Συνεχίνεν τι Οδηγίντιβεν Κατά Πίστη

1. Σόσκε νιωθίνελας πφερντό ο Παύλος κάνα σκεφτίνελας σαρ χρησιμοποιηντάς πι ζωή;

Ο ΑΠΟΣΤΟΛΟΣ Παύλος τζανέλας ότι ατζεχάνικ κα μερέλας, αλλά ισινέ μπουτ ευτυχισμέ κάνα σκεφτίνελας ο τρόπος σο χρησιμοποιηντάς πι ζωή. Βοβ βακερντάς: «Τθαβντισάλομ μέχρι κο τέλος κι ντρομέσκο, ατσσιλόμ κι πίστη». (2 Τιμ. 4:6-8) Ο Παύλος αποφασιντάς τι χρησιμοποιήνελ πι ζωή για τι υπηρετίνελ ι Ιεχωβάς, ντα ανταβά ισινέ γκοντιαβέρ. Οτθάρ τθερέλας ι σιγουριά ότι ο Ιεχωβά ισινέ ευχαριστιμέ λέσαρ. Αμέν-ντα μανγκάσα τι λας λατσσέ αποφάσεις ντα τι κεράς ι Ιεχωβάσκο γκι. Σαρ μπορίνασα τι κεράς-λες ανταβά;

2. Σο μανγκέλας τι βακερέλ ο Παύλος κο εδάφιος 2 Κορινθίους 5:7;

² Ο Παύλος βακερντάς σο κερντάς βοβ ντα ο γιαβερά Χριστιανοί. Γραφιντάς: «Να οδηγίντιβασα κατά πράγματα σο ντικχάσα αλλά κατά πίστη». (2 Κορ. 5:7) Σο μανγκέλας τι βακερέλ ο Παύλος; Εκ τζενό σο να τθερέλα πίστη κο Ιεχωβά λέλα αποφάσεις σο βασίντιβενα σάντε οντουλέντε σο ντικχέλα, σο ασουνέλα ντα νιωθίνελα. Οκιά μπάνταρ, εκ τζενό σο οδηγίντιβελα κατά πίστη, κάνα λέλα αποφάσεις σκεφτίνελα σο μανγκέλα ο Ιεχωβά. Ανταβά τζενό ισί σίγουρος ότι κάνα ντέλα καν κο συμβουλές κι Γραφιάκε, εμ κα τθερέλ πο λατσσί ζωή ακανά, εμ ο Ιεχωβά κα ευλογίνελ-λες κο μέλλον.​—Ψαλμ. 119:66· Εβρ. 11:6.

3. Σο λατσσίματα κα ντικχάς άμα οδηγίντιβασα κατά πίστη; (2 Κορινθίους 4:18)

³ Ισί μπαγιά ότι σαρέ αμέν πρέπει τι βασίντιβας οντουλέντε σο ντικχάσα, ασουνάσα ντα νιωθίνασα κάνα λάσα αποφάσεις. Αλλά άμα βασίντιβασα σάντε κο πράγματα σο ντικχάσα ή ασουνάσα κάνα λάσα σημαντικές αποφάσεις, μπέκιμ κα τθεράς προβλήματα. Σόσκε; Επειδή οντουλά σο ντικχάσα ή ασουνάσα νανέ πάντα σωστά. Άμα λάσα αποφάσεις σο βασίντιβενα σάντε οντουλέντε σο ντικχάσα, ασουνάσα ή νιωθίνασα, κα ερεσάς κο σημείος τι κεράς κάτι σο να μανγκέλα ο Ιεχωβά τι κεράς. (Εκκλ. 11:9· Ματθ. 24:37-39) Αλλά κάνα οδηγίντιβασα κατά πίστη αμαρί, κα λας αποφάσεις σο κα κερέν «ι Κυριόσκο γκι». (Εφεσ. 5:10) Κάνα κεράσα οντουλά σο μανγκέλα ο Ιεχωβά κα τθεράς αληθινή ειρήνη αντρ’ αμέντε ντα κα αβάς μπαγιά χαρούμενοι. (Ψαλμ. 16:8, 9· Ησ. 48:17, 18) Ντα άμα συνεχίνασα τι οδηγίντιβας κατά πίστη, κα τζουβντιάς για πάντα.​—Διαβάνεν 2 Κορινθίους 4:18.

