Βοηθίνεν Οντουλένγκε Τσσαβέν σο Ισί «Γιαβερέ Τθεμένταρ»

1, 2. (α) Καβά πρόβλημας τθερένα μπουτ τσσαβέ σο λένγκο ντατ ντα λένγκι ντάι ισί μετανάστες; (β) Καλά ερωτήσεις κα ντικχάς ανταλέ μαθημάστε;

«ΧΟΥΡΝΤΙΑΡΕΛΑ, κο κχερ ντα κι εκκλησία κεράβας λάφι ι τσσιπ σο κερέλας λάφι μο ντατ ντα μι ντάι σο ισινέ μετανάστες», βακερέλα ο Τζόσουα. «Αλλά όταν γκιλόμ σχολείος, αρχισάλομ τι μπεϊντίναβ ι τσσιπ σο κερντιόλας λάφι οτθέ. Να νακχλέ μπουτ μπρεσά ντα σαρέ ο πράγματα αλλαξάλεας. Να μπορίναβας τι αγαβάβ ο συναθροίσεις, ντα η κουλτούρα σο τθερέλας μο ντατ ντα μι ντάι να αγγίνελας-μαν». Ανταβά να αβιλό-πες σάντε κο Τζόσουα.

² Αντιβές, πιο μπουτ από 240.000.000 τζενέ να μπεσένα κο τθεμ σο μπιάντιλε. Άμα ισινέν μετανάστες, σαρ μπορίνενα τι κερέν σο νακχέλα τουμαρέ βαστένταρ για τι σικλιαρέν τουμαρέ τσσαβέν τι μανγκέν ι Ιεχωβάς ντα τι “πφιρέν κι αλήθεια”; (3 Ιωάννη 4) Ντα σαρ μπορίνενα τι βοηθίνεν ο γιαβερά;

ΝΤΑΝΤΑΛΕΝ ΝΤΑ ΝΤΑΓΙΑΛΕΝ, ΝΤΕΝ ΛΑΤΣΣΟ ΠΑΡΑΔΕΙΓΜΑΣ

3, 4. (α) Σαρ μπορίνενα ο νταντά ντα ο νταγιά τι ντεν λατσσό παράδειγμας πουμαρέ τσσαβέντε; (β) Σο δεν πρέπει τι μπεκλεντίνεν ο νταντά ντα ο νταγιά πουμαρέ τσσαβένταρ;

³ Νταντάλεν ντα νταγιάλεν, τουμαρό παράδειγμας ισί μπουτ σημαντικός άμα μανγκένα τι τθερέν τουμαρέ τσσαβέ εκ λατσσί φιλία ι Ιεχωβάσαρ ντα τι τζουβντιόν για πάντα. Όταν τουμαρέ τσσαβέ ντικχένα-τουμέν «τι μανγκέν πρώτα ι βασιλεία», σικλιόνα τι στηρίντιβεν κο Ιεχωβά ι πραγματένγκε σο χρειαζίντιβενα κάθε ντιβές. (Ματθαίος 6:​33, 34) Τσσουβέν πρώτα τουμαρέ ζωγιάτε ι Ιεχωβάς, όχι ο λοβέ ντα γιαβερά πράγματα. Τζουβντιόν απλά ντα προσπαθίνεν μα τι τθερέν χρέη. Μανγκέν τι τθερέν «ο θησαυρός σο ισί κο ουρανός», δηλαδή ι ευλογία ι Ιεχωβάσκι, αντί τι μανγκέν ο λοβέ ή «ι τζενένγκι δόξα».​—Διαβάνεν Μάρκος 10:​21, 22· Ιωάννης 12:43.

