Σικλιλόμ Κατά Λατσσέ Παραδείγματα ντα Ευλογισάλομ Μπουτ

Μπιάντιλομ κο Καναδάς, κι Πόλη του Κεμπέκ, σο οτθέ ο τζενέ κερένα λάφι γαλλικά. Μο ντατ ντα μι ντάι, ο Λουί ντα η Ζέλια, μπαριαρντέ-μαν μανγκιμάσαρ. Μο ντατ ισινέ γκιντιμέ τζενό ντα μπεϊντίνελας τι διαβάνελ. Με μπεϊντίναβας τι γραφίναβ ντα μανγκάβας μπουτ εκ ντιβές τι αβάβ δημοσιογράφος.

Κάνα ισινόμας περίπου 12 μπρεσένγκο, εκ τζενό σο κερέλας μπουτί μι νταντέσαρ, ο Ροντόλφ Σουσί, αβιλό αμαρέ κχερέστε πι αμαλέσαρ. Ισινέ Μάρτυρες ι Ιεχωβάσκε. Να τζανάβας μπουτ ι Μαρτυρένγκε ντα να χάλας-μαν ανάγκη λένγκε θρησκειάκε. Αλλά ο λογικές απαντήσεις σο ντένας αντράλ κατά Γραφή μουκχλέ-μαν πουταρντέ μόσαρ. Εμ μο ντατ εμ μι ντάι ατσσιλέ πουταρντέ μόσαρ, ντα αρχισάλαμ μελέτη.

Αζομάν, τζάβας εκχέ σχολειόστε σο τθερέλας η Καθολική Κχανγκιρί. Μπάζιμα, κεράβας λάφι ι γιαβερέ τσσαβέντζαρ οντουλένγκε σο σικλιάβας κατά Γραφή. Τελικά, λιντέ-λες αμπέρι μο καθηγητές σο ισινέ παπάζια. Όχι σάντε να σικαντέ μάνγκε κατά Γραφή ότι μο λάφια να ισινέ σωστά, αλλά εκ λένταρ κατηγοριντάς-μαν ανγκλάλ σαριλέντε ότι τζάβας λέντζαρ κόντρα! Οντουβά σο αβιλό-πες στεναχωριντάς-μαν, αλλά ο αποτελέσματα ισινέ λατσσέ σόσκε αγαντόμ ότι οντουλά σο σικλιάβας κο σχολείος τζάνας κόντρα ι Γραφιάσαρ. Αγαντόμ ότι έπρεπε τι τσσιναβάβ οντουλέ σχολειόσταρ. Πουτσλόμ μι νταντές ντα μι νταγιά ντα βον μουκχλέ-μαν τι τζαβ γιαβερέ σχολειόστε.

ΣΙΚΛΙΑΒΑ ΤΙ ΜΑΝΓΚΑΒ Ο ΕΡΓΟΣ

Κεράβας μελέτη, αλλά να κεράβας μπουτ πράγματα κι αλήθεια σόσκε νταράβας τι κεράβ έργος κχερ κχερέστε. Η Καθολική Κχανγκιρί, σο επηρεάνελας μπουτ ι τζενέν, τζάλας μπουτ μπαρί κόντρα κο έργος. Ο Μορίς Ντιπλεσί, ο πρωθυπουργός κο Κεμπέκ, τσσίντελας κατά κχανγκιρί. Τσσουβέλας τζενέν τι ανέν προβλήματα κο πφραλά ή ατζέ-ντα τι χαν-πες λέντζαρ. Οντουλά ντιβεσά, έπρεπε τι αβές μπαγιά μπίνταρανο για τι κερές ο έργος.

Εκ πφραλ σο βοηθιντάς-μαν μα τι νταράβ ισινέ ο Τζον Ρέι, σο νακχλάας ι τάξη 9 κι Σχολή Γαλαάδ. Τζανέλας μπουτ πράγματα, ισινέ κοβλέ γκίσκο, ταπεινός ντα να λατζάας τι κερές λέσαρ λάφι. Μπουτ χάνικ φαρ ντέλας-μαν συμβουλή, αλλά σικλιλόμ μπουτ πράγματα λέσκε λατσσέ παραδειγμάσταρ. Μαρέλας-πες τι κερέλ λάφι γαλλικά, οτθάρ τζάβας λέσαρ μπουτ φαρ κο έργος ντα βοηθίναβας-λες. Η παρέα σο κερντόμ λέσαρ βοηθιντάς-μαν τι τσσίνταβ μπίνταρανες κατά αλήθεια. Μπολντιλόμ 26 Μαΐου 1951, κάνα νακχλέας ντες μπρεσά οτθάρ μπερί σο κερντόμ πρώτη φαρ λάφι ι Μαρτυρέντζαρ.