4. Σαρ μπορίνελα εκ τζενό τι αγαβέλ κατέ βασίντιβελα κάνα λέλα αποφάσεις;

⁴ Σαρέ αμέν χρειαζίντιβελα τι πουτσάς αμαρό νεαυτός: Κατέ βασίντιβαβα κάνα λάβα αποφάσεις; Μήπως βασίντιβαβα σάντε κο πράγματα σο μπορίναβα τι ντικχάβ; Ή ντάβα μπέσα κο Ιεχωβά ντα κο συμβουλές λέσκε; Ακανά κα ντικχάς σαρ μπορίνασα τι συνεχίνας τι οδηγίντιβας κατά πίστη (1) κάνα τραμπίνασα σο μπουτί κα κεράς, (2) κάνα τραμπίνασα κάσαρ κα παντρίνας ντα (3) κάνα λάσα οδηγίες κατά οργάνωση ι Ιεχωβάσκι. Κι κάθε περίπτωση ανταλένταρ, κα συζητίνας καλά πράγματα χρειαζίντιβελα τι σκεφτίνας για τι λας λατσσέ αποφάσεις.

ΚΑΝΑ ΤΡΑΜΠΙΝΑΣΑ ΣΟ ΜΠΟΥΤΙ ΚΑ ΚΕΡΑΣ

5. Σο πρέπει τι σκεφτίνας κάνα τραμπίνασα σο μπουτί κα κεράς;

⁵ Σαρέ αμέν μανγκάσα τι ανάς ο αναγκαία αμαρέ φαμιλιάκε ή αμαρέ νεαυτόσκε. (Εκκλ. 7:12· 1 Τιμ. 5:8) Μερικέ μπουτιέντε λάσα πο μπουτ λοβέ, ενώ γιαβερέντε λάσα πο χάνικ. Φιρειπείν, εκ τζενό μπορεί τι λελ μπερεκέτι λοβέ εμ για τι ανέλ ο αναγκαία πι φαμιλιάκε, εμ για τι τσσουβέλ κάτι κι νάκρη. Αλλά γιαβερέ μπουτιέντε, ο λοβέ ερεσένα σάντε για το πο σημαντικά πράγματα σο χρειαζίντιβελα η φαμιλί σαρ ισί ο χαμπέ, κάπου τι μπεσέν ντα ο σέα. Κάνα τραμπίνασα καγιά μπουτί κα κεράς, σίγουρα πρέπει τι σκεφτίνας καζόμ λοβέ κα λας. Αλλά άμα σκεφτίνασα σάντε ανταβά, να οδηγίντιβασα κατά πίστη.

6. Σαρ μπορίνασα τι οδηγίντιβας κατά πίστη κάνα τραμπίνασα σο μπουτί κα κεράς; (Εβραίους 13:5)

⁶ Άμα οδηγίντιβασα κατά πίστη, κα σκεφτίνας επίσης σαρ αμαρί μπουτί κα επηρεάνελ ι φιλία σο τθεράσα ι Ιεχωβάσαρ. Μπορίνασα τι πουτσάς αμαρό νεαυτός: “Ανταγιά μπουτί κερέλα ι Ιεχωβάσκο γκι ή τθερέλα τι κερέλ πραγματέντζαρ σο μισίνελα ο Ιεχωβά;” (Παρ. 6:16-19) “Μήπως κα χασαράβ ο συναθροίσεις; Μήπως κα τθεράβ πο χάνικ χρόνος για τι κεράβ έργος ή τι διαβάναβ ι Γραφή; Μήπως κα ατσσικιαρέλ-μαν ντουρ μι φαμιλιάταρ για μπουτ βακίτι;” (Φιλιπ. 1:10) Άμα ο απαντήσεις ανταλέ ερωτησιέντε ισί βα, κα αβέλας λατσσό μα τι δεχτίνας ι μπουτί ατζέ-ντα άμα ισί δύσκολος τι αρακχάς εκ τανί μπουτί. Επειδή οδηγίντιβασα κατά πίστη, λάσα αποφάσεις σο σικαβένα αμαρί σιγουριά ότι ο Ιεχωβά κα φροντίνελ τι τθεράς οντουλά σο χρειαζίντιβασα.​—Ματθ. 6:33· διαβάνεν Εβραίους 13:5.

