Τι Χρησιμοποιήνεν ι Δημιουργία για τι Σικλιαρέν Τουμαρέ Τσσαβέν ι Ιεχωβάσκε

1. Σο μανγκένα ο νταντά ντα ο νταγιά πουμαρέ τσσαβένγκε;

ΝΤΑΝΤΑΛΕΝ ντα νταγιάλεν, τζανάσα ότι μανγκένα τι βοηθίνεν τουμαρέ τσσαβέν τι σικλιόν ντα τι μανγκέν ι Ιεχωβάς. Αλλά ο Ντεβέλ να ντικχίντιβελα. Σαρ κα βοηθίνεν τουμαρέ τσσαβέν τι αγαβέν ότι ο Ντεβέλ υπαρχίντιβελα ντα τι τζαν πασέ λέστε;​—Ιακ. 4:8.

2. Σαρ μπορίνενα ο νταντά ντα ο νταγιά τι σικλιαρέν πουμαρέ τσσαβέν ο ιδιότητες ι Ιεχωβάσκε;

² Εκ σημαντικός τρόπος τι βοηθίνεν τουμαρέ τσσαβέν τι τζαν πασέ κο Ιεχωβά ισί τι κερέν-λεν μελέτη κατά Αγία Γραφή. (2 Τιμ. 3:​14-17) Όμως, η Γραφή σικαβέλα ατζέκ εκ τρόπος σο ο τερνέ μπορίνενα τι σικλιόν ι Ιεχωβάσκε. Κο βιβλίος Παροιμίες, εκ ντατ μάλλον βακερέλα πι τσσαβέσκε τι τθερέλ πάντα ανγκλάλ πι γιακχίντε ο ιδιότητες ι Ιεχωβάσκε, σο σικάντιβενα κι δημιουργία. (Παρ. 3:​19-21) Κα ντικχάς καλέ τροπόντζαρ μπορίνενα ο νταντά ντα ο νταγιά τι χρησιμοποιήνεν ι δημιουργία για τι βοηθίνεν πουμαρέ τσσαβέν τι σικλιόν για το ιδιότητες ι Ιεχωβάσκε.

ΣΑΡ ΤΙ ΧΡΗΣΙΜΟΠΟΙΗΝΕΝ Ι ΔΗΜΙΟΥΡΓΙΑ ΓΙΑ ΤΙ ΣΙΚΛΙΑΡΕΝ ΤΟΥΜΑΡΕ ΤΣΣΑΒΕΝ

3. Σο πρέπει τι βοηθίνεν ο νταντά ντα ο νταγιά πουμαρέ τσσαβέν τι ντικχέν;

³ Η Γραφή βακερέλα ότι ο «ιδιότητες [ι Ντεβλέσκε] σο ναστί ντικχάσα-λεν . . . σικάντιβενα καθαρά από αζομάν σο κερντάς ι πφουβ ντα σοράν, επειδή αγαβάσα-λεν οντουλένταρ σο κερντάς». (Ρωμ. 1:​20) Νταντάλεν ντα νταγιάλεν, μάλλον μπεϊντίνενα τι νακχέν σαάτι αβρί κι δημιουργία τουμαρέ τσσαβέντζαρ. Χρησιμοποιήνεν οντουβά σαάτι για τι βοηθίνεν τουμαρέ τσσαβέν τι ντικχέν σαρ ο πράγματα «σο κερντάς» ο Ιεχωβά τθερένα τι κερέν λέσκε σουκάρ ιδιοτητέντζαρ. Οπράλ ανταλέστε, για τι ντικχάς σο μπορίνενα τι σικλιόν ο νταντά ντα ο νταγιά κατά παράδειγμας ι Ιησούσκο.

