Δεχτίνεν ι Αγάπη ι Ιεχωβάσκι

1. Σόσκε μανγκλέν τι υπηρετίνεν για πάντα ι Ιεχωβάς; (Ντικχέν ι φωτογραφία-ντα)

ΜΠΟΡΙΝΕΝΑ τι ανέν τουμαρέ γκοντιάτε ι προσευχή σο κερντέν κο Ιεχωβά για τι βακερέν λέσκε ότι μανγκένα τι υπηρετίνεν-λες για πάντα; Λιντέν ανταγιά απόφαση επειδή γνωριντέν-λες ντα μανγκλέν-λες. Ντινέν τουμαρό λάφι ότι κα τσσουβέν πρώτα τουμαρέ ζωγιάτε λέσκο θέλημας ντα ότι κα συνεχίνεν τι μανγκέν-λες σαρέ τουμαρέ γκίσαρ, τουμαρέ ψυχιάσαρ, τουμαρέ γκοντιάσαρ ντα τουμαρέ ζοριάσαρ. (Μάρκ. 12:30) Οτθάρ μπερί, τουμαρί αγάπη λέσκε καζόμ τζάλα αβέλα πο ζουρανί. Άρα σαρ κα απαντίνενας άμα κάποιος κα πουτσέλας-τουμέν: «Ισινάν σίγουρος ότι μανγκέσα ι Ιεχωβάς;» Χωρίς τι σακιντίνεν, κα βακερένας: «Βα, να μανγκάβα τίποτα ντα καεκχές πο μπουτ κατά Ιεχωβά!»

2, 3. Καλέ πραγμάσκε μανγκέλα ο Ιεχωβά τι αβάς σίγουροι, ντα σο κα σικλιάς ανταλέ μαθημάστε; (Ιερεμίας 31:3)

² Όμως, σαρ κα απαντίνενας άμα κάποιος κα πουτσέλας-τουμέν: «Ισινάν σίγουρος ότι ο Ιεχωβά μανγκέλα τουτ;» Μήπως κα σακιντίνενας τι απαντίνεν επειδή σκεφτίνενα ότι να αξίνενα ι αγάπη ι Ιεχωβάσκι; Εκ πφεν σο κάνα ισινέ χουρντί νακχέλας μπουτ δύσκολα πι φαμιλιάτε βακερντάς: «Τζανάβα ότι μανγκάβα ι Ιεχωβάς. Ισινόμ ντιπ σίγουρη ανταλέσκε. Όμως μπουτ φαρ να ισινόμ σίγουρη άμα ο Ιεχωβά μανγκέλα-μαν». Σο κα βοηθίνελ-τουμέν τι αγαβέν σαρ νιωθίνελα μπαγιά τουμένγκε ο Ιεχωβά;

³ Ο Ιεχωβά μανγκέλα τι αβέν ντιπ σίγουροι ότι τθερέλα τουμένγκε μπαρί αγάπη. (Διαβάνεν Ιερεμίας 31:3) Ισί μπαγιά ότι ο Ιεχωβά ταρτιντάς-αμέν πασέ πέστε. Ντα κάνα αφιερωντέν-τουμέν λέστε ντα μπολντιλέν, κερντάς τουμένγκε εκ μπαρό δώρος, πι αφοσιωμέ αγάπη. Ανταγιά αγάπη ισί μπουτ ζουρανί ντα ποτές να χασάρντιβελα. Επειδή ο Ιεχωβά σικαβέλα αφοσιωμέ αγάπη πι πιστέ υπηρετόντε ντικχέλα-λεν σαριλέν σαρ “εκ λαός σο ξεχωριντάς-λες πέσκε”. (Μαλ. 3:17) Ο Ιεχωβά μανγκέλα τι αβέν αζόμ σίγουροι ότι μανγκέλα-τουμέν, σαρ ισινέ ο απόστολος Παύλος. Βοβ γραφιντάς: «Ισινόμ ντιπ σίγουρος ότι ούτε ο μεριπέ ούτε η ζωή ούτε ο άγγελοι ούτε οντουλά σο κερένα κουμάντος ούτε ο πράγματα σο αβένα-πες ακανά ούτε οντουλά σο κα αβέν-πες ούτε καέκ ζορ ούτε ο πράγματα σο ισί οπρέ ούτε ο πράγματα σο ισί τελέ ούτε καέκ γιαβέρ πράγμας σο λατσσάρντιλο ναστί τσσιναβέλα-αμέν κατά αγάπη ι Ντεβλέσκι». (Ρωμ. 8:38, 39) Κο μάθημας ανταβά, κα ντικχάς σόσκε χρειαζίντιβελα τι αβάς ντιπ σίγουροι ότι ο Ιεχωβά μανγκέλα-αμέν ντα σαρ κα μπορίνας τι κεράς-λες ανταβά.

