Μπορίνασα τι Τζουβντιάς για Πάντα

1. Κάνα σκεφτίνασα λατσσές ο λάφι ι Ιεχωβάσκο ότι κα τζουβντιάς για πάντα, σαρ νιωθίνασα;

Ο ΙΕΧΩΒΑ ντέλα πο λάφι ότι οντουλά σο ντένα-λες καν κα “τζουβντιόν για πάντα”. (Ρωμ. 6:​23) Κάνα σκεφτίνασα λατσσές οντουλά σο ντέλα-αμέν ο Ιεχωβά, αμαρό μανγκιπέ λέσκε σίγουρα μπαριόλα. Σκεφτίνεν: Αμαρό Ντατ σο ισί κο ουρανός μανγκέλα-αμέν αζόμ μπουτ σο μανγκέλα τι υπαρχίντιβας για πάντα, πασέ λέστε αιώνια.

2. Σαρ βοηθίνελα-αμέν ο λάφι σο ντινάς ο Ντεβέλ ότι κα τζουβντιάς για πάντα;

² Ο λάφι σο ντινάς ο Ντεβέλ ότι κα τζουβντιάς για πάντα βοηθίνελα-αμέν τι νταϊντίνας ο προβλήματα σο νακχάσα ακανά. Ατζέ-ντα κάνα αμαρέ ντουσμάνια βακερένα ότι κα μουνταρέν-αμέν, να κεράσα παλάλ. Σόσκε; Επειδή τζανάσα ότι άμα κα μεράς πιστοί κο Ιεχωβά, βοβ κα τζουβντιαρέλ-αμέν ντα κα ντελ-αμέν ι ευκαιρία μα τι μεράς ποτές. (Ιωάν. 5:​28, 29· 1 Κορ. 15:​55-58· Εβρ. 2:​15) Σόσκε ισινάμ σίγουροι ότι μπορίνασα τι τζουβντιάς για πάντα; Ντικχέν ο λόγοι σο ισί πο τελέ.

Ο ΙΕΧΩΒΑ ΤΖΟΥΒΝΤΙΟΛΑ ΓΙΑ ΠΑΝΤΑ

3. Σόσκε ισινάμ σίγουροι ότι ο Ιεχωβά μπορίνελα τι ντελ-αμέν ζωή για πάντα; (Ψαλμός 102:​12, 24, 27)

³ Τζανάσα ότι ο Ιεχωβά μπορίνελα τι ντελ-αμέν ζωή για πάντα επειδή λέσταρ αβέλα η ζωή ντα ο ίδιος τζουβντιόλα για πάντα. (Ψαλμ. 36:9) Ντικχέν μερικά εδάφια κατά Γραφή σο σικαβένα ότι ο Ιεχωβά υπαρχίντιβελας ντα κα υπαρχίντιβελ για πάντα. Ο εδάφιος Ψαλμός 90:2 βακερέλα ότι ο Ιεχωβά ισί «από πάντα ντα για πάντα». Εμ ο Ψαλμός 102 βακερέλα κάτι ασακό. (Διαβάνεν Ψαλμός 102:​12, 24, 27) Ο προφήτης Αββακούμ γραφιντάς αμαρέ Νταντέσκε σο ισί κο ουρανός: «Να υπαρχίντιβεας τούι πάντα, Ιεχωβά; Ντέβλα μου, σο ισινάν μο Άγιος, τούι να μερέσα».​—Αββακ. 1:12.

4. Πρέπει τι ανησυχίνας άμα να αγαβάσα ότι ο Ιεχωβά υπαρχίντιβελας πάντα; Εξηγίνεν.

