Τθεράσα Μπαρί Εκτίμηση σο Συγχωρίνελα-αμέν ο Ιεχωβά

1, 2. Σόσκε μοιάζασα ι τερνέσαρ σο βακερντάμ κι παράγραφος 1;

ΣΚΕΦΤΙΝΕΝ εκχέ τερνές σο μπαριλό σε εκ χουλανί φαμιλί. Εκ ντιβές αβέλα-πες κάτι μπουτ μπέτι. Λέσκο ντατ ντα λέσκι ντάι μερένα. Ανταβά ντουκχαβέλα-λες μπουτ. Όμως, λέλα γιαβερά-ντα μπέτι αμπέρια. Σικλιόλα ότι λέσκο ντατ ντα λέσκι ντάι χαλαντέ σαρέ πουμαρέ λοβέ ντα ότι τθερένας μπαρέ χρέη. Σκεφτίνεν: Αντίς τι κληρονομίνελ λένγκο χουλανιπέ κληρονομιντάς λένγκε χρέη. Ο τζενέ μανγκένα πουμαρέ λοβέ. Ο χρέος ισί αζόμ μπαρό σο να κα μπορίνελ ποτές τι ποκινέλ-λες.

² Αμέν μοιάζασα ανταλέ τερνέστε. Αμαρό πρώτος ντατ ντα ντάι, ο Αδάμ ντα η Εύα, ισινέ τέλειοι ντα τζουβντιόνας σε εκ σουκάρ παράδεισος. (Γέν. 1:27· 2:7-9) Κα μπορίνενας τι απολαμβάνεν εκ σουκάρ ζωή για πάντα. Σοράν όμως σαρέ αλλαξάλε. Χασαρντέ πουμαρό κχερ, ο παράδεισος, αλλά εμ ι αιώνια ζωή. Σο κληρονομιά κα μπορίνενας τι μουκχέν πουμαρέ τσσαβέντε; Η Αγία Γραφή βακερέλα: «Η αμαρτία αβιλί κο ντουνιάς εκχέ τζενέσταρ [κατά Αδάμ] ντα κατά αμαρτία αβιλό ο μεριπέ. Αντικάς ο μεριπέ γκιλό σαρέ κο τζενέ, σόσκε σαρέ αμαρτιντέας». (Ρωμ. 5:12) Η κληρονομιά σο μουκχλάς αμένγκε ο Αδάμ ισί η αμαρτία, σο γκερέλα κο μεριπέ. Ανταγιά αμαρτία σο κληρονομιντάμ μοιάζελα με εκ μπουτ μπαρό χρέος, σο καέκ να μπορίνελα τι ποκινέλ-λες.​—Ψαλμ. 49:8.

3. Σόσκε αμαρέ αμαρτίες μοιάζενα με “χρέη”;

³ Ο Ιησούς μοιασκιαρντάς ο αμαρτίες με “χρέη”. (Ματθ. 6:12 υποσ.· Λουκ. 11:4) Κάνα αμαρτίνασα ισί σαρ τι χρωστάνασα κο Ιεχωβά. Πρέπει τι ποκινάς για την αμαρτία. Άμα ανταβά χρέος να ποκιντάμ-λες, κα ακυρώντιβελ σάντε κάνα κα μεράς.​—Ρωμ. 6:7, 23.

4. (α) Χωρίς βοήθεια, σο κα παθίνενας σαρέ ο αμαρτωλά τζενέ; (Ψαλμός 49:7-9) (β) Σο μανγκέλα τι βακερέλ η λέξη «αμαρτία» κι Αγία Γραφή; (Ντικχέν ο πλαίσιος-ντα «Αμαρτία»)

⁴ Κα μπορίναας κορκορέ τι λας παλάλ σαρέ οντουλά σο χασαρντάας ο Αδάμ ντα η Εύα; Σίγουρα όχι. (Διαβάνεν Ψαλμός 49:7-9) Χωρίς βοήθεια, να κα τθεράας ι ελπίδα τι τζουβντιάς για πάντα ούτε τι αναστίντιβεν ο μουλέ. Κα μεράας ντα να κα ξανατζουβντιάας, αντικάς σαρ αβέλα-πες με το ζώα.​—Εκκλ. 3:19· 2 Πέτρ. 2:12.

