Σο Σικλιάσα Κατά Τελευταία Λάφια σο Βακερντάς ο Ιακώβ πι Πρώτε Σταρέ Τσσαβέντε

1, 2. Σο κερντάς ο Ιακώβ πριν τι μερέλ, ντα σόσκε; (Ντικχέν ι φωτογραφία-ντα)

ΚΑΝΑ ο Ιακώβ ισινέ μπουτ πφουρό, νασλό σαρέ πι φαμιλιάσαρ κατά Χαναάν ντα γκιλέ κι Αίγυπτος. Οτθέ συνεχιντάς τι υπηρετίνελ πιστά ι Ιεχωβάς για 17 μπρεσά. (Γέν. 47:28) Ο Ιακώβ ισινέ μπουτ χαρούμενος σο ντικχλάς πι τσσαβές τον Ιωσήφ πάλι, επειδή πακιάλας ότι ισινέ μουλό. Ο Ιακώβ ντα λέσκε τσσαβέ ισινέ πάλι γιεκ. Όμως τζανέλας ότι μπουτ σουγκό κα μερέλας. Οτθάρ ντινάς βίκος σαρέ πι τσσαβέν για τι ντικχέν-λες επειδή τθερέλας κάτι μπουτ σημαντικός τι βακερέλ λένγκε.​—Γέν. 49:28.

² Οντουλά μπρεσά, κάνα ισινέ τι μερέλ ο ντατ ι φαμιλιάκο γκίντελας σαρί πι φαμιλί γιεκ για τι ντελ-λεν κάποιες οδηγίες. (Ησ. 38:1) Επίσης κι συνάντηση ανταγιά βακέρντιβελας κον κα αβέλας ο σορό ι φαμιλιάκο κάνα κα μερέλας ο ντατ.

3. Σο σικλιάσα κατά λάφια σο ισί κο εδάφια Γένεση 49:1, 2;

³ Διαβάνεν Γένεση 49:1, 2. Όμως ανταγιά συνάντηση ισινέ διαφορετική. Ο Ιακώβ βακερντάς σο κα αβέλας-πες κο μέλλον. Ι Ιεχωβάσκε βοηθειάσαρ, ο Ιακώβ βακερντάς πι τσσαβένγκε σημαντικά πράγματα σο κα αβένας-πες κο μέλλον λένγκε ντα λένγκε φαμιλίνγκε. Οτθάρ βακεράσα ότι ο λάφια σο βακερντάς ο Ιακώβ ισινέ εκ προφητεία σο βακερντάς πριν τι μερέλ.

4. Σο βακερντάς ο Ιακώβ ντα σο μπορίνασα τι σικλιάς λέσκε λαφίνταρ; (Ντικχέν ο πλαίσιος-ντα «Η Φαμιλί του Ιακώβ»)

⁴ Κο μάθημας ανταβά, κα ντικχάς σο βακερντάς ο Ιακώβ πι πρώτε σταρέ τσσαβέντε: κο Ρουβήν, κο Συμεών, κο Λευί ντα κο Ιούδας. Κο γιαβέρ μάθημας, κα ντικχάς σο βακερντάς ο Ιακώβ πι γιαβερέ οχτώ τσσαβέντε. Σαρ κα ντικχάς, ο Ιακώβ να κερντάς λάφι σάντε πι τσσαβένγκε αλλά λένγκε προσαγγονίνγκε-ντα. Κο μέλλον, ανταλά προσάγγονα κα αβένας τελικά ο λαός Ισραήλ. Άμα κα ντικχάς σο αβιλό-πες κο λαός Ισραήλ, κα σικλιάς σαρ ο λάφια του Ιακώβ νικίστιλε μπαγιά. Ντα άμα κα σκεφτίνας πο λατσσές λέσκε λάφια, κα σικλιάς μπουτ σημαντικά πράγματα σο κα βοηθίνεν-αμέν τι κεράς ο γκι αμαρέ Νταντέσκο, ι Ιεχωβάσκο.