4. Σαρ χρησιμοποιηντάς ο Ιησούς ι δημιουργία για τι σικλιαρέλ πι μαθητέν; (Λουκάς 12:​24, 27-30)

⁴ Τσσουβέν σημασία σαρ χρησιμοποιηντάς ο Ιησούς ι δημιουργία για τι σικλιαρέλ. Εκ φαρ, μανγκλάς πι μαθητένταρ τι ντικχέν προσεκτικά ο κοράκια ντα ο κρίνα. (Διαβάνεν Λουκάς 12:​24, 27-30) Ο Ιησούς κα μπορίνελας τι κερέλ λάφι για εκ γιαβέρ ζώος ή φυτός, αλλά τραμπιντάς εκ τσιρικλές ντα εκ λουλούδι σο λέσκε μαθητές τζανένας λατσσές. Λέσκε μαθητές μπορεί τι ντικχλέας κοράκια τι περέν κατά ουρανός ντα λουλούδια τι μπαριόν κο χωράφια. Μπορίνενα τι ανέν τουμαρέ γκοντιάτε ι Ιησούς τι σικαβέλ κάρινγκ ανταλέ πραγματέντε καζόμ κερέλας λάφι; Ντα σο κερντάς αφού βακερντάς ανταλά παραδείγματα; Σικλιαρντάς πι μαθητέν κάτι μπουτ σημαντικός​—ότι λένγκο Ντατ σο ισί κο ουρανός ντέλα πι βαστέσταρ ντα ισί λατσσό. Ο Ιεχωβά κα παρβαρέλ ντα κα ιριαβέλ πι πιστέ υπηρετόν, σαρ κερέλα ι τσιρικλέντζαρ ντα ι λουλουδίντζαρ κο χωράφια.

5. Καλά παραδείγματα κατά δημιουργία μπορίνενα τι χρησιμοποιήνεν ο νταντά ντα ο νταγιά για τι σικλιαρέν πουμαρέ τσσαβές ι Ιεχωβάσκε;

⁵ Νταντάλεν ντα νταγιάλεν, κα μοιάζεν κο Ιησούς κάνα σικλιαρένα; Κα μπορίνενας τι βακερέν τουμαρέ τσσαβέσκε κάτι κατά δημιουργία σο μπεϊντίνενα τουμέν, σαρ ισί τουμαρό αγαπημέ ζώος ή φυτός. Καζόμ κερένα-λες ανταβά, μα μπιστρέν τι βακερέν λέσκε σο σικαβέλα ανταβά ι Ιεχωβάσκε. Σοράν, μπέκιμ τι πουτσέν τουμαρέ τσσαβές καβά ισί λέσκο αγαπημέ ζώος ή φυτός. Άμα κα χρησιμοποιήνεν κάτι κατά δημιουργία σο ήδη μπεϊντίνελα, μπέκιμ τι προσοχίνελ ατζέ πο μπουτ κάνα κερένα λέσαρ λάφι για το ιδιότητες ι Ιεχωβάσκε.

6. Σο μπορίνασα τι σικλιάς κατά ντάι ι πφραλέσκι Κρίστοφερ;

⁶ Ισί ανάγκη άραγες τι ντεν ο νταντά ντα ο νταγιά μπουτ πουμαρέ σαατίσταρ για τι ρόντεν για εκ συγκεκριμέ ζώος ή φυτός πριν τι συζητίνεν σο σικαβέλα ανταβά ι Ιεχωβάσκε; Νάα. Ο Ιησούς να εξηγιντάς μπουτ σαρ χάνα ο κοράκια ή σαρ μπαριόνα ο κρίνα. Ατζέ-ντα άμα τουμαρό τσσαβό μπεϊντίνελα τι σικλιόλ πο μπουτ πράγματα οντουλένγκε σο κερντάς ο Ιεχωβά, μπουτ φαρ ερεσέλα εκ χουρντό λάφι ή εκ ερώτηση για τι ντελ τουμαρέ τσσαβές τι αγαβέλ ο σημείος. Ντικχέν σο ντέλα-πες γκοντί εκ πφραλ, ο Κρίστοφερ, ότι αβέλας-πες κάνα ισινέ χουρντό: «Μι ντάι βακερέλας αμένγκε απλά λάφια σο κερένας-αμέν τι εκτιμίνας ι δημιουργία ντονταλάι αμένταρ. Για παράδειγμας, κάνα ισινάμας πασέ κο βεσά βακερέλας: “Ντικχέν καζόμ βουτσσέ ντα σουκάρ ισί οντουλά βεσά! Σο μπαρό Ντεβέλ ισί ο Ιεχωβά!” Ή κάνα ισινάμας πασέ κι ντεριάβ, βακερέλας: “Ντικχέν καζόμ μπαρί ζορ τθερένα ανταλά κύματα! Καζόμ ζουρανό ισί ο Ντεβέλ!”» Ο Κρίστοφερ βακερέλα: «Ανταλά απλά λάφια τσσουβένας-αμέν σε σκέψεις ντα επηρεαντέ-αμέν μπουτ».

