Τι Ντεν Μπέσα κο «Κριτής Σαρέ ι Πφουβιάκο» σο Τζιτζίνελα ι Τζενένγκε!

1. Καβά πράγμας σο παρηγορίνελα-αμέν σικλιαρντάς ο Ιεχωβά κο Αβραάμ;

Ο ΑΒΡΑΑΜ να μπισταρντάς ποτές ανταγιά συζήτηση. Αντράλ εκχέ αγγελόσταρ, ο Ντεβέλ βακερντάς λέσκε ότι κα καταστραφίνελας ο Σόδομα ντα ο Γόμορρα. Οντουβά πιστός τζενό τθερέλας μερικές αμφιβολίες ντα πουτσλάς: «Κα μουνταρές μπαγιά ι δίκαιε τζενές γιεκ ι πφιρνέ τζενέσαρ; . . . Να κα κερέλ ο Κριτής σαρέ ι πφουβιάκο οντουβά σο ισί σωστός;» Ο Ιεχωβά σικλιαρντάς με υπομονή πι αγαπημέ αμαλές κάτι σο βοηθίνελα ντα παρηγορίνελα σαρέ αμέν: Ο Ντεβέλ ποτές να κα καταστραφίνελ δίκαιε τζενέν.​—Γέν. 18:23-33.

2. Σο κερέλα-αμέν σίγουρους ότι, κάνα ο Ιεχωβά κρίνελα ι τζενέν, σικαβέλα πάντα δικαιοσύνη ντα τζιτζίνελα λένγκε;

² Σόσκε ισινάμ σίγουροι ότι, κάνα ο Ιεχωβά κρίνελα ι τζενέν, σικαβέλα πάντα δικαιοσύνη ντα τζιτζίνελα λένγκε; Επειδή τζανάσα ότι «ο Ιεχωβά ντικχέλα αντρέ κο γκι» κι τζενένγκο. (1 Σαμ. 16:7) Εκτός ανταλέσταρ, τζανέλα «ο γκι κάθε τζενέσκο». (1 Βασ. 8:39· 1 Χρον. 28:9) Ανταγιά αλήθεια κερέλα-αμέν τι σαστίνας. Ο Ιεχωβά ισί μπουτ πο γκοντιαβέρ αμένταρ, οτθάρ μπορεί μα τι αγαβάς πάντα σόσκε λέλα μερικές αποφάσεις. Άκ’ σόσκε ο Παύλος βακερντάς: “Ναστί αρακχάσα ο αποφάσεις ούτε ο ντρομά ι Ιεχωβάσκε!”​—Ρωμ. 11:33.

3, 4. Σο μπορεί τι πουτσάς-αμέν μπάζιμα, ντα σο κα ντικχάς ανταλέ μαθημάστε; (Ιωάννης 5:28, 29)

³ Παρόλο σο τζανάσα ότι ο Ιεχωβά κερέλα πάντα ο σωστός, μερικές φορές μπέκιμ τι τθεράς ερωτήσεις σαρ οντουλά σο τθερέλας ο Αβραάμ. Ντα μπορεί τι πουτσάς-αμέν: “Υπαρχίντιβελα ελπίδα τι τζουβντιόν πάλι ο τζενέ σο καταστραφιντάς ο Ιεχωβά κο Σόδομα ντα κο Γόμορρα; Αβέλα-πες μερικοί οντουλένταρ τι αναστίντιβεν κάνα «κα τζουβντιόν πάλι» ο άδικοι;”​—Πράξ. 24:15.

⁴ Για τι ντικχάς πάλι ο τρόπος σο αγαβάσα ακανά ι ανάσταση. Πριν από χάνικ βακίτι, αγαντάμ πο λατσσές σο μανγκέλα τι βακερέλ ότι μερικά τζενέ «κα ιστίν για τι τζουβντιόν» ντα ότι μερικά τζενέ «κα ιστίν για τι κρίντιβεν».a (Διαβάνεν Ιωάννης 5:​28, 29) Ανταβά κερντάς-αμέν τι αγαβάς πο λατσσές γιαβερά-ντα πράγματα, σο κα ντικχάς κο μάθημας ανταβά ντα κο γιαβέρ. Πρώτα, κα ντικχάς σο να τζανάσα ντα σοράν σο τζανάσα ι τροπόσκε σο κρίνελα δίκαια ο Ιεχωβά.

