Βοηθίνεν ι Τζενέν σο Κερένα-λεν Μελέτη τι Λεν ι Απόφαση τι Υπηρετίνεν ι Ιεχωβάς

1, 2. (α) Σόσκε μερικά τζενέ σακιντίνενα τι λεν ι απόφαση τι υπηρετίνεν ι Ιεχωβάς; (β) Σο κα ντικχάς ανταλέ μαθημάστε;

ΜΗΠΩΣ σακιντίνενας τι αβέν Μάρτυρες ι Ιεχωβάσκε; Μπορεί τι νταρένας ότι τουμαρέ συμμαθητές, τουμαρέ αμαλά ή τουμαρέ τζενέ κα τζάνας τουμέντζαρ κόντρα. Ή μπορεί τι νιωθίνενας ότι ποτές να κα μπορίνεν τι ντεν καν ι Ιεχωβάς σαρέ κο πράγματα. Άμα νιωθίνενας αντικάς, μπορίνενα τι αγαβέν σαρ νιωθίνενα μερικά τζενέ σο κερένα μελέτη ντα σόσκε ισί λένγκε δύσκολος τι λεν ι απόφαση τι αβέν Μάρτυρες ι Ιεχωβάσκε.

² Ο Ιησούς τζανέλας ότι ασακέ πράγματα κα μπορίνενας τι κερέν εκχέ τζενές μα τι αποφασίνελ τι υπηρετίνελ ι Ιεχωβάς. (Ματθ. 13:20-22) Αλλά βοβ συνεχίνελας τι βοηθίνελ ι τζενέν σο σακιντίνενας τι ακολουθίνεν-λες. Εκτός ανταλέσταρ, σικαντάς πι μαθητένγκε-ντα σαρ τι βοηθίνεν ασακέ τζενέν (1) τι αγαβέν σο κερέλα-λεν μα τι αποφασίνεν τι υπηρετίνεν ι Ιεχωβάς, (2) τι μπαριαρέν πουμαρί αγάπη ι Ιεχωβάσκε, (3) τι τσσουβέν ι Ιεχωβάς πρώτα πουμαρέ ζωγιάτε, ντα (4) τι νακχαβέν πουμαρέ δυσκολίες. Σαρ μπορίνασα τι σικλιαράς σαρ ο Ιησούς καζόμ χρησιμοποιήνασα ο βιβλίος Μπουτ Σουκάρ Ζωή για Πάντα! για τι βοηθίνας εκχέ τζενές τι λελ ι απόφαση τι υπηρετίνελ ι Ιεχωβάς;

ΒΟΗΘΙΝΕΝ-ΛΕΝ ΤΙ ΑΓΑΒΕΝ ΣΟ ΤΣΣΙΝΑΒΕΛΑ-ΛΕΝ ΤΙ ΤΡΑΜΠΙΝΕΝ ΤΙ ΥΠΗΡΕΤΙΝΕΝ Ι ΙΕΧΩΒΑΣ

3. Σο μπορεί τι τσσιναβέλας ι Νικοδημός τι αβέλ μαθητής ι Ιησούσκο;

³ Ο Νικόδημος ισινέ εκ σημαντικός κυβερνήτης ι Ιουδαιόνγκε. Αλλά υπαρχίντιβελας κάτι σο δυσκολίνελας-λες τι τραμπίνελ τι ακολουθίνελ ι Ιησούς. Σάντε σιοβ μασεκά αφού ο Ιησούς ξεκινισάλο πο έργος, ο Νικόδημος αγαντάς ότι ο Ιησούς μπουτσσάντιλοας κατά Ντεβέλ. (Ιωάν. 3:1, 2) Όμως ο Νικόδημος τραμπιντάς τι συναντίνελ ι Ιησούς αποτσοράλ επειδή “νταρέλας κατά Ιουδαίοι”. (Ιωάν. 7:13· 12:42) Μπορεί τι σκεφτίνελας ότι κα χασαρέλας μπουτ πράγματα άμα κα αβέλας μαθητής ι Ιησούσκο.a

4. Σαρ βοηθιντάς ο Ιησούς ι Νικοδημός τι αγαβέλ σο μπεκλεντίνελας λέσταρ ο Ντεβέλ;

