Σαρ Βοηθίνελα-αμέν ο Ιεχωβά τι Κεράς Υπομονή

1. Σόσκε χρειαζίντιβελα τι κεράς υπομονή ντα κάσκι βοήθεια τθεράσα; (1 Πέτρου 5:10)

ΑΝΤΑΛΕ τελευταίε ντιβεσέντε, ο λαός ι Ιεχωβάσκο χρειαζίντιβελα τι κερέλ υπομονή. Κάποιοι ισί νασφαλέ για μπουτ μπρεσά. Μερικοί τθερένα μπαρί ντουκχ επειδή χασαρντέ εκχέ αγαπημέ τζενές κο μεριπέ. Γιαβερέντζαρ, τζάνα λέντζαρ κόντρα είτε τζενέ λένγκε φαμιλιάταρ είτε τζενέ κατά κυβέρνηση. (Ματθ. 10:18, 36, 37) Μπορίνενα τι αβέν σίγουροι ότι σο-ντα δυσκολίες τι νακχένα τουμαρέ ζωγιάτε, ο Ιεχωβά κα ντελ-τουμέν ι ζορ σο χρειαζίντιβενα για τι κερέν υπομονή μέχρι κο τέλος.​—Διαβάνεν 1 Πέτρου 5:10.

2. Κον βοηθίνελα-αμέν τι κεράς υπομονή;

² Υπομονή μανγκέλα τι βακερέλ ότι ατσσάσα πιστοί κο Ιεχωβά ντα υπηρετίνασα-λες με χαρά ατζέ-ντα κάνα νακχάσα δυσκολίες, τζάνα αμέντζαρ κόντρα, ή αβέλα αμένγκε εκ πειρασμός. Για τι κεράς υπομονή, χρειαζίντιβελα επίσης τι πακιάς ότι ο πράγματα κα τζαν πο λατσσές. Μπορίνασα τι κεράς υπομονή σάντε επειδή ο Ιεχωβά ντέλα-αμέν ι «ζορ σο ναστί τθερένα-λα ο τζενέ». Ναστί κεράσα υπομονή χωρίς τι ντελ-αμέν Βοβ πι βοήθεια. (2 Κορ. 4:7) Κο μάθημας ανταβά, κα ντικχάς σταρ πράγματα σο ντινάς-αμέν ο Ιεχωβά για τι βοηθίνελ-αμέν τι κεράς υπομονή. Επίσης κα σικλιάς σο πρέπει τι κεράς για τι βοηθίντιβας ανταλέ πραγματένταρ.

ΠΡΟΣΕΥΧΗ

3. Σόσκε βακεράσα ότι η προσευχή ισί εκ θαύμας;

³ Ο Ιεχωβά κερντάς εκ θαύμας αμένγκε για τι βοηθίνελ-αμέν τι κεράς υπομονή. Παρόλο σο ισινάμ ατελείς, ντινάς-αμέν ι ευκαιρία τι μπορίνας τι κεράς λέσαρ λάφι. (Εβρ. 4:16) Σκεφτίνεν-λες χάνικ ανταβά: Μπορίνασα τι κεράς προσευχή κο Ιεχωβά κάνα-ντα τι μανγκάς ντα καλέ θεμάσκε-ντα τι απασχολίνελ-αμέν. Μπορίνελα τι ασουνέλ-αμέν καλέ-ντα τσσιμπάτε τι κεράς λέσαρ λάφι ντα κατέ-ντα τι αβάς, ατζέ-ντα άμα ισινάμ ντιπ κορκορέ ή κι φυλακή. (Ιωνάς 2:1, 2· Πράξ. 16:25, 26) Μπάζιμα ισινάμ αζόμ πιεσμέ σο να τζανάσα σαρ τι εξηγίνας οντουβά σο νιωθίνασα. Ατζέ-ντα αζομάν, ο Ιεχωβά μπορίνελα τι αγαβέλ οντουβά σο μανγκάσα τι βακεράς λέσκε. (Ρωμ. 8:26, 27) Σίγουρα η προσευχή ισί εκ θαύμας!

4. Σόσκε βακεράσα ότι ο προσευχές σο κεράσα για τι τθεράς υπομονή συμφωνίνενα οντουλέσαρ σο μανγκέλα ο Ιεχωβά;

⁴ Πι Λαφίστε, ο Ιεχωβά βακερέλα αμένγκε ότι «σο-ντα τι μανγκάς λέσταρ ντα συμφωνίνελα οντουλέσαρ σο μανγκέλα, βοβ ασουνέλα-αμέν». (1 Ιωάν. 5:14) Μπορίνασα τι μανγκάς ι Ιεχωβάσκι βοήθεια για τι κεράς υπομονή; Βα! Ανταβά συμφωνίνελα οντουλέσαρ σο μανγκέλα. Σαρ τζανάσα-λες ανταβά; Ο Ιεχωβά βακερέλα ότι κάνα αμέν κεράσα υπομονή, Βοβ τθερέλα σο τι βακερέλ κο Μπενγκ σο πρασάλα-λες. (Παρ. 27:11) Η Γραφή βακερέλα ότι ο Ιεχωβά μανγκέλα «τι βοηθίνελ πι ζοριάσαρ οντουλέν σο υπηρετίνενα-λες σαρέ πουμαρέ γκίσαρ». (2 Χρον. 16:9) Άρα μπορίνασα τι αβάς σίγουροι ότι ο Ιεχωβά εμ τθερέλα ι ζορ εμ μανγκέλα τι βοηθίνελ-αμέν τι κεράς υπομονή.​—Ησ. 30:18· 41:10· Λουκ. 11:13.

5. Σαρ μπορίνελα η προσευχή τι βοηθίνελ-αμέν τι τθεράς ειρήνη κι γκοντί; (Ησαΐας 26:3)

⁵ Η Γραφή βακερέλα ότι κάνα κεράσα προσευχή για τι μουκχάς οπρά-λέστε αμαρέ ανησυχίες, “ο Ντεβέλ κα ντελ-αμέν ι ειρήνη σο ναστί αγαβένα-λα ο τζενέ, ντα αντικάς . . . κα αρακχαβέλ αμαρό γκι ντα αμαρί γκοντί”. (Φιλιπ. 4:7) Σκεφτίνεν σο μανγκέλα τι βακερέλ ανταβά. Ο τζενέ σο να υπηρετίνενα ι Ιεχωβάς νακχένα βον-ντα δυσκολίες. Μπουτ λένταρ προσπαθίνενα τι αρακχέν διάφορους τρόπους για τι μπορίνεν τι τθερέν ειρήνη κι γκοντί. Για παράδειγμας, κάποιοι προσπαθίνενα τι τσουτσαρέν ντιπ πουμαρί γκοντί σαρέ κατά σκέψεις σο τθερένα ντα αντικάς τι ηρεμίνεν. Κάνα εκ τζενό μαρέλα-πες για τι κερέλ κάτι ασακό ντα να κερέλα κουμάντος πο σκέψεις, μπορεί τι επηρεάντιβελ κατά δαίμονες. Ανταβά ισί μπουτ επικίνδυνος. (Ντικχέν Ματθαίος 12:43-45) Παρόλο σο ο τζενέ μπορεί τι ηρεμίνενα κάνα κερένα ασακέ πράγματα, να τθερένα ι αληθινή ειρήνη σο αβέλα κατά Ιεχωβά. Ανταγιά ειρήνη ισί μπουτ πο λατσσί. Κάνα κεράσα προσευχή κο Ιεχωβά σικαβάσα ότι ντάσα σαρί αμαρί μπέσα λέστε ντα βοβ ντέλα-αμέν ι «ειρήνη σο ατσσόλα για πάντα». (Διαβάνεν Ησαΐας 26:3) Εκ τρόπος σο ο Ιεχωβά ντέλα-αμέν ειρήνη ισί κάνα βοηθίνελα-αμέν τι ντας-αμέν γκοντί εδάφια σο λοκχιαρένα αμαρό γκι. Ανταλά εδάφια ηρεμίνενα αμαρί γκοντί ντα αμαρί καρδιά επειδή τζανάσα ότι ο Ιεχωβά πφαμπόλα αμένγκε ντα μανγκέλα τι βοηθίνελ-αμέν.​—Ψαλμ. 62:1, 2.