⁴ Ατζέ-ντα άμα ισινέν μπουτ απασχολημέ, τι αρακχέν πάντα χρόνος τουμαρέ τσσαβένγκε. Βακερέν λένγκε ότι ισινέν περήφανοι λένγκε όταν αποφασίνενα τι τσσουβέν πρώτα ι Ιεχωβάς αντί τι μανγκέν, είτε πουμένγκε είτε τουμένγκε, φήμη ή λοβέ. Μα τι τθερέν ι άποψη ότι ο τσσαβέ πρέπει τι ντεν πουμαρέ νταντέστε ντα πουμαρέ νταγιάτε εκ λατσσί ζωή. Ντεν-τουμέν γκοντί ότι «νανέ υποχρεωμέ ο τσσαβέ τι κερέν κουμάντος πουμαρέ νταντέσκε ντα πουμαρέ νταγιάκε, αλλά ο ντατ ντα η ντάι πρέπει τι κερέν κουμάντος πουμαρέ τσσαβένγκε».​—2 Κορινθίους 12:14.

ΝΤΑΝΤΑΛΕΝ ΝΤΑ ΝΤΑΓΙΑΛΕΝ, ΠΡΟΣΠΑΘΙΝΕΝ ΤΙ ΝΑΚΧΑΒΕΝ Ο ΠΡΟΒΛΗΜΑΤΑ ΣΟ ΑΒΕΝΑ ΚΑΤΑ ΤΣΣΙΠ

5. Σόσκε πρέπει ο νταντά ντα ο νταγιά τι κερέν λάφι κάθε ντιβές πουμαρέ τσσαβέντζαρ ι Ιεχωβάσκε;

⁵ Σαρ βακέρντιλοας, τζενέ «σαρέ κατά τσσιμπά» αβένα κι Ιεχωβάσκι οργάνωση. (Ζαχαρίας 8:​23) Αλλά άμα τουμαρέ τσσαβέ να αγαβένα λατσσές τουμαρί τσσιπ, μπορεί τι αβέλ δύσκολος τουμένγκε τι σικλιαρέν-λεν ι αλήθεια. Τουμαρέ τσσαβέ ισί ο πιο σημαντικές μελέτες σο κα τθερέν ποτές, ντα άμα κα «σικλιόν» ι Ιεχωβάσκε κα τθερέν ζωή για πάντα. (Ιωάννης 17:3) Για τι σικλιόν τουμαρέ τσσαβέ οντουλά σο μανγκέλα ο Ιεχωβά, πρέπει “τι βακερέν-λεν λένγκε” συχνά.​—Διαβάνεν Δευτερονόμιο 6:6, 7.

6. Σαρ μπορεί τι βοηθίντιβεν τουμαρέ τσσαβέ άμα κα σικλιόν τουμαρί τσσιπ; (Ντικχ ι φωτογραφία σο ισί κι αρχή.)

⁶ Τουμαρέ τσσαβέ μάλλον κα σικλιόν κο σχολείος ντα γιαβερένταρ ι τσσιπ σο κερντιόλα λάφι κο τθεμ σο μπεσένα. Αλλά σικλιόνα τουμαρί τσσιπ όταν κερένα λέντζαρ λάφι κάθε ντιβές. Όταν τουμαρέ τσσαβέ κερένα λάφι τουμαρί τσσιπ, κα αβέλ πιο εύκολος τι κερέν τουμέντζαρ λάφι ντα τι βακερέν τουμένγκε σαρ νιωθίνενα. Αλλά ανταβά κα βοηθίνελ-λεν με γιαβερά-ντα τρόπους. Όταν τουμαρέ τσσαβέ να κερένα λάφι σάντε εκ τσσιπ, σικλιόνα τι σκεφτίνεν πιο λατσσές ντα μπορίνενα τι αγαβέν πιο λατσσές ο απόψεις ι γιαβερένγκε. Επίσης, μπορεί τι ντιντιόλ-λεν η ευκαιρία τι κερέν πιο μπουτ πράγματα κο έργος κι Ντεβλέσκο. «Μπεϊντίναβα μπουτ σο ισινόμ εκχέ εκκλησιάτε σο κερντιόλα λάφι εκ ξένη τσσιπ», βακερέλα η Καρολίνα, σο λάκο ντατ ντα λάκι ντάι ισί μετανάστες. «Ντα ισί μπουτ σουκάρ τι βοηθίνες οτθέ σο ισί πιο μπαρί ανάγκη».

