Ισί Λατσσό Αμένγκε τι Αβάς Λατσσέ Αμαλά ο Εκ ι Γιαβερέσαρ!

1, 2. Καβά ισί εκ πράγμας σο ισί σημαντικός ι Ιεχωβάσκε, ντα σο μανγκέλα αμένταρ τι κεράς;

ΕΚ ΚΑΤΑ πο σημαντικά πράγματα ι Ιεχωβάσκε ισί ο τρόπος σο συμπεριφερίντιβασα ι γιαβερένγκε. Ο Ιησούς σικλιαρντάς-αμέν ότι πρέπει τι μανγκάς ι γιαβερέν σαρ μανγκάσα αμαρό νεαυτός. (Ματθ. 22:37-39) Ανταβά μανγκέλα τι βακερέλ τι σικαβάς λατσσιπέ ατζέ-ντα οντουλέντε σο να υπηρετίνενα ι Ιεχωβάς. Κάνα κεράσα-λες ανταβά, μοιάζασα κο Ιεχωβά Ντεβέλ, σο «κερέλα τι νικιόλ ο κχαμ εμ ι γκεραλένγκε εμ ι λατσσένγκε ντα ντέλα ο μπρισίμ εμ κο δίκαιοι εμ κο άδικοι».​—Ματθ. 5:45.

² Παρόλο σο ο Ιεχωβά μανγκέλα σαρέ ι τζενέν, μανγκέλα ειδικά οντουλέν σο υπηρετίνενα-λες. (Ιωάν. 14:21) Μανγκέλα αμένταρ τι μοιάζας λέστε. Βακερέλα αμένγκε “τι μανγκάς μπουτ” ντα “τι μανγκάς αντράλ αμαρέ γκίσταρ” αμαρέ πφραλέν ντα αμαρέ πφενίν. (1 Πέτρ. 4:8· Ρωμ. 12:10) Ανταγιά αγάπη μοιάζελα με την αγάπη σο τθεράσα αμαρέ τζενένγκε ή αμαρέ φιλόνγκε.

3. Σο πρέπει τι ντας-αμέν γκοντί για την αγάπη;

³ Η αγάπη ισί σαρ εκ λουλούδι. Χρειαζίντιβελα τι φροντίνας-λα για τι μπαριόλ. Ο απόστολος Παύλος βακερντάς κο Χριστιανοί: «Συνεχίνεν τι μανγκέν ο εκ ι γιαβερές σαρ πφραλά». (Εβρ. 13:1) Ο Ιεχωβά μανγκέλα αμένταρ τι συνεχίνας τι μπαριαράς αμαρί αγάπη ι γιαβερένγκε. Κο μάθημας ανταβά, κα ντικχάς σόσκε πρέπει τι αβάς πο λατσσέ αμαλά αμαρέ πφραλέντζαρ ντα αμαρέ πφενίντζαρ ντα σαρ μπορίνασα τι συνεχίνας τι κεράς-λες ανταβά.

ΣΟΣΚΕ ΠΡΕΠΕΙ ΤΙ ΑΒΑΣ ΠΟ ΛΑΤΣΣΕ ΑΜΑΛΑ Ο ΕΚ Ι ΓΙΑΒΕΡΕΣΑΡ

4. Σαρ βακερέλα κο Ψαλμός 133:1, σαρ κα μπορίνας τι συνεχίνας τι εκτιμίνας ι ενότητα σο τθεράσα αμαρέ πφραλέντζαρ ντα αμαρέ πφενίντζαρ; (Ντικχέν ο φωτογραφίες-ντα)

⁴ Διαβάνεν Ψαλμός 133:1. Συμφωνίνασα ι λαφίντζαρ σο βακερντάς ο ψαλμωδός ότι η φιλία οντουλέντζαρ σο μανγκένα ι Ιεχωβάς ισί «λατσσό» ντα «σουκάρ» πράγμας. Όμως, σαρ εκ τζενό κα μπορίνελας μα τι ντικχέλ καζόμ σουκάρ ισί εκ δέντρος σο τθερέλα-λες κάθε ντιβές, άκ’ αντικάς κα μπορίνελας μα τι ντικχέλ καζόμ σουκάρ ισί η ενότητα σο τθεράσα αμαρέ πφραλέντζαρ ντα αμαρέ πφενίντζαρ. Ντικχάσα αμαρέ πφραλέν ντα αμαρέ πφενίν συνέχεια, μπέκιμ μπουτ φαρ αντρέ κι εβδομάδα. Σαρ κα μπορίνας τι συνεχίνας τι εκτιμίνας-λεν; Αμαρί αγάπη αμαρέ πφραλένγκε ντα αμαρέ πφενίνγκε κα μπαριόλ άμα κα μπεσάς τι σκεφτίνας καζόμ πολύτιμος ισί ο κάθε εκ λένταρ ι κχανγκιριάκε αλλά αμένγκε-ντα.

5. Σαρ επηρεάντιβενα ο τζενέ κατά αγάπη σο τθεράσα ο εκ ι γιαβερέσκε;

⁵ Κάποια τζενέ σο γκιλέ πρώτη φαρ κι συνάθροιση, ατσσιλέ πουταρντέ μόσαρ κάνα ντικχλέ καζόμ μπουτ μανγκάσα ο εκ ι γιαβερές. Ανταλέσταρ σο ντικχλέ, αγαντέ ότι αρακχλέ ι αλήθεια. Ο Ιησούς βακερντάς: «Ανταλέσταρ κα αγαβέν σαρέ ότι ισινέν μο μαθητές, άμα τθερένα αγάπη ο εκ ι γιαβερέσκε». (Ιωάν. 13:35) Σκεφτίνεν ι εμπειρία της Τσάιτρα. Κάνα ισινέ κο πανεπιστήμιος, αρχισάλι τι κερέλ μελέτη κατά Γραφή με το Μάρτυρες ι Ιεχωβάσκε. Βόι δεχτισάλι τι τζαλ σε εκ περιφερειακή συνέλευση. Αφού παρακολουθιντάς ο πρώτος ντιβές, βόι βακερντάς κι πφεν σο κερέλας-λα μελέτη: «Μο ντατ ντα μι ντάι ποτές να ντινέας-μαν ανγκάλι. Αλλά κι συνέλευση τουμαρί ντινέ-μαν ανγκάλι 52 φαρ αντρέ σε εκ ντιβές. Νιωσάλομ ότι ο Ιεχωβά χρησιμοποιηντάς ανταλέ τζενέν για τι κερέλ-μαν τι νιωθίναβ λέσκι αγάπη. Μανγκάβα με-ντα τι νταβ αντρέ ανταλέ φαμιλιάτε». Η Τσάιτρα συνεχιντάς τι κερέλ μελέτη ντα αλλαγές πι ζωγιάτε ντα αντικάς μπολντιλί κο 2024. Βα, κάνα εκ τζενό ντικχέλα αμαρί λατσσί συμπεριφορά ντα ι αγάπη σο τθεράσα ο εκ ι γιαβερέσκε, μπουτ φαρ ανταβά τσσίντελα-λες τι αρχίνελ τι υπηρετίνελ ι Ιεχωβάς.​—Ματθ. 5:16.

6. Σαρ αρακχαβέλα-αμέν η λατσσί φιλία αμαρέ πφραλέντζαρ ντα αμαρέ πφενίντζαρ;

⁶ Η λατσσί φιλία αμαρέ πφραλέντζαρ ντα αμαρέ πφενίντζαρ, μπορίνελα τι αρακχαβέλ-αμέν. Ο Παύλος βακερντάς κο Χριστιανοί: «Τι ενθαρρύνεν ο εκ ι γιαβερές κάθε ντιβές . . . για μα τι χουχάντιβελ καέκ τουμένταρ κατά αμαρτία ντα τι συνηθίνελ τι κερέλ-λα». (Εβρ. 3:13) Άμα κα χασαράς αζόμ μπουτ αμαρί ζορ σο κα αβέλ αμένγκε δύσκολος τι συνεχίνας τι κεράς ο σωστός, ο Ιεχωβά μπορεί τι μπουτσσαβέλ αμένγκε εκχέ πφραλές ή εκχέ πφενιά σο ντικχλάς-λες ανταβά, για τι ντελ-αμέν ι βοήθεια σο χρειαζίντιβασα. (Ψαλμ. 73:2, 17, 23) Ανταγιά βοήθεια κερέλα αμένγκε λατσσιπέ.

7. Σαρ η αγάπη γκερέλα κι ενότητα; (Κολοσσαείς 3:13, 14)

⁷ Ισινάμ αντρέ σε εκ ομάδα τζενένγκι σο μαρένα-πες μπουτ για τι σικαβέν αγάπη ο εκ κο γιαβέρ. Οτθάρ, απολαμβάνασα μπουτ ευλογίες. (1 Ιωάν. 4:11) Για παράδειγμας, η αγάπη τσσίντελα-αμέν “τι αντιχίνας ο εκ ι γιαβερές” ντα ανταβά βοηθίνελα-αμέν τι ατσσάς ενωμέ. (Διαβάνεν Κολοσσαείς 3:13, 14· Εφεσ. 4:2-6) Άκ’ σόσκε κο συναθροίσεις αμαρέ, απολαμβάνασα κάτι σο να υπαρχίντιβελα πουθενά αντρέ κο ντουνιάς. Ντάσα λατρεία ενωμέ αμαρέ Ντεβλές εκχέ σουκάρ τροπόσαρ.

ΤΙ ΣΕΒΑΝΕΝ Ο ΕΚ Ι ΓΙΑΒΕΡΕΣ

8. Σο κερέλα ο Ιεχωβά για τι βοηθίνελ-αμέν τι αβάς ενωμέ;

⁸ Η ενότητα σο απολαμβάνασα αμαρέ πφραλέντζαρ ντα αμαρέ πφενίντζαρ σαρό κο ντουνιάς ισί εκ θαύμας. Ο Ιεχωβά κερέλα-λες ανταβά παρόλο σο αμέν ισινάμ ατελείς. (1 Κορ. 12:25) Η Γραφή βακερέλα ότι ο Ντεβέλ “σικλιαρντάς-αμέν τι μανγκάς ο εκ ι γιαβερές”. (1 Θεσ. 4:9) Ανταβά μανγκέλα τι βακερέλ ότι ο Ιεχωβά χρησιμοποιήνελα ι Γραφή για τι βακερέλ αμένγκε σο ακριβώς πρέπει τι κεράς για τι αβάς αμαλά ο εκ ι γιαβερέσαρ. Μπορίνασα τι “σικλιάς κατά Ντεβέλ” κάνα διαβάνασα προσεκτικά οντουλά σο σικλιαρέλα-αμέν ντα εφαρμόνασα-λεν. (Εβρ. 4:12· Ιακ. 1:25) Άκ’ ανταβά μαρένα-πες τι κερέν ο Μάρτυρες ι Ιεχωβάσκε.

9. Σο σικλιάσα κατά Ρωμαίους 12:9-13 για το σεβασμός σο πρέπει τι σικαβάς ο εκ κο γιαβέρ;

⁹ Σαρ σικλιαρέλα-αμέν ο Λάφι ι Ντεβλέσκο τι αβάς πο λατσσέ αμαλά ο εκ ι γιαβερέσαρ; Σκεφτίνεν σο βακερντάς ο Παύλος ανταλέσκε κο Ρωμαίους 12:9-13. (Διαβάνεν) Προσοχίνεν ότι βακερντάς «τι σικαβέν πρώτα τουμέν σεβασμός κο γιαβερά». Σο μανγκέλα τι βακερέλ ανταβά; Πρέπει τι ρόντας ι ευκαιρία για τι σικαβάς ότι “μανγκάσα αντράλ αμαρέ γκίσταρ ι γιαβερέν”. Μερικοί τρόποι σο μπορίνασα τι κεράς-λες ανταβά ισί τι συγχωρίνας, τι σικαβάς φιλοξενία ντα τι ντας αντράλ αμαρέ γκίσταρ. (Εφεσ. 4:32) Μα μπεκλεντίνεν τουμαρέ πφραλένταρ ντα τουμαρέ πφενίνταρ τι κερέν-λες τουμένγκε ανταβά. Κερέν-λες λένγκε «πρώτα τουμέν». Αντικάς κα νιωθίνεν οντουβά σο βακερντάς ο Ιησούς: «Ισί πο ευτυχισμέ εκ τζενό κάνα ντέλα παρά κάνα λέλα».​—Πράξ. 20:35.

