Τζάνα κο Ιεχωβά για τι Αρακχαβέν-τουμέν;

1. Επειδή ισί αμαρτωλοί, σαρ νιωθίνενα μπουτ πιστοί υπηρέτες ι Ντεβλέσκε;

«ΣΟ ΤΑΛΑΙΠΩΡΙΑ τσσίνταβα!» γραφιντάς ο απόστολος Παύλος. (Ρωμαίους 7:​24) Αμαρέ ντιβεσέντε, μπουτ πιστοί υπηρέτες ι Ντεβλέσκε νιωθίνενα σαρ ο Παύλος σο χασαρντάς πο κουράγιος ντα πφανγκιλό λέσκο γκι. Σόσκε; Επειδή παρόλο σο μανγκάσα τι κεράς ι Ιεχωβάς τι χαιρίνελ, σαρέ κληρονομιντάμ ι αμαρτία ντα ισινάμ ατελείς. Οτθάρ, μπορεί τι νιωθίνας μπέτι όταν να καταφερίνασα τι κεράς-λες χαρούμενος. Μερικοί Χριστιανοί σο κερντέ εκ μπαρί αμαρτία μπορεί ατζέ-ντα τι νιωθίνεν ότι ναστί αβέλα-πες τι συγχωρίνελ-λεν ο Ιεχωβά.

2. (α) Σαρ σικαβέλα ο εδάφιος Ψαλμός 34:​22 ότι ι Ντεβλέσκε υπηρετόν να χρειαζίντιβελα τι χαν-λεν ο τύψεις; (β) Σο κα ντικχάς ανταλέ μαθημάστε; (Ντικχέν ο πλαίσιος «Μαθήματα ή Πράγματα σο Τθερένα Συμβολική Σημασία;»)

² Η Αγία Γραφή ντέλα-αμέν ι σιγουριά ότι, άμα τζάσα κο Ιεχωβά για τι αρακχαβάς-αμέν, να χρειαζίντιβελα τι χαν-αμέν ο τύψεις. (Διαβάνεν Ψαλμός 34:​22) Αλλά σο μανγκέλα τι βακερέλ τι αρακχαβάς-αμέν κο Ιεχωβά; Σο πρέπει τι κεράς άμα μανγκάσα ο Ιεχωβά τι σικαβέλ αμένγκε έλεος ντα τι συγχωρίνελ-αμέν; Μπορίνασα τι αρακχάς ο απαντήσεις ανταλέ ερωτησιέντε αν κα σικλιάς για το πόλεις ι αρακχαϊμάσκε σο ισινέ κο πουρανό Ισραήλ. Οντουλά πόλεις υπαρχίντιβενας αζομάν σο ισινέ η συμφωνία του Νόμου, σο λάκε θεσιάτε αβιλί η νεβί συμφωνία κι Πεντηκοστή, κο μπρες 33. Όμως, ο Νόμος αβιλό κατά Ιεχωβά. Άρα, κατά πόλεις ι αρακχαϊμάσκε, σικλιάσα σαρ ντικχέλα ο Ιεχωβά ι αμαρτία, ι αμαρτωλόν ντα οντουλέν σο μετανιώνενα. Πρώτα, για τι ντικχάς σόσκε κο Ισραήλ υπαρχίντιβενας ασακέ πόλεις ντα σαρ ισινέ οργανωμέ.

«ΤΡΑΜΠΙΝΕΝ Ο ΠΟΛΕΙΣ Ι ΑΡΑΚΧΑΪΜΑΣΚΕ»

3. Σο έπρεπε τι κερέν ο Ισραηλίτες εκχέ δολοφονός;

³ Ι Ιεχωβάσκε, ισινέ μπουτ σοβαρός πράγμας τι μουνταρέλ κάποιος εκχέ γιαβερές. Άμα εκ Ισραηλίτης μουνταρέλας εκχέ τζενές, “οντουβά σο λέλας εκδίκηση ι ρατέσκε”, δηλαδή ο μουρς σο ισινέ ο πιο κοντινός συγγενής ι μουλέ τζενέσκο, έπρεπε τι μουνταρέλ ι δολοφονός. (Αριθμοί 35:​19) Αντικάς, ο δολοφόνος κα ποκινέλας πι ζωγιάσαρ, ι ζωή ι αθώε τζενέσκι σο μουνταρντάς. Άμα να κα μουνταρένας σουγκό ι δολοφονός, ο Υποσχεμέ Τθεμ κα μαγαρίντιβελας, δηλαδή να κα αβέλας άγιος. Ο Ιεχωβά ντινάς ακαγιά εντολή: «Δεν πρέπει [τι τσσορέν τζενέσκο ρατ, δηλαδή τι μουνταρέν, ντα αντικάς] τι μαγαρίνεν ο τθεμ σο μπεσένα».​—Αριθμοί 35:​33, 34.

4. Σο αβέλας-πες όταν εκ Ισραηλίτης μουνταρέλας εκχέ τζενές κατά λάθος;

⁴ Όμως, σο αβέλας-πες όταν εκ Ισραηλίτης μουνταρέλας εκχέ τζενές κατά λάθος; Παρόλο σο να μανγκέλας τι μουνταρέλ-λες, φταίνελας σο μουλό εκ αθώος τζενό. (Γένεση 9:5) Ασακέ περιπτωσιέντε όμως, ο Ιεχωβά βακερντάς ότι μπορίνελας τι σικάντιβελ έλεος. Οντουβά σο μουνταρντάς κατά λάθος μπορίνελας τι τζαλ σε εκ κατά σιοβ πόλεις ι αρακχαϊμάσκε για τι γλιτώνελ οντουλέσταρ σο λέλας εκδίκηση ι ρατέσκε. Αφού κα μουκχένας-λες τι μπεσέλ κι πόλη, ισινέ αρακχαντό. Αλλά έπρεπε τι μπεσέλ κι πόλη μέχρι τι μερέλας ο αρχιερέας.​—Αριθμοί 35:​15, 28.

5. Σόσκε μπορίνενα ο πόλεις ι αρακχαϊμάσκε τι βοηθίνεν-αμέν τι αγαβάς πιο λατσσές ι Ιεχωβάς;

⁵ O πόλεις ι αρακχαϊμάσκε να ισινέ τζενέσκι ιδέα. Ισινέ ι Ιεχωβάσκι. Βοβ βακερντάς κο Ιησούς του Ναυή: «Βάκερ κο Ισραηλίτες: “Τραμπίνεν ο πόλεις ι αρακχαϊμάσκε”». Ανταλά πόλεις βακέρντιλε “άγιες”. (Ιησούς του Ναυή 20:1, 2, 7, 8) Ο Ιεχωβά αποφασιντάς ότι ανταλά πόλεις έπρεπε τι ξεχωρίντιβεν. Άρα, κατά πόλεις ι αρακχαϊμάσκε, μπορίνασα τι σικλιάς μπουτ πράγματα ι Ιεχωβάσκε. Για παράδειγμας, βοηθίνενα-αμέν τι αγαβάς πιο λατσσές ο έλεος ι Ιεχωβάσκο. Ντα σικλιαρένα-αμέν σαρ μπορίνασα τι τζας κο Ιεχωβά για τι αρακχαβάς-αμέν αμαρέ ντιβεσέντε.

ΠΡΕΠΕΙ ΤΙ «ΒΑΚΕΡΕΛ ΟΝΤΟΥΒΑ ΣΟ ΑΒΙΛΟ-ΠΕΣ» ΚΟ ΠΡΕΣΒΥΤΕΡΟΙ

6, 7. (α) Βακερέν σο έπρεπε τι κερέν ο πρεσβύτεροι όταν κρίνενας εκχέ τζενές σο μουνταρντάς κατά λάθος. (Ντικχ ι φωτογραφία σο ισί κι αρχή) (β) Σόσκε έπρεπε τι κερέλ λάφι κο πρεσβύτεροι εκ τζενό σο μουνταρντάς;

⁶ Άμα εκ Ισραηλίτης μουνταρέλας εκχέ τζενές κατά λάθος, έπρεπε τι τθάβντελ κι πόλη κι αρακχαϊμάσκι ντα τι «βακερέλ οντουβά σο αβιλό-πες» κο πρεσβύτεροι σο ισινέ κι μπαρί πόρτα σο τθερέλας η πόλη. Ο πρεσβύτεροι έπρεπε τι δεχτίνεν-λες κι πόλη. (Ιησούς του Ναυή 20:4) Πιο σοράν, κα μπουτσσαβένας-λες παλάλ κι πόλη σο αβιλό ο μουνταριπέ για τι κρίνεν-λες ο πρεσβύτεροι. (Διαβάνεν Αριθμοί 35:​24, 25) Αν οντουλά πρεσβύτεροι αποφασίνενας ότι ο μουνταριπέ αβιλόας κατά λάθος, κα μπουτσσαβένας πάλι ι τζενές σο μουνταρντάς κι πόλη κι αρακχαϊμάσκι.

⁷ Σόσκε ο τζενό σο μουνταρντάς έπρεπε τι κερέλ λάφι κο πρεσβύτεροι; Ο πρεσβύτεροι κα κερένας σο νακχέλας λένγκε βαστέσταρ για τι ατσσικιαρέν πάκι ι εκκλησία ι Ισραηλιτένγκι ντα κα βοηθίνενας ι τζενές σο μουνταρντάς κατά λάθος τι ωφελίντιβελ κατά έλεος ι Ιεχωβάσκο. Εκ συγγραφέας σο ασχολίντιβελα ι Γραφιάσαρ γραφιντάς ότι αν οντουβά σο μουνταρντάς να τζάλας κο πρεσβύτεροι, μπορεί τι χασαρέλας πι ζωή. Επίσης, βακερντάς ότι βοβ κα αβέλας υπεύθυνος πι μεριμάσκε επειδή να κερντάς οντουβά σο βακερέλας η εντολή ι Ντεβλέσκι. Για τι ατσσόλας τζουβντό εκ τζενό σο μουνταρντάς κατά λάθος, έπρεπε τι μανγκέλ βοήθεια ντα τι δεχτίνελ-λα. Άμα να κα τζάλας σε εκ κατά αρακχαϊμάσκε πόλεις, ο πιο κοντινός συγγενής ι τζενέσκο σο μουλό τθερέλας ο δικαίωμας τι μουνταρέλ-λες.

8, 9. Σόσκε πρέπει τι κερέλ λάφι κο πρεσβύτεροι εκ Χριστιανός σο κερντάς μπαρί αμαρτία;

⁸ Αμαρέ ντιβεσέντε, για τι τθερέλ πάλι εκ λατσσί φιλία ι Ιεχωβάσαρ εκ Χριστιανός σο κερντάς μπαρί αμαρτία, χρειαζίντιβελα τι τζαλ κο πρεσβύτεροι για τι βοηθίνεν-λες. Σόσκε ισί αζόμ σημαντικός ανταβά; Πρώτον, ο Ιεχωβά ισί οντουβά σο διοριντάς ι πρεσβυτερόν τι λεν αποφάσεις όταν αβένα-πες σοβαρές αμαρτίες. (Ιακώβου 5:​14-16) Δεύτερον, ο πρεσβύτεροι βοηθίνενα οντουλέν σο μετανιώνενα εκχέ αμαρτιάκε τι τθερέν πάλι ι ευλογία ι Ντεβλέσκι ντα μα τι ξανακερέν ι αμαρτία. (Γαλάτες 6:1· Εβραίους 12:​11) Τρίτον, ο πρεσβύτεροι ισί διορισμέ ντα εκπαιδευμέ τι κερέν λάφι λέντζαρ με σουκάρ τρόπος ντα τι βοηθίνεν-λεν τι κοβλιαρέν ι ντουκχ ