Η Αγάπη ντα η Εκτίμηση ι Ιεχωβάσκε Γκερένα κο Μπολντιπέ

1, 2. Σο τσσιντιντάς ι μουρσές κατά Αιθιοπία τι μπολντιόλ σαρ σικάντιβελα κο εδάφια Πράξεις 8:​27-31, 35-38;

ΜΑΝΓΚΕΝΑ τι μπολντιόν ντα τι αβέν μαθητές ι Χριστόσκε; Η αγάπη ντα η εκτίμηση τσσιντιντέ μπουτέ τζενέν τι κερέν-λες ανταβά. Ανέν τουμαρέ γκοντιάτε εκχέ μουρσές σο κερέλας μπουτί ι βασιλισσάκε κι Αιθιοπία.

² Κάνα οντουβά Αιθίοπας σικλιλό οντουλά σο βακερέλα η Γραφή, μπολντιλό σουγκό. (Διαβάνεν Πράξεις 8:​27-31, 35-38) Σο τσσιντιντάς-λες τι κερέλ-λες ανταβά; Εκτιμίνελας ο Λάφι ι Ντεβλέσκο. Οτθάρ, καζόμ ισινέ οπράλ πι αμαξάτε διαβάνελας κατά βιβλίος Ησαΐας. Κάνα κερντάς λέσαρ λάφι ο Φίλιππος, εκτιμιντάς οντουλά σο κερντάας λέσκε ο Ιησούς. Αλλά σόσκε γκιλόας οντουβά Αιθίοπας κι Ιερουσαλήμ; Σόσκε μανγκέλας ι Ιεχωβάς. Σαρ τζανάσα-λες ανταβά; Μόλις ντινάας λατρεία ι Ιεχωβάς κι Ιερουσαλήμ. Ντικχίντιβελα ότι μουκχλάας ι θρησκεία σο τθερέλας χουρντιαρέλα ντα τσσιντιντάας κατά λαός σο ντινάας πι ζωή κο αληθινός Ντεβέλ. Μανγκέλας ι Ιεχωβάς, ντα ανταβά τσσιντιντάς-λες τι κερέλ ατζέκ εκ σημαντικός πράγμας​—τι μπολντιόλ ντα τι αβέλ μαθητής ι Χριστόσκο.​—Ματθ. 28:19.

3. Σο μπορεί τι τσσιναβέλα εκχέ τζενές τι μπολντιόλ; (Ντικχέν ο πλαίσιος «Σο Τθερένα Αντρέ Τουμαρέ Γκίστε;»)

³ Η αγάπη ι Ιεχωβάσκε μπορίνελα τι τσσίντελ τουμέν-ντα τι μπολντιόν. Αλλά η αγάπη μπορεί τι τσσιναβέλ-τουμέν ντα. Σαρ; Μπορεί τι μανγκένα μπουτ τουμαρέ τζενέν ή τουμαρέ αμαλέν σο νανέ κι αλήθεια ντα νταρένα ότι άμα κα μπολντιόν κα μισίνεν-τουμέν. (Ματθ. 10:​37) Ή μπορεί τι μανγκένα πράγματα σο τζανένα ότι ο Ντεβέλ μισίνελα ντα ισί τουμένγκε δύσκολος τι τσσιναβέν-λεν. (Ψαλμ. 97:​10) Ή μπορεί τι κερένα έθιμα ι ψεύτικε θρησκειάκε χουρντιαρέλα. Μπορεί τι αβένα τουμαρέ γκοντιάτε σουκάρ πράγματα οντουλέ γιορτένταρ. Οντουλέσκε, μπορεί τι αβέλ τουμένγκε δύσκολος τι τσσιναβέν τι κερέν ο έθιμα σο να μανγκέλα ο Ιεχωβά. (1 Κορ. 10:​20, 21) Οτθάρ, πρέπει τι αποφασίνεν: «Κας ή σο μανγκάβα πιο μπουτ;»

