Δεχτίνεν ι Συγχώρηση ι Ιεχωβάσκι

1, 2. Σο κερέλα ο Ιεχωβά κάνα μετανιώνασα αμαρέ αμαρτιένγκε; (Ντικχέν ι φωτογραφία-ντα)

Ο ΒΑΣΙΛΙΑΣ Δαβίδ τζανέλας σαρ ισί τι τθερέλ εκ τζενό τύψεις ιτιρί κατά πουρανέ αμαρτίες σο κερντάς. (Ψαλμ. 40:12· 51:3· οπραϊνέ λάφια) Βοβ κερντάας κάποιες μπουτ μπαρέ αμαρτίες πι ζωγιάτε. Όμως μετανιωσάλο μπαγιά, κερντάς αλλαγές ντα ο Ιεχωβά συγχωριντάς-λες. (2 Σαμ. 12:13) Ο Δαβίδ χαιρισάλο μπουτ κάνα αγαντάς ότι ο Ιεχωβά συγχωριντάς-λες.​—Ψαλμ. 32:1.

² Σαρ ο Δαβίδ, αντικάς αμέν-ντα μπορίνασα τι νιωθίνας χαρούμενοι κάνα αγαβάσα ότι ο Ιεχωβά τζιτζισάλο αμένγκε ντα συγχωριντάς αμαρέ αμαρτίες. Ατζέ-ντα άμα κερντάμ εκ σοβαρή αμαρτία, λοκχιόλα αμαρό γκι σο τζανάσα ότι ο Ιεχωβά κα συγχωρίνελ-αμέν άμα μετανιωσάλαμ μπαγιά, κερντάμ προσευχή λέστε για τι συγχωρίνελ-αμέν, κερντάμ λάφι ι πρεσβυτερόντζαρ ντα κεράσα σο-ντα μπορίνασα για μα τι ξανακεράς ο ίδιος! (Παρ. 28:13· Πράξ. 26:20· 1 Ιωάν. 1:9) Ντα ισινάμ μπουτ χαρούμενοι σο κάνα ο Ιεχωβά συγχωρίνελα αμαρί αμαρτία, ποτές ξανά να κα κατηγορίνελ-αμέν ή να κα τιμωρίνελ-αμέν ανταλάκε!​—Ιεζ. 33:16.

3, 4. Σαρ νιωσάλι εκ πφεν σοράν κατά μπολντιπέ λάκο, ντα σο κα ντικχάς ανταλέ μαθημάστε;

³ Όμως, κάποιες φαρ μπορεί μα τι αβάς σίγουροι ότι ο Ιεχωβά συγχωριντάς-αμέν μπαγιά. Αντικάς νιωθίνελας η Τζένιφερ. Λάκο ντατ ντα λάκι ντάι σικλιαρένας-λα ι Ιεχωβάσκε. Αλλά κάνα μπαριλί χάνικ, αρχισάλι τι κερέλ μπέτι πράγματα αποτσοράλ. Όμως, κάποια μπρεσά πο σοράν κερντάς αλλαγές, αφιερωντάς-πες κο Ιεχωβά ντα μπολντιλί. Βόι βακερέλα: «Ανγκλέ, κεράβας λουμνιπέ, ματιάβας, τθεράβας μπουτ νεύρα ντα ο πο σημαντικός πράγμας μάνγκε ισινέ τι νικαβάβ λοβέ. Τζανάβας ότι η Αγία Γραφή βακερέλα ότι χάρη κι θυσία κι Χριστόσκι, ο Ιεχωβά μπορίνελα τι συγχωρίνελ αμαρέ αμαρτίες. Αλλά παρόλο σο μετανιωσάλομ ντα μανγκλόμ κατά Ιεχωβά τι συγχωρίνελ-μαν, να πακιάβας μπαγιά ότι συγχωριντάς-μαν».

