Παρόλο σο Ισινόμ Λαλορό, Τίποτα να Τσσιναντάς-μαν τι Σικλιαράβ ι Γιαβερέν

ΠΕΡΙΠΟΥ κο 1910, μο ντατ ντα μι ντάι νασλέ πουμαρέ τθεμέσταρ, κατά Τιφλίδα σο ισί κι Γεωργία, ντα γκιλέ κο Καναδάς. Μπεσένας σε εκ χουρντό κτήμας κο χωράφια, πασέ κο Πέλι του Σασκάτσιουαν. Με μπιάντιλομ κο 1928 ντα ισινόμας ο πιο χουρντό μι παντζέ πφραλένταρ ντα πφενίνταρ. Μο ντατ μουλό σιοβ μάσεκ πριν τι μπιάντιβαβ, ντα μι ντάι μουλί όταν ισινόμας εκχέ μπρεσέσκο. Χάνικ πιο σοράν μουλί η Λούσι-ντα, μι πιο μπαρί πφεν, όταν ισινέ 17 μπρεσένγκι. Οτθάρ, μο κακ ο Νικ λιντάς μαν, μι πφραλέν ντα μι πφενίν για τι μπαριαρέλ-αμέν.

Εκ ντιβές, όταν ισινόμας ντουέ μπρεσένγκο, μο τζενέ ντικχλέ-μαν τι ταρτίναβ ι πορί εκχέ γκραστέσκι σο τθεράας κο κτήμας. Νταρασάλε μπουτ ντα αμντισάλε ότι ο γκρας κα ντέλας-μαν λαχτί. Ντινέ βίκος ζουρανές για τι σταματίναβ. Αλλά με ντικχάβας οκιά μπάνταρ ντα να ασουνάβας σο ντένας βίκος. Ευτυχώς, να παθισάλομ τίποτα. Όμως, οντουβά ντιβές μο τζενέ αγαντέ ότι ισινόμας λαλορό.

Εκ λατσσό αμάλ αμαρέ φαμιλιάκο βακερντάς ότι κα αβέλας πιο λατσσό τι τζαβ εκχέ σχολειόστε γιεκ γιαβερέ λαλορέ χουρντέντζαρ. Οντουλέσκε, μο κακ ο Νικ μπουτσσαντάς-μαν σε εκ σχολείος λαλορένγκε κο Σασκατούν του Σασκάτσιουαν. Οντουβά σχολείος ισινέ μπουτ ντουρ μι τζενένταρ, ντα επειδή ισινόμας σάντε παντζέ μπρεσένγκο, νταράβας μπουτ. Μπορίναβας τι ντικχάβ μι τζενέν σάντε κο μπαρέ ντιβεσά ντα κο νιλάι. Τελικά, σικλιλόμ ι νοηματική τσσιπ ντα νακχάβας λατσσές επειδή κχελάβας μάνγκε ι γιαβερέ χουρντέντζαρ.

ΣΙΚΛΙΑΒΑ Ι ΑΛΗΘΕΙΑ Ι ΓΡΑΦΙΑΚΙ

Κο 1939, μι πιο μπαρί πφεν, η Μάριον, παντρισάλι τον Μπιλ Ντανιλτσούκ ντα λιντέ μι πφενιά, τη Φράνσις, ντα μαν για τι ντικχέν-αμέν βον. Ισινέ ο πρώτοι μι φαμιλιάταρ σο αρχισάλε τι κερέν μελέτη με τους Μάρτυρες του Ιεχωβά. Όταν πφαντιόνας ο σχολεία, κερένας ο πιο λατσσό σο μπορίνενας για τι βακερέν μάνγκε οντουλά σο σικλιόνας κατά Γραφή. Να ισινέ εύκολος τι επικοινωνίνας επειδή να τζανένας ι νοηματική τσσιπ. Μπορίνενας όμως τι ντικχέν ότι τθεράβας μπουτ αγάπη οντουλένγκε σο σικλιάβας ι Ιεχωβάσκε. Αγαβάβας ότι οντουλά σο κερένας ταιριάνενας οντουλέντζαρ σο βακερέλα η Γραφή, οτθάρ τζάβας γιεκ λέντζαρ κο έργος. Μετά από χάνικ καιρός, μανγκάβας τι μπολντιάβ, ντα στις 5 Σεπτεμβρίου 1941, ο Μπιλ μπολντάς-μαν σε εκ βαρέλι από ατσάλι σο ισινέ πφερντό πανί. Ο πανί ισινέ μπουτ σουρντό!