⁴ Ο Νικόδημος τζανέλας ο Νόμος, αλλά χρειαζίντιβελας βοήθεια για τι αγαβέλ σο μπεκλεντίνελας λέσταρ ο Ιεχωβά. Σαρ βοηθιντάς-λες ο Ιησούς; Ο Ιησούς ντινάς πι σαατίσταρ κο Νικόδημος για τι συναντίνελ-λες ντα τι κερέλ λέσαρ λάφι αντρέ κι ιράτ. Ντα ο Ιησούς βακερντάς ξεκάθαρα κο Νικόδημος σο έπρεπε τι κερέλ για τι αβέλ μαθητής. Έπρεπε τι μετανιώνελ πι αμαρτιένγκε, τι μπολντιόλ αντρέ κο πανί ντα τι σικαβέλ πίστη κο τσσαβό κι Ντεβλέσκο.​—Ιωάν. 3:5, 14-21.

5. Σαρ μπορίνασα τι βοηθίνας εκχέ τζενές τι αγαβέλ σο τσσιναβέλα-λες τι υπηρετίνελ ι Ιεχωβάς;

⁵ Ατζέ-ντα άμα ο τζενό τζανέλα ι Γραφή, μπορεί τι χρειαζίντιβελα βοήθεια για τι αγαβέλ σο τσσιναβέλα-λες τι υπηρετίνελ ι Ιεχωβάς. Για παράδειγμας, λέσκι μπουτί μπορεί τι λέλα λέσταρ μπουτ χρόνος, ή λέσκι φαμιλί μα τι μανγκέλα τι αβέλ Μάρτυρας ι Ιεχωβάσκο. Οτθάρ σαρ ο Ιησούς, ντεν τουμαρέ σαατίσταρ κο τζενό για τι βοηθίνεν-λες. Μπορίνενα τι καλίνεν-λες τι πιν εκ καφές ή τι τζαν τουμένγκε βόλτα. Κάνα κερένα ασακέ πράγματα γιεκ, μπορεί τι αβέλ λέσκε πο εύκολος τι πουτρέλ-πες τουμένγκε για το δυσκολίες σο νακχέλα. Ενθαρρύνεν ι τζενές τι κερέλ ο αλλαγές σο χρειαζίντιβενα, όχι για τι κερέλ τουμαρό γκι, αλλά για τι σικαβέλ πι αγάπη ι Ιεχωβάσκε.

6. Σαρ μπορίνενα τι βοηθίνεν εκχέ τζενές τι αρακχέλ ο θάρρος τι κερέλ πι ζωγιάτε οντουλά σο σικλιόλα; (1 Κορινθίους 16:13)

⁶ Κάνα εκ τζενό ισί σίγουρος ότι ο Ιεχωβά κα βοηθίνελ-λες τι κερέλ ο σωστός, κα τθερέλ ι ζορ τι κερέλ πι ζωγιάτε οντουλά σο σικλιόλα. (Διαβάνεν 1 Κορινθίους 16:13) Οντουβά σο κερένα μοιάζελα οντουλέσαρ σο κερέλα εκ δάσκαλος κο σχολείος. Αζομάν σο τζάνας σχολείος, καλέ δασκαλός μπεϊντίνενας; Σίγουρα μπεϊντίνενας ανταλέ δασκαλός σόσκε βοηθιντάς-τουμέν με υπομονή τι πακιάν ότι μπορίνενα τι κερέν οντουλά σο χρειαζίντιβελας τι κερέν. Αμέν-ντα κάνα σικλιαράσα ι τζενέν κατά Γραφή, ισινάμ σαρ δάσκαλοι. Εκ λατσσό δάσκαλος να σικλιαρέλα εκχέ τζενές απλά σο μανγκέλα λέσταρ ο Ντεβέλ τι κερέλ. Αλλά ο λατσσό δάσκαλος βοηθίνελα-λες επίσης τι αβέλ σίγουρος ότι μπορίνελα τι κερέλ-λες επειδή ο Ιεχωβά βοηθίνελα-λες. Σαρ μπορίνενα τι κερέν-λες ανταβά;

