“Μα Τσσιναβέν τι Πφιρέν Παλάλ” κο Ιησούς Σοράν Κατά Μπολντιπέ

1, 2. Σαρ κα αβέλ τουμαρί ζωή πο λατσσί σοράν κατά μπολντιπέ;

ΧΑΙΡΙΝΑΣΑ μπουτ κάνα κάποιος μπολντιόλα ντα αβέλα αντρέ κι φαμιλί κι Ιεχωβάσκι. Ισί προνόμιος τι τθεράς ανταγιά λατσσί φιλία ι Ιεχωβάσαρ. Συμφωνίνασα ι λαφίντζαρ ι Δαβιδίσκε, σο βακερντάς: «Ευτυχισμέ ισί οντουβά σο τραμπίνεσα [Ιεχωβά] ντα ανέσα πασέ για τι μπεσέλ κο αυλές τιρέ».—Ψαλμ. 65:4.

² Ο Ιεχωβά να ανέλα κας τι αβέλ κο αυλές πιρέ. Σαρ ντικχλάμ κο γιαβέρ μάθημας, τραμπίνελα τι αβέλ πασέ οντουλέντε σο σικαβένα ότι μανγκένα τι τθερέν εκ λατσσί φιλία λέσαρ. (Ιακ. 4:8) Κάνα αφιερώντιβενα κο Ιεχωβά ντα μπολντιόνα, τζάνα πο πασέ λέστε εκχέ ξεχωριστέ τροπόσαρ. Τι αβέν σίγουροι ότι, από αζομάν σο κα μπολντιόν ντα σοράν, βοβ “κα ντελ σαρ μπρισίμ οπρά-τουμέντε αζόμ μπουτ ευλογίες σο να κα ερεσέλ-λεν ο τθαν”.—Μαλ. 3:10· Ιερ. 17:7, 8.

3. Καγιά σοβαρή ευθύνη τθερένα ο αφιερωμέ ντα μπολντέ Χριστιανοί; (Εκκλησιαστής 5:4, 5)

³ Σίγουρα, ο μπολντιπέ ισί σάντε η αρχή. Σοράν κατά μπολντιπέ, κα κερέν ο πο λατσσό σο μπορίνενα για τι τζουβντιόν αντικάς σαρ βακερντέν κι αφιέρωση σο κερντέν, ατζέ-ντα κάνα τθερένα πειρασμούς ή νακχένα δοκιμασίες. (Διαβάνεν Εκκλησιαστής 5:4, 5) Σαρ μαθητές ι Ιησούσκε, κα ακολουθίνεν λέσκο παράδειγμας ντα λέσκε εντολές καζόμ πο λατσσές αβέλα-πες. (Ματθ. 28:19, 20· 1 Πέτρ. 2:21) Αμαρό μάθημας κα βοηθίνελ-τουμέν τι κερέν-λες ανταβά.

“ΜΑ ΤΣΣΙΝΑΒΕΝ ΤΙ ΠΦΙΡΕΝ ΠΑΛΑΛ” ΚΟ ΙΗΣΟΥΣ ΠΑΡΟΛΟ ΣΟ ΚΑ ΤΘΕΡΕΝ ΔΟΚΙΜΑΣΙΕΣ ΝΤΑ ΠΕΙΡΑΣΜΟΙ

4. Σόσκε βακεράσα ότι ο μαθητές ι Ιησούσκε κα βάντενας εκ “κας ντουκχένγκο”; (Λουκάς 9:23)

⁴ Σοράν κατά μπολντιπέ, τουμαρί ζωή να κα αβέλ εύκολη. Ο Ιησούς σικαντάς ξεκάθαρα ότι λέσκε μαθητές κα βάντενας εκ “κας ντουκχένγκο” ντα κα κερένας-λες ανταβά «κάθε ντιβές». (Διαβάνεν Λουκάς 9:23) Μήπως ο Ιησούς μανγκέλας τι βακερέλ ότι λέσκε μαθητές κα τσσίντενας ταλαιπωρίες συνέχεια; Σίγουρα όχι. Απλώς μανγκέλας τι σικαβέλ ότι, εκτός κατά ευλογίες σο κα τθερένας, κα νακχένας δυσκολίες-ντα. Μερικές ανταλέ δυσκολιένταρ μπέκιμ τι αβένας μπουτ πφαρέ.—2 Τιμ. 3:12.