5. Σο ντινάς-αμέν αμαρό λατσσό Ντατ για τι ποκίντιβελ ο χρέος ι αμαρτιάκο; (Ντικχέν ι φωτογραφία)

⁵ Σκεφτίνεν πάλι ι τερνές σο βακερντάμ κι αρχή. Σαρ κα νιωθίνελας άμα εκ χουλανό τζενό κα μανγκέλας τι ποκινέλ σαρέ λέσκε χρέη; Σίγουρα κα νιωθίνελας μπαρί εκτίμηση ντα ανταβά κα τσσίντελας-λες τι δεχτίνελ ανταβά μπαρό δώρος. Αντικάς αμαρό Ντατ, σο μανγκέλα-αμέν μπουτ, ο Ιεχωβά, ντινάς-αμέν εκ δώρος. Αντράλ κατά δώρος ανταβά ποκίντιβελα η αμαρτία σο κληρονομιντάμ κατά Αδάμ. Ο Ιησούς εξηγιντάς-λες ακαλέ λαφίντζαρ: «Ο Ντεβέλ μανγκλάς ι ντουνιάς αζόμ μπουτ σο ντινάς πι μοναδικέ Τσσαβές, για μα τι καταστραφίντιβελ κον σικαβέλα πίστη λέστε, αλλά τι τζουβντιόλ για πάντα». (Ιωάν. 3:16) Επίσης, αντράλ κατά δώρος ανταβά μπορίνασα τι τθεράς εκ λατσσί σχέση ι Ιεχωβάσαρ.

6. Σο κα ντικχάς κο μάθημας ανταβά ντα σόσκε;

⁶ Σο μπορίνασα τι κεράς για τι βοηθίντιβας κατά μπαρό δώρος ανταβά ντα τι συγχωρίντιβεν αμαρέ αμαρτίες, ή γιαβέρτουλους αμαρέ “χρέη”; Για τι απαντίνας κι ερώτηση ανταγιά κα ντικχάς πο λατσσές κάποια συγκεκριμέ λάφια σο τθερέλα η Γραφή ντα σο μανγκένα τι βακερέν. Καζόμ σκεφτίνασα πο προσεκτικά σο κερντάς ο Ιεχωβά για τι συγχωρίνελ-αμέν, κα μπαριόλ αμαρί εκτίμηση λέσκε.

Ο ΙΕΧΩΒΑ ΜΑΝΓΚΕΛΑ ΤΙ ΤΘΕΡΑΣ ΕΚ ΛΑΤΣΣΙ ΦΙΛΙΑ ΛΕΣΑΡ

7. (α) Σο γιαβέρ χασαρντέ ο Αδάμ ντα η Εύα; (β) Καβά πράγμας τθεράσα μπαρί ανάγκη αμέν ο τσσαβέ του Αδάμ ντα της Εύας; (Ρωμαίους 5:10, 11)

⁷ Ο Αδάμ ντα η Εύα χασαρντέ, όχι μόνο ι αιώνια ζωή, αλλά ι μπουτ σημαντική σχέση-ντα σο τθερένας πουμαρέ Νταντέσαρ, ι Ιεχωβάσαρ. Κι αρχή, ο Αδάμ ντα η Εύα ισινέ αντρέ κι φαμιλί ι Ντεβλέσκι. (Λουκ. 3:38) Κάνα όμως να ντινέ καν ι Ιεχωβάς, νικίστιλε αβρί λέσκε φαμιλιάταρ. Λένγκε τσσαβέ μπιάντιλε σοράν ανταλέσταρ. (Γέν. 3:23, 24· 4:1) Καέκ λένγκε τσσαβένταρ να κα μπορίνελας τι αβέλ αντρέ κι φαμιλί κι Ιεχωβάσκι, ούτε αμέν. Ανταλέσκε χρειαζίντιβασα βοήθεια για τι αβάς φίλοι ι Ιεχωβάσαρ. (Διαβάνεν Ρωμαίους 5:10, 11) Πρέπει τι σταματίνας τι αβάς εχθροί ι Ντεβλέσκε ντα σοράν τι αβάς λέσκε φίλοι. Ισί μπουτ σουκάρ σο ο Ιεχωβά κερντάς ο πρώτος βήμας για τι αβέλ-πες ανταβά. Σαρ;