Αμαρέ χουρντέ κχανγκιριάτε κι Πόλη του Κεμπέκ ο πιο μπουτ πφραλά ντα πφενιά ισινέ σκαπανείς. Λένγκο λατσσό παράδειγμας κερντάς-μαν τι λαβ με-ντα ο σκαπανικός. Αζομάν κεράας έργος κχερ κχερέστε σάντε ι Γραφιάσαρ. Να τθεράας έντυπα, οτθάρ έπρεπε τι χρησιμοποιήνας ι Γραφή πιο λατσσές. Οντουλέσκε μαρντόμ-μαν τι σικλιάβ εδάφια για τι σικαβάβ κο τζενέ ι αλήθεια. Όμως, μπουτ τζενέ να μανγκένας τι διαβάνεν ούτε εκ εδάφιος άμα να ισινέ κατά Γραφές σο τθερέλας η Καθολική Κχανγκιρί.

Κο 1952, παντρισάλομ με τη Σιμόν Πατρί, σο ισινέ εκ πιστή πφεν μι κχανγκιριάταρ. Γκιλάμ τι μπεσάς κο Μόντρεαλ ντα αντρέ εκχέ μπρεσέστε κερντάμ εκχέ τσσαγιά σο τσσουντάμ λάκε Λιζ. Παρόλο σο τσσιναντόμας ο σκαπανικός πριν τι παντρίναβ, η Σιμόν ντα με προσπαθίναας τι ατσσικιαράς απλή αμαρί ζωή για τι κεράς σαρ φαμιλί καζόμ πιο μπουτ πράγματα αβέλας-πες αμαρέ κχανγκιριάτε.

Νακχλέ ντες μπρεσά για τι σκεφτίναβ σοβαρά τι κεράβ πιο μπουτ κο έργος. Κο 1962, νακχλόμ ι Σχολή Διακονίας της Βασιλείας ι πρεσβυτερόνγκε κο Μπέθελ κι Καναδάσκο. Αζομάν η σχολή ατσσικιαρέλας εκ μάσεκ, ντα τσσουντέας-μαν κο ίδιος δωμάτιος εκχέ πφραλέσαρ σο βακερένας λέσκε Καμίλ Ουελέτ. Κερντάς μάνγκε μπαρί εντύπωση καζόμ μπουτ πφαμπόλας ο Καμίλ ι εργόσκε, παρόλο σο πουταρντάας φαμιλί-ντα. Οντουλά μπρεσά, μπουτ χάνικ πφραλά κο Κεμπέκ κερένας σκαπανικός καζόμ μπαριαρένας εκχέ τσσαβές. Αλλά ανταβά μανγκέλας τι κερέλ ο Καμίλ. Καζόμ μπεσάας γιεκ, βακερντάς μάνγκε τι σκεφτίναβ σαρ ισί ο πράγματα μι ζωγιάτε. Χάνικ μάσεκ πιο σοράν, αγαντόμ ότι κα μπορίναβας τι λαβ πάλι ο τακτικός σκαπανικός. Ισινέ τζενέ σο βακερένας ότι να λιντόμ λατσσί απόφαση, αλλά με να ατσσιλόμ λένγκε λαφίντε, ισινόμας σίγουρος ότι ο Ιεχωβά κα βοηθίνελας-μαν τι κεράβ πιο μπουτ κο έργος.

ΒΟΥΡΤΙΝΑΣΑ ΚΙ ΠΟΛΗ ΤΟΥ ΚΕΜΠΕΚ ΣΑΡ ΕΙΔΙΚΟΙ ΣΚΑΠΑΝΕΙΣ

Κο 1964, η Σιμόν ντα με μπουτσσάντιλαμ αμαρέ τθεμέστε, κι Πόλη του Κεμπέκ, σαρ ειδικοί σκαπανείς ντα οτθέ υπηρετιντάμ μπουτ μπρεσά. Οντουλά μπρεσά ισινέ πιο εύκολος τι κεράς ο έργος, αλλά ισινέ ατζέ τζενέ σο τζάνας αμέντζαρ κόντρα.

Εκ Σάββατος απόγευμας, ασταρντέ-μαν κι χουρντί πόλη Σεντ-Μαρί, πασέ κι Πόλη του Κεμπέκ. Εκ ασκέρι γκερντάς-μαν κο τμήμας ντα τσσουντάς-μαν κο κρατητήριος επειδή κεράβας έργος κχερ κχερέστε χωρίς άδεια. Σοράν, γκερντέ-μαν ανγκλάλ εκχέ δικαστίστε σο βακερένας λέσκε Μπαϊγιαρζόν, ντα νταρέας τι ντικχές-λες. Πουτσλάς-μαν κον κα αβέλας μο δικηγόρος. Κάνα βακερντόμ ο ναβ Γκλεν Χάου,a βακερντάς χολιάσαρ: «Όχι βοβ!» Ι πφραλές Γκλεν Χάου τζανένας-λες σαρέ επειδή βοηθιντάας μπουτέ πφραλέν κο δικαστήρια. Μπουτ σουγκό, ο δικαστήριος βακερντάς μάνγκε ότι ο κατηγορίες λιντιλέας παλάλ.

Εκ γιαβέρ πρόβλημας σο αντάς η κόντρα σο τζάνας αμέντζαρ ο τζενέ κο Κεμπέκ ισινέ ότι ναστί αρακχάας λατσσέ τθανά ι συναθροισιένγκε. Αμαρέ χουρντέ κχανγκιριάκε αρακχλάμ σάντε εκ πουρανό γκαράζ σο να ισινέ τατιμάσκο. Για τι τατιάς χάνικ αντρέ κο μπουτ σιλ κι βεντέσκο, τσσουβάας εκ σόμπα πετρελαιόσκι. Μπουτ φαρ γκιντίντιβαας ντονταλάι κατά σόμπα χάνικ σαάτια πριν κατά συνάθροιση ντα βακεράας εμπειρίες για τι ντας ζορ ο εκ ι γιαβερές.

Ισί μπουτ σουκάρ τι ντικχάς καζόμ μπουτ πράγματα αβιλέ-πες κο έργος σαρέ ανταλά μπρεσά. Κο μπρεσά σοράν κατά 1960, κι Πόλη του Κεμπέκ, κο Κοτ Νορ, κι χερσόνησος Γκασπέ ντα κο τθεμά πασέ λέντε ισινέ σάντε χάνικ χουρντέ κχανγκιριά. Αντιβές, τθεράσα οτθέ ντούι περιοχές μπουτέ πφραλέντζαρ, ντα ο κχανγκιριά κερένα συναθροίσεις σουκάρ Αιθουσέντε.

ΤΖΑΒΑ ΤΘΑΝ ΤΘΑΝΕΣΤΕ ΣΑΡ ΕΠΙΣΚΟΠΟΣ

Κο 1970, βακερντέ κι Σιμόν ντα μάνγκε τι υπηρετίνας κο έργος περιοχής. Κο 1973, μπουτσσαντέ-αμέν κο έργος περιφερείας. Οντουλά μπρεσά, σικλιλόμ μπουτ πράγματα πφραλένταρ σαρ ισινέ ο Λοριέ Σομίρb ντα ο Ντέιβιντ Σπλέιν,c σο ισινέ ο ντούι-ντα επίσκοποι σο τζάνας τθαν τθανέστε. Σοράν κατά συνελεύσεις με ντα ο Ντέιβιντ ντάας συμβουλές ο εκ κο γιαβέρ για τι σικλιαράς πιο λατσσές. Ντάβα-μαν γκοντί σο βακερντάς μάνγκε εκ φαρ: «Λεόνς, μπεϊντιντόμ τι τελευταία ομιλία. Ισινέ μπουτ σουκάρ, αλλά με κα νικαβάβας τριν ντανέ ομιλίες σαρέ οντουλέ λαφίντζαρ!» Πφεράβας μο ομιλίες μπουτέ λαφίντζαρ. Έπρεπε τι σικλιάβ τι βακεράβ πιο χάνικ λάφια.

