Τουμέν “Σικλιλέν Σαρ τι Αβέν Ικανοποιημέ”;

1. Σο μανγκέλα τι βακερέλ τι αβάς ικανοποιημέ, ντα σο να μανγκέλα τι βακερέλ;

ΙΣΙΝΕΝ ικανοποιημέ οντουλέντζαρ σο τθερένα; Ο τζενό σο ισί ικανοποιημέ αρακχέλα χαρά ντα ειρήνη επειδή ντικχέλα ο ευλογίες σο τθερέλα ακανά. Παρόλο σο να τθερέλα κάποια πράγματα, να πφερντιόλα κερκιπέ ή χολί. Όμως, ατζέ-ντα κάνα ισινάμ ικανοποιημέ αμαρέ ζωγιάσαρ, ανταβά να μανγκέλα τι βακερέλ ότι δεν πρέπει τι χαλ-αμέν ανάγκη σαρ τζουβντιάσα αμαρί ζωή. Για παράδειγμας, ισί λατσσό εκχέ Χριστιανόσκε τι ρόντελ ευκαιρίες για τι κερέλ πο μπουτ κο έργος. (Ρωμ. 12:1· 1 Τιμ. 3:1) Όμως να χασαρέλα πι χαρά άμα να λέλα προνόμια καζόμ σουγκό κα μανγκέλας τι λελ.

2. Καλά μπέτι πράγματα μπορεί τι αβέν-πες άμα να ισινάμ ικανοποιημέ;

² Άμα να ισινάμ ικανοποιημέ οντουλέντζαρ σο τθεράσα κα μπορίναας τι αρχίνας τι λας μπέτι αποφάσεις. Οντουλά σο νανέ ποτές ικανοποιημέ οντουλέντζαρ σο τθερένα, μπορεί τι κερένα μπουτ πο μπουτ σαάτια μπουτί για τι τθερέν υλικά πράγματα σο να χρειαζίντιβενα-λεν μπαγιά. Δυστυχώς χάνικα Χριστιανοί ερεσλέ κο σημείος ατζέ-ντα τι τσορέν λοβέ ντα γιαβερά πράγματα σο μανγκένας. Μπορεί τι σκεφτιντέ “αξίναβα-λες”, “μπεσάβας αζόμ καιρός για τι λαβ-λες” ή “κα νταβ παλάλ ο λοβέ πο σοράν”. Όμως, ο τσοριπέ, σαρ-ντα τι αβέλ, πφανγκέλα ο γκι ι Ιεχωβάσκο ντα ανέλα λέσκε λατζ. (Παρ. 30:9) Γιαβερά χασαρντέ πουμαρί ζορ επειδή να λιντέ εκ προνόμιος ντα αντικάς τσσιναντέ τι υπηρετίνεν ι Ιεχωβάς. (Γαλ. 6:9) Σαρ κα μπορίνελας εκ υπηρέτης ι Ιεχωβάσκο τι ερεσέλ κο σημείος ατζέ-ντα τι σκεφτίνελ-λες ανταβά; Ο πρόβλημας μπορεί τι ισί ότι ανταβά τζενό χάνικ χάνικ τσσιναντάς τι αβέλ ικανοποιημέ.

3. Καβά πράγμας σο πφερέλα-αμέν σιγουριά σικλιάσα κατά Φιλιππησίους 4:11, 12;

³ Σαρέ μπορίνασα τι σικλιάς τι αβάς ικανοποιημέ. Ο απόστολος Παύλος γραφιντάς ότι “σικλιλό τι ερεσέν-λες οντουλά σο τθερέλας σαρ-ντα τι αβένας ο πράγματα λέσκε ζωγιάτε”. (Διαβάνεν Φιλιππησίους 4:11, 12) Ανταλά λάφια γραφιντάς-λεν κάνα ισινέ κι φυλακή. Ατζέ-ντα αζομάν όμως να χασαρντάας πι χαρά. Σικλιλόας κάτι σο να τζανένα-λες μπουτ τζενέ: τι αβέλ ικανοποιημέ. Άμα δυσκολίντιβασα τι αβάς ικανοποιημέ, ο λάφια ι Παυλόσκε ντα οντουλά σο νακχλό κερένα-αμέν σίγουρους ότι μπορίνασα τι αβάς ικανοποιημέ. Δεν πρέπει τι πακιάς ότι κα αβέλ εύκολος τι αβάς ικανοποιημέ αμαρέ ζωγιάσαρ. Οκιά μπάνταρ, πρέπει τι σικλιάς τι αβάς ικανοποιημέ. Σαρ; Για τι ντικχάς καλά ιδιότητες κα βοηθίνεν-αμέν τι σικλιάς τι αβάς ικανοποιημέ.

