Νταντάλεν ντα Νταγιάλεν​—Σικλιαρέν Τουμαρέ Τσσαβέν τι Μανγκέν ι Ιεχωβάς

1. Σο μουκχέλα ο Ιεχωβά κο βαστά κι νταντένγκε ντα κι νταΐνγκε;

Ο ΙΕΧΩΒΑ τσσουντάς κο γκι κι πρώτε μουρσέσκο ντα κι πρώτε τζουβλιάκο τι μανγκέν τι κερέν τσσαβέν. Άκ’ σόσκε η Αγία Γραφή βακερέλα: «Ο τσσαβέ ισί κληρονομιά κατά Ιεχωβά». (Ψαλμ. 127:3, υποσ.) Σο μανγκέλα τι βακερέλ ανταβά; Βακερέν ότι τουμαρό λατσσό αμάλ ντέλα-τουμέν μπουτ λοβέ για τι γκεραβέν-λεν λέσκε. Σαρ κα νιωθίνενας; Μάλλον κα χαιρίνενας σο ντέλα τουμένγκε μπέσα. Αλλά κα νταρένας-ντα μα τι χασαρέν-λεν. Αμαρό πιο λατσσό Αμάλ, ο Ιεχωβά, ντέλα κο νταντά ντα κο νταγιά κάτι σο τθερέλα πιο μπαρί αξία κατά λοβέ. Μουκχέλα λένγκε βαστέντε ι τσσαβέν ντα μανγκέλα λένταρ τι αρακχαβέν-λεν λατσσές για τι αβέν ευτυχισμέ.

2. Καλά ερωτήσεις κα ντικχάς;

² Κον πρέπει τι αποφασίνελ άμα εκ αντρόγυνος κα κερέλ τσσαβέν ντα κάνα κα κερέλ-λεν; Ντα σαρ κα βοηθίνεν ο νταντά ντα ο νταγιά πουμαρέ τσσαβέν τι τζουβντιόν ευτυχισμέ; Ντικχέν χάνικ λάφια ι Γραφιάκε σο κα βοηθίνεν ι ρομές ντα ι ρομνιά τι λεν λατσσέ αποφάσεις.

ΤΙ ΣΕΒΑΝΕΝ Ι ΑΠΟΦΑΣΗ Ι ΡΟΜΕΣΚΙ ΝΤΑ Ι ΡΟΜΝΙΑΚΙ

3. (α) Κον πρέπει τι αποφασίνελ άμα εκ ρομ ντα εκ ρομνί κα κερέν τσσαβέν; (β) Καβά λάφι ι Γραφιάκο πρέπει τι τθερέν πουμαρέ γκοντιάτε ο αμαλά ντα ο τζενέ ι αντρογυνόσκε;

³ Μερικέ τθεμέντε, μανγκένα οντουλένταρ σο παντρίνενα τι κερέν τσσαβέν καζόμ πιο σουγκό αβέλα-πες. Λένγκε τζενέ ντα γιαβερά μπορεί τι ζορισκιαρέν-λεν τι κερέν-λες ανταβά. Ο Τζέθρο, εκ πφραλ κι Ασία, βακερέλα: «Κι κχανγκιρί, ισί πφραλά σο τθερένα τσσαβέν ντα ζορισκιαρένα οντουλέν σο να τθερένα τι κερέν βον-ντα». Ο Τζέφρι, εκ γιαβέρ πφραλ σο τζουβντιόλα κι Ασία, βακερέλα: «Ισί τζενέ σο βακερένα οντουλένγκε σο να τθερένα τσσαβέν ότι να κα τθερέν καεκχές τι αρακχαβέλ-λεν κάνα κα πφουριόν». Ο ρομ ντα η ρομνί πρέπει τι αποφασίνεν κορκορέ άμα κα κερέν τσσαβέν. Ι απόφαση κα λεν-λα βον. Ισί λένγκι ευθύνη. (Γαλ. 6:5, υποσ.) Αγαβάσα ότι ο αμαλά ντα ο τζενέ ι νεβέ αντρογυνόσκε μανγκένα τι ντικχέν-λεν ευτυχισμέ. Αλλά σαρέ πρέπει τι ντεν-πες γκοντί ότι ο ρομ ντα η ρομνί ισί οντουλά σο κα αποφασίνεν άμα κα κερέν τσσαβέν.​—1 Θεσ. 4:11.