6. Σο μπορίνενα τι κερέν για τι βοηθίντιβεν καζόμ πο μπουτ αβέλα-πες κατά προσευχή; (Ντικχέν ι φωτογραφία-ντα)

⁶ Σο μπορίνενα τι κερέν. Καζόμ νακχένα εκ δοκιμασία, “μουκχέν κο Ιεχωβά ο πφαριπέ σο βάντενα” ντα μανγκέν λέσταρ αντράλ κατά προσευχή τι ντελ-τουμέν πι ειρήνη. (Ψαλμ. 55:22) Μανγκέν λέσταρ επίσης ι ειρήνη σο χρειαζίντιβενα για τι νταϊντίνεν ι δοκιμασία. (Παρ. 2:10, 11) Επίσης, μα μπιστρέν τι βακερέν ευχαριστώ κο Ντεβέλ τουμαρέ προσευχιέντε. (Φιλιπ. 4:6) Σκεφτίνεν ο πράγματα σο κερέλα τουμένγκε κάθε ντιβές για τι βοηθίνελ-τουμέν τι κερέν υπομονή ντα βακερέν λέσκε ευχαριστώ για την βοήθεια λέσκι ντα για το λατσσέ πράγματα σο ντέλα-τουμέν. Μα μουκχέν κι δοκιμασία σο νακχένα τι κοριαρέλ-τουμέν ντα αντικάς μα τι ντικχέν ο ευλογίες σο τθερένα ήδη.​—Ψαλμ. 16:5, 6.

ΛΑΦΙ Ι ΝΤΕΒΛΕΣΚΟ

7. Σαρ βοηθίντιβασα κάνα σικλιαράσα-αμέν κατά Γραφή;

⁷ Ο Ιεχωβά ντέλα-αμέν πο Λάφι, ι Γραφή, για τι βοηθίνελ-αμέν τι κεράς υπομονή. Η Αγία Γραφή τθερέλα μπουτ εδάφια σο πφερένα-αμέν σιγουριά ότι ο Ιεχωβά κα στηρίνελ-αμέν. Σκεφτίνεν εκ παράδειγμας. Ο εδάφιος Ματθαίος 6:8 βακερέλα: «Τουμαρό Ντατ τζανέλα σο τθερένα ανάγκη ατζέ-ντα πριν τι μανγκέν-λες λέσταρ». Ανταλά λάφια βακερντάς-λεν ο Ιησούς, σο βοβ τζανέλα ι Ιεχωβάς πο λατσσές σαριλένταρ. Άρα, μπορίνασα τι αβάς ντιπ σίγουροι ότι κάνα νακχάσα εκ μπαρί δοκιμασία, ο Ιεχωβά τζανέλα σο χρειαζίντιβασα ντα κα βοηθίνελ-αμέν. Η Γραφή ισί πφερντί με γιαβερά-ντα ασακέ σουκάρ σκέψεις κατά Ιεχωβά σο κερένα-αμέν ατζέ πο αποφασισμέ τι νταϊντίνας ο δυσκολίες.​—Ψαλμ. 94:19.

8. (α) Βακερέν εκ συμβουλή κατά Γραφή σο βοηθίνελα-αμέν τι κεράς υπομονή. (β) Σο κα βοηθίνελ-αμέν τι ντας-αμέν γκοντί ο συμβουλές ι Γραφιάκε κάνα κα χρειαζίντιβας-λεν;

⁸ Η Γραφή ντέλα-αμέν συμβουλές σο μπορίνενα τι βοηθίνεν-αμέν τι κεράς υπομονή. Ανταλά συμβουλές ντένα-αμέν ι σοφία σο χρειαζίντιβασα για τι λας λατσσέ αποφάσεις. (Παρ. 2:6, 7) Για παράδειγμας, η Γραφή βακερέλα αμένγκε ότι αντίς τι ανησυχίνας οντουλένγκε σο μπορεί τι αβέν-πες κο μέλλον, χρειαζίντιβελα τι στηρίντιβας κο Ιεχωβά για τι ντας πέρα ο κάθε ντιβές. (Ματθ. 6:34) Άμα διαβάνασα ι Γραφή κάθε ντιβές ντα σκεφτίνασα λατσσές οντουλά σο διαβάνασα, κα αβέλ πο εύκολος τι ντας-αμέν γκοντί ο συμβουλές λάκε κάνα κα χρειαζίντιβας-λεν.

