Τι Μοιάζεν κο Πιστοί Άγγελοι

1, 2. (α) Καλέ πραγματέντε ισινάμ διαφορετικοί κατά άγγελοι; (β) Καλέ πραγματέντε μοιάζασα με το άγγελοι;

ΣΑΡΕ αμέν σο ισινάμ λαός ι Ιεχωβάσκο, ισινάμ αντρέ σε εκ αγαπημέ φαμιλί σο ντέλα-λες λατρεία. (Δαν. 7:9, 10) Αντρέ ανταλέ φαμιλιάτε ισί αμαρέ πφραλά ντα αμαρέ πφενιά σαρό κατά ντουνιάς, αλλά επίσης εκατομμύρια άγγελοι-ντα. Κάνα ανάσα αμαρέ γκοντιάτε ι αγγελόν μπορεί τι σκεφτίνασα ότι ισί μπουτ διαφορετικοί αμένταρ. Για παράδειγμας, ο άγγελοι τζουβντιλέ μπουτ πο μπουτ αμένταρ. (Ιώβ 38:4, 7) Ισί μπουτ πο ζουρανέ. Ντα ισί αζόμ άγιοι ντα δίκαιοι σο αμέν, σαρ ατελείς τζενέ, να μπορίνασα τι αβάς.​—Λουκ. 9:26.

² Ισί μπαγιά ότι ισινάμ διαφορετικοί κατά άγγελοι μπουτέ πραγματέντε. Όμως υπαρχίντιβενα μπουτ γιαβερά-ντα πράγματα σο μοιάζασα λέντζαρ. Για παράδειγμας, σαρ ο άγγελοι, αμέν-ντα μπορίνασα τι σικαβάς ο σουκάρ ιδιότητες ι Ιεχωβάσκε. Τθεράσα ι ελευθερία τι τραμπίνας σο κα κεράς, σαρ βον. Αμέν-ντα τθεράσα ο κάθε εκ αμαρό ναβ, αμαρό χαρακτήρας ντα μπουτ ευθύνες. Ντα σαρ ο άγγελοι, τθεράσα αμέν-ντα ι ανάγκη τι ντας λατρεία αμαρέ Δημιουργός.​—1 Πέτρ. 1:12.

3. Σο μπορίνασα τι σικλιάς κατά πιστοί άγγελοι;

³ Επειδή μοιάζασα ι αγγελόντζαρ μπουτέ πραγματέντε, λένγκο λατσσό παράδειγμας κα ενθαρρύνελ-αμέν ντα κα σικλιαρέλ-αμέν μπουτ σημαντικά πράγματα. Ανταλέ μαθημάστε, κα ντικχάς σαρ μπορίνασα τι μοιάζας κο πιστοί άγγελοι, τι σικαβάς ταπεινότητα ντα αγάπη ι τζενένγκε. Επίσης κα σικλιάς σαρ μπορίνασα τι σικαβάς υπομονή ντα σαρ μπορίνασα τι μαράς-αμέν για τι ατσσόλ η κχανγκιρί πάκι.

Ο ΑΓΓΕΛΟΙ ΙΣΙ ΤΑΠΕΙΝΟΙ

4. (α) Σαρ σικαβένα ο άγγελοι ταπεινότητα; (β) Σόσκε ισί ο άγγελοι ταπεινοί; (Ψαλμός 89:7)

⁴ Ο πιστοί άγγελοι ισί ταπεινοί. Ντένα καν κο εντολές κι Ιεχωβάσκε παρόλο σο τζανένα μπουτ πράγματα, ισί ζουρανέ ντα γκοντιαβέρ. (Ψαλμ. 103:20) Κάνα κερένα πουμαρέ διορισμούς, ποτές να ισαρένα-πες οντουλένγκε σο κερένα, ούτε χρησιμοποιήνενα πουμαρί ζορ για τι ταρτίνεν ι προσοχή οπρά-πουμέντε. Κερένα χαράσαρ οντουβά σο μανγκέλα ο Ιεχωβά ατζέ-ντα κάνα ο γιαβερά να σικλιόνα λένγκο ναβ.a (Γέν. 32:24, 29· 2 Βασ. 19:35) Να μανγκένα τι λεν ι δόξα σο αξίνελα ο Ιεχωβά. Σόσκε ισί ο άγγελοι αζόμ ταπεινοί; Επειδή μανγκένα ι Ιεχωβάς ντα σεβάνενα-λες μπουτ.​—Διαβάνεν Ψαλμός 89:7.