4, 5. Καλέ ντουέ πραγματένγκε πρέπει τι κερέλ λάφι ο ρομ ντα η ρομνί, ντα κάνα ισί πιο λατσσές τι κερέν-λες ανταβά; Εξηγίνεν.

⁴ Οντουλά σο αποφασίνενα τι κερέν τσσαβέν ισί λατσσό τι κερέν λάφι ντουέ σημαντικέ πραγματένγκε: Πρώτον, κάνα μανγκένα τι κερέν τσσαβέν; Δεύτερον, καζομέ τσσαβέν μανγκένα τι κερέν; Κάνα ισί πιο λατσσές τι κερέν λάφι ανταλένγκε; Ντα σόσκε ισί ανταλά ντούι πράγματα αζόμ σημαντικά;

⁵ Ο πιο μπουτ φαρ, ο ρομ ντα η ρομνί ισί λατσσό τι κερέν λάφι ανταλέ πραγματένγκε πριν τι παντρίνεν. Σόσκε; Επειδή ισί μπουτ σημαντικός τι τθερέν ι ίδια άποψη ανταλέ πραγμάσκε. Ντα πρέπει τι ντικχέν άμα ισί έτοιμοι ανταλέσκε. Μερικοί σο παντρίνενα αποφασιντέ τι μπεκλεντίνεν εκ ή ντούι μπρεσά ντα σοράν τι κερέν τσσαβέν, σόσκε αγαβένα ότι για τι μπαριαρέν πουμαρέ τσσαβέν κα ντεν μπουτ πουμαρέ σαατίσταρ ντα πουμαρέ ζοριάταρ. Πακιάνα ότι, άμα κα μπεκλεντίνεν χάνικ, κα τθερέν πιο μπουτ χρόνος τι σικλιόν τι τζουβντιόν ο εκ ι γιαβερέσαρ ντα τι αβέν πιο πασέ ο εκ κο γιαβέρ.​—Εφεσ. 5:33.

6. Σο αποφασιντέ τι κερέν μερικοί ανταλέ ντιβεσέντε σο τζουβντιάσα;

⁶ Γιαβερά Χριστιανοί τραμπιντέ τι σικλιόν κατά παράδειγμας σο μουκχλέ ο τριν τσσαβέ ι Νωέσκε ντα λένγκε ρομνιά. Βον να κερντέ σουγκό τσσαβέν. (Γέν. 6:​18· 9:​18, 19· 10:1· 2 Πέτρ. 2:5) Ο Ιησούς βακερντάς ότι αμαρέ ντιβεσά ισί σαρ ο «ντιβεσά σο τζουβντιόλας ο Νώε», ντα τζανάσα μπουτ λατσσές ότι αμαρέ ντιβεσά ισί «δύσκολα ντα επικίνδυνα». (Ματθ. 24:​37· 2 Τιμ. 3:1) Οντουλέσκε, ισί τζενέ σο αποφασίνενα τι κερέν τσσαβέν πιο σοράν για τι τθερέν πιο μπουτ σαάτι τι νικιόν κο έργος.