7, 8. Σαρ εκ πφραλ κι Νότια Αμερική οδηγίντιλο κατά πίστη; (Ντικχέν ι φωτογραφία-ντα)

⁷ Σκεφτίνεν σαρ εκ πφραλ ο Χαβιέ,a σο μπεσέλα κι Νότια Αμερική, αγαντάς καζόμ σημαντικός ισί τι οδηγίντιβελ κατά πίστη. Βοβ βακερέλα: «Κερντόμ αίτηση για εκ λατσσί μπουτί σο κα λάβας ο διπλά λοβέ ντα μπεϊντίναβας-λα μπουτ». Όμως ο Χαβιέ μανγκέλας μπουτ εμ τι κερέλ ο σκαπανικός-ντα. Βοβ συνεχίνελα: «Βακερντέ μάνγκε τι νταβ εκ συνέντευξη κο μπαρό διευθυντής. Πριν τι τζαβ κι συνέντευξη, προσευχισάλομ για τι βοηθίνελ-μαν ο Ιεχωβά επειδή ισινόμας σίγουρος ότι βοβ τζανέλας καβά ισινέ ο πο λατσσό μάνγκε. Μανγκάβας τι τθεράβ πο λατσσί θέση μι μπουτιάτε ντα τι ποκίντιβαβ πο λατσσές. Αλλά να κα λάβας ανταγιά μπουτί άμα να κα βοηθίνελας-μαν τι κεράβ πο μπουτ πράγματα ι Ιεχωβάσκε».

⁸ Ο Χαβιέ βακερέλα: «Κι συνέντευξη, ο διευθυντής βακερντάς μάνγκε ότι μπουτ φαρ έπρεπε τι μπεσάβ πο μπουτ σαάτια κι μπουτί. Βακερντόμ λέσκε λατσσέ τροπόσαρ ότι ναστί κεράβας-λες ανταβά επειδή μάνγκε ο πο σημαντικός πράγμας ισί ο έργος ι Ντεβλέσκο». Βα, ο Χαβιέ τραμπιντάς μα τι δεχτίνελ ανταγιά μπουτί. Ντούι εβδομάδες πο σοράν αρχισάλο ο σκαπανικός. Ντα κο ίδιος μπρες, αρακχλάς εκ μπουτί με πο χάνικ σαάτια. Βοβ βακερέλα: «Ο Ιεχωβά ασουντάς μο προσευχές ντα βοηθιντάς-μαν τι αρακχάβ εκ μπουτί σο κα μπορίναβας τι κεράβ ο σκαπανικός. Ισινόμ μπαγιά χαρούμενος σο τθεράβα εκ μπουτί σο μουκχέλα μάνγκε πο μπουτ χρόνος για τι υπηρετίναβ ι Ιεχωβάς ντα ι πφραλέν».

9. Σο σικλιόνα κατά εμπειρία του Τρεζόρ;