5. Σαρ σικαντάς εκ άγγελος ταπεινότητα κάνα διορθωντάς τον απόστολο Ιωάννη; (Ντικχέν ι φωτογραφία-ντα)

⁵ Σκεφτίνεν εκ ιστορία κατά Γραφή σο σικαβέλα καζόμ ταπεινοί ισί ο άγγελοι. Περίπου κο 96 Σ.Κ.Χ. (σοράν κατά Χριστός), εκ άγγελος σο να τζανάσα λέσκο ναβ σικαντάς μπουτ σουκάρ πράγματα κο απόστολος Ιωάννης. (Αποκ. 1:1) Σο κερντάς ο Ιωάννης κάνα ντικχλάς ανταλά σουκάρ πράγματα; Μανγκλάς τι ντελ λατρεία κο άγγελος. Όμως, οντουβά αφοσιωμέ πνευματικός πλάσμας σταματιντάς-λες αμέσως ντα βακερντάς: «Προσόχινε! Μα κερ-λες ανταβά! Με-ντα ισινόμ εκ υπηρέτης σαρ τούτε ντα σαρ τι πφραλέντε . . . Κο Ντεβέλ ντε λατρεία!» (Αποκ. 19:10) Καζόμ ταπεινότητα σικαντάς! Ο άγγελος να μανγκλάς τι λελ δόξα πι νεαυτόσκε. Βακερντάς αμέσως κο Ιωάννης τι ντελ ι δόξα κο Ιεχωβά Ντεβέλ. Όμως, να κερντάς ι Ιωαννής τι νιωθίνελ μπέτι. Παρόλο σο βοβ υπηρετίνελας ι Ιεχωβάς πο μπουτ καιρός λέσταρ ντα ισινέ μπουτ πο ζουρανό κατά Ιωάννης, βακερντάς ταπεινά ότι ο απόστολος ισινέ εκ υπηρέτης σαρ λέστε. Ντα παρόλο σο έπρεπε τι διορθώνελ ι πφουρέ αποστολός να ντινάς λέσκε βίκος ούτε βακερντάς λέσκε πφαρέ λάφια. Οκιά μπάνταρ, κερντάς λέσκε λάφι λατσσιμάσαρ. Μάλλον αγαντάς ότι ο Ιωάννης γκιλό τι κερέλ-λες ανταβά επειδή σαστισάλοας οντουλέντζαρ σο ντικχλάας.

6. Σαρ μπορίνασα τι σικαβάς ταπεινότητα σαρ ο άγγελοι;

⁶ Σαρ μπορίνασα τι σικαβάς ταπεινότητα σαρ ο άγγελοι; Μανγκάσα αμέν-ντα σαρ ο άγγελοι τι κεράς ο πο λατσσό κι υπηρεσία κι Ιεχωβάσκι, χωρίς τι ισαράς-αμέν ή τι κεράς πράγματα για τι ισαρέν-αμέν ο γιαβερά. (1 Κορ. 4:7) Επίσης δεν πρέπει τι νιωθίνας ότι ισινάμ πο σημαντικοί κατά γιαβερά επειδή υπηρετίνασα ι Ιεχωβάς πο μπουτ καιρός λένταρ ή επειδή τθεράσα κάποια προνόμια. Κι πραγματικότητα, καζόμ πο μπουτ ευθύνες τθεράσα, αζόμ πο χουρντέ πρέπει τι νιωθίνας. (Λουκ. 9:48) Σαρ ο άγγελοι, αντικάς αμέν-ντα μανγκάσα τι υπηρετίνας ι γιαβερέν. Να μανγκάσα τι κεράς ι γιαβερέν οντουλέντζαρ σο κεράσα τι νιωθίνεν ότι ισινάμ πο σημαντικοί λένταρ.

