Μα Τσσιναβέν τι “Πφιρέν κι Αλήθεια”

1. Σο λατσσιπέ ντικχάσα κάνα βακεράσα ι γιαβερένγκε σαρ σικλιλάμ “ι αλήθεια”;

«ΣΑΡ σικλιλάν ι αλήθεια;» Σίγουρα απαντιντέν μπουτ φαρ ανταλέ ερωτησιάτε. Ισί εκ κατά πρώτα πράγματα σο πουτσένα-αμέν ο πφραλά για τι σικλιόν-αμέν πο λατσσές. Μπεϊντίνασα μπουτ τι ασουνάς σαρ σικλιλέ ντα μανγκλέ ι Ιεχωβάς αμαρέ πφραλά ντα πφενιά ντα χαιρίνασα τι βακεράς λένγκε καζόμ σημαντική ισί η αλήθεια αμένγκε. (Ρωμ. 1:​11) Κάνα κεράσα λάφι ανταλέσκε, ντάσα-αμέν γκοντί καζόμ μανγκάσα ι αλήθεια. Ντα μανγκάσα ατζέ πο μπουτ τι “πφιράς κι αλήθεια”​—τι τζουβντιάς εκχέ τροπόσαρ σο ανέλα αμένγκε ι ευλογία ντα ι ζαμ ι Ιεχωβάσκι.​—3 Ιωάν. 4.

2. Σο κα ντικχάς ανταλέ μαθημάστε;

² Ανταλέ μαθημάστε, κα ντας-αμέν γκοντί μερικά πράγματα σο κερένα-αμέν τι μανγκάς ι αλήθεια. Σοράν, κα ντικχάς σαρ μπορίνασα μα τι τσσιναβάς τι σικαβάς αμαρό μανγκιπέ ανταλέ πααλίς δωρόσκε. Σίγουρα, ανταβά μάθημας κα κερέλ-αμέν τι εκτιμίνας ατζέ πο μπουτ ι Ιεχωβάς σο αντάς-αμέν κι αλήθεια. (Ιωάν. 6:​44) Ντα κα κερέλ-αμέν τι μανγκάς ατζέ πο μπουτ τι βακεράς ι αλήθεια κο γιαβερά.

ΣΟΣΚΕ ΜΑΝΓΚΑΣΑ “Ι ΑΛΗΘΕΙΑ”

3. Καβά ισί ο πο σημαντικός πράγμας σο κερέλα-αμέν τι μανγκάς ι αλήθεια;

³ Ισί μπουτ πράγματα σο κερένα-αμέν τι μανγκάς ι αλήθεια. Ο πο σημαντικός ισί ότι μανγκάσα ι Ιεχωβά Ντεβλές, σο λέσταρ αβέλα η αλήθεια. Αντράλ λέσκε Λαφίσταρ, κατά Αγία Γραφή, σικλιλάμ ότι βοβ νανέ σάντε ο πο Ζουρανό, σο λατσσαρντάς ο ουρανός ντα ι πφουβ, αλλά ότι ισί αμαρό λατσσό ουράνιος Ντατ-ντα, σο πφαμπόλα αμένγκε μανγκιμάσαρ. (1 Πέτρ. 5:7) Τζανάσα ότι αμαρό Ντεβέλ “τζιτζίνελα ντα πφαμπόλα ι γιαβερένγκε, να χολιάνελα εύκολα, ντα ισί πφερντό αφοσιωμέ μανγκιπέ ντα αλήθεια”. (Έξοδ. 34:6) Ο Ιεχωβά μανγκέλα ι δικαιοσύνη. (Ησ. 61:8) Ντουκχάλα κάνα ντικχέλα-αμέν τι τσσίντας προβλήματα, ντα ισί έτοιμος​—βα, μπεσέλα σαρ σαρ—​τι νασκιαρέλ σαρέ ο βάσανα κο βακίτι σο τραμπιντάς. (Ιερ. 29:​11) Σο σουκάρ ισί ανταβά! Άκ’ σόσκε μανγκάσα ι Ιεχωβάς αζόμ μπουτ!