ΣΙΚΛΙΟΝ ΤΙ ΤΘΕΡΕΝ ΕΚΤΙΜΗΣΗ

4. Σαρ η εκτίμηση κα βοηθίνελ-αμέν τι αβάς ικανοποιημέ; (1 Θεσσαλονικείς 5:18)

⁴ Ο τζενό σο τθερέλα εκτίμηση ο πο μπουτ φαρ ισί ικανοποιημέ-ντα. (Διαβάνεν 1 Θεσσαλονικείς 5:18) Για παράδειγμας, κάνα εκτιμίνασα μπαγιά ότι τθεράσα ο αναγκαία αμαρέ ζωγιάκε, μάλλον να κα ανησυχίνας μπουτ ι πραγματένγκε σο μανγκάσα αλλά να τθεράσα. Κάνα σκεφτίνασα με εκτίμηση ο προνόμια σο τθεράσα ακανά, κα προσπαθίνας τι κεράς ο πο λατσσό ανταλέντε αντίς τι σκεφτίνας συνέχεια σο γιαβερά-ντα προνόμια κα μανγκάας τι λας. Άκ’ σόσκε βακερέλα αμένγκε η Γραφή τι βακεράς ευχαριστώ κάνα προσευχίντιβασα κο Ιεχωβά! Κάνα τθεράσα εκτίμηση, κα νιωθίνας «ι ειρήνη σο [ντέλα-αμέν ο Ντεβέλ ντα] ναστί αγαβένα-λα ο τζενέ».​—Φιλιπ. 4:6, 7.

5. Σόσκε έπρεπε τι σικαβέν εκτίμηση ο Ισραηλίτες; (Ντικχέν ι φωτογραφία-ντα)

⁵ Σκεφτίνεν σο αβιλό-πες κο Ισραηλίτες. Μπουτ φαρ κερένας παράπονα κο Ιεχωβά επειδή μανγκένας τι χαν ο χαμπέ σο τθερένας κι Αίγυπτος. (Αριθ. 11:4-6) Ισί μπαγιά ότι να ισινέ εύκολος τι τζουβντιόν κι έρημος. Σο κα βοηθίνελας-λεν τι αβέν ικανοποιημέ; Έπρεπε τι σκεφτίνενας με εκτίμηση οντουλά σο κερντάας ήδη ο Ντεβέλ λένγκε. Έπρεπε τι ντένας-πες γκοντί ότι κάνα ισινέ δούλοι κι Αίγυπτος συμπεριφερίντιβενας λένγκε μπουτ μπέτι ντα ότι ο Ιεχωβά αντάας ο ντες πληγές κο Αιγύπτιοι ντα σωντάς πι λαός. Κάνα ο Ισραηλίτες νασλέ κατά Αίγυπτος, ο Ιεχωβά βοηθιντάς-λεν τι λεν μπουτ ασήμι, χρυσάφι ντα σέα κατά Αιγύπτιους. (Έξοδ. 12:35, 36) Κάνα ο Ισραηλίτες να τθερένας κατάρ τι νασέν επειδή ερεσλέ ανγκλάλ κι Ερυθρά Θάλασσα ντα παλά-λένταρ ισινέ ο Αιγύπτιοι, ο Ιεχωβά πουταρντάς ο πανιά ι ντεριαβάκε ντα νασλέ οτθάρ. Ντα καζόμ ο Ισραηλίτες κερένας ταξίδι αντρέ κι έρημος, ο Ιεχωβά ντέλας-λεν κάθε ντιβές μάννα για τι χαν. Άρα καβά ισινέ λένγκο πρόβλημας; Να σικαβένας εκτίμηση. Όχι επειδή να τθερένας ο χαμπέ σο χρειαζίντιβενας, αλλά επειδή να εκτιμίνενας οντουβά σο ήδη τθερένας.