7. Σαρ κα βοηθίνεν εκχέ αντρογυνός ο εδάφια Λουκάς 14:​28, 29 ντα Παροιμίες 21:5;

⁷ Κάνα αποφασίνενα άμα κα κερέν τσσαβέν ντα καζομέν κα κερέν, εκ γκοντιαβέρ ρομ ντα ρομνί “σκεφτίνενα καζόμ κα χαλαβέν”. (Διαβάνεν Λουκάς 14:​28, 29) Οντουλά σο τθερένα μπαριαρντό τσσαβέν βακερένα ότι για τι κερές-λες ανταβά, να ντέσα σάντε τι λοβένταρ, αλλά εμ τι σαατίσταρ ντα τι ζοριάταρ. Οτθάρ, ισί σημαντικός εκ ρομ ντα εκ ρομνί τι πουτσέν-πες: “Κα χρειαζίντιβελ τι κεράς μπουτί ο ντούι-ντα για τι τθεράς ο αναγκαία ι φαμιλιάκε; Συμφωνίνασα καλά ισί ο «αναγκαία»; Άμα κα χρειαζίντιβελ τι κεράς μπουτί ο ντούι-ντα, κον κα αρακχαβέλ αμαρέ τσσαβέν; Κον κα σικλιαρέλ-λεν σο τι σκεφτίνεν ντα σο τι κερέν;” Κάνα ο ρομ ντα η ρομνί κερένα λάφι ανταλέ πραγματένγκε, κερένα οντουβά σο βακερέλα ο εδάφιος Παροιμίες 21:5.​—Διαβάνεν.

8. Καλά δυσκολίες μπορεί τι τθερέλ ο ρομ ντα η ρομνί, ντα σο κα κερέλ εκ λατσσό ρομ;

⁸ Εκ τσσαβό μανγκέλα ντα αξίνελα ο σαάτι ντα ι ζορ πι νταντέσκι ντα πι νταγιάκι. Οντουλέσκε, άμα κερντέν μπερεκέτι τσσαβέν πας πασέ, μπορεί τι αβέλ δύσκολος τουμένγκε τι ντεν σαρέ κο τσσαβέ ι προσοχή σο χρειαζίντιβελα. Μερικά ζευγάρια σο τθερένας μπερεκέτι χουρντέν βακερντέ ότι να τζανένας σο τι κερέν. Εκ ντάι μπορεί τι νιωθίνελ ότι χασαρέλα σαρί πι ζορ. Μπορεί μα τι τθερέλ ζορ τι σικλιαρέλ-πες, τι προσευχίντιβελ ντα τι τζαλ κο έργος. Εκ γιαβέρ πρόβλημας ισί άμα κα μπορίνελ τι ασουνέλ κο συναθροίσεις ντα τι βοηθίντιβελ λένταρ. Σίγουρα, εκ λατσσό ρομ κα κερέλ σο νακχέλα λέσκε βαστένταρ για τι βοηθίνελ πι ρομνιά ι χουρντέντζαρ, εμ κο συναθροίσεις εμ κο κχερ. Για παράδειγμας, κα αβέλας λατσσό τι βοηθίνελ-λα κο μπουτιά κι κχερέσκε. Κα κερέλ ο πιο λατσσό για τι βοηθίντιβεν σαρέ κατά Φαμιλιάκι Λατρεία κάθε εβδομάδα ντα κα νικιόλ πι φαμιλιάσαρ κο έργος.

ΣΙΚΛΙΑΡΕΝ ΤΟΥΜΑΡΕ ΤΣΣΑΒΕΝ ΤΙ ΜΑΝΓΚΕΝ Ι ΙΕΧΩΒΑΣ

9, 10. Σο πρέπει τι κερέν ο νταντά ντα ο νταγιά για τι βοηθίνεν πουμαρέ τσσαβέν;

⁹ Καλά ισί μερικά πράγματα σο μπορίνενα τι κερέν ο νταντά ντα ο νταγιά για τι σικλιαρέν πουμαρέ τσσαβέν τι μανγκέν ι Ιεχωβάς; Σαρ κα αρακχαβέν πουμαρέ τσσαβέν ανταλέ πφιρνέ ντουνιάσταρ; Ντικχέν οντουλά σο ισί πιο τελέ.

