Μι Σουκάρ Ζωή κι Υπηρεσία κι Ιεχωβάσκι

Εκ μπρες πιο σοράν, ο πφραλά βακερντέ κι φαμιλί Μπέθελ ότι ο γραφείος τμήματος κι Νότια Αφρική μανγκέλας πφραλέν τι τζαν τι κερέν μπουτί οτθέ σόσκε κα τσσουβένας εκ νεβό πιεστήριος. Κερντόμ αίτηση ντα χαιρισάλομ μπουτ κάνα τραμπιντέ-μαν. Τραμπίντιλε ατζέ τριν Μπεθελίτες κατά Καναδάς​—ο Ντένις Λιτς, ο Μπιλ Μακλέλαν ντα ο Κεν Νόρντιν. Βακερντέ αμένγκε ότι κα μπεσάας κι Νότια Αφρική για μπουτ βακίτι!

Λιντόμ τηλέφωνος μι νταγιάτε ντα βακερντόμ λάκε: «Ντάι, τθεράβα τι βακεράβ τούκε εκ αμπέρι. Τζάβα κι Νότια Αφρική!» Μι ντάι ισινέ εκ τζενί σο να κερέλας μπουτ λάφι, αλλά τθερέλας μπαρί πίστη ντα λατσσί φιλία ι Ιεχωβάσαρ. Να βακερντάς μπουτ πράγματα, αλλά τζανάβας ότι κα αβέλας πασέ μάντε. Ούτε μο ντατ ούτε μι ντάι να προσπαθιντέ τι αλλάνεν μι απόφαση, παρόλο σο στεναχωρίντιβενας μπουτ σο κα νασάβας πασέ λένταρ.

ΤΖΑΒΑ ΚΙ ΝΟΤΙΑ ΑΦΡΙΚΗ!

Ο σταρ-ντα κάνα γκιλάμ πρώτη φαρ κο Μπέθελ κο Μπρούκλιν, σικλιάας τριν μάσεκ σαρ εκτυπώντιβενας εκχέ συγκεκριμέ τροπόσαρ ο έντυπα. Σοράν, τσσουντάμ-αμέν εκχέ καραβίστε για τι τζας κο Κέιπ Τάουν κι Νότια Αφρική. Αζομάν ισινόμας 20 μπρεσένγκο. Ισινέ αρατί κάνα λιντάμ ο τρένος κατά Κέιπ Τάουν για τι τζας κο Γιοχάνεσμπουργκ. Πριν τι ντισιόλ, ερεσλάμ κι πρώτη στάση σε εκ χουρντί πόλη κο Καρού, σο μπεσένας οτθέ χάνικ τζενέ. Τθερέλας μπουτ σκόνη, κάντος ντα κερέλας μπουτ κάψα. Ντικχάας ο σταρ-ντα κατά παράθυρος ντα σκεφτίναας σο τθαν ισινέ ανταβά. Σκεφτίναας σαρ κα αβέλας αμαρό νεβό διορισμός. Σοράν, κάνα γκιλάμ πάλι οτθέ, αγαντάμ ότι ανταγιά χουρντί πόλη ισινέ μπουτ σουκάρ ντα ήσυχη.

Μο διορισμός για χάνικ μπρεσά ισινέ τι κεράβ μπουτί ι λινοτυπική μηχανή σο ισινέ σουκάρ αλλά δύσκολη​—έπρεπε τι τσσουβάβ κι σειρά ο γράμματα για τι τυπώντιβελ η Σκοπιά ντα ο Ξύπνα! Ο γραφείος τμήματος τυπώνελας ο περιοδικά μπουτέ αφρικανικέ τσσιμπέντε, όχι σάντε για την Νότια Αφρική, αλλά μπουτέ τθεμένγκε-ντα κι Βόρεια Αφρική. Ισινάμας μπουτ χαρούμενοι σο χρησιμοποιήντιβελας αζόμ μπουτ ανταβά νεβό πιεστήριος, σο λέσκε αβιλάμας κατά Καναδάς!