6. Καλά ισί μερικοί τρόποι σο μπορίνασα τι σικαβάς εκτίμηση;

⁶ Σο κα βοηθίνελ-τουμέν τι σικαβέν εκτίμηση; Εκ πρώτος πράγμας ισί τι σκεφτίνεν κάθε ντιβές ο λατσσέ πράγματα σο απολαμβάνενα. Κα μπορίνενας ατζέ-ντα τι γραφίνεν ντούι ή τριν πράγματα σο εκτιμίνενα. (Θρ. 3:22, 23) Εκ δεύτερος πράγμας σο μπορίνενα τι κερέν ισί τι σικαβέν τουμαρί εκτίμηση. Τσσουβέν στόχος τι βακερέν ευχαριστώ κο τζενέ σο κερένα τουμένγκε εκ λατσσιπέ ντα κάτι ατζέ πο σημαντικός ισί τι βακερέν ευχαριστώ κο Ιεχωβά κάθε ντιβές. (Ψαλμ. 75:1) Εκ τρίτος πράγμας σο μπορίνενα τι κερέν ισί τι αβέν λατσσέ αμαλά τζενέντζαρ σο σικαβένα εκτίμηση. Άμα αμαρέ αμαλά να σικαβένα εκτίμηση ντα κερένα μπουτ φαρ παράπονα, μπορεί τι αβάς αμέν-ντα αντικάς. Αλλά άμα αμαρέ αμαλά σικαβένα εκτίμηση, λένγκι λατσσί συμπεριφορά κα βοηθίνελ αμέν-ντα τι σικαβάς εκτίμηση. (Δευτ. 1:26-28· 2 Τιμ. 3:1, 2, 5) Κάνα ρόντασα ευκαιρίες τι σικαβάς εκτίμηση, να κα στεναχωρίντιβας αζόμ μπουτ για το δυσκολίες αμαρέ ντα ι πραγματένγκε σο μανγκάσα αλλά να τθεράσα.

7. Σο βοηθιντάς την Άτσι τι αβέλ ικανοποιημέ;

⁷ Σκεφτίνεν σο αβιλό-πες κι Άτσι σο τζουβντιόλα κι Ινδονησία. Βόι βακερέλα: «Κο Κορωνοϊός αρχισάλομ τι συγκρίναβ μι ζωή με τη ζωή μι πφραλένγκι ντα μι πφενίνγκι. Οτθάρ αρχισάλομ μα τι αβάβ ικανοποιημέ». (Γαλ. 6:4) Σο βοηθιντάς-λα τι αλλάνελ ο τρόπος σο σκεφτίνελας; Η Άτσι βακερέλα: «Αρχισάλομ τι γκινάβ ο ευλογίες σο λάβας κάθε ντιβές ντα τι σκεφτίναβ ο μπουτ λατσσέ πράγματα σο τθεράβας επειδή ισινόμας αντρέ κι οργάνωση κι Ντεβλέσκι. Σοράν, βακερντόμ ευχαριστώ κο Ιεχωβά σαρέ ανταλένγκε. Αντικάς αρχισάλομ τι αβάβ πάλι μπαγιά ικανοποιημέ». Άμα χασαρένα τουμαρί ζορ επειδή συγκρίνενα τουμαρί ζωή με τη ζωή ι γιαβερένγκι, κα μπορίνενας τι κερέν οντουβά σο κερντάς η Άτσι για τι νιωθίνεν πάλι εκτίμηση;

ΤΙ ΑΒΕΝ ΤΑΠΕΙΝΟΙ

8. Σο παθισάλο ο Βαρούχ;