4, 5. Σόσκε μοιασκιαρντάς ο απόστολος Παύλος αμαρί ελπίδα εκχέ αγκυράσαρ;

⁴ Καβά ισί εκ γιαβέρ πράγμας σο κερέλα-αμέν τι μανγκάς ι αλήθεια; Η αλήθεια ανέλα αμένγκε μπουτ λατσσιπέ. Ντικχέν εκ παράδειγμας. Αντρέ κι αλήθεια κι Γραφιάκι ισί η ελπίδα-ντα σο τθεράσα ι ντιβεσένγκε σο κα αβέν. Ο απόστολος Παύλος σικαντάς καμπόρ μπαρί αξία τθερέλα ανταγιά ελπίδα, κάνα γραφιντάς: «Τθεράσα ανταγιά ελπίδα σαρ άγκυρα ι γκίσκε, σίγουρη ντα σταθερή». (Εβρ. 6:​19) Σαρ η άγκυρα κερέλα ο καράβι τι αβέλ σταθερός, αντικάς αμαρί ελπίδα σο ισί αντράλ κατά Γραφή μπορίνελα τι κερέλ-αμέν σταθεροί κάνα νακχάσα προβλήματα κι ζωή.

⁵ Ατθέ, ο Παύλος κερέλας λάφι ι ελπιδάκε σο τθερένα τι τζουβντιόν κο ουρανός ο χρισμέ Χριστιανοί. Αλλά λέσκε λάφια ισί ι Χριστιανόνγκε-ντα σο μπεκλεντίνενα τι τζουβντιόν για πάντα κο παράδεισος κι πφουβ. (Ιωάν. 3:​16) Σίγουρα, κάνα σικλιλάμ ότι ντιντιόλα ελπίδα κο τζενέ τι τζουβντιόν για πάντα, αμαρί ζωή αβιλί πφερντί.

6, 7. Σο λατσσιπέ ντικχλάς η Υβόν σο σικλιλί ι αλήθεια ι ντιβεσένγκε σο κα αβέν;

⁶ Ντικχέν σο βακερέλα εκ πφεν, η Υβόν. Να μπαριλί κι αλήθεια, ντα κάνα ισινέ χουρντί νταρέλας κατά μεριπέ. Ατσσιλόας λάκε γκοντιάτε εκ λάφι σο διαβαντάας, ότι εκ ντιβές σαρέ ο τζενέ μερένα. Η Υβόν βακερέλα: «Ανταβά λάφι κερέλας-μαν τι χασαράβ μο σοϊπέ ιράτ ντα σκεφτίναβας σο κα κερντιόλ κο ντιβεσά σο κα αβέν. “Σίγουρα η ζωή νανέ σάντε ανταβά σο τζουβντιάβα”, σκεφτίναβας. “Σόσκε ισινόμ ατθέ;” Να μανγκάβας τι μεράβ!»

⁷ Πο σοράν, κάνα μπαριλί, η Υβόν κερντάς λάφι ι Ιεχωβάσκε Μαρτυρέντζαρ. Βόι βακερέλα: «Πακιασάλομ ότι αβέλας-πες τι τθεράβ ι ελπίδα τι τζουβντιάβ για πάντα κο Παράδεισος κι πφουβ». Σο λατσσιπέ ντικχλάς αμαρί πφεν σο σικλιλί ι αλήθεια; Βόι βακερέλα ακαβά-ντα: «Ακανά να χασαράβα μο σοϊπέ επειδή τσσουβάβα μι γκίστε ι ντιβεσένγκε σο κα αβέν ή ι μεριμάσκε». Σαρ αγαβάσα, η Υβόν πακιάλα ότι η αλήθεια ισί μπουτ σημαντική, ντα αβέλα λάκο γκι κάνα πουτρέλα κο γιαβερά ι σουκάρ πραγματένγκε σο μπεκλεντίνελα τι αβέν.​—1 Τιμ. 4:16.

8, 9. (α) Κι παραβολή κι Ιησούσκι, καζόμ αξία τθερέλας ο θησαυρός ι τζενέσκε σο αρακχλάς-λες; (β) Καμπόρ σημαντική ισί τουμένγκε η αλήθεια;

⁸ Αντρέ κι αλήθεια κι Γραφιάκι ισί ο λατσσέ αμπέρια-ντα ι Ντεβλέσκε Βασιλειάκε. Ο Ιησούς μοιασκιαρντάς ι αλήθεια οντουλέ Βασιλειάκι εκχέ γκεραντέ θησαυρόσαρ. Σαρ ντικχάσα κο εδάφιος Ματθαίος 13:​44, ο Ιησούς βακερντάς: «Η Βασιλεία σο ισί κο ουρανός ισί σαρ θησαυρός γκεραντό κο χωράφι, σο αρακχλάς-λες εκ τζενό ντα γκεραντάς-λες· ντα πι χαράταρ τζάλα ντα μπικινέλα σο-ντα τθερέλα ντα κινέλα οντουβά χωράφι». Τσσουβέν σημασία ότι οντουβά τζενό να ρόντελας ι θησαυρόσκε. Αλλά κάνα αρακχλάς-λες, μπικιντάς μάξους λέσκε σαρέ οντουλά σο τθερέλας. Σόσκε; Σόσκε τζανέλας καμπόρ πααλίς ισινέ οντουβά θησαυρός. Τθερέλας μπουτ πο μπαρί αξία σαρέ κατά πράγματα σο έπρεπε τι μουκχέλ.