5. Καλά ευλογίες ντινάς πο λάφι ο Ιησούς ότι κα τθερέν οντουλά σο κερένα θυσίες;

⁵ Επειδή τσσουβένα πρώτα ι Βασιλεία, μπέκιμ τουμαρί φαμιλί τι γκιλί κόντρα τουμέντζαρ ή μπέκιμ τι κερντέν θυσίες ντα οτθάρ να τθερένα αζόμ μπουτ λοβέ ντα πράγματα καζόμ κα μπορίνενας τι τθερέν. (Ματθ. 6:33) Άμα αβέλα-πες ανταβά, τι αβέν σίγουροι ότι ο Ιεχωβά ντικχλάς σαρέ ο πράγματα σο κερντέν λέσκε. (Εβρ. 6:10) Μάλλον ντικχλέν τουμαρέ ζωγιάτε καζόμ μπαγιά ισί ο λάφια ι Ιησούσκε: «Σαρέ οντουλέντζαρ σο μουκχλέ κχερ ή πφραλέν ή πφενίν ή νταγιά ή νταντές ή τσσαβέν ή χωράφια μάξους μάνγκε ντα ι λατσσέ αμπερίνγκε, κα τζαν λέντζαρ κόντρα, αλλά κα λεν 100 φαρ πο μπουτ ακανά, ανταλέ βακιτίστε, εμ κχερά εμ πφραλέν εμ πφενίν εμ νταΐν εμ τσσαβέν εμ χωράφια, ντα κο ντουνιάς σο κα αβέλ ζωή για πάντα». (Μάρκ. 10:29, 30) Ο ευλογίες σο λιντέν ισί μπαγιά πο μπαρέ σαρέ κατά θυσίες σο κερντέν.—Ψαλμ. 37:4.

6. Σόσκε κα χρειαζίντιβελ τι συνεχίνεν τι τζαν κόντρα “οντουλέντζαρ σο μανγκέλα ο σώμας” σοράν κατά μπολντιπέ;

⁶ Σοράν κατά μπολντιπέ, κα χρειαζίντιβελ τι συνεχίνεν τι τζαν κόντρα κο πράγματα «σο μανγκέλα ο σώμας». (1 Ιωάν. 2:16) Έτσι κι αλλιώς, κα συνεχίνεν τι αβέν ατελείς. Μερικές φορές, μπορεί τι νιωθίνεν σαρ ο απόστολος Παύλος, σο γραφιντάς: «Μπεϊντίναβα μπαγιά ο νόμος ι Ντεβλέσκο αντρά-μάντε, αλλά ντικχάβα μι σωμάστε εκ γιαβέρ νόμος σο τζάλα κόντρα κο νόμος μι γκοντιάκο ντα γκερέλα-μαν αιχμάλωτος κο νόμος κι αμαρτιάκο σο ισί μι σωμάστε». (Ρωμ. 7:22, 23) Μπορεί τι χασαρέν τουμαρί ζορ επειδή πρέπει τι τζαν κόντρα κο λάθος επιθυμίες σο τθερένα. Όμως, άμα κα σκεφτίνεν ο λάφι σο ντινέν κο Ιεχωβά κάνα κερντέν τουμαρί αφιέρωση λέστε, κα αβέν ατζέ πο αποφασισμέ τι τζαν κόντρα κο πειρασμός. Η αλήθεια ισί ότι τουμαρί αφιέρωση κα βοηθίνελ-τουμέν κάνα κα νακχέν πειρασμούς. Σαρ;

7. Σαρ κα βοηθίνελ-τουμέν τουμαρί αφιέρωση τι ατσσόν πιστοί κο Ιεχωβά;

⁷ Κάνα αφιερώντιβενα κο Ιεχωβά, τσσιναβένα τι τζουβντιόν τουμένγκε. Ανταβά μανγκέλα τι βακερέλ τι μουκχέν παλάλ οντουλά πράγματα σο μπεϊντίνενα ή σο μανγκένα τι πετυχίνεν αλλά κα πφανγκένας ι Ιεχωβάσκο γκι. (Ματθ. 16:24) Οτθάρ, κάνα νακχένα εκ δοκιμασία, να κα χρειαζίντιβελ τι ντεν σαάτι για τι σκεφτίνεν σο τι κερέν. Αποφασιντέν ήδη σο κα κερέν—κα αβέν πιστοί κο Ιεχωβά. Κα αβέν αποφασισμέ τι κερέν ι Ιεχωβάσκο γκι. Αντικάς κα μοιάζεν κο Ιώβ. Παρόλο σο βοβ νακχλάς μπουτ μπαρέ δοκιμασίες, βακερντάς με σιγουριά: «Κα ατσσικιαράβ σαστό μο γκι κο Ντεβέλ!»—Ιώβ 27:5.