7. Σο μπορίνενα τι κερέν άμα η τσσιπ ισί εκ πρόβλημας τουμαρέ φαμιλιάτε;

⁷ Όμως, όταν ο τσσαβέ οντουλένγκε σο ισί μετανάστες σικλιόνα ι κουλτούρα ντα ι τσσιπ σο κερντιόλα λάφι κο τθεμ σο μπεσένα, μερικά λένταρ μπορεί μα τι μανγκέν ή μα τι μπορίνεν τι κερέν λάφι ι τσσιπ σο κερέλα λένγκο ντατ ντα λένγκι ντάι. Νταντάλεν ντα νταγιάλεν, άμα ανταβά αβέλα-πες τουμαρέ τσσαβέντζαρ-ντα, μήπως μπορίνενα τι σικλιόν ατζέ-ντα χάνικ ι τσσιπ σο κερντιόλα λάφι κο τθεμ σο μπεσένα; Κα αβέλ πιο εύκολος τι μπαριαρέν τουμαρέ τσσαβέν σαρ Χριστιανούς άμα αγαβένα λένγκε συζητήσεις, ο τρόπος σο διασκεδάνενα ντα λένγκε μαθήματα, ντα άμα μπορίνενα τι κερέν λάφι λένγκε δασκαλόντζαρ. Ισί μπαγιά ότι, για τι σικλιόν εκ νεβί τσσιπ, πρέπει τι τθερέν χρόνος, τι κερέν προσπάθεια ντα τι αβέν ταπεινοί. Αλλά αξίνελα τι κερέν-λες. Για παράδειγμας, άμα τουμαρό τσσαβό κα κασουκίντιβελας, να κα προσπαθίνενας τι σικλιόν ι νοηματική τσσιπ για τι κερέν λέσαρ λάφι; Να συμφωνίνενα ότι αξίνελα τι σικαβάς ο ίδιος ενδιαφέρον εκχέ τσσαβέσκε σο κερέλα λάφι πιο λατσσές εκ γιαβέρ τσσιπ;a​—Ντικχ ι υποσημείωση.

8. Άμα να κερένα λατσσές λάφι ι τσσιπ σο κερντιόλα κο τθεμ σο μπεσένα, σαρ μπορίνενα τι βοηθίνεν τουμαρέ τσσαβέν;

⁸ Μπορεί τι αβέλ μπουτ δύσκολος για κάποιους μετανάστες τι σικλιόν τι κερέν λάφι λατσσές ι νεβί τσσιπ πουμαρέ τσσαβένγκι. Ανταβά μπορεί τι δυσκολίνελ ι νταντέν ντα ι νταΐν τι βοηθίνεν πουμαρέ τσσαβέν τι αγαβέν «ι Ντεβλέσκε λάφια». (2 Τιμόθεο 3:​15) Άμα αβέλα-πες ανταβά τουμέντζαρ-ντα, μπορίνενα τι βοηθίνεν τουμαρέ τσσαβέν τι σικλιόν ντα τι μανγκέν ι Ιεχωβάς. «Αμαρί ντάι, σο μπαριαρέλας-αμέν κορκορί, να κερέλας λατσσές λάφι ι τσσιπ σο αγαβάας με ντα μο πφενιά πιο λατσσές, ντα αμέν να κεράας λατσσές λάκι τσσιπ», βακερέλα εκ πρεσβύτερος, ο Σαν. «Αλλά όταν ντικχάας-λα τι διαβάνελ, τι προσευχίντιβελ ντα τι κερέλ ο πιο λατσσό σο μπορίνελας για τι κερέλ κάθε εβδομάδα ι φαμιλιάκι λατρεία, αγαβάας ότι ισινέ μπουτ σημαντικός τι σικλιάς ι Ιεχωβάς».

9. Σαρ μπορίνενα ο νταντά ντα ο νταγιά τι βοηθίνεν πουμαρέ τσσαβέν σο μπορεί τι αβέν αναγκασμέ τι διαβάνεν ντουέ τσσιμπέντε;

⁹ Μερικά τσσαβέ μπορεί τι χρειαζίντιβελ τι σικλιόν ι Ιεχωβάσκε ντουέ τσσιμπέντε. Σόσκε; Επειδή κερένα λάφι γιαβέρ τσσιπ κο σχολείος ντα γιαβέρ κο κχερ. Οτθάρ, μερικά νταντά ντα νταγιά χρησιμοποιήνενα έντυπα, ηχογραφήσεις ντα βίντεα κο ντούι-ντα τσσιμπά. Σίγουρα, ο νταντά ντα ο νταγιά σο ισί μετανάστες πρέπει τι προσπαθίνεν πιο μπουτ για τι βοηθίνεν πουμαρέ τσσαβέν τι πλησιάνεν ι Ιεχωβάς.

ΚΑΛΕ ΤΣΣΙΜΠΑΤΕ ΠΡΕΠΕΙ ΤΙ ΠΑΡΑΚΟΛΟΥΘΙΝΕΝ Ο ΣΥΝΑΘΡΟΙΣΕΙΣ;

10. (α) Κον πρέπει τι αποφασίνελ καλέ τσσιμπάτε κα παρακολουθίνελ ο συναθροίσεις η φαμιλί; (β) Σο πρέπει τι κερέλ ο σορό ι φαμιλιάκο πριν τι αποφασίνελ;

¹⁰ Όταν οντουλά σο ισί «γιαβερέ τθεμένταρ» μπεσένα ντουρ γιαβερέ πφραλένταρ σο κερένα λάφι λένγκι τσσιπ, πρέπει τι παρακολουθίνεν ο συναθροίσεις κι τσσιπ οντουλέ τθεμέσκι σο μπεσένα. (Ψαλμός 146:9) Αλλά άμα ισί πασέ λέντε εκ εκκλησία σο χρησιμοποιήνελα λένγκι τσσιπ, ο σορό ι φαμιλιάκο πρέπει τι αποφασίνελ καγιά εκκλησία κα βοηθίνελ πιο λατσσές λέσκι φαμιλί. Πριν τι αποφασίνελ, πρέπει τι σκεφτίνελ λατσσές ντα τι προσευχίντιβελ. Πρέπει επίσης τι κερέλ λάφι πι ρομνιάσαρ ντα πι τσσαβέντζαρ. (1 Κορινθίους 11:3) Σο πρέπει τι σκεφτίνελ; Καλά συμβουλές σο ισί κι Γραφή μπορίνενα τι βοηθίνεν-λες τι αποφασίνελ;

11, 12. (α) Σαρ επηρεάνελα η τσσιπ καζόμ πράγματα κα σικλιόλ εκ τσσαβό κο συναθροίσεις; (β) Σόσκε μερικά τσσαβέ να μανγκένα τι σικλιόν ι τσσιπ σο κερέλα λένγκο ντατ ντα λένγκι ντάι;

¹¹ Ο νταντά ντα ο νταγιά πρέπει τι σκεφτίνεν σο χρειαζίντιβενα μπαγιά λένγκε τσσαβέ. Για τι αγαβέν λατσσές ο αλήθειες σο ισί κι Γραφή, να ερεσένα σάντε ο χάνικ σαάτια σο τζάνα κάθε εβδομάδα κο συναθροίσεις. Αλλά σκεφτίνεν ακαβά: Κο συναθροίσεις σο αβένα κι τσσιπ σο αγαβένα πιο λατσσές ο τσσαβέ, απλά επειδή ισί οτθέ μπορίνενα τι σικλιόν μπουτ πράγματα, ατζέ-ντα άμα λένγκε νταντά ντα λένγκε νταγιά να αγαβένα-λες ανταβά. Ανταβά μπορεί μα τι αβέλ-πες όταν ο τσσαβέ να αγαβένα λατσσές ι τσσιπ. (Διαβάνεν 1 Κορινθίους 14:9, 11) Ντα η τσσιπ σο κερέλα λάφι ο ντατ ντα η ντάι εκχέ τσσαβέσκι μπορεί μα τι συνεχίνελ τι αβέλ η τσσιπ σο επηρεάνελα ο τρόπος σο σκεφτίνελα ντα νιωθίνελα ο τσσαβό. Μάλιστα, μερικά τσσαβέ μπορεί τι σικλιόν τι ντεν απαντήσεις, τι κερέν παρουσιάσεις ντα ομιλίες κι τσσιπ σο κερέλα λένγκο ντατ ντα λένγκι ντάι χωρίς τι βακερέν οντουλά σο σκεφτίνενα ντα νιωθίνενα πραγματικά.

