Σαρ Μπορίνενα τι Λύνεν ο Παρεξηγήσεις για τι Ατσσικιαρέν ι Ειρήνη;
Ο ΙΕΧΩΒΑ ΝΤΕΒΕΛ μανγκέλα τι απολαμβάνεν ειρήνη οντουλά σο ντένα-λες δόξα. Μανγκέλα λένταρ τι κερέν ειρήνη ο εκ ι γιαβερέσαρ. Όταν κερένα-λες ανταβά, υπαρχίντιβελα ειρήνη κι Χριστιανική εκκλησία, ντα οτθάρ γιαβερά-ντα τζενέ μανγκένα τι αβέν κι εκκλησία.
Για παράδειγμας, εκ μάγος-γιατρός κι Μαδαγασκάρη ντικχλάς ότι ο Μάρτυρες του Ιεχωβά τθερένα ειρήνη ντα σκεφτιντάς: “Άμα κα τραμπίναβας ποτές εκ θρησκεία, ανταγιά κα τραμπίναβας”. Αφού νακχλό χάνικ καιρός, τσσιναντάς τι ντελ λατρεία κο δαίμονες, κερντάς αλλαγές πι παντριάτε ντα αρχισάλο τι ντελ δόξα ι Ιεχωβάς, ι Ντεβλές σο μανγκέλα ι ειρήνη.
Σαρ κερντάς οντουβά μουρς, χιλιάδες τζενέ κάθε μπρες αβένα κι Χριστιανική εκκλησία ντα αρακχένα ι ειρήνη σο ρόντενας αζόμ μπουτ. Αλλά κι Αγία Γραφή διαβάνασα ότι, άμα αντρέ κι εκκλησία “τθεράσα μπαρί ζήλια ντα μανγκάσα τι χας-αμέν ι γιαβερέντζαρ”, ανταβά μπορεί τι χαλαβέλ αμαρέ φιλίες ντα τι ανέλ προβλήματα. (Ιακώβου 3:14-16) Όμως η Γραφή ντέλα-αμέν λατσσέ συμβουλές για μα τι τθεράς ασακέ προβλήματα ντα τι μπαριαράς ι ειρήνη αμαρέ πφραλέντζαρ ντα πφενίντζαρ. Για τι ντικχάς σαρ ανταλά συμβουλές αντέ λατσσέ αποτελέσματα μερικέ πφραλένγκε ντα πφενίνγκε.
ΠΡΟΒΛΗΜΑΤΑ ΝΤΑ ΛΥΣΕΙΣ
«Δυσκολίντιβαβας τι τζαβ-λεν λατσσές εκχέ πφραλέσαρ σο κεράας μπουτί γιεκ. Εκ φαρ σο ντάας βίκος, αβιλέ ντούι τζενέ ντα ντικχλέ ότι χάας-αμέν».—ΚΡΙΣ.
«Εκ πφεν νικιόλας μάντζαρ μπουτ φαρ κο έργος, αλλά ξαφνικά τσσιναντάς τι κερέλ-λες ανταβά. Σοράν, να κερέλας μάντζαρ ιτς λάφι. Να μπορίναβας τι αγαβάβ σόσκε».—ΤΖΑΝΕΤ.
«Κεράβας λάφι κο τηλέφωνος ντουέ γιαβερέ τζενέντζαρ. Μετά από χάνικ, ο εκ βακερντάς αμένγκε “γεια” ντα με αμντισάλομ ότι πφαντάας ο τηλέφωνος. Σοράν κερντόμ λέσκε μπέτι λάφια. Κάι τι τζανάβ ότι τθερέλας ο τηλέφωνος πουταρντό!»—ΜΑΪΚΛ.
«Αμαρέ εκκλησιάτε, ντούι σκαπάνισσες αρχισάλε τι τθερέν προβλήματα. Μπουτ φαρ, η εκ κρίνελας ι γιαβερά. Επειδή χάνας-πες, ο γιαβερά κι εκκλησία στεναχωρίντιβενας».—ΓΚΑΡΙ.