¹⁰ Τι μανγκέν ι βοήθεια ι Ιεχωβάσκι αντράλ κατά προσευχή. Ανέν τουμαρέ γκοντιάτε ι Μανωές ντα λέσκε ρομνιά, σο κερντέ εκχέ τσσαβές, σο λέσκο ναβ ισινέ Σαμψών. Κάνα ο Μανωέ λιντάς αμπέρι ότι λέσκι ρομνί κα κερέλας τσσαβές, μολιντάς ι Ιεχωβάς τι σικαβέλ λένγκε σαρ τι μπαριαρέν-λες.

11. Σαρ κα σικλιόν ο νταντά ντα ο νταγιά κατά παράδειγμας ι Μανωέσκο σαρ ντικχάσα-λες κο εδάφιος Κριτές 13:8;

¹¹ Ο Νίχαντ ντα η Άλμα κατά Βοσνία-Ερζεγοβίνη σικλιλέ κατά παράδειγμας ι Μανωέσκο. Βον βακερένα: «Σαρ ο Μανωέ, αντικάς αμέν-ντα μολίναας ι Ιεχωβάς τι σικλιαρέλ-αμέν σαρ τι μπαριαράς λατσσές αμαρέ τσσαβές. Ο Ιεχωβά απαντίνελας αμαρέ προσευχιέντε μπουτέ τροπόντζαρ​—αντράλ κατά Γραφή, κατά έντυπα, κατά συναθροίσεις ντα κατά συνελεύσεις».​—Διαβάνεν Κριτές 13:8.

12. Σο παράδειγμας μουκχλάς ο Ιωσήφ ντα η Μαρία πουμαρέ τσσαβένγκε;

¹² Τι σικλιαρέν-λεν οντουλέντζαρ σο κερένα. Τουμαρέ λάφια ισί σημαντικά, αλλά οντουλά σο κερένα κα επηρεάνεν πιο μπουτ τουμαρέ τσσαβέν. Μπορίνασα τι αβάς σίγουροι ότι ο Ιωσήφ ντα η Μαρία μουκχλέ μπουτ σουκάρ παράδειγμας πουμαρέ τσσαβένγκε, ατζέ-ντα ι Ιησούσκε. Ο Ιωσήφ κερέλας πφαρί μπουτί για τι νικαβέλ πι φαμιλιάκο μαντρό. Ντα βοηθίνελας πι φαμιλί τι εκτιμίνελ ι Ντεβλέσκε πράγματα. (Δευτ. 4:9, 10) Παρόλο σο ο Νόμος να βακερέλας ότι εκ τζενό έπρεπε τι λελ παλά-πέστε σαρί πι φαμιλί «κάθε μπρες» κι Ιερουσαλήμ για τι κερέν ο Πάσχας, ο Ιωσήφ κερέλας-λες ανταβά. (Λουκ. 2:​41, 42) Μερικά νταντά κο μπρεσά κι Ιησούσκε μπορεί τι βακερένας ότι άμα κα λένας παλάλ σαρί ι φαμιλί κα κχινιόνας μπουτ, κα χασαρένας μπουτ σαάτι ντα κα χαλαβένας μπουτ λοβέ. Αλλά ντικχίντιβελα ότι ο Ιωσήφ εκτιμίνελας ι Ντεβλέσκε πράγματα ντα σικλιαρέλας πι τσσαβέν-ντα τι κερέν-λες ανταβά. Η Μαρία τζανέλας βόι-ντα λατσσές ι Γραφή. Οντουλέντζαρ σο βακερέλας ντα κερέλας, σικλιαρντάς πι τσσαβέν τι μανγκέν ο Λάφι ι Ντεβλέσκο.

13. Σο κερντάς εκ ρομ ντα εκ ρομνί για τι αβέλ σαρ ο Ιωσήφ ντα η Μαρία;

¹³ Ο Νίχαντ ντα η Άλμα μανγκένας τι αβέν σαρ ο Ιωσήφ ντα η Μαρία. Σαρ βοηθιντάς-λεν ανταβά τι σικλιαρέν πουμαρέ τσσαβές τι μανγκέλ ντα τι υπηρετίνελ ι Ντεβλές καζόμ μπαριαρένας-λες; Βον βακερένα: «Αμαρέ ζωγιάσαρ, προσπαθίναας τι σικαβάς αμαρέ τσσαβέσκε καζόμ λατσσό ισί τι τζουβντιάς σαρ βακερέλα ο Ιεχωβά». Ο Νίχαντ βακερέλα: «Τι αβέν τουμέν αντικάς σαρ μανγκένα τι αβέλ τουμαρό τσσαβό».

14. Σόσκε πρέπει τι τζανέν ο νταντά ντα ο νταγιά σο αμαλέν τθερένα λένγκε τσσαβέ;

¹⁴ Τι βοηθίνεν τουμαρέ τσσαβέν τι τραμπίνεν λατσσέ αμαλέν. Εμ η ντάι εμ ο ντατ, πρέπει τι τζανέν σο αμαλέν τθερένα λένγκε τσσαβέ ντα σο πράγματα κερένα. Ανταβά μανγκέλα τι βακερέλ τι τζανέν κάσαρ κερένα λάφι λένγκε τσσαβέ κο κοινωνικά δίκτυα ντα κο κινητός. Οντουλά αμαλά επηρεάνενα ο τρόπος σο σκεφτίνενα ο τσσαβέ ντα οντουλά σο κερένα.​—1 Κορ. 15:33.

15. Σο σικλιόνα ο νταντά ντα ο νταγιά κατά Τζέσι;

¹⁵ Σο κα κερέν ο νταντά ντα ο νταγιά άμα να τζανένα μπουτ για το υπολογιστές, για το τάμπλετ ή για το κινητά; Ο Τζέσι, εκ ντατ κατά Φιλιππίνες, βακερέλα: «Να τζανάας μπουτ για την τεχνολογία. Αλλά ανταβά να τσσιναντάς-αμέν τι βακεράς αμαρέ τσσαβένγκε σο ζιάνι μπορεί τι κερέν ο ηλεκτρονικές συσκευές». Ο Τζέσι να βακερντάς πι τσσαβένγκε μα τι χρησιμοποιήνεν ασακέ συσκευές επειδή βοβ να τζανέλας μπουτ λένγκε. Βοβ βακερέλα: «Βακεράβας μι τσσαβένγκε τι χρησιμοποιήνεν πουμαρέ ηλεκτρονικές συσκευές για τι σικλιόν εκ γιαβέρ τσσιπ, τι ετοιμάνεν-πες ι συναθροισιένγκε ντα τι διαβάνεν ι Γραφή κάθε ντιβές». Άμα τθερένα τσσαβέν, διαβαντέν ντα κερντέν λάφι λέντζαρ για το λατσσέ συμβουλές σο ισί κι ενότητα «Έφηβοι» κο ιστότοπος jw.org^® ντα σο τθερένα τι κερέν ι μηνυματέντζαρ ντα ι φωτογραφιέντζαρ σο βάντενα; Ντικχλέν λέντζαρ ο βίντεα Ποιος Έχει τον Έλεγχο​—Εσύ ή οι Συσκευές Σου; ντα Χρησιμοποιείς Έξυπνα τα Κοινωνικά Δίκτυα;b Σαρέ ανταλά κα βοηθίνεν-τουμέν τι σικλιαρέν τουμαρέ τσσαβέν σαρ τι χρησιμοποιήνεν ο ηλεκτρονικές συσκευές γκοντιάσαρ.​—Παρ. 13:20.