ΣΟ ΝΑ ΤΖΑΝΑΣΑ

5. Σο βακερένας αμαρέ έντυπα κο πουρανέ μπρεσά ι τζενένγκε σο καταστραφιντάς-λεν ο Ιεχωβά κο Σόδομα ντα κο Γόμορρα;

⁵ Κο πουρανέ μπρεσά, αμαρέ έντυπα βακερένας σο κα αβέλ-πες ι τζενέντζαρ σο ο Ιεχωβά κριντάς-λεν σαρ άδικοι ντα καταστραφιντάς-λεν. Βακεράας ότι ασακέ τζενέ, σαρ ισί οντουλά σο μπεσένας κο Σόδομα ντα κο Γόμορρα, να τθερένα ι ελπίδα τι αναστίντιβεν. Αλλά αφού ροντιντάμ προσεκτικά ανταβά θέμας ντα προσευχισάλαμ πο μπουτ ανταλέσκε, ισί ξεκάθαρος ότι να μπορίνασα τι βακεράς-λες ανταβά με σιγουριά. Σόσκε;

6. Καλά ισί μερικά παραδείγματα σο ο Ιεχωβά κριντάς τζενέν σο ισινέ άδικοι, ντα σο να τζανάσα;

⁶ Σκεφτίνεν μερικές ιστορίες κατά Γραφή σο βακερένα ότι ο Ιεχωβά κριντάς μερικέ τζενέν σαρ άδικοι. Για παράδειγμας, ο Ιεχωβά καταστραφιντάς σαρέ ι τζενέν κο Κατακλυσμός εκτός κατά Νώε ντα λέσκε φαμιλιάταρ. Επίσης, ντινάς λέσκε λαόστε ι οδηγία τι καταστραφίνεν εφτά τθεμά σο ισινέ κο Υποσχεμέ Τθεμ. Ντα εκ άγγελος ι Ιεχωβάσκο μουνταρντάς 185.000 στρατιώτες ι Ασσυριόνγκε αντρέ σε εκ ιράτ. (Γέν. 7:23· Δευτ. 7:1-3· Ησ. 37:36, 37) Ανταλέ περιπτωσιέντε, βακερέλα αμένγκε η Αγία Γραφή ξεκάθαρα ότι ο Ιεχωβά ποτές να κα αναστίνελ οντουλέ τζενέν; Νάα. Σόσκε βακεράσα-λες ανταβά;

7. Καλά πράγματα να τζανάσα ι τζενένγκε σο καταστραφισάλε κο Κατακλυσμός ή κο τθεμά κι Χαναάν; (Ντικχέν ι φωτογραφία)

⁷ Να τζανάσα σαρ κριντάς ο Ιεχωβά ι κάθε τζενές. Ούτε τζανάσα άμα ο τζενέ σο καταστραφιντάς ο Ιεχωβά τθερένας ι ευκαιρία τι σικλιόν λέσκε ντα τι μετανιώνεν. Η Γραφή βακερέλα ότι, κάνα αβιλό ο Κατακλυσμός, ο Νώε «κερέλας λάφι για το δίκαια πράγματα ι Ντεβλέσκε». (2 Πέτρ. 2:5) Αλλά να βακερέλα ότι, καζόμ κερέλας ι μπαρί κιβωτός, προσπαθίνελας επίσης τι κερέλ λάφι ι κάθε τζενέσαρ σο ισινέ κι πφουβ ντα κα μερέλας κο Κατακλυσμός. Αντικάς-ντα, να τζανάσα άμα σαρέ ο πφιρνέ τζενέ σο μπεσένας κο τθεμά κι Χαναάν τθερένας ι ευκαιρία τι σικλιόν ι Ιεχωβάσκε ντα τι αλλάνεν πουμαρί συμπεριφορά.

8. Σο να τζανάσα ι τζενένγκε σο μπεσένας κο Σόδομα ντα κο Γόμορρα;

⁸ Σο κα βακεράς ι τζενένγκε σο μπεσένας κο Σόδομα ντα κο Γόμορρα; Εκ δίκαιος τζενό, ο Λωτ, τζουβντιόλας ντονταλάι λένταρ. Τζανάσα όμως ότι ο Λωτ κερντάς λάφι ι Ιεχωβάσκε σαρέ οντουλέ τζενένγκε; Νάα. Σίγουρα ισινέ πφιρνέ, αλλά τζανένας σαρέ οντουλά τζενέ σο ισί σωστός ντα σο ισί λάθος; Ντεν-τουμέν γκοντί σο βακερέλα η Γραφή ότι μανγκένας τι κερέν μπουτ τζενέ οντουλέ τθεμέσταρ. Μανγκένας τι σοβέν ζορίσαρ ι τζενέντζαρ σο τθερέλας πι κχερέστε ο Λωτ. Η Γραφή βακερέλα ότι αντρέ ανταλέ τζενέντε, εκτός από πφουρέ ισινέ μαξίμια-ντα. Οτθάρ, μπέκιμ ο μαξίμια ναστί αγαβένας καζόμ λάθος ισινέ ανταβά πράγμας. (Γέν. 19:4· 2 Πέτρ. 2:7) Αμαρό Ντεβέλ, ο Ιεχωβά, τζιτζίνελα ι γιαβερένγκε. Τζανάσα μπαγιά ότι αποφασιντάς ι κάθε εκχέσκε ανταλέ τζενένταρ ότι να κα τθερέλ ι ελπίδα τι αναστίντιβελ; Να μπορίνασα τι βακεράς-λες ανταβά. Ο Ιεχωβά βακερντάς κο Αβραάμ ότι να υπαρχίντιβενας ούτε ντες δίκαια τζενέ οντουλέ τθεμέστε. (Γέν. 18:32) Άρα, ισινέ άδικοι, ντα ο Ιεχωβά τθερέλας δίκιος σο καταστραφιντάς-λεν. Μπορίνασα όμως τι βακεράς με σιγουριά ότι καέκ λένταρ να κα αναστίντιβελ κάνα «κα τζουβντιόν πάλι» ο άδικοι; Όχι, να μπορίνασα τι βακεράς-λες ανταβά με σιγουριά!

9. Σο να τζανάσα για τον Σολομώντα;

⁹ Κατά γιαβέρ μπάντα, κι Αγία Γραφή διαβάνασα τζενένγκε-ντα σο ισινέ δίκαιοι αλλά αβιλέ άδικοι. Ο βασιλιάς Σολομών ισί εκ ασακό παράδειγμας. Τζανέλας κον ισινέ ο Ιεχωβά ντα σαρ έπρεπε τι ντας-λες λατρεία. Ντα ο Ιεχωβά ευλογιντάς-λες μπουτ. Όμως, πο σοράν, ο Σολομών αρχισάλο τι ντελ λατρεία ψεύτικε ντεβλέντε. Λέσκε αμαρτίες κερντέ ι Ιεχωβάς τι χολιάνελ μπουτ, ντα ο αποτελέσματα ισινέ μπουτ μπέτι σαρέ ι λαόσκε για μπουτ βακίτι. Για μπουτ μπρεσά, πακιάας ότι ο Σολομών κα αναστίντιβελ. Ντα ο λόγος σο πακιάας-λες ανταβά ισινέ ότι η Γραφή βακερέλα ότι ο Σολομών «πραχούντιλο πι παππουδέντζαρ». Η Γραφή βακερέλα ο ίδιος πράγμας πιστέ τζενένγκε, σαρ ισινέ ο βασιλιάς Δαβίδ. (1 Βασ. 11:5-9, 43· 2 Βασ. 23:13) Αλλά επειδή ο Σολομών πραχούντιλο ανταλέ τροπόσαρ, μπορίνασα τι αβάς σίγουροι ότι κα αναστίντιβελ; Η Γραφή να βακερέλα. Μερικά τζενέ όμως μπέκιμ σκεφτίνενα ότι ο Σολομών κα αναστίντιβελ επειδή “ο τζενό σο μουλό νασλί λέσταρ η αμαρτία”. (Ρωμ. 6:7) Ανταβά ισί μπαγιά, αλλά να μανγκέλα τι βακερέλ ότι σαρέ ο τζενέ σο μουλέ κα αναστίντιβεν. Απλώς επειδή εκ τζενό μουλό, να κερδιντάς ο δικαίωμας τι τζουβντιόλ πάλι. Η ανάσταση ισί εκ δώρος αμαρέ λατσσέ Ντεβλέσταρ. Βοβ ντέλα-λες οντουλέντε σο μανγκέλα τι τθερέν ι ευκαιρία τι υπηρετίνεν-λες για πάντα. (Ιώβ 14:13, 14· Ιωάν. 6:44) Κα λελ ο Σολομών ανταβά δώρος; Ο Ιεχωβά τζανέλα ι απάντηση, όχι αμέν. Ανταβά σο τζανάσα όμως ισί ότι ο Ιεχωβά κα κερέλ ο σωστός.