⁹ Σο πρέπει τι κεράς άμα κα αγαβάς ότι η μπουτί σο τθεράσα ακανά, νανέ αζόμ λατσσί αμένγκε ή δυσκολίνελα-αμέν τι ατσσάς πασέ κο Ιεχωβά; Ντεν σημασία κι εμπειρία του Τρεζόρ, κατά Κονγκό. Βοβ βακερέλα: «Μι νεβί μπουτί ισινέ κάτι σο πάντα μανγκάβας τι κεράβ. Λάβας τριν φαρ πο μπουτ λοβέ κατά προηγούμενη μπουτί σο τθεράβας ντα ο τζενέ σεβάνενας-μαν». Όμως, ο Τρεζόρ χασαρέλας μπουτ φαρ ο συναθροίσεις επειδή μπεσέλας κι μπουτί πο μπουτ σαάτια. Επίσης ο τζενέ σο κερέλας μπουτί γιεκ λέντζαρ πιένενας-λες τι βακερέλ ψέματα κο τζενέ, πραγματένγκε σο η εταιρία μανγκέλας τι γκεραβέλ. Ο Τρεζόρ μανγκέλας τι τσσιναβέλ ανταγιά μπουτί, αλλά ανησυχίνελας άμα κα αρακχέλας εκ γιαβέρ. Σο βοηθιντάς-λες; Βοβ βακερέλα: «Ο εδάφια Αββακούμ 3:17-19 βοηθιντέ-μαν τι αγαβάβ ότι ατζέ-ντα άμα κα σταματίναβας ανταγιά μπουτί ντα κα νικαβάβας πο χάνικ λοβέ, ο Ιεχωβά κα αρακχέλας τρόπος για τι φροντίνελ-μαν. Ανταλέσκε, νασλόμ κατά μπουτί ανταγιά». Βοβ εξηγίνελα: «Μπουτ αφεντικά αμντίνενα ότι, για τι νικαβέλ εκ τζενό μπουτ λοβέ κα κερέλ τα πάντα. Για παράδειγμας, μπορεί ατζέ-ντα μα τι ντελ μπουτ σαάτι πι φαμιλιάτε ή κο πράγματα σο τθερένα τι κερέν με τη θρησκεία λέσκι. Ισινόμ χαρούμενος σο αρακχαντόμ μι σχέση ι Ιεχωβάσαρ ντα μι φαμιλιάσαρ. Εκ μπρες πο σοράν, ο Ιεχωβά βοηθιντάς-μαν τι αρακχάβ εκ λατσσί μπουτί. Αντικάς λάβα ο λοβέ σο χρειαζίντιβαβα για τι τζουβντιάβ εκ απλή ζωή ντα τθεράβα πο μπουτ χρόνος για τι υπηρετίναβ ι Ιεχωβάς. Κάνα τσσουβάσα ι Ιεχωβάς κι πρώτη θέση αμαρέ ζωγιάτε, μπάζιμα μπορεί τι τθεράς μπουτ χάνικ λοβέ, αλλά σίγουρα ο Ιεχωβά κα φροντίνελ-αμέν». Βα, άμα ντάσα μπέσα κο υποσχέσεις ντα κο συμβουλές κι Ιεχωβάσκε, κα συνεχίνας τι λας αποφάσεις σο σικαβένα ότι τθεράσα πίστη ντα βοβ κα ευλογίνελ-αμέν.

ΚΑΝΑ ΤΡΑΜΠΙΝΑΣΑ ΚΑΣΑΡ ΚΑ ΠΑΝΤΡΙΝΑΣ

10. Καλά πράγματα ισί σημαντικά κάνα σκεφτίνασα κάσαρ κα παντρίνας, αλλά σο πρέπει τι προσοχίνας;

¹⁰ Ο μπιαβ ισί εκ δώρος κατά Ιεχωβά ντα ισί φυσιολογικός τι μανγκάς τι παντρίνας. Κάνα εκ πφεν σκεφτίνελα τι παντρίνελ εκχέ συγκεκριμέ πφραλέσαρ, μπορεί τι σκεφτίνελ σο εμφάνιση τθερέλα, σαρ συμπεριφερίντιβελα, σαρ ντικχένα-λες ο γιαβερά, σαρ κερέλα κουμάντος ο λοβέ, σαρ κερέλα-λα τι νιωθίνελ ντα επίσης άμα λέσκι φαμιλί τθερέλα κάποια ανάγκη ντα πρέπει τι φροντίνελ-λα.b Σαρέ ανταλά ισί μπουτ σημαντικά. Όμως, άμα σκεφτίνελα σάντε ανταλά, να οδηγίντιβελα κατά πίστη.