ΚΑΣ ΠΡΕΠΕΙ ΤΙ ΜΑΝΓΚΑΣ ΠΙΟ ΜΠΟΥΤ

4. Καβά ισί ο πιο σημαντικός πράγμας σο κα γκερέλ-τουμέν κο μπολντιπέ;

⁴ Τθερένα μπουτ πράγματα τι μανγκέν ντα τι εκτιμίνεν. Για παράδειγμας, ατζέ-ντα πριν τι κερέν μελέτη ι Ιεχωβάσκε Μαρτυρέντζαρ, μπορεί τι εκτιμίνενας μπουτ ι Γραφή. Ντα μπορεί τι μανγκένας ι Ιησούς. Ακανά σο τζανένα ι Ιεχωβάσκε Μαρτυρέν, μπορεί τι μανγκένα μπουτ τι αβέν λέντζαρ. Αλλά ατζέ-ντα άμα μανγκένα ανταλά λατσσέ πράγματα, ανταβά να μανγκέλα τι βακερέλ ότι σίγουρα κα μανγκέν τι ντεν τουμαρό λάφι κο Ιεχωβά ότι κα τζουβντιόν λέσκε ντα τι μπολντιόν. Ο πιο σημαντικός πράγμας σο κα γκερέλ-τουμέν κο μπολντιπέ ισί ότι μανγκένα ι Ιεχωβά Ντεβλές. Κάνα κα μανγκέν ι Ιεχωβάς πιο μπουτ σαριλένταρ, να κα μουκχέν τίποτα ντα καεκχές τι τσσιναβέλ-τουμέν. Η αγάπη σο τθερένα ι Ιεχωβάσκε κα τσσίντελ-τουμέν τι μπολντιόν ντα κα βοηθίνελ-τουμέν τι ατσσόν πιστοί σοράν κατά μπολντιπέ.

5. Καλά ερωτήσεις κα ντικχάς;

⁵ Ο Ιησούς βακερντάς ότι πρέπει τι μανγκάς ι Ιεχωβάς σαρέ αμαρέ γκίσαρ, σαρέ αμαρέ ψυχιάσαρ, σαρέ αμαρέ γκοντιάσαρ ντα σαρέ αμαρέ ζοριάσαρ. (Μάρκ. 12:​30) Σαρ κα σικλιόν τι μανγκέν ντα τι σεβάνεν ι Ιεχωβάς αζόμ μπουτ; Άμα ανάσα αμαρέ γκοντιάτε καζόμ μπουτ μανγκέλα-αμέν ο Ιεχωβά, ανταβά κα τσσίντελ-αμέν τι μανγκάς-λες αμέν-ντα. (1 Ιωάν. 4:​19) Οντουλέσκε, ανταλέ μαθημάστε κα σικλιόν σο πρέπει τι κερέν για τι μπαριαρέν τουμαρί αγάπη ι Ιεχωβάσκε ντα τι ερεσέν κο μπολντιπέ.b

6. Καβά ισί εκ τρόπος τι σικλιόν ι Ιεχωβάσκε σαρ βακερέλα ο εδάφιος Ρωμαίους 1:20;

⁶ Σικλιόν ι Ιεχωβάσκε αντράλ κατά πράγματα σο λατσσαρντάς. (Διαβάνεν Ρωμαίους 1:​20· Αποκ. 4:​11) Ανέν τουμαρέ γκοντιάτε ο φυτά ντα ο ζώα ντα σαρ ανταλά σικαβένα καζόμ γκοντιαβέρ ισί ο Ιεχωβά, Οντουβά σο κερντάς-λεν. Σικλιόν καζόμ σουκάρ ισί κερντό τουμαρό σώμας. (Ψαλμ. 139:​14) Ντα σκεφτίνεν καζόμ ζορ τσσουντάς ο Ιεχωβά αντρέ κο κχαμ ντα κο δισεκατομμύρια τσεργανιά.c (Ησ. 40:​26) Αντικάς, ο σεβασμός σο τθερένα ι Ιεχωβάσκε κα μπαριόλ. Όμως, για τι τθερέν ζουρανί αγάπη ι Ιεχωβάσκε ντα τι αβέν λέσκε αμαλά, να ερεσέλα σάντε τι τζανέν ότι ισί γκοντιαβέρ ντα ο πιο ζουρανό. Χρειαζίντιβελα τι σικλιόν πιο μπουτ λέσκε.