ΡΟΥΒΗΝ

5. Σο μπορεί τι μπεκλεντίνελας ο Ρουβήν τι λελ πι νταντέσταρ;

⁵ Ο Ιακώβ κερντάς λάφι πρώτα κο Ρουβήν. Βακερντάς: «Τούι ισινάν μο πρώτος τσσαβό». (Γέν. 49:3) Οτθάρ ο Ρουβήν μπεκλεντίνελας τι λελ πο μπαρί κληρονομιά πι νταντέσταρ απ’ ότι λέσκε πφραλά. Κάτι γιαβέρ σο μπορεί τι μπεκλεντίνελας ισινέ τι αβέλ ο σορό κι φαμιλί κάνα κα μερέλας λέσκο ντατ. Επίσης, μπέκιμ τι μπεκλεντίνελας ότι κάποιος λέσκε προσαγγονίνταρ κα οδηγίνελας πάντα σαρί ι φαμιλί.

6. Σόσκε ο Ρουβήν να λιντάς ι κληρονομιά σο έπρεπε τι λελ επειδή ισινέ ο πρώτος τσσαβό; (Γένεση 49:3, 4)

⁶ Όμως, ο Ρουβήν χασαρντάς ι κληρονομιά σο κα λέλας επειδή ισινέ ο πρώτος τσσαβό. (1 Χρον. 5:1) Σόσκε; Μερικά μπρεσά πο τζανγκλέ ο Ρουβήν σοτάς με τη Βαλλά σο ισινέ παλλακίδα λέσκε νταντέσκι. Ισινέ η υπηρέτρια σο τθερέλας λέσκι αγαπημέ ρομνί, η Ραχήλ, σο μουλίας. (Γέν. 35:19, 22) Ο Ρουβήν ισινέ ο τσσαβό ι γιαβερέ ρομνιάκο σο τθερέλας ο Ιακώβ, της Λείας. Άρα μπορεί τι σοτάς με τη Βαλλά για τι κερέλ τον Ιακώβ τι μανγκέλ πο μπουτ λέσκε νταγιά ντα όχι τη Βαλλά. Ή μπορεί τι μπεϊντιντάς αζόμ μπουτ τη Βαλλά σο ναστί ατσσικιαρέλας πο νεαυτός. Καβά-ντα τι αβέλας ο λόγος, οντουβά σο κερντάς πφανγκλάς ο γκι ι Ιεχωβάσκο εμ λέσκε νταντέσκο.​—Διαβάνεν Γένεση 49:3, 4.

7. Σο αβιλό-πες κο Ρουβήν ντα κο προσάγγονα λέσκε; (Ντικχέν ο πλαίσιος-ντα «Η Προφητεία σο Βακερντάς ο Ιακώβ Πριν τι Μερέλ»)

⁷ Ο Ιακώβ βακερντάς κο Ρουβήν: «Να κα τθερές μπαρί θέση». Ανταλά λάφια νικίστιλε μπαγιά. Η Γραφή να βακερέλα πουθενά ότι κάποιος προσάγγονος του Ρουβήν αβιλό βασιλιάς, ιερέας, ή προφήτης. Όμως ο Ιακώβ ντινάς εκ κληρονομιά κο Ρουβήν, ντα αντικάς η φαμιλί του Ρουβήν αβιλί εκ κατά φάρες του Ισραήλ. (Ιησ. Ναυή 12:6) Ο Ρουβήν σικαντάς ότι τθερέλας σουκάρ ιδιότητες γιαβερά φορές, ντα να ντικχίντιβελα ότι κερντάς ποτές πάλι λουμνιπέ.​—Γέν. 37:20-22· 42:37.