10. Σαρ μπορίνασα τι αβάς μπουτιαρνέ καζόμ βοηθίνασα ι γιαβερέν; (Ντικχέν ι φωτογραφία-ντα)

¹⁰ Κερέλα αμένγκε εντύπωση ότι, αμέσως αφού βακερντάς τι σικαβάς πρώτα αμέν σεβασμός ο εκ κο γιαβέρ, ο Παύλος βακερέλα αμένγκε “τι αβάς μπουτιαρνέ, όχι τεμπέληδες”. Κάποιος σο ισί μπουτιαρνό, πφαμπόλα ντα μαρέλα-πες ι μπουτιάκε σο τθερέλα. Κάνα ντιντιόλα-λες κάτι τι κερέλ, κερέλα-λες λατσσές. Ο εδάφια Παροιμίες 3:27, 28 βακερένα αμένγκε: «Τι σικαβές λατσσιπέ οντουλένγκε σο πρέπει τι σικαβές-λες, άμα ισί τι βαστέστε τι βοηθίνες-λεν». Σαρ βακερένα ο εδάφια, κάνα ντικχάσα εκχέ τζενές τι χρειαζίντιβελ βοήθεια, κεράσα σουγκό σο μπορίνασα για τι βοηθίνας-λες. Δεν πρέπει τι αργίνας, ούτε τι σκεφτίνας ότι κάποιος γιαβέρ κα κερέλ-λες.​—1 Ιωάν. 3:17, 18.

11. Σο κα βοηθίνελ-αμέν τι αβάς πο λατσσέ αμαλά ο εκ ι γιαβερέσαρ;

¹¹ Εκ γιαβέρ τρόπος σο μπορίνασα τι σικαβάς σεβασμός ο εκ κο γιαβέρ ισί τι συγχωρίνας σουγκό ι γιαβερέν κάνα προσβαλίνενα-αμέν. Κο Εφεσίους 4:26 βακερέλα: «Τι νασκιαρέν τουμαρί χολί πριν τι περέλ ο κχαμ». Σόσκε; Κο εδάφιος 27 βακερέλα ότι άμα κα κεράς-λες ανταβά, “να κα ντας κο Μπενγκ ευκαιρία τι επηρεάνελ-αμέν”. Αντρέ πι Λαφίστε, ο Ιεχωβά βακερέλα αμένγκε συνέχεια ότι πρέπει τι συγχωρίνας ο εκ ι γιαβερές. Ο εδάφιος Κολοσσαείς 3:13 βακερέλα αμένγκε “τι συγχωρίνας ο εκ ι γιαβερές σαρέ αμαρέ γκίσαρ”. Κάνα συγχωρίνασα ο λάθη ι γιαβερένγκε, ανταβά ισί εκ κατά πο λατσσέ τρόποι για τι αβάς λατσσέ αμαλά ι γιαβερέντζαρ. Κάνα συγχωρίνασα ι γιαβερέν, “κεράσα σο νακχέλα αμαρέ βαστένταρ για τι τθεράς ειρήνη ο εκ ι γιαβερέσαρ ντα αντικάς τι ατσσάς ενωμέ”. (Εφεσ. 4:3) Ισί ξεκάθαρος ότι κάνα συγχωρίνασα ο εκ ι γιαβερές, βοηθίνασα ι οργάνωση ι Ιεχωβάσκι τι ατσσόλ ενωμέ ντα τι τθερέλ ειρήνη.

12. Σαρ βοηθίνελα-αμέν ο Ιεχωβά τι συγχωρίνας;

¹² Ισί μπαγιά ότι μπορεί τι αβέλ αμένγκε δύσκολος τι συγχωρίνας οντουλέν σο πληγωντέ-αμέν. Όμως κα μπορίνας τι συγχωρίνας-λεν με τη βοήθεια ι Ντεβλέσκε πνευμάσκι. Αφού βακερέλα αμένγκε “τι μανγκάς αντράλ αμαρέ γκίσταρ ο εκ ι γιαβερές” ντα “τι αβάς μπουτιαρνέ”, η Γραφή ντέλα-αμέν ι συμβουλή: “Ο πνεύμας ι Ντεβλέσκο τι πφαμπόλ σαρ γιακ αντρ’ αμέντε”. Ο τζενό σο “πφαμπόλα αντρέ λέστε” ο πνεύμας ι Ντεβλέσκο μανγκέλα τι κερέλ πράγματα ι γιαβερένγκε αντράλ πι γκίσταρ ντα χαράσαρ. Άρα ο πνεύμας ι Ντεβλέσκο τσσίντελα-αμέν τι μανγκάς ντα τι συγχωρίνας ι γιαβερέν αντράλ αμαρέ γκίσταρ. Οτθάρ μολίνασα ι Ιεχωβάς τι βοηθίνελ-αμέν.​—Λουκ. 11:13.

“ΜΑ ΤΙ ΤΘΕΡΑΣ ΔΙΧΟΝΟΙΑ”

13. Καβά πράγμας κα μπορίνελας τι ανέλ αμένγκε διχόνοια;

¹³ Η κχανγκιρί τθερέλα “σαβέ τι μανγκές τζενέν” μπουτέ διαφορετικέ κουλτουρένταρ ντα τθεμένταρ. (1 Τιμ. 2:3, 4) Ιτιρί ανταλέσταρ, ο κάθε εκ αμένταρ μπορεί τι τραμπίνελ τι ιριαβέλ-πες ή τι λατσσαρέλ-πες διαφορετικά ντα τι φροντίνελ πι υγεία ή τι διασκεδάνελ εκχέ διαφορετικέ τροπόσαρ. Άμα να κα αβάς προσεκτικοί, κα μπορίνενας ανταλά διαφορές τι ανέν αμένγκε διχόνοια. (Ρωμ. 14:4· 1 Κορ. 1:10) Επειδή ο Ντεβέλ σικλιαρντάς-αμέν τι μανγκάς ο εκ ι γιαβερές, πρέπει τι προσοχίνας μα τι επιμίνας ότι αμαρέ επιλογές ισί πο λατσσέ κατά γιαβερένγκε.​—Φιλιπ. 2:3.

14. Σο πρέπει τι προσπαθίνας τι κεράς συνέχεια, ντα σόσκε;

¹⁴ Κάνα ντάσα ζορ ντα ενθαρρύνασα ι πφραλέν ντα ι πφενίν κι κχανγκιρί κάνα-ντα χρειαζίντιβενα-λες, ανταβά ισί εκ γιαβέρ τρόπος σο βοηθίνασα μα τι υπαρχίντιβελ διχόνοια. (1 Θεσ. 5:11) Ακανά τελευταία, κάποια τζενέ σο ισινέ αδρανείς ή σο η κχανγκιρί ατσσικιαρντάας-λεν ντουρ, βουρτισάλε πάλι παλάλ κο Ιεχωβά. Μανγκάσα τι καλωσορίνας-λεν αντράλ αμαρέ γκίσταρ! (2 Κορ. 2:8) Προσοχίνεν σο αβιλό-πες εκχέ πφενιάσαρ σο ισινέ αδρανής ντες μπρεσά ντα βουρτισάλι παλάλ κι κχανγκιρί. Βόι βακερντάς: «Σαρέ ντικχένας-μαν με εκ χαμόγελος ντα χαιρετίνενας-μαν». (Πράξ. 3:19) Σαρ επηρεαντέ-λα ανταλά απλά πράγματα σο σικαβένα λατσσιπέ; Βόι βακερέλα: «Ισινέ σαρ τι λέλας-μαν ο Ιεχωβά κατά βας ντα τι βοηθίνελας-μαν τι αβάβ πάλι χαρούμενη». Κάνα μαράσα-αμέν για τι ενθαρρύνας ι γιαβερέν, ο Χριστός μπορίνελα τι χρησιμοποιήνελ-αμέν για τι ντας ζορ οντουλέν σο “ισί κχινέ ντα τθερένα πφαριπέ αντρέ πουμέντε”.​—Ματθ. 11:28, 29.