⁴ Μήπως δυσκολίντιβενα τι αγαβέν ότι ο Ιεχωβά υπαρχίντιβελας «για πάντα»; (Ησ. 40:​28) Μπουτ γιαβερά-ντα τζενέ δυσκολίντιβενα τι αγαβέν-λες ανταβά. Ο Ελιού βακερντάς ότι: «Αμαρί γκοντί να ερεσέλα για τι αγαβέλ καζόμ μπρεσά τζουβντιόλα [ο Ντεβέλ]». (Ιώβ 36:​26) Αλλά επειδή αμέν ναστί αγαβάσα κάτι, ανταβά να μανγκέλα τι βακερέλ ότι νανέ μπαγιά. Για παράδειγμας, ναστί αγαβάσα ντιπ σαρ λειτουργίνελα ο ρεύμας. Μανγκέλα τι βακερέλ ανταβά ότι ο ρεύμας να υπαρχίντιβελα; Σίγουρα όχι. Κάτι ασακό αβέλα-πες αμέντζαρ-ντα. Αμέν ο τζενέ, μπέκιμ μα τι αγαβάς ποτές ντιπ λατσσές ότι ο Ιεχωβά υπαρχίντιβελας πάντα ντα κα υπαρχίντιβελ πάντα. Αλλά ανταβά να μανγκέλα τι βακερέλ ότι ο Ντεβέλ να τζουβντιόλα για πάντα. Οντουλά σο αμέν μπορίνασα ή να μπορίνασα τι αγαβάς να τσσουβένα όρια κο Δημιουργός. (Ρωμ. 11:​33-36) Ντα ο Δημιουργός υπαρχίντιβελας πριν τι κερντιόν σαρέ ο πράγματα κο σύμπαν, σαρ ισί ο κχαμ ντα ο τσεργανιά. Ο Ιεχωβά βακερέλα αμένγκε ότι βοβ ισί ο Δημιουργός ι πφουβιάκο, σο κερντάς-λα πι ζοριάσαρ. Βα, βοβ υπαρχίντιβελας πριν “τι κερέλ ο μπαρό ουρανός”. (Ιερ. 51:​15· Πράξ. 17:​24) Καβά ισί εκ γιαβέρ λόγος σο πφερέλα-αμέν σιγουριά ότι μπορίνασα τι τζουβντιάς για πάντα;

ΚΕΡΝΤΙΛΑΜ ΓΙΑ ΤΙ ΤΖΟΥΒΝΤΙΑΣ ΓΙΑ ΠΑΝΤΑ

5. Καγιά ευκαιρία τθερέλας ο πρώτος ζευγάρι;

⁵ Σαρέ ο πράγματα σο τθερένα ζωή κι πφουβ ντα κερντιλέ κατά Ιεχωβά τελικά κα μερένας. Εκτός κατά τζενέ, σο ντινάς σάντε λέντε ι ευκαιρία μα τι μερέν ποτές. Όμως, ο Ιεχωβά βακερντάς κο Αδάμ: «Κατά δέντρος σο ντέλα γνώση ι λατσσιμάσκε ντα ι γκεραλιμάσκε δεν πρέπει τι χας, σόσκε οντουβά ντιβές σο κα χας λέσταρ σίγουρα κα μερές». (Γέν. 2:​17) Άμα ο Αδάμ ντα η Εύα ντινέας καν κο Ιεχωβά, να κα μερένας. Ισί λογικός τι πακιάς ότι κάποια στιγμή ο Ιεχωβά κα μουκχέλας-λεν τι χαν κατά δέντρος ι ζωγιάκο. Ανταβά κα μανγκέλας τι βακερέλ ότι κα τθερένας ι σιγουριά ότι κα τζουβντιόνας για πάντα.b​—Γέν. 3:22.