⁴ Μπορεί μπάζιμα τι δυσκολίντιβενα τι πακιάν ότι ο Ιεχωβά συγχωριντάς-τουμέν για το πουρανέ λάθη σο κερντέν. Αλλά ο Ιεχωβά συγχωρίνελα μπουτ. Ο Δαβίδ ισινέ ντιπ σίγουρος ότι ο Ιεχωβά συγχωριντάας-λες ντα οτθάρ νιωθίνελας μπαρί χαρά. Ο Ιεχωβά μανγκέλα τι νιωθίνας αμέν-ντα ο ίδιος. Ανταλέ μαθημάστε, κα ντικχάς σόσκε χρειαζίντιβελα τι δεχτίνας ι συγχώρηση ι Ιεχωβάσκι ντα σο μπορίνελα τι βοηθίνελ-αμέν τι κεράς-λες ανταβά.

ΣΟΣΚΕ ΧΡΕΙΑΖΙΝΤΙΒΕΛΑ ΤΙ ΔΕΧΤΙΝΑΣ Ι ΙΕΧΩΒΑΣΚΙ ΣΥΓΧΩΡΗΣΗ;

5. Σο μανγκέλα ο Μπενγκ τι πακιάς; Βακερέν εκ παράδειγμας.

⁵ Κάνα δεχτίνασα ι συγχώρηση ι Ιεχωβάσκι, μπορίνασα τι νασάς ντουρ κατά παγίδες ι Μπενγκέσκε. Τι ντεν-τουμέν γκοντί ότι ο Μπενγκ κα κερέλ σο-ντα μπορίνελα για τι τσσιναβέλ-αμέν τι υπηρετίνας ι Ιεχωβάς. Για τι πετυχίνελ-λες ανταβά, ο Μπενγκ μπορεί τι προσπαθίνελ τι κερέλ-αμέν τι πακιάς ότι αμαρέ αμαρτίες ναστί συγχωρίντιβενα. Σκεφτίνεν σο αβιλό-πες ι μουρσέσαρ κι Κόρινθος σο η κχανγκιρί ατσσικιαρντάας-λες ντουρ επειδή κερντάας λουμνιπέ. (1 Κορ. 5:1, 5, 13) Πο σοράν ανταβά μουρς μετανιωσάλο. Αλλά ο Μπενγκ μανγκέλας ο πφραλά κι κχανγκιρί μα τι συγχωρίνεν ανταλέ μουρσές ντα μα τι καλωσορίνεν-λες παλάλ κι κχανγκιρί. Ντα άμα η κχανγκιρί να κα συγχωρίνελας-λες, ανταβά μουρς μπέκιμ τι αμντίνελας ότι ο Ιεχωβά να κα μπορίνελας ποτές τι συγχωρίνελ-λες. Αντικάς, μπορεί τι νιωθίνελας αζόμ στεναχωριμέ σο ανταβά τι κερέλας-λες τι τσσιναβέλ τι υπηρετίνελ ι Ιεχωβάς. Άκ’ ανταβά μανγκέλας ο Μπενγκ. Αντιβές-ντα, ο Μπενγκ μανγκέλα τι νιωθίνας ότι ο Ιεχωβά να μπορίνελα ποτές τι συγχωρίνελ αμαρέ αμαρτίες, ντα αντικάς τι τσσιναβάς τι υπηρετίνας ι Ιεχωβάς. Αλλά αμέν «τζανάσα μπουτ λατσσές οντουλά σο μανγκέλα τι κερέλ».​—2 Κορ. 2:5-11.

6. Σο μπορίνελα τι βοηθίνελ-αμέν κάνα συνεχίνενα τι χαν-αμέν ο τύψεις;

⁶ Κάνα δεχτίνασα μπαγιά ότι ο Ιεχωβά συγχωριντάς-αμέν, μπορίνασα τι τσσιναβάς τι νιωθίνας τύψεις. Κάνα κεράσα εκ αμαρτία, νιωθίνασα μπέτι οντουλέσκε σο κερντάμ. (Ψαλμ. 51:17) Ανταβά ισί λατσσό. Κάνα νιωθίνασα τύψεις, ανταβά τσσίντελα-αμέν τι αλλάνας ντα τι κεράς ο σωστός. (2 Κορ. 7:10, 11) Αλλά άμα κα συνεχίνας τι νιωθίνας ότι ο Ιεχωβά να συγχωριντάς-αμέν, μπορεί τι σταματίνας τι υπηρετίνας-λες. Όμως, άμα κα δεχτίνας ότι ο Ιεχωβά συγχωριντάς-αμέν μπαγιά, κα σταματίνας τι νιωθίνας τύψεις. Αντικάς, κα μπορίνας τι συνεχίνας τι υπηρετίνας-λες, κα νιωθίνας σίγουροι ότι χαιρίνελα αμέντζαρ ντα κα αβάς πάλι ευτυχισμέ. Ανταβά μανγκέλα ο Ιεχωβά αμένγκε. (Κολ. 1:10, 11· 2 Τιμ. 1:3) Αλλά σαρ μπορίνασα τι αλλάνας αμαρέ αισθήματα ντα τι αβάς σίγουροι ότι ο Ιεχωβά συγχωριντάς-αμέν;