ΣΟΣΚΕ ΧΡΕΙΑΖΙΝΤΙΒΕΛΑ ΤΙ ΔΕΧΤΙΝΑΣ Ι ΑΓΑΠΗ Ι ΙΕΧΩΒΑΣΚΙ

4. Σαρ μπορίνασα τι τζας κόντρα σε εκ κατά πο πφιρνικανέ παγίδες ι Μπενγκέσκε;

⁴ Κάνα δεχτίνασα ι αγάπη ι Ιεχωβάσκι, μπορίνασα τι πολεμίνας ο “παγίδες ι Μπενγκέσκε”. (Εφεσ. 6:11) Ο Μπενγκ κα κερέλ τα πάντα για τι τσσιναβέλ-αμέν τι υπηρετίνας ι Ιεχωβάς. Εκ κατά παγίδες ι Μπενγκέσκε ισί τι κερέλ-αμέν τι πακιάς ο ψέμας ότι ο Ιεχωβά να μανγκέλα-αμέν. Η Γραφή βακερέλα ότι ο Μπενγκ μοιάζελα με λιοντάρι. (1 Πέτρ. 5:8, 9) Ο λιοντάρια μπεϊντίνενα τι κερέν επίθεση κο ζώα σο ισί μπίζουρανε ντα να μπορίνενα τι αρακχαβέν-πες. Αντικάς ο Μπενγκ-ντα μπουτ φαρ κερέλα αμένγκε επίθεση κάνα ισινάμ μπίζουρανε, κχινέ ή στεναχωριμέ επειδή νακχλάμ κάτι μπέτι ανγκλέ, τθεράσα προβλήματα ακανά ή νταράσα σο κα αβέλ-πες ανγκλ’ αμέντε. (Παρ. 24:10) Ο Μπενγκ πακιάλα ότι μπορίνελα τι κερέλ-αμέν τι αβάς αζόμ μπίζουρανε σο κα τσσιναβάς τι υπηρετίνας ι Ιεχωβάς. Αλλά μπορίνασα τι τζας «κόντρα κο Μπενγκ» ντα κο πφιρνικανέ παγίδες σο τσσουβέλα αμένγκε κάνα κεράσα σο νακχέλα αμαρέ βαστέσταρ για τι αβάς ντιπ σίγουροι ότι ο Ιεχωβά μανγκέλα-αμέν.​—1 Πέτρ. 5:8, 9· Ιακ. 4:7.