Σοράν, υπηρετιντόμ κο Γραφείος Εργοστασίου, σο οτθέ κανονίντιβελας τι εκτυπώντιβεν, τι μπουτσσάντιβεν ντα τι μεταφράντιβεν ο έντυπα. Τθεράβας μπουτ πράγματα τι κεράβ ντα μι ζωή ισινέ σουκάρ ντα πφερντί.

ΜΟ ΜΠΙΑΒ ΝΤΑ ΕΚ ΝΕΒΟ ΔΙΟΡΙΣΜΟΣ

Κο 1968, παντρισάλομ εκχέ σκαπανισσάσαρ σο βακερένα λάκε Λόρα Μπόουεν ντα μπεσέλας πασέ κο Μπέθελ. Κερέλας ο σκαπανικός αλλά βοηθίνελας κο Μεταφραστικός Τμήμας-ντα σαρ δακτυλογράφος. Αζομάν, κάνα παντρίνελας εκ ζευγάρι, ο πιο μπουτ φαρ νασέλας κατά Μπέθελ, οτθάρ ντινέ-αμέν ο διορισμός τι αβάς ειδικοί σκαπανείς. Ανησυχίναβας χάνικ ανταλέσκε. Σοράν από ντες μπρεσά κο Μπέθελ, σο πάντα τθεράβας κχερ ντα χαμπέ, σαρ κα ντάας-λεν πέρα ι λοβέντζαρ σο κα τθεράας σαρ ειδικοί σκαπανείς; Ο κάθε εκ αμένταρ λέλας 25 ραντ (σο αζομάν ισινέ 35 δολάρια ΗΠΑ) κάθε μάσεκ, αλλά σάντε άμα κα νικαβάας ο σαάτια, κα κεράας ο επανεπισκέψεις ντα κα ντάας ο έντυπα σο έπρεπε. Οντουλέ λοβέντζαρ, έπρεπε τι ποκινάας αμαρό ενοίκιος, ο χαμπίματα, ι βενζίνη, ι γιατρόν ντα γιαβερά πράγματα.

Διορισάλαμ εκχέ χουρντέ ομιλόστε πασέ κι πόλη Ντέρμπαν, κο Ινδικός Ωκεανός. Οτθέ ισινέ μπουτ Ινδοί, μπουτ λένταρ ισινέ προσάγγονα τζενένγκε σο αβιλέας κι Νότια Αφρική περίπου κο 1875 για τι κερέν μπουτί χωραφίντε σο τθερένας ζαχαροκάλαμος. Ακανά κερένας γιαβερά μπουτιά, αλλά ατσσικιαρντέας πουμαρί κουλτούρα ντα πουμαρέ χαμπίματα, σο αντρέ τθερένα κάρι ντα ισί μπουτ λατσσέ. Κερένας λάφι αγγλικά, οτθάρ να χρειαζίντιβελας τι σικλιάς λένγκι τσσιπ για τι βακεράς λένγκε ο λατσσέ αμπέρια.

Αζομάν ο ειδικοί σκαπανείς έπρεπε τι νικαβέν 150 σαάτια κάθε μάσεκ κο έργος. Ο πρώτος ντιβές, η Λόρα ντα με βακερντάμ τι νικιάς σιοβ σαάτια κο έργος. Κερέλας μπουτ κάψα ντα τθερέλας υγρασία. Να τθεράας επανεπισκέψεις ούτε μελέτες, οτθάρ κα νικιάας κο έργος κχερ κχερέστε. Αφού κερντάμας χάνικ έργος, ντικχλόμ μο σαάτι ντα νακχλέας σάντε 40 λεπτά! Σκεφτιντόμ σαρ κα ντάας-λεν πέρα.