ΣΟ ΜΠΟΡΙΝΕΛΑ ΤΙ ΒΟΗΘΙΝΕΛ-ΑΜΕΝ ΤΙ ΔΕΧΤΙΝΑΣ Ι ΣΥΓΧΩΡΗΣΗ Ι ΙΕΧΩΒΑΣΚΙ;

7, 8. Σο βακερντάς αμένγκε ο Ιεχωβά πι νεαυτόσκε, ντα καλέ πραγμάσκε μπορίνασα τι αβάς σίγουροι; (Έξοδος 34:6, 7)

⁷ Σκεφτίνεν σο βακερντάς ο Ιεχωβά για το χαρακτήρας πιρό. Για παράδειγμας, ντεν-τουμέν γκοντί σο βακερντάς ο Ιεχωβά κο Μωυσής κάνα μανγκέλας τι σικλιόλ πο μπουτ ι Ιεχωβάσκε.a (Διαβάνεν Έξοδος 34:6, 7) Παρόλο σο ο Ιεχωβά τθερέλα αζόμ μπουτ ντα σουκάρ ιδιότητες, τραμπιντάς τι βακερέλ κο Μωυσής ότι ισί «Ντεβέλ σο τζιτζίνελα ντα πφαμπόλα ι γιαβερένγκε». Κα μπορίνελας εκ ασακό Ντεβέλ μα τι μανγκέλ τι συγχωρίνελ πι υπηρετής σο μετανιωσάλο μπαγιά πι αμαρτιάκε; Σίγουρα όχι! Άμα ο Ιεχωβά να κα συγχωρίνελας εκχέ ασακέ τζενές, κα σικαβέλας ότι τθερέλας σουκό γκι. Ο Ιεχωβά να κα κερέλας ποτές κάτι ασακό!

⁸ Μπορίνασα τι αβάς σίγουροι ότι κάνα ο Ιεχωβά βακερέλα ότι συγχωρίνελα-αμέν, βακερέλα ι αλήθεια. Ποτές να βακερέλα ψέματα. (Ψαλμ. 31:5) Άρα, μπορίνασα τι πακιάς λέσκε λάφια. Άμα ισί τουμένγκε δύσκολος τι πακιάν ότι ο Ιεχωβά συγχωριντάς-τουμέν μπαγιά, πουτσέν τουμαρό νεαυτός: “Πακιάβα ότι ο Ιεχωβά συγχωρίνελα μπαγιά, πφαμπόλα ι τζενένγκε ντα μπορίνελα τι συγχωρίνελ σαρέ οντουλέν σο μετανιώνενα πουμαρέ αμαρτιένγκε;” Άμα πακιάνα-λες ανταβά, μπορίνενα τι αβέν σίγουροι ότι ο Ιεχωβά συγχωριντάς τουμέν-ντα.