7. Σαρ μπορίνενα τι σικλιαρέν τουμαρέ τσσαβέν τι σκεφτίνεν λατσσές ι δημιουργία;

⁷ Καζόμ μπαριόνα τουμαρέ τσσαβέ, μπορίνενα τι σικλιαρέν-λεν τι κερέν αχόρτ σκέψεις οντουλένγκε σο κερντάς ο Ιεχωβά ντα τι αγαβέν σο χαρακτήρας τθερέλα. Μπορίνενα τι βακερέν εκ κατά πράγματα σο κερντάς ο Ντεβέλ ντα τι πουτσέν τουμαρέ τσσαβέν: «Σο σικλιαρέλα-τουμέν ανταβά ι Ιεχωβάσκε;» Μπορεί τι ατσσόν πουταρντέ μόσαρ ντα τι χαιρίνεν κάνα κα ασουνέν οντουλά σο τθερένα τι βακερέν.​—Ματθ. 21:16.

ΚΑΝΑ ΜΠΟΡΙΝΕΝΑ ΤΙ ΧΡΗΣΙΜΟΠΟΙΗΝΕΝ Ι ΔΗΜΙΟΥΡΓΙΑ ΓΙΑ ΤΙ ΣΙΚΛΙΑΡΕΝ ΤΟΥΜΑΡΕ ΤΣΣΑΒΕΝ;

8. Καγιά ευκαιρία τθερένας ο Ισραηλίτες νταντά ντα νταγιά καζόμ κερένας ταξίδια «κο ντρομ»;

⁸ Ο Ισραηλίτες σο τθερένας τσσαβέν έπρεπε τι σικλιαρέν-λεν ο εντολές ι Ιεχωβάσκε κάνα πφιρένας «κο ντρομ». (Δευτ. 11:​19) Ο ντρομά κο Ισραήλ νακχένας κατά φύση. Μπορίνελας τι ντικχέλ κάποιος σαβέ τι μανγκές ζώα, τσιρικλέν ντα λουλούδια. Καζόμ ο φαμιλιά ι Ισραηλιτένγκε κερένας ταξίδια κο ντρομά, ο νταντά ντα ο νταγιά τθερένας ι ευκαιρία τι κερέν λάφι πουμαρέ τσσαβέντζαρ οντουλένγκε σο κερντάς ο Ιεχωβά. Νταντάλεν ντα νταγιάλεν, μπέκιμ τθερένα τουμέν-ντα ασακέ ευκαιρίες για τι σικλιαρέν τουμαρέ τσσαβέν κατά δημιουργία. Ντικχέν σαρ κερντέ-λες μερικοί ανταβά.

9. Σο σικλιόνα κατά Πουνίθα ντα κατά Κάτια;

⁹ Εκ ντάι, η Πουνίθα, σο τζουβντιόλα σε εκ μπαρί πόλη κι Ινδία, βακερέλα: «Κάνα τζάσα τι πφιραβάς-αμέν αμαρέ τζενέντε κο γκαβ, ντικχάσα-λες ανταβά σαρ ευκαιρία για τι βοηθίνας αμαρέ τσσαβέν τι σικλιόν ι μπουτ σουκάρ πραγματένγκε σο κερντάς ο Ιεχωβά. Πακιάβα ότι μο τσσαβέ αγαβένα πο λατσσές ι δημιουργία κάνα ισί ντουρ κατά μπαρέ ντρομά σο ισί πφερντέ κούρσες». Νταντάλεν ντα νταγιάλεν, τουμαρέ τσσαβέ μπέκιμ να κα μπιστρέν ποτές καζόμ λατσσές νακχένα τουμέντζαρ εκχέ σουκάρ τθανέστε. Η Κάτια, εκ πφεν κατά Μολδαβία, βακερέλα: «Ο πο σουκάρ πράγματα σο ντάβα-μαν γκοντί χουρντιαρέλα ισί μι νταντέσαρ ντα μι νταγιάσαρ κι φύση. Εκτιμίναβα μπουτ σο σικλιαρντέ-μαν χουρντιαρέλα τι ατσσάβ ντα τι ντικχάβ προσεκτικά οντουλά σο κερντάς ο Ιεχωβά ντα τι ντικχάβ-Λες αντράλ κατά δημιουργία λέσκι».