6, 7. (α) Σο γιαβέρ σικαβέλα ότι ο τζενέ να κερντιλέ για τι μερέν; (β) Σο κα μανγκένας τι κερέν κο νεβό ντουνιάς; (Ντικχέν ι φωτογραφία)

⁶ Μερικά τζενέ σο ρόντενα, αρακχλέ επιστημονικές αποδείξεις ότι αμαρό εγκέφαλος μπορίνελα τι σικλιόλ πο μπουτ πληροφορίες οντουλένταρ σο σικλιάσα αμαρέ ζωγιάτε. Κο 2010, εκ περιοδικός βακερντάς ότι η χωρητικότητα σο τθερέλα αμαρό εγκέφαλος ισί σχεδόν 2,5 εκατομμύρια γιγαμπάιτ. Ισί ο ίδιος μέγεθος σο κα τθερέλας εκ μπουτ μπαρί ταινία. Για τι ντικχέλ-λα εκ τζενό, κα μανγκέλας 3 εκατομμύρια σαάτια, ή γιαβέρσοϊ πο μπουτ από 300 μπρεσά. Ντα η χωρητικότητα σο τθερέλα αμαρό εγκέφαλος μπορεί τι αβέλ μπουτ πο μπαρί. Όμως, ανταλά πράγματα σικαβένα ότι ο Ιεχωβά κερντάς αμαρό εγκέφαλος τι ατσσικιαρέλ πο μπουτ πληροφορίες οντουλένταρ σο ατσσικιαράσα μέχρι κο 70 ή 80 μπρεσά.​—Ψαλμ. 90:10.

⁷ Ο Ιεχωβά κερντάς-αμέν επίσης τι μανγκάς μπουτ τι ατσσάς τζουβντέ. Η Γραφή βακερέλα ι τζενένγκε: «[Ο Ντεβέλ] τσσουντάς αντρέ λένγκε γκίστε ι επιθυμία τι τζουβντιόν για πάντα». (Εκκλ. 3:​11) Ανταβά ισί εκ λόγος σο ντικχάσα ο μεριπέ σαρ ντουσμάνι. (1 Κορ. 15:​26) Άμα κα αβάς μπουτ νασφαλέ, μήπως να κα κεράς τίποτα ντα απλά κα μπεκλεντίνας τι μεράς; Νάα. Ο πο μπουτ φαρ τζάσα κο γιατρός ντα μπέκιμ τι λας φάρμακα για τι ντας πέρα ο νασφαλιπέ. Ντα κεράσα σο νακχέλα αμαρέ βαστέσταρ για μα τι μεράς. Ντα κάνα κάποιος σο μανγκάσα μερέλα, είτε ισί τερνό είτε πφουρό, τθεράσα για μπουτ βακίτι ντουκχ αντρέ αμαρέ γκίστε. (Ιωάν. 11:​32, 33) Σίγουρα, άμα αμαρό Ντατ σο μανγκέλα-αμέν να τθερέλας σκοπός τι ατσσάς τζουβντέ, να κα τσσουβέλας αντρ’ αμέντε ι επιθυμία τι ατσσάς τζουβντέ. Τθεράσα όμως γιαβερά-ντα λόγους τι πακιάς ότι μπορίνασα τι τθεράς ζωή για πάντα. Για τι ντικχάς χάνικ πράγματα σο κερντάς ο Ιεχωβά ανγκλέ ντα αμαρέ ντιβεσέντε, σο σικαβένα ότι ο σκοπός σο τθερέλας κι αρχή να αλλαξάλο.

Ο ΣΚΟΠΟΣ Ι ΙΕΧΩΒΑΣΚΟ ΝΑ ΑΛΛΑΞΑΛΟ

8. Καγιά σιγουριά σο τθερέλα τι κερέλ ι Ιεχωβάσκε σκοπόσαρ ντέλα-αμέν ο εδάφιος Ησαΐας 55:11;

⁸ Παρόλο σο ο Αδάμ ντα η Εύα αμαρτιντέ ντα αντέ ο μεριπέ πουμαρέ τσσαβέντε, ο Ιεχωβά να αλλαντάς πο σκοπός. (Διαβάνεν Ησαΐας 55:​11) Λέσκο σκοπός ισί ο ίδιος​—τι τζουβντιόν ο πιστά τζενέ για πάντα. Τζανάσα-λες ανταβά οντουλένταρ σο βακερντάς ντα κερντάς ο Ιεχωβά για τι κερέλ πο σκοπός τι νικιόλ μπαγιά.