ΒΟΗΘΙΝΕΝ-ΛΕΝ ΤΙ ΜΠΑΡΙΑΡΕΝ ΠΟΥΜΑΡΙ ΑΓΑΠΗ Ι ΙΕΧΩΒΑΣΚΕ

7. Σαρ βοηθιντάς ο Ιησούς ι τζενέν τι μπαριαρέν πουμαρί αγάπη ι Ιεχωβάσκε;

⁷ Ο Ιησούς τζανέλας ότι η αγάπη ι Ντεβλέσκε κα τσσίντελας λέσκε μαθητέν τι κερέν πουμαρέ ζωγιάτε οντουλά σο σικλιλέας. Μπουτ φαρ σικλιαρέλας-λεν πράγματα σο κα βοηθίνενας-λεν τι μπαριαρέν πουμαρί αγάπη πουμαρέ Νταντέσκε σο ισί κο ουρανός. Για παράδειγμας, βακερντάς ότι ο Ιεχωβά ισί σαρ εκ ντατ σο ντέλα λατσσέ πράγματα πι τσσαβέντε. (Ματθ. 7:9-11) Μερικά κατά τζενέ σο ασουνένας ι Ιησούς μπορεί μα τι τθερένας εκχέ ασακέ λατσσέ νταντές. Για τι βοηθίνελ-λεν τι αγαβέν-λες ανταβά, ο Ιησούς βακερντάς λένγκε εκ παράδειγμας. Βακερντάς λένγκε ι ιστορία εκχέ τσσαβέσκι σο νασλόας πι νταντέσκε κχερέσταρ για τι κερέλ πι ζωή, αλλά λέσκο ντατ δεχτιντάς-λες παλάλ λατσσιμάσαρ. Σο σουκάρ πρέπει τι νιωσάλε κάνα ασουντέ-λες ανταβά! Ακανά μπορίνενας τι ντικχέν ότι ο Ιεχωβά μανγκέλα μπουτ πι τσσαβέν κι πφουβ ντα μανγκέλα τι βοηθίνελ-λεν.​—Λουκ. 15:20-24.

8. Σαρ μπορίνενα τι βοηθίνεν εκχέ τζενές τι μπαριαρέλ πι αγάπη ι Ιεχωβάσκε;

⁸ Τουμέν-ντα μπορίνενα τι βοηθίνεν ι τζενές τι μπαριαρέλ πι αγάπη ι Ιεχωβάσκε κάνα βακερένα λέσκε καζόμ σουκάρ ιδιότητες τθερέλα ο Ιεχωβά. Κάθε φαρ σο κερένα μελέτη, βοηθίνεν ι τζενές τι αγαβέλ σαρ οντουλά σο σικλιλό σικαβένα ότι ο Ιεχωβά μανγκέλα-αμέν. Κάνα κερένα λάφι για το λύτρος, βοηθίνεν ι τζενές τι αγαβέλ ότι ο Ιεχωβά κερντάς ανταγιά θυσία, όχι απλά επειδή μανγκέλα σαρέ ι τζενέν, αλλά επίσης επειδή μανγκέλα λες προσωπικά. (Ρωμ. 5:8· 1 Ιωάν. 4:10) Κάνα εκ τζενό αγαβέλα καζόμ μπουτ μανγκέλα-λες ο Ιεχωβά προσωπικά, ανταβά μπορίνελα τι βοηθίνελ-λες τι μανγκέλ ι Ιεχωβάς ατζέ πο μπουτ.​—Γαλ. 2:20.

