Κερέν Έργος Σαρέ Τουμαρέ Γκίσαρ σαρ ο Ιησούς

1. Σαρ ξεχωρίνελα ο λαός ι Ιεχωβάσκο οντουλένταρ σο βακερένα ότι ισί Χριστιανοί;

Ι ΙΕΧΩΒΑΣΚΕ υπηρέτες πφαμπόνας ι εργόσκεa ντα μαρένας-πες μπουτ τι κερέν-λες. Ανταβά ισί σο κερέλα-λεν τι ξεχωρίνεν κατά γιαβερά τζενέ σο βακερένα ότι ισί Χριστιανοί. (Τίτο 2:14) Μπάζιμα, όμως, μπορεί μα τι ντελ αζόμ μπουτ λένγκο γκι τι κερέν έργος. Μπορεί τι νιωθίνενα σαρ εκ πρεσβύτερος σο μαρέλα-πες μπουτ ι κχανγκιριάκε. Βοβ βακερέλα: «Μερικές φορές να ντέλα μο γκι τι κεράβ έργος».

2. Σόσκε μπουτ φαρ νανέ αζόμ εύκολος τι κεράς ο έργος χαράσαρ;

² Αντίς τι κεράς έργος, μπορεί τι απολαμβάνασα πο μπουτ τι κεράς γιαβερά πράγματα κι υπηρεσία κι Ιεχωβάσκι. Σόσκε; Επειδή κάνα χτίνασα ή φροντίνασα ο Αίθουσες Βασιλείας, βοηθίνασα αμαρέ πφραλέν σο νακχένα καταστροφές ή ντάσα-λεν ζορ κάνα χρειαζίντιβενα-λες, ντικχάσα αμέσως ο λατσσέ αποτελέσματα ντα ανταβά κερέλα-αμέν τι νιωθίνας μπουτ σουκάρ. Κάνα κεράσα μπουτί αμαρέ πφραλέντζαρ τθεράσα ειρήνη ντα σικαβάσα αγάπη ο εκ ι γιαβερέσκε. Ντα τζανάσα ότι αμαρέ πφραλά εκτιμίνενα οντουλά σο κεράσα λένγκε. Οκιά μπάνταρ, μπορεί τι κεράσα έργος για μπουτ μπρεσά κο ίδιος τομέας ντα χάνικα τζενέ τι σικαντέ ενδιαφέρον. Ή μπορεί τι συναντίνασα τζενέν σο να μανγκένα ιτς τι ασουνέν. Επίσης, τζανάσα ότι καζόμ πο πασέ ερεσάσα κο τέλος αζόμ πο μπαρί κόντρα κα τζαν αμέντζαρ. (Ματθ. 10:22) Σο κα βοηθίνελ-αμέν τι συνεχίνας τι πφαμπάς ι εργόσκε ντα, καζόμ τζάλα, τι κεράς-λες ανταβά ατζέ πο μπουτ;

3. Σο σικλιάσα ι Ιησούσκε κατά παράδειγμας σο ισί κο Λουκάς 13:6-9;

³ Μπορίνασα τι σικλιάς κατά παράδειγμας ι Ιησούσκο σαρ μπορίνασα τι πφαμπάς ι εργόσκε. Κάνα ισινέ κι πφουβ, ο Ιησούς ποτές να σταματισάλο τι μαρέλ-πες για τι βακερέλ ο λατσσέ αμπέρια κο τζενέ. Ντα καζόμ νακχέλας ο βακίτι, κερέλας ατζέ πο μπουτ πράγματα κο έργος. (Διαβάνεν Λουκάς 13:6-9) Σαρ ο τζενό σο κερέλας μπουτί κο χωράφι, σο μαρέλας-πες τριν μπρεσά τι φροντίνελ εκ χχελινγκίν σο να νικαβέλας χχελιά, αντικάς ο Ιησούς-ντα κερέλας έργος κο Ιουδαίοι για τριν μπρεσά, ντα ο πο μπουτ λένταρ να ακολουθιντέ-λες. Όμως, σαρ ο τζενό σο κερέλας μπουτί κο χωράφι να χασαρντάς πι ελπίδα οντουλέ χχελινγκινάκε, αντικάς ο Ιησούς-ντα να τσσιναντάς τι κερέλ έργος λένγκε. Ο Ιησούς μαρέλας-πες ατζέ πο μπουτ για τι κερέλ έργος κο Ιουδαίοι ντα τι βοηθίνελ-λεν τι δεχτίνεν ο λατσσέ αμπέρια.