11. Σαρ μπορίνασα τι οδηγίντιβας κατά πίστη κάνα τραμπίνασα κάσαρ κα παντρίνας; (1 Κορινθίους 7:39)

¹¹ Καμπόρ περήφανος ισί ο Ιεχωβά σο αμαρέ πφραλά ντα πφενιά ακολουθίνενα λέσκε συμβουλές κάνα τραμπίνενα κάσαρ κα παντρίνεν! Για παράδειγμας, πριν τι κερέν γνωριμία εκχέ τζενέσαρ κερένα οντουβά σο βακερέλα η Γραφή, δηλαδή μπεσένα μέχρι “τι νακχαβέν ι ηλικία σο κερένα-λεν κουμάντος ο σεξουαλικές επιθυμίες”. (1 Κορ. 7:36) Ο πο σημαντικός πράγμας ισί τι αβέν σίγουροι ότι ο τζενό σο κα παντρίνεν λέσαρ τθερέλα ο ιδιότητες σο βακερέλα ο Ιεχωβά ότι πρέπει τι τθερέλ εκ λατσσό ρομ ή εκ λατσσί ρομνί. (Παρ. 31:10-13, 26-28· Εφεσ. 5:33· 1 Τιμ. 5:8) Άμα εκ τζενό σο νανέ Μάρτυρας σικαβέλα ενδιαφέρον λένγκε, βον ντένα καν κι οδηγία τι παντρίνεν σάντε εκχέ τζενέσαρ σο «ισί μαθητής ι Κυριόσκο». (Διαβάνεν 1 Κορινθίους 7:39) Σαρέ ανταλά κερένα-λεν επειδή τζανένα ότι ο Ιεχωβά κα σικαβέλ λένγκε πάντα ι αγάπη ντα ι προσοχή σο χρειαζίντιβενα.​—Ψαλμ. 55:22.

12. Σο σικλιόνα κατά Ρόζα;

¹² Ντικχέν ι εμπειρία εκχέ πφενιάκι σο ισί σκαπάνισσα κι Κολομβία ντα βακερένα λάκε Ρόζα. Εκ μουρς σο κερένας μπουτί γιεκ αλλά να ισινέ Μάρτυρας, σικαβέλας ενδιαφέρον λάκε. Η Ρόζα μπεϊντίνελας ανταλέ μουρσές. Βόι βακερέλα: «Βοηθίνελας ι τζενέν σο ισινέ πασέ λέστε ντα ντικχίντιβελας μπαγιά εκ μπουτ λατσσό τζενό. Συμπεριφερίντιβελας μάνγκε λατσσέ τροπόσαρ. Βοβ τθερέλας σο-ντα μανγκάβας εκχέ μουρσέσταρ, όμως να ισινέ Μάρτυρας». Βόι συνεχίνελα: «Ισινέ μάνγκε δύσκολος τι βακεράβ λέσκε ότι να μανγκάβας τι νικιάβ ραντεβού λέσαρ. Οντουβά βακίτι νιωθίναβας κορκορί ντα μανγκάβας τι παντρίναβ, αλλά να μπορισάλομ τι αρακχάβ καεκχέ πφραλές». Όμως η Ρόζα να ατσσιλί σάντε οντουλέντε σο μπορίνελας τι ντικχέλ. Σκεφτιντάς σαρ κα επηρεάντιβελας η φιλία σο τθερέλας ι Ιεχωβάσαρ άμα κα τραμπίνελας τι τθερέλ σχέση ανταλέ μουρσέσαρ. Οτθάρ, βόι τσσιναντάς ντιπ τι κερέλ παρέα λέσαρ ντα ατσσιλί απασχολημέ κο έργος. Χάνικ πο σοράν καλιντέ-λα κι Σχολή για Ευαγγελιστές της Βασιλείας, ντα ακανά υπηρετίνελα σαρ ειδική σκαπάνισσα. Η Ρόζα βακερέλα: «Ο Ιεχωβά ντινάς-μαν αζόμ μπουτ ευλογίες σο κερντέ-μαν μπουτ ευτυχισμέ». Νανέ πάντα εύκολος τι κεράς ανταβά σο μανγκέλα ο Ιεχωβά, ειδικά άμα κάτι επηρεάνελα μπουτ αμαρέ αισθήματα. Όμως κάνα σκεφτίνασα σαρ σκεφτίνελα ο Ιεχωβά, πάντα κα τθεράς λατσσιπέ.