⁹ Τουμέν, ντικχένα αντικάς ι αλήθεια; Σίγουρα! Τζανάσα ότι τίποτα σο τθερέλα τι ντελ ανταβά ντουνιάς νανέ πο λατσσό κατά χαρά σο τθεράσα καζόμ υπηρετίνασα ι Ιεχωβάς ακανά ντα κατά ελπίδα τι τζουβντιάς για πάντα τελάλ κατά Βασιλεία. Ο προνόμιος τι τθεράς εκ λατσσί φιλία ι Ιεχωβάσαρ αξίνελα πο μπουτ σαρέ κατά πράγματα σο χρειαζίντιβελα τι μουκχάς. Αμαρί πο μπαρί χαρά ισί “τι κεράς-λες τι χαιρίνελ σαρέ κο πράγματα”.​—Κολ. 1:10.

10, 11. Σόσκε μανγκλάς ο Μάικλ τι λελ γιαβέρ ντρομ πι ζωγιάτε;

¹⁰ Μπουτ αμένταρ μουκχλάμ πράγματα σο μανγκάας μπουτ για τι τθεράς ι Ιεχωβάσκι ζαμ. Ισί τζενέ σο μουκχλέ μπαρέ καριέρες κο ντουνιάς ή τσσιναντέ τι κουλαντίνεν ο χουλανιπέ. Ντα γιαβερά κάνα σικλιλέ ι Ιεχωβάσκε, λιντέ ντιπ γιαβέρ ντρομ πουμαρέ ζωγιάτε. Ανταβά κερντάς ο Μάικλ. Να μπαριλό κι αλήθεια. Κάνα ισινέ τερνό, σικλιλό καράτε. Βοβ βακερέλα: «Ισαράβας-μαν μι ζουρανέ σωμάσκε. Ισινέ φαρ σο πακιάβας ότι ναστί χασαράβας καεκχέσταρ». Όμως ο Μάικλ, κατά μελέτη σο κερέλας, σικλιλό σαρ ντικχέλα ο Ιεχωβά ι βία. (Ψαλμ. 11:5) Ο Μάικλ βακερέλα: «[Οντουβά πφραλ πι ρομνιάσαρ σο κερένας-μαν μελέτη], ποτές να βακερντέ μάνγκε τι μουκχάβ ο καράτε. Απλώς συνεχιντέ τι σικλιαρέν-μαν ι αλήθεια ι Γραφιάκι».

¹¹ Καζόμ πο μπουτ σικλιόλας ο Μάικλ ι Ιεχωβάσκε, αζόμ πο μπουτ μπαριόλας ο μανγκιπέ σο τθερέλας Λέσκε. Πουτάρντιλο λέσκο γκι κάνα σικλιλό ότι ο Ιεχωβά αγαβέλα ι ντουκχ πι υπηρετόνγκι. Καζόμ νακχέλας ο βακίτι, ο Μάικλ ντικχλάς ότι έπρεπε τι λελ εκ απόφαση σο κα αλλάνελας λέσκι ζωή. Βοβ βακερέλα: «Τζανάβας ότι τι μουκχάβ ο καράτε κα αβέλας ο πο δύσκολος πράγμας σο κερντόμας ποτές. Αλλά τζανάβας-ντα ότι ανταβά κα κερέλας ι Ιεχωβάσκο γκι ντα ισινόμας σίγουρος ότι, σο-ντα τι μουκχάβας μάξους λέσκε, αξίνελας». Ο Μάικλ αγαντάς καμπόρ αξία τθερέλας η αλήθεια σο αρακχλάας, ντα ανταβά τσσιντιντάς-λες τι κερέλ μπαρέ αλλαγές πι ζωγιάτε.​—Ιακ. 1:25.