9. Σο σικλιαρέλα-αμέν ο εδάφιος Ψαλμός 32:5 για το τρόπος σο συγχωρίνελα ο Ιεχωβά αμαρέ αμαρτίες;

⁹ Σκεφτίνεν σο σικλιαρέλα-αμέν ο Ιεχωβά αντράλ κατά Αγία Γραφή για το τρόπος σο συγχωρίνελα-αμέν. Για παράδειγμας ντικχέν σο βακερντάς ο Δαβίδ, σο γραφιντάς κι Γραφή, για τη συγχώρηση ι Ιεχωβάσκι. (Διαβάνεν Ψαλμός 32:5) «Τούι συγχωριντάν μο λάθη ντα μο αμαρτίες», βακερντάς ο Δαβίδ. Ο εβραϊκός λάφι σο μεταφράντιβελα “συγχωρίναβα” ανταλέ εδαφιόντε μανγκέλα τι βακερέλ «βάνταβα», «νασκιαράβα» ή «ακχαράβα». Άρα, κάνα ο Ιεχωβά συγχωριντάς τον Δαβίδ, βοβ νιωσάλο σαρ τι βαντιντάς λέσκο πφαρό φορτίος. Ο Δαβίδ μπορίνελας τι νιωθίνελ μπαρί χαρά επειδή τζανέλας ότι ο Ιεχωβά συγχωριντάς-λες ντιπ. (Ψαλμ. 32:2-4) Μπορίνασα αμέν-ντα τι νιωθίνας ι ίδια χαρά. Άμα μετανιώνασα μπαγιά για το λάθη αμαρέ, να χρειαζίντιβελα τι συνεχίνας τι νιωθίνας τύψεις οντουλένγκε σο κερντάμ. Οκιά μπάνταρ, μπορίνασα τι αβάς χαρούμενοι σο ο Ιεχωβά συγχωριντάς-αμέν ντιπ.

10, 11. Σο σικλιάσα ι Ιεχωβάσκε κατά λάφια “έτοιμος τι συγχωρίνελ”; (Ψαλμός 86:5)

¹⁰ Διαβάνεν Ψαλμός 86:5. Ο Δαβίδ βακερέλα ατθέ ότι ο Ιεχωβά ισί “έτοιμος τι συγχωρίνελ”. Σαρ βακερέλα εκ βιβλίος σο ασχολίντιβελα ι Γραφιάσαρ για το εδάφιος ανταβά: «[Ο Ιεχωβά] “συγχωρίνελα” ντα ανταβά ισί κάτι σο “νικιόλα λέσταρ”». Σόσκε η συγχώρηση ισί κάτι σο νικιόλα φυσικά κατά Ιεχωβά; Ο γιαβέρ κομμάτι ι εδαφιόσκο βακερέλα: «Σικαβέσα αφοσιωμέ αγάπη σαρέ οντουλένγκε σο ρόντενα τούκε». Κο γιαβέρ μάθημας σικλιλάμ ότι ο Ιεχωβά ντέλα πο λάφι τι σικαβέλ αφοσιωμέ αγάπη οντουλέντε σο μανγκένα-λες ντα ποτές να κα μουκχέλ-λεν. Η αφοσιωμέ αγάπη κα τσσίντελ-λες τι «συγχωρίνελ μπουτ» σαρέ οντουλέν σο μετανιώνενα. (Ησ. 55:7) Άμα δυσκολίντιβενα τι δεχτίνεν ότι ο Ιεχωβά συγχωριντάς-τουμέν για κάτι σο κερντέν ανγκλέ, μπορίνενα τι πουτσέν-τουμέν: “Πακιάβα ότι ο Ιεχωβά ισί έτοιμος τι συγχωρίνελ σαρέ οντουλέν σο μετανιώνενα ντα μολίνενα-λες τι τζιτζίνελ λένγκε; Άμα βα, μπορίναβα τι αβάβ σίγουρος ότι συγχωριντάς μαν-ντα κάνα μανγκλόμ λέσταρ τι τζιτζίνελ μάνγκε ντα τι συγχωρίνελ-μαν”.

¹¹ Η Αγία Γραφή βακερέλα αμένγκε επίσης ότι ο Ιεχωβά αγαβέλα ντιπ σαρ ισινάμ κερντέ ντα ότι ισινάμ ατελείς. Ανταβά μπορίνελα τι λοκχιαρέλ αμαρό γκι. (Ψαλμ. 139:1, 2) Για τι ντικχάς σο βακερντάς ο Δαβίδ σε εκ γιαβέρ ψαλμός ντα σαρ ανταβά μπορίνελα τι βοηθίνελ-αμέν επίσης τι πακιάς ότι ο Ιεχωβά μανγκέλα τι συγχωρίνελ-αμέν.

ΜΑ ΜΠΙΣΤΡΕΝ ΟΝΤΟΥΒΑ ΣΟ ΝΤΕΛΑ-ΠΕΣ ΓΚΟΝΤΙ Ο ΙΕΧΩΒΑ

12, 13. Σαρ βακερέλα ο εδάφιος Ψαλμός 103:14, σο ντέλα-πες γκοντί ο Ιεχωβά αμένγκε ντα σο τσσίντελα-λες τι κερέλ ανταβά;

¹² Διαβάνεν Ψαλμός 103:14. Ο Δαβίδ βακερέλα ότι ο Ιεχωβά «ντέλα-πες γκοντί ότι ισινάμ τσικ». Ανταλέ λαφίντζαρ, ο Δαβίδ βακερέλα εκ κατά λόγους σο ο Ιεχωβά ισί έτοιμος τι συγχωρίνελ πι υπηρετόν σο μετανιωσάλε: Ντέλα-πες γκοντί πάντα ότι ισινάμ ατελείς. Για τι αγαβάς-λες πο λατσσές, ελάν τι ντικχάς πο προσεκτικά ο λάφια ι Δαβιδίσκε.

¹³ Ο Ιεχωβά κερντάς τον Αδάμ «κατά πράχος ι πφουβιάκο» ή γιαβέρτουλους κατά τσικ. Οτθάρ, τζανέλα σαρ ισί κερντέ ο τζενέ ντα σο χρειαζίντιβενα. Για παράδειγμας, πρέπει τι χαν, τι σοβέν ντα τι λεν ανάσα. Ατζέ-ντα ο τέλεια τζενέ χρειαζίντιβενα ανταλά πράγματα. (Γέν. 2:7) Αλλά επειδή ο Αδάμ ντα η Εύα αμαρτιντέ, ο τζενέ αβιλέ πράχος εκχέ γιαβερέ-ντα τροπόσαρ. Ισινάμ πράχος επειδή ισινάμ ατελείς ντα πρέπει τι τζας κόντρα αμαρέ νεαυτόσαρ για μα τι κεράς μπέτι πράγματα. Ο Ιεχωβά τζανέλα-λες μπουτ λατσσές ανταβά. Αλλά κάνα ο Δαβίδ βακερντάς ότι ο Ιεχωβά ντέλα-πες γκοντί ότι ισινάμ τσικ, μανγκέλα τι βακερέλ επίσης ότι επειδή ο Ιεχωβά τζανέλα ότι ισινάμ ατελείς, τζιτζίνελα αμένγκε πάντα. Χάνικ λαφίντζαρ, ο Δαβίδ ισί σαρ τι βακερέλα: Ο Ιεχωβά αγαβέλα ότι κάποιες φαρ κα κεράς λάθη. Κάνα αβέλα-πες ανταβά αλλά μετανιώνασα μπαγιά, ι Ιεχωβάσκο γκι τσσίντελα-λες τι τζιτζίνελ αμένγκε ντα τι συγχωρίνελ-αμέν.​—Ψαλμ. 78:38, 39.

14. (α) Σο γιαβέρ βακερέλα ο Δαβίδ για το τρόπος σο συγχωρίνελα ο Ιεχωβά; (Ψαλμός 103:12) (β) Σο μπορίνασα τι σικλιάς κατά τρόπος σο ο Ιεχωβά συγχωριντάς ι Δαβιδίς; (Ντικχέν ο πλαίσιος «Σαρ ο Ιεχωβά Συγχωρίνελα ντα Μπιστρέλα»)