9. Σο λάφι ντινάς ο Ντεβέλ; (Δανιήλ 12:2, 13)

⁹ Ο Ιεχωβά ντινάς πο λάφι ότι κα τζουβντιαρέλ ι μουλέν ντα κα ντελ-λεν ι ευκαιρία τι τζουβντιόν για πάντα. (Πράξ. 24:​15· Τίτο 1:1, 2) Ο πιστός Ιώβ ισινέ σίγουρος ότι ο Ιεχωβά μπεσέλα σαρ σαρ τι τζουβντιαρέλ οντουλέν σο μουλέ. (Ιώβ 14:​14, 15) Ο προφήτης Δανιήλ τζανέλας ότι ο τζενέ τθερένα ι ευκαιρία τι αναστίντιβεν ντα τι τζουβντιόν για πάντα. (Ψαλμ. 37:​29· διαβάνεν Δανιήλ 12:2, 13) Ο Ιουδαίοι-ντα κο ντιβεσά κι Ιησούσκε τζανένας ότι ο Ιεχωβά κα ντελ πι πιστέ υπηρετόντε ζωή για πάντα. (Λουκ. 10:​25· 18:​18) Ο Ιησούς να κερντάς σάντε μπουτ φαρ λάφι για την υπόσχεση ανταγιά, αλλά αναστισάλο-ντα πι Νταντέσταρ.​—Ματθ. 19:​29· 22:​31, 32· Λουκ. 18:​30· Ιωάν. 11:25.

10. Σο σικαβένα ο αναστάσεις σο αβιλέ-πες κο πουρανέ μπρεσά; (Ντικχέν ι φωτογραφία)

¹⁰ Ο Ιεχωβά ισί Οντουβά σο ντέλα ζωή ντα τθερέλα ι ζορ τι ανέλ ι τζενέν κι ζωή. Ντινάς κο προφήτης Ηλίας ι ζορ τι τζουβντιαρέλ ι χηράκε τσσαβές κατά Σαρεπτά. (1 Βασ. 17:​21-23) Σοράν, ι Ντεβλέσκε βοηθειάσαρ, ο προφήτης Ελισαιέ αντάς κι ζωή ι Σουναμιτισσάκε τσσαβές. (2 Βασ. 4:​18-20, 34-37) Ανταλά ντα γιαβερά αναστάσεις σικαβένα ότι ο Ιεχωβά τθερέλα ι ζορ τι ανέλ τζενέν κι ζωή. Κάνα ο Ιησούς ισινέ κι πφουβ, σικαντάς ότι λέσκο Ντατ ντινάας-λες ανταγιά ζορ. (Ιωάν. 11:​23-25, 43, 44) Ακανά ο Ιησούς ισί κο ουρανός ντα ντιντιλί-λες «σαρί η εξουσία κο ουρανός ντα κι πφουβ». Οτθάρ μπορίνελα τι κερέλ ι υπόσχεση σο ντινάς ότι «σαρέ οντουλά σο ισί κο μεζάρια» κα τζουβντιόν ντα κα τθερέν ι ευκαιρία τι ατσσόν τζουβντέ για πάντα.​—Ματθ. 28:​18· Ιωάν. 5:​25-29.

11. Σαρ ντέλα-αμέν ο λύτρος ι ευκαιρία τι τζουβντιάς για πάντα;