Αντρέ χάνικ ντιβεσέντε, κερντάμ πιο λατσσές αμαρό πρόγραμμας. Κάθε ντιβές, κεράας σάντουιτς ντα τσσουβάας σούπα ή καφές εκχέ θερμόστε. Κάνα μανγκάας τι κεράς εκ διάλειμμας, τσσουβάας αμαρό χουρντό αυτοκίνητος τελάλ εκχέ δεντρόσταρ για τι τθεράς βουτσσάλ. Μπάζιμα, γκιντίντιβενας ντονταλάι αμένταρ χουρντέ Ινδοί ντα ντικχένας-αμέν σόσκε ισινάμας διαφορετικοί λένταρ! Αντρέ χάνικ ντιβεσέντε, αγαντάμ ότι σοράν από ντούι ή τριν σαάτια, ο ντιβές νακχέλας μπουτ σουγκό.

Καζόμ χαρούμενοι ισινάμας σο βακεράας ι αλήθεια ι Γραφιάκι κο τζενέ σο αρακχάας οντουλέ τομεάστε! Αγαντάμας ότι ο Ινδοί σικαβένας σεβασμός, ισινέ λατσσέ αμέντζαρ ντα μανγκένας ι Ντεβλές. Μπουτ Ινδουιστές ασουνένας οντουλά σο βακεράας λένγκε. Μπεϊντίνενας τι σικλιόν ι Ιεχωβάσκε, ι Ιησούσκε, ι Γραφιάκε, ι νεβέ ντουνιάσκε σο κα ανέλ ειρήνη σαρό κο ντουνιάς ντα για την ελπίδα σο τθερένα ο μουλέ. Εκ μπρες σοράν, τθεράας 20 μελέτες. Κάθε μεσημέρι, χάας εκχέ οντουλέ φαμιλίνταρ σο κεράας μελέτη. Ισινάμας μπουτ ευτυχισμέ.

Μπουτ σουγκό λιντάμ εκ γιαβέρ διορισμός. Μπουτσσαντέ-αμέν τι κεράς έργος περιοχής κο τθανά σο ισινέ πασέ κο ντεριαβά κο Ινδικός Ωκεανός. Κάθε εβδομάδα, εκ φαμιλί φιλοξενίνελας-αμέν πι κχερέστε καζόμ τζάας τι ντικχάς ι πφραλέν κι κχανγκιρί ντα τι νικιάας λέντζαρ κο έργος για τι ντάας-λεν ζορ. Ισινάμας σαρ φαμιλί λένγκε ντα μπεϊντίναας μπουτ ι παρέα λένγκι, λένγκι τσσαβένγκι ντα λένγκε ζώα. Νακχλέ ντούι μπουτ σουκάρ μπρεσά. Οτθέ σο να μπεκλεντίναας-λες, λιντέ-αμέν τηλέφωνος κατά γραφείος τμήματος. Βακερντέ αμένγκε: «Κα μανγκάας τι αβέν πάλι κο Μπέθελ». Με βακερντόμ λένγκε: «Τζανένα, νακχάσα μπουτ σουκάρ ατθέ». Αλλά ισινάμας έτοιμοι τι τζας κάι-ντα τι βακερένας αμένγκε.

ΒΟΥΡΤΙΝΑΣΑ ΚΟ ΜΠΕΘΕΛ

Κο Μπέθελ, ισινόμας κο Τμήμας Υπηρεσίας, σο οτθέ τθεράβας ο προνόμιος τι κεράβ μπουτί μπουτέ γκοντιαβέρ πφραλέντζαρ. Αζομάν, κάνα ο επίσκοπος περιοχής νασέλας εκχέ κχανγκιριάταρ μπουτσσαβέλας εκ έκθεση κο γραφείος τμήματος. Σοράν, ο πφραλά κατά Τμήμας Υπηρεσίας μπουτσσαβένας εκ γράμμας οντουλέ κχανγκιριάκε. Αντράλ κατά επιστολές ανταλά, μανγκένας τι ντεν ζορ ι πφραλέν ντα τι βακερέν λένγκε σο τι κερέν. Ανταβά μανγκέλας τι βακερέλ ότι ο γραμματέας ι κάθε κχανγκιριάκο έπρεπε τι κερέλ μπουτ μπουτί για τι μεταφράνελ ο επιστολές κατά κόζα, κατά ζουλού ντα κατά γιαβερά αφρικανικά τσσιμπά κο αγγλικά ντα κατά αγγλικά σαρέ ανταλέ τσσιμπέντε. Εκτιμίναβας μπουτ οντουλέ μπουτιαρνέ πφραλέν σο μεταφράνενας αλλά επίσης βοηθίνενας-μαν τι αγαβάβ ο δυσκολίες σο νακχένας ο καλέ πφραλά ντα πφενιά κατά Αφρική.