8. Σο σικλιάσα κατά παράδειγμας του Ρουβήν;

⁸ Σο σικλιάσα; Χρειαζίντιβελα τι μαράς-αμέν για τι ατσσικιαράς αμαρό νεαυτός ντα τι νασάς ντουρ κατά λουμνιπέ. Άμα κα αβέλ αμένγκε ποτές η επιθυμία τι κεράς εκ αμαρτία, πρέπει τι σταματίνας ντα τι σκεφτίνας σαρ οντουλά σο κα κεράς κα πφανγκέν ο γκι ι Ιεχωβάσκο, αμαρέ φαμιλιάκο ντα γιαβερένγκο. Πρέπει επίσης τι τθεράς αμαρέ γκοντιάτε ότι «σο σπειρίνελα ο τζενό, οντουβά κα γκίντελ». (Γαλ. 6:7) Οκιά μπάνταρ, οντουβά σο αβιλό-πες κο Ρουβήν ανέλα αμαρέ γκοντιάτε καζόμ μπουτ συγχωρίνελα ο Ιεχωβά. Μπορεί ατζέκ τι τσσίντασα μπουτ ιτιρί κατά λάθη σο κερντάμ, όμως άμα μετανιωσάλαμ ντα μαράσα-αμέν τι κεράς ο σωστός, ο Ιεχωβά κα συγχωρίνελ-αμέν ντα κα ευλογίνελ-αμέν.

ΣΥΜΕΩΝ ΝΤΑ ΛΕΥΙ

9. Σόσκε ο Ιακώβ να ισινέ ευχαριστιμέ με τον Συμεών ντα τον Λευί; (Γένεση 49:5-7)

⁹ Διαβάνεν Γένεση 49:5-7. Σοράν, ο Ιακώβ κερντάς λάφι κο Συμεών ντα κο Λευί. Όμως, οντουλά σο βακερντάς σικαβένα ότι να ισινέ ευχαριστιμέ λέντζαρ. Μπουτ μπρεσά πο τζανγκλέ, εκ μουρς σο βακερένας λέσκε Συχέμ ντα ισινέ κατά Χαναάν σοτάς ζορίσαρ ι τσσαγιάσαρ σο τθερέλας ο Ιακώβ, με την Δείνα. Σαρ αγαβάσα, σαρέ ο τσσαβέ του Ιακώβ ισινέ μπουτ χολιαμέ ανταλέσκε σο αβιλό-πες. Όμως ο Συμεών ντα ο Λευί να μπορισάλε τι ατσσικιαρέν πουμαρί χολί. Βακερντέ ψέματα κο Συχέμ ντα λέσκε μουρσέντε ότι κα κερένας λέντζαρ ειρήνη, άμα ο μουρσά του Συχέμ κα κερένας περιτομή. Ο μουρσά συμφωνιντέ ντα κερντέ περιτομή. Καζόμ ατζέκ ανταλά μουρσά ντουκχάνας κατά περιτομή, ο Συμεών ντα ο Λευί «λιντέ ο κάθε εκ πουμαρό σπαθίς, ντα ντινέ αντρέ κι πόλη χωρίς τι μπεκλεντίνεν-λες ο γιαβερά ντα μουνταρντέ σαρέ ι μουρσέν».​—Γέν. 34:25-29.

10. Σαρ νικίστιλε μπαγιά ο προφητικά λάφια σο βακερντάς ο Ιακώβ για τον Συμεών ντα τον Λευί; (Ντικχέν ο πλαίσιος-ντα «Η Προφητεία σο Βακερντάς ο Ιακώβ Πριν τι Μερέλ»)

¹⁰ Ο Ιακώβ ισινέ μπουτ χολιαμέ σο λέσκε ντούι τσσαβέ μουνταρντέας αζόμ μπουτ τζενέν. Βοβ βακερντάς λένγκε ότι η πφουβ σο κα λένας σαρ κληρονομιά κα αβέλας διαφορετικέ τθανέντε αντρέ κο Ισραήλ. Ανταλά προφητικά λάφια νικίστιλε μπαγιά σοράν από 200 μπρεσά κάνα ο λαός Ισραήλ ντινάς αντρέ κο Υποσχεμέ Τθεμ. Η φάρα του Συμεών λιντάς σαρ κληρονομιά τθανά σο ισινέ τρουγιμέ αντρέ κο Ιούδας. (Ιησ. Ναυή 19:1) Ντα η φάρα του Λευί λιντάς σαρ κληρονομιά 48 πόλεις σο ισινέ τρουγιμέ αντρέ κο Ισραήλ.​—Ιησ. Ναυή 21:41.