Ο επίσκοποι περιφερείας μπουτσσάντιβενας τι ντεν ζορ κο επίσκοποι περιοχής. Όμως, μπουτ πφραλά κο Κεμπέκ τζανένας-μαν λατσσές. Μπουτ φαρ μανγκένας τι νικιόν μάντζαρ κο έργος κάνα τζάβας κο περιοχές. Μπεϊντίναβας μπουτ σο νικιάβας κο έργος λέντζαρ ντα αντικάς να ντάβας μι σαατίσταρ κο επίσκοπος περιοχής. Εκ φαρ, εκ επίσκοπος περιοχής βακερντάς μάνγκε: «Ισί λατσσό σο ντέσα τι σαατίσταρ κο πφραλά, αλλά μα μπίσταρ ότι ανταγιά εβδομάδα ισινάν ατθέ μάνγκε. Χρειαζίντιβαβα με-ντα ζορ!» Σικλιλόμ μπουτ ανταλέ λατσσέ λαφίσταρ.

Κο 1976, αβιλό-πες κάτι σο να μπεκλεντίναβας ντα πφαμπαρντάς μο γκι. Μι ρομνί η Σιμόν, σο μανγκάβας-λα αζόμ μπουτ νασφάλιλι ντα σοτάς ο σοϊπέ ι μεριμάσκο. Ισινέ μπουτ λατσσί ρομνί μάνγκε σόσκε να ντικχέλας πο νεαυτός ντα μανγκέλας μπουτ ι Ιεχωβάς. Να τσσιναντόμ τι κεράβ μπουτ πράγματα κο έργος, ντα ανταβά ντινάς-μαν μπουτ μπαρί βοήθεια για τι νταϊντίναβ μπι λάκο. Ευχαριστίναβα ι Ιεχωβάς σο ατσσιλό πασέ μάντε μανγκιμάσαρ οντουλέ δύσκολε ντιβεσέντε. Πιο σοράν, παντρισάλομ με την Κάρολιν Έλιοτ. Βόι ισινέ εκ σκαπάνισσα, σο λάκι τσσιπ ισινέ η αγγλική, μανγκέλας μπουτ ο έργος ντα αβιλίας κο Κεμπέκ για τι υπηρετίνελ οτθέ σο ισινέ μπαρί ανάγκη. Να λατζάσα τι κερές λάσαρ λάφι ντα πφαμπόλα μπαγιά ι γιαβερένγκε, ντα ατζέ πιο μπουτ οντουλένγκε σο ισί λατζανέ ντα κορκορέ. Ντινάς-μαν μπαρί βοήθεια καζόμ κεράβας ο έργος τθαν τθανέστε.

ΕΚ ΜΠΟΥΤ ΣΗΜΑΝΤΙΚΟΣ ΜΠΡΕΣ

Κο 1978 κο Ιανουάριος, μανγκλέ μάνταρ τι σικλιαράβ κι πρώτη Σχολή Υπηρεσίας Σκαπανέα κο Κεμπέκ. Τθεράβας μπουτ άγχος σόσκε ποτές να νακχλόμας οντιά σχολή ούτε ντικχλόμας ο βιβλίος σο κα κεράας, οτθάρ σαρέ ισινέ νεβέ εμ ι μαθητένγκε εμ μάνγκε. Ισινέ λατσσό όμως ότι κι πρώτη τάξη σο σικλιαρντόμ τθεράας μπερεκέτι πφραλέν σο κερένας μπρεσά ο σκαπανικός. Παρόλο σο με σικλιαράβας-λεν, σικλιλόμ μπουτ πράγματα λένταρ!

Πιο σοράν κο ίδιος μπρες, αβιλί-πες κο Ολυμπιακός Στάδιος κο Μόντρεαλ η Διεθνής Συνέλευση «Νικηφόρος Πίστις». Ισινέ η πιο μπαρί συνέλευση σο αβιλίας-πες ποτές κο Κεμπέκ ντα αβιλέ 80.000 ντα πιο μπουτ τζενέ. Ντινέ-μαν ι μπουτί τι κεράβ λάφι με το δημοσιογράφοι ντα αβιλό μο γκι σο ντικχλόμ ότι γραφιντέ αζόμ λατσσέ πράγματα αμένγκε. Λιντέ αμένταρ συνεντεύξεις κι τηλεόραση ντα κο ράδιος σο σαρέ ατσσικιαρντέ πιο μπουτ από 20 σαάτια, ντα νικαντέ μπουτ άρθρα-ντα. Σο μπαρί μαρτυρία ντιντιλί!