7. Σαρ μπορίνασα τι σικαβάς ταπεινότητα κάνα κα ντας εκ συμβουλή ή κα διορθώνας κάποιον;

⁷ Μπορίνασα επίσης τι σικαβάς ταπεινότητα κάνα κα χρειαζίντιβελ τι ντας εκ συμβουλή ή τι διορθώνας εκχέ πφραλές ή πφενιά ή αμαρέ τσσαβές. Μερικές φορές μπορεί τι χρειαζίντιβελ τι βακεράς εκχέ πφραλέσκε ξεκάθαρα για εκ λάθος σο κερντάς. Αλλά σαρ ο άγγελος διορθωντάς ι Ιωαννής λατσσιμάσαρ, αντικάς αμέν-ντα μπορίνασα τι κεράς λάφι ξεκάθαρα χωρίς όμως τι ντουκχαβάς ο γκι ι τζενέσκο. Άμα να πακιάσα ότι ισινάμ πο σημαντικοί, κάνα κα ντας εκ συμβουλή κα αβέλ αντράλ κατά Γραφή ντα κα κεράς λάφι με σεβασμός ντα αγάπη.​—Κολ. 4:6.

Ο ΑΓΓΕΛΟΙ ΜΑΝΓΚΕΝΑ Ι ΤΖΕΝΕΝ

8. (α) Σαρ βακερέλα ο εδάφιος Λουκάς 15:10, σαρ σικαβένα ο άγγελοι πουμαρί αγάπη κο τζενέ; (β) Σο μπουτί κερένα ο άγγελοι κάνα βακεράσα ο λατσσέ αμπέρια; (Ντικχέν ι φωτογραφία-ντα)

⁸ Ο άγγελοι να ατσσικιαρένα-πες ντουρ κατά τζενέ ντα σικαβένα ενδιαφέρον λένγκε. Μανγκένα ι τζενέν. Χαιρίνενα κάνα εκ τζενό σο κερέλα εκ αμαρτία μετανιώνελα, δηλαδή κάνα εκ μπρακό σο χασάρντιβελα βουρτίνελα κο Ιεχωβά. Επίσης λένα μπαρί χαρά κάνα εκ τζενό κερέλα ο αλλαγές σο χρειαζίντιβενα για τι αβέλ κι αλήθεια. (Διαβάνεν Λουκάς 15:10) Επίσης ο άγγελοι βοηθίνενα-αμέν τι βακεράς ο λατσσέ αμπέρια. (Αποκ. 14:6) Παρόλο σο να κερένα βον ο ίδιοι λάφι κο τζενέ, μπορεί τι οδηγίνεν εκχέ πφραλές σε εκ τζενό σο μανγκέλα τι σικλιόλ ι Ιεχωβάσκε. Ισί μπαγιά ότι να τζανάσα με σιγουριά καλέ περιπτωσιέντε ο άγγελοι οδηγιντέ-αμέν σε εκ συγκεκριμέ τζενό. Τζανάσα ότι ο Ιεχωβά μπορεί τι χρησιμοποιήνελ γιαβερά-ντα πράγματα, σαρ πο άγιος πνεύμας για τι βοηθίνελ ι τζενέν ντα τι οδηγίνελ πι υπηρετόν. (Πράξ. 16:6, 7) Χρησιμοποιήνελα μπουτ όμως πι αγγελόν-ντα. Οτθάρ, κάνα βακεράσα ο λατσσέ αμπέρια, μπορίνασα τι αβάς σίγουροι ότι ο άγγελοι ισί οτθέ για τι βοηθίνεν-αμέν.​—Ντικχέν ο πλαίσιος-ντα «Λένγκε Προσευχές Απαντισάλε».b

9. Σαρ μπορίνασα τι μανγκάς ι τζενέν σαρ ο άγγελοι;