Ανταλά προβλήματα μπορεί τι ντικχίντιβενα χουρντέ. Αλλά κα μπορίνενας τι ανέν μπαρί στεναχώρια ντα τι χαλαβέν ι ειρήνη αντρέ κι εκκλησία. Ευτυχώς, ανταλά πφραλά ντα πφενιά ασουντέ ο συμβουλές ι Γραφιάκε ντα ξαναρακχλέ πουμαρί ειρήνη. Καλά συμβουλές κατά Γραφή πακιάνα ότι βοηθιντέ-λεν;
«Μα χολιάνεν ο εκ ι γιαβερέσκε κο ντρομ». (Γένεση 45:24) Ο Ιωσήφ ντινάς ανταγιά λατσσί συμβουλή πι πφραλέντε σο κα βουρτίνενας πουμαρέ νταντέστε. Όταν εκ τζενό να κερέλα κουμάντος πο συναισθήματα ντα νευριάνελα εύκολα, ο πράγματα μπορεί τι αβέν ατζέκ πιο δύσκολα. Μπορεί τι χολιάνεν ο γιαβερά-ντα. Ο Κρις αγαντάς ότι μπάζιμ ισινέ λέσκε δύσκολος τι αβέλ ταπεινός ντα τι κερέλ ο οδηγίες σο ντένας-λες. Επειδή μανγκέλας τι αλλάνελ, βακερντάς συγνώμη οντουλέ πφραλέσκε σο χαλέας-πες. Σοράν, προσπαθιντάς μπουτ τι κερέλ κουμάντος πο νεύρα. Όταν ο γιαβέρ πφραλ ντικχλάς καζόμ μπουτ προσπαθίνελας ο Κρις τι αλλάνελ, κερντάς βοβ-ντα ο ίδιος. Ακανά τθερένα ειρήνη ντα υπηρετίνενα γιεκ ι Ιεχωβάς.
«Ο σχέδια να τθερένα επιτυχία όταν να συζητίντιβενα». (Παροιμίες 15:22) Όταν η αμαλίν της Τζάνετ τσσιναντάς τι κερέλ λάσαρ λάφι, η Τζάνετ αποφασιντάς τι κερέλ οντουβά σο βακερέλα ανταβά εδάφιος. Γκιλί τι “συζητίνελ” οντουλέ πφενιάσαρ. Πουτσλάς-λα άμα κερντάας κάτι σο προσβαλιντάς-λα ή άμα στεναχωριντάς-λα. Κι αρχή ο ντούι-ντα να νιωθίνενας άνετα. Αλλά καζόμ συνεχίνενας τι κερέν λάφι ήρεμα, νιωσάλε πιο λατσσές. Η αμαλίν της Τζάνετ αγαντάς ότι παρεξηγιντάας κάτι σο αβιλόας-πες πριν καιρός ντα ότι η Τζάνετ να κερντάας κάτι σο προσβαλιντάς-λα. Μανγκλάς συγνώμη κατά Τζάνετ, ντα ακανά ισί πάλι λατσσέ αμαλινά ντα υπηρετίνενα γιεκ ι Ιεχωβάς.
«Οτθάρ, άμα ανέσα το δώρος ανγκλάλ κο θυσιαστήριος ντα οτθέ ντινάν-τουτ γκοντί ότι το πφραλ τθερέλα κάτι τούσαρ, μουκχ το δώρος οτθέ, ανγκλάλ κο θυσιαστήριος, ντα νας· πρώτα κερ ειρήνη τι πφραλέσαρ». (Ματθαίος 5:23, 24) Ο Ιησούς ντινάς ανταγιά συμβουλή όταν κερντάς ι Επί του Όρους Ομιλία. Ο Μάικλ κερντάς μπέτι λάφια ι γιαβερέ πφραλέσκε, αλλά σοράν νιωσάλο μπουτ μπέτι. Αποφασιντάς τι κερέλ σο νακχέλας λέσκε βαστέσταρ για τι διορθώνελ ο πρόβλημας. Οτθάρ, γκιλό οντουλέ πφραλέστε ντα βακερντάς λέσκε ότι στεναχωρισάλοας μπουτ οντουλένγκε σο βακερντάας. Σο αβιλό-πες τελικά; Ο Μάικλ βακερέλα: «Μο πφραλ συγχωριντάς-μαν μπαγιά». Αβιλέ πάλι αμαλά.
«Τι νταϊντίνεν ο εκ ι γιαβερές ντα τι συγχωρίνεν ο εκ ι γιαβερές αντράλ τουμαρέ γκίσταρ, άμα κάποιος τθερέλα παράπονος εκχέ τζενέσκε». (Κολοσσαείς 3:12-14) Ντένα-τουμέν γκοντί ι ντουέ πφενίν σο ισινέ σκαπάνισσες ντα χάνας-πες η εκ ι γιαβεράσαρ όταν ισινέ κο έργος; Εκ πρεσβύτερος βοηθιντάς-λεν με αγάπη τι αγαβέν ότι στεναχωρίνενας ι γιαβερέν ντα ότι κερένας-λεν τι νιωθίνεν μπέτι. Βακερντάς λένγκε ότι πρέπει τι νταϊντίνεν η εκ ι γιαβερά ντα τι βοηθίνεν τι υπαρχίντιβελ ειρήνη αντρέ κι εκκλησία. Δεχτιντέ τι κερέν λέσκι συμβουλή. Ακανά τζάνα-λεν λατσσές η εκ ι γιαβεράσαρ ντα βακερένα γιεκ ο λατσσέ αμπέρια.