9. Σαρ ο ιστορίες ι Γραφιάκε μπαριαρένα αμαρί σιγουριά ότι ο Ιεχωβά κα βοηθίνελ-αμέν;

⁹ Κι Γραφή, διαβάνασα επίσης αληθινές ιστορίες τζενένγκε σο ντινέ μπέσα κο Ιεχωβά ντα βοβ βοηθιντάς-λεν. Ανταλά τζενέ ισινέ σαρ αμέντε. (Εβρ. 11:32-34· Ιακ. 5:17) Κάνα σκεφτίνασα σαρ ο Ιεχωβά βοηθιντάς-λεν, ανταβά κα κερέλ-αμέν τι πακιάς ατζέ πο μπουτ ότι ο Ιεχωβά κα βοηθίνελ αμέν-ντα. Βοβ ισί «αμαρό καταφύγιος ντα αμαρί ζορ, βοήθεια σο αρακχάσα-λα εύκολα αζομάν σο αβένα στεναχώριες». (Ψαλμ. 46:1) Ντα κάνα σκεφτίνασα σαρ ι Ιεχωβάσκε υπηρέτες σικαντέ πουμαρί πίστη λέστε ντα συνεχιντέ τι υπηρετίνεν-λες ατζέ-ντα κο δυσκολίες, λάσα ζορ για τι κεράς αμέν-ντα ο ίδιος.​—Ιακ. 5:10, 11.

10. Σο μπορίνενα τι κερέν για τι βοηθίντιβεν καζόμ πο μπουτ αβέλα-πες κατά Λάφι ι Ντεβλέσκο;

¹⁰ Σο μπορίνενα τι κερέν. Διαβάνεν κάθε ντιβές ι Γραφή, ντα ασταρέν κάπου ο εδάφια σο βοηθίνενα-τουμέν πο μπουτ. Μπουτ πφραλά διαβάνενα κάθε πρωί ο εδάφιος ντα ο σχόλια κατά βιβλιάριος Τι Ρόντας κι Γραφή Κάθε Ντιβές. Αντικάς τθερένα τι σκεφτίνεν σαρό ο γιαβέρ ντιβές κάτι σο ντέλα-λεν ζορ. Άκ’ ανταβά βοηθιντάς εκχέ πφενιά-ντα σο βακερένα λάκε Μαρίa κάνα φροντίνελας πι νταντές ντα πι νταγιά. Ο ντούι-ντα τθερένας καρκίνος ο ίδιος βακίτι ντα ισινέ μεριμάσκε. Βόι βακερέλα: «Κάθε πρωί διαβάναβας ο εδάφιος ι ντιβεσέσκο ντα σκεφτίναβας λατσσές σο σικλιαρέλα-μαν. Ανταβά βοηθίνελας-μαν τι κεράβ σκέψεις ι Ιεχωβάσκε ντα ι σουκάρ πραγματένγκε σο σικλιαρέλα-αμέν πι Λαφίσταρ αντίς τι σκεφτίναβ σάντε ο προβλήματα σο τθεράβας».​—Ψαλμ. 61:2.