ΣΟ ΤΖΑΝΑΣΑ

10. Σαρ νιωθίνελα ο Ιεχωβά κάνα ισί τι καταστραφίνελ εκχέ τζενές; (Ιεζεκιήλ 33:11) (Ντικχέν ι φωτογραφία-ντα)

¹⁰ Διαβάνεν Ιεζεκιήλ 33:​11. Ο Ιεχωβά βακερέλα αμένγκε λατσσιμάσαρ καλέ τροπόσαρ κρίνελα ι τζενέν, ντα σαρ νιωθίνελα. Ο απόστολος Πέτρος βακερντάς ι Ντεβλέσκε πνευμάσαρ κάτι σο μοιάζελας οντουλέσαρ σο γραφιντάς ο προφήτης Ιεζεκιήλ: «Ο Ιεχωβά . . . να μανγκέλα τι καταστραφίντιβελ καέκ τζενό». (2 Πέτρ. 3:9) Ανταλά λάφια ηρεμίνενα-αμέν σόσκε τζανάσα ότι ο Ιεχωβά να σιγκιαρέλα τι καταστραφίνελ εκχέ τζενές για πάντα. Ο Ιεχωβά τζιτζίνελα μπουτ ι τζενένγκε, ντα κερέλα-λες ανταβά κάθε φαρ σο ντικχέλα ότι υπαρχίντιβελα λόγος τι κερέλ-λες.

11. Κον να κα αναστίντιβεν, ντα σαρ τζανάσα-λες ανταβά;

¹¹ Σο τζανάσα ι τζενένγκε σο να κα αναστίντιβεν; Η Αγία Γραφή βακερέλα σάντε χάνικ παραδείγματα.b Ο Ιησούς σικαντάς ότι ο Ιούδας να κα αναστίντιβελ. (Μάρκ. 14:21· Ιωάν. 17:12)c Ο Ιούδας τζανέλας ότι ανταβά σο κερντάς τζάλας κόντρα κο Ιεχωβά Ντεβέλ ντα λέσκε Τσσαβέστε. Παρόλο σο τζανέλας-λες, κερντάς-λες. (Μάρκ. 3:29)d Αντικάς-ντα, ο Ιησούς βακερντάς ότι μερικοί αρχηγοί ι θρησκειάκε σο γκιλέ λέσαρ κόντρα να κα τθερένας ι ελπίδα τι αναστίντιβεν. (Ματθ. 23:33) Ντα ο απόστολος Παύλος προειδοποιηντάς ότι ο αποστάτες σο να μετανιώνενα να κα αναστίντιβεν.​—Εβρ. 6:4-8· 10:29.

12. Σαρ σικαντάς ο Ιεχωβά ότι τζιτζίνελα ι τζενένγκε; Βακερέν παραδείγματα.

¹² Σο γιαβέρ τζανάσα; Σαρ ντικχλάμ πο οπρέ, ο Ιεχωβά τζιτζίνελα μπουτ ι τζενένγκε ντα «να μανγκέλα τι καταστραφίντιβελ καέκ τζενό». Σαρ τζιτζισάλο μερικέ τζενένγκε σο κερντέ μπαρέ αμαρτίες; Ο βασιλιάς Δαβίδ κερντάς μπουτ μπαρέ αμαρτίες. Γκιλό εκχέ γιαβερέσκε ρομνιάσαρ ντα μουνταρντάς λάκε ρομές. Όμως ο Δαβίδ μετανιωσάλο, οτθάρ ο Ιεχωβά τζιτζισάλο λέσκε ντα συγχωριντάς-λες. (2 Σαμ. 12:1-13) Ο βασιλιάς Μανασσής, σχεδόν σαρί πι ζωή, κερντάς μπουτ γκεραλέ πράγματα. Παρόλο σο ανταβά τζενό ισινέ μπουτ πφιρνό, κάνα μετανιωσάλο, ο Ιεχωβά τζιτζισάλο λέσκε ντα συγχωριντάς-λες. (2 Χρον. 33:9-16) Ανταλά παραδείγματα ανένα αμαρέ γκοντιάτε ότι ο Ιεχωβά τζιτζίνελα ι γιαβερένγκε κάθε φαρ σο ντικχέλα ότι υπαρχίντιβελα λόγος τι κερέλ-λες ανταβά. Κα αναστίνελ ασακέ τζενέν επειδή αγαντέ ότι κερντέ μπαρέ αμαρτίες ντα μετανιωσάλε.