⁸ Ο Βαρούχ σο ισινέ ο γραμματέας σο τθερέλας ο προφήτης Ιερεμίας, αρχισάλο για χάνικ μα τι αβέλ ικανοποιημέ οντουλέντζαρ σο τθερέλας πι ζωγιάτε. Ο Βαρούχ τθερέλας εκ δύσκολος διορισμός. Έπρεπε τι βοηθίνελ τον Ιερεμία τι βακερέλ κο Ισραηλίτες σο να σικαβένας εκτίμηση σο κα αβέλας-πες λέντε επειδή να ντινέας καν κο Ιεχωβά. Αλλά αντίς τι σκεφτίνελ σο μανγκέλας λέσταρ ο Ιεχωβά τι κερέλ, ο Βαρούχ αρχισάλο τι σκεφτίνελ μπουτ σο μανγκέλας βοβ τι κερέλ. Αντράλ κατά Ιερεμίας, ο Ιεχωβά βακερντάς κο Βαρούχ: «Μανγκέσα μπαρέ πράγματα τι νεαυτόσκε. Μα μανγκ». (Ιερ. 45:3-5) Γιαβερέ λαφίντζαρ, βακερέλας λέσκε: «Τι αβές ικανοποιημέ οντουλέντζαρ σο τθερέσα ακανά». Ο Βαρούχ δεχτιντάς ι διόρθωση ντα συνεχιντάς τι αβέλ φίλος ι Ιεχωβάσκο.

9. Σο σικλιάσα κατά 1 Κορινθίους 4:6, 7; (Ντικχέν ο φωτογραφίες-ντα)

⁹ Μπάζιμα, εκ Χριστιανός μπορεί τι νιωθίνελα ότι πρέπει τι λελ εκ συγκεκριμέ διορισμός. Μπορεί τι νιωθίνελα αντικάς επειδή τθερέλα μπουτ ικανότητες, ισί μπουτιαρνό ή υπηρετιντάς ι Ιεχωβάς μπουτ μπρεσά. Όμως, μπορεί ανταβά προνόμιος τι λένα-λες γιαβερά τζενέ. Σο κα βοηθίνελ-λες άμα ανταβά στεναχωρίνελα-λες; Κα μπορίνελας τι σκεφτίνελ οντουβά σο γραφιντάς ο Παύλος κο εδάφια 1 Κορινθίους 4:6, 7. (Διαβάνεν) Κάθε προνόμιος σο λάσα ντα κάθε ικανότητα σο τθεράσα, αβέλα κατά Ιεχωβά. Να κερδίνασα ούτε αξίνασα αμέν ανταλά δώρα. Σαρέ σικαβένα ι Ιεχωβάσκο λατσσιπέ σο να αξίνασα-λες.​—Ρωμ. 12:3, 6· Εφεσ. 2:8, 9.

10. Σαρ μπορίνασα τι σικλιάς τι αβάς ταπεινοί;

¹⁰ Μπορίνασα τι σικλιάς τι αβάς ταπεινοί κάνα σκεφτίνασα λατσσές ο παράδειγμας σο μουκχλάς αμένγκε ο Ιησούς. Σκεφτίνεν σο αβιλό-πες ι ιράτ σο ο Ιησούς τθοντάς ο πιντρέ πι αποστολόνγκε. Ο απόστολος Ιωάννης γραφιντάς: «Ο Ιησούς τζανέλας [1] ότι ο Ντατ ντινάας-λεν σαρέ λέσκε βαστέντε ντα [2] ότι αβιλόας κατά Ντεβέλ ντα [3] τζάλας κο Ντεβέλ, . . . ντα τθοβέλας ο πιντρέ ι μαθητένγκε». (Ιωάν. 13:3-5) Ο Ιησούς κα μπορίνελας τι νιωθίνελ ότι λέσκε μαθητές έπρεπε τι τθοβένας λέσκε πιντρέ. Αλλά ο Ιησούς ποτές να νιωσάλο ότι επειδή ισινέ ο τσσαβό ι Ντεβλέσκο έπρεπε τι τθερέλας εκ άνετος κχερ, μπουτ λοβέ ή εκ εύκολη ζωή. (Λουκ. 9:58) Ο Ιησούς ισινέ ταπεινός ντα οτθάρ ισινέ ικανοποιημέ. Μουκχλάς εκ μπουτ λατσσό παράδειγμας αμένγκε.​—Ιωάν. 13:15.