Οντουλά μπρεσά, κι Νότια Αφρική ισινέ ο σύστημας απαρτχάιντ. Κάθε φυλή μπεσέλας συγκεκριμέ τθανέντε, οτθάρ ο καλέ τζενέ ναστί κερένας παρέα ι παρνέ τζενέντζαρ. Ο καλέ πφραλά κερένας λάφι πουμαρί τσσιπ, κερένας έργος πουμαρέ τσσιμπάτε ντα τζάνας συναθροίσεις κχανγκιρίντε σο κερντιόλας λάφι λένγκι τσσιπ.

Να τζανάβας μπουτέ καλέ Αφρικανόν, σόσκε σαρέ μο διορισμοί ισινέ κχανγκιρίντε σο οτθέ ο τζενέ κερένας λάφι αγγλικά. Ακανά όμως τθεράβας ι ευκαιρία τι σικλιάβ ι καλέ Αφρικανόν, λένγκι κουλτούρα ντα λένγκε έθιμα. Σικλιλόμ για το δυσκολίες σο νακχένας αμαρέ πφραλά ιτιρί οντουλένταρ σο ισινέ σικλέ τι κερέν ο τζενέ οτθέ σο μπεσένας ντα ιτιρί οντουλένταρ σο πακιάνας. Σικαβένας καζόμ μπίνταρανε ισινέ κάνα να κερένας πράγματα σο τζάνας κόντρα κι Γραφή παρόλο σο ισινέ αντρέ κι κουλτούρα λένγκι ντα κάνα να μανγκένας τι κερέν μπενγκαλέ πράγματα παρόλο σο τζάλας λέντζαρ μπαρί κόντρα λένγκι φαμιλί ντα ο γκαβ! Κο αγροτικές περιοχές, ο τζενέ ισινέ μπουτ τσορορέ. Μπουτ τζενέ είτε να γκιλέας σχολείος είτε γκιλέας για χάνικ, αλλά σεβάνενας ι Αγία Γραφή.

Τθεράβας ο προνόμιος τι βοηθίναβ κο νομικά πράγματα σο τθερένας τι κερέν πφραλέντζαρ σο μανγκένας τι ντεν λατρεία ελεύθερα ντα τι ατσσόν ουδέτεροι. Μι πίστη μπαριόλας κάνα ντικχάβας καζόμ αφοσιωμέ ντα μπίνταρανε ισινέ ο τερνέ πφραλά σο πάλντενας-λεν κατά σχολείος επειδή να μανγκλέας τι κερέν προσευχή ντα τι γκιλιαβέν ύμνους ι θρησκειάκε.

Ο πφραλά τθερένας ατζέκ εκ δυσκολία κο χουρντό αφρικανικός τθεμ σο αζομάν βακέρντιβελας Σουαζιλάνδη. Κάνα μουλό ο βασιλιάς Σομπούζα Δεύτερος, βακερντέ ι τζενένγκε σο μπεσένας οτθέ τι κερέν μερικά πράγματα σο ισινέ σικλέ τι κερέν οντουλέ τθεμέστε για τι σικαβέν ότι ασταρένα λύπη. Ο μουρσά έπρεπε τι μοραβέν πουμαρό σορό ντα ο τζουβλιά τι τσσινέν ντιπ πουμαρέ μπαλά. Μπουτέ πφραλέντζαρ ντα πφενίντζαρ γκιλέ κόντρα σόσκε να μανγκένας τι κερέν ανταλά πράγματα σο ισινέ έθιμα ι μουλένγκε. Καζόμ μπουτ χαιρισάλαμ σο ατσσιλέ αφοσιωμέ κο Ιεχωβά! Σικλιλάμ μπουτ πράγματα κατά αφοσίωση ντα κατά υπομονή σο σικαντέ αμαρέ πφραλά κι Αφρική, ντα ανταβά μπαριαρντάς αμαρί πίστη.