12, 13. Σαρ ντινάς φως η αλήθεια ι Γραφιάκι κι Μίλι;

¹² Για τι σικαβέλ καμπόρ αξία τθερέλα η αλήθεια, η Γραφή μοιασκιαρέλα-λα εκχέ λυχναρίσαρ σο λέλα-πες αντρέ κο καρανίκι. (Ψαλμ. 119:​105· Εφεσ. 5:8) Η Μίλι, κατά Αζερμπαϊτζάν, εκτιμίνελα μπουτ ο φως σο ντινάς-λα ο Λάφι ι Ντεβλέσκο. Μπαριλί εκχέ φαμιλιάτε σο να τθερένας σαρέ ι ίδια θρησκεία. Λάκο ντατ ισινέ Μουσουλμάνος ντα λάκι ντάι Εβραία. Η Μίλι βακερέλα: «Παρόλο σο πακιάβας κο Ντεβέλ, ισινέ μπουτ πράγματα σο χάνας-μαν. Πουτσάβας μο νεαυτός: “Σόσκε λατσσαρντάς ο Ντεβέλ ι τζενέν, ντα σόσκε τι μαρέν-πες ο τζενέ σαρί πουμαρί ζωή σάντε για τι τζαν κι κόλαση ντα τι τσσίντεν μπουτ ντουκχ για πάντα;” Ο τζενέ βακερένας ότι σαρέ ο πράγματα αβένα-πες σόσκε μανγκέλα-λεν ο Ντεβέλ. Οτθάρ, πουτσάβας μο νεαυτός: “Μήπως ο Ντεβέλ κερέλα κουμάντος αμαρί ζωή ντα αβέλα λέσκο γκι κάνα ντικχέλα-αμέν τι τσσίντας;”»

¹³ Η Μίλι να τσσιναντάς τι ρόντελ απαντήσεις πι ερωτησιέντε. Σοράν, μανγκλάς τι κερέλ μελέτη ντα σικλιλί ι αλήθεια. Βόι βακερέλα: «Ο λάφια ι Γραφιάκε πφερντέ μι γκοντί ντα αλλαντέ ντιπ ο τρόπος σο ντικχάβας ι ζωή. Ι Ντεβλέσκο Λάφι ντινάς-μαν τι αγαβάβ σαρ ισί μπαγιά ο πράγματα, ντα ανταβά αντάς μάνγκε ειρήνη αντρέ μάντε». Σαρ η Μίλι, σαρέ ισαράσα ο ναβ ι Ιεχωβάσκο, “Οντουλέσκο σο ντινάς-αμέν βίκος τι νικιάς κατά καρανίκι ντα τι τζας κο φως σο τθερέλα”.​—1 Πέτρ. 2:9.

14. Σαρ κα μπαριαράς αμαρό μανγκιπέ ι αληθειάκε; (Ντικχέν ο πλαίσιος-ντα «Γιαβερά-ντα Παραδείγματα»)

¹⁴ Ανταλά ισί σάντε χάνικ παραδείγματα σο σικαβένα ι αξία ι αληθειάκι. Σίγουρα, μπορίνασα τι σκεφτίνας μπουτ γιαβερά-ντα. Καζόμ σικλιαρένα-τουμέν κατά Αγία Γραφή, κα αβέλας λατσσό τι ρόντεν γιαβερά-ντα πράγματα σο κερένα-αμέν τι μανγκάς ι αλήθεια. Καζόμ πο μπουτ μανγκάσα ι αλήθεια, αζόμ πο μπουτ τρόπους κα αρακχάς για τι σικαβάς αμαρό μανγκιπέ λάκε.

ΣΑΡ ΣΙΚΑΒΑΣΑ ΟΤΙ ΜΑΝΓΚΑΣΑ Ι ΑΛΗΘΕΙΑ

15. Καβά ισί εκ τρόπος σο μπορίνασα τι σικαβάς αμαρό μανγκιπέ ι αληθειάκε;