15. Καλέ γιαβερέ τροπόσαρ μπορίνασα τι ατσσάς ενωμέ; (Ντικχέν ι φωτογραφία-ντα)

¹⁵ Εκ γιαβέρ τρόπος για τι ατσσάς ενωμέ ισί τι προσοχίνας σο βακεράσα. Κο Ιώβ 12:11 βακερέλα: «Να αγαβέλα ο καν ο λάφια σαρ αγαβέλα η τσσιπ ο χαμπέ;» Εκ λατσσό μάγειρας δοκιμάνελα πάντα ο χαμπέ σο κερέλα πριν τι ντελ-λες κο γιαβερά τζενέ για τι αβέλ σίγουρος ότι ισί λατσσό. Αντικάς αμέν-ντα ισί λατσσό τι σκεφτίνας προσεκτικά σο κα βακεράς, πριν τι βακεράς-λες. (Ψαλμ. 141:3) Μανγκάσα πάντα τι αβάς σίγουροι ότι οντουλά σο κα βακεράς κα ντεν ζορ, κα ενθαρρύνεν ντα κα “κερέν λατσσιπέ οντουλένγκε σο ασουνένα”.​—Εφεσ. 4:29.

16. Καλά τζενέ πρέπει ατζέ πο μπουτ τι μαρέν-πες για τι ντεν ζορ πουμαρέ λαφίντζαρ;

¹⁶ Ειδικά ο σορέ ι φαμιλίνγκε ντα ο νταντά ντα ο νταγιά πρέπει τι προσοχίνεν μπουτ για τι κερέν λάφι τροπόσαρ σο ντέλα ζορ. (Κολ. 3:19, 21· Τίτο 2:4) Ο πρεσβύτεροι επίσης πρέπει τι ενθαρρύνεν ντα τι ντεν ζορ ι Ιεχωβάσκε μπρακέν. (Ησ. 32:1, 2· Γαλ. 6:1) Η Γραφή βακερέλα αμένγκε «καζόμ λατσσό ισί ο λάφι σο βακέρντιβελα οπράλ κο σαάτι!»​—Παρ. 15:23.

ΤΙ ΜΑΝΓΚΑΣ «ΟΝΤΟΥΛΕΝΤΖΑΡ ΣΟ ΚΕΡΑΣΑ ΝΤΑ ΜΕ ΑΛΗΘΕΙΑ»

17. Σαρ κα αβάς σίγουροι ότι αμαρί αγάπη αμαρέ πφραλένγκε ντα αμαρέ πφενίνγκε νικιόλα αντράλ αμαρέ γκίσταρ;

¹⁷ Ο απόστολος Ιωάννης βακερέλα αμένγκε «τι μανγκάς, όχι λαφίντζαρ ούτε μόσαρ, αλλά οντουλέντζαρ σο κεράσα ντα με αλήθεια». (1 Ιωάν. 3:18) Μανγκάσα η αγάπη σο τθεράσα αμαρέ πφραλένγκε ντα αμαρέ πφενίνγκε τι αβέλ αντράλ αμαρέ γκίσταρ. Σαρ μπορίνασα τι κεράς-λες ανταβά; Καζόμ πο μπουτ χρόνος νακχάσα αμαρέ πφραλέντζαρ ντα αμαρέ πφενίντζαρ, αζόμ πο πασέ κα αβάς ο εκ κο γιαβέρ ντα αζόμ πο ζουρανί κα αβέλ αμαρί αγάπη. Οτθάρ ρόντεν ευκαιρίες για τι νακχέν χρόνος ο εκ ι γιαβερέσαρ κο συναθροίσεις ντα κο έργος. Επίσης ντεν τουμαρέ σαατίσταρ για τι κερέν παρέα ο εκ ι γιαβερέσαρ. Κάνα κεράσα-λες ανταβά, σικαβάσα ότι “ο Ντεβέλ σικλιαρντάς-αμέν τι μανγκάς ο εκ ι γιαβερές”. (1 Θεσ. 4:9) Ντα κα συνεχίνας τι αγαβάς μπουτ λατσσές «καζόμ λατσσό ντα καζόμ σουκάρ ισί τι τζουβντιόν ο πφραλά μαζί ντα ενωμέ!»​—Ψαλμ. 133:1.