ΚΕΡΑΒΑ ΠΑΛΙ ΜΠΟΥΤΙ ΚΟ ΤΥΠΟΓΡΑΦΕΙΟΣ

Κο 1981, γκιλόμ τι κεράβ πάλι μπουτί κο τυπογραφείος. Οτθέ βοηθίναβας τι χρησιμοποιήνας ο υπολογιστές για τι εκτυπώνας εκχέ νεβέ τροπόσαρ ο έντυπα. Σο σουκάρ ισινέ οντουβά σο αβέλας-πες! Ο τρόπος σο εκτυπώντιβενας ο έντυπα αλλάνελας. Εκ τζενό οντουλέ τθεμέσταρ σο μπικινέλας πράγματα ντινάς κο γραφείος τμήματος εκ νεβό μηχάνημας ντα μουκχλάς-αμέν τι δοκιμάνας-λες χωρίς τι ποκινάς-λες. Οτθάρ, νικαντάμ ο εννιά λινοτυπικές μηχανές σο τθεράας ντα τσσουντάμ παντς οντουλέ νεβέ μηχανηματένταρ. Επίσης, τσσουντάμ εκ νεβό πιεστήριος. Εκτυπώναας πιο μπουτ έντυπα από κάθε γιαβέρ φαρ!

Ο υπολογιστές βοηθιντέ-αμέν επίσης τι αρακχάς νεβέ τρόπους για τι κεράς ι στοιχειοθέτηση αντράλ κατά MEPS, εκ Πολυγλωσσικός Ηλεκτρονικός Εκδοτικός Σύστημα. Η τεχνολογία αβιλίας μπουτ πιο λατσσί από αζομάν σο αβιλάμας σταρ Μπεθελίτες κατά Καναδάς για τι κεράς μπουτί κι Νότια Αφρική! (Ησ. 60:​17) Ντα ακανά σαρέ ισινάμας παντριμέ λατσσέ πφενίντζαρ σο ισινέ σκαπάνισσες ντα μανγκένας μπουτ ι Ιεχωβάς. Ο Μπιλ ντα με συνεχίναας τι υπηρετίνας κο Μπέθελ. Ο Κεν ντα ο Ντένις κερντέας τσσαβέν ντα μπεσένας πασέ κο Μπέθελ.

Καζόμ τζάλας, υπαρχίντιβελας πιο μπουτ μπουτί κο γραφείος τμήματος. Ο έντυπα μεταφράντιβενας ντα τυπώντιβενας πιο μπουτ τσσιμπέντε ντα μπουτσσάντιβενας κο γιαβερά γραφεία τμήματος. Οτθάρ, χρειαζίντιβαας εκ νεβό Μπέθελ. Ο πφραλά κερντέ εκ Μπέθελ εκχέ σουκάρ τθανέστε δυτικά κατά Γιοχάνεσμπουργκ, ντα λέσκι αφιέρωση αβιλί-πες κο 1987. Χαιρίναβα σο βοηθιντόμ με-ντα σαρέ ανταλέντε ντα σο υπηρετιντόμ κι Επιτροπή του Τμήματος κι Νότια Αφρική μπουτ μπρεσά.

ΕΚ ΝΕΒΟ ΔΙΟΡΙΣΜΟΣ ΠΑΛΙ!