¹² Επίσης, ο γκι εκχέ τσσαβέσκο να επηρεάντιβελα σάντε κατά τσσιπ. Ανταβά αβέλας-πες κο Τζόσουα-ντα, σο βακερντάμας λέσκε πιο τζανγκλέ. Λέσκι πφεν, η Έστερ, βακερέλα: «Όταν ο χουρντέ μπεϊντίνενα ι τσσιπ σο κερέλα λένγκο ντατ ντα λένγκι ντάι, κα μπεϊντίνεν εμ λένγκι θρησκεία εμ λένγκι κουλτούρα». Άμα ο τσσαβέ νιωθίνενα ότι να αγγίνελα-λεν η κουλτούρα λένγκε νταντέσκι ντα λένγκε νταγιάκι, μπορεί μα τι μανγκέν τι σικλιόν ι τσσιπ ντα ι θρησκεία σο τθερένα βον. Σο μπορίνενα τι κερέν ο νταντά ντα ο νταγιά σο ισί μετανάστες;

13, 14. (α) Σόσκε εκ αντρόγυνος σο ισί μετανάστες γκιλό πι τσσαβέντζαρ εκχέ εκκλησιάτε σο κερντιόλα λάφι η τσσιπ ι τθεμέσκι σο μπεσένας; (β) Σαρ ο ντατ ντα η ντάι ατσσικιαρένας ζουρανί πουμαρί σχέση ι Ιεχωβάσαρ;

¹³ Ο νταντά ντα ο νταγιά σο ισί Χριστιανοί τσσουβένα ι πνευματικότητα πουμαρέ τσσαβένγκι πιο οπρέ κατά πράγματα σο μανγκένα τι κερέν βον. (1 Κορινθίους 10:​24) Ο Σάμιουελ, ο ντατ του Τζόσουα ντα της Έστερ, βακερέλα: «Με ντα μι ρομνί ντάας σημασία αμαρέ τσσαβέν για τι αγαβάς καλέ τσσιμπάτε κερένας πνευματική πρόοδος, ντα προσευχίντιβαας για σοφία. Η απάντηση σο λιντάμ να ισινέ εύκολη αμένγκε. Αλλά μόλις αγαντάμ ότι ο συναθροίσεις αμαρέ τσσιμπάτε να βοηθίνενας μπουτ αμαρέ τσσαβέν, αποφασιντάμ τι τζας εκχέ εκκλησιάτε σο κερντιόλας λάφι η τσσιπ ι τθεμέσκι σο μπεσάας. Σαρέ μαζί τζάας κο συναθροίσεις ντα κο έργος. Επίσης καλίναας πφραλέν οντουλέ εκκλησιάταρ για τι χαν αμέντζαρ ντα τι τζας βόλτες. Σαρέ ανταλά βοηθιντέ αμαρέ τσσαβέν τι γνωρίνεν ι πφραλέν ντα τι σικλιόν ότι ο Ιεχωβά νανέ σάντε λένγκο Ντεβέλ, αλλά λένγκο Ντατ ντα λένγκο Αμάλ-ντα. Σκεφτιντάμ ότι να ισινέ αζόμ σημαντικός τι σικλιόν μπουτ λατσσές αμαρί τσσιπ καζόμ ισινέ ανταβά».