¹⁵ Σικαβάσα ότι μανγκάσα ι αλήθεια κάνα σικλιαράσα-αμέν μπουτ φαρ κατά Αγία Γραφή ντα κατά έντυπα σο βασίντιβενα λάτε. Να μπιστράσα ότι, καζόμ-ντα βακίτι τι αβάς κι αλήθεια, πάντα κα τθεράς τι σικλιάς νεβέ πράγματα. Η πρώτη Σκοπιά σο νικίστιλι βακερντάς: «Η αλήθεια ισί σαρ ταπεινός λουλουδάκι κι έρημος κι ζωγιάκι. Ντονταλάι λέσταρ ισί μπερεκέτι μπαρέ τσαριά χουχαϊμάσκε σο τζάνα τι τασαβέν-λες. Άμα μανγκένα τι αρακχέν-λες, πρέπει πάντα τι τθερέν τουμαρέ γιακχά πουταρντέ. . . . Άμα μανγκένα-λες, πρέπει τι κερέν τελέ για τι λεν-λες. Μα τι ερεσέλ-τουμέν εκ λουλούδι. . . . Μα τσσιναβέν τι γκίντεν ντα τι ρόντεν ασακέ λουλούδια». Μανγκέλα μπουτί για τι σικλιαράς-αμέν, αλλά αξίνελα τι κεράς-λες ανταβά.

16. Καβά τρόπος για τι σικλιαρέν-τουμέν κερέλα λατσσιπέ τουμένγκε; (Παροιμίες 2:​4-6)

¹⁶ Να μπεϊντίνασα σαρέ τι διαβάνας ντα τι σικλιαράς-αμέν. Αλλά ο Ιεχωβά βακερέλα αμένγκε τι “ρόντας” για τι αγαβάς πο λατσσές ι αλήθεια ντα τι “χαντζουβάς” για τι κεράς-λα αμαρί. (Διαβάνεν Παροιμίες 2:​4-6) Κάνα μαράσα-αμέν ανταλέσκε, ντικχάσα πάντα λατσσιπέ. Ο Κόρι βακερέλα ότι, κάνα διαβάνελα ι Αγία Γραφή, ρόντελα ο κάθε εδάφιος εκ εκ. Βακερέλα ακαβά-ντα: «Διαβάναβα σαρέ ο υποσημειώσεις, ντικχάβα σαρέ ο παραπομπές ντα ρόνταβα πο μπουτ. . . . Σικλιάβα μπουτ πράγματα κάνα διαβάναβα ανταλέ τροπόσαρ!» Είτε διαβάνασα ανταλέ τροπόσαρ είτε εκχέ γιαβερέσαρ, σικαβάσα αμαρί εκτίμηση ι αληθειάκε κάνα ντάσα αμαρέ σαατίσταρ ντα αμαρέ ζοριάταρ για τι σικλιαράς-αμέν λάταρ.​—Ψαλμ. 1:​1-3.

17. Σο μανγκέλα τι βακερέλ τι τζουβντιάς ι αλήθεια; (Ιακώβου 1:25)

¹⁷ Σίγουρα, τζανάσα ότι να ερεσέλα σάντε τι σικλιαράς-αμέν κατά αλήθεια. Για τι ντικχάς καμπόρ πο μπαρό λατσσιπέ αβέλα-πες, πρέπει τι τζουβντιάς ι αλήθεια, γιαβερέ λαφίντζαρ τι κεράς αμαρέ ζωγιάτε οντουλά σο σικλιάσα. Σάντε αζομάν κα ανέλ αμένγκε αληθινή ευτυχία η αλήθεια. (Διαβάνεν Ιακώβου 1:​25) Σαρ μπορίνασα τι αβάς σίγουροι ότι τζουβντιάσα ι αλήθεια; Εκ πφραλ βακερέλα ότι ισί λατσσό τι ρόντας αμαρό νεαυτός για τι αρακχάς καλέ πραγματέντε τζάσα λατσσές ντα καλέντε πρέπει τι τζας πο λατσσές. Ο απόστολος Παύλος βακερντάς-λες αντικάς: «Κάι-ντα τι ερεσάσα ανταλέ ντρομέστε, τι συνεχίνας τι πφιράς σωστά κο ίδιος ντρομ».​—Φιλιπ. 3:16.

18. Σόσκε κεράσα σο νακχέλα αμαρέ βαστένταρ για τι “πφιράς κι αλήθεια”;

¹⁸ Ανέν τουμαρέ γκοντιάτε καζόμ λατσσιπέ αβέλα κάνα κεράσα σο νακχέλα αμαρέ βαστένταρ για τι “πφιράς κι αλήθεια”! Να κεράσα πο λατσσί σάντε αμαρί ζωή, αλλά ανάσα χαρά κο Ιεχωβά ντα αμαρέ πφραλέντε. (Παρ. 27:​11· 3 Ιωάν. 4) Να πακιάνα τουμέν-ντα ότι ανταλά ισί ο πο σημαντικοί λόγοι για τι μανγκάς ι αλήθεια ντα τι τζουβντιάς ι αλήθεια;