¹¹ Σόσκε μουκχλάς ο Ιεχωβά τι μερέλ λέσκο τσσαβό ντα τι ντουκχάλ αζόμ μπουτ; Ο Ιησούς μουτθαντάς ο λόγος κάνα βακερντάς: «Ο Ντεβέλ μανγκλάς αζόμ μπουτ ι ντουνιάς σο ντινάς πι μοναδικέ Τσσαβές, για μα τι καταστραφίντιβελ οντουβά σο σικαβέλα πίστη λέστε, αλλά τι τθερέλ ζωή για πάντα». (Ιωάν. 3:​16) Κάνα ντινάς πι Τσσαβές σαρ λύτρος για τι ιτσσαρέλ αμαρέ αμαρτίες, ο Ντεβέλ μπορισάλο τι ντελ-αμέν ι ευκαιρία τι τζουβντιάς για πάντα. (Ματθ. 20:​28) Ο απόστολος Παύλος βακερντάς χάνικ λαφίντζαρ ο σκοπός ι Ντεβλέσκο κάνα γραφιντάς: «Επειδή ο μεριπέ αβιλό εκχέ τζενέσταρ, η ανάσταση ι μουλένγκι αβέλα βόι-ντα εκχέ τζενέσταρ. Επειδή σαρ αντράλ κατά Αδάμ σαρέ μερένα, αντικάς αντράλ κατά Χριστός σαρέ κα τζουβντιόν πάλι».​—1 Κορ. 15:​21, 22.

12. Σαρ κα βοηθίνελ η Βασιλεία τι αβέλ-πες ο σκοπός σο τθερέλα ο Ιεχωβά αμένγκε;

¹² Ο Ιησούς σικλιαρντάς πι μαθητέν τι προσευχίντιβεν τι αβέλ η Βασιλεία ι Ντεβλέσκι ντα τι αβέλ οντουβά σο μανγκέλα ο Ντεβέλ κι πφουβ. (Ματθ. 6:9, 10) Αντρέ κο σκοπός κι Ντεβλέσκο ισί τι τζουβντιόν ο τζενέ για πάντα κι πφουβ. Για τι αβέλ-πες ανταβά, ο Ιεχωβά κερντάς πι Τσσαβές Βασιλιάς κι Μεσσιανική Βασιλεία. Ο Ντεβέλ γκίντελα κατά πφουβ 144.000 τζενέν τι κερέν μπουτί γιεκ ι Ιησούσαρ για τι αβέλ-πες ο θέλημας ι Ντεβλέσκο.​—Αποκ. 5:9, 10.

13. Σο κερέλα ακανά ο Ιεχωβά, ντα σο πρέπει τι κερέν τουμέν;

¹³ Ο Ιεχωβά γκίντελα ακανά «εκ μπαρό πλήθος» τζενέντζαρ ντα σικλιαρέλα-λεν τι αβέν τελάλ κατά Βασιλεία λέσκι. (Αποκ. 7:9, 10· Ιακ. 2:8) Παρόλο σο τζουβντιόνα εκχέ ντουνιάστε σο ισί τρουγιμέ κατά νταρ ντα κατά τζένγκι, ο τζενέ κατά «μπαρό πλήθος» μαρένα-πες για μα τι τθερέν μίσος καεκχέ τζενέσκε, σο-ντα φυλή τι τθερέλ ή καλέ τθεμέσταρ-ντα τι αβέλ. Από ακανά, λένα πουμαρέ σπαθιά ντα κερένα-λεν εργαλεία ι χωραφίσκε, σαρ τι βακεράας. (Μιχ. 4:3) Αντίς τι κερέν τζένγκια, σο ανένα μεριπέ, βοηθίνενα τζενέν τι αρακχέν «ι πραγματική ζωή» κάνα σικλιαρένα-λεν ι αληθινέ Ντεβλέσκε ντα ι πραγματένγκε σο μανγκέλα τι κερέλ. (1 Τιμ. 6:​19) Λένγκι φαμιλί μπέκιμ τι τζάλα λέντζαρ κόντρα ή μπέκιμ τι χασαρέν λοβέ σόσκε τσσίντενα κατά Βασιλεία ι Ντεβλέσκι. Ο Ιεχωβά όμως ντέλα-λεν σο-ντα χρειαζίντιβενα. (Ματθ. 6:​25, 30-33· Λουκ. 18:​29, 30) Σαρέ ανταλά ντένα-αμέν σιγουριά ότι η Βασιλεία ι Ντεβλέσκι ισί μπαγιά ντα ότι κα συνεχίνελ τι κερέλ ο σκοπός ι Ιεχωβάσκο.