10. Σο μπορίνενα τι κερέν ο νταντά ντα ο νταγιά άμα δυσκολίντιβενα τι τζαν εκδρομή αβρί κατά πόλη; (Ντικχέν ο πλαίσιος «Βοήθεια ι Νταντένγκε ντα ι Νταΐνγκε»)

¹⁰ Σο μπορίνενα τι κερέν άμα να αβέλα-πες τι τζαν εκδρομή κι φύση; Ο Αμόλ, σο τζουβντιόλα βοβ-ντα κι Ινδία, βακερέλα: «Οτθέ σο μπεσάβα, μο ντατ ντα μι ντάι ισινέ αναγκασμέ τι κερέν μπουτί μπουτ σαάτια, ντα ισινέ μπουτ πααλίς τι τζας εκ εκδρομή κι φύση. Όμως, εκ χουρντό πάρκος ή εκ νταράτσα μπορεί τι αβέν μπουτ λατσσέ για τι ντικχάς προσεκτικά ι δημιουργία ντα τι κεράς λάφι για το ιδιότητες ι Ιεχωβάσκε». Άμα κα ντικχέν προσεκτικά, μπέκιμ κα αγαβέν ότι πασέ τουμαρέ κχερέστε-ντα ισί μπουτ πράγματα κατά δημιουργία σο μπορίνενα τι σικαβέν τουμαρέ τσσαβέντε. (Ψαλμ. 104:​24) Μάλλον κα αρακχέν τσιρικλέν, έντομα, λουλούδια ντα μπουτ γιαβερά. Η Καρίνα, κατά Γερμανία, βακερέλα: «Μι ντάι μπεϊντίνελα μπουτ ο λουλούδια, οτθάρ κάνα ισινόμας χουρντί, σικαβέλας μάνγκε σουκάρ λουλούδια κάνα τζάας βόλτα γιεκ». Νταντάλεν ντα νταγιάλεν, μπορίνενα επίσης τι χρησιμοποιήνεν ο μπουτ βίντεα ντα ο έντυπα σο βακερένα για τη δημιουργία ντα κερντάς-λεν αμαρί οργάνωση για τι σικλιαρέν τουμαρέ τσσαβέν. Βα, σαρ-ντα τι αβέν ο πράγματα τουμαρέ ζωγιάτε, μπορίνενα τι βοηθίνεν τουμαρέ τσσαβέν τι ντικχέν προσεκτικά οντουλά σο κερντάς ο Ντεβέλ. Για τι ντικχάς ακανά μερικές ιδιότητες ι Ιεχωβάσκε σο κα μπορίνενας τι βακερέν τουμαρέ τσσαβέντε.

Ο ΙΔΙΟΤΗΤΕΣ Ι ΙΕΧΩΒΑΣΚΕ ΣΟ ΝΑ ΝΤΙΚΧΙΟΝΑ «ΣΙΚΑΝΤΙΒΕΝΑ ΚΑΘΑΡΑ»

11. Σαρ μπορίνενα ο νταντά ντα ο νταγιά τι βοηθίνεν πουμαρέ τσσαβέν τι αγαβέν ο μανγκιπέ ι Ιεχωβάσκο;