7. Για τι μανγκέν μπουτ ι Ιεχωβάς, καλέ πραγμάσκε πρέπει τι αβέν σίγουροι;

⁷ Χρειαζίντιβελα τι αβέν σίγουροι ότι ο Ιεχωβά πφαμπόλα τουμένγκε μπαγιά. Μήπως ισί τουμένγκε δύσκολος τι πακιάν ότι Οντουβά σο κερντάς ο ουρανός ντα ι πφουβ ντικχέλα-τουμέν ντα πφαμπόλα τουμένγκε; Άμα βα, μα μπιστρέν ότι ο Ιεχωβά «νανέ ντουρ αμένταρ». (Πράξ. 17:​26-28) «Ρόντελα σαρέ ο γκιά» ντα ντέλα-τουμέν πο λάφι ότι “άμα ρόντενα λέσκε, κα μουκχέλ-τουμέν τι αρακχέν-λες”, σαρ βακερντάς ο Δαβίδ κο Σολομώντας. (1 Χρον. 28:9) Ακανά κερένα μελέτη σόσκε ο Ιεχωβά “ταρτιντάς-τουμέν πασέ πέστε”. (Ιερ. 31:3) Καζόμ πιο μπουτ αγαβένα σαρέ οντουλά σο κερντάς τουμένγκε ο Ιεχωβά, αζόμ πιο μπουτ κα μανγκέν-λες.

8. Σαρ κα σικαβέν ότι μανγκένα ι Ιεχωβάς;

⁸ Εκ τρόπος για τι σικαβέν ότι μανγκένα ι Ιεχωβάς ισί τι κερέν λέσαρ λάφι αντράλ κατά προσευχή. Κα μανγκέν ι Ντεβλές ατζέ πιο μπουτ καζόμ κα βακερέν λέσκε τουμαρέ προβλήματα ντα κα ευχαριστίνεν-λες σαρέ οντουλένγκε σο κερέλα τουμένγκε. Ντα τουμαρί φιλία λέσαρ κα αβέλ πιο ζουρανί καζόμ κα ντικχέν σαρ απαντίνελα τουμαρέ προσευχιέντε. (Ψαλμ. 116:1) Κα αβέν ντιπ σίγουροι ότι αγαβέλα-τουμέν. Αλλά για τι τζαν πασέ κο Ιεχωβά, πρέπει τι αγαβέν σαρ σκεφτίνελα. Ντα πρέπει τι τζανέν σο μανγκέλα τουμένταρ. Ο μόνος τρόπος τι σικλιόν-λες ανταβά ισί τι σικλιαρέν-τουμέν λέσκε Λαφίσταρ, κατά Αγία Γραφή.

9. Σαρ κα σικαβέν ότι εκτιμίνενα ι Γραφή;

⁹ Σικλιόν τι εκτιμίνεν ο Λάφι ι Ντεβλέσκο, ι Αγία Γραφή. Σάντε αντράλ κατά Γραφή κα σικλιόν κον ισί μπαγιά ο Ιεχωβά ντα σο μανγκέλα τι κερέλ τουμένγκε. Σικαβένα εκτίμηση ι Γραφιάκε άμα διαβάνενα-λα κάθε ντιβές, άμα προετοιμάντιβενα τουμαρέ μελετιάκε ντα άμα κερένα οντουλά σο σικλιόνα. (Ψαλμ. 119:​97, 99· Ιωάν. 17:​17) Τουμέν, τθερένα πρόγραμμας για τι διαβάνεν ι Γραφή; Διαβάνενα-λα κάθε ντιβές;

