Σο Σικλιάσα Κατά Θαύμας ι Μαντρέσαρ

1. Καζόμ σημαντικός ισινέ ο μαντρό κι Αγία Γραφή;

Ο ΜΑΝΤΡΟ ισινέ ο πο σημαντικός χαμπέ ι τζενένγκε κο πουρανέ μπρεσά. (Γέν. 14:18· Λουκ. 4:4) Ισινέ αζόμ σημαντικός σο κι Αγία Γραφή μπάζιμα χρησιμοποιήντιβελα η λέξη «μαντρό» για τι σικαβέλ γενικά ο χαμπέ. (Ματθ. 6:11) Επίσης ο Ιησούς χρησιμοποιηντάς ο μαντρό για τι κερέλ ντούι θαύματα. (Ματθ. 16:9, 10) Αρακχάσα ι εκ ιστορία ανταλένταρ κο κεφάλαιος 6 κο Ιωάννης. Κα ντικχάς ανταγιά ιστορία ντα κα ρόντας σο μπορίνασα τι σικλιάς ντα τι κεράς αμαρέ ζωγιάτε αντιβές.

2. Καλέ περιπτωσιάτε χρειαζίντιλε μερικά τζενέ χαμπέ;

² Κάνα ο απόστολοι ι Ιησούσκε τελειωσάλε εκ εκστρατεία για τι βακερέν ο λατσσέ αμπέρια, ο Ιησούς λιντάς-λεν ντα γκιλέ βαρκάσαρ οκιά μπάνταρ κατά Ντεριάβ της Γαλιλαίας για τι ξεκουράντιβεν. (Μάρκ. 6:7, 30-32· Λουκ. 9:10) Ερεσλέ εκχέ τθανέστε σο τθερέλας ησυχία κι Βηθσαϊδά. Αλλά ο τζενέ ασουντέ ότι ο Ιησούς ισινέ οτθέ ντα μπουτ σουγκό χιλιάδες τζενέ γκιλέ για τι ντικχέν-λες. Ο Ιησούς να κερντάς-λεν πέρα. Ντινάς λατσσιμάσαρ πι σαατίσταρ για τι σικλιαρέλ-λεν ι Βασιλειάκε ντα για τι κερέλ λατσσές ι νασφαλέν. Κάνα ο σαάτι νακχλό, ο μαθητές σκεφτίνενας σο κα χάνας σαρέ ανταλά τζενέ. Μερικοί μπορεί τι τθερένας χάνικ χαμπέ, αλλά ο πο μπουτ έπρεπε τι τζαν κο γκαβά για τι αρακχέν χαμπέ. (Ματθ. 14:15· Ιωάν. 6:4, 5) Σο κα κερέλας ο Ιησούς;

ΝΤΙΝΑΣ-ΛΕΝ ΜΑΝΤΡΟ ΜΕ ΕΚ ΘΑΥΜΑΣ

3. Σο βακερντάς ο Ιησούς τι κερέν λέσκε μαθητές ι τζενένγκε; (Ντικχέν ι φωτογραφία-ντα)

³ Ο Ιησούς βακερντάς πι μαθητέντε: «Να χρειαζίντιβελα τι νασέν. Ντεν-λεν τουμέν τι χαν». (Ματθ. 14:16) Ανταβά να ισινέ ιτς εύκολος επειδή οτθέ ισινέ περίπου 5.000 μουρσά. Ντα αν κα τσσουβάς ι τζουβλίν ντα ι χουρντέν, ο τζενέ σο έπρεπε τι χαν μπορεί τι ισινέ 15.000. (Ματθ. 14:21) Ο Ανδρέας βακερντάς: «Ισί ατθέ εκ τσσαβορό σο τθερέλα παντς μαντρέ τζοβιάταρ ντα ντούι χουρντέ ματσσέ. Αλλά σο ισί ανταλά αζόμ μπουτέ τζενένγκε;» (Ιωάν. 6:9) Ο μαντρέ ι τζοβιάταρ χάνας-λεν συνήθως ο τσορορέ αλλά γιαβερά-ντα. Ντα ο χουρντέ ματσσέ μπορεί τι ισινέ πεκέ αντρέ κο λον ντα αποξηραμέ. Αλλά ο χουρντό τσσαβό να τθερέλας αζόμ χαμπέ για τι χαν αζόμ τζενέ.

4. Σο σικλιάσα κατά εδάφια Ιωάννης 6:11-13; (Ντικχέν ο φωτογραφίες-ντα)

⁴ Ο Ιησούς μανγκέλας τι σικαβέλ λατσσιπέ κο τζενέ οτθάρ μανγκλάς λένταρ τι μπεσέν ομάδες ομάδες κι τσαρ. (Μάρκ. 6:39, 40· διαβάνεν Ιωάννης 6:11-13) Διαβάνασα ότι ο Ιησούς κερντάς εκ προσευχή για τι βακερέλ ευχαριστώ πι Νταντέσκε ι μαντρένγκε ντα ι ματσσένγκε. Κάνα κερντάς προσευχή κο Ντεβέλ σικαντάς ότι βοβ ισινέ οντουβά σο ντινάας-λεν ο χαμπέ ντα ότι εκτιμίνελας-λες ανταβά. Ανταβά ανέλα αμαρέ γκοντιάτε τι ακολουθίνας ο παράδειγμας ι Ιησούσκο ντα τι κεράς προσευχή πριν τι χας είτε ισινάμ κορκορέ είτε ισί γιαβερά-ντα τζενέ ντονταλάι αμένταρ. Σοράν ο Ιησούς βακερντάς τι ντεν ο χαμπέ κο τζενέ ντα ο τζενέ χαλέ ντα τσαλιλέ. Υπαρχίντιβελας αζόμ μπουτ χαμπέ σο ο τζενέ να μπορισάλε τι χαν-λες σαρό. Ο Ιησούς να μανγκέλας τι φουρτίντιβελ ανταβά χαμπέ. Οτθάρ βακερντάς πι μαθητένγκε τι γκίντεν ο χαμπέ σο ατσσιλό για τι μπορίνεν τι χαν-λες γιαβέρ φαρ. Ο Ιησούς χρησιμοποιήνελας ο πράγματα σο τθερέλας γκοντιάσαρ, ανταβά ισί εκ μπουτ λατσσό παράδειγμας αμένγκε. Άμα τθερένα τσσαβέν, μπορίνενα τι χρησιμοποιήνεν ανταγιά ιστορία για τι σικλιαρέν-λεν σόσκε ισί σημαντικός τι κερέν προσευχή πριν τι χαν, τι σικαβέν λατσσιπέ κο γιαβερά ντα τι ντεν αντράλ πουμαρέ γκίσταρ οντουλά σο τθερένα, σαρ κερντάς ο Ιησούς-ντα.

5. Σο μανγκλέ ο τζενέ τι κερέν ι Ιησούς, ντα σο κερντάς βοβ;

⁵ Ο τζενέ ατσσιλέ πουταρντέ μόσαρ κατά σικλιαριπέ ι Ιησούσκο ντα κατά θαύματα λέσκε. Βον τζανένας ότι ο Μωυσής βακερντάας ότι ο Ντεβέλ κα μπουτσσαβέλας λένγκε εκχέ ξεχωριστέ προφητής. Οτθάρ μπορεί τι σκεφτίνενας ότι ο Ιησούς ισινέ ανταβά προφήτης. (Δευτ. 18:15-18) Μπορεί τι σκεφτίνενας ότι ο Ιησούς κα αβέλας εκ μπουτ λατσσό βασιλιάς αφού μπορίνελας τι ντελ μαντρό σαρό κο λαός. Οτθάρ μανγκένας τι “καπτίνεν-λες για τι κερέν-λες βασιλιάς”. (Ιωάν. 6:14, 15) Άμα ο Ιησούς κα μουκχέλας τι αβέλ-πες ανταβά, κα αβέλας σαρ τι τζάλας γιεκ ι Ιουδαιόντζαρ κι κόντρα σο τθερένας με τους Ρωμαίους σο κερένας κουμάντος αζομάν. Σο κερντάς όμως ο Ιησούς; Η Γραφή βακερέλα ότι νασλό ντα “γκιλό κο βες” για τι αβέλ ντιπ κορκορό. Άρα παρόλο σο ο γιαβερά πιένενας-λες να μανγκέλας τι ανακατούντιβελ κο πολιτικά. Σο σικλιάσα αμέν ανταλέσταρ;

6. Σαρ μπορίνασα τι σικαβάς ότι μανγκάσα τι ακολουθίνας ο παράδειγμας ι Ιησούσκο; (Ντικχέν ι φωτογραφία-ντα)

⁶ Σίγουρα ο τζενέ να κα μανγκέν αμένταρ ποτές τι κεράς εκ θαύμας για τι ντας-λεν χαμπέ ή τι κεράς-λεν λατσσές. Ούτε κα μανγκέν αμένταρ ποτές τι κυβερνίνας-λεν. Όμως μπορεί τι πιένεν-αμέν τι ανακατούντιβας κι πολιτική ντα αντικάς τι ψηφίνας ή τι υποστηρίνας εκχέ τζενές σο πακιάνα ότι κα αλλάνελας ο πράγματα. Όμως ο παράδειγμας ι Ιησούσκο ισί ξεκάθαρος. Βοβ να μανγκλάς τι ανακατούντιβελ κι πολιτική ντα βακερντάς πο σοράν: «Μι Βασιλεία νανέ σαρ ανταβά ντουνιάς». (Ιωάν. 17:14· 18:36) Ο Χριστιανοί αντιβές πρέπει τι σκεφτίνεν σαρ σκεφτίνελα ο Ιησούς ντα τι κερέν οντουλά σο κερέλα βοβ. Υποστηρίνασα ι Βασιλεία ι Ντεβλέσκι, κεράσα λάφι γιαβερέντε λάκε ντα προσευχίντιβασα τι αβέλ. (Ματθ. 6:10) Αλλά ισί γιαβερά-ντα πράγματα σο μπορίνασα τι σικλιάς κατά θαύμας ι μαντρέσαρ.

«ΣΟ ΜΑΝΓΚΕΝΑΣ ΤΙ ΣΙΚΑΒΕΝ Ο ΜΑΝΤΡΕ»

7. Σο κερντάς ο Ιησούς ντα σο κερντέ σοράν ο μαθητές; (Ιωάννης 6:16-20)

⁷ Αφού ο Ιησούς παρβαρντάς ι τζενέν, βακερντάς πι μαθητένγκε τι νασέν οντουτθάρ ντα τι βουρτίνεν ι βαρκάσαρ κι Καπερναούμ. Βοβ γκιλό κο βες, για μα τι κερέν-λες ο τζενέ βασιλιάς. (Διαβάνεν Ιωάννης 6:16-20) Καζόμ ο μαθητές κερένας ταξίδι ι βαρκάσαρ, αρχισάλι τι πφούντελ ζουρανί μπαρμπάλ ντα κι ντεριάβ αβιλί μπαρί φουρτούνα. Αζομάν ο Ιησούς πφιρντάς οπράλ κο πανί ντα γκιλό πασέ λέντε. Ντα βακερντάς κο Πέτρος τι πφιρέλ βοβ-ντα οπράλ κο πανί. (Ματθ. 14:22-31) Μόλις ο Ιησούς νικλιντάς κι βάρκα, η μπαρμπάλ πελί. Ο μαθητές ατσσιλέ πουταρντέ μόσαρ ντα βακερντέ: «Μπαγιά ισινάν Τσσαβό ι Ντεβλέσκο».a (Ματθ. 14:33) Όμως, να αγαντέ σαρ συνδέντιβελας ανταβά θαύμας οντουλέσαρ σο κερντάας ι μαντρέντζαρ. Ο Μάρκος βακερέλα: «[Ο απόστολοι] ατσσιλέ πουταρντέ μόσαρ, σόσκε να αγαντέας σο μανγκένας τι σικαβέν ο μαντρέ, αλλά λένγκο γκι ατζέ να αγαβέλας». (Μάρκ. 6:50-52) Βα, να αγαντέας καζόμ μπαρί ισινέ η ζορ σο ντινάας ο Ιεχωβά κο Ιησούς για τι κερέλ θαύματα. Χάνικ πο σοράν, ο ίδιος ο Ιησούς κερντάς λάφι για το θαύμας ι μαντρέντζαρ ντα βακερντάς σο μπορίνασα τι σικλιάς.

8, 9. Σόσκε ο τζενέ ρόντενας ι Ιησούσκε; (Ιωάννης 6:26, 27)

⁸ Ο γιαβέρ ντιβές, ο τζενέ αβιλέ κο τθαν σο ντινάας-λεν ο Ιησούς τι χαν. Όμως βοβ ντα λέσκε μαθητές να ισινέ οτθέ. Οτθάρ ο τζενέ λιντέ καράβια σο αβιλέ κατά Τιβεριάδα ντα γκιλέ κι Καπερναούμ για τι ρόντεν ι Ιησούσκε. (Ιωάν. 6:22-24) Κερντέ-λες ανταβά επειδή μανγκένας τι σικλιόν πο μπουτ ι Βασιλειάκε; Όχι. Οντουβά σο μανγκένας πο μπουτ ισινέ τι ντελ-λεν ο Ιησούς γιαβέρ-ντα μαντρό. Σαρ τζανάσα-λες ανταβά;