4. Καλά σταρ πράγματα μπορίνασα τι σικλιάς κατά Ιησούς;

⁴ Κο μάθημας ανταβά, κα ντικχάς σαρ ο Ιησούς σικαντάς ότι πφαμπόλας ι εργόσκε, ντα ατζέ πο μπουτ ο τελευταία σιοβ μασεκά. Μπορίνασα τι συνεχίνας τι πφαμπάς ι εργόσκε άμα κα ντας καν οντουλέντε σο βακερντάς ο Ιησούς ντα άμα κα κεράς οντουλά σο κερντάς. Κα ντικχάς σταρ πράγματα σο μπορίνασα τι σικλιάς κατά Ιησούς: (1) Τσσουβέλας πρώτα πι ζωγιάτε οντουβά σο μανγκέλας ο Ιεχωβά, (2) ντέλας προσοχή κο προφητείες κι Γραφιάκε, (3) βασίντιβελας κο Ιεχωβά κάνα μανγκέλας βοήθεια ντα (4) να χασαρντάς πι ελπίδα ότι κάποια τζενέ κα ασουνένας.

ΤΣΣΟΥΒΕΛΑΣ ΠΡΩΤΑ ΟΝΤΟΥΒΑ ΣΟ ΜΑΝΓΚΕΛΑΣ ΛΕΣΤΑΡ Ο ΙΕΧΩΒΑ

5. Σαρ ο Ιησούς σικαντάς ότι τσσουβέλας πρώτα οντουβά σο μανγκέλας λέσταρ ο Ντεβέλ;

⁵ Ο Ιησούς πφαμπόλας ι εργόσκε ντα σικαντάς-λες ανταβά καζόμ βακερέλας “ο λατσσέ αμπέρια ι Βασιλειάκε” επειδή τζανέλας ότι οντουβά μανγκλάς λέσταρ ο Ντεβέλ τι κερέλ. (Λουκ. 4:43) Ι Ιησούσκε, ο πο σημαντικός πράγμας λέσκε ζωγιάτε ισινέ τι βακερέλ ο λατσσέ αμπέρια. Ατζέ-ντα κο τελευταία μασεκά σο ισινέ κι πφουβ, νακχέλας «τθεμ τθεμέσταρ ντα γκαβ γκαβέσταρ» για τι σικλιαρέλ ι γιαβερέν. (Λουκ. 13:22) Επίσης σικλιαρντάς γιαβερέ-ντα μαθητέν τι κερέν ο έργος σο κερέλας βοβ.​—Λουκ. 10:1.

6. Σαρ ο έργος συνδέντιβελα με το γιαβερά υπηρεσίες σο κεράσα ι Ιεχωβάσκε; (Ντικχέν ι φωτογραφία-ντα)

⁶ Αντιβές-ντα, ο πο σημαντικός πράγμας σο μανγκένα αμένταρ ο Ιεχωβά ντα ο Ιησούς ισί τι βακεράς ο λατσσέ αμπέρια. (Ματθ. 24:14· 28:19, 20) Σαρέ ο γιαβερά μπουτιά σο κεράσα ι Ιεχωβάσκε τθερένα σχέση ι εργόσαρ. Για παράδειγμας, λατσσαράσα κτίρια σο ντάσα λατρεία ι Ιεχωβάς ή υπηρετίνασα κο Μπέθελ για τι υποστηρίνας ο ανάγκες σο τθερένα ο πφραλά για τι συνεχίνεν τι βακερέν ο λατσσέ αμπέρια. Κάνα αβέλα-πες εκ καταστροφή, μανγκάσα τι αβάς σίγουροι ότι αμαρέ πφραλά ντα αμαρέ πφενιά τθερένα οντουλά σο χρειαζίντιβενα για τι μπορίνεν σοράν τι τζαν κο συναθροίσεις ντα κο έργος πάλι. Άμα κα τθεράς αμαρέ γκοντιάτε ότι ο έργος ισί ο πο σημαντικός πράγμας σο μανγκέλα αμένταρ τι κεράς ο Ιεχωβά, κα μανγκάς ατζέ πο μπουτ τι βακεράς πο μπουτ φαρ ο λατσσέ αμπέρια. Ο Γιάνος, εκ πρεσβύτερος κι Ουγγαρία, βακερέλα: «Πάντα ντάβα-μαν γκοντί ότι, καζόμ-ντα πράγματα τι τθεράβ τι κεράβ κι υπηρεσία κι Ιεχωβάσκι, καέκ κατά υπηρεσίες ανταλά δεν πρέπει τι τσσιναβέν-μαν τι βακεράβ ο λατσσέ αμπέρια. Ο έργος ισί αμαρό πο σημαντικός διορισμός».

7. Σόσκε ο Ιεχωβά μανγκέλα αμένταρ τι συνεχίνας τι κεράς έργος; (1 Τιμόθεο 2:3, 4)

⁷ Μπορίνασα τι πφαμπάς ατζέ πο μπουτ ι εργόσκε άμα κα νιωθίνας ι τζενένγκε αντικάς σαρ νιωθίνελα ο Ιεχωβά λένγκε. Βοβ μανγκέλα τι ασουνέν ο λατσσέ αμπέρια ντα τι σικλιόν λέσκε καζόμ πο μπουτ τζενέ αβέλα-πες. (Διαβάνεν 1 Τιμόθεο 2:3, 4) Επειδή ανταλά λατσσέ αμπέρια μπορίνενα τι σώνεν τζενέν, ο Ιεχωβά βοηθίνελα-αμέν τι σικλιάς τι βακεράς-λεν ατζέ πο λατσσέ τροπόσαρ. Για παράδειγμας, ο βιβλιάριος Μανγκέν ι Τζενέν​—Κερέν Μαθητέν σικλιαρέλα-αμέν τι τθεράς αμαρέ γκοντιάτε τι αρχίνας μελέτη ι τζενέντζαρ σο συζητίνασα, για τι βοηθίνας-λεν τι αβέν μαθητές ι Ιησούσκε. Ατζέ-ντα άμα ο τζενέ να κα μανγκέν ακανά, μπορεί τι τθερέν εκ ευκαιρία τι κερέν-λες ανταβά χάνικ πριν τι τελειώνελ η μπαρί στεναχώρια. Κο μέλλον, μπορεί τι ντεν-πες γκοντί οντουλά σο βακερντάμ λένγκε, ντα τι μανγκέν τι υπηρετίνεν ι Ιεχωβάς. Αλλά για τι μπορίνελ τι αβέλ-πες ανταβά, πρέπει τι συνεχίνας τι κεράς έργος.

ΝΤΕΛΑΣ ΠΡΟΣΟΧΗ ΚΟ ΠΡΟΦΗΤΕΙΕΣ ΚΙ ΓΡΑΦΙΑΚΕ

8. Σαρ ο προφητείες ι Γραφιάκε βοηθιντέ ι Ιησούς τι χρησιμοποιήνελ πο χρόνος γκοντιάσαρ;

⁸ Ο Ιησούς αγαβέλας σαρ κα νικιόνας μπαγιά ο προφητείες ι Γραφιάκε. Τζανέλας ότι λέσκο έργος κα ατσσικιαρέλας σάντε για τρεισήμισι μπρεσά. (Δαν. 9:26, 27) Επίσης, τζανέλας κάνα ντα σαρ κα μερέλας. (Λουκ. 18:31-34) Επειδή τζανέλας-λεν σαρέ ανταλά από πριν, ο Ιησούς χρησιμοποιηντάς πο χρόνος με το πο λατσσό τρόπος. Οτθάρ, κερέλας έργος σαρέ πι γκίσαρ για τι τελειώνελ ο έργος σο ντιντιλόας-λες.

9. Σόσκε ο προφητείες ι Γραφιάκε τσσίντενα-αμέν τι βακεράς ο λατσσέ αμπέρια σαρέ αμαρέ γκίσαρ;