⁹ Σαρ μπορίνασα τι μανγκάς ι τζενέν σαρ ο άγγελοι; Κάνα ανακοινώντιβελα ότι κάποιος βουρτισάλο κι αλήθεια, μανγκάσα τι χαιρίνας σαρ ο άγγελοι. Μπορίνασα τι καλωσορίνας ι πφραλές ντα τι κεράς-λες τι νιωθίνελ ότι μανγκάσα-λες. (Λουκ. 15:4-7· 2 Κορ. 2:6-8) Μπορίνασα επίσης τι μοιάζας κο άγγελοι κάνα κεράσα ο πο λατσσό κο έργος. (Εκκλ. 11:6) Επίσης σαρ ο άγγελοι βοηθίνενα-αμέν τι βακεράς ο λατσσέ αμπέρια, αντικάς αμέν-ντα μπορίνασα τι ρόντας τρόπους για τι βοηθίνας αμαρέ πφραλέν ντα αμαρέ πφενίν κο έργος. Για παράδειγμας, μήπως μπορίνασα τι κανονίνας τι νικιάς γιεκ εκχέ πφραλέσαρ σο ισί νεβό κι αλήθεια; Μήπως μπορίνασα τι βοηθίνας ι πφουρέν ή ι πφραλέν ντα ι πφενίν σο τθερένα προβλήματα υγείας για τι νικιόν αμέντζαρ κο έργος;

10. Σο σικλιάσα κατά εμπειρία σο τθερέλας η Σάρα;

¹⁰ Σο κα αβέλ-πες όμως άμα να μπορίνασα τι κεράς οντουβά σο κα μανγκάας κι υπηρεσία κι Ιεχωβάσκι; Μπορίνασα τι αρακχάς πάλι τρόπους τι συνεργαζίντιβας ι αγγελόντζαρ κο έργος. Ντικχέν ι εμπειρία σο τθερέλας η Σάρα,c εκ πφεν κι Ινδία. Αφού κερντάς σκαπανικός περίπου 20 μπρεσά, η Σάρα νασφάλιλι ντα να μπορίνελας ούτε τι πφιρέλ ούτε τι ιστίλ κατά κρεβάτι. Ντα σαρ αγαβάσα ανταβά ανέλας λάκε μπαρί στεναχώρια. Αλλά η Σάρα αρακχλάς πάλι πι χαρά επειδή ο πφραλά ντα ο πφενιά λάκε κχανγκιριάταρ βοηθιντέ-λα ντα επίσης επειδή τθερέλας εκ λατσσό πρόγραμμας για τι διαβάνελ ι Γραφή. Ισί μπαγιά ότι έπρεπε τι αρακχέλ γιαβερά τρόπους για τι κερέλ ο έργος. Αφού να μπορίνελας ούτε τι γραφίνελ επιστολές, κερέλας έργος κατά τηλέφωνος. Οτθάρ λέλας τηλέφωνος πο επανεπισκέψεις ντα λάκε επανεπισκέψεις βακερένας λάκε γιαβερέ τζενένγκε σο μπορεί τι ενδιαφερίντιβενας. Καβά ισινέ ο αποτέλεσμας; Αντρέ σε χάνικ μασεκά, η Σάρα τθερέλας 70 μελέτες! Να μπορίνελας κορκορί τι κερέλ σαρέ ανταλά μελέτες. Οτθάρ ντινάς μερικές ανταλένταρ γιαβερέ τζενέντε κι κχανγκιρί. Μπουτ τζενέ ανταλένταρ σο κερένας μελέτη ακανά τζάνα κι συνάθροιση. Καζόμ μπουτ πρέπει τι χαιρίνενα ο άγγελοι κάνα συνεργαζίντιβενα πφραλέντζαρ ντα πφενίντζαρ σο κερένα ο πο λατσσό κο έργος, σαρ η Σάρα!