10. Καβά ισί εκ ξεχωριστός πράγμας σο τθερέλα αντρέ η Γραφή;

¹⁰ Κάτι ξεχωριστός σο τθερέλα η Γραφή ισί ότι ο τζενέ σο ντικχλέ ι Ιησούς πουμαρέ γιακχίντζαρ κερένα λάφι λέσκε. Ισί ο μόνος βιβλίος σο βακερέλα μπαγιά σο κερντάς ο Ιησούς τουμένγκε. Καζόμ σικλιόνα σο βακερντάς ντα κερντάς ο Ιησούς, κα μανγκέν τι αβέν αμαλά λέσαρ.

11. Σαρ κα σικλιόν τι μανγκέν ι Ιεχωβάς;

¹¹ Σικλιόν τι μανγκέν ι Ιησούς, ντα κα μανγκέν πιο μπουτ ι Ιεχωβάς. Σόσκε; Επειδή ο Ιησούς μοιάζελα ντιπ πι Νταντέστε. (Ιωάν. 14:9) Οντουλέσκε, καζόμ πιο μπουτ σικλιόνα ι Ιησούσκε, αζόμ πιο λατσσές κα αγαβέν ντα κα εκτιμίνεν ι Ιεχωβάς. Ανέν τουμαρέ γκοντιάτε καζόμ τζιτζίνελας ο Ιησούς οντουλένγκε σο να ντένας-λεν σημασία​—ι τσορορένγκε, ι νασφαλένγκε ντα ι μπίζουρανενγκε. Ντα σκεφτίνεν ο λατσσέ συμβουλές σο ντέλα-τουμέν ντα σαρ αβέλα πιο λατσσί τουμαρί ζωή κάνα ασουνένα-λες.​—Ματθ. 5:​1-11· 7:​24-27.

12. Καζόμ σικλιόνα ι Ιησούσκε, σο κα μανγκέν τι κερέν;

¹² Κα μανγκέν ι Ιησούς ατζέ πιο μπουτ άμα ανένα τουμαρέ γκοντιάτε ότι μουλό για τι συγχωρίντιβεν αμαρέ αμαρτίες. (Ματθ. 20:​28) Κάνα κα αγαβέν ότι ο Ιησούς μανγκλάς αντράλ πι γκίσταρ τι μερέλ τουμένγκε, ανταβά μπορεί τι τσσίντελ-τουμέν τι μετανιώνεν ντα τι μανγκέν τι συγχωρίνελ-τουμέν ο Ιεχωβά. (Πράξ. 3:​19, 20· 1 Ιωάν. 1:9) Καζόμ πιο μπουτ κα μανγκέν ι Ιησούς ντα ι Ιεχωβάς, αζόμ πιο μπουτ κα ταρτίντιβεν πασέ κο τζενέ σο μανγκένα-λεν βον-ντα.

13. Σο ντινάς-τουμέν ο Ιεχωβά;

¹³ Σικλιόν τι μανγκέν ι Ιεχωβάσκι φαμιλί. Τουμαρέ τζενέ σο νανέ κι αλήθεια ντα τουμαρέ πουρανέ αμαλά μπορεί μα τι αγαβένα σόσκε μανγκένα τι τζουβντιόν ι Ιεχωβάσκε. Μπορεί ατζέ-ντα τι τζαν τουμέντζαρ κόντρα. Αλλά ο Ιεχωβά κα ντελ-τουμέν πφραλέν ντα πφενίν σο κα αβέν σαρ φαμιλί τουμένγκε. Άμα κα ατσσόν πασέ ανταλέ φαμιλιάτε, κα αρακχέν ι αγάπη ντα ι βοήθεια σο χρειαζίντιβενα. (Μάρκ. 10:​29, 30· Εβρ. 10:​24, 25) Καζόμ κα νακχέλ ο καιρός, τουμαρέ τζενέ μπορεί βον-ντα τι υπηρετίνεν ι Ιεχωβάς ντα τι τζουβντιόν σαρ μανγκέλα Βοβ.​—1 Πέτρ. 2:12.