Ο ΤΡΟΠΟΣ ΣΟ ΚΑΝΟΝΙΝΤΑΣ Ο ΙΕΧΩΒΑ ΓΙΑ ΤΙ ΑΒΑΣ ΛΕΣΚΕ ΦΙΛΟΙ

8. Καβά πράγμας κανονιντάς ο Ιεχωβά;

⁸ Ο Ιεχωβά κανονιντάς ο τρόπος για τι μπορίνεν ατελείς τζενέ τι αβέν λέσκε φίλοι. Ο Ιεχωβά κανονιντάς τι ντελ κάτι σο τθερέλας ι ίδια αξία οντουλέσαρ σο χασαρντάς ο Αδάμ. Εμ ο Χριστιανικά βιβλία ι Γραφιάκε βακερένα οντουλένγκε σο κανονιντάς ο Ιεχωβά για τι μπορίνας τι τθεράς εκ ειρηνική σχέση λέσαρ.​—Ρωμ. 3:25.

9. Σο κερντάς ο Ιεχωβά για τι μπορίνεν τι συγχωρίντιβεν ο αμαρτίες ι Ισραηλιτένγκε;

⁹ Ο Ιεχωβά κανονιντάς ο τρόπος για τι συγχωρίντιβεν ο αμαρτίες ι Ισραηλιτένγκε ντα τι τθερέν εκ λατσσί σχέση λέσαρ. Όμως ανταβά τρόπος να κα ατσσικιαρέλας για πάντα. Ο Ισραηλίτες κερένας εκ γιορτή εκ συγκεκριμέ ντιβές αντρέ κο μπρες σο βακέρντιβελας Ημέρα της Εξιλέωσης. Οντουβά ντιβές, ο αρχιερέας θυσιάνελας ζώα για το λατσσιπέ ι λαόσκο. Όμως, να ερεσένας σάντε ανταλά θυσίες για τι συγχωρίντιβεν ντιπ ο αμαρτίες ι Ισραηλιτένγκε, σόσκε ο ζώα ισινέ πο τελέ κατά τζενέ. Αλλά αφού ο Ισραηλίτες σο μετανιώνενας κερένας ο θυσίες σο μανγκέλας λένταρ ο Ιεχωβά, βοβ συγχωρίνελας λένγκε αμαρτίες. (Εβρ. 10:1-4) Ανταλά θυσίες σο κερένας κι Ημέρα της Εξιλέωσης, εμ γιαβερά-ντα φορές, βοηθίνενας ι Ισραηλιτέν τι αγαβέν ότι ισινέ αμαρτωλοί ντα ότι χρειαζίντιβενας κάτι πο μπαρό ανταλέσταρ για τι ιτσσαρέλ ντιπ λένγκε αμαρτίες.

10. Σο κερντάς ο Ιεχωβά για τι συγχωρίντιβεν ο αμαρτίες ι τζενένγκε;

¹⁰ Σο κερντάς ο Ιεχωβά για τι συγχωρίντιβεν ο αμαρτίες ι τζενένγκε; Κανονιντάς λέσκο αγαπημέ Τσσαβό τι ντελ πο νεαυτός «εκ φαρ για πάντα για τι βάντελ ο αμαρτίες μπουτέ τζενένγκε». (Εβρ. 9:28) Ο Ιησούς ντινάς «πι ζωή σαρ λύτρος μπουτέ τζενένγκε». (Ματθ. 20:28) Σο ισί ο λύτρος;

ΟΝΤΟΥΒΑ ΣΟ ΠΟΚΙΝΤΙΛΟ ΓΙΑ ΤΙ ΑΒΑΣ ΦΙΛΟΙ Ι ΙΕΧΩΒΑΣΚΕ

11. (α) Σαρ βακερέλα η Γραφή, σο ισί ο λύτρος; (β) Σο κα χρειαζίντιβελας για τι ντιντιόλ ανταβά λύτρος;