Ο ΑΓΓΕΛΟΙ ΚΕΡΕΝΑ ΥΠΟΜΟΝΗ

11. Σαρ σικαντέ μπαρί υπομονή ο πιστοί άγγελοι;

¹¹ Ο πιστοί άγγελοι ισί μπουτ λατσσέ παραδείγματα υπομονής. Κερντέ υπομονή καζόμ ντικχένας ανταλά χιλιάδες μπρεσά ι αδικία ντα ο πφιρνιπέ σο νταϊντίνελα ο Ιεχωβά. Ανταβά επηρεάνελα λεν-ντα. Ντικχλέ ι Μπενγκές ντα μπουτ γιαβερά πνευματικά πλάσματα σο πριν υπηρετίνενας γιεκ λέντζαρ τι τζαν κόντρα κο Ιεχωβά. (Γέν. 3:1· 6:1, 2· Ιούδα 6) Η Γραφή κερέλα λάφι για εκ περίπτωση εκχέ πιστέ αγγελόσκι σο γκιλό λέσαρ κόντρα εκ ζουρανό δαίμονας. (Δαν. 10:13) Επίσης σαρέ ανταλά μπρεσά, ο άγγελοι ντικχλέ σάντε εκ χουρντί ομάδα τζενένγκι τι ντελ λατρεία ι Ιεχωβάς. Όμως, ανταλά πιστοί άγγελοι συνεχίνενα τι υπηρετίνεν ι Ιεχωβάς χαράσαρ ντα αντράλ πουμαρέ γκίσταρ. Τζανένα ότι κο σωστός βακίτι, ο Ντεβέλ κα εξαφανίνελ σαρί ι αδικία.

12. Σο κα βοηθίνελ-αμέν τι κεράς υπομονή;

¹² Σαρ μπορίνασα τι κεράς αμέν-ντα υπομονή σαρ ο άγγελοι; Σαρ ο άγγελοι, αντικάς αμέν-ντα μπορεί τι ντικχάσα αδικίες ή τι τθεράσα εναντίωση. Αλλά ισινάμ αμέν-ντα σίγουροι ότι κο σωστός βακίτι, ο Ντεβέλ κα εξαφανίνελ ντιπ ο πφιρνιπέ. Οτθάρ, σαρ ο πιστοί άγγελοι, αντικάς αμέν-ντα “να τσσιναβάσα τι κεράς ο λατσσό”. (Γαλ. 6:9) Ο Ντεβέλ ντέλα πο λάφι ότι κα βοηθίνελ-αμέν τι κεράς υπομονή. (1 Κορ. 10:13) Μπορίνασα τι κεράς προσευχή κο Ιεχωβά για τι ντελ-αμέν πο πνεύμας, σο ανέλα υπομονή ντα χαρά. (Γαλ. 5:22· Κολ. 1:11) Σο μπορίνενα τι κερέν άμα τθερένα εναντίωση; Τι ντεν σαρί τουμαρί μπέσα κο Ιεχωβά ντα μα τι νταρέν. Ο Ιεχωβά πάντα κα βοηθίνελ-τουμέν ντα κα ντελ-τουμέν ζορ.​—Εβρ. 13:6.

Ο ΑΓΓΕΛΟΙ ΒΟΗΘΙΝΕΝΑ ΓΙΑ ΤΙ ΑΤΣΣΟΛ ΠΑΚΙ Η ΚΧΑΝΓΚΙΡΙ

13. Καβά ξεχωριστός διορισμός τθερένα ο άγγελοι κο τελευταία ντιβεσά; (Ματθαίος 13:47-49)

¹³ Κο τελευταία ντιβεσά ο Ιεχωβά ντινάς κο άγγελοι εκ ξεχωριστός διορισμός. (Διαβάνεν Ματθαίος 13:47-49) Εκατομμύρια τζενέ σαρό κατά ντουνιάς ενδιαφερίντιβενα για το λατσσέ αμπέρια. Κάποιοι λένταρ κερένα πράγματα για τι αβέν αληθινοί Χριστιανοί, ενώ γιαβερά όχι. Κο άγγελοι ντιντιλί η μπουτί τι «νικαβέν ι πφιρνέν αντράλ κατά δίκαιοι». Ανταβά μανγκέλα τι βακερέλ ότι ντιντιλί-λεν η μπουτί τι βοηθίνεν για τι ατσσόλ η κχανγκιρί πάκι. Ανταβά να μανγκέλα τι βακερέλ ότι σαρέ οντουλά σο ισί ντουρ κατά κχανγκιρί να κα μπορίνεν τι βουρτίνεν ποτές. Ούτε μανγκέλα τι βακερέλ ότι να κα υπαρχίντιβεν ποτές προβλήματα κι κχανγκιρί. Μπορίνασα όμως τι αβάς σίγουροι ότι ο άγγελοι μαρένα-πες μπουτ για τι αβέν αμαρέ κχανγκιριά πάκι.