13. (α) Σόσκε τζιτζισάλο ο Ιεχωβά για το Νινευίτες; (β) Σο βακερντάς ο Ιησούς πο σοράν για το Νινευίτες;

¹³ Κάτι γιαβέρ σο τζανάσα ισί ότι ο Ιεχωβά τζιτζισάλο για το Νινευίτες. Ο Ντεβέλ βακερντάς κο Ιωνάς: «Ντικχλόμ καζόμ πφιρνέ ισί». Αλλά κάνα μετανιωσάλε πουμαρέ αμαρτιένγκε, ο Ιεχωβά συγχωριντάς-λεν λατσσιμάσαρ. Τζιτζισάλο για το Νινευίτες πο μπουτ κατά Ιωνάς. Ο Ιωνάς ισινέ χολιαμέ, ντα ο Ντεβέλ χρειαζίντιλο τι ανέλ λέσκε γκοντιάτε ότι οντουλά Νινευίτες “να τζανένας τι ξεχωρίνεν ο σωστός κατά λάθος”. (Ιωνάς 1:1, 2· 3:10· 4:9-11) Πο σοράν, ο Ιησούς χρησιμοποιηντάς ανταβά παράδειγμας για τι σικαβέλ καζόμ δίκαιος ισί ο Ιεχωβά ντα καζόμ τζιτζίνελα ι γιαβερένγκε. Ο Ιησούς βακερντάς ότι ο Νινευίτες σο μετανιωσάλε «κα ιστίν κατά μεριπέ» κο Ντιβές σο κα Κρίνελ ο Ντεβέλ ι τζενέν.​—Ματθ. 12:41.

14. Σο μανγκέλα τι βακερέλ ότι ο Νινευίτες «κα ιστίν για τι κρίντιβεν»;

¹⁴ Αλλά καλέ “Ντιβεσέστε” κα «ιστίν κατά μεριπέ» ο Νινευίτες; Ο Ιησούς βακερντάς ότι κάποια τζενέ «κα ιστίν για τι κρίντιβεν». (Ιωάν. 5:29) Ανταβά κα αβέλ-πες κι Βασιλεία λέσκι σο κα ατσσικιαρέλ χίλια μπρεσά. Οτθέ «κα τζουβντιόν πάλι εμ οντουλά σο ισί δίκαιοι εμ οντουλά σο νανέ», δηλαδή ο άδικοι. (Πράξ. 24:15) Ο άδικα τζενέ «κα ιστίν για τι κρίντιβεν». Ανταβά μανγκέλα τι βακερέλ ότι ο Ιεχωβά ντα ο Ιησούς κα ντικχέν λένγκι συμπεριφορά ντα άμα κα κερέν ο πράγματα σο σικλιόνα οτθέ. Άμα εκ Νινευίτης σο κα αναστίντιβελ να κα μανγκέλ τι υπηρετίνελ ι Ιεχωβάς, κάνα βοβ κα κρίνελ-λες, κα αποφασίνελ ότι πρέπει τι μερέλ. (Ησ. 65:20) Αλλά σαρέ οντουλά σο κα τραμπίνεν τι υπηρετίνεν πιστά ι Ιεχωβάς, κάνα βοβ κα κρίνελ-λεν, κα αποφασίνελ ότι κα τζουβντιόν για πάντα!​—Δαν. 12:2.

15. (α) Σόσκε ισί πο λατσσό μα τι βακεράς ότι καέκ οντουλένταρ σο καταστραφισάλε κο Σόδομα ντα κο Γόμορρα να κα αναστίντιβελ; (β) Σαρ μπορίνασα τι αγαβάς ο λάφια σο ισί γραμμέ κο εδάφιος Ιούδα 7; (Ντικχέν ο πλαίσιος «Σο Μανγκέλας τι Βακερέλ ο Ιούδας;»)