⁹ Κάνα αγαβάσα ο προφητείες ι Γραφιάκε, ανταβά μπορεί τι τσσίντελ-αμέν τι βακεράς ο λατσσέ αμπέρια σαρέ αμαρέ γκίσαρ. Τζανάσα ότι μπουτ σουγκό ανταβά ντουνιάς κα καταστραφίντιβελ. Η Γραφή βακερντάας σαρ κα αβένας ο τζενέ κο τελευταία ντιβεσά ντα σο κα αβέλας-πες αζομάν. Ντικχάσα ανταλά προφητείες τι νικιόν μπαγιά. Εκ προφητεία βακερέλα επίσης ότι ο βασιλιάς κατά νότος ντα ο βασιλιάς κατά βορράς κα τζάνας κόντρα ο εκ ι γιαβερέσαρ «κο τελευταία ντιβεσά». Αγαβάσα ότι ανταβά νικιόλα μπαγιά αντιβές επειδή ντικχάσα την Αγγλοαμερικανική Παγκόσμια Δύναμη ντα τη Ρωσία ι τθεμέντζαρ σο ισί λάσαρ, τι τζαν κόντρα ο εκ κο γιαβέρ. (Δαν. 11:40) Αγαβάσα επίσης ότι ο πιντρέ σο τθερέλα ο άγαλμας σο ισί κο εδάφια Δανιήλ 2:43-45 μανγκένα τι σικαβέν την Αγγλοαμερικανική Παγκόσμια Δύναμη. Σαρ σικαβέλα η προφητεία, ισινάμ ντιπ σίγουροι ότι σουγκό, μπουτ σουγκό, η Βασιλεία ι Ντεβλέσκι κα καταστραφίνελ σαρέ ι τζενένγκε κυβερνήσεις. Σαρέ ανταλά προφητείες σικαβένα ότι τζουβντιάσα μπουτ πασέ κο τέλος. Οτθάρ, πρέπει τι χρησιμοποιήνας αμαρό χρόνος ι πο λατσσέ τροπόσαρ για τι βακεράς ο λατσσέ αμπέρια.

10. Καλέ γιαβερέ τροπόντζαρ ο προφητείες ι Γραφιάκε βοηθίνενα-αμέν τι συνεχίνας τι βακεράς ο λατσσέ αμπέρια;

¹⁰ Εκχέ γιαβερέ τροπόσαρ σο βοηθίνενα-αμέν ο προφητείες ι Γραφιάκε ισί ότι οντουλά σο σικλιάσα λένταρ μανγκάσα σαρ σαρ τι βακεράς-λεν γιαβερτθέ. «Κάνα σκεφτίναβα ο σουκάρ πράγματα σο ντέλα πο λάφι ότι κα κερέλ ο Ιεχωβά κο μέλλον, νιωθίναβα ότι πρέπει τι βακεράβ-λες γιαβερτθέ-ντα ανταβά», βακερέλα η Κάρι, εκ πφεν σο υπηρετίνελα κι Δομινικανή Δημοκρατία. Επίσης βακερέλα: «Κάνα ντικχάβα σο τσσίντενα ο τζενέ αντιβές, αγαβάβα ότι ανταλά υποσχέσεις νανέ σάντε μάνγκε αλλά ισί λένγκε-ντα». Ο προφητείες ι Γραφιάκε σικαβένα ότι ο Ιεχωβά βοηθίνελα-αμέν τι κεράς ανταβά έργος, ντα ανταβά ντέλα-αμέν ι ζορ για τι συνεχίνας τι βακεράς ο λατσσέ αμπέρια. Η Λέιλα, σο μπεσέλα κι Ουγγαρία, βακερέλα: «Ο εδάφια Ησαΐας 11:6-9 σικαβένα ότι, ι Ιεχωβάσκε βοηθειάσαρ, σαρέ μπορίνενα τι αλλάνεν. Ανταβά βοηθίνελα-μαν τι βακεράβ ο λατσσέ αμπέρια τζενέντε σο αμντίναβα ότι να κα ασουνέν». Ντα ο Κρίστοφερ, εκ πφραλ κατά Ζάμπια, βακερέλα: «Σαρ γραφίντιλοας κο εδάφιος Μάρκος 13:10, ο λατσσέ αμπέρια βακέρντιβενα σαρό κο ντουνιάς. Ντα ισί μάνγκε μπαρό προνόμιος σο βοηθίναβα τι νικιόλ μπαγιά ανταγιά προφητεία». Καλά προφητείες ι Γραφιάκε βοηθίνενα-τουμέν τι συνεχίνεν τι βακερέν ο λατσσέ αμπέρια;