9. Σο βοηθιντάς εκχέ τζενές σο βακέρντιβελα Μάικλ τι κερέλ αλλαγές πι ζωγιάτε;

⁹ Σκεφτίνεν ι ιστορία του Μάικλ κατά Ινδονησία. Τζανέλας ι αλήθεια χουρντιαρέλα αλλά να μπολντιλόας. Κάνα αβιλό 18 μπρεσένγκο, γκιλό εκχέ γιαβερέ τθεμέστε για τι κερέλ μπουτί σαρ φορτηγατζής. Πο σοράν παντρισάλο αλλά μουκχλάς πι φαμιλί παλάλ για τι συνεχίνελ ι μπουτί εκχέ γιαβερέ τθεμέστε. Αζομάν, λέσκι ρομνί ντα λέσκι τσσάι αρχισάλε τι κερέν μελέτη κατά Γραφή ντα τι εφαρμόνεν πουμαρέ ζωγιάτε οντουλά σο σικλιόνας. Αφού μουλί λέσκι ντάι, ο Μάικλ αποφασιντάς τι βουρτίνελ κχερέ για τι φροντίνελ πι νταντές ντα δεχτιντάς βοβ-ντα τι κερέλ μελέτη. Κάνα ντικχλάς πι μελετιάτε ο «Χάντζουβ πο Αχόρτ» κατά μάθημας 27 κο βιβλίος Μπουτ Σουκάρ Ζωή για Πάντα!, ο Μάικλ συγκινισάλο. Κάνα σικλιλό καζόμ μπουτ ντουκχασάλο ο Ιεχωβά σο ντικχλάς πι τσσαβές τι βασανίντιβελ, ο Μάικλ αρχισάλο τι ροβέλ. Ντα κάνα αγαντάς καζόμ μπουτ μανγκέλα-λες ο Ιεχωβά ντα ο Ιησούς πφερντιλό εκτίμηση, κερντάς αλλαγές πι ζωγιάτε ντα μπολντιλό.

ΒΟΗΘΙΝΕΝ-ΛΕΝ ΤΙ ΤΣΣΟΥΒΕΝ ΠΡΩΤΑ ΠΟΥΜΑΡΕ ΖΩΓΙΑΤΕ Ι ΙΕΧΩΒΑΣ

10. Σαρ βοηθιντάς ο Ιησούς πι πρώτε μαθητέν τι κερέν αλλαγές για τι υπηρετίνεν πο μπουτ ι Ιεχωβάς; (Λουκάς 5:5-11) (Ντικχέν ι φωτογραφία-ντα)

¹⁰ Ο πρώτοι μαθητές αγαντέ σουγκό ότι ο Ιησούς ισινέ ο Μεσσίας. Αλλά χρειαζίντιβενας βοήθεια για τι αγαβέν ότι έπρεπε τι κερέν έργος αντράλ πουμαρέ γκίσταρ για τι υπηρετίνεν ι Ιεχωβάς. Ο Πέτρος ντα ο Ανδρέας ισινέ ήδη μαθητές για κάποιος βακίτι κάνα ο Ιησούς βακερντάς λένγκε τι μουκχέν-λεν σαρέ ντα τι τζαν παλά-λέστε. (Ματθ. 4:18, 19) Βον-ντα, σαρ ο Ιάκωβος ντα ο Ιωάννης, ισινέ ψαράδες ντα λένγκι μπουτί τζάλας λατσσές. (Μάρκ. 1:16-20) Κάνα ο Πέτρος ντα ο Ανδρέας «μουκχλέ . . . πουμαρέ δίχτυα», σίγουρα αρακχλέ εκ τρόπος-ντα για τθερέλ λένγκι φαμιλί οντουλά σο χρειαζίντιβελας καζόμ βον ακολουθίνενας ι Ιησούς. Σο βοηθιντάς-λεν τι τσσουβέν πρώτα πουμαρέ ζωγιάτε ο έργος ντα όχι ο λοβέ; Ο Ιησούς κερντάς εκ θαύμας για τι σικαβέλ λένγκε ότι ο Ιεχωβά μπορίνελας τι ντελ-λεν ο αναγκαία σο-ντα τι αβέλας-πες. Ανταβά βοηθιντάς-λεν τι αβέν σίγουροι ότι ο Ιεχωβά πάντα κα ντέλας-λεν οντουλά σο χρειαζίντιβενας άμα κα τσσουβένας πρώτα Λες.​—Διαβάνεν Λουκάς 5:5-11.

11. Σαρ μπορίνασα τι χρησιμοποιήνας αμαρέ εμπειρίες για τι μπαριαράς ι τζενέσκι πίστη;

¹¹ Ναστί κεράσα θαύματα σαρ ο Ιησούς, αλλά μπορίνασα τι βακεράς εμπειρίες σο σικαβένα σαρ ο Ιεχωβά βοηθίνελα οντουλέν σο τσσουβένα πρώτα Λες πουμαρέ ζωγιάτε. Για παράδειγμας, ντένα-τουμέν γκοντί σαρ ο Ιεχωβά βοηθιντάς-τουμέν κάνα αρχισάλεν τι τζαν κο συναθροίσεις; Μπορεί τι χρειαζίντιβελας τι κερέν λάφι τουμαρέ αφεντικόσαρ ντα τι εξηγίνεν λέσκε σόσκε να μπορίνενα τι μπεσέν πο μπουτ σαάτια κι μπουτί κο ντιβεσά σο τθερένα συνάθροιση. Καζόμ βακερένα τουμαρέ εμπειρίες κο τζενό, εξηγίνεν λέσκε σαρ μπαριλί τουμαρί πίστη καζόμ ντικχένας ι Ιεχωβάς τι υποστηρίνελ τουμαρί απόφαση τι τσσουβέν πρώτα Λες τουμαρέ ζωγιάτε.

12. (α) Σόσκε πρέπει τι καλίνας διαφορετικέ πφραλέν ντα πφενίν σε εκ μελέτη; (β) Σαρ μπορίνενα τι χρησιμοποιήνεν ο βίντεα για τι σικλιαρέν ι τζενές τι τσσουβέλ ι Ιεχωβάς πρώτα πι ζωγιάτε; Βακερέν εκ παράδειγμας.

¹² Κάτι γιαβέρ σο κα βοηθίνελ ι τζενές, ισί τι ασουνέλ εμπειρίες γιαβερέ πφραλένγκε ντα πφενίνγκε σο κερντέ αλλαγές πουμαρέ ζωγιάτε για τι τσσουβέν πρώτα ι Ιεχωβάς. Οτθάρ καλίνεν μπουτέ διαφορετικέ πφραλέν ντα πφενίν για τι αβέν τουμέντζαρ κι μελέτη. Μανγκέν λένταρ τι εξηγίνεν σαρ αβιλέ κι αλήθεια ντα σο κερντέ για τι τσσουβέν πρώτα πουμαρέ ζωγιάτε ι υπηρεσία ι Ιεχωβάσκι. Επίσης, ντικχέν γιεκ ι τζενέσαρ ο βίντεα είτε κατά «Χάντζουβ πο Αχόρτ» είτε κατά «Ρόντε» σο ισί κο βιβλίος Μπουτ Σουκάρ Ζωή για Πάντα! Για παράδειγμας, κάνα κερένα ο μάθημας 37 ντα ντικχένα ο βίντεος Ο Ιεχωβά κα Ντελ-αμέν Οντουλά σο Τθεράσα Ανάγκη, συζητίνεν ι τζενέσαρ ο βίντεος ντα βοηθίνεν-λες τι ντικχέλ ότι ο Ιεχωβά κα αβέλ γιεκ λέσαρ κάνα τσσουβέλα Λες πρώτα πι ζωγιάτε.

ΒΟΗΘΙΝΕΝ-ΛΕΝ ΤΙ ΝΑΚΧΑΒΕΝ Ο ΔΥΣΚΟΛΙΕΣ

13. Σαρ βοηθιντάς ο Ιησούς πι μαθητέν τι αβέν έτοιμοι κάνα κα τζάνας λέντζαρ κόντρα;

¹³ Ο Ιησούς βακερντάς μπουτ φαρ πι μαθητένγκε ότι ο τζενέ κα τζάνας λέντζαρ κόντρα, ατζέ-ντα τζενέ λένγκε φαμιλιάταρ. (Ματθ. 5:11· 10:22, 36) Χάνικ πριν τι μερέλ, ο Ιησούς βακερντάς πι μαθητένγκε ότι μπορεί τι ερεσένας ατζέ-ντα κο μεριπέ επειδή υπηρετίνενας ι Ιεχωβάς. (Ματθ. 24:9· Ιωάν. 15:20· 16:2) Βακερντάς λένγκε τι αβέν προσεκτικοί κο έργος. Για παράδειγμας, βακερντάς λένγκε μα τι χαν-πες οντουλέντζαρ σο τζάνας λέντζαρ κόντρα ιτιρί οντουλένγκε σο πακιάνας ντα τι προσοχίνεν οντουλά σο βακερένας ντα κερένας για τι μπορίνεν τι συνεχίνεν ο έργος.