¹⁵ Ο Ιησούς βακερντάς ότι, «κο Ντιβές σο κα Κρίνελ ο Ντεβέλ ι τζενέν», ο πράγματα κα αβένας πο εύκολα ι τζενένγκε κο Σόδομα ντα κο Γόμορρα παρά ι τζενένγκε σο να δεχτιντέ τι ασουνέν λέσκο σικλιαριπέ. (Ματθ. 10:14, 15· 11:23, 24· Λουκ. 10:12) Σο μανγκέλας τι βακερέλ; Μπέκιμ τι αμντίνας ότι ο Ιησούς ισινέ υπερβολικός. Αλλά ντικχίντιβελα ότι ο Ιησούς βακερντάς-λες ανταβά επειδή αντικάς κα αβέλ-πες. Κάνα βακερντάς ότι ο Νινευίτες «κα ιστίν κατά μεριπέ» κο Ντιβές σο κα Κρίνελ ο Ντεβέλ ι τζενέν, μανγκέλας τι σικαβέλ ότι αντικάς κα αβέν ο πράγματα. Κο ντούι-ντα περιπτώσεις, εμ κάνα κερέλας λάφι ι τζενένγκε κο Σόδομα ντα κο Γόμορρα εμ για το Νινευίτες, ο Ιησούς κερέλας λάφι για το ίδιος «Ντιβές σο κα Κρίνελ ο Ντεβέλ ι τζενέν». Σαρ ο Νινευίτες, αντικάς ο τζενέ κο Σόδομα ντα κο Γόμορρα κερντέ μπέτι πράγματα. Αλλά ο Νινευίτες τθερένας ι ευκαιρία τι μετανιώνεν, ενώ ο τζενέ κο Σόδομα ντα κο Γόμορρα να τθερένας ανταγιά ευκαιρία. Επίσης, ντεν-τουμέν γκοντί σο βακερντάς ο Ιησούς. Καλά τζενέ «κα ιστίν για τι κρίντιβεν»; Τζενέ-ντα «σο κερντέ μπέτι πράγματα». (Ιωάν. 5:29) Οτθάρ, ντικχίντιβελα ότι μπέκιμ υπαρχίντιβελα ελπίδα ι τζενένγκε κο Σόδομα ντα κο Γόμορρα. Υπαρχίντιβελα περίπτωση ότι μερικά ανταλέ τζενένταρ κα αναστίντιβεν, ντα μπέκιμ κα τθεράς ι ευκαιρία τι σικλιαράς-λεν ι Ιεχωβάσκε ντα ι Ιησού Χριστόσκε.

16. Οντουλένταρ σο τζανάσα, σαρ κα αποφασίνελ ο Ιεχωβά κας κα αναστίνελ; (Ιερεμίας 17:10)

¹⁶ Διαβάνεν Ιερεμίας 17:​10. Ανταβά εδάφιος βακερέλα αμένγκε χάνικ λαφίντζαρ οντουλά σο τζανάσα: Ο Ιεχωβά ισί πάντα οντουβά σο “ρόντελα αντρέ κο γκι, σο ντικχέλα ο σκέψεις σο ισί γκεραντέ”. Κάνα κα αποφασίνελ καλέ τζενέν κα αναστίνελ, βοβ “κα ντελ κο κάθε εκ σύμφωνα λέσκε ντρομέντζαρ”. Ο Ιεχωβά να κα αλλάνελ πο δίκαιοι κανόνες, αλλά κα τζιτζίνελ ι γιαβερένγκε κάθε φαρ σο κα υπαρχίντιβελ λόγος τι κερέλ-λες ανταβά. Οτθάρ, δεν πρέπει τι νικαβάς ο συμπέρασμας ότι εκ τζενό να τθερέλα ι ελπίδα τι αναστίντιβελ εκτός άμα τζανάσα-λες σίγουρα ανταβά επειδή η Γραφή βακερέλα-λες!

«Ο ΚΡΙΤΗΣ ΣΑΡΕ Ι ΠΦΟΥΒΙΑΚΟ» ΚΑ ΚΕΡΕΛ «ΟΝΤΟΥΒΑ ΣΟ ΙΣΙ ΣΩΣΤΟΣ»

17. Σο κα αβέλ-πες ι τζενέντζαρ σο μουλέ;