11. Σαρ βοηθίνελα η ταπεινότητα τον Ντένις τι νιωθίνελ ικανοποιημέ;

¹¹ Ο Ντένις, κατά Ολλανδία, προσπαθιντάς τι αβέλ ταπεινός σαρ ο Ιησούς αλλά ανταβά να ισινέ εύκολος. Βοβ βακερέλα: «Μπάζιμα νικιόλα μάνταρ μπαρικανιπέ ή χασαράβα μι χαρά κάνα κάποιος λέλα εκ προνόμιος σο μανγκάβας-λες με. Κάνα αβέλα-πες ανταβά, διαβάναβα για την ταπεινότητα. Κο JW Library^®, τσσουντόμ αντρέ σε εκ ετικέτα μερικά εδάφια για την ταπεινότητα για τι μπορίναβ τι αρακχάβ-λεν σουγκό ντα τι ξαναδιαβάναβ-λεν. Επίσης γουλιαρντόμ μι κινητόστε μερικές ομιλίες για την ταπεινότητα ντα ασουνάβα-λεν μπουτ φαρ.a Σικλιλόμ ότι σο-ντα κεράβα ι Ιεχωβάσκε πρέπει τι ντελ δόξα λέστε, όχι τι ταρτίνελ ι προσοχή μάντε. Ο Ιεχωβά ντέλα λατσσιμάσαρ κο κάθε εκ αμένταρ κάτι τι κερέλ, αλλά βοβ ισί οντουβά σο κερέλα τι τθεράς επιτυχία». Άμα χασαρντέν τουμαρί χαρά επειδή να τθερένα εκ συγκεκριμέ διορισμός σο μανγκένα, κερέν πο μπουτ μπουτί για τι αβέν ταπεινοί. Ανταβά κα κερέλ πο ζουρανί τουμαρί φιλία ι Ιεχωβάσαρ ντα κα βοηθίνελ-τουμέν τι νιωθίνεν ικανοποιημέ.​—Ιακ. 4:6, 8.

ΣΚΕΦΤΙΝΕΝ ΛΑΤΣΣΕΣ Ο ΥΠΟΣΧΕΣΕΙΣ Ι ΙΕΧΩΒΑΣΚΕ

12. Καλά υποσχέσεις για το μέλλον βοηθίνενα-αμέν τι αβάς ικανοποιημέ; (Ησαΐας 65:21-25)

¹² Νιωθίνασα πο ικανοποιημέ κάνα σκεφτίνασα λατσσές ο μπουτ σουκάρ υποσχέσεις σο ντινάς αμένγκε ο Ιεχωβά. Κο βιβλίος του Ησαΐα, ο Ιεχωβά βακερέλα αμένγκε ότι αγαβέλα ο μπουτ δυσκολίες σο τθεράσα, αλλά επίσης ντέλα πο λάφι τι νασκιαρέλ σαρέ ανταλά προβλήματα. (Διαβάνεν Ησαΐας 65:21-25) Κα τθεράς μπουτ σουκάρ κχερά, κα τθεράς μπουτί σο πφερέλα-αμέν ντα κα χας υγιεινός ντα σουκάρ χαμπέ. Ποτές να κα ξανανησυχίνας μήπως κα αβέλ αμένγκε ή αμαρέ τσσαβένγκε κάτι κακός. (Ησ. 32:17, 18· Ιεζ. 34:25) Μπορίνασα τι αβάς σίγουροι ότι σαρέ ανταλά σουκάρ υποσχέσεις για το μέλλον, κα αβέν-πες μπαγιά.

13. Καλά δυσκολίες τθεράσα ντα σαρ βοηθίνελα-αμέν άμα κα σκεφτίνας ο υποσχέσεις ι Ντεβλέσκε;