ΚΑΝΑ ΛΑΣΑ ΟΔΗΓΙΕΣ ΚΑΤΑ ΟΡΓΑΝΩΣΗ Ι ΙΕΧΩΒΑΣΚΙ

13. Σαρ μπορεί τι αντιδράνας κάνα λάσα οδηγίες κατά οργάνωση;

¹³ Ο πρεσβύτεροι αμαρέ κχανγκιριάκε, ο επίσκοπος περιοχής, ο Μπέθελ ντα ο Κυβερνών Σώμας μπουτ φαρ ντένα-αμέν οδηγίες για τι βοηθίνεν-αμέν τι υπηρετίνας ι Ιεχωβάς. Αλλά μπάζιμα μπορεί μα τι μπορίνας τι αγαβάς σόσκε λάσα εκ οδηγία. Μπορεί τι σκεφτίνας σάντε ο δυσκολίες σο κα ανέλ αμένγκε ανταγιά οδηγία. Μπέκιμ τι αρχίνας τι σκεφτίνας ότι ο πφραλά σο ντινέ ι οδηγία κερένα λάθη.

14. Σο κα βοηθίνελ-αμέν τι ντας καν κο οδηγίες σο λάσα κατά οργάνωση; (Εβραίους 13:17)

¹⁴ Πακιάσα ότι ο Ιεχωβά οδηγίνελα πι οργάνωση ντα τζανέλα αμαρέ ανάγκες. Οτθάρ ντάσα καν αμέσως ντα αντράλ αμαρέ γκίσταρ. (Διαβάνεν Εβραίους 13:17) Τζανάσα ότι άμα ντάσα καν κο οδηγίες, βοηθίνασα αμαρί κχανγκιρί τι αβέλ ενωμέ. (Εφεσ. 4:2, 3) Επίσης παρόλο σο ο πφραλά σο οδηγίνενα-αμέν νανέ τέλειοι, άμα ντάσα καν λέντε, ισινάμ σίγουροι ότι ο Ιεχωβά κα ευλογίνελ-αμέν. (1 Σαμ. 15:22) Ατζέ-ντα άμα εκ οδηγία πρέπει τι αλλάνελ, ο Ιεχωβά σίγουρα κα κερέλ-λες ανταβά κάνα κα αβέλ ο βακίτι.​—Μιχ. 7:7.

15, 16. Σο βοηθιντάς εκχέ πφραλές τι οδηγίντιβελ κατά πίστη, παρόλο σο να ισινέ σίγουρος για το οδηγίες σο λιντάς; (Ντικχέν ι φωτογραφία-ντα)

¹⁵ Ντικχέν εκ εμπειρία σο σικαβέλα ο λατσσιπέ σο αβέλα κάνα τθεράσα πίστη ντα ακολουθίνασα οντουλά σο βακερέλα αμένγκε η οργάνωση. Η τσσιπ σο κερένα λάφι κο Περού ισί η ισπανική, αλλά μπουτ τζενέ μερικέ περιοχιέντε κερένα λάφι γιαβερά τσσιμπά. Εκ ανταλένταρ ισί η τσσιπ κέτσουα. Ο πφραλά ντα ο πφενιά σο κερένα λάφι κέτσουα ρόντενας μπουτ μπρεσά κο τομέας τζενένγκε σο κερένας λάφι ανταγιά τσσιπ. Όμως, για τι μπορίνεν τι ντεν καν μερικέ πραγματέντε σο βακερέλας ο νόμος, χρειασάλε τι αβέν-πες μερικές αλλαγές κο τρόπος σο ρόντενας ι τζενένγκε. (Ρωμ. 13:1) Οτθάρ, μερικοί σκεφτίνενας άμα ανταβά κα αβέλας λατσσό για το τομέας. Επειδή όμως ο πφραλά κερντέ ανταλά αλλαγές, ο Ιεχωβά ευλογιντάς λένγκε προσπάθειες τι αρακχέν μπουτέ τζενέν σο κερένας λάφι κέτσουα.