14. Καζόμ τθερένα τουμαρέ γκοντιάτε ο εδάφιος 1 Ιωάννη 5:3, βακερέν σαρ ντικχλέν ότι οντουλά σο βακερέλα ο Ιεχωβά ισί λατσσέ τουμένγκε.

¹⁴ Σικλιόν τι εκτιμίνεν ντα τι κερέν οντουλά σο βακερέλα ο Ιεχωβά. Πριν τι σικλιόν ι Ιεχωβάσκε, μπορεί τι τραμπίνενας κορκορέ σο τι κερέν τουμαρέ ζωγιάτε, αλλά ακανά ντικχένα ότι οντουλά σο βακερέλα ο Ιεχωβά ισί πιο λατσσέ. (Ψαλμ. 1:​1-3· διαβάνεν 1 Ιωάννη 5:3) Ανέν τουμαρέ γκοντιάτε οντουλά σο βακερέλα η Γραφή τι κερέν ο παντριμέ τζενέ, ο νταντά, ο νταγιά ντα ο τσσαβέ. (Εφεσ. 5:​22–6:4) Καζόμ κερένα-λεν ανταλά, ντικχένα τουμαρί φαμιλί τι αβέλ πιο λατσσί; Αβιλέν πιο λατσσέ τζενέ καζόμ ντένα καν κο συμβουλές κι Ιεχωβάσκε σο βακερένα τι τραμπίνας γκοντιάσαρ αμαρέ αμαλέν; Ισινέν πιο χαρούμενοι; (Παρ. 13:​20· 1 Κορ. 15:​33) Μάλλον κα βακερέν «βα».

15. Κάι κα αρακχέν βοήθεια για τι κερέν οντουλά σο σικλιόνα κατά Γραφή;

¹⁵ Ισί φαρ σο μπορεί μα τι τζανένα σαρ τι κερέν οντουλά σο σικλιόνα κατά Γραφή. Οντουλέσκε, ο Ιεχωβά αντράλ κατά οργάνωση σο τθερέλα ντέλα-τουμέν έντυπα για τι αγαβέν ι Γραφή ντα τι τζανέν καβά ισί ο σωστός ντα ο λάθος. (Εβρ. 5:​13, 14) Καζόμ κα διαβάνεν ανταλά έντυπα ντα κα σικλιαρέν-τουμέν λένταρ, κα αγαβέν ακριβώς σο βακερένα ο συμβουλές ι Γραφιάκε ντα ο λατσσιπέ σο ανένα κάνα κερένα-λεν τουμαρέ ζωγιάτε. Ντα ανταβά μάλλον κα ταρτίνελ-τουμέν κι οργάνωση κι Ιεχωβάσκι.

16. Σαρ οργανωντάς ο Ιεχωβά πι λαός;