Ανταγιά συμβουλή, σο ισί κο εδάφια Κολοσσαείς 3:12-14, μπορίνελα τι βοηθίνελ-τουμέν τι αβέν ταπεινοί, τι συγχωρίνεν εκχέ τζενές σο πληγωντάς-τουμέν ντα τι σταματίνεν τι σκεφτίνεν οντουβά σο αβιλό-πες. Σο κα αβέλ-πες όμως άμα προσπαθιντάμ τι συγχωρίνας αλλά να μπορισάλαμ; Κο εδάφιος Ματθαίος 18:15 υπαρχίντιβελα εκ συμβουλή σο μπορίνελα τι βοηθίνελ-αμέν. Παρόλο σο ατθέ ο Ιησούς κερέλας λάφι πιο μπουτ ι μπαρέ αμαρτιένγκε, σικαντάς ότι υπαρχίντιβελα κάτι σο μπορίνασα τι κεράς όταν τθεράσα εκ πρόβλημας εκχέ πφραλέσαρ ή εκχέ πφενιάσαρ. Με λατσσό τρόπος ντα με ταπεινότητα, μπορίνασα τι τζας οντουλέ τζενέστε για τι συζητίνας ντα τι προσπαθίνας τι λύνας ο πρόβλημας.
Κι Γραφή υπαρχίντιβενα γιαβερά-ντα λατσσέ συμβουλές. Ο πιο μπουτ ανταλένταρ βακερένα αμένγκε τι στηρίντιβας κο άγιος πνεύμας κι Ντεβλέσκο για τι τθεράς «ο καρπός του πνεύματος», δηλαδή ιδιότητες σαρ ισί «αγάπη, χαρά, ειρήνη, υπομονή, λατσσιπέ, αγαθότητα, πίστη, πραότητα, εγκράτεια». (Γαλάτες 5:22, 23) Σκεφτίνεν: Όταν εκ μηχάνημας τθερέλα λάδι, λειτουργίνελα λατσσές. Αντικάς αμέν-ντα, όταν τθεράσα ανταλά σουκάρ ιδιότητες ι Ιεχωβάσκε, κα αβέλ πιο εύκολος τι λύνας ο προβλήματα ντα τι τθεράς λατσσέ φιλίες ι γιαβερέντζαρ.
Ο ΔΙΑΦΟΡΕΤΙΚΟΙ ΧΑΡΑΚΤΗΡΕΣ ΚΕΡΕΝΑ ΠΙΟ ΣΟΥΚΑΡ Ι ΕΚΚΛΗΣΙΑ
Ο κάθε τζενό τθερέλα πιρό χαρακτήρας. Ο κάθε εκ αμένταρ τθερέλα διαφορετικές ιδιότητες, ντικχέλα ο πράγματα με διαφορετικός τρόπος ντα κερέλα λάφι διαφορετικά. Σαρέ ανταλά μπορίνενα τι κερέν-αμέν τι απολαμβάνας πιο μπουτ αμαρέ φιλίες. Αλλά μπορεί τι αβέν-πες παρεξηγήσεις-ντα επειδή να τθεράσα ο ίδιος χαρακτήρας. Εκ πφραλ σο ισί μπουτ μπρεσά πρεσβύτερος βακερντάς εκ παράδειγμας: «Εκ τζενό σο ισί λατζανό μπορεί τι δυσκολίντιβελα τι κερέλ παρέα εκχέσαρ σο μπεϊντίνελα τι κερέλ λάφι. Ανταβά μπορεί τι ντικχίντιβελα ότι νανέ αζόμ σημαντικός, αλλά μπορίνελα τι ανέλ μπαρέ προβλήματα». Μήπως πακιάνα ότι ο τζενέ σο να τθερένα ο ίδιος χαρακτήρας να μπορίνενα ποτές τι τζαν-λεν λατσσές ο εκ ι γιαβερέσαρ; Για τι ντικχάς ο παράδειγμας ντουέ αποστολένγκο. Όταν σκεφτίνασα ι Πετρός, μπορεί τι τθεράσα-λες αμαρέ γκοντιάτε σαρ εκ τζενό σο βακερέλας ντα κερέλας σο-ντα σκεφτίνελας. Όταν σκεφτίνασα ι Ιωαννής, μπορεί τι τθεράσα-λες αμαρέ γκοντιάτε σαρ εκ πφραλ σο σικαβέλας αγάπη ντα ο πιο μπουτ φαρ σκεφτίνελας πριν τι βακερέλ ή τι κερέλ κάτι. Ο Πέτρος ντα ο Ιωάννης να τθερένας ο ίδιος χαρακτήρας. Όμως, συνεργαζίντιβενας λατσσές κι υπηρεσία κι Ιεχωβάσκι. (Πράξεις 8:14· Γαλάτες 2:9) Άρα, αντιβές-ντα ο Χριστιανοί σο τθερένα μπουτ διαφορετικός χαρακτήρας μπορίνενα τι συνεργαζίντιβεν λατσσές.