16. Σο κερντέ μπουτ νταντά ντα νταγιά, ντα σο αβιλό-πες;

¹⁶ Μπουτ νταντά ντα νταγιά κερένα ο πιο λατσσό για τι αβέν λένγκε τσσαβέ τζενέντζαρ σο υπηρετίνενα πιστά ι Ντεβλές. Για παράδειγμας, ο Εντένι ντα η Μπόμιν, σο τζουβντιόνα κι Ακτή Ελεφαντοστού, βακερένας μπουτ φαρ κο επίσκοπος περιοχής τι μπεσέλ λένγκε κχερέστε. Ο Εντένι βακερέλα: «Ανταβά κερντάς μπαρό λατσσιπέ αμαρέ τσσαβέσκε. Λιντάς ο σκαπανικός ντα ακανά μπουτσσάντιβελα κο κχανγκιριά κάνα ναστί τζάλα ο επίσκοπος περιοχής». Κα μπορίνενας τουμέν-ντα τι βοηθίνεν τουμαρέ τσσαβέν τι κερέν ασακέ λατσσέ αμαλέν;

17, 18. Κάνα πρέπει τι αρχίνεν ο νταντά ντα ο νταγιά τι σικλιαρέν πουμαρέ τσσαβέν;

¹⁷ Αρχίνεν τι σικλιαρέν τουμαρέ τσσαβέν καζόμ πιο σουγκό αβέλα-πες. Καζόμ πιο σουγκό αρχίνενα ο νταντά ντα ο νταγιά τι σικλιαρέν πουμαρέ τσσαβέν, αζόμ πιο λατσσές ισί. (Παρ. 22:6) Ανέν τουμαρέ γκοντιάτε ι Τιμοθεός, σο τζάλας μπουτέ τθεμέντε ι Παυλόσαρ κάνα μπαριλό. Η ντάι ι Τιμοθεόσκι, η Ευνίκη, ντα λέσκι μπάμπα, η Λωίδα, σικλιαρντέ-λες «χουρντιαρέλα».​—2 Τιμ. 1:5· 3:15.

¹⁸ Εκ γιαβέρ αντρόγυνος κι Ακτή Ελεφαντοστού, ο Ζαν-Κλοντ ντα η Πις, καζόμ μπαριαρένας πουμαρέ σιοβέ τσσαβέν, μπορισάλε τι σικλιαρέν-λεν τι μανγκέν ι Ιεχωβάς ντα τι υπηρετίνεν-λες. Σο βοηθιντάς-λεν; Κερντέ οντουβά σο κερντάας η Ευνίκη ντα η Λωίδα. Βον βακερένα: «Τσσουβάας χάνικ χάνικ αμαρέ τσσαβένγκε γκίστε ο Λάφι ι Ντεβλέσκο χουρντιαρέλα μπερί, χάνικ πιο σοράν λένγκε μπιανιμάσταρ».​—Δευτ. 6:6, 7.

19. Σο μανγκέλα τι βακερέλ τι τσσουβέν χάνικ χάνικ ο Λάφι ι Ντεβλέσκο κο γκι τουμαρέ τσσαβένγκο;

¹⁹ Σο μανγκέλα τι βακερέλ τι “τσσουβέν χάνικ χάνικ” ο Λάφι ι Ιεχωβάσκο κο γκι τουμαρέ τσσαβένγκο; Ο λάφι «τσσουβάβα χάνικ χάνικ» μανγκέλα τι βακερέλ «σικλιαράβα ντα βακεράβα εκ λάφι μπουτ φαρ για τι ατσσόλ κι γκοντί εκχέ τζενέσκι». Για τι κερέν-λες ανταβά ο νταντά ντα ο νταγιά, χρειαζίντιβελα τι ντεν συχνά πουμαρέ σαατίσταρ για τι αβέν πουμαρέ τσσαβέντζαρ. Μπάζιμα, μπορεί τι χασαρέν πουμαρί ζορ κάνα βακερένα μπουτ φαρ πουμαρέ τσσαβένγκε ο ίδια λάφια. Αλλά πρέπει τι αγαβέν ότι αντικάς κα βοηθίνεν πουμαρέ τσσαβέν τι σικλιόν ο Λάφι ι Ντεβλέσκο ντα τι κερέν-λες πουμαρέ ζωγιάτε.