¹⁴ Σο γιαβέρ μπορίνελα τι βοηθίνελ-αμέν τι αβάς σίγουροι ότι ο Ιεχωβά συγχωριντάς-αμέν; (Διαβάνεν Ψαλμός 103:12) Ο Δαβίδ βακερέλα ότι, κάνα ο Ιεχωβά συγχωρίνελα, τσσουβέλα αμαρέ αμαρτίες “αζόμ ντουρ καζόμ ισί η ανατολή κατά δύση”. Η ανατολή ισί οτθάρ σο νικιόλα ο κχαμ ντα η δύση ισί οτθάρ σο περέλα. Ανταλά ντούι τθανά να συναντίντιβενα ποτές ντα τθερένα ι πο μπαρί απόσταση σο υπαρχίντιβελα. Σο σικαβέλα αμένγκε ανταβά για το τρόπος σο συγχωρίνελα ο Ιεχωβά αμαρέ αμαρτίες; Εκ βιβλίος σο εξηγίνελα ανταβά εδάφιος βακερέλα ότι ο Ντεβέλ λέλα αμαρέ αμαρτίες αζόμ ντουρ αμένταρ, σαρ εκ μυρωδιά σο εξαφανίντιλι ντιπ. Οτθάρ, μπορίνασα τι αβάς σίγουροι ότι ποτές ξανά να κα σκεφτίνελ-λεν ή κα ανέλ-λεν αμαρέ γκοντιάτε. Μπάζιμα, εκ μυρωδιά μπορίνελα τι κερέλ-αμέν τι σκεφτίνας κάτι σο αβιλόας-πες πο ανγκλέ. Αλλά κάνα ο Ιεχωβά συγχωρίνελα, ισί σαρ μα τι ατσσόλα ούτε εκ στάλα μυρωδιά σο κα κερέλας-λες τι ντελ-πες γκοντί ι αμαρτία ντα τι χρησιμοποιήνελ-λα για τι τιμωρίνελ-αμέν.​—Ιεζ. 18:21, 22· Πράξ. 3:19.

15. Σο μπορίνασα τι κεράς άμα νιωθίνασα τύψεις για το πουρανέ λάθη σο κερντάμ;

¹⁵ Σαρ μπορίνενα ο λάφια ι Δαβιδίσκε κο Ψαλμός 103 τι βοηθίνεν-αμέν τι δεχτίνας ι συγχώρηση ι Ιεχωβάσκι; Άμα ο τύψεις για εκ αμαρτία σο κερντάμ ανγκλέ να νασένα, μπορίνασα τι σκεφτίνας: “Ο Ιεχωβά ντέλα-πες γκοντί ότι ισινόμ ατελής ντα συγχωρίνελα εκχέ τζενές σο μετανιώνελα, σαρ κερντόμ με. Μήπως με μπιστράβα-λες ανταβά; Επίσης ο Ιεχωβά τραμπίνελα τι μπιστρέλ μο πουρανέ αμαρτίες σο συγχωριντάς-λεν ντα να χρησιμοποιήνελα-λεν για τι κατηγορίνελ-μαν. Μήπως με ντάβα-μαν γκοντί ανταλά;” Ο Ιεχωβά να ατσσόλα κο πουρανέ αμαρτίες αμαρέ. Ούτε αμέν πρέπει τι κεράς-λες ανταβά. (Ψαλμ. 130:3) Κάνα δεχτίνασα ι συγχώρηση ι Ιεχωβάσκι, κα μπορίνας τι συγχωρίνας αμαρό νεαυτός για το πουρανέ λάθη σο κερντάμ ντα τι συνεχίνας τι υπηρετίνας ι Ιεχωβάς χαράσαρ.

16. Βακερέν εκ παράδειγμας σο σικαβέλα ότι ισί επικίνδυνος τι σκεφτίνας συνέχεια ο πουρανέ αμαρτίες. (Ντικχέν ι φωτογραφία-ντα)

¹⁶ Σκεφτίνεν ακαβά παράδειγμας. Κάνα εκ τζενό οδηγίνελα εκ κούρσα, μπορίνελα τι ντικχέλ κο ανιάς για τι αγαβέλ σο αβέλα παλάλ λέσταρ. Μπορίνελα τι κερέλ-λες ανταβά μπάζιμα, αλλά κα αβέλας επικίνδυνος άμα κα ντικχέλας κο ανιάς συνέχεια. Για τι οδηγίνελ χωρίς τι παθίνελ ζιάνι, πρέπει τι συνεχίνελ τι ντικχέλ κο ντρομ ανγκλάλ. Αντικάς-ντα, μπορεί μπάζιμα τι αβέλ λατσσό τι σκεφτίνας αμαρέ πουρανέ λάθη. Ανταβά μπορεί τι βοηθίνελ-αμέν μα τι κεράς πάλι ο ίδιος λάθος. Αλλά άμα συνεχίνασα τι ντικχάς ο πουρανέ λάθη σο κερντάμ, μπορεί τι χασαράς αμαρί χαρά ντα μα τι ντας κο Ιεχωβά ο πο λατσσό σο μπορίνασα. Αντίς τι κεράς-λες ανταβά, μανγκάσα τι τθεράς αμαρέ γιακχά κι υπηρεσία κι Ιεχωβάσκι. Ισινάμ κο ντρομ σο γκερέλα κο νεβό ντουνιάς, σο οτθέ ο μπέτι πράγματα σο τζουβντιλάμ «να κα αβέν κι γκοντί».​—Ησ. 65:17· Παρ. 4:25.