ΑΜΑΡΕ ΠΦΡΑΛΑ ΝΤΑ ΠΦΕΝΙΑ

11. Σόσκε ντέλα-αμέν ζορ σο τζανάσα ότι να ισινάμ κορκορέ καζόμ νακχάσα δοκιμασίες;

¹¹ Ο Ιεχωβά ντέλα-αμέν αμαρέ πφραλέν ντα πφενίν σαρό κο ντουνιάς για τι βοηθίνελ-αμέν τι νταϊντίνας με υπομονή. Σάντε σο τζανάσα ότι “σαρέ αμαρέ πφραλά κο ντουνιάς τσσίντενα οντουλά σο τσσίντασα αμέν” τθεράσα ι σιγουριά ότι να ισινάμ κορκορέ. (1 Πέτρ. 5:9) Ανταβά μανγκέλα τι βακερέλ ότι υπαρχίντιβενα γιαβερά-ντα πφραλά ντα πφενιά σο νακχλέ ο πρόβλημας σο νακχάσα αμέν ντα μπορισάλε τι ατσσόν πιστοί κο Ιεχωβά. Οτθάρ ισινάμ σίγουροι ότι μπορίνασα τι ατσσάς πιστοί αμέν-ντα!​—Πράξ. 14:22.

12. Σαρ βοηθίνενα-αμέν αμαρέ πφραλά ντα πφενιά, ντα σο μπορίνασα τι κεράς αμέν λένγκε; (2 Κορινθίους 1:3, 4)

¹² Αμαρέ πφραλά ντα πφενιά, αντράλ οντουλένταρ σο βακερένα ντα κερένα, ντένα-αμέν ζορ για τι νταϊντίνας. Ανταβά τζανέλας-λες μπουτ λατσσές εμ ο απόστολος Παύλος. Κο γράμματα σο γραφιντάς, βακερντάς ο ναβά οντουλένγκε σο βοηθιντέ-λες κάνα ισινέ φυλακισμέ πι κχερέστε ντα σικαντάς πι εκτίμηση λένγκε. Ανταλά πφραλά ντα πφενιά λοκχιαρντέ ι Παυλόσκο γκι, ντινέ-λες ζορ ντα γιαβέρ-ντα βοήθεια σο χρειαζίντιβελας. (Φιλιπ. 2:25, 29, 30· Κολ. 4:10, 11) Αντιβές μπορεί τι ντικχάσα-λες αμέν-ντα ανταβά αμαρέ ζωγιάτε. Κάνα χρειαζίντιβασα βοήθεια για τι νταϊντίνας, αμαρέ πφραλά ντα πφενιά ισί οτθέ αμένγκε. Ντα κάνα χρειαζίντιβενα βοήθεια βον, ισινάμ αμέν οτθέ λένγκε.​—Διαβάνεν 2 Κορινθίους 1:3, 4.

13. Σο βοηθιντάς ι πφενιά Μάγια τι κερέλ υπομονή;

¹³ Κο 2020, ο ασκέρια κι Ρωσία τσσουντέ-πες ξαφνικά κο κχερ εκχέ πφενιάκο σο βακέρντιβελα Μάγια, για τι ρόντεν-λες. Σοράν, η πφεν γκιλί κο δικαστήριος για τι υπερασπίνελ ο δικαίωμας σο τθερέλα τι κερέλ έργος. Η Μάγια βακερέλα ότι λάκε πφραλά ντα πφενιά ντινέ-λα μπαγιά μπουτ μπαρί ζορ καζόμ νακχέλας ανταγιά δυσκολία. Βόι βακερέλα: «Ισινόμας μπουτ κχινί, αγχωμέ ντα στεναχωριμέ. Αλλά μο πφραλά ντα μο πφενιά λένας-μαν τηλέφωνος, μπουτσσαβένας μάνγκε μηνύματα ντα γραφίνενας μάνγκε γράμματα. Σαρέ ανταλέντζαρ σικαντέ μάνγκε ξεκάθαρα καζόμ μπουτ μανγκένας-μαν. . . . Πάντα τζανάβας ότι μο πφραλά ντα μο πφενιά μανγκένα-μαν ντα ισί μι φαμιλί. Όμως κατά 2020, ισινόμ ατζέ πο σίγουρη ανταλέσκε».