20. Εξηγίνεν σαρ ταιριάνελα ο εδάφιος Ψαλμός 127:4 κι τσσαβένγκο μπαριαριπέ.

²⁰ Τι τζανέν λατσσές τουμαρέ τσσαβέν. Ο Ψαλμός 127 βακερέλα ότι ο τσσαβέ ισί σαρ βέλη. (Διαβάνεν Ψαλμός 127:4) Ο βέλη νανέ κερντέ σαρέ εκχέ πραγμάσταρ, μερικά ισί μπαρέ ντα γιαβερά χουρντέ. Αντικάς κάθε τσσαβό-ντα ισί διαφορετικός. Οντουλέσκε, ο νταντά ντα ο νταγιά πρέπει τι αγαβέν σαρ πρέπει τι σικλιαρέν ι κάθε τσσαβές. Εκ αντρόγυνος κατά Ισραήλ, σο καζόμ μπαριαρένας πουμαρέ ντουέ τσσαβέν σικλιαρντέ-λεν τι υπηρετίνεν ι Ιεχωβάς, βακερέλα σο βοηθιντάς-λεν: «Κεράας μελέτη ι κάθε εκχές ξεχωριστά». Σίγουρα, ο σορό ι κάθε φαμιλιάκο κα αποφασίνελ άμα πρέπει ή μπορίνενα τι κερέν-λεν μελέτη αντικάς.

Ο ΙΕΧΩΒΑ ΚΑ ΒΟΗΘΙΝΕΛ-ΤΟΥΜΕΝ

21. Καγιά βοήθεια μπορίνενα τι μπεκλεντίνεν ο νταντά ντα ο νταγιά κατά Ιεχωβά;

²¹ Ο νταντά ντα ο νταγιά μπάζιμα δυσκολίντιβενα μπουτ τι σικλιαρέν πουμαρέ τσσαβέν, αλλά ο τσσαβέ ισί δώρος κατά Ιεχωβά. Βοβ πάντα ισί έτοιμος τι βοηθίνελ. Ασουνέλα λένγκε προσευχές. Απαντίνελα οντουλέ προσευχιέντε αντράλ κατά Γραφή, κατά έντυπα ντα πφραλένταρ σο τθερένα μπαριαρντό τσσαβέν.

22. Καλά ισί μερικά κατά πιο λατσσέ πράγματα σο μπορίνενα τι ντεν ο νταντά ντα ο νταγιά πουμαρέ τσσαβέντε;

²² Μερικά τζενέ βακερένα ότι ατσσικιαρέλα 20 μπρεσά ο μπαριαριπέ εκχέ τσσαβέσκο, αλλά κι πραγματικότητα ο νταντά ντα ο νταγιά πάντα κα αβέν ντατ ντα ντάι πουμαρέ τσσαβένγκε. Μερικά κατά πιο λατσσέ πράγματα σο μπορίνενα τι ντεν πουμαρέ τσσαβέντε ισί πουμαρί αγάπη, πουμαρό σαάτι ντα ο σικλιαριπέ ι Γραφιάκο. Ο κάθε τσσαβό μανγκέλα γιαβέρ τρόπος για τι σικλιόλ. Όμως, μπουτ οντουλένταρ σο μπαριλέ νταντέσταρ ντα νταγιάταρ σο μανγκένα ι Ιεχωβάς νιωθίνενα σαρ η Τζοάνα-Μέι, εκ πφεν σο τζουβντιόλα κι Ασία: «Καζόμ ανάβα μι γκοντιάτε ο σικλιαριπέ σο λιντόμ μι νταντέσταρ ντα μι νταγιάταρ, νιωθίναβα μπαρί εκτίμηση σο διορθώνενας-μαν ντα σο σικλιαρντέ-μαν τι μανγκάβ ι Ιεχωβάς. Να ντινέ-μαν απλά ζωή, αλλά εκ πφερντί ζωή». (Παρ. 23:​24, 25) Εκατομμύρια πφραλά ντα πφενιά νιωθίνενα βον-ντα αντικάς.