5. Σόσκε χρειαζίντιβασα τι νιωθίνας ότι ο Ιεχωβά μανγκέλα-αμέν ντα εκτιμίνελα-αμέν;

⁵ Κάνα δεχτίνασα ι αγάπη ι Ιεχωβάσκι, τζάσα πο πασέ λέστε. Σκεφτίνεν σόσκε μπορίνασα τι βακεράς-λες ανταβά. Ο Ιεχωβά κάνα κερντάς ι τζενέν τσσουντάς λένγκε ι ανάγκη τι σικαβέν αγάπη κο γιαβερά ντα τι λεν αγάπη κατά γιαβερά. Κάνα εκ τζενό σικαβέλα αμένγκε αγάπη, νικιόλα αμένταρ τι σικαβάς λέσκε αμέν-ντα. Άρα, καζόμ πο μπουτ νιωθίνασα ότι ο Ιεχωβά μανγκέλα-αμέν ντα εκτιμίνελα-αμέν, αζόμ πο μπουτ κα μανγκάς-λες αμέν-ντα. (1 Ιωάν. 4:19) Ντα καζόμ πο ζουρανί αβέλα αμαρί αγάπη λέσκε, αζόμ πο ζουρανί κα αβέλ λέσκι-ντα αγάπη αμένγκε. Η Γραφή βακερέλα ξεκάθαρα: «Τζαν πασέ κο Ντεβέλ, ντα κα αβέλ βοβ-ντα πασέ τουμέντε». (Ιακ. 4:8) Όμως σο μπορίνασα τι κεράς για τι αβάς ατζέ πο σίγουροι ότι ο Ιεχωβά μανγκέλα-αμέν;

ΣΟ ΜΠΟΡΙΝΕΛΑ ΤΙ ΒΟΗΘΙΝΕΛ-ΑΜΕΝ ΤΙ ΔΕΧΤΙΝΑΣ Ι ΑΓΑΠΗ Ι ΙΕΧΩΒΑΣΚΙ;

6. Σο μπορίνενα τι κερέν άμα να ισινέν σίγουροι ότι ο Ιεχωβά μανγκέλα-τουμέν;

⁶ Συνεχίνεν τι κερέν προσευχή κο Ιεχωβά για τι βοηθίνελ-τουμέν τι αγαβέν σόσκε μανγκέλα-τουμέν. (Λουκ. 18:1· Ρωμ. 12:12) Μπορεί τι χρειαζίντιβελ τι κερέν προσευχή λέστε μπουτ φαρ αντρέ κο ντιβές για τι βοηθίνελ-τουμέν τι ντικχέν τουμαρό νεαυτός σαρ ντικχέλα-λες βοβ. Μπάζιμα μπορεί τι νιωθίνενα αζόμ μπέτι τουμαρέ νεαυτόσκε σο δυσκολίντιβενα τι πακιάν ότι ο Ιεχωβά μανγκέλα-τουμέν. Όμως τι ντεν-τουμέν γκοντί ότι ο Ιεχωβά ισί πο μπαρό τουμαρέ γκίσταρ. (1 Ιωάν. 3:19, 20) Βοβ τζανέλα-τουμέν πο λατσσές απ’ ότι τζανένα τουμέν τουμαρό νεαυτός. Ντικχέλα τουμαρέ λατσσέ ιδιότητες σο ατζέ-ντα τουμέν μπορεί μα τι αγαβένα ότι τθερένα-λεν. (1 Σαμ. 16:7· 2 Χρον. 6:30) Οτθάρ μα σακιντίνεν «τι πουτρέν τουμαρό γκι λέστε» για τι βακερέν λέσκε σαρ νιωθίνενα ντα τι μανγκέν λέσταρ βοήθεια για τι δεχτίνεν λέσκι αγάπη. (Ψαλμ. 62:8) Αφού κα κερέν προσευχή, ισί σημαντικός τι κερέν ο πράγματα σο ισί πο τελέ.