¹¹ Σαρ βακερέλα κι Γραφή, ο Ιεχωβά αποφασιντάς ότι κα χρειαζίντιβελας τι ντιντιόλ εκ λύτρος για τι συγχωρίντιβεν αμαρέ αμαρτίες ντα τι αβάς λέσκε φίλοι.a Καβά κα αβέλας ο λύτρος σο έπρεπε τι ντιντιόλ για τι κερδίνεν ο τζενέ οντουβά σο χασαρντάς ο Αδάμ; Ντεν-τουμέν γκοντί ότι ο Αδάμ ντα η Εύα χασαρντέ πουμαρί τέλεια ζωή ντα ι ευκαιρία τι τζουβντιόν για πάντα. Οτθάρ, ο λύτρος κα χρειαζίντιβελας τι αβέλας κάτι σο κα τθερέλας ι ίδια αξία οντουλέσαρ σο χασάρντιλοας. (1 Τιμ. 2:6) Κα μπορίνελας τι ντιντιόλ σάντε εκχέ μπαρέ μουρσέσταρ (1) σο ισινέ τέλειος, (2) σο κα μπορίνελας τι τζουβντιόλ για πάντα κι πφουβ ντα (3) σο κα μανγκέλας τι μουκχέλ ανταγιά ζωή, ή γιαβέρτουλους τι θυσιάνελ-λα χάρη αμένγκε. Σάντε αζομάν κα μπορίνελας η ζωή ανταλέ τζενέσκι τι ποκινέλ οντουλάκε σο χασάρντιλι.

12. Σόσκε ο Ιησούς μπορίνελας τι ντελ ο λύτρος σο χρειαζίντιβαας;

¹² Τθερέλας ο Ιησούς ο τριν βασικά πράγματα σο χρειαζίντιβενας για τι ντελ ο λύτρος; Βα. (1) Ισινέ τέλειος​—«να κερντάς καέκ αμαρτία». (1 Πέτρ. 2:22) (2) Οτθάρ, μπορίνελας τι τζουβντιόλ για πάντα κι πφουβ. (3) Μανγκέλας τι μερέλ ντα τι μουκχέλ οντιά ζωή χάρη αμένγκε. (Εβρ. 10:9, 10) Ο Ιησούς ισινέ τέλειος τζενό, ακριβώς αντικάς σαρ ισινέ ο Αδάμ, πριν τι αμαρτίνελ. (1 Κορ. 15:45) Άρα πι μεριμάσαρ, ο Ιησούς μπορισάλο τι ντελ ακριβώς οντουβά σο χρειαζίντιβελας ντα τι λελ παλάλ οντουβά σο χασαρντάς ο Αδάμ. (Ρωμ. 5:19) Ανταλέ τροπόσαρ, ο Ιησούς αβιλό «ο τελευταίος Αδάμ». Να χρειαζίντιβελα τι αβέλ κάποιος γιαβέρ τέλειος τζενό για τι ποκινέλ οντουβά σο χασαρντάς ο Αδάμ. Ο Ιησούς μουλό «εκ φαρ για πάντα».​—Εβρ. 7:27· 10:12.

13. Σαρ μπορίνασα τι τθεράς εκ λατσσί σχέση ι Ιεχωβάσαρ;

¹³ Σαρ μπορίνασα τι τθεράς εκ λατσσί σχέση ι Ιεχωβάσαρ; Ο Ιεχωβά κανονιντάς ο τρόπος για τι συγχωρίντιβεν αμαρέ αμαρτίες. Ο Ιησούς ντινάς πι τέλεια ζωή για τι ποκινέλ ακριβώς οντουβά σο χρειαζίντιβελα αμαρέ αμαρτιένγκε.​—Εφεσ. 1:7· Εβρ. 9:14.