ΒΑΣΙΝΤΙΒΕΛΑΣ ΚΟ ΙΕΧΩΒΑ ΓΙΑ ΒΟΗΘΕΙΑ

11. Σόσκε ο Ιησούς χρειαζίντιβελας τι στηρίντιβελ κο Ιεχωβά για τι συνεχίνελ τι βακερέλ ο λατσσέ αμπέρια σαρέ πι γκίσαρ; (Λουκάς 12:49, 53)

¹¹ Ο Ιησούς βασίντιβελας κο Ιεχωβά για τι βοηθίνελ-λες τι συνεχίνελ τι κερέλ έργος σαρέ πι γκίσαρ. Αν-ντα ο Ιησούς κερέλας με σεβασμός λάφι κο γιαβερά, τζανέλας ότι μπουτ τζενέ κα τζάνας μπαρί κόντρα κο αμπέρια ανταλά. (Διαβάνεν Λουκάς 12:49, 53) Ο αρχηγοί ι θρησκειάκε προσπαθιντέ μπουτ φαρ τι μουνταρέν-λες επειδή κερέλας έργος. (Ιωάν. 8:59· 10:31, 39) Αλλά ο Ιησούς συνεχιντάς τι κερέλ έργος επειδή τζανέλας ότι ο Ιεχωβά ισινέ λέσαρ. Βακερντάς: «Να ισινόμ κορκορό, αλλά ο Ντατ σο μπουτσσαντάς-μαν ισί μάντζαρ. . . . Να μουκχλάς-μαν κορκορό, σόσκε με κεράβα πάντα ο πράγματα σο μπεϊντίνελα».​—Ιωάν. 8:16, 29.

12. Σαρ προετοιμαντάς ο Ιησούς πι μαθητέν για τι συνεχίνεν τι βακερέν ο λατσσέ αμπέρια κάνα κα τζάνας λέντζαρ κόντρα;

¹² Ο Ιησούς βακερντάς πι μαθητένγκε ότι μπορίνενας βον-ντα τι στηρίντιβεν κο Ιεχωβά για βοήθεια. Βακερντάς λένγκε μπουτ φαρ ότι ο Ιεχωβά κα βοηθίνελας-λεν ατζέ-ντα κάνα κα τθερένας διωγμός. (Ματθ. 10:18-20· Λουκ. 12:11, 12) Επειδή ο Ιησούς τζανέλας ότι μπουτ τζενέ κα τζάνας κόντρα κο λατσσέ αμπέρια, βακερντάς πι μαθητένγκε τι αβέν προσεκτικοί. (Ματθ. 10:16· Λουκ. 10:3) Επίσης, ντινάς-λεν ι συμβουλή ότι άμα ο τζενέ να κα μανγκένας τι ασουνέν-λεν, βον δεν έπρεπε τι πιένεν-λεν. (Λουκ. 10:10, 11) Ντα βακερντάς λένγκε τι νασέν άμα κα τζάνας λέντζαρ κόντρα. (Ματθ. 10:23) Παρόλο σο ο Ιησούς πφαμπόλας μπουτ ι εργόσκε ντα ντέλας μπέσα κο Ιεχωβά, να τσσουβέλας πι ζωή σε κίνδυνος σινανέ.​—Ιωάν. 11:53, 54.

13. Σόσκε μπορίνενα τι αβέν σίγουροι ότι ο Ιεχωβά κα βοηθίνελ-τουμέν;

¹³ Χρειαζίντιβασα αντιβές-ντα ι βοήθεια ι Ιεχωβάσκι για τι συνεχίνας τι βακεράς ο λατσσέ αμπέρια σαρέ αμαρέ γκίσαρ κάνα τζάνα αμέντζαρ κόντρα. (Αποκ. 12:17) Σόσκε μπορίνενα τι αβέν σίγουροι ότι ο Ιεχωβά κα βοηθίνελ-τουμέν; Ντεν-τουμέν γκοντί ι προσευχή ι Ιησούσκι σο ισί γραμμέ κο Ιωάννης κο 17 κεφάλαιος. Ο Ιησούς μανγκλάς κατά Ιεχωβά τι αρακχαβέλ ι αποστολόν, ντα ο Ιεχωβά απαντιντάς λέσκε προσευχιάτε. Ο βιβλίος Πράξεις σικαβέλα σαρ βοηθιντάς ι αποστολόν τι βακερέν σαρέ πουμαρέ γκίσαρ ο λατσσέ αμπέρια παρόλο σο τθερένας διωγμός. Πι προσευχιάτε, ο Ιησούς μανγκλάς επίσης κατά Ιεχωβά τι αρακχαβέλ οντουλέν σο κα πακιάνας κο λατσσέ αμπέρια. Αντρέ ανταλέ τζενέντε ισινέν τουμέν-ντα. Ο Ιεχωβά συνεχίνελα τι απαντίνελ κι προσευχή κι Ιησούσκι. Σαρ βοηθιντάς ι αποστολόν, αντικάς κα βοηθίνελ τουμέν-ντα.​—Ιωάν. 17:11, 15, 20.