7, 8. Σαρ ο Ψαλμοί κερένα-αμέν τι αβάς σίγουροι ότι ο Ιεχωβά μανγκέλα-αμέν;

⁷ Ντεν μπέσα οντουλέντε σο βακερέλα ο Ιεχωβά. Ο Ιεχωβά ντινάς πο πνεύμας κο μουρσά σο γραφιντέ ι Γραφή. Άρα σαρέ οντουλά σο βακερντέ ι Ιεχωβάσκε ισί μπαγιά. Σε εκ κατά ψαλμοί, ο Δαβίδ σικαβέλα εκχέ σουκάρ τροπόσαρ καζόμ μπουτ πφαμπόλα αμένγκε ο Ιεχωβά. Ο Δαβίδ γραφιντάς: «Ο Ιεχωβά ισί πασέ οντουλέντε σο τθερένα πφανγκό γκι· σώνελα οντουλέν σο ισί μπουτ στεναχωριμέ». (Ψαλμ. 34:18) Κάνα ισινέν στεναχωριμέ, μπορεί τι νιωθίνενα ότι καέκ να μπορίνελα τι αγαβέλ-τουμέν ή τι βοηθίνελ-τουμέν. Όμως ο Ιεχωβά ντέλα πο λάφι ότι αζομάν κα αβέλ πασέ τουμέντε επειδή ντικχέλα καζόμ μπουτ χρειαζίντιβενα λέσκι βοήθεια. Σε εκ γιαβέρ ψαλμός, ο Δαβίδ γραφιντάς: «Τσσουβ μο δάκρυα αντρέ τι παγουρίστε». (Ψαλμ. 56:8) Ο Ιεχωβά ντικχέλα κάνα ισινέν στεναχωριμέ ντα ντουκχάνα. Πφαμπόλα αντράλ πι γκίσταρ τουμένγκε ντα αγαβέλα τουμαρί ντουκχ. Ανέν τουμαρέ γκοντιάτε καζόμ σημαντικός ισί εκ παγούρι πανί εκχέ τζενέσκε σο πφιρέλα κι έρημος. Άκ’ αζόμ μπαρί αξία τθερένα ο δάκρυα αμαρέ ι Ιεχωβάσκε. Βοβ ντέλα-πες γκοντί ι κάθε φαρ σο ντουκχάσα ντα ροβάσα. Κο Ψαλμός 139:3, διαβάνασα: «[Ιεχωβά] τζανέσα λατσσές σαρέ μο ντρομά». Ο Ιεχωβά ντικχέλα σαρέ ο πράγματα σο κεράσα, αλλά ντέλα μπαρί προσοχή κο λατσσέ πράγματα σο κεράσα. (Εβρ. 6:10) Σόσκε; Επειδή τθερέλα μπαρί αξία λέσκε κάνα ντικχέλα-αμέν τι μαράς-αμέν τι κεράς λέσκο γκι.a

⁸ Ο Ιεχωβά ντέλα-αμέν μπουτ εδάφια κι Γραφή σο λοκχιαρένα αμαρό γκι ντα ισί σαρ τι βακερέλα αμένγκε: «Πφαμπάβα τούκε ντα μανγκάβα-τουτ μπουτ». Όμως σαρ ντικχλάμ πο πριν, ο Μπενγκ μανγκέλα τι κερέλ-αμέν τι πακιάς ο ψέμας ότι ο Ιεχωβά να μανγκέλα-αμέν. Άρα άμα κάποια στιγμή να ισινέν σίγουροι άμα μανγκέλα-τουμέν ο Ιεχωβά, ατσσόν χάνικ ντα πουτσέν τουμαρό νεαυτός: “Κας κα πακιάβ, ι Μπενγκές σο ισί «ο ντατ ι ψεμάσκο» ή ι Ντεβλές σο λέσταρ «αβέλα η αλήθεια»;”​—Ιωάν. 8:44· Ψαλμ. 31:5.