ΕΛΕΥΘΕΡΩΣΑΛΑΜ ΚΑΤΑ ΑΜΑΡΤΙΑ ΝΤΑ ΚΑΤΑ ΜΕΡΙΠΕ ΝΤΑ ΒΑΚΕΡΝΤΙΒΑΣΑ ΔΙΚΑΙΟΙ

14. Σο κα ντικχάς ακανά, ντα σόσκε;

¹⁴ Σαρ βοηθίντιβασα οντουλένταρ σο κερντάς αμένγκε ο Ιεχωβά; Για τι απαντίνας κι ερώτηση ανταγιά, κα ντικχάς σο μανγκένα τι βακερέν ντούι λάφια σο ισί κι Αγία Γραφή. Ανταλά λάφια κα ντεν-αμέν τι αγαβάς σαρ βοηθίντιβασα κατά Ιεχωβάσκι συγχώρηση.

15, 16. (α) Κι Γραφή, σο μανγκέλα τι βακερέλ ο λάφι “ελευθερώντιβασα”; (β) Σαρ επηρεάνελα-αμέν ανταβά;

¹⁵ Η Γραφή βακερέλα ότι επειδή ντιντιλό ο λύτρος, αμέν ελευθερωσάλαμ αμαρέ αμαρτιένταρ. Ο απόστολος Πέτρος βακερντάς-λες ανταβά ακαλέ λαφίντζαρ: «Τζανένα ότι να ισινέ ο πράγματα σο χαλάντιβενα σαρ ο ασήμι ή ο χρυσάφι οντουλά σο ελευθερωντέ-τουμέν κατά τρόπος σο τζουβντιόνα. Τουμέν τζουβντιόνα τροπόσαρ σο να τθερέλα καέκ αξία. Αντικάς σαρ τζουβντιόνας τουμαρέ παππούδες-ντα. Αλλά οντουβά σο ελευθερωντάς-τουμέν ισί εκ ρατ σο τθερέλα μπαρί αξία. Ανταβά ρατ μοιάζελα ι ρατέσαρ σο τθερέλα εκ τέλειος μπρακό σο ισί χωρίς μελ, σαρ ο ρατ ι Χριστόσκο».​—1 Πέτρ. 1:18, 19.

¹⁶ Χάρη κο λύτρος, μπορίνασα τι ελευθερώντιβας κατά αμαρτία ντα κατά μεριπέ, σο ανένα αμένγκε αζόμ μπουτ βάσανα. (Ρωμ. 5:21) Νιωθίνασα μπαρί εκτίμηση ι Ιεχωβάσκε ντα ι Ιησούσκε σο ελευθερωντέ-αμέν αντράλ κατά μπουτ πολύτιμος ρατ ι Ιησούσκο, αντράλ λέσκε ζωγιάταρ.​—1 Κορ. 15:22.

17, 18. (α) Σο μανγκέλα τι βακερέλ ότι βακέρντιβασα δίκαιοι; (β) Σαρ επηρεάνελα-αμέν ανταβά;

¹⁷ Η Γραφή βακερέλα ότι ο υπηρέτες ι Ιεχωβάσκε βακέρντιβενα δίκαιοι. Ανταβά μανγκέλα τι βακερέλ ότι σβήντιβενα λένγκε αμαρτίες ντα να χρειαζίντιβελα τι ποκινέν λένγκε. Παρόλο σο κερέλα-λες ανταβά ο Ιεχωβά, να τζάλα κόντρα κο δίκαιους κανόνες σο τθερέλα. Να βακερέλα ότι ισινάμ δίκαιοι επειδή αξίνασα-λες. Ούτε πφάντελα πο γιακχά κι αμαρτία. Αλλά ο Ιεχωβά μανγκέλα τι συγχωρίνελ αμαρέ αμαρτίες επειδή σικαβάσα πίστη οντουλέντε σο κερντάς βοβ ντα ο Ιησούς για τι ντιντιόλ ο λύτρος.​—Ρωμ. 3:24· Γαλ. 2:16.