14. Σαρ τζανάσα ότι κα μπορίνας τι συνεχίνας τι βακεράς ο λατσσέ αμπέρια σαρέ αμαρέ γκίσαρ ατζέ-ντα δύσκολε βακιτίντε; (Ντικχέν ι φωτογραφία-ντα)

¹⁴ Καζόμ ερεσάσα πο πασέ κο τέλος, μπορεί τι αβέλ πο δύσκολος τι βακεράς ο λατσσέ αμπέρια σαρέ αμαρέ γκίσαρ, αλλά κα τθεράς σαρί ι βοήθεια σο χρειαζίντιβασα. (Λουκ. 21:12-15) Σαρ ο Ιησούς ντα λέσκε μαθητές, αντικάς αμέν-ντα μουκχάσα ι τζενέν τι αποφασίνεν κορκορέ αν κα ασουνέν ή όχι ντα να ασταράσα-αμέν κο λάφια λέντζαρ. Ατζέ-ντα σε τθεμά σο αμαρέ πφραλά να μπορίνενα τι κερέν έργος ελεύθερα, βον καταφερίνενα τι συνεχίνεν τι βακερέν ο λατσσέ αμπέρια επειδή στηρίντιβενα κο Ιεχωβά ντα όχι πουμαρέ ζοριάτε. Σαρ ο Ιεχωβά ντέλας ζορ κο πρώτοι Χριστιανοί, ντέλα αμέντε-ντα ζορ «για τι αβέλ-πες . . . ντιπ λατσσές ο έργος», αντικάς σαρ μανγκέλα βοβ. (2 Τιμ. 4:17) Μπορίνενα τι αβέν σίγουροι ότι, άμα στηρίντιβενα κο Ιεχωβά, κα μπορίνεν τι συνεχίνεν τι βακερέν ο λατσσέ αμπέρια σαρέ τουμαρέ γκίσαρ.

ΝΑ ΧΑΣΑΡΕΛΑΣ ΠΙ ΕΛΠΙΔΑ

15. Σο σικαβέλα ότι ο Ιησούς ισινέ σίγουρος ότι λέσκο έργος κα τθερέλας λατσσέ αποτελέσματα;

¹⁵ Ο Ιησούς ισινέ σίγουρος ότι υπαρχίντιβενας τζενέ σο κα ασουνένας ο λατσσέ αμπέρια. Ανταβά βοηθιντάς-λες τι ατσσόλ χαρούμενος ντα τι συνεχίνελ τι μαρέλ-πες κο έργος. Για παράδειγμας, κάνα τελειώνελας ο μπρες 30 Σ.Κ.Χ. (σοράν κατά Χριστός) ο Ιησούς ντικχλάς ότι μπουτ τζενέ ισινέ έτοιμοι τι δεχτίνεν ι αλήθεια. Ντα μοιασκιαρντάς-λεν χωραφίσαρ σο ισί παρνό γκιντιμάσκε. (Ιωάν. 4:35) Εκ μπρες πο σοράν, βακερντάς πι μαθητένγκε: «Ο χωράφι ισί πφερντό». (Ματθ. 9:37, 38) Ντα πο σοράν βακερντάς ατζέκ εκ φαρ: «Ο χωράφι ισί πφερντό . . . Μολίνεν ι Αφεντικός ι χωραφίσκο τι μπουτσσαβέλ τζενέν πι γκιντιμάσκε». (Λουκ. 10:2) Ο Ιησούς να τσσιναντάς ποτές τι τθερέλ ι ελπίδα ότι κάποια τζενέ κα ντεν καν κο λατσσέ αμπέρια, ντα κάνα αβέλας-πες ανταβά χαιρίνελας.​—Λουκ. 10:21.