9. Καγιά σιγουριά ντέλα ο Ιεχωβά οντουλέντε σο μανγκένα-λες; (Έξοδος 20:5, 6)

⁹ Σκεφτίνεν σαρ νιωθίνελα ο Ιεχωβά οντουλένγκε σο μανγκένα-λες. Ανέν τουμαρέ γκοντιάτε σο βακερντάς ο Ιεχωβά κο Μωυσής ντα κο Ισραηλίτες. (Διαβάνεν Έξοδος 20:5, 6) Ο Ιεχωβά ντέλα πο λάφι ότι κα συνεχίνελ τι σικαβέλ αφοσιωμέ αγάπη οντουλέντε σο μανγκένα-λες. Ανταλά λάφια κερένα-αμέν σίγουρους ότι αμαρό αφοσιωμέ Ντεβέλ να αβέλα-πες τι λελ αγάπη πι υπηρετόνταρ ντα μα τι σικαβέλ λένγκε βοβ-ντα πι αγάπη. (Νεεμ. 1:5) Οτθάρ άμα μπάζιμα να ισινέν σίγουροι ότι ο Ιεχωβά μανγκέλα-τουμέν, ατσσόν χάνικ ντα πουτσέν-τουμέν: “Με μανγκάβα ι Ιεχωβάς;” Σοράν σκεφτίνεν ακαβά: Άμα μανγκένα-λες ντα μαρένα-τουμέν τι κερέν λέσκο γκι, μπορίνενα τι αβέν σίγουροι ότι βοβ-ντα μανγκέλα-τουμέν αντράλ πι γκίσταρ. (Δαν. 9:4· 1 Κορ. 8:3) Γιαβερέ λαφίντζαρ, άμα να τθερένα αμφιβολίες ότι μανγκένα ι Ιεχωβάς, σόσκε τθερένα αμφιβολίες ότι ο Ιεχωβά μανγκέλα τουμέν; Μπορίνενα τι αβέν ντιπ σίγουροι ότι βοβ κα μανγκέλ-τουμέν για πάντα ντα ποτές να κα μουκχέλ-τουμέν!

10, 11. Σαρ μανγκέλα ο Ιεχωβά τι ντικχάς ο λύτρος; (Γαλάτες 2:20)

¹⁰ Σκεφτίνεν ο λύτρος. Ο Ιεχωβά ντινάς ο πο μπαρό δώρος κο τζενέ κάνα μπουτσσαντάς πι τσσαβές, ι Ιησούς Χριστός, τι μερέλ αμένγκε. (Ιωάν. 3:16) Αλλά μπουτσσαντάς ο Ιεχωβά πι τσσαβές ι κάθε εκχέσκε ξεχωριστά; Βα! Σκεφτίνεν ι απόστολε Παυλός. Κερντάς κάποιες μπουτ μπαρέ αμαρτίες πριν τι αβέλ Χριστιανός, ντα ατζέ-ντα αφού αβιλό Χριστιανός, έπρεπε τι συνεχίνελ τι τζαλ κόντρα κο ατέλειες πιρέ. (Ρωμ. 7:24, 25· 1 Τιμ. 1:12-14) Όμως, μαρντάς-πες για τι ντικχέλ ο λύτρος σαρ εκ δώρος σο κερντάς λέσκε προσωπικά ο Ιεχωβά. (Διαβάνεν Γαλάτες 2:20) Ντεν-τουμέν γκοντί ότι ο Ιεχωβά ισινέ οντουβά σο ντινάς πο πνεύμας κο Παύλος για τι γραφίνελ ανταλά λάφια. Ντα σαρέ οντουλά σο ισί αντρέ κι Γραφή ισί αμαρέ σικλιαριμάσκε. (Ρωμ. 15:4) Ο Ιεχωβά μανγκέλα τι πακιάν τουμέν-ντα ότι η θυσία ι Ιησούσκι ισί εκ δώρος σο κερντάς κο κάθε εκ τουμένταρ προσωπικά. Κάνα κα ερεσέν κο σημείος τι ντικχέν αντικάς ο λύτρος, κα αβέν ατζέ πο σίγουροι ότι ο Ιεχωβά μανγκέλα-τουμέν προσωπικά.

¹¹ Βακεράσα ευχαριστώ κο Ιεχωβά σο μπουτσσαντάς ι Ιησούς κι πφουβ για τι μερέλ αμένγκε. Όμως εκ γιαβέρ λόγος σο αβιλό ο Ιησούς κι πφουβ ισινέ για τι βακερέλ ι αλήθεια ι Ντεβλέσκε. (Ιωάν. 18:37) Εκ κατά αλήθειες σο σικλιαρντάς-αμέν ο Ιησούς ισινέ καζόμ μπουτ μανγκέλα ο Ιεχωβά πι τσσαβέν.

ΣΑΡ ΒΟΗΘΙΝΕΛΑ-ΑΜΕΝ Ο ΙΗΣΟΥΣ ΤΙ ΔΕΧΤΙΝΑΣ Ι ΙΕΧΩΒΑΣΚΙ ΑΓΑΠΗ

12. Σόσκε μπορίνασα τι πακιάς οντουλά σο βακερντάς ο Ιησούς ι Ιεχωβάσκε;

¹² Κάνα ισινέ κι πφουβ, ο Ιησούς μπεϊντίνελας μπουτ τι βακερέλ κο τζενέ σο χαρακτήρας τθερέλα ο Ιεχωβά. (Λουκ. 10:22) Μπορίνασα τι πακιάς σαρέ οντουλά σο βακερέλας ο Ιησούς ι Ιεχωβάσκε. Σόσκε; Επειδή ο Ιησούς ισινέ πι Νταντέσαρ, ι Ιεχωβάσαρ κο ουρανός για μπουτ μπρεσά πριν τι αβέλ κι πφουβ. (Κολ. 1:15) Ο Ιησούς τζανέλα καζόμ μπουτ μανγκέλα-λες λέσκο Ντατ. Επίσης ντικχλάς σαρ λέσκο Ντατ σικαντάς αγάπη πι πιστέ αγγελόντε ντα σαρέ πι πιστέ τσσαβέντε ντα τσσαΐντε κι πφουβ. Σαρ βοηθίνελα ο Ιησούς γιαβερέν τι δεχτίνεν ι Ντεβλέσκι αγάπη;

13. Σαρ μανγκέλα ο Ιησούς τι ντικχάς ι Ιεχωβάς;

¹³ Ο Ιησούς μανγκέλα τι τζανάς σαρ νιωθίνελα μπαγιά ο Ιεχωβά αμένγκε. Κο Ευαγγέλια, ο Ιησούς βακερντάς ι Ιεχωβάσκε «Ντάντε» πο μπουτ από 160 φαρ. Ντα κάνα κερέλας λάφι πι μαθητέντε, χρησιμοποιήνελας λάφια σαρ “τουμαρό Ντατ” ή «τουμαρό Ντατ σο ισί κο ουρανός». (Ματθ. 5:16· 6:26) Πριν τι αβέλ ο Ιησούς κι πφουβ, ο πιστοί υπηρέτες ι Ιεχωβάσκε ντένας βίκος ι Ιεχωβάς, “Μπαρέα”, “Ζουρανέα”, “Δημιουργέ” ντα μπουτ γιαβερά. Αλλά μπουτ φαρ ο Ιησούς ντέλας βίκος ι Ιεχωβάς «Ντάντε». Ανταλά λάφια σικαβένα ότι ο Ιεχωβά μανγκέλα λέσκε πιστοί υπηρέτες τι νιωθίνεν πασέ λέστε σαρ εκ τσσαβό νιωθίνελα πασέ πι λατσσέ νταντέστε. Άρα, ο Ιησούς μανγκέλα τι ντικχάς ι Ιεχωβάς σαρ βοβ, δηλαδή σαρ αμαρό λατσσό Ντατ, σο μανγκέλα μπουτ πι αγαπημέ τσσαβέν. Ελάν τι ντικχάς ντούι περιπτώσεις σο ο Ιησούς βακερντάς ι Ιεχωβάσκε «Ντάντε».