¹⁶ Σικλιόν τι μανγκέν ντα τι υποστηρίνεν ι οργάνωση ι Ιεχωβάσκι. Ο Ιεχωβά κερντάς πι λαός τι αβέλ οργανωμέ κχανγκιρίντε, ντα λέσκο Τσσαβό, ο Ιησούς, ισί ο σορό σαρέ οντουλέ κχανγκιρίνγκο. (Εφεσ. 1:​22· 5:​23) Ο Ιησούς τσσουντάς χάνικ χρισμέ πφραλέν σο τραμπίντιλε ι πνευμάσαρ τι αβέν ανγκλάλ ντα τι βακερέν σαρ τι κερντιόλ ο έργος σο βοβ μανγκέλα τι αβέλ-πες αμαρέ ντιβεσέντε. Ο Ιησούς βακερντάς οντουλέ πφραλένγκε «πιστός ντα φρόνιμος δούλος». Ανταλά μουρσά αγαβένα καζόμ σημαντικός ισί τι βοηθίνεν-τουμέν τι αβέν πασέ κο Ντεβέλ ντα τι αρακχαβέν τουμαρί φιλία λέσαρ. (Ματθ. 24:​45-47) Εκ κατά πράγματα σο κερέλα ο πιστός δούλος τουμένγκε ισί ότι τσσουβέλα πρεσβυτερόν σο μπορίνενα τι σικλιαρέν-τουμέν ντα τι αρακχαβέν-τουμέν. (Ησ. 32:1, 2· Εβρ. 13:​17· 1 Πέτρ. 5:2, 3) Ο πρεσβύτεροι αντράλ πουμαρέ γκίσταρ κερένα σο νακχέλα λένγκε βαστένταρ για τι λοκχιαρέν τουμαρό γκι ντα τι βοηθίνεν-τουμέν τι τζαν ατζέ πιο πασέ κο Ιεχωβά. Αλλά εκ κατά πιο σημαντικά πράγματα σο κερένα τουμένγκε ισί ότι βοηθίνενα-τουμέν τι σικλιαρέν γιαβερέν ι Ιεχωβάσκε.​—Εφεσ. 4:​11-13.

17. Σόσκε κεράσα λάφι κο γιαβερά ι Ιεχωβάσκε σαρ βακερένα ο εδάφια Ρωμαίους 10:​10, 13, 14;

¹⁷ Σικλιαρέν γιαβερέν τι μανγκέν ι Ιεχωβάς. Ο Ιησούς βακερντάς οντουλένγκε σο τζάνας παλά-λέστε τι σικλιαρέν γιαβερέν ι Ιεχωβάσκε. (Ματθ. 28:​19, 20) Ισί τζενέ σο ντένα καν ανταλέ λαφίστε σάντε επειδή πρέπει. Αλλά καζόμ κα μανγκέν ι Ιεχωβάς πιο μπουτ, κα νιωθίνεν σαρ ο απόστολος Πέτρος ντα ο απόστολος Ιωάννης, σο βακερντέ: «Ναστί τσσιναβάσα τι κεράς λάφι οντουλένγκε σο ντικχλάμ ντα ασουντάμ». (Πράξ. 4:​20) Χάνικ πράγματα ανένα αζόμ μπαρί ευτυχία σαρ οντιά σο λάσα κάνα βοηθίνασα εκχέ τζενές τι μανγκέλ ι Ιεχωβάς. Ανέν τουμαρέ γκοντιάτε καζόμ χαρά λιντάς ο Φίλιππος κάνα βοηθιντάς οντουλέ Αιθιοπάς τι σικλιόλ ι αλήθεια ι Γραφιάκι ντα τι μπολντιόλ! Άμα ισινέν σαρ ο Φίλιππος ντα ντένα καν κι εντολή κι Ιησούσκι τι βακερέν ο λατσσέ αμπέρια, σικαβένα ότι μανγκένα τι αβέν Μάρτυρες ι Ιεχωβάσκε. (Διαβάνεν Ρωμαίους 10:​10, 13, 14) Αζομάν, μάλλον τουμέν-ντα κα πουτσέν οντουβά σο πουτσλάς ο Αιθίοπας: «Σο τσσιναβέλα-μαν τι μπολντιάβ;»​—Πράξ. 8:36.

18. Σο κα ντικχάς κο γιαβέρ μάθημας;

¹⁸ Κάνα κα μπολντιόν, κα κερέν ο πιο σημαντικός πράγμας τουμαρέ ζωγιάτε. Επειδή ισί αζόμ σημαντικός, πρέπει τι σκεφτίνεν μπουτ λατσσές σο μανγκέλα τι βακερέλ ανταβά. Σο πρέπει τι τζανέν ι μπολντιμάσκε; Σο πρέπει τι κερέν πριν ντα σοράν κατά μπολντιπέ; Κο γιαβέρ μάθημας κα ντικχάς ανταλά ερωτήσεις.