¹⁴ Ο Σάμιουελ βακερντάς επίσης: «Για τι ατσσάς πνευματικά ζουρανέ, παρακολουθίναας μι ρομνιάσαρ ο συναθροίσεις αμαρέ τσσιμπάτε-ντα. Τθεράας μπουτ τι κεράς κάθε ντιβές ντα τσσιντιάας-αμέν. Αλλά ευχαριστίνασα ι Ιεχωβάς σο ευλογιντάς αμαρέ προσπάθειες ντα αμαρέ θυσίες. Ο τριν-ντα τσσαβέ αμαρέ υπηρετίνενα ι Ιεχωβάς κι ολοχρόνια υπηρεσία».

ΣΟ ΜΠΟΡΙΝΕΝΑ ΤΙ ΚΕΡΕΝ Ο ΤΕΡΝΕ

15. Σόσκε νιωθίνελας η Κριστίνα ότι κα αβέλας πιο λατσσό τι τζαλ εκχέ εκκλησιάτε σο κερένας λάφι ι τσσιπ ι τθεμέσκι σο μπεσέλας;

¹⁵ Όταν ο τσσαβέ μπαριόνα, μπορεί τι αγαβέν ότι κα μπορίνενας τι υπηρετίνεν πιο λατσσές ι Ιεχωβάς εκχέ εκκλησιάτε σο χρησιμοποιήνελα ι τσσιπ σο αγαβένα πιο λατσσές. Άμα κα αβέλ-πες κάτι ασακό, ο νταντά ντα ο νταγιά δεν πρέπει τι νιωθίνεν ότι λένγκε τσσαβέ να μανγκένα λεν. «Αγαβάβας χάνικ ι τσσιπ σο κερέλας λάφι μο ντατ ντα μι ντάι, αλλά όταν ασουνάβας-λα κο συναθροίσεις να αγαβάβας τίποτα», βακερέλα η Κριστίνα. «Όταν ισινόμας 12 μπρεσένγκι, γκιλόμ σε εκ συνέλευση σο κερένας λάφι ι τσσιπ σο κερντιόλας κο σχολείος. Για πρώτη φορά, αγαντόμ ότι οντουλά σο ασουνάβας ισινέ η αλήθεια! Εκ γιαβέρ σημαντική αλλαγή ισινέ όταν αρχισάλομ τι προσευχίντιβαβ κι τσσιπ σο κερντιόλας λάφι κο σχολείος. Μπορίναβας τι κεράβ λάφι κο Ιεχωβά αντράλ μι γκίσταρ!» (Πράξεις 2:​11, 41) Όταν αβιλί 18 μπρεσένγκι, η Κριστίνα κερντάς λάφι ανταλέσκε πι νταντέσαρ ντα πι νταγιάσαρ ντα αποφασιντάς τι τζαλ εκχέ εκκλησιάτε σο κερένας λάφι ι τσσιπ ι τθεμέσκι σο μπεσένας. Η ίδια βακερέλα: «Επειδή σικλιάβας ι Ιεχωβάσκε κι τσσιπ σο κερντιόλας λάφι κο σχολείος, μανγκλόμ τι κεράβ πιο μπουτ πράγματα». Μπουτ σουγκό, η Κριστίνα αβιλί σκαπάνισσα ντα ισί μπουτ χαρούμενη.