14. Σαρ μπορίνασα τι βοηθίνας ι τζενές τι αβέλ έτοιμος κάνα κα τζαν λέσαρ κόντρα; (2 Τιμόθεο 3:12)

¹⁴ Μπορίνασα τι βοηθίνας ι τζενές τι αβέλ έτοιμος κάνα κα τζαν λέσαρ κόντρα άμα κα εξηγίνας λέσκε σο μπορεί τι ασουνέλ κατά τζενέ κι μπουτί, πι αμαλένταρ ντα πι τζενένταρ. (Διαβάνεν 2 Τιμόθεο 3:12) Μερικά τζενέ κι μπουτί μπορεί τι ασάνα πέσκε λέσαρ επειδή προσπαθίνελα τι κερέλ πι ζωγιάτε οντουλά σο βακερέλα η Γραφή. Γιαβερά, ατζέ-ντα λέσκε τζενέ, μπορεί μα τι συμφωνίνενα οντουλέντζαρ σο βακερέλα η Γραφή. Ισί λατσσό τι κεράς λάφι ανταλέσκε ι τζενέσαρ καζόμ πο τζανγκλέ αβέλα-πες. Αντικάς, να κα σαστίνελ κάνα κα τζαν λέσαρ κόντρα ντα κα τζανέλ σαρ τι αντιμετωπίνελ-λες.

15. Σο μπορεί τι βοηθίνελ εκχέ τζενές κάνα λέσκι φαμιλί τζάλα λέσαρ κόντρα;

¹⁵ Άμα η φαμιλί ι τζενέσκι τζάλα λέσαρ κόντρα, βοηθίνεν-λες τι αγαβέλ σόσκε κερένα-λες ανταβά. Μπορεί τι πακιάνα ότι ο Μάρτυρες ι Ιεχωβάσκε σικλιαρένα ψέματα, ή μπορεί τι ασουντέ μπέτι λάφια ι Μαρτυρένγκε. Ατζέ-ντα η φαμιλί ι Ιησούσκι πακιάλας ότι ισινέ ντινιλό. (Μάρκ. 3:21· Ιωάν. 7:5) Οτθάρ σικλιαρέν ι τζενές τι κερέλ υπομονή ντα τι κερέλ λάφι λατσσιμάσαρ πι φαμιλιάτε ντα γιαβερέντε.

16. Σαρ μπορίνασα τι βοηθίνας εκχέ τζενές σο κερέλα μελέτη τι κερέλ λάφι οντουλένγκε σο πακιάλα σουκάρ τροπόσαρ;

¹⁶ Ατζέ-ντα κάνα η φαμιλί ι τζενέσκι σο κερέλα μελέτη σικαβέλα ενδιαφέρον, ισί λατσσό μα τι προσπαθίνελ ο τζενό τι εξηγίνελ-λεν λένγκε σαρέ κατά πρώτη φαρ. Άμα κα κερέλας-λες ανταβά, λέσκε τζενέ κα νιωθίνενας πίεση ντα αντικάς να κα μανγκένας τι ξανακερέν λέσαρ λάφι ανταλέσκε. Οτθάρ βοηθίνεν ι τζενές τι κερέλ λάφι οντουλένγκε σο πακιάλα τροπόσαρ σο κα ντελ-λες ι ευκαιρία τι κερέλ-λες πάλι ανταβά εκ γιαβέρ-ντα φαρ. (Κολ. 4:6) Για παράδειγμας, κα μπορίνελας τι σικαβέλ πι τζενένγκε σαρ τι ντεν κο ιστότοπος jw.org. Αντικάς κα μπορίνεν τι ρόντεν ι Ιεχωβάσκε Μαρτυρένγκε αντράλ κατά ιστότοπος κάνα μανγκένα βον ντα καζόμ μανγκένα βον.