14. Σαρ μπορίνασα τι βοηθίντιβας αμαρέ πφραλένταρ ντα πφενίνταρ; (Ντικχέν ι φωτογραφία-ντα)

¹⁴ Σο μπορίνενα τι κερέν. Καζόμ κερένα υπομονή σε εκ δοκιμασία σο νακχένα, ισί σημαντικός τι ατσσόν πασέ κο πφραλά ντα κο πφενιά. Μα σακιντίνεν τι μανγκέν βοήθεια κατά πρεσβύτεροι. Βον μπορίνενα τι αβέν «σαρ εκ τθαν σο αρακχαβέλα κατά μπαρμπάλ ντα κατά μπουτ μπρισίμ». (Ησ. 32:2) Ντεν-τουμέν γκοντί όμως ότι εμ τουμαρέ πφραλά ντα πφενιά νταϊντίνενα δοκιμασίες. Οτθάρ, κάνα κερένα κάτι λατσσό οντουλένγκε σο τθερένα-λες ανάγκη, ανταβά κα βοηθίνελ-τουμέν τι αβέν χαρούμενοι ντα τι κερέν υπομονή καζόμ νακχένα εκ δοκιμασία.​—Πράξ. 20:35.

ΑΜΑΡΙ ΕΛΠΙΔΑ

15. Σαρ η ελπίδα βοηθιντάς ι Ιησούς ντα σαρ βοηθίνελα αμέν-ντα; (Εβραίους 12:2)

¹⁵ Ο Ιεχωβά ντινάς-αμέν εκ σίγουρη ελπίδα σο βοηθίνελα-αμέν τι κεράς υπομονή μέχρι κο τέλος. (Ρωμ. 15:13) Ανέν τουμαρέ γκοντιάτε σαρ η ελπίδα βοηθιντάς ι Ιησούς τι κερέλ υπομονή κο πο δύσκολα ντιβεσά σο τζουβντιλό ατθέ κι πφουβ. (Διαβάνεν Εβραίους 12:2) Ο Ιησούς τζανέλας ότι άμα κα ατσσόλας αφοσιωμέ, κα βοηθίνελας τι αγιάντιβελ ο ναβ ι Ιεχωβάσκο. Ο Ιησούς επίσης μπεσέλας σαρ σαρ τι αβέλ πάλι πι Νταντέσαρ ντα τι υπηρετίνελ γιεκ πι πφραλέντζαρ κι Βασιλεία κο ουρανός. Αμαρί-ντα ελπίδα τι τζουβντιάς για πάντα κο νεβό ντουνιάς κι Ντεβλέσκο βοηθίνελα-αμέν τι κεράς υπομονή σο-ντα δυσκολίες τι ανέλ αμένγκε ο ντουνιάς ι Μπενγκέσκο.

16. Σαρ η ελπίδα βοηθιντάς εκχέ πφενιά τι νταϊντίνελ, ντα σο σικλιάσα λάκε λαφίνταρ;

¹⁶ Ντικχέν σαρ η ελπίδα τι τζουβντιάς κο νεβό ντουνιάς βοηθιντάς εκχέ πφενιά κι Ρωσία, σο βακέρντιβελα Άννα. Λάκε ρομές ασταρντέ-λες ντα τσσουντέ-λες κι φυλακή καζόμ μπεσέλας τι αβέλ ο δικαστήριος. Κάνα αβιλό ανταβά, η Άννα βακερντάς: «Μπουτ φαρ κεράβας λάφι κο Ιεχωβά για την ελπίδα σο ντινάς-μαν ντα σκεφτίναβας ανταβά σουκάρ μέλλον. Αντικάς να χασαρντόμ μι ζορ. Αγαβάβα ότι ανταβά νανέ ο τέλος. Ο Ιεχωβά κα νικίνελ, ντα κα νικίνας αμέν-ντα».