14, 15. Σαρ μπορίνασα τι σικαβάς ο ενδιαφέρον σο σικαβένα ο άγγελοι για τι ατσσόλ η κχανγκιρί πάκι; (Ντικχέν ο φωτογραφίες-ντα)

¹⁴ Σαρ κα σικαβάς ότι αμέν-ντα μανγκάσα σαρ ο άγγελοι τι ατσσόλ πάκι η κχανγκιρί; Κάνα κεράσα αμέν-ντα σο νακχέλα αμαρέ βαστέσταρ για τι ατσσόλ αμαρί κχανγκιρί πνευματικά ντα ηθικά πάκι. Οτθάρ μαράσα-αμέν τι αρακχαβάς αμαρό γκι κάνα τραμπίνασα λατσσέ φιλόν ντα κάνα κεράσα πέρα σο-ντα πράγμας κα μπορίνελας τι κερέλ αμένγκε ζιάνι. (Ψαλμ. 101:3) Μπορίνασα επίσης τι βοηθίνας αμαρέ πφραλέν τι ατσσόν πιστοί κο Ιεχωβά. Για παράδειγμας, σο πρέπει τι κεράς άμα κα σικλιάς ότι εκ πφραλ ή εκ πφεν κερντάς εκ σοβαρή αμαρτία; Επειδή μανγκάσα ανταλέ τζενές, κα βακεράς λέσκε τι κερέλ λάφι ι πρεσβυτερόντζαρ. Άμα να κα κερέλ-λες, πρέπει τι κεράς αμέν λάφι λέντζαρ. Άμα εκ πφραλ ή εκ πφεν κα αβέλ μπίζουρανο πνευματικά, μανγκάσα τι λελ βοήθεια καζόμ πο σουγκό αβέλα-πες!​—Ιακ. 5:14, 15.

¹⁵ Η κχανγκιρί μπορεί τι χρειαζίντιβελ τι ατσσικιαρέλ ντουρ κάποιε τζενέν σο κερένα εκ μπαρί αμαρτία. Ασακέ περιπτωσιέντε, τσσιναβάσα τι κεράς παρέα ανταλέ τζενέντζαρ.d (1 Κορ. 5:9-13) Κάνα κεράσα-λες ανταβά, βοηθίνασα τι ατσσόλ πάκι η κχανγκιρί. Επίσης, κάνα τραμπίνασα μα τι κεράς παρέα ανταλέ τζενέντζαρ, κι πραγματικότητα σικαβάσα λένγκε λατσσιπέ. Επειδή αμέν να κεράσα παλάλ ανταλέ πραγμάστε, μπορεί τι βοηθίνας-λεν τι αγαβέν-πες. Άμα κα αβέλ-πες ανταβά, χαιρίνασα γιεκ ι Ιεχωβάσαρ ντα λέσκε αγγελόντζαρ.​—Λουκ. 15:7.

16. Καλά πράγματα πρέπει τι μαράς-αμέν τι κεράς για τι μοιάζας κο άγγελοι;

¹⁶ Σο μπαρό προνόμιος τθεράσα σο μπορίνασα τι αγαβάς οντουλά σο αβένα-πες κο ουρανός ντα σο συνεργαζίντιβασα ι αγγελόντζαρ! Μακάρι τι σικαβάς ο σουκάρ ιδιότητες λένγκε: λένγκι ταπεινότητα, ι αγάπη σο τθερένα ι τζενένγκε, λένγκι υπομονή ντα ο ενδιαφέρον σο τθερένα για τι ατσσόλ πάκι η κχανγκιρί πνευματικά ντα ηθικά. Άμα κα μοιάζας κο πιστοί άγγελοι, κα μπορίνας αμέν-ντα τι αβάς αντρέ κι φαμιλί κι Ιεχωβάσκι για πάντα.