¹¹ Για τι βοηθίνεν τουμαρέ τσσαβέν τι αγαβέν ο μανγκιπέ ι Ιεχωβάσκο, κα μπορίνενας τι βακερέν λένγκε καζόμ γκουλντέ τροπόσαρ φροντίνενα μπουτ ζώα πουμαρέ χουρντέν. (Ματθ. 23:​37) Επίσης, κα μπορίνενας τι κερέν λάφι ι μπουτέ ντα διαφορετικέ πραγματένγκε σο απολαμβάνασα αζόμ μπουτ κι δημιουργία. Η Καρίνα, σο κερντάμ λάκε λάφι πο τζανγκλέ, βακερέλα: «Κάνα τζάας βόλτα, μι ντάι βακερέλας μάνγκε τι ντικχάβ προσεκτικά σαρ ο κάθε λουλούδι ισί ξεχωριστός ντα σαρ λέσκο σουκαριπέ σικαβέλα ο μανγκιπέ ι Ιεχωβάσκο. Παρόλο σο νακχλέ μπουτ μπρεσά, συνεχίναβα τι τσσουβάβ σημασία κο λουλούδια. Ντικχάβα καζόμ διαφορετικά σχέδια ντα χρώματα υπαρχίντιβενα. Ο λουλούδια συνεχίνενα τι ανέν μι γκοντιάτε καζόμ μπουτ μανγκέλα-αμέν ο Ιεχωβά».

12. Σαρ μπορίνενα ο νταντά ντα ο νταγιά τι βοηθίνεν πουμαρέ τσσαβέν τι αγαβέν ι σοφία ι Ντεβλέσκι; (Ψαλμός 139:​14) (Ντικχέν ι φωτογραφία-ντα)

¹² Βοηθίνεν τουμαρέ τσσαβέν τι αγαβέν ι σοφία ι Ντεβλέσκι. Ο Ιεχωβά σίγουρα ισί μπουτ πο γκοντιαβέρ αμένταρ. (Ρωμ. 11:​33) Για παράδειγμας, κα μπορίνενας τι βακερέν λένγκε σαρ ο πανί, σο νικλίλα οπρέ ντα κερντιόλα σύννεφα, τζάλα εύκολα κατά εκ τθαν κο γιαβέρ. (Ιώβ 38:​36, 37) Κα μπορίνενας επίσης τι βακερέν λένγκε καζόμ σουκάρ τροπόσαρ ισί κερντό ι τζενέσκο σώμας. (Διαβάνεν Ψαλμός 139:​14) Τσσουβέν σημασία σαρ κερντάς-λες ανταβά εκ ντατ, ο Βλαντίμιρ. Βοβ βακερέλα: «Εκ ντιβές, μο τσσαβό πελό κατά ποδήλατος ντα ντινάς-πες. Σοράν από χάνικ ντιβεσά, η πληγή πφαντιλί. Μι ρομνί ντα με βοηθιντάμ αμαρέ τσσαβές τι αγαβέλ ότι ο Ιεχωβά κερντάς αμαρό σώμας τι μπορίνελ τι αβέλ λατσσές κορκορό. Βακερντάμ λέσκε ότι να ντικχάσα κάτι ασακό κο πράγματα σο κερντέ ο τζενέ. Για παράδειγμας, εκ αμάξι ναστί λατσσάρντιβελα κορκορό σοράν από εκ τρακάρα. Ανταβά βοηθιντάς αμαρέ τσσαβές τι αγαβέλ ι σοφία ι Ιεχωβάσκι».

13. Σαρ μπορίνενα ο νταντά ντα ο νταγιά τι βοηθίνεν πουμαρέ τσσαβέν τι αγαβέν ι Ντεβλέσκι ζορ; (Ησαΐας 40:26)