17. Σαρ μπορίνενα τι σικλιαρέν εκχέ τζενές σο κερένα-λες μελέτη σαρ τι απαντίνελ κο ερωτήσεις σο μπορεί τι τθερέν γιαβερά ι Ιεχωβάσκε Μαρτυρένγκε; (Ντικχέν ι φωτογραφία-ντα)

¹⁷ Μπορίνενα τι χρησιμοποιήνεν ι σειρά «Σο Πουτσέλα ο Ντουνιάς ι Ιεχωβάσκε Μαρτυρένγκε», για τι βοηθίνεν ι τζενές σο κερένα-λες μελέτη, τι ετοιμάνελ χουρντέ απαντήσεις κο ερωτήσεις σο κερένα ο τζενέ λέσκε φαμιλιάταρ ή λέσκε μπουτιάταρ. (2 Τιμ. 2:24, 25) Κο τέλος κι κάθε μαθημάσκο, ντικχέν ο «Μερικά Τζενέ Βακερένα» σο ισί κο βιβλίος Μπουτ Σουκάρ Ζωή για Πάντα! Βοηθίνεν ι τζενές τι κερέλ πρόβες για τι τζανέλ σαρ τι εξηγίνελ κο τζενέ οντουλά σο πακιάλα ακανά. Άμα χρειαζίντιβελα, βοηθίνεν-λες τι αρακχέλ εκ πο λατσσό τρόπος για τι εξηγίνελ οντουλά σο πακιάλα. Κάνα ντένα τουμαρέ σαατίσταρ για τι κερέν ασακέ πρόβες ι τζενέσαρ, κα βοηθίνεν-λες τι μπορίνελ τι εξηγίνελ κο γιαβερά σόσκε πακιάλα ή σόσκε να πακιάλα κάτι.

18. Σαρ μπορίνενα τι βοηθίνεν ι τζενές τι αβέλ μπίμπολντο ευαγγελιζόμενος; (Ματθαίος 10:27)

¹⁸ Ο Ιησούς ντινάς πι μαθητέντε ι εντολή τι βακερέν ο λατσσέ αμπέρια κο τζενέ. (Διαβάνεν Ματθαίος 10:27) Καζόμ πο σουγκό αρχίνελα εκ τζενό τι κερέλ λάφι οντουλένγκε σο πακιάλα, αζόμ πο σουγκό κα σικλιόλ τι ντελ μπέσα κο Ιεχωβά. Σαρ μπορίνενα τι βοηθίνεν ι τζενές σο κερένα-λες μελέτη τι καταφερίνελ-λες ανταβά; Κάνα ανακοινώντιβελα κι κχανγκιρί ότι κα αβέλ-πες εκ εκστρατεία, βακερέν κο τζενό τι σκεφτίνελ άμα κα μπορίνελας τι αβέλ ευαγγελιζόμενος. Εξηγίνεν λέσκε σόσκε μερικέ τζενένγκε ισί πο εύκολος τι αρχίνεν τι κερέν έργος κάνα αβέλα εκ εκστρατεία. Εκ γιαβέρ στόχος σο κα μπορίνελας τι τσσουβέλ ισί τι αρχίνελ τι κερέλ ομιλίες κο συναθροίσεις σο τθεράσα αντρέ κι εβδομάδα. Καζόμ κερέλα ανταβά στόχος, κα σικλιόλ τι κερέλ λάφι οντουλένγκε σο πακιάλα με σιγουριά.

ΣΙΚΑΒΕΝ ΟΤΙ ΝΤΕΝΑ ΜΠΕΣΑ ΚΟ ΤΖΕΝΟ ΣΟ ΚΕΡΕΝΑ-ΛΕΣ ΜΕΛΕΤΗ

19. Σαρ ντινάς μπέσα ο Ιησούς πι μαθητένγκε, ντα σαρ μπορίνασα τι μοιάζας λέστε;