¹⁸ Σο λατσσιπέ τθεράσα επειδή ο Ιεχωβά βακερέλα ότι ισινάμ δίκαιοι; Μερικοί οντουλένταρ σο βακέρντιβενα δίκαιοι τραμπίντιλε για τι κυβερνίνεν γιεκ ι Ιησούσαρ κο ουρανός ντα αβιλέ τσσαβέ ι Ντεβλέσκε. (Τίτο 3:7· 1 Ιωάν. 3:1) Λένγκε αμαρτίες συγχωρίντιλε. Ισί σαρ μα τι κερντέας ποτές ανταλά αμαρτίες ντα αντικάς μπορίνενα τι αβέν κι Βασιλεία. (Ρωμ. 8:1, 2, 30) Ο γιαβερά σο βακέρντιβενα δίκαιοι κα τζουβντιόν για πάντα κι πφουβ. Ο Ιεχωβά συγχωριντάς λένγκε αμαρτίες ντα βον αβιλέ λέσκε αμαλά. (Ιακ. 2:21-23) Ο μπαρό πλήθος σο κα νακχέλ τζουβντό κατά Αρμαγεδδώνας, κα τθερέλ ι ευκαιρία μα τι μερέλ ποτές. (Ιωάν. 11:26) «Ο δίκαιοι» ντα «ο άδικοι» σο μουλέ κα αναστίντιβεν. (Πράξ. 24:15· Ιωάν. 5:28, 29) Κο τέλος, σαρέ ο υπηρέτες ι Ιεχωβάσκε ατθέ κι πφουβ σο ντένα-λες καν «κα τθερέν ι μπαρί ελευθερία ι Ντεβλέσκε τσσαβένγκι». (Ρωμ. 8:21) Σο μπαρί ευλογία αβέλα αντράλ κατά λύτρος! Τθεράσα ο προνόμιος τι αβάς τέλεια τσσαβέ αμαρέ Νταντέσκε, ι Ιεχωβάσκε για πάντα!

19. Σαρ αβιλέ πο λατσσές ο πράγματα ανταλέσαρ σο κερντάς ο Ιεχωβά ντα ο Ιησούς αμένγκε; (Ντικχέν ο πλαίσιος-ντα «Σο Μανγκέλα τι Βακερέλ Αμένγκε»)

¹⁹ Η αλήθεια ισί ότι κάποτε μοιάζαας ι τερνέσαρ σο βακερντάμ κι αρχή. Βοβ χασαρντάς τα πάντα ντα κληρονομιντάς εκ μπουτ μπαρό χρέος σο να κα μπορίνελας ποτές τι ποκινέλ-λες. Αλλά ο Ιεχωβά βοηθιντάς-αμέν. Ο πράγματα αλλαξάλε επειδή ο Ιεχωβά κανονιντάς ο τρόπος για τι συγχωρίντιβεν αμαρέ αμαρτίες ντα ο Ιησούς ποκιντάς ο λύτρος. Επειδή πακιάσα κο Ιησούς Χριστός μπορίνασα τι ελευθερώντιβας κατά αμαρτία ντα κατά μεριπέ. Επίσης, αμαρέ αμαρτίες μπορίνενα τι σβήντιβεν ντα τι αβέν σαρ μα τι κερντάμ-λεν ποτές. Ο πο σημαντικός όμως ισί ότι ακανά μπορίνασα τι τθεράς εκ λατσσί σχέση αμαρέ λατσσέ Νταντέσαρ σο ισί κο ουρανός, ι Ιεχωβάσαρ.

20. Σο κα ντικχάς κο γιαβέρ μάθημας;

²⁰ Αμαρό γκι ισί πφερντό εκτίμηση ι Ιεχωβάσκε ντα ι Ιησούσκε κάνα σκεφτίνασα σαρέ οντουλά σο κερντέ αμένγκε. (2 Κορ. 5:15) Να κα τθεράας καέκ ελπίδα άμα να κα βοηθίνενας-αμέν βον! Κο γιαβέρ μάθημας κα ντικχάς μερικά παραδείγματα κατά Γραφή σο κα βοηθίνεν-αμέν τι αγαβάς καζόμ βοηθίντιβασα κατά λύτρος ο κάθε εκ αμένταρ προσωπικά.