¹³ Ο Ιεχωβά καλίνελα-αμέν τι βάντας αμαρέ γιακχά κάρινγκ κο ουρανός ντα τι σκεφτίνας σαρ λέσκι μπαρί ζορ ατσσικιαρέλα ο τσεργανιά πουμαρέ τθανέστε. (Διαβάνεν Ησαΐας 40:​26) Μπορίνενα τι βακερέν τουμαρέ τσσαβένγκε τι ντικχέν ο ουρανός ντα τι σκεφτίνεν οντουλά σο ντικχένα. Τσσουβέν σημασία σο ντέλα-πες γκοντί χουρντιαρέλα η Τινγκτίνγκ, εκ πφεν κατά Ταϊβάν: «Εκ φαρ, γκιλόμ για κάμπινγκ μι νταγιάσαρ, ντα ντικχάας αρατί ο ουρανός χωρίς τι τθεράς ο φώτα κατά πόλη. Οντουβά βακίτι, ανησυχίναβας σόσκε τθεράβας πίεση κατά γιαβερά τερνέ ντα να ισινόμας σίγουρη άμα κα μπορίναβας τι υπηρετίναβ ι Ιεχωβάς πιστά. Μι ντάι βακερντάς μάνγκε τι σκεφτίναβ ι ζορ σο χρησιμοποιηντάς ο Ιεχωβά για τι κερέλ σαρέ οντουλά τσεργανιά. Ντα βακερντάς μάνγκε τι νταβ-μαν γκοντί ότι Βοβ μπορίνελα σίγουρα τι χρησιμοποιήνελ οντιά ζορ για τι βοηθίνελ-μαν τι νταϊντίναβ ο δοκιμασίες. Αφού ντικχλόμ προσεκτικά ι δημιουργία κι εκδρομή οντιά, ανταβά τσσιντιντάς-μαν τι σικλιάβ ατζέ πο λατσσές ι Ιεχωβάς ντα αβιλόμ ατζέ πο αποφασισμέ τι υπηρετίναβ-λες».

14. Σαρ μπορίνενα ο νταντά ντα ο νταγιά τι χρησιμοποιήνεν ι δημιουργία για τι βοηθίνεν πουμαρέ τσσαβέν τι ντικχέν ότι ο Ιεχωβά ισί ο ευτυχισμέ Ντεβέλ;

¹⁴ Η δημιουργία ι Ιεχωβάσκι σικαβέλα εμ ότι ισί χαρούμενος εμ ότι μπεϊντίνελα τι ασάς. Ο επιστήμονες ντικχλέ ότι ο πο μπουτ ζώα κχελένα πέσκε, ντα αντρέ ανταλέντε ισί ο τσιρικλέ ντα ο ματσσέ. (Ιώβ 40:​20) Ασάντιλε ποτές τουμαρέ τσσαβέ επειδή ντικχλέ εκ ζώος τι κχελέλ πέσκε; Μπέκιμ ντικχλέ εκχέ χουρντέ ματσικά τι κουλαντίνελ ο τθαβά κι κουρτίνα ή χουρντέ τζουκλέν τι πειράνεν ο εκ ι γιαβερές. Ι γιαβέρ φαρ σο τουμαρέ τσσαβέ κα ασάν με το παιχνίδια σο κερέλα εκ ζώος, ανέν λένγκε γκοντιάτε ότι υπηρετίνασα εκχέ ευτυχισμέ Ντεβλές.​—1 Τιμ. 1:11.

ΤΙ ΑΠΟΛΑΜΒΑΝΕΝ Ι ΔΗΜΙΟΥΡΓΙΑ Ι ΙΕΧΩΒΑΣΚΙ ΣΑΡ ΦΑΜΙΛΙ

15. Σο μπορεί τι βοηθίνελ ι νταντέν ντα ι νταΐν τι νικαβέν ο σκέψεις πουμαρέ τσσαβένγκε; (Παροιμίες 20:5) (Ντικχέν ι φωτογραφία-ντα)

¹⁵ Ισί φαρ σο ο νταντά ντα ο νταγιά μπέκιμ δυσκολίντιβενα τι κερέν πουμαρέ τσσαβέν τι κερέν λάφι πουμαρέ προβληματένγκε. Άμα ανταβά αβέλα-πες τουμέντζαρ-ντα, μπέκιμ τι χρειαζίντιβελα τι νικαβέν τουμέν ο σκέψεις τουμαρέ τσσαβένγκε. (Διαβάνεν Παροιμίες 20:5) Μερικέ νταντένγκε ντα νταΐνγκε ισί πο εύκολος τι κερέν-λες ανταβά κάνα απολαμβάνενα ι δημιουργία πουμαρέ τσσαβέντζαρ. Σόσκε; Εκ λόγος ισί ότι υπαρχίντιβενα πο χάνικ πράγματα σο μπορεί τι ταρτίνεν λένγκι προσοχή​—εμ ι τσσαβένγκι, εμ ι νταντέσκι ντα ι νταγιάκι. Εκ ντατ κατά Ταϊβάν, ο Μασαχίκο, βακερέλα ατζέκ εκ λόγος: «Κάνα νακχάσα σαάτι αμαρέ τσσαβέντζαρ κι φύση​—νικλιάσα ο βεσά, πφιράσα πασέ κι ντεριάβ—​ο πο μπουτ φαρ νιωθίνενα πο άνετα. Αντικάς ισί αμένγκε πο εύκολος τι βοηθίνας-λεν τι πουτρέν-πες ντα τι σικλιάς σο σκεφτίνενα». Η Κάτια, σο κερντάμ λάκε λάφι πο τζανγκλέ, βακερέλα: «Σοράν κατά σχολείος, μι ντάι γκερέλας-μαν σε εκ σουκάρ πάρκος. Εκχέ ασακέ ήρεμε τθανέστε, ισινέ μάνγκε πο εύκολος τι κεράβ λάσαρ λάφι οντουλένγκε σο αβιλέας-πες κο σχολείος ή οντουλένγκε σο ανησυχίνενας-μαν».