¹⁹ Πριν τι τζαλ ο Ιησούς κο ουρανός, βακερντάς πι μαθητένγκε ότι εκ ντιβές κα αβένας πάλι γιεκ. Βον όμως να αγαντέας ότι ο Ιησούς κερέλας λάφι ι ουρανόσκε. Παρόλο σο λέσκε μαθητές να αγαντέας-λεν σαρέ, ο Ιησούς ισινέ σίγουρος ότι μανγκένας τι ακολουθίνεν-λες. (Ιωάν. 14:1-5, 8) Τζανέλας ότι χρειαζίντιβενας χρόνος για τι αγαβέν κάποια πράγματα, σαρ για παράδειγμας ότι κα τζουβντιόνας κο ουρανός. (Ιωάν. 16:12) Αμέν-ντα μπορίνασα τι ντας μπέσα κο τζενό ότι μανγκέλα τι κερέλ ι Ιεχωβάσκο γκι.

20. Σαρ εκ πφεν κι Μαλάουι σικαντάς ότι ντέλας μπέσα κι τζενί σο κερέλας μελέτη;

²⁰ Σικαβέν κο τζενό ότι ισινέν σίγουροι ότι μανγκέλα τι κερέλ ο σωστός. Σκεφτίνεν, για παράδειγμας, ι πφενιά Κιφούντο κατά Μαλάουι. Βόι αρχισάλιας μελέτη εκχέ τερνέ τζουβλιάσαρ, σο ισινέ Καθολική ντα βακέρντιβελας Αλινέιφ, κατά βιβλίος Μπουτ Σουκάρ Ζωή για Πάντα! Κάνα μπιτισκιαρντέ ο μάθημας 14, η Κιφούντο πουτσλάς ι τζενιά σο πακιάλας για το εικόνες. Βόι στεναχωρισάλι ντα βακερντάς: «Ισί μιρί απόφαση άμα κα χρησιμοποιήναβ ο εικόνες!» Η Κιφούντο σκεφτίνελας ότι σοράν ανταλέσταρ η τζενί κα σταματίνελας ι μελέτη. Αλλά κερντάς υπομονή ντα συνεχιντάς τι κερέλ μελέτη με την Αλινέιφ, ντα πακιάλας ότι σιγά σιγά κα αγαβέλ σόσκε ισί λάθος τι πακιάς κο εικόνες. Χάνικ μασεκά πο σοράν, η Κιφούντο κερντάς λάκε ι ερώτηση σο ισί κο μάθημας 34: «Μέχρι ακανά, ντικχλάν καέκ λατσσιπέ κατά μελέτη ι Γραφιάκι ντα κατά Ιεχωβά, σο ισί ο αληθινός Ντεβέλ;» Η Αλινέιφ βακερντάς λάκε μπουτ σουκάρ σημεία. Εκ ανταλένταρ ισινέ ότι ο Μάρτυρες ι Ιεχωβάσκε να κερένα τίποτα σο βακερέλα η Γραφή ότι ισί λάθος. Αφού νακχλό χάνικ βακίτι, η Αλινέιφ τσσιναντάς τι πακιάλ κο εικόνες ντα μπολντιλί.

21. Σαρ μπορίνασα τι βοηθίνας ι τζενές τι τραμπίνελ τι υπηρετίνελ ι Ιεχωβάς;

²¹ Παρόλο σο ο Ιεχωβά ισί οντουβά «σο κερέλα-λες τι μπαριόλ», μπορίνασα αμέν-ντα τι κεράς κάτι για τι βοηθίνας ι τζενές τι κερέλ αλλαγές πι ζωγιάτε. (1 Κορ. 3:7) Να σικλιαράσα-λες απλά σο μανγκέλα λέσταρ ο Ντεβέλ. Αλλά βοηθίνασα-λες τι μπαριαρέλ πι αγάπη ι Ιεχωβάσκε. Επίσης βοηθίνασα-λες τι τσσουβέλ πρώτα Λες πι ζωγιάτε ντα αντικάς τι σικαβέλ λέσκε πι αγάπη. Ντα σικλιαράσα-λες σαρ τι στηρίντιβελ κο Ιεχωβά κάνα τθερέλα δυσκολίες. Κάνα ντάσα μπέσα κο τζενό, βοηθίνασα-λες τι τθερέλ ο θάρρος σο χρειαζίντιβελα για τι τραμπίνελ τι υπηρετίνελ ι Ιεχωβάς.