14. Σαρ ο Ιησούς σικαντάς ότι ο κάθε εκ αμένταρ ισί πολύτιμος αμαρέ Νταντέσκε, ι Ιεχωβάσκε; (Ματθαίος 10:29-31) (Ντικχέν ι φωτογραφία-ντα)

¹⁴ Πρώτα ελάν τι ντικχάς σο βακερντάς ο Ιησούς κο Ματθαίος 10:29-31. (Διαβάνεν) Ο σπουργίτια ισί χουρντέ τσιρικλέ σο ποτές να κα σικαβένας αγάπη ή να κα ντένας λατρεία κο Ιεχωβά. Όμως, αμαρέ Νταντέσκε τθερέλα αζόμ μπαρί αξία εκ σπουργίτι σο τζανέλα ατζέ-ντα κάνα περέλα κι πφουβ. Άμα ι Ιεχωβάσκε τθερέλα αζόμ μπαρί αξία εκ χουρντό τσιρικλό, μπορίνασα τι αβάς σίγουροι ότι πφαμπόλα ατζέ πο μπουτ ι κάθε εκχέσκε αμένταρ σο μανγκάσα-λες ντα ντάσα-λες λατρεία! Επίσης ο Ιησούς βακερντάς ότι αμαρό Ντατ τζανέλα καζόμ μπαλά τθεράσα αμαρέ σορέστε. Αφού ο Ιεχωβά τζανέλα ατζέ-ντα χουρντέ πράγματα αμένγκε, μπορίνασα τι αβάς ντιπ σίγουροι ότι πφαμπόλα αμένγκε μπουτ. Σίγουρα, ο Ιησούς μανγκέλα τι δεχτίνας ότι ο κάθε εκ αμένταρ ισί πολύτιμος κο γιακχά αμαρέ Νταντέσκε σο ισί κο ουρανός.

15. Σο αγαβένα τουμαρέ Νταντέσκε σο ισί κο ουρανός κατά λάφια ι Ιησούσκε κο Ιωάννης 6:44;

¹⁵ Ντικχέν εκ γιαβέρ-ντα παράδειγμας σο βακερντάς ο Ιησούς κάνα χρησιμοποιηντάς ο λάφι «Ντατ». (Διαβάνεν Ιωάννης 6:44) Τουμαρό Ντατ σο ισί κο ουρανός βοηθιντάς-τουμέν τι γνωρίνεν-λες ντα τι μανγκέν-λες. Σόσκε κερντάς-λες ανταβά; Επειδή ντικχλάς αντρέ τουμαρέ γκίστε ο σουκάρ ιδιότητες σο τθερένα. (Πράξ. 13:48) Κάνα ο Ιησούς βακερντάς ο λάφια σο ισί κο Ιωάννης 6:44, μπορεί τι τθερέλας πι γκοντιάτε ο λάφια ι Ιεχωβάσκε σο ισί κο Ιερεμίας 31:3. Οτθέ ο Ιεχωβά βακερέλα πι λαόσκε: «Ταρτιντόμ-τουτ πασέ μάντε με αφοσιωμέ αγάπη». (Ιερ. 31:3· ντικχέν Ωσηέ 11:4) Σκεφτίνεν σο μανγκέλα τι βακερέλ ανταβά. Αμαρό αγαπημέ Ντατ σο ισί κο ουρανός ντικχέλα πάντα ο σουκάρ ιδιότητες σο τθεράσα ατζέ-ντα κάνα αμέν ναστί ντικχάσα-λεν.