16. Σαρ μπορίνενα ο φαμιλιά τι ηρεμίνεν ντα τι νακχέν λατσσές κάνα απολαμβάνενα ι δημιουργία ι Ιεχωβάσκι;

¹⁶ Η δημιουργία ι Ιεχωβάσκι μπορίνελα επίσης τι βοηθίνελ ι φαμιλίν τι ηρεμίνεν ντα τι νακχέν λατσσές, ντα αντικάς τι αβέν πο πασέ ο εκ κο γιαβέρ. Η Γραφή βακερέλα ότι ισί «βακίτι τι ασάλ» εκ τζενό ντα «βακίτι τι κχελέλ». (Εκκλ. 3:1, 4) Ο Ιεχωβά κερντάς μπουτ σουκάρ τθανά κι πφουβ σο μπορίνασα οτθέ τι κεράς πράγματα σο μανγκάσα. Μπουτ φαμιλιά μπεϊντίνενα τι τζαν γιεκ κο βεσά, κι ντεριάβ, κο μεριάδες ή κο δάση. Μερικά τσσαβέ μπεϊντίνενα μπουτ τι τθάβντεν ντα τι κχελέν κο πάρκος, τι ντικχέν προσεκτικά ο ζώα ή τι κερέν μπάνιος εκχέ λενιάτε ή κι ντεριάβ. Σο σουκάρ ευκαιρίες τθεράσα για τι νακχάς λατσσές κάνα ισινάμ κι φύση ντα τθεράσα ντονταλάι αμένταρ οντουλά σο κερντάς ο Ιεχωβά!

17. Σόσκε πρέπει ο νταντά ντα ο νταγιά τι βοηθίνεν πουμαρέ τσσαβέν τι απολαμβάνεν ι δημιουργία ι Ντεβλέσκι;

¹⁷ Κο νεβό ντουνιάς κι Ντεβλέσκο, εμ ο νταντά ντα ο νταγιά εμ λένγκε τσσαβέ κα απολαμβάνεν ι δημιουργία ι Ιεχωβάσκι πο μπουτ από ποτές. Αζομάν να κα νταράς κατά ζώα ούτε βον αμένταρ, σαρ αβέλα-πες αντιβές. (Ησ. 11:​6-9) Κα τθεράς καζόμ σαάτι μανγκάσα για τι απολαμβάνας σαρέ οντουλά σο κερντάς ο Ιεχωβά. (Ψαλμ. 22:​26) Όμως νταντάλεν ντα νταγιάλεν, μα μπεκλεντίνεν μέχρι αζομάν για τι βοηθίνεν τουμαρέ τσσαβέν τι απολαμβάνεν ι δημιουργία. Καζόμ χρησιμοποιήνενα ι δημιουργία για τι σικλιαρέν τουμαρέ τσσαβέν ι Ιεχωβάσκε, αζομάν μάλλον βον κα συμφωνίνεν ι λαφίντζαρ σο βακερντάς ο Δαβίδ: «Ιεχωβά, να υπαρχίντιβελα καέκ πράγμας σο μοιάζελα οντουλέντζαρ σο κερντάν τούι».​—Ψαλμ. 86:8.