17. Σαρ μπορίνασα τι σικαβάς αμαρί εκτίμηση για την ελπίδα σο ντινάς-αμέν ο Ιεχωβά; (Ντικχέν ι φωτογραφία-ντα)

¹⁷ Σο μπορίνενα τι κερέν. Ντεν τουμαρέ σαατίσταρ για τι σκεφτίνεν ο μπουτ σουκάρ μέλλον σο ετοιμαντάς τουμένγκε ο Ιεχωβά. Ντικχέν τουμαρό νεαυτός κο νεβό ντουνιάς κι Ντεβλέσκο ντα κερέν φαντασία ο ευλογίες σο κα τθεράς οτθέ. Ντα σο-ντα δοκιμασία μπορεί τι νακχάσα ακανά κα ντικχίντιβελ αμένγκε “χάνικ ντα χουρντί” άμα κα σκεφτίνας ο μπουτ μπαρέ ευλογίες σο κα τζουβντιάς κο νεβό ντουνιάς για πάντα. (2 Κορ. 4:17) Επίσης κερέν ο πο λατσσό σο μπορίνενα για τι βακερέν κο γιαβερά ο σουκάρ υποσχέσεις ι Ιεχωβάσκε. Σκεφτίνεν σαρ ισί λένγκε τι μαρέν-πες τι ντεν-λεν πέρα ανταλέ μπενγκαλέ ντουνιάστε χωρίς τι τζανέν ι ελπίδα σο ντέλα ο Ντεβέλ για το μέλλον. Ατζέ-ντα με εκ χουρντί συζήτηση, μπορίνενα τι γκερέν λένγκι προσοχή κι Βασιλεία κι Ιεχωβάσκι ντα κο υποσχέσεις λέσκε.

18. Σόσκε μπορίνασα τι ντας μπέσα κο υποσχέσεις κι Ιεχωβάσκε;

¹⁸ Αφού ο Ιώβ νακχλό μπουτ δοκιμασίες, βακερντάς κο Ιεχωβά: «Ακανά τζανάβα ότι μπορίνεσα τι κερές σαρέ ο πράγματα ντα ότι τίποτα οντουλένταρ σο τθερέσα τι γκοντιάτε νανέ δύσκολος τούκε». (Ιώβ 42:2) Σαρ σικλιλό ο Ιώβ, τίποτα ναστί τσσιναβέλα ο σκοπός ι Ιεχωβάσκο. Κάνα τθεράσα-λες ανταβά αμαρέ γκοντιάτε, λάσα ζορ για τι συνεχίνας τι κεράς υπομονή. Σκεφτίνεν για παράδειγμας εκχέ τζουβλιά σο ισί νασφαλί ντα χασαρντάς πι ζορ επειδή γκιλί μπερεκέτι γιατρόντε ντα καέκ να μπορισάλο τι κερέλ-λα λατσσές. Όμως τελικά αρακχέλα εκχέ λατσσέ γιατρός σο ντέλα λέσκε μπέσα. Βοβ βακερέλα λάκε σο ακριβώς τθερέλα ντα εξηγίνελα λάκε σαρ κα βοηθίνελ-λα τι αβέλ λατσσές. Αμέσως λοκχιόλα λάκο γκι παρόλο σο τζανέλα ότι πρέπει τι μπεσέλ κάποιος βακίτι μέχρι τι αβέλ εντάξει. Ακανά μπορίνελα τι κερέλ υπομονή, επειδή τζανέλα ότι κα αβέλ λατσσές. Αντικάς αμέν-ντα μπορίνασα τι κεράς υπομονή επειδή τθεράσα μπαρί σιγουριά κι ελπίδα αμαρί.

19. Σο χρειαζίντιβασα για τι κεράς υπομονή;

¹⁹ Σαρ ντικχλάμ, ο Ιεχωβά βοηθίνελα-αμέν τι κεράς υπομονή καζόμ νακχάσα δοκιμασίες αντράλ κατά προσευχή, πι Λαφίσταρ, αμαρέ πφραλένταρ ντα πφενίνταρ ντα κατά ελπίδα αμαρί. Άμα χρησιμοποιήνασα-λεν σαρέ ανταλά καζόμ πο λατσσές αβέλα-πες, ο Ιεχωβά κα βοηθίνελ-αμέν σο-ντα τι νακχάσα ακανά. Αντικάς κα συνεχίνας τι κεράς υπομονή μέχρι ο ντουνιάς ι Μπενγκέσκο ντα σαρέ ο βάσανα τι εξαφανίντιβεν ντιπ.​—Φιλιπ. 4:13.