ΜΠΕΚΛΕΝΤΙΝΑΣΑ ΣΟΥΚΑΡ ΝΤΙΒΕΣΕΝΓΚΕ

14, 15. Σαρ κα νικιόλ μπαγιά η υπόσχεση σο ντινάς ο Ιεχωβά τι νασκιαρέλ ο μεριπέ για πάντα;

¹⁴ Ο Ιησούς ισί ακανά ο Βασιλιάς κι Βασιλεία κι Ντεβλέσκι ντα κα κερέλ μπαγιά σαρέ ο υποσχέσεις σο ντινάς ο Ιεχωβά. (2 Κορ. 1:​20) Κατά 1914, ο Ιησούς νικίνελα πι ντουσμανίν. (Ψαλμ. 110:1, 2) Ατζεχάνικ, ο Ιησούς ντα οντουλά σο κα κυβερνίνεν λέσαρ κα μπιτισκιαρέν πουμαρί νίκη ντα κα καταστραφίνεν ι πφιρνέν.​—Αποκ. 6:2.

¹⁵ Κι Βασιλεία κι Ιησούσκι σο κα ατσσικιαρέλ χίλια μπρεσά, ο μουλέ κα τζουβντιόν ντα ο τζενέ σο ντένα καν κα αβέν τέλειοι. Σοράν κατά τελευταία δοκιμασία, οντουλά σο ο Ιεχωβά κα βακερέλ ότι ισί δίκαιοι «κα τθερέν πουμένγκε ι πφουβ ντα κα τζουβντιόν για πάντα λάτε». (Ψαλμ. 37:​10, 11, 29) Ευτυχώς, «ο τελευταίος ντουσμάνι, ο μεριπέ, κα χασάρντιβελ».​—1 Κορ. 15:26.

16. Σο πρέπει τι τσσίντελ-αμέν τι υπηρετίνας ι Ιεχωβάς;

¹⁶ Σαρ ντικχλάμ, η ελπίδα σο τθεράσα τι τζουβντιάς για πάντα τθερέλα ζουρανέ θεμέλια κο Λάφι κι Ντεβλέσκο. Ανταγιά ελπίδα μπορίνελα τι βοηθίνελ-αμέν τι ατσσάς αφοσιωμέ ανταλέ δύσκολε ντιβεσέντε. Αλλά για τι κεράς ι Ιεχωβάσκο γκι, πρέπει τι τσσίντελ-αμέν κάτι πο σημαντικός κατά επιθυμία σο τθεράσα τι τζουβντιάς. Ο πο μπαρό λόγος σο ατσσάσα αφοσιωμέ κο Ιεχωβά ντα κο Ιησούς ισί ότι μανγκάσα-λεν αντράλ αμαρέ γκίσταρ. (2 Κορ. 5:​14, 15) Ανταβά τσσίντελα-αμέν τι μοιάζας λέντε ντα τι βακεράς γιαβερένγκε-ντα ι ελπίδα σο τθεράσα. (Ρωμ. 10:​13-15) Καζόμ σικλιάσα τι ντας αμαρέ βαστένταρ ντα μα τι ντικχάς σάντε αμαρό νεαυτός, ο Ιεχωβά κα μανγκέλ τι αβέλ αμαρό Αμάλ.​—Εβρ. 13:16.

17. Καγιά ευθύνη τθερέλα ο κάθε εκ αμένταρ; (Ματθαίος 7:​13, 14)

¹⁷ Κα αβάς αντρέ οντουλέντε σο κα λεν ζωή για πάντα; Ο Ιεχωβά πουταρντάς αμένγκε ανταγιά πόρτα. Ακανά ισί αμαρέ βαστέντε τι ατσσάς κο ντρομ σο οδηγίνελα κι ζωή. (Διαβάνεν Ματθαίος 7:​13, 14) Σαρ κα αβέλ η ζωή κάνα κα τζουβντιάς για πάντα; Κα ντικχάς ι απάντηση κο γιαβέρ μάθημας.