11. Καλά λατσσέ πράγματα κερντέ η φάρα του Συμεών ντα η φάρα του Λευί;

¹¹ Ο προσάγγονα του Συμεών ντα του Λευί να κερντέ ο λάθη σο κερντέας λένγκε νταντά. Η φάρα του Λευί σικαντάς μπαρί αφοσίωση κι αληθινή λατρεία. Κάνα ο Μωυσής γκιλό κο βες Σινά για τι λελ ο νόμος κατά Ιεχωβά, μπουτ Ισραηλίτες ντινέ λατρεία σε εκ μοσχάρι. Αλλά ο Λευίτες να δεχτιντέ τι ντεν λατρεία εκχέ ψεύτικε Ντεβλέστε. Οκιά μπάνταρ, πο σοράν βον βοηθιντέ τον Μωυσή για τι εξαφανίντιβεν οντουλά σο ντινέ λατρεία κο μοσχάρι. (Έξοδ. 32:26-29) Ο Ιεχωβά τραμπιντάς μουρσέν κατά φάρα του Λευί για τι αβέν ιερείς κο Ισραήλ. (Έξοδ. 40:12-15· Αριθ. 3:11, 12) Ντα πο σοράν, η φάρα του Συμεών βοηθιντάς ι φάρα του Ιούδα για τι πολεμίνεν ι Χαναναιόν ντα αντικάς τι λεν ο Υποσχεμέ Τθεμ.​—Κριτ. 1:3, 17.

12. Σο σικλιάσα κατά παράδειγμας του Συμεών ντα του Λευί;

¹² Σο σικλιάσα; Μα τι μουκχάς ποτές αμαρί χολί τι κερέλ-αμέν κουμάντος. Άμα εκ τζενό πληγωντάς αμέν ή εκχές αμαρέ αγαπημέ τζενένταρ, ισί λογικός τι χολιάνας. (Ψαλμ. 4:4) Πρέπει όμως τι ντας-αμέν γκοντί ότι να κα κεράς ι Ιεχωβάσκο γκι άμα κα βακεράς ή κα κεράς κάτι για τι ντουκχαβάς οντουλέν σο πληγωντέ-αμέν. (Ιακ. 1:20) Κάνα εκ τζενό πληγώνελα-αμέν, είτε υπηρετίνελα ι Ιεχωβάς είτε όχι, αμέν συμπεριφερίντιβασα λέσκε εκχέ τροπόσαρ σο κερέλα ο γκι ι Ιεχωβάσκο. Ανταβά κα βοηθίνελ-αμέν μα τι βακεράς ή τι κεράς κάτι σο κα κερέλ ζιάνι ι γιαβερένγκε. (Ρωμ. 12:17, 19· 1 Πέτρ. 3:9) Ατζέ-ντα άμα τουμαρό ντατ ή τουμαρί ντάι κερένα πράγματα σο ισί μπέτι κι Ιεχωβάσκε γιακχά, τι ντεν-τουμέν γκοντί ότι μπορίνενα τι τραμπίνεν μα τι ακολουθίνεν λένγκο παράδειγμας. Μα σκεφτίνεν ότι να αβέλα-πες τι κερέν ο γκι ι Ιεχωβάσκο. Ο Ιεχωβά κα βοηθίνελ-τουμέν τι κερέν ο σωστός ντα κα ευλογίνελ-τουμέν ανταλέσκε.

ΙΟΥΔΑΣ

13. Σόσκε μπορεί τι ανησυχίνελας ο Ιούδας για το λάφια σο κα ασουνέλας πι νταντέσταρ;

¹³ Σοράν ο Ιακώβ κερντάς λάφι πι γιαβερέ τσσαβέστε, κο Ιούδας. Κάνα ασουντάς ο λάφια σο βακερντάς ο Ιακώβ λέσκε πο μπαρέ πφραλέντε, ο Ιούδας μπορεί τι ανησυχίνελας. Βοβ-ντα κερντάας κάποια σοβαρά λάθη. Κάνα ο Συμεών ντα ο Λευί μουνταρντέ ι μουρσέν σο τθερέλας η πόλη Συχέμ, ο Ιούδας γκιλό γιεκ πι γιαβερέ πφραλέντζαρ κι πόλη ντα λιντάς σαρέ ο πράγματα ι τζενένγκε. (Γέν. 34:27) Γιεκ πι πφραλέντζαρ μπικιντέ τον Ιωσήφ σαρ δούλος ντα βακερντέ ψέματα πουμαρέ νταντέσκε ανταλέσκε. (Γέν. 37:31-33) Πο σοράν, αφού μουλό λέσκο τσσαβό, ο Ιούδας σοτάς πι μποριάσαρ, με τη Θάμαρ. Κερντάς-λες ανταβά επειδή να αγαντάας ότι ισινέ λέσκι μπορί, αλλά αμντισάλο ότι ισινέ εκ πόρνη.​—Γέν. 38:15-18.

14. Καλά λατσσέ πράγματα κερντάς ο Ιούδας; (Γένεση 49:8, 9)

¹⁴ Όμως ο Ιακώβ σάντε ισαρντάς τον Ιούδα ντα ντινάς πο λάφι ότι κα αβένας λατσσέ πράγματα λέσκε ντα λέσκε φαμιλιάτε. (Διαβάνεν Γένεση 49:8, 9) Ο Ιούδας σικαντάς ότι πφαμπόλας μπουτ πι πφουρέ νταντέσκε. Επίσης σικαντάς ότι πφαμπόλας πι τερνέ πφραλέσκε-ντα, για τον Βενιαμίν.​—Γέν. 44:18, 30-34.

15. Σαρ ευλογισάλο ο Ιούδας;

¹⁵ Ο Ιακώβ βακερντάς ότι ο Ιούδας κα αβέλας οντουβά σο κα οδηγίνελας πι πφραλέν. Όμως ανταγιά προφητεία νικίστιλι μπαγιά σοράν από μπουτ καιρός. Σοράν από περίπου 200 μπρεσά, κάνα ο Ισραηλίτες νασλέ κατά Αίγυπτος ντα πφιρένας αντρέ κι έρημος για τι ερεσέν κο Υποσχεμέ Τθεμ, η φάρα του Ιούδα πφιρέλας ανγκλάλ ντα ο γιαβερά φάρες ακολουθίνενας-λα. (Αριθ. 10:14) Μπουτ μπρεσά πο σοράν, ο Ιεχωβά διοριντάς ι φάρα του Ιούδα τι τζαλ πρώτη τι πολεμίνελ ι Χαναναιόν για τι ντεν ο Ισραηλίτες αντρέ κο Υποσχεμέ Τθεμ. (Κριτ. 1:1, 2) Ντα ο Δαβίδ ισινέ ο πρώτος κατά μπουτ βασιλιάδες σο αστάρντιβενας κατά Ιούδας. Όμως ανταγιά προφητεία νικίστιλι μπαγιά γιαβερέ-ντα τροπόντζαρ.

16. Σαρ νικίστιλι μπαγιά η προφητεία σο ισί κο εδάφιος Γένεση 49:10; (Ντικχέν ο πλαίσιος-ντα «Η Προφητεία σο Βακερντάς ο Ιακώβ Πριν τι Μερέλ»)

¹⁶ Ο Ιακώβ βακερντάς ότι οντουβά σο κα κυβερνίνελας για πάντα σαρέ ι τζενέν κα αβέλας κατά προσάγγονα του Ιούδα. (Διαβάνεν Γένεση 49:10) Οντουβά σο κα κυβερνίνελ ισί ο Ιησούς Χριστός, σο ο Ιακώβ ντινάς-λες ο ναβ Σηλώ. Εκ άγγελος βακερντάς: «Ο Ιεχωβά Ντεβέλ κα ντελ [κο Ιησούς] ο θρόνος ι Δαβιδίσκο λέσκε νταντέσκο». (Λουκ. 1:32, 33) Επίσης, ο Ιησούς ισί «ο Λιοντάρι κατά φάρα ι Ιουδάσκι».​—Αποκ. 5:5.