⁹ Τσσουβέν σημασία σο αβιλό-πες κάνα ο τζενέ αρακχλέ ι Ιησούς πασέ κι Καπερναούμ. Ο Ιησούς βακερντάς λένγκε ξεκάθαρα ότι οντουβά σο μανγκένας πο μπουτ ισινέ τι τσαλιαρέν-πες. Παρόλο σο “χαλέ κατά μαντρέ ντα τσαλιλέ” ο Ιησούς βακερντάς ότι ανταβά χαμπέ ισινέ “χαμπέ σο χαλάντιβελα”. Βακερντάς λένγκε τι κερέν μπουτί ι «χαμπέσκε σο να χαλάντιβελα ντα ντέλα ζωή για πάντα». (Διαβάνεν Ιωάννης 6:26, 27) Ο Ιησούς βακερντάς ότι ανταβά χαμπέ κα ντέλας-λες λέσκο Ντατ. Κάνα ασουντέ ο τζενέ ότι υπαρχίντιβελα χαμπέ σο κα μπορίνελας τι ντελ-λεν ζωή για πάντα μάλλον ατσσιλέ πουταρντέ μόσαρ! Καβά χαμπέ κα μπορίνελας τι κερέλ κάτι ασακό, ντα σαρ κα μπορίνενας τι λεν-λες ανταλά τζενέ;

10. Σο έπρεπε τι κερέν ο τζενέ για τι “τζουβντιόν για πάντα”;

¹⁰ Ανταλά Ιουδαίοι μανγκένας τι τζανέν σο έπρεπε τι κερέν για τι λεν ανταβά χαμπέ. Μπορεί τι τθερένας πουμαρέ γκοντιάτε “οντουλά σο μανγκέλας” λένταρ ο Μωσαϊκός Νόμος. Όμως ο Ιησούς βακερντάας λένγκε: «Ακαβά ισί σο μανγκέλα ο Ντεβέλ: Τι σικαβέν πίστη οντουλέστε σο μπουτσσαντάς βοβ». (Ιωάν. 6:28, 29) Ισί μπουτ σημαντικός τι σικαβέλ κάποιος πίστη οντουλέστε σο μπουτσσαντάς ο Ντεβέλ για «τι τζουβντιόλ για πάντα». Ο Ιησούς-ντα κερντάας λάφι ανταλέσκε. (Ιωάν. 3:16-18, 36) Ντα πο σοράν κα βακερέλας ατζέ πο μπουτ πράγματα οντουλένγκε σο έπρεπε τι κερέν για τι κερδίνεν ζωή για πάντα.​—Ιωάν. 17:3.

11. Σαρ σικαντέ ο Ιουδαίοι ότι οντουβά σο χάλας-λεν σάντε ανάγκη ισινέ τι τσαλιαρέν-πες μαντρέσαρ; (Ψαλμός 78:24, 25)

¹¹ Οντουλά Ιουδαίοι να πακιαντέ ότι έπρεπε τι σικαβέν πίστη κο Ιησούς. Πουτσλέ-λες: «Σο θαύμας κα κερές, για τι ντικχάς-λες ντα τι πακιάς-τουτ;» (Ιωάν. 6:30) Βακερντέ ότι λένγκε παππούδες κο ντιβεσά κι Μωυσίσκε λιντέας ο μάννα σο μοιάζελας ι μαντρέσαρ. (Νεεμ. 9:15· διαβάνεν Ψαλμός 78:24, 25) Αγαβάσα μπουτ λατσσές ότι οντουβά σο χάλας-λεν ανάγκη σάντε ισινέ σαρ τι τσαλιαρέν-πες ι μαντρέσαρ. Ντα κάνα ο Ιησούς βακερντάς λένγκε σοράν για το «αληθινός μαντρό κατά ουρανός» να πουτσλέ-λες σο μανγκέλα τι βακερέλ. Ανταβά μαντρό να ισινέ σαρ ο μάννα, ισινέ μαντρό σο κα ντέλας-λεν ζωή για πάντα. (Ιωάν. 6:32) Τθερένας πουμαρέ γκοντιάτε αζόμ μπουτ ο ανάγκες σο τθερένας σο να ντένας σημασία κο πνευματικές αλήθειες σο προσπαθίνελας τι βακερέλ λένγκε ο Ιησούς. Σο σικλιάσα ανταλέσταρ;

ΣΟ ΙΣΙ Ο ΠΟ ΣΗΜΑΝΤΙΚΟΣ ΑΜΕΝΓΚΕ

12. Σαρ σικαντάς ο Ιησούς καβά ισί ο πο σημαντικός πράγμας;

¹² Εκ μπουτ σημαντικός σικλιαριπέ σο λάσα κατά κεφάλαιος 6 κο Ιωάννης ισί ακαβά: Ο πο σημαντικός πράγμας αμένγκε ισί τι ντας καν κο Ντεβέλ ντα τι τθεράς εκ λατσσί σχέση λέσαρ. Ντεν-τουμέν γκοντί ότι ο Ιησούς βακερντάας-λες ανταβά κάνα βακερντάς όχι κο πειρασμός κι Μπενγκέσκο. (Ματθ. 4:3, 4) Κι ομιλία σο κερντάς Οπράλ κο Βες, τονιντάς ότι πρέπει τι αγαβάς ότι τθεράσα ανάγκη ι Ντεβλές. (Ματθ. 5:3) Οτθάρ μπορίνασα τι πουτσάς αμαρό νεαυτός: “Σικαβέλα ο τρόπος σο τζουβντιάβα ότι τθερέλα πο μπαρί σημασία μάνγκε μι φιλία ι Ιεχωβάσαρ παρά ο πράγματα σο ντέλα μο γκι τι τθεράβ;”

13. (α) Σόσκε νανέ κακός τι απολαμβάνας αμαρό χαμπέ; (β) Καγιά προειδοποίηση ντινάς-αμέν ο Παύλος; (1 Κορινθίους 10:6, 7, 11)

¹³ Νανέ λάθος τι κεράς προσευχή για το πράγματα σο τθεράσα ανάγκη ντα τι χαιρίνας ανταλέ πραγματέντζαρ. (Λουκ. 11:3) Η Γραφή βακερέλα ότι ισί λατσσό εκχέ τζενέσκε «τι χαλ ντα τι πιλ ντα τι χαιρίνελ ι πφαρέ μπουτιάκε σο κερέλα» ντα ότι ανταβά «αβέλα κατά αληθινέ Ντεβλέσκο βας». (Εκκλ. 2:24· 8:15· Ιακ. 1:17) Όμως, πρέπει τι προσοχίνας μα τι μουκχάς ο πράγματα σο τθεράσα ανάγκη τι αβέν ο πο σημαντικά αμαρέ ζωγιάτε. Ο Παύλος τονιντάς-λες ανταβά κάνα γραφιντάς κο Χριστιανοί σο τζουβντιόνας χάνικ πριν τι αβέλ η καταστροφή της Ιερουσαλήμ. Κερντάς λάφι ι Ισραηλιτένγκε ντα βακερντάς εμ-ντα οντουλά σο αβιλέ-πες πασέ κο βες Σινά. Προειδοποιηντάς ι Χριστιανόν “μα τι μανγκέν γκεραλέ πράγματα, σαρ μανγκλέ [ο Ισραηλίτες]”. (Διαβάνεν 1 Κορινθίους 10:6, 7, 11) Ο Ιεχωβά αντράλ από εκ θαύμας ντινάας χαμπέ ανταλέ Ισραηλιτέντε. Όμως επειδή ισινέ μπίτσαλε γιακχάκε, οντουβά χαμπέ αβιλό “γκεραλό πράγμας λένγκε”. (Αριθ. 11:4-6, 31-34) Ντα κάνα ντινέ λατρεία κο χρυσός μοσχάρι, να χασαρντέ ι ευκαιρία τι χαν τι πιν ντα τι νακχέν λατσσές. (Έξοδ. 32:4-6) Ο Παύλος βακερντάς λένγκε ανταλά παραδείγματα για τι προειδοποιήνελ ι Χριστιανόν σο τζουβντιόνας αζομάν σο μπεσένας τι καταστραφίντιβελ η Ιερουσαλήμ ντα ο ναός. Αμέν-ντα τζουβντιάσα μπουτ πασέ κο βακίτι σο ανταβά ντουνιάς κα καταστραφίντιβελ. Οτθάρ ισί μπουτ σημαντικός αμένγκε τι ντας προσοχή οντουλέντε σο βακερντάς ο Παύλος.