16. Σαρ ο παραδείγματα σο βακερντάς ο Ιησούς σικαβένα ότι ο έργος κα τθερέλας λατσσέ αποτελέσματα; (Λουκάς 13:18-21) (Ντικχέν ι φωτογραφία-ντα)

¹⁶ Ο Ιησούς βοηθιντάς πι μαθητέν τι συνεχίνεν τι πφαμπόν ι εργόσκε. Για τι πετυχίνελ-λες ανταβά, βακερέλας μπουτ φαρ πι μαθητένγκε ότι ανταλά λατσσέ αμπέρια σο βακερένας κα τθερένας μπουτ λατσσέ αποτελέσματα. Ντικχέν ντούι κατά παραδείγματα σο βακερντάς. (Διαβάνεν Λουκάς 13:18-21) Σε εκ παράδειγμας ο Ιησούς μοιασκιαρντάς ο λατσσέ αμπέρια ι Βασιλειάκε εκχέ χουρντέ σπορόσαρ σο βακέρντιβελα σινάπι, σο σοράν ανταβά αβέλα εκ μπαρό δέντρος. Ανταβά μανγκέλα τι βακερέλ ότι μπουτ τζενέ κα δεχτίνενας ο λατσσέ αμπέρια ντα καέκ να κα μπορίνελας τι τσσιναβέλ-λες ανταβά. Σε εκ γιαβέρ παράδειγμας μοιασκιαρντάς ο λατσσέ αμπέρια ι Βασιλειάκε ι μαγιάσαρ. Κερντάς-λες ανταβά επειδή ο λατσσέ αμπέρια ι Βασιλειάκε κα βακέρντιβενας μπουτέ τθεμέντε σαρό κο ντουνιάς ντα κα τσσίντενας μπουτέ τζενέν τι αλλάνεν. Όμως, ανταλά αλλαγές να κα ντικχένας-λεν αμέσως ο γιαβερά. Αντικάς, ο Ιησούς βοηθιντάς πι μαθητέν τι αβέν σίγουροι ότι ο λατσσέ αμπέρια σο βακερένας κα βοηθίνενας μπουτέ τζενέν.

17. Καλά λόγους τθεράσα για μα τι χασαράς αμαρί ελπίδα ι εργόσκε;

¹⁷ Κάνα σκεφτίνασα σαρ ο έργος βοηθίνελα μπουτέ τζενέν σαρό κο ντουνιάς, λάσα ζορ για τι συνεχίνας τι βακεράς ο λατσσέ αμπέρια. Κάθε μπρες εκατομμύρια τζενέ τζάνα κι Ανάμνηση ντα κερένα γιεκ αμέντζαρ μελέτη κατά Αγία Γραφή. Χιλιάδες τζενέ μπολντιόνα ντα κερένα γιεκ αμέντζαρ ο έργος. Να τζανάσα καζόμ τζενέ ατζέκ κα ντεν καν κο λατσσέ αμπέρια. Αλλά οντουβά σο τζανάσα ισί ότι ο Ιεχωβά γκίντελα εκ μπαρό πλήθος σο κα τζουβντιόλ κατά μπαρί στεναχώρια σο αβέλα. (Αποκ. 7:9, 14) Ο Ιεχωβά ισί ο Αφεντικός ι χωραφίσκο ντα ισί σίγουρος ότι μπουτ τζενέ κα δεχτίνεν ο λατσσέ αμπέρια. Οτθάρ κα συνεχίνας τι βακεράς-λεν.

18. Σο μανγκάσα τι ντικχέν ο γιαβερά τζενέ κάνα κεράσα έργος;

¹⁸ Πάντα ο μαθητές ι Ιησούσκε πφαμπόνας μπουτ ι εργόσκε ντα μανγκένας σαρέ πουμαρέ γκίσαρ τι κερέν-λες. Κάνα ο τζενέ ντικχλέ καζόμ μπίνταρανε ισινέ ο απόστολοί, «αγαντέ ότι βον ισινέ ι Ιησούσαρ». (Πράξ. 4:13) Μανγκάσα αμέν-ντα τι βακεράς ο λατσσέ αμπέρια μπίνταρανες ντα σαρέ αμαρέ γκίσαρ. Άμα κα κεράς-λες ανταβά μπορεί ο τζενέ τι ντικχέν ότι αμέν-ντα μοιάζασα κο Ιησούς.