¹⁶ Ο Κέβιν, εκ πρεσβύτερος εκχέ κχανγκιριάτε σο κερένα λάφι κέτσουα, ανησυχίνελας βοβ-ντα ανταλέσκε. Βακερέλα: «Σκεφτιντόμ: “Σαρ κα αρακχάς ακανά ι τζενέν σο κερένα λάφι κέτσουα;”» Σο κερντάς ο Κέβιν; Βοβ βακερέλα: «Αντόμ μι γκοντιάτε ο εδάφιος Παροιμίες 3:5. Επίσης σκεφτιντόμ ι Μωυσής. Ο Ιεχωβά ντινάς-λες εκ οδηγία σο να ντικχίντιβελας λογική. Βακερντάς κο Μωυσής τι νικαβέλ ι Ισραηλιτέν αβρί κατά Αίγυπτος ντα τι γκερέλ-λεν κι Ερυθρά Θάλασσα. Ντικχίντιβελας ότι να κα τθερένας τρόπος τι νασέν οτθάρ για τι σώντιβεν κατά Αιγύπτιοι σο κυνηγίνενας-λεν. Όμως ο Ιεχωβά ευλογιντάς ι Μωυσής. Κερντάς εκ μπουτ μπαρό θαύμας ντα σωντάς-λεν». (Έξοδ. 14:1, 2, 9-11, 21, 22) Ο Κέβιν ισινέ έτοιμος τι αλλάνελ ο τρόπος σο κερέλας έργος. Καβά ισινέ ο αποτέλεσμας; Βακερέλα: «Σαστισάλομ σο ντικχλόμ καζόμ μπουτ ευλογιντάς-αμέν ο Ιεχωβά. Πριν έπρεπε τι πφιράς μπουτ για τι τζας κο τομέας ντα μπάζιμ αρακχάας σάντε εκχές ή ντουέ τζενέν σο κερένας λάφι κέτσουα. Ακανά τζάσα τθανέντε σο υπαρχίντιβενα μπουτ τζενέ σο κερένα λάφι κέτσουα. Αντικάς, κεράσα πο μπουτ συζητήσεις, τθεράσα πο μπουτ επανεπισκέψεις ντα πο μπουτ μελέτες. Επίσης αβένα πο μπουτ τζενέ αμαρέ συναθροισιέντε». Βα, ισί μπαγιά ότι κάνα οδηγίντιβασα κατά πίστη, πάντα ο Ιεχωβά ευλογίνελα-αμέν.

17. Σο σικλιλέν ανταλέ μαθημάσταρ;

¹⁷ Ντικχλάμ σαρ μπορίνασα τι συνεχίνας τι λας αποφάσεις σο οδηγίντιβενα κατά πίστη τρινέ πραγματέντε αμαρέ ζωγιάτε. Αλλά πρέπει τι συνεχίνας τι οδηγίντιβας κατά πίστη σαρέ κο πράγματα αμαρέ ζωγιάτε. Για παράδειγμας πρέπει τι κεράς-λες ανταβά κάνα τραμπίνασα σαρ κα διασκεδάνας, σαρ κα νακχάς αμαρό σαάτι, σαρ κα μπαριαράς αμαρέ τσσαβέν ντα κάνα λάσα αποφάσεις ι σχολειόσκε ντα για το σπουδές. Σαρέ κο αποφάσεις σο τθεράσα τι λας, δεν πρέπει τι οδηγίντιβας σάντε οντουλένταρ σο ντικχάσα. Αλλά πρέπει επίσης τι τθεράς αμαρέ γκοντιάτε αμαρί φιλία ι Ιεχωβάσαρ, λέσκε συμβουλές ντα ο λάφι σο ντινάς ότι κα φροντίνελ-αμέν. Άμα κα κεράς-λες ανταβά, «κα πφιράς για πάντα ι Ιεχωβάσκε ναβέσαρ σο ισί αμαρό Ντεβέλ».​—Μιχ. 4:5.