Κο 2001, αβιλό-πες κάτι σο να μπεκλεντίναας. Βακερντέ μάνγκε τι υπηρετίναβ κι νεβί Επιτροπή του Τμήματος κο Ηνωμένες Πολιτείες. Παρόλο σο στεναχωρίντιβαας σο κα μουκχάας παλάλ αμαρέ διορισμοί ντα αμαρέ αμαλέν κι Νότια Αφρική, μπεϊντίναας σο κα αβάας κι φαμιλί Μπέθελ κο Ηνωμένες Πολιτείες.

Όμως, τσσουβάας αμαρέ γκίστε σο κα μουκχάας παλάλ μι σασά σο ισινέ πφουρί. Να κα μπορίναας τι κεράς μπουτ πράγματα λάκε κατά Νέα Υόρκη, αλλά ο τριν πφενιά μι ρομνιάκε βακερντέ αμένγκε ότι κα αρακχαβένας-λα, κα αβένας πασέ λάτε ντα κα βοηθίνενας-λα οικονομικά. Βακερντέ: «Αμέν ναστί αβάσα κι ολοχρόνια υπηρεσία, αλλά άμα κα αρακχαβάς αμαρέ νταγιά, κα βοηθίνας τι ατσσόν τουμέν τουμαρέ διορισμόστε». Ισινάμ πφερντέ εκτίμηση λένγκε.

Μο πφραλ-ντα πι ρομνιάσαρ, σο μπεσένας κο Τορόντο, για τι βοηθίνεν-αμέν, αρακχαβένας μι νταγιά σο ισινέ χήρα. Αζομάν μι ντάι μπεσέλας ήδη λέντζαρ πιο μπουτ από 20 μπρεσά. Μπαγιά ισινάμ πφερντέ εκτίμηση λένγκε σο σικαντέ λάκε αγάπη ντα αρακχαντέ-λα μέχρι σο μουλί, χάνικ αφού αβιλάμ κι Νέα Υόρκη. Ισί μπαρί ευλογία τι βοηθίνεν-τουτ το τζενέ σο ισί έτοιμοι τι αλλάνεν πουμαρί ζωή για τι κερέν κάτι ασακό!

Για μπουτ μπρεσά μο διορισμός κο Ηνωμένες Πολιτείες ισινέ τι βοηθίναβ τι κερντιόν έντυπα εκχέ νεβέ ντα πιο απλέ τροπόσαρ. Ακανά, κεράβα μπουτί κο Τμήμας Αγορών. Ισί μπουτ σουκάρ σο 20 μπρεσά ακανά ισινόμ κο τμήμας ανταβά, σο ακανά τθερέλα περίπου 5.000 πφραλέν σο ισί κι φαμιλί Μπέθελ ντα περίπου 2.000 πφραλέν σο βοηθίνενα χάνικ ντιβεσά κο Μπέθελ!

Πριν από 60 μπρεσά, ούτε σο νακχέλας μι γκοντιάταρ ότι κα αβάβας ατθέ. Η Λόρα βοηθιντάς-μαν σαρέ ανταλά μπρεσά. Αμαρί ζωή ισινέ μπαγιά μπουτ σουκάρ! Σαρέ ο διορισμοί σο τθεράας ντα σαρέ ο πφραλά σο κερντάμ λέντζαρ μπουτί ντα έργος ισί αμένγκε μπουτ σημαντικοί, αντρέ οντουλέντε ο πφραλά-ντα σε μπουτ γραφεία τμήματος σο τζάας τι ντικχάς μπουτέ τθεμέντε. Ακανά σο ισινόμ πιο μπουτ από 80 μπρεσένγκο, μπορίναβα τι κεράβ πιο χάνικ μπουτί σόσκε μπερεκέτι τερνέ πφραλά σικλιλέ τι κερέν λατσσές ανταβά έργος.

Ο ψαλμωδός γραφιντάς: «Ευτυχισμέ ισί ο λαός σο τθερέλα Ντεβλές ι Ιεχωβάς». (Ψαλμ. 33:​12) Καζόμ μπαγιά ισί ανταβά! Ισινόμ πφερντό εκτίμηση σο μπορισάλομ τι υπηρετίναβ ι Ιεχωβάς λέσκε ευτυχισμέ λαόσαρ.