¹³ Ακανά ισί ατζέ πο μπουτ ανάγκη τι τθεράς αμαρέ γιακχά κο υποσχέσεις κι Ιεχωβάσκε. Σόσκε; Επειδή τζουβντιάσα «κο τελευταία ντιβεσά» ντα σαρέ τθεράσα προβλήματα σο ισί αμένγκε «δύσκολα». (2 Τιμ. 3:1) Ο Ιεχωβά κάθε ντιβές ντέλα-αμέν ο συμβουλές, ι ζορ ντα ι βοήθεια σο χρειαζίντιβασα για τι νταϊντίνας. (Ψαλμ. 145:14) Επίσης αμαρί ελπίδα μπορίνελα τι βοηθίνελ-αμέν μπουτ κάνα νακχάσα δυσκολίες. Μπορεί τι δυσκολίντιβενα τι ανέν ο αναγκαία τουμαρέ φαμιλιάκε. Μήπως ανταβά μανγκέλα τι βακερέλ ότι πάντα κα αβέν τσορορέ; Σίγουρα όχι! Ο Ιεχωβά ντινάς πο λάφι τι ντελ-τουμέν οντουλά σο χρειαζίντιβενα ντα ατζέ πο μπουτ κο Παράδεισος. (Ψαλμ. 9:18· 72:12-14) Μπορεί τι τθερένα μπουτ ντουκχ κάθε ντιβές, τι τθερένα κατάθλιψη ή εκ σοβαρός νασφαλιπέ. Μήπως κα τζουβντιόν για πάντα αντικάς χωρίς τι τθερέν ελπίδα; Νάα. Ο νασφαλιπέ ντα ο μεριπέ να κα αβέν κο νεβό ντουνιάς κι Ντεβλέσκο. (Αποκ. 21:3, 4) Ανταγιά ελπίδα κερέλα-αμέν τι νιωθίνας ικανοποιημέ, χωρίς χολί ντα κερκιπέ, ατζέ-ντα ακανά. Μπορίνασα τι νιωθίνας ικανοποιημέ ατζέ-ντα άμα κάποιος κα συμπεριφερίντιβελ αμένγκε άδικα, άμα χασαρντάμ εκχέ τζενές σο μανγκάσα κο μεριπέ, άμα ισινάμ νασφαλέ ή αβιλό-πες αμένγκε κάτι γιαβέρ μπέτι αμαρέ ζωγιάτε. Σόσκε; Επειδή σο-ντα δυσκολίες τι νακχάσα ακανά, τζανάσα ότι «η στεναχώρια ατσσικιαρέλα χάνικ ντα ισί χουρντί» ντα ότι κο νεβό ντουνιάς, μπουτ σουγκό, να κα τθεράς ντουκχ πάλι.​—2 Κορ. 4:17, 18.

14. Σαρ μπορίνασα τι μπαριαράς αμαρί πίστη κο υποσχέσεις κι Ιεχωβάσκε;

¹⁴ Αφού ισί αζόμ σημαντικός τι σκεφτίνας ο υποσχέσεις ι Ιεχωβάσκε, σο κα βοηθίνελ-αμέν τι αβάς σίγουροι ότι ο Ιεχωβά κα κερέλ μπαγιά ανταλά υποσχέσεις; Σαρ εκ τζενό μπορεί τι χρειαζίντιβελα τι τσσουβέλ πο γυαλιά για τι ντικχέλ λατσσές πράγματα σο ισί ντουρ, αντικάς αμέν-ντα μπορεί τι χρειαζίντιβελ τι κεράς κάποια πράγματα για τι μπορίνας τι ντικχάς αμαρό νεαυτός κο Παράδεισος. Κάνα χάλα-αμέν η ανησυχία για το λοβέ, μπορίνασα τι σκεφτίνας σαρ κα αβέλ αμαρί ζωή κάνα ο λοβέ, ο χρέη ντα ο τσοροριπέ να κα αβέν πια. Άμα ανησυχίνασα για το προνόμια σο να λιντάμ ατζέκ, μπορίνασα τι σκεφτίνας καζόμ χάνικ αξία κα τθερέν ανταλά κάνα κα αβάς τέλειοι ντα κα τθεράς υπηρετιντό ήδη ι Ιεχωβάς για μπουτ μπρεσά. (1 Τιμ. 6:19) Ανησυχίνασα αζόμ μπουτέ πραγματένγκε ακανά σο μπορεί τι αβέλ αμένγκε δύσκολος τι σκεφτίνας ο υποσχέσεις ι Ντεβλέσκε για το μέλλον. Αλλά καζόμ πο μπουτ σκεφτίνασα ο σουκάρ μέλλον σο ντινάς πο λάφι τι ντελ-αμέν ο Ιεχωβά, αζόμ πο εύκολος κα αβέλ τι τθεράς αμαρέ γιακχά οτθέ ντα όχι κο ανησυχίες αμαρέ.