Κο 1946, όταν βουρτισάλομ κο κχερ κο νιλάι, παρακολουθιντάμ εκ συνέλευση κο Κλίβελαντ του Οχάιο, κι Αμερική. Ο πρώτος ντιβές, μο πφενιά ατσσικιαρένας μάνγκε σημειώσεις για τι ντικχάβ-λεν ντα τι αγαβάβ ο πρόγραμμας. Ο δεύτερος ντιβές, όμως, χαιρισάλομ μπουτ όταν λιντόμ αμπέρι ότι υπαρχίντιβελας εκ όμιλος λαλορένγκο ντα ότι εκ πφεν μεταφράνελας κι νοηματική τσσιπ. Ακανά μπορίναβας επιτέλους τι αγαβάβ ξεκάθαρα οντουλά σο σικλιαρέλα η Γραφή. Καζόμ σουκάρ νιωθίναβας!

ΣΙΚΛΙΑΡΑΒΑ Ι ΑΛΗΘΕΙΑ

Οντουλά μπρεσά μόλις τελειωσάλοας ο Δεύτερος Παγκόσμιος Πόλεμος ντα ο τζενέ μανγκένας τι σικαβέν ότι ισινέ πιστοί πουμαρέ τθεμέστε. Με όμως, όταν βουρτισάλομ κατά συνέλευση ντα γκιλόμ πάλι κο σχολείος, ισινόμας αποφασισμέ τι ατσσάβ πιστός κο Ιεχωβά. Οτθάρ, τσσιναντόμ τι χαιρετίναβ ι σημαία ντα τι συμμετεχίναβ κο εθνικός ύμνος ντα κο γιορτές. Επίσης, τσσιναντόμ τι τζαβ κι κχανγκιρί γιεκ μι συμμαθητέντζαρ. Οντουλά σο κερένας μπουτί κο σχολείος να χαιρισάλε ιτς. Νταραβένας-μαν ντα βακερένας μάνγκε ψέματα για τι κερέν-μαν τι αλλάναβ μι άποψη. Μο συμμαθητές ντικχένας σο αβέλας-πες, ντα οτθάρ τθεράβας μπουτ ευκαιρίες τι βακεράβ λένγκε ι Ιεχωβάσκε. Κάποιοι μι συμμαθητένταρ, σαρ ο Λάρι Άντρεσοφ, ο Νόρμαν Ντίτρικ ντα ο Έμιλ Σνάιντερ, δεχτιντέ τελικά ι αλήθεια ντα υπηρετίνενα ι Ιεχωβάς μέχρι αντιβές.

Όταν τζάβας γιαβερέ τθανέντε, τθεράβας πάντα ο στόχος τι κεράβ λάφι ι Ντεβλέσκε κο λαλορέ. Για παράδειγμας, κο Μόντρεαλ, γκιλόμ εκχέ τθανέστε σο γκιντίντιβενας ο λαλορέ. Οτθέ κερντόμ λάφι ι Ντεβλέσκε εκχέ τερνέστε, κο Έντι Τέιγκερ, σο ισινέ μπλεγμέ σε εκ συμμορία. Μέχρι αζομάν σο μουλό, πέρσι, τζάλας κι εκκλησία νοηματικής του Λαβάλ, κο Κεμπέκ. Γνωριντόμ επίσης τον Χουάν Άρνταναζ. Σαρ οντουλά σο μπεσένας κι Βέροια κο πουρανέ μπρεσά, οντουβά τερνό ρόντελας για τι ντικχέλ άμα οντουλά σο σικλιόλας βασίντιβενας κι Γραφή. (Πράξεις 17:​10, 11) Γνωριντάς βοβ-ντα ι αλήθεια ντα υπηρετιντάς σαρ πρεσβύτερος κι Οτάβα του Οντάριο μέχρι οντουβά ντιβές σο μουλό.

Κο 1950, γκιλόμ τι μπεσάβ κο Βανκούβερ. Παρόλο σο μπεϊντίναβα μπουτ τι κεράβ λάφι ι Ντεβλέσκε κο λαλορέ, ποτές να κα μπιστράβ εκ εμπειρία σο τθεράβας όταν ντινόμ μαρτυρία κο ντρομ εκχέ τζουβλιάτε σο να ισινέ λαλορί, κι Κρις Σπάισερ. Δεχτίνελας τι λελ αμαρέ περιοδικά ντα μανγκέλας τι γνωρίναβ λάκε ρομές, ι Γκαρίς. Γκιλόμ λένγκε κχερέστε ντα κερντάμ λάφι με σημειώματα για μπουτ σαάτια. Να ξαναρακχίντιλαμ, μέχρι σο χάνικ μπρεσά πιο σοράν, χωρίς τι μπεκλεντίναβ-λες, αβιλέ τι χαιρετίνεν-μαν σε εκ συνέλευση κο Τορόντος του Οντάριο. Ο Γκάρι κα μπολντιόλας οντουβά ντιβές. Οντιά εμπειρία βοηθιντάς-μαν τι νταβ-μαν γκοντί καμπόρ σημαντικός ισί τι συνεχίνας τι κεράς ο έργος, επειδή ποτές να τζανάσα άμα εκ τζενό σο ντάσα-λες μαρτυρία κα γνωρίνελ τελικά ι αλήθεια.

Πιο σοράν, γκιλόμ πάλι κο Σασκατούν. Οτθέ γνωριντόμ εκχέ τζουβλιά σο μανγκλάς μάνταρ τι κεράβ μελέτη κατά Γραφή λάκε ντουέ δίδυμε τσσαΐν σο ισινέ λαλορέ, την Τζιν ντα την Τζόουν Ρόθενμπεργκερ. Τζάνας κο ίδιος σχολείος σο γκιλόμας με-ντα. Σε χάνικ καιρός, ο ντούι τσσαγιά κερένας λάφι πουμαρέ συμμαθητέντε οντουλένγκε σο σικλιόνας. Τελικά, παντς τσσαγιά λένγκε ταξιάταρ αβιλέ Μάρτυρες του Ιεχωβά. Εκ λένταρ ισινέ η Γιούνις Κόλιν. Τθεράβας-λα ντικχλό για πρώτη φαρ όταν ισινόμας κι τελευταία τάξη κο σχολείος κι λαλορένγκο. Αζομάν, ντινάας-μαν εκ καραμέλα ντα πουτσλάας-μαν άμα μανγκάβας τι αβάς αμαλά. Κάι τι τζανάβας ότι μετά από μερικά μπρεσά κα αβέλας μπουτ σημαντική μάνγκε. Κα αβέλας μι ρομνί!

Όταν η ντάι της Γιούνις λιντάς αμπέρι ότι κερέλας μελέτη κατά Γραφή, τσσουντάς ι διευθυντής κο σχολείος τι κερέλ-λα τι τσσιναβέλ πι μελέτη. Παρόλο σο ο διευθυντής προσπαθιντάς, ντα μάλιστα λιντάς λάταρ ο γραφικά έντυπα σο τθερέλας, η Γιούνις ισινέ αποφασισμέ τι ατσσόλ πιστή κο Ιεχωβά. Όταν μανγκέλας τι μπολντιόλ, λάκο ντατ ντα λάκι ντάι βακερντέ λάκε: «Αν τυχόν αβιλάν Μάρτυρας του Ιεχωβά, κα νασές αμαρέ κχερέσταρ!» Όταν ισινέ 17 μπρεσένγκι, η Γιούνις νασλί κατά κχερ ντα γκιλί τι μπεσέλ εκχέ φαμιλιάτε σο ισινέ Μάρτυρες. Συνεχιντάς πι μελέτη ντα πιο σοράν μπολντιλί. Όταν παντρισάλαμ κο 1960, λάκο ντατ ντα λάκι ντάι να αβιλέ αμαρέ μπιαβέστε. Αλλά καζόμ νακχένας ο μπρεσά, αρχισάλε τι σεβάνεν-αμέν χάρη οντουλένταρ σο πακιάας ντα επειδή μπαριαράας αμαρέ τσσαβέν με σωστός τρόπος.

Ο ΙΕΧΩΒΑ ΒΟΗΘΙΝΤΑΣ-ΜΑΝ ΜΠΟΥΤ

Επειδή ισινάμας λαλορέ, να ισινέ εύκολος τι μπαριαράς εφτά τσσαβέν σο μπορίνενας τι ασουνέν. Αλλά βοηθιντάμ-λεν τι σικλιόν ι νοηματική τσσιπ για τι επικοινωνίνας λατσσές ντα τι σικλιαράς-λεν ι αλήθεια. Ο πφραλά ντα ο πφενιά αμαρέ εκκλησιάτε βοηθιντέ-αμέν μπουτ. Για παράδειγμας, εκ πφραλ ντινάς-αμέν εκ σημείωμας σο γραφίνελας ότι εκ τανό αμαρέ τσσαβένταρ βακερέλας γκεραλέ λάφια αντρέ κι Αίθουσα Βασιλείας. Διορθωντάμ ο πρόβλημας αμέσως. Σταρ μι τσσαβένταρ​—ο Τζέιμς, ο Τζέρι, ο Νίκολας ντα ο Στίβεν—​ισί πρεσβύτεροι ντα υπηρετίνενα ι Ιεχωβάς πιστά πουμαρέ ρομνίντζαρ ντα πουμαρέ φαμιλίντζαρ. Επίσης, ο Νίκολας ντα λέσκι ρομνί, η Ντέμπορα, βοηθίνενα κι μετάφραση σο αβέλα-πες κι νοηματική τσσιπ κο γραφείος τμήματος κι Βρετανία, ενώ ο Στίβεν ντα λέσκι ρομνί, η Σάναν, μεταφράνενα κι νοηματική τσσιπ κο γραφείος τμήματος κο Ηνωμένες Πολιτείες.

Δυστυχώς, εκ μάσεκ πριν τι πφάντας 40 μπρεσά παντριμέ, η Γιούνις μουλί από καρκίνος. Σαρό οντουβά δύσκολος καιρός, η πίστη σο τθερέλας κι ανάσταση ατσσικιαρέλας-λα ζουρανί. Μπεσάβα σαρ σαρ τι αβέλ ο ντιβές σο κα ξαναντικχάβ-λα.

Κο 2012, κο Φεβρουάριος, πελόμ ντα πφανγκλόμ μι λεκάνη. Αγαντόμ ότι κα χρειαζίντιβαβας βοήθεια, οτθάρ γκιλόμ τι μπεσάβ σε εκ μι τσσαβένταρ ντα λέσκε ρομνιάτε. Ακανά ισινάμ κι Εκκλησία Κάλγκαρι Νοηματική, σο συνεχίναβα τι υπηρετίναβ σαρ πρεσβύτερος. Κι πραγματικότητα, ανταγιά ισί η πρώτη φαρ σο ισινόμ σε εκ εκκλησία νοηματικής! Σαρ καταφεριντόμ λοιπόν τι ατσσικιαράβ ζουρανί μι σχέση ι Ιεχωβάσαρ σαρέ ανταλά μπρεσά σο ισινόμας κο αγγλικές εκκλησίες; Ο Ιεχωβά βοηθιντάς-μαν. Ατσσικιαρντάς πι υπόσχεση τι αρακχαβέλ ι τσσαβέν σο να τθερένα νταντές. (Ψαλμός 10:​14) Εκτιμίναβα μπουτ ο προσπάθειες σο κερντέ σαρέ οντουλά σο ισινέ πρόθυμοι τι γραφίνεν σημειώματα, τι σικλιόν ι νοηματική τσσιπ ντα τι μεταφράνεν καζόμ πιο λατσσές μπορίνενας μάνγκε.

Ισινέ φαρ σο να αγαβάβας σο βακερένας οντουλά σο ισινέ πασέ μάντε ή σο αμντίναβας ότι καέκ να αγαβέλας σαρ τι βοηθίνελ ι λαλορέν. Αζομάν σο νιωθίναβας απελπισμέ ντα μανγκάβας τι παρατίναβ-λεν, σκεφτίναβας ο λάφια ι Πετρόσκε σο βακερντάς κο Ιησούς: «Κύριε, κάστε τι τζας; Τούι τθερέσα λάφια σο ντένα αιώνια ζωή». (Ιωάννης 6:​66-68) Σαρ μπουτ γιαβερά λαλορέ πφραλά ντα πφενιά σο ισί κι αλήθεια μπουτ μπρεσά, αντικάς με-ντα σικλιλόμ τι κεράβ υπομονή. Σικλιλόμ τι τθεράβ εμπιστοσύνη κο Ιεχωβά ντα κι οργάνωση σο τθερέλα, ντα ανταβά αντάς μάνγκε μπουτ ευλογίες. Ακανά μπουτ γραφικά έντυπα νικιόνα μι τσσιμπάτε-ντα, ντα ισινόμ χαρούμενος σο μπορίναβα τι παρακολουθίναβ ο συναθροίσεις ντα ο συνελεύσεις κι αμερικανική νοηματική τσσιπ. Μι ζωή κι υπηρεσία αμαρέ μπαρέ Ντεβλέσκι, κι Ιεχωβάσκι, ισί μπαγιά πφερντί ευλογίες ντα χαρά.