14. Σο βακερέλα η Γραφή ι χαμπέσκε σο κα τθεράς κο νεβό ντουνιάς;

¹⁴ Κάνα ο Ιησούς βακερντάς αμένγκε τι προσευχίντιβας τι τθεράς «μαντρό ανταλέ ντιβεσέσκε», σικλιαρντάς-αμέν επίσης τι προσευχίντιβας τι αβέλ-πες οντουβά σο μανγκέλα ο Ντεβέλ «σαρ κο ουρανός, αντικάς οπράλ κι πφουβ-ντα». (Ματθ. 6:9-11) Σαρ κα αβέλ ο ντουνιάς αζομάν; Η Γραφή βακερέλα ότι εκ κατά πράγματα σο μανγκέλα ο Ντεβέλ τι αβέν-πες κι πφουβ ισί τι τθεράς λατσσό χαμπέ. Σαρ βακερένα ο εδάφια Ησαΐας 25:6-8, σαρέ ο τζενέ κα τθερέν μπερεκέτι λατσσό χαμπέ. Ντα κο Ψαλμός 72:16 βακερέλα: «Κα υπαρχίντιβελ μπουτ γκιβ κι πφουβ, ντιπ οπράλ κο βεσά κα αβέλ γκιβ μπερεκέτι». Να μπεσένα σαρ σαρ τι χρησιμοποιήνεν ο γκιβά για τι κερέν τουμαρό αγαπημέ μαντρό ή τι δοκιμάνεν νεβέ συνταγές; Κα μπορίνεν επίσης τι απολαμβάνεν ο καρποί κατά ρεζά σο φυτιντέν τουμέν. (Ησ. 65:21, 22) Ντα ανταλά κα απολαμβάνεν-λεν σαρέ ο τζενέ κι πφουβ.

15. Καβά σικλιαριπέ κα αβέλ-πες σοράν κατά ανάσταση; (Ιωάννης 6:35)

¹⁵ Διαβάνεν Ιωάννης 6:35. Σο κα αβέλ-πες οντουλέντζαρ σο χαλέ ο μαντρέ ντα ο ματσσέ σο ντινάας-λεν ο Ιησούς; Κι ανάσταση σο κα αβέλ, μπορεί τι γνωρίνεν μερικέ ανταλένταρ. Ατζέ-ντα άμα πο ανγκλέ να σικαντέας πίστη μπορεί τι αναστίντιβεν. (Ιωάν. 5:28, 29) Ανταλά τζενέ κα χρειαζίντιβελ τι σικλιόν σο μανγκένας τι βακερέν ο λάφια ι Ιησούσκε: «Με ισινόμ ο μαντρό ι ζωγιάκο. Κον αβέλα μάντε να κα μποκχάλιβελ ποτές». Κα χρειαζίντιβελ τι μπαριαρέν πουμαρί πίστη κι θυσία κι Ιησούσκι. Τι πακιάν ότι βοβ ντινάς πι ζωή λένγκε. Αλλά αζομάν, ο αναστημέ τζενέ ντα οντουλά σο μπιαντιόνα κο νεβό ντουνιάς, κα σικλιόν ι αλήθεια ι Ιεχωβάσκε ντα λέσκε σκοπόσκε. Κα αβάς μπουτ χαρούμενοι σο κα βοηθίνας-λεν τι σικλιόν ανταλά μπουτ σουκάρ αλήθειες. Ανταβά σο κα κεράς αζομάν κα ντελ-αμέν ατζέ πο μπαρί χαρά κατά χαμπέ. Βα, ο πνευματικά πράγματα κα αβέν ο πο σημαντικά ντα ο πο σουκάρ πράγμας αμαρέ ζωγιάτε.

16. Σο κα ντικχάς κο γιαβέρ μάθημας;

¹⁶ Ντικχλάμ σάντε εκ κομμάτι κατά κεφάλαιος 6 του Ιωάννη. Αλλά ο Ιησούς σικλιαρντάς ατζέ πο μπουτ πράγματα ι ζωγιάκε σο κα τθεράς για πάντα. Σαρέ οντουλά σο βακερντάας αξίνελας τι ασουνέν-λεν οντουλά Ιουδαίοι, ντα ακανά αξίνελα τι ασουνάς-λεν αμέν-ντα. Κα συνεχίναας κο γιαβέρ μάθημας τι ντικχάς γιαβερά-ντα πράγματα κατά κεφάλαιος 6 του Ιωάννη.