ΣΥΝΕΧΙΝΕΝ ΤΙ ΑΒΕΝ ΣΙΓΟΥΡΟΙ ΑΝΤΡΕ ΤΟΥΜΑΡΕ ΓΚΙΣΤΕ

17. Σόσκε χρειαζίντιβελα τι συνεχίνας τι αβάς σίγουροι αντρέ αμαρέ γκίστε ότι ο Ιεχωβά μανγκέλα-αμέν ντα συγχωρίνελα-αμέν μπαγιά;

¹⁷ Πρέπει τι συνεχίνας τι αβάς σίγουροι αντρέ αμαρέ γκίστε ότι ο Ιεχωβά μανγκέλα-αμέν ντα ότι ισί πάντα έτοιμος τι συγχωρίνελ-αμέν. (1 Ιωάν. 3:19, υποσ.) Σόσκε; Επειδή ο Μπενγκ κα συνεχίνελ τι κερέλ-αμέν τι νιωθίνας ότι επειδή ισινάμ ατελείς ο Ιεχωβά να κα μπορίνελ τι μανγκέλ-αμέν ούτε τι συγχωρίνελ-αμέν ποτές. Καβά-ντα τρόπος τι χρησιμοποιήνελ, λέσκο στόχος να αλλαξάλο. Μανγκέλα τι τσσιναβάς τι υπηρετίνας ι Ιεχωβάς. Μπορίνασα τι μπεκλεντίνας ότι κα μαρέλ-πες πο μπουτ τι κερέλ-αμέν τι σταματίνας, επειδή τζανέλα ότι σε χάνικ να κα υπαρχίντιβελ. (Αποκ. 12:12) Δεν πρέπει τι μουκχάς-λες τι νικίνελ!

18. Σο μπορίνενα τι κερέν για τι αβέν σίγουροι ότι ο Ιεχωβά μανγκέλα-τουμέν ντα συγχωρίνελα-τουμέν;

¹⁸ Ο γιαβέρ μάθημας σικλιαρντάς-τουμέν σο χρειαζίντιβελα τι κερέν για τι αβέν πο σίγουροι ότι ο Ιεχωβά μανγκέλα-τουμέν. Ανταβά μάθημας σικλιαρντάς-τουμέν σαρ τι αβέν σίγουροι ότι ο Ιεχωβά συγχωριντάς-τουμέν. Για παράδειγμας, ντεν-τουμέν γκοντί σο βακερντάς ο Ιεχωβά για το χαρακτήρας πιρό. Ντεν τουμαρέ σαατίσταρ για τι σκεφτίνεν λατσσές σο βακερέλα η Αγία Γραφή για το τρόπος σο συγχωρίνελα ο Ιεχωβά. Μα μπιστρέν ότι βοβ τζανέλα ότι ισινάμ ατελείς ντα ότι τζιτζίνελα αμένγκε. Ντα επίσης ντεν-τουμέν γκοντί ότι κάνα συγχωρίνελα, συγχωρίνελα ντιπ. Οτθάρ, μπορίνενα τι νιωθίνεν ευτυχισμέ επειδή κα αβέν σίγουροι ότι ο Ιεχωβά συγχωρίνελα, ντα σαρ ο Δαβίδ μπορίνενα τι βακερέν: «Ευχαριστώ, Ιεχωβά, σο “τούι συγχωριντάν μο λάθη ντα μο αμαρτίες”!»​—Ψαλμ. 32:5.