¹⁷ Από αζομάν σο ο Αδάμ ντα η Εύα ακολουθιντέ ι Μπενγκές ντα γκιλέ κόντρα ι Ιεχωβά Ντεβλέσαρ, δισεκατομμύρια τζενέ τθερένα μουλό. Ο «μεριπέ» σο ισί αμαρό «ντουσμάνι», λιντάς μπουτέ τζενένγκε ζωές! (1 Κορ. 15:26) Σο κα αβέλ-πες σαρέ οντουλέ τζενέντζαρ; Εκ χουρντό αριθμός πιστέ τζενένγκο σο ακολουθίνενα ι Χριστός, 144.000, κα τθερέν αθάνατη ζωή κο ουρανός. (Αποκ. 14:1) Εκ μπαρό αριθμός πιστέ μουρσένγκο ντα τζουβλίνγκο σο μανγκένας ι Ιεχωβάς κα αναστίντιβεν κάνα “κα τζουβντιόν πάλι οντουλά σο ισί δίκαιοι”. Βον κα τζουβντιόν για πάντα κι πφουβ άμα κα ατσσόν δίκαιοι κι Βασιλεία κι Χριστόσκι σο κα ατσσικιαρέλ χίλια μπρεσά ντα κι τελευταία δοκιμασία. (Δαν. 12:13· Εβρ. 12:1) Επίσης, αντρέ κο Χίλια Μπρεσά, «οντουλά σο νανέ» δίκαιοι, ατζέ-ντα οντουλά σο «κερντέ μπέτι πράγματα», κα τθερέν ι ευκαιρία τι αλλάνεν συμπεριφορά ντα τι αβέν πιστοί. Αντρέ κο άδικα τζενέ ισί εμ οντουλά σο ποτές να υπηρετιντέ ι Ιεχωβάς. (Λουκ. 23:42, 43) Όμως, μερικά τζενέ ισινέ αζόμ πφιρνέ, ντα αζόμ αποφασισμέ τι τζαν κόντρα ι Ιεχωβάσαρ ντα λέσκε σκοπόσαρ, σο Βοβ αποφασιντάς ότι να κα τθερέν ι ευκαιρία τι αναστίντιβεν.​—Λουκ. 12:4, 5.

18, 19. (α) Σόσκε μπορίνασα τι αβάς σίγουροι ότι ο Ιεχωβά κα κρίνελ δίκαια ι μουλέν; (Ησαΐας 55:8, 9) (β) Σο κα ντικχάς κο γιαβέρ μάθημας;

¹⁸ Σόσκε μπορίνασα τι αβάς ντιπ σίγουροι ότι κάνα ο Ιεχωβά κρίνελα ι τζενέν, λέλα πάντα ι σωστή απόφαση; Ο Αβραάμ αγαβέλας μπουτ λατσσές ότι ο Ιεχωβά ισί ο τέλειος «Κριτής σαρέ ι πφουβιάκο». Επίσης ισί γκοντιαβέρ ντα τζιτζίνελα ι τζενένγκε. Ο Ιεχωβά σικλιαρντάς πι Τσσαβές ντα ντινάς λέστε ι ευθύνη τι κρίνελ σαρέ ι τζενέν. (Ιωάν. 5:22) Εμ ο Ιεχωβά εμ ο Ιησούς τζανένα σο ισί κο γκι κι κάθε τζενέσκο. (Ματθ. 9:4) Οτθάρ, κάνα κα κρίνεν ι τζενέν, κα κερέν «οντουβά σο ισί σωστός»!

¹⁹ Τι αβάς αποφασισμέ τι ντας μπέσα κο Ιεχωβά σόσκε βοβ τζανέλα ο πράγματα πο λατσσές αμένταρ. Αγαβάσα ότι αμέν να τθεράσα ι ικανότητα τι κρίνας, αλλά βοβ τθερέλα-λα! (Διαβάνεν Ησαΐας 55:8, 9) Οτθάρ, ντάσα μπέσα κο Ιεχωβά ντα λέσκε Τσσαβέστε για τι κρίνεν βον ι τζενέν. Ντα τζανάσα ότι ο Ιησούς, αμαρό Βασιλιάς, ισί μπουτ δίκαιος ντα τζιτζίνελα μπουτ ι γιαβερένγκε, ακριβώς σαρ λέσκο Ντατ. (Ησ. 11:3, 4) Αλλά σαρ κα κρίνελ ο Ιεχωβά ντα ο Ιησούς ι τζενέν κι μπαρί στεναχώρια; Σο να τζανάσα; Σο τζανάσα; Κο γιαβέρ μάθημας, κα ντικχάς ανταλά ερωτήσεις.