15. Σο σικλιόνα κατά λάφια σο βακερντάς η Κρίστα;

¹⁵ Σκεφτίνεν σαρ βοηθίντιλι η Κρίστα, η ρομνί του Ντένις, επειδή σκεφτίνελας ο υποσχέσεις ι Ιεχωβάσκε. Βόι βακερέλα: «Τθεράβα εκ νασφαλιπέ σο κερέλα-μαν τι νιωθίναβ μπουτ μπίζουρανι. Να μπορίναβα τι πφιράβ. Οτθάρ τθεράβα καροτσάκι ντα ο πο μπουτ σαάτια κο ντιβές ισινόμ κο κρεβάτι. Ντουκχάβα κάθε ντιβές. Μο γιατρός ακανά τελευταία βακερντάς μάνγκε ότι μι υγεία να κα τζαλ πο λατσσές. Αλλά αμέσως σκεφτιντόμ: “Βοβ να ντικχέλα ο μέλλον σαρ ντικχάβα-λες με”. Μιρέ γιακχά ισί κο υποσχέσεις κι Ιεχωβάσκε ντα ανταβά ντέλα-μαν ειρήνη μι γκοντιάτε. Αντιβές μπορεί τι χρειαζίντιβελ τι νταϊντίναβ ο προβλήματα ανταλέ ντουνιάστε, αλλά ατζεχάνικ κα απολαμβάναβ εκ μπουτ σουκάρ ζωή κο νεβό ντουνιάς!»

«ΟΝΤΟΥΛΑ ΣΟ ΡΟΝΤΕΝΑ Ι ΙΕΧΩΒΑΣΚΕ ΚΑ ΛΕΝ ΣΑΡΕ Ο ΛΑΤΣΣΙΜΑΤΑ»

16. Σόσκε μπορίνελας ο βασιλιάς Δαβίδ τι γραφίνελ ότι «οντουλά σο ρόντενα ι Ιεχωβάσκε κα λεν σαρέ ο λατσσίματα»;

¹⁶ Ατζέ-ντα κάνα ισινάμ ικανοποιημέ, κα τθεράς πάλι προβλήματα. Ο βασιλιάς Δαβίδ χασαρντάς τουλάχιστον τρινέν πι τσσαβένταρ. Μερικά τζενέ κατηγοριντέ-λες σινανέ, προδοντέ-λες ντα εκ βασιλιάς προσπαθιντάς τι μουνταρέλ-λες ντα κυνηγίνελας-λες για μπουτ μπρεσά. Παρόλο σο νακχέλας ανταλά δυσκολίες, ο Δαβίδ ισινέ ικανοποιημέ. Βακερντάς: «Οντουλά σο ρόντενα ι Ιεχωβάσκε κα λεν σαρέ ο λατσσίματα». (Ψαλμ. 34:9, 10) Σόσκε μπορίνελας τι βακερέλ-λες ανταβά; Επειδή παρόλο σο, σαρ λαός ι Ιεχωβάσκο, να μπεσάσα τι τθεράς εκ ζωή χωρίς προβλήματα, ισινάμ σίγουροι ότι να κα λειπίνελ αμένταρ τίποτα σο χρειαζίντιβασα-λες μπαγιά. (Ψαλμ. 145:16) Ντα μπορίνασα τι αβάς σίγουροι ότι ο Ιεχωβά κα βοηθίνελ-αμέν τι νταϊντίνας σαρέ αμαρέ δοκιμασίες. Μπορίνασα τι αβάς ικανοποιημέ.

17. Σόσκε μανγκένα τι αβέν ικανοποιημέ;

¹⁷ Ο Ιεχωβά μανγκέλα τι αβέν ικανοποιημέ. (Ψαλμ. 131:1, 2) Οτθάρ, κερέν ο πο λατσσό σο μπορίνενα για τι αβέν ικανοποιημέ. Άμα μαρένα-τουμέν για τι σικλιόν τι τθερέν εκτίμηση, τι αβέν ταπεινοί ντα τι τθερέν τουμαρέ γκοντιάτε ο υποσχέσεις ι Ιεχωβάσκε, κα μπορίνεν τι βακερέν: «Βα, ισινόμ ικανοποιημέ».​—Ψαλμ. 16:5, 6.