ΜΠΟΥΤΣΣΑΝΤΙΒΑΒΑ ΟΤΘΕ ΣΟ ΚΕΡΕΝΑ ΛΑΦΙ ΓΙΑΒΕΡ ΤΣΣΙΠ

Οτθάρ μπερί σο μπολντιλόμ, υπηρετιντόμας κο Κεμπέκ, σο κερένα λάφι γαλλικά. Αλλά κο 1996 αβιλί εκ μπαρί αλλαγή μάνγκε. Μπουτσσαντέ-μαν τι αβάβ επίσκοπος περιφερείας κο Τορόντος, σο κερένα λάφι αγγλικά. Αβέλας μάνγκε ότι ναστί κεράβας-λες ανταβά ντα λέλας-μαν ιζρανί σο κα κεράβας ομιλίες κο αγγλικά σο να τζανάβας-λεν λατσσές. Χρειαζίντιβελας τι κεράβ προσευχή πιο μπουτ φαρ ντα τι μουκχάβ-μαν πιο μπουτ κι Ιεχωβάσκε βαστά.

Ακανά μπορίναβα μπαγιά τι βακεράβ ότι οντουλά ντούι μπρεσά σο ισινόμας κο Τορόντος ισινέ μπουτ σουκάρ. Η Κάρολιν βοηθιντάς-μαν με υπομονή τι πφανγκιόλ μι τσσιπ, ντα ο πφραλά ισινέ πασέ μάντε ντα ντένας-μαν μπουτ ζορ. Κερντάμ μπουτέ αμαλέν σουγκό.

Έπρεπε τι κεράβ μπουτ πράγματα για τι ετοιμάναβ ο συνελεύσεις σο αβένας κο σαββατοκύριακος, αλλά μπουτ φαρ Παρασκευή απόγευμας νικιάβας κο έργος κχερ κχερέστε περίπου εκ σαάτι. Μπορεί μερικά τζενέ τι βακερένας: “Σόσκε τι νικιός κο έργος εκ ντιβές πιο τζανγκλέ αφού ο σαββατοκύριακος ι συνελευσιάκο κα αβέλ πφερντό;” Αγαντόμ όμως ότι λάβας μπουτ ζορ κατά σουκάρ συζητήσεις σο κεράβας κο έργος. Ατζέ-ντα ακανά, κάθε φαρ σο νικιάβα κο έργος πουτάρντιβελα μο γκι.

Κο 1998, μπουτσσάντιλαμ σαρ ειδικοί σκαπανείς κο Μόντρεαλ. Μπουτ μπρεσά κανονίναβας εκστρατείες ντα κεράβας λάφι με το δημοσιογράφοι για τι αλλάνας μερικά λάθος πράγματα σο πακιάνας ο τζενέ ι Ιεχωβάσκε Μαρτυρένγκε. Ακανά, η Κάρολιν ντα με βακεράσα χαράσαρ ο λατσσέ αμπέρια ξένε τζενένγκε σο αβιλέ κο Καναδάς ακανά σουγκό. Μπουτ λένταρ μανγκένα σαρέ πουμαρέ γκίσαρ τι σικλιόν πιο μπουτ ι Γραφιάκε.

Καζόμ ανάβα μι γκοντιάτε ο 68 μπρεσά σο ισινόμ μπολντό υπηρέτης ι Ιεχωβάσκο, νιωθίναβα μπαγιά ευλογιμέ. Τθεράβα μπουτ χαρά σο σικλιλόμ τι μπεϊντίναβ ο έργος ντα σο βοηθιντόμ αζόμ τζενέν τι σικλιόν ι αλήθεια. Μι τσσάι η Λιζ ντα λάκο ρομ μπαριαρντέ πουμαρέ τσσαβέν ντα σοράν λιντέ ο τακτικός σκαπανικός. Αβέλα μο γκι κάνα ντικχάβα ότι μι τσσάι πφαμπόλα μπουτ ι εργόσκε. Εκτιμίναβα μπουτ ι πφραλέν σο μουκχλέ μάνγκε λατσσό παράδειγμας ντα ντινέ-μαν λατσσέ συμβουλές. Βοηθιντέ-μαν τι αβάβ λατσσό αμάλ ι Ιεχωβάσκο ντα τι κεράβ μπουτ πράγματα λέσκε. Σαρ αγαντόμ, σάντε άμα κα μουκχάς-αμέν κο μπουτ ζουρανό άγιος πνεύμας κι Ιεχωβάσκο να κα τσσιναβάς τι κεράς οντουβά σο μανγκέλα αμένταρ λέσκι οργάνωση. (Ψαλμ. 51:​11) Να τσσιναβάβα τι βακεράβ ευχαριστώ κο Ιεχωβά σο μουκχλάς-μαν τι ισαράβ λέσκο ναβ!​—Ψαλμ. 54:6.