8. Άμα κα σκεφτίνεν λατσσές ι προσευχή σο κερντέν κάνα αφιερωντέν-τουμέν, σαρ κα βοηθίνελ-τουμέν ανταβά τι τζαν κόντρα κο πειρασμός;

⁸ Άμα κα σκεφτίνεν λατσσές ι προσευχή σο κερντέν κάνα αφιερωντέν-τουμέν κο Ιεχωβά, κα αρακχέν ι ζορ τι τζαν κόντρα σαρέ κο πειρασμοί. Για παράδειγμας, κα αρχίνενας τι περέν εκχέ τζουβλιάκε ή εκχέ μουρσέσκε σο ισί παντριμέ; Σίγουρα όχι! Βακερντέν ήδη όχι ανταλέστε. Άμα να κα μουκχέν από την αρχή τι ασταρέν ρίζες αντρέ τουμέντε λάθος αισθήματα, σοράν να κα μαρέν-τουμέν για τι νικαβέν-λεν. Κα νασέν ντουρ κατά “ντρομ ι πφιρνένγκο”.—Παρ. 4:14, 15.

9. Άμα κα σκεφτίνεν λατσσές ι προσευχή σο κερντέν κάνα αφιερωντέν-τουμέν, σαρ κα βοηθίνελ-τουμέν ανταβά τι τσσουβέν πρώτα ο πνευματικά πράγματα;

⁹ Σο κα κερέν άμα κάποιος κα βακερέλ τουμένγκε τι ασταρέν εκ μπουτί σο να κα μουκχέλ-τουμέν τι τζαν σαρέ κο συναθροίσεις; Σίγουρα κα τζανένας σο τι βακερέν. Πριν τι κερέλ τουμένγκε ι πρόταση, τθερένας λιντό ήδη τουμαρί απόφαση μα τι δεχτίνεν κάτι ασακό. Οτθάρ, να κα τζαν κο πειρασμός τι λεν εκ μπέτι απόφαση ντα σοράν τι προσπαθίνεν τι τσσουβέν πρώτα ι Ιεχωβάς. Άμα κα σκεφτίνεν καζόμ αποφασισμέ ισινέ ο Ιησούς τι κερέλ πι Νταντέσκο γκι, κα αβέν τουμέν-ντα αποφασισμέ τι βακερέν αμέσως όχι κάθε πραγμάστε σο τζανένα ότι κα στεναχωρίνελας ι Ντεβλές, σόσκε ισινέν αφιερωμέ λέστε.—Ματθ. 4:10· Ιωάν. 8:29.

10. Σαρ κα βοηθίνελ-τουμέν ο Ιεχωβά σοράν κατά μπολντιπέ “μα τι τσσιναβέν τι πφιρέν παλάλ” κο Ιησούς;

¹⁰ Ο δοκιμασίες ντα ο πειρασμοί ισί εκ ευκαιρία για τι σικαβέν ότι ισινέν αποφασισμέ “μα τι τσσιναβέν τι πφιρέν παλάλ” κο Ιησούς. Καζόμ κερένα-λες ανταβά, μπορίνενα τι αβέν σίγουροι ότι ο Ιεχωβά κα βοηθίνελ-τουμέν. Η Αγία Γραφή βακερέλα: «Ο Ντεβέλ ισί πιστός ντα να κα μουκχέλ-τουμέν τι δοκιμάντιβεν πο μπουτ οντουλέσταρ σο αντιχίνενα, αλλά μαζί με τη δοκιμασία κα σικαβέλ τουμένγκε ο τρόπος-ντα για τι μπορίνεν τι νταϊντίνεν-λα».—1 Κορ. 10:13.