Σο αβέλα-πες όμως άμα κάποιος κι εκκλησία βακερέλα ή κερέλα κάτι σο νευριάνελα-τουμέν; Ισί λατσσό τι ντεν-τουμέν γκοντί ότι ο Χριστός μουλό οντουλέ πφραλέσκε σαρ μουλό τουμένγκε-ντα, ντα πρέπει τι μανγκέν τουμαρέ πφραλές. (Ιωάννης 13:34, 35· Ρωμαίους 5:6-8) Να κα αβέλας σωστός τι αποφασίνεν μα τι κερέν παρέα οντουλέ τζενέσαρ ή μα τι ντεν-λες σημασία. Όμως ισί λατσσό τι πουτσέν τουμαρό νεαυτός: “Κερέλα μο πφραλ κάτι σο τζάλα κόντρα κο νόμοι κι Ιεχωβάσκε; Μήπως προσπαθίνελα τι πληγώνελ-μαν επίτηδες; Ή απλώς να τθεράσα ο ίδιος χαρακτήρας; Μήπως τθερέλα κάποιες ιδιότητες σο κα μανγκάβας τι τθεράβ με-ντα;”
Για παράδειγμας, αν οντουβά πφραλ μπεϊντίνελα μπουτ τι κερέλ λάφι αλλά τουμέν να ισινέν αντικάς, σόσκε μα τι νικιόν γιεκ κο έργος για τι ντικχέν σο μπορίνενα τι σικλιόν λέσταρ; Ή άμα τθερέλα ι συνήθεια τι ντελ αντράλ πι γκίσταρ πιο μπουτ από ό,τι τουμέν, ντικχλέν ι χαρά σο τθερέλα όταν ντέλα κο πφουρέ, κο νασφαλέ ή κο τσορορέ; Κα μπορίνενας τι σικλιόν λέσταρ τι ντεν τουμέν-ντα πιο μπουτ πράγματα κο γιαβερά; Ο σημαντικός ισί ότι, παρόλο σο ισινέν διαφορετικοί, μπορίνενα τι ντικχέν ο λατσσέ ιδιότητες τουμαρέ πφραλέσκε. Παρόλο σο μπορεί μα τι αβέν ποτές ο πιο λατσσέ αμαλά, κα πλησιάνεν πιο μπουτ ο εκ ι γιαβερές. Ανταβά κα βοηθίνελ τι τθερέν ειρήνη τουμαρέ πφραλέσαρ ντα αντρέ κι εκκλησία.
Κο πρώτος αιώνας, ισινέ ντούι πφενιά σο βακερένας λένγκε Ευοδία ντα Συντύχη. Τθερένας μπουτ διαφορετικός χαρακτήρας, αλλά ο απόστολος Παύλος βακερντάς λένγκε «τι τθερέν ο ίδιες σκέψεις ενώ υπηρετίνενα ι Κυριός». (Φιλιππησίους 4:2) Αμέν-ντα μανγκάσα τι ντας λατρεία ι Ιεχωβάς γιεκ αμαρέ πφραλέντζαρ ντα πφενίντζαρ ντα τι βοηθίνας τι υπαρχίντιβελ ειρήνη κι εκκλησία.