16. (α) Σο βακερέλα αμένγκε ο Ιησούς, ντα σόσκε πρέπει τι πακιάς-λες; (β) Σαρ μπορίνασα τι αβάς πο σίγουροι ότι ο Ιεχωβά ισί ο Ντατ σο χρειαζίντιβασα; (Ντικχέν ο πλαίσιος «Ο Ντατ σο Σαρέ Χρειαζίντιβασα»)

¹⁶ Κάνα ο Ιησούς βακερντάς ότι ο Ιεχωβά ισί αμαρό Ντατ, ισί σαρ τι βακερέλα αμένγκε: «Ο Ιεχωβά νανέ σάντε μιρό Ντατ, ισί εμ τουμαρό Ντατ. Μανγκάβα τι αβέν σίγουροι ότι σικαβέλα αγάπη ντα πφαμπόλα ι κάθε εκχέσκε τουμένταρ προσωπικά». Άρα, άμα μπάζιμα να ισινέν σίγουροι άμα μανγκέλα-τουμέν ο Ιεχωβά, ανέν τουμαρέ γκοντιάτε οντουβά σο βακερντάς ο Ιησούς ντα πακιάν-λες, σόσκε βοβ βακερέλα πάντα ι αλήθεια ντα ισί οντουβά σο τζανέλα αμαρέ Νταντές πο λατσσές σαριλένταρ.​—1 Πέτρ. 2:22.

ΣΥΝΕΧΙΝΕΝ ΤΙ ΜΠΑΡΙΑΡΕΝ ΤΟΥΜΑΡΙ ΣΙΓΟΥΡΙΑ

17. Σόσκε πρέπει τι συνεχίνας τι μπαριαράς αμαρί σιγουριά ότι ο Ιεχωβά μανγκέλα-αμέν;

¹⁷ Χρειαζίντιβελα τι μπαριαράς αμαρί σιγουριά ότι ο Ιεχωβά μανγκέλα-αμέν. Ντεν-τουμέν γκοντί ότι ο Μπενγκ κερέλα σο νακχέλα λέσκε βαστέσταρ για τι τσσιναβέλ-αμέν τι υπηρετίνας ι Ιεχωβάς. Μανγκέλα τι κερέλ-αμέν τι χασαράς αμαρί ζορ. Οτθάρ να κα παρατίνελ-λεν ντα κα μαρέλ-πες τι κερέλ-αμέν τι πακιάς ότι ο Ιεχωβά να μανγκέλα-αμέν. Δεν πρέπει τι μουκχάς ι Μπενγκές τι νικίνελ!​—Ιώβ 27:5.

18. Σαρ μπορίνενα τι μπαριαρέν τουμαρί σιγουριά ότι ο Ιεχωβά μανγκέλα-τουμέν;

¹⁸ Για μα τι τσσιναβέν τι μπαριαρέν τουμαρί σιγουριά ότι ο Ιεχωβά μανγκέλα-τουμέν, συνεχίνεν τι κερέν προσευχή λέστε για τι βοηθίνελ-τουμέν τι ντικχέν τουμαρό νεαυτός αντικάς σαρ ντικχέλα-τουμέν βοβ. Σκεφτίνεν λατσσές ο εδάφια ι Γραφιάκε σο σικαβένα καζόμ μπουτ πφαμπόλα ο Ιεχωβά οντουλένγκε σο μανγκένα-λες. Ντεν-τουμέν γκοντί ότι ο Ιεχωβά πάντα κα μανγκέλ οντουλέν σο μανγκένα-λες. Σκεφτίνεν σόσκε πρέπει τι ντικχέν ο λύτρος σαρ εκ δώρος σο κερντάς τουμένγκε προσωπικά ο Ντεβέλ. Ντα ντεν μπέσα κο Ιησούς σο βακερντάς ότι ο Ιεχωβά ισί τουμαρό Ντατ. Αντικάς, άμα κάποιος κα πουτσέλ-τουμέν: «Ισινάν σίγουρος ότι ο Ιεχωβά μανγκέλα-τουτ;» Κα μπορίνεν τι απαντίνεν με σιγουριά: «Βα, ισινόμ! Ντα κεράβα σο νακχέλα μι βαστέσταρ για τι σικαβάβ λέσκε με-ντα μι αγάπη!»