ΣΟ ΤΙ ΚΕΡΕΝ ΓΙΑ “ΜΑ ΤΙ ΤΣΣΙΝΑΒΕΝ ΤΙ ΠΦΙΡΕΝ ΠΑΛΑΛ” ΚΟ ΙΗΣΟΥΣ

11. Καβά ισί εκ κατά πο λατσσέ τρόποι για μα τι τσσιναβέν τι πφιρέν παλάλ κο Ιησούς σοράν τουμαρέ μπολντιμάσταρ; (Ντικχέν ι φωτογραφία-ντα)

¹¹ Ο Ιησούς υπηρετίνελας ι Ιεχωβάς γκίσαρ ντα ατσσόλας πασέ λέστε αντράλ κατά προσευχή. (Λουκ. 6:12) Μάλιστα, εκ κατά πο λατσσέ τρόποι για μα τι τσσιναβέν τι πφιρέν παλάλ κο Ιησούς σοράν τουμαρέ μπολντιμάσταρ ισί τι τθερέν ι συνήθεια τι κερέν πράγματα σο κα ανέν-τουμέν πο πασέ κο Ιεχωβά. Η Αγία Γραφή βακερέλα: «Κάι-ντα τι ερεσάσα ανταλέ ντρομέστε, τι συνεχίνας τι πφιράς σωστά κο ίδιος ντρομ». (Φιλιπ. 3:16) Κα αβέν φορές σο κα ασουνέν εμπειρίες πφραλένγκε σο αποφασιντέ τι κερέν πο μπουτ κι υπηρεσία κι Ιεχωβάσκι. Μπέκιμ νακχλέ ι Σχολή για Ευαγγελιστές της Βασιλείας ή μετακομιντέ οτθέ σο η ανάγκη ισί πο μπαρί. Άμα μπορίνενα τι τσσουβέν τουμέν-ντα εκ ασακό στόχος, μα σακιντίνεν τι κερέν-λες. Ο υπηρέτες ι Ιεχωβάσκε μανγκένα τι κερέν πο μπουτ πράγματα λέσκε. (Πράξ. 16:9) Σο αβέλα-πες όμως άμα ανταγιά στιγμή να μπορίνενα τι κερέν-λες ανταβά; Μα αμντίνεν ότι τθερένα πο χάνικ αξία οντουλένταρ σο μπορίνενα τι κερέν-λες. Ο αγώνας σο κεράσα σαρ Χριστιανοί ισί εκ αγώνας σο χρειαζίντιβελα υπομονή. (Ματθ. 10:22) Ο κάθε εκ αμένταρ τθερέλα διαφορετικές ικανότητες ντα ο πράγματα λέσκε ζωγιάτε ισί διαφορετικά. Οτθάρ, κερέν ο πο λατσσό σο μπορίνενα τουμέν, ντα ο Ιεχωβά κα χαιρίνελ ανταλέσκε. Ανταβά ισί εκ σημαντικός τρόπος για μα τι τσσιναβέν τι πφιρέν παλάλ κο Ιησούς σοράν τουμαρέ μπολντιμάσταρ.—Ψαλμ. 26:1.

12, 13. Σο μπορίνενα τι κερέν άμα αρχίνενα τι χασαρέν τουμαρί χαρά κι υπηρεσία κι Ιεχωβάσκι; (1 Κορινθίους 9:16, 17) (Ντικχέν ο πλαίσιος-ντα «Ατσσόν κο Αγώνας»)

¹² Σο αβέλα-πες άμα, για κάποιο βακίτι, νιωθίνενα ότι να προσευχίντιβενα αντράλ τουμαρέ γκίσταρ ή ότι να μπεϊντίνενα αζόμ μπουτ ο έργος; Σο αβέλα-πες άμα να μπεϊντίνενα τι διαβάνεν ι Γραφή αζόμ μπουτ καζόμ μπεϊντίνενας-λες ανγκλέ; Άμα κα νιωθίνεν αντικάς σοράν τουμαρέ μπολντιμάσταρ, μα αμντίνεν ότι νασλό τουμένταρ ο πνεύμας ι Ιεχωβάσκο. Επειδή ισινάμ ατελείς, αμαρί ψυχολογία μπορεί τι αλλάνελ εύκολα. Άμα αρχίνενα τι χασαρέν τουμαρί χαρά κι υπηρεσία κι Ιεχωβάσκι, σκεφτίνεν ο παράδειγμας ι απόστολε Παυλόσκο. Παρόλο σο προσπαθίνελας τι μοιάζελ κο Ιησούς, τζανέλας ότι μπάζιμα να τθερέλας αζόμ μπουτ όρεξη τι κερέλ ο πράγματα σο χρειαζίντιβελας τι κερέλ. (Διαβάνεν 1 Κορινθίους 9:16, 17) Ο Παύλος βακερντάς: «Ατζέ-ντα άμα κεράβα-λες παρόλο σο να μανγκάβα-λες, ο Ντεβέλ ντινάς μάνγκε μπέσα τι κεράβ ανταβά διορισμός». Γιαβερέ λαφίντζαρ, ο Παύλος ισινέ αποφασισμέ τι κερέλ πο διορισμός σαρ-ντα τι νιωθίνελας οντιά στιγμή.

¹³ Αντικάς τουμέν-ντα, μα μουκχέν τουμαρέ ατελείς συναισθήματα τι λεν αποφάσεις τουμένγκε. Τι αβέν αποφασισμέ τι κερέν ο σωστός σαρ-ντα τι νιωθίνεν. Καζόμ νακχέλα ο βακίτι, άμα κα συνεχίνεν τι κερέν ο σωστός, τουμαρέ συναισθήματα μπορεί τι αλλάνεν ντα τι νιωθίνεν πο λατσσές. Μέχρι τι αβέλ-πες ανταβά, άμα κα ατσσικιαρέν εκ λατσσό πνευματικός πρόγραμμας, ανταβά κα βοηθίνελ-τουμέν μα τι τσσιναβέν τι πφιρέν παλάλ κο Ιησούς σοράν κατά μπολντιπέ. Κάνα τουμαρέ πφραλά κα ντικχέν ότι συνεχίνενα τι υπηρετίνεν ι Ιεχωβάς σαρ-ντα τι αβέν ο πράγματα τουμαρέ ζωγιάτε, κα λεν ζορ.—1 Θεσ. 5:11.

«ΤΙ ΔΟΚΙΜΑΝΕΝ . . . ΤΙ ΣΙΚΑΒΕΝ»

14. Σο πρέπει τι εξετάνεν συχνά, ντα σόσκε; (2 Κορινθίους 13:5)

¹⁴ Κάτι γιαβέρ σο κα βοηθίνελ-τουμέν σοράν τουμαρέ μπολντιμάσταρ ισί τι εξετάνεν τουμαρό νεαυτός συχνά. (Διαβάνεν 2 Κορινθίους 13:5) Κάποιες φορές, ισί λατσσό τι εξετάνεν προσεκτικά τουμαρί ζωή ντα τουμαρέ συνήθειες για τι ντικχέν άμα προσευχίντιβενα κάθε ντιβές, άμα διαβάνενα ντα σικλιαρένα-τουμέν κατά Γραφή, άμα τζάνα κο συναθροίσεις ντα άμα κερένα έργος. Τι προσπαθίνεν τι αρακχέν τρόπους για τι βοηθίντιβεν πο μπουτ ανταλέ πραγματένταρ. Για παράδειγμας, πουτσέν-τουμέν: “Μπορίναβα τι εξηγίναβ γιαβερένγκε ο βασικά πράγματα σο σικλιαρέλα η Γραφή; Υπαρχίντιβενα τρόποι για τι μπεϊντίναβ πο μπουτ ο έργος; Καζόμ συγκεκριμέ ισί μο προσευχές; Σικαβένα ότι στηρίντιβαβα σαρέ μι γκίσαρ κο Ιεχωβά; Τζάβα συνέχεια κο συναθροίσεις; Σο μπορίναβα τι κεράβ για μα τι πφιρέλ μι γκοντί κάνα ισινόμ κι συνάθροιση ντα τι νταβ πο μπουτ απαντήσεις;”

15, 16. Σο σικλιόνα κατά εμπειρία εκχέ πφραλέσκι για το πειρασμός;

¹⁵ Επίσης, ισί λατσσό τι εξετάνεν τουμαρό νεαυτός για τι ντικχέν καλά αδυναμίες τθερένα. Εκ πφραλ, ο Ρόμπερτ, βακερέλα εκ εμπειρία σο σικαβέλα-λες ανταβά: «Κάνα ισινόμας περίπου 20 μπρεσένγκο, τθεράβας εκ μπουτί χάνικ σαατίντζαρ. Εκ ντιβές, κάνα μπιτισκιαρντάμ ι μπουτί, εκ τζενί κατά μπουτί καλιντάς-μαν πι κχερέστε. Βακερντάς μάνγκε ότι κα αβάας κορκορέ ντα ότι κα “νακχάας λατσσές”. Κι αρχή, βακερντόμ μερικές δικαιολογίες για μα τι εξηγίναβ λάκε καβά ισινέ ο πραγματικός λόγος σο να κα τζάβας. Αλλά τελικά, βακερντόμ όχι ντα εξηγιντόμ ο λόγος». Ο Ρόμπερτ γκιλό κόντρα κο πειρασμός, ντα ανταβά ισί μπουτ σουκάρ. Πο σοράν όμως, σκεφτιντάς οντουβά σο αβιλόας-πες ντα ντικχλάς ότι κα μπορίνελας τι τζαλ-λεν πο λατσσές οντουλέ περιπτωσιάτε. Βοβ βακερέλα: «Να βακερντόμ όχι κι πρόταση αζόμ σταθερά ή αζόμ σουγκό σαρ ο Ιωσήφ κι ρομνί του Πετεφρή. (Γέν. 39:7-9) Μάλιστα, κερντάς μάνγκε εντύπωση σο δυσκολισάλομ τι βακεράβ όχι. Οντιά περίπτωση σικλιαρντάς-μαν τι αγαβάβ ότι χρειαζίντιβελας τι κεράβ μι φιλία ι Ιεχωβάσαρ πο ζουρανί».