17. Σαρ μπορίνασα τι μοιάζας κο Ιεχωβά κο τρόπος σο ντικχάσα ι γιαβερέν;

¹⁷ Σο σικλιάσα; Ο Ιεχωβά ευλογιντάς τον Ιούδα παρόλο σο κερντάας κάποια σοβαρά λάθη. Όμως, ο πφραλά του Ιούδα μπορεί τι σκεφτίνενας σόσκε ο Ιεχωβά ευλογιντάς-λες; Να τζανάσα σο μπορεί τι σκεφτίνενας, αλλά οντουβά σο τζανάσα ισί ότι ο Ιεχωβά ντικχλάς κάτι λατσσό κο Ιούδας ντα ευλογιντάς-λες ανταλέσκε. Σαρ μπορίνασα τι μοιάζας κο Ιεχωβά; Κάνα εκ τζενό λέλα εκ προνόμιος, μπορεί κι αρχή μα τι αγαβάς σόσκε ντιντιλό-λες ειδικά άμα τζανάσα λέσκε ατέλειες. Αλλά πρέπει τι ντας-αμέν γκοντί ότι ο Ιεχωβά σίγουρα χαιρίνελα κάνα ντικχέλα ο λατσσέ ιδιότητες αμαρέ πφραλένγκε. Ο Ιεχωβά ρόντελα ο λατσσιπέ πι υπηρετόντε. Πρέπει τι μαράς-αμέν τι κεράς αμέν-ντα ο ίδιος.

18. Σόσκε χρειαζίντιβελα τι κεράς υπομονή;

¹⁸ Κάτι γιαβέρ σο σικλιάσα κατά Ιούδας ισί ότι χρειαζίντιβελα τι κεράς υπομονή. Ο Ιεχωβά πάντα κερέλα τι νικιόν μπαγιά λέσκε υποσχέσεις. Όμως να κερέλα-λες πάντα με το τρόπος ή κο σαάτι σο μανγκάσα αμέν. Ο προσάγγονα ι Ιουδάσκε να αρχισάλε αμέσως τι οδηγίνεν ι Ντεβλέσκε λαός. Όμως βον υποστηρίνενας πιστά οντουλέν σο τραμπίνελας ο Ιεχωβά για τι κερέν-λες ανταβά. Μερικοί ανταλένταρ ισινέ ο Μωυσής σο ισινέ κατά φάρα του Λευί, ο Ιησούς του Ναυή σο ισινέ κατά φάρα του Εφραΐμ ντα ο βασιλιάς Σαούλ σο ισινέ κατά φάρα του Βενιαμίν. Πρέπει αμέν-ντα τι υποστηρίνας καλέ-ντα τζενές ο Ιεχωβά τραμπίνελα για τι οδηγίνελ-αμέν αντιβές.​—Εβρ. 6:12.

19. Σο σικλιάσα ι Ιεχωβάσκε κατά προφητεία σο βακερντάς ο Ιακώβ πριν τι μερέλ;

¹⁹ Σο σικλιλάμ κατά τελευταία λάφια σο βακερντάς ο Ιακώβ πι πρώτε σταρέ τσσαβένγκε; Αγαντάμ ξεκάθαρα ότι «ο τζενό να ντικχέλα σαρ ο Ντεβέλ». (1 Σαμ. 16:7) Ο Ιεχωβά κερέλα μπαρί υπομονή ντα συγχωρίνελα μπουτ. Βοβ να μπεϊντίνελα κάνα κεράσα μπέτι πράγματα. Όμως να μπεκλεντίνελα-ντα τι αβάς τέλειοι. Μπορίνελα ατζέ-ντα τι ευλογίνελ τζενέν σο πο τζανγκλέ κερντέ σοβαρά λάθη, άμα βον μετανιωσάλε αντράλ πουμαρέ γκίσταρ ντα μαρένα-πες τι κερέν ο σωστός. Κο γιαβέρ μάθημας, κα ντικχάς σο βακερντάς ο Ιακώβ πι γιαβερέ οχτώ τσσαβένγκε.