1921​—Πριν από Σελ Μπρεσά

ΒΑΚΕΡΕΝΑ Ο ΛΑΤΣΣΕ ΑΜΠΕΡΙΑ ΜΠΙΝΤΑΡΑΝΕΣ

Για τι βακερέν ο λατσσέ αμπέρια, ο Σπουδαστές της Γραφής κα χρειαζίντιβελας τι αβέν μπίνταρανε. Έπρεπε τι βακερέν ο “λατσσέ αμπέρια οντουλένγκε σο τθερένας κοβλό γκι” αλλά κο πφιρνέ-ντα “ο ντιβές σο αμαρό Ντεβέλ κα λελ εκδίκηση”.

Ο πφραλ Τζ. Χ. Χόσκιν, σο τζουβντιόλας κο Καναδάς, βακερέλας ο λατσσέ αμπέρια μπίνταρανες παρόλο σο τζάνας λέσαρ μπαρί κόντρα. Κι άνοιξη κο 1921, αρακχλάς εκχέ παπαζίς. Ο πφραλ Χόσκιν πουταρντάς ι συζήτηση ακαλέ λαφίντζαρ: «Πρέπει τι τθεράς εκ σουκάρ συζήτηση ι Γραφιάκε, ντα ατζέ-ντα άμα κα βακεράς γιαβερά πράγματα ο εκ κατά γιαβέρ, μπορίνασα τι βακεράς ότι ο κάθε εκ αμένταρ πακιάλα γιαβερά πράγματα ντα τι ατσσάς αμαλά». Αλλά να γκιλέ αντικάς ο πράγματα. Ο πφραλ Χόσκιν βακερντάς: «Κερντάμας λάφι σάντε χάνικ λεπτά κάνα [ο παπάζι] ντινάς αζόμ ζουρανές κι πόρτα σο αμντισάλομ ότι λάκο μπαρό τζάμι κα περέλας τελέ».

«Σόσκε να τζάνα τι κερέν λάφι οντουλέντζαρ σο νανέ Χριστιανοί;» ντινάς βίκος ο παπάζι. Ο πφραλ Χόσκιν ατσσικιαρντάς-πες, αλλά καζόμ νασέλας βακερντάς αντρά-πέσταρ: “Ισινέ σαρ τι κεράβας λάφι εκχέ ασακέ τζενέσαρ!”

Κάνα ο παπάζι κερντάς ομιλία πι κχανγκιριάτε ο γιαβέρ ντιβές, βακερντάς μπουτ μπέτι πράγματα ι πφραλέσκε Χόσκιν. «Βακερντάς κο τζενέ ότι ισινόμας ο πο μπαρό ψεύτης σο αβιλόας ποτές οντουλέ τθανέστε ντα ότι έπρεπε τι μουνταρέν-μαν», βακερντάς ο πφραλ Χόσκιν. Αλλά ανταβά να κερντάς-λες τι τσσιναβέλ τι βακερέλ ο λατσσέ αμπέρια. Ντα κερντάς λάφι μπουτέ τζενέντε. Σαρ βακερντάς βοβ: «Ποτές να νακχλόμας πο λατσσές κο έργος. Μερικοί βακερένας μάνγκε: “Τζανάβα ότι ισινάν τζενό ι Ντεβλέσκο!” ντα ντένας-μαν πράγματα σο τθεράβας ανάγκη».

ΜΕΛΕΤΗ ΣΟ ΚΕΡΕΝΑΣ ΚΟΡΚΟΡΕ ΝΤΑ ΠΟΥΜΑΡΕ ΦΑΜΙΛΙΑΣΑΡ

Για τι βοηθίνεν ι τζενέν τι αγαβέν πο λατσσές ι Γραφή, ο Σπουδαστές της Γραφής νικαβένας ερωτήσεις ντα απαντήσεις κατά Γραφή κο περιοδικός Χρυσούς Αιών.a Ισινέ ερωτήσεις κατά Γραφή ι τερνένγκε σο ο νταντά ντα ο νταγιά μπορίνενας τι συζητίνεν-λεν πουμαρέ τσσαβέντζαρ. Ο νταντά ντα ο νταγιά έπρεπε τι κερέν ανταλά ερωτήσεις πουμαρέ τσσαβένγκε ντα τι βοηθίνεν-λεν τι αρακχέν ι απάντηση κι Αγία Γραφή. Χάνικ ερωτήσεις, σαρ ισινέ «Καζόμ βιβλία τθερέλα ι Γραφή;», σικλιαρένας ο βασικά πράγματα ι Γραφιάκε. Γιαβερά ερωτήσεις, σαρ ισινέ «Πρέπει κάθε αληθινός Χριστιανός τι μπεκλεντίνελ ότι κα τζαν λέσαρ κόντρα;», σικλιαρένας ι τερνέν τι αβέν μπίνταρανε κάνα κα βακερένας ο λατσσέ αμπέρια.

Τθερέλας επίσης ερωτήσεις ντα απαντήσεις κατά Γραφή οντουλένγκε σο τζανένας σο βακερέλας η Γραφή. Μπορίνενας τι αρακχέν ο απαντήσεις κο πρώτος τόμος ι βιβλιόσκο Γραφικαί Μελέται. Μπουτ τζενέ σο διαβάνενας Ο Χρυσούς Αιών, σικλιλέ μπουτ πράγματα ανταλέ ερωτησιένταρ, αλλά σοράν βακέρντιλο ότι κα τσσιναβένας τι νικαβέν ανταλά ερωτήσεις. Σόσκε;

ΕΚ ΝΕΒΟ ΒΙΒΛΙΟΣ!

Ο πφραλά σο κερένας κουμάντος αγαντέ ότι ο τζενέ έπρεπε τι σικλιόν ι Γραφιάκε εκχέ πο οργανωμέ τροπόσαρ. Οτθάρ, κο Νοέμβριος 1921 νικαντέ ο βιβλίος Η Κιθάρα του Θεού. Ο τζενέ σο λένας ο βιβλίος τσσουβένας-πες επίσης σε εκ σειρά μαθημάτων σο μπορίνενας τι κερέν κορκορέ. Ανταλά μαθήματα βοηθίνενας ι τζενέν τι σικλιόν ότι ο Ντεβέλ τθερέλα πι γκοντιάτε τι ντελ σαρέ κο τζενέ ζωή για πάντα. Σαρ αβένας-πες ο μαθήματα;

Κάνα εκ τζενό λέλας εκ βιβλίος, λέλας εκ χουρντί κάρτα-ντα σο βακερέλας καλά σελίδες έπρεπε τι διαβάνελ. Ι γιαβέρ εβδομάδα, λέλας εκ γιαβέρ κάρτα σο τθερέλας ερωτήσεις οντουλένγκε σο διαβαντάς. Κο τέλος, η κάρτα βακερέλας σο έπρεπε τι διαβάνελ ι γιαβερέ εβδομαδάκε.

Κάθε εβδομάδα για 12 εβδομάδες, ο τζενό λέλας κατά ταχυδρομείος εκ νεβί κάρτα κατά τοπική τάξη, ή γιαβέρσοϊ κχανγκιρί. Μπουτ φαρ ο κάρτες μπουτσσαβένας-λεν τζενέ κατά κχανγκιρί σο ισινέ πφουρέ ή σο ναστί τζάνας τι κερέν έργος κχερ κχερέστε. Για παράδειγμας, η Άννα Κ. Γκάρντνερ, κατά Ηνωμένες Πολιτείες βακερντάς: «Κάνα νικίστιλο ο βιβλίος Η Κιθάρα του Θεού, μι πφεν σο ναστί πφιρέλας, η Θέιλ, ακανά τθερέλας πο μπουτ έργος τι κερέλ, σόσκε μπουτσσαβέλας ο κάρτες ι εβδομαδάκε ι ερωτησιέντζαρ». Κάνα ο τζενό μπιτισκιαρέλας ο μάθημας, εκ πφραλ τζάλας τι βοηθίνελ-λες τι σικλιόλ πο μπουτ ι Γραφιάκε.

Ο ΕΡΓΟΣ ΣΟ ΙΣΙΝΕ ΑΝΓΚΛΑΛ

Κο τέλος οντουλέ μπρεσέσκο, ο πφραλ Ι. Φ. Ρόδερφορντ μπουτσσαντάς εκ γράμμας σαρέ κο κχανγκιριά. Βακερντάς: «Ο έργος σο αβιλό-πες ανταβά μπρες ι Βασιλειάκε ισινέ πο μπουτ ντα βοηθιντάς πο μπουτ τζενέν από κάθε γιαβέρ μπρες». Σοράν βακερντάς: «Ισί μπουτ έργος ατζέκ τι αβέλ-πες. Βακερέν γιαβερένγκε-ντα τι κερέν ανταβά σουκάρ έργος». Ντικχίντιβελα μπουτ λατσσές ότι ο Σπουδαστές της Γραφής κερντέ οντουβά σο βακερντάς. Κο μπρες 1922 βακερντέ μπίνταρανες ο λατσσέ αμπέρια ι Βασιλειάκε πο μπουτ από κάθε γιαβέρ φαρ.