16. Σόσκε ισί χαρούμενη η Νάντια σο ατσσιλί εκχέ εκκλησιάτε σο κερντιόλας λάφι η ξένη τσσιπ;

¹⁶ Τερνάλεν, μήπως πακιάνα ότι κα μανγκένας τι τζαν εκχέ εκκλησιάτε σο κερντιόλα λάφι η τσσιπ ι τθεμέσκι σο μπεσένα; Άμα πακιάνα-λες ανταβά, σκεφτίνεν σόσκε μανγκένα τι τζαν. Κα βοηθίνελας-τουμέν οντιά αλλαγή τι πλησιάνεν πιο μπουτ ι Ιεχωβάς; (Ιακώβου 4:8) Ή μήπως μανγκένα τι τζαν επειδή να μανγκένα τι παρακολουθίνελ τουμαρό ντατ ντα τουμαρί ντάι οντουλά σο κερένα ή επειδή να μανγκένα τι κερέν καέκ προσπάθεια; «Όταν με ντα μο πφραλά μπαριλάμ χάνικ, μανγκάας τι τζας κι εκκλησία σο κερντιόλας λάφι η τσσιπ ι τθεμέσκι σο μπεσάας», βακερέλα η Νάντια, σο υπηρετίνελα ακανά κο Μπέθελ. Αλλά λένγκο ντατ ντα λένγκι ντάι τζανένας ότι ανταβά να κα βοηθίνελας λένγκε τσσαβέν τι τθερέν εκ λατσσί φιλία ι Ιεχωβάσαρ. «Αντιβές, ισινάμ μπουτ χαρούμενοι σο αμαρό ντατ ντα αμαρί ντάι μαρντέ-πες τι σικλιαρέν-αμέν πουμαρί τσσιπ ντα τι ατσσικιαρέν-αμέν κι εκκλησία σο κερντιόλας λάφι η ξένη τσσιπ. Ανταβά πφερντάς αμαρί ζωή ντα τθεράας πιο μπουτ ευκαιρίες τι βοηθίνας γιαβερέν τι σικλιόν ι Ιεχωβάς».

ΣΑΡ ΜΠΟΡΙΝΕΝΑ ΤΙ ΒΟΗΘΙΝΕΝ Ο ΓΙΑΒΕΡΑ

17. (α) Κάστε ντινάς ο Ιεχωβά ι ευθύνη τι μπαριαρέν ι τσσαβέν; (β) Σαρ μπορίνενα ο νταντά ντα ο νταγιά τι λεν βοήθεια για τι σικλιαρέν ι αλήθεια πουμαρέ τσσαβέντε;

¹⁷ Ο Ιεχωβά ντινάς κο νταντά ντα κο νταγιά ι ευθύνη τι σικλιαρέν πουμαρέ τσσαβέν ι αλήθεια. Να ντινάς-λα κο παππούδες ή εκχέ γιαβερέστε. (Διαβάνεν Παροιμίες 1:8· 31:​10, 27, 28) Όμως ο νταντά ντα ο νταγιά σο να τζανένα ι τσσιπ ι τθεμέσκι σο μπεσένα μπορεί τι χρειαζίντιβενα βοήθεια για τι ερεσέν κο γκι πουμαρέ τσσαβένγκο. Όταν μανγκένα βοήθεια κατά γιαβερά, να σικαβένα ότι να μανγκένα τι τθερέν ι ευθύνη τι μπαριαρέν πουμαρέ τσσαβέν. Αντίθετα, ανταβά μπορεί τι αβέλ λένγκε σημαντικός για τι ντεν πουμαρέ τσσαβέντε «ι διόρθωση ντα ο συμβουλές ι Ιεχωβάσκε». (Εφεσίους 6:4) Για παράδειγμας, ο νταντά ντα ο νταγιά μπορεί τι μανγκέν κατά πρεσβυτέρους σο ισί κι εκκλησία τι βακερέν λένγκε σαρ κα μπορίνενας τι κερέν ι φαμιλιάκι λατρεία ντα τι βοηθίνεν-λεν τι αρακχέν λατσσέ αμαλέν πουμαρέ τσσαβένγκε.

18, 19. (α) Σαρ μπορίνενα ο γιαβερά Χριστιανοί τι βοηθίνεν ι τερνέν; (β) Σο πρέπει τι συνεχίνεν τι κερέν ο νταντά ντα ο νταγιά;

¹⁸ Για τι βοηθίνεν πουμαρέ τσσαβέν, ο νταντά ντα ο νταγιά μπορεί τι καλίνεν μερικές φορές κι φαμιλιάκι λατρεία γιαβερά-ντα φαμιλιά. Επίσης, μπουτ τερνέ σικλιόνα γιαβερέ Χριστιανόνταρ όταν νικιόνα για έργος λέντζαρ ή κερένα γιαβερά πράγματα μαζί. (Παροιμίες 27:​17) «Ντάβα-μαν γκοντί ι πφραλέν σο σικαντέ μάνγκε μπουτ ενδιαφέρον», βακερέλα ο Σαν, σο βακερντάμ λέσκε πιο πριν. «Όταν βοηθίνενας-μαν τι νικαβάβ ομιλίες για τη συνάθροιση, πάντα σικλιάβας πιο μπουτ. Ντα μπεϊντίναβας μπουτ τι κεράς παρέα ι γιαβερέντζαρ σαρ ομάδα».

¹⁹ Φυσικά, όταν ο νταντά ντα ο νταγιά τραμπίνενα μερικέ πφραλέν για τι βοηθίνεν πουμαρέ τσσαβέν, βον πρέπει πάντα τι ενθαρρύνεν-λεν τι σεβάνεν πουμαρέ νταντές ντα πουμαρέ νταγιά. Ανταβά μπορίνενα τι κερέν-λες άμα βακερένα λένγκε λατσσέ πράγματα λένγκε νταντένγκε ντα λένγκε νταΐνγκε ντα άμα να λένα βον ι ευθύνη τι μπαριαρέν λένγκε τσσαβέν. Επίσης, ο πφραλά σο βοηθίνενα δεν πρέπει τι τθερέν εκ συμπεριφορά σο κα μπορίνενας τι παρεξηγίνεν-λα ντα τι σκεφτίνεν ο τζενέ σο ισί αντρέ κι εκκλησία ή αβρί κατά εκκλησία ότι νανέ σωστή. (1 Πέτρου 2:​12) Παρόλο σο ο νταντά ντα ο νταγιά μπορεί τι μανγκέν ι βοήθεια ι γιαβερένγκι, βον συνεχίνενα τι τθερέν ι ευθύνη τι σικλιαρέν ι αλήθεια πουμαρέ τσσαβέντε. Πρέπει τι τζανέν σαρ βοηθίνενα ο γιαβερά Χριστιανοί λένγκε τσσαβέν.

20. Σαρ μπορίνενα ο νταντά ντα ο νταγιά τι βοηθίνεν πουμαρέ τσσαβέν τι υπηρετίνεν πιστά ι Ιεχωβάς;

²⁰ Νταντάλεν ντα νταγιάλεν, προσευχίντιβεν κο Ιεχωβά για βοήθεια ντα κερέν ο πιο λατσσό σο μπορίνενα. (Διαβάνεν 2 Χρονικών 15:7) Τσσουβέν πρώτα ι φιλία σο τθερέλα τουμαρό τσσαβό ι Ιεχωβάσαρ ντα μετά ο πράγματα σο μανγκένα τουμέν. Κερέν σο νακχέλα τουμαρέ βαστέσταρ για τι αβέν σίγουροι ότι ο Λάφι ι Ντεβλέσκο ερεσέλα κο γκι τουμαρέ τσσαβέσκο. Ποτές μα τι σταματίνεν τι πακιάν ότι τουμαρό τσσαβό μπορίνελα τι υπηρετίνελ ι Ιεχωβάς. Όταν τουμαρέ τσσαβέ ακολουθίνενα ο Λάφι ι Ντεβλέσκο ντα τουμαρό λατσσό παράδειγμας, κα νιωθίνεν σαρ νιωθίνελας ο απόστολος Ιωάννης πι πνευματικέ τσσαβένγκε: «Τίποτα να ντέλα-μαν πιο μπαρί χαρά ανταλάταρ: τι ασουνάβ ότι μο τσσαβέ πφιρένα κι αλήθεια».​—3 Ιωάννη 4.