¹⁶ Μπέκιμ κα βοηθίντιβεν άμα κα εξετάνεν τουμαρό νεαυτός, σαρ κερντάς ο Ρόμπερτ. Ατζέ-ντα κάνα καταφερίνενα τι τζαν κόντρα κο πειρασμός, τι πουτσέν-τουμέν: “Καζόμ σαάτι λιντάς-μαν τι βακεράβ όχι;” Άμα ντικχένα ότι μπορίνενα τι κερέν κάτι για τι τζαν-λεν πο λατσσές, μα χασαρέν τουμαρί ζορ. Τι χαιρίνεν σο ακανά αγαβένα τουμαρί αδυναμία. Τι προσευχίντιβεν ανταλέ πραγμάσκε κο Ιεχωβά, ντα κερέν βήματα για τι αβέν ατζέ πο αποφασισμέ τι τζουβντιόν αντικάς σαρ βακερένα ο πάκι κανόνες ι Ιεχωβάσκε.—Ψαλμ. 139:23, 24.

17. Σο σχέση τθερέλας η εμπειρία του Ρόμπερτ ι Ιεχωβάσκε ναβέσαρ;

¹⁷ Αλλά η εμπειρία του Ρόμπερτ να μπιτίνελα οτθέ. Βοβ συνεχίνελα: «Κάνα να δεχτιντόμ ι πρόσκληση ι τζενιάκι σο κεράβας λάσαρ μπουτί, βόι βακερντάς μάνγκε: “Νακχλάν ο τεστ!” Πουτσλόμ-λα σο μανγκέλας τι βακερέλ. Εξηγιντάς μάνγκε ότι εκ αμάλ λάκο, σο ανγκλέ ισινέ Μάρτυρας, βακερντάας λάκε ότι σαρέ ο τερνέ Μάρτυρες κερένα αποτσοράλ αμαρτίες κάνα ντιντιόλα-λεν η ευκαιρία. Βόι βακερντάς λέσκε ότι κα κερέλας εκ δοκιμή μάντζαρ για τι ντικχέλ άμα μπαγιά ισί αντικάς ο πράγματα. Αζομάν αγαντόμ καζόμ μπουτ χαιρισάλομ σο ντινόμ δόξα κο ναβ κι Ιεχωβάσκο».

18. Σο ισινέν αποφασισμέ τι κερέν σοράν τουμαρέ μπολντιμάσταρ; (Ντικχέν ο πλαίσιος-ντα «Ντούι Θέματα σο κα Μπεϊντίνεν»)

¹⁸ Κάνα αφιερώντιβενα κο Ιεχωβά ντα μπολντιόνα, σικαβένα ότι μανγκένα τι αγιάνεν λέσκο ναβ σο-ντα τι αβέλ-πες. Μπορίνενα τι αβέν σίγουροι ότι ο Ιεχωβά τζανέλα εμ ο δοκιμασίες σο νακχένα εμ ο προσπάθειες σο κερένα για τι τζαν κόντρα κο πειρασμός. Κα ευλογίνελ ο προσπάθειες σο κερένα τι ατσσόν πιστοί. Τι αβέν σίγουροι ότι αντράλ πι άγιε πνευμάσταρ μπορίνελα τι ντελ-τουμέν ι ζορ τι κερέν-λες ανταβά. (Λουκ. 11:11-13) Με τη βοήθεια ι Ιεχωβάσκι, κα μπορίνεν τι πφιρέν συνέχεια παλάλ κο Ιησούς σοράν τουμαρέ μπολντιμάσταρ.