ΜΑ ΜΟΥΚΧΕΝ Ο ΠΑΡΕΞΗΓΗΣΕΙΣ ΤΙ ΣΥΝΕΧΙΝΤΙΒΕΝ
Σόσκε πρέπει τι νασκιαράς σουγκό αντρ’ αμένταρ σο-ντα μπέτι αισθήματα μπορεί τι τθεράς ι γιαβερένγκε; Ανταλά αισθήματα μοιάζενα σαρ ο τσαριά σο αρχίνενα τι μπαριόν σε εκ σουκάρ κήπος με λουλούδια. Άμα να νικαντάμ-λεν ριζάσαρ, κα πφερέν σαρό ο κήπος. Αντικάς-ντα, άμα μουκχλάμ ο μπέτι αισθήματα τι μπαριόν αντρ’ αμέντε, ανταβά μπορεί τι επηρεάνελ σαρί ι εκκλησία. Αλλά άμα μανγκάσα ι Ιεχωβάς ντα αμαρέ πφραλέν, κα κεράς σο νακχέλα αμαρέ βαστέσταρ για τι αρακχαβάς ι ειρήνη αντρέ κι εκκλησία.
Άμα προσπαθίνενα ταπεινά τι τθερέν ειρήνη ι γιαβερέντζαρ, μπορεί τι τθερέν λατσσέ αποτελέσματα σο να νακχλέας ιτς τουμαρέ γκοντιάταρ
Άμα προσπαθίνασα τι τθεράς ειρήνη ι γιαβερέντζαρ, μπορεί τι τθεράς λατσσέ αποτελέσματα σο να νακχλέας ιτς αμαρέ γκοντιάταρ. Εκ πφεν ντικχλάς ότι ανταβά ισί μπαγιά. Βακερέλα: «Αισθάντιβαβας ότι εκ πφεν συμπεριφερίντιβελας μάνγκε σαρ τι ισινόμας εκ χουρντό μαξίμι. Ανταβά ενοχλίνελας-μαν αζόμ μπουτ, σο αρχισάλομ τι συμπεριφερίντιβαβ λάκε απότομα. Σκεφτίναβας: “Αφού να σεβάνελα-μαν βόι, ούτε με κα σεβάναβ-λα”».
Σοράν οντιά πφεν σκεφτιντάς σαρ συμπεριφερίντιβελας βόι. «Αρχισάλομ τι ντικχάβ ο πράγματα σο έπρεπε τι διορθώναβ μι νεαυτόστε, ντα απογοητευσάλομ μπουτ. Αγαντόμ ότι έπρεπε τι αλλάναβ ο τρόπος σο σκεφτίναβας. Προσευχίντιλομ κο Ιεχωβά ανταλέ θεμάσκε, λιντόμ ι πφενιάκε εκ δώρος ντα γραφιντόμ λάκε εκ σημείωμας για τι μανγκάβ λάταρ συγνώμη επειδή συμπεριφερίντιβαβας λάκε με μπέτι τρόπος. Ντινάμ-αμέν αγκάλι ντα συμφωνιντάμ ότι κα μπιστράς-λεν σαρέ. Οτθάρ μπερί να ξανατθεράας προβλήματα».
Σαρέ χρειαζίντιβασα ι ειρήνη. Όμως όταν ο τζενέ να νιωθίνενα ασφάλεια ή ισί υπερήφανοι, μπορεί τι κερέν πράγματα σο χαλαβένα ι ειρήνη. Ανταβά ισί συνηθισμέ κο ντουνιάς, αλλά ο Ιεχωβά μπεκλεντίνελα κάτι γιαβέρ πι υπηρετόνταρ. Ο Μάρτυρες του Ιεχωβά πρέπει τι τθερέν ειρήνη ντα τι αβέν ενωμέ. Πι πνευμάσαρ, ο Ιεχωβά τσσουντάς ι Παυλός τι γραφίνελ κο Χριστιανοί “τι τζουβντιόν σωστά, ανάλογα με το κάλεσμας σο λιντέ”. Για τι κερέν-λες ανταβά, βακερντάς λένγκε “τι αβέν μπουτ ταπεινοί ντα λατσσέ, τι σικαβέν υπομονή, τι νταϊντίνεν ο εκ ι γιαβερές με αγάπη, ντα τι κερέν μπαρέ προσπάθειες για τι ατσσικιαρέν ι ενότητα ι πνευμάσκι με την ειρήνη σο κερέλα-λεν τι αβέν γιεκ”. (Εφεσίους 4:1-3) Η «ειρήνη» σο κερέλα ι Ιεχωβάσκε λαός τι αβέλ γιεκ τθερέλα μπαρί αξία. Μακάρι σαρέ τι κεράς ο πιο λατσσό σο μπορίνασα για τι μπαριαράς ι ειρήνη ντα τι λύνας σο-ντα προβλήματα μπορεί τι τθεράσα αμαρέ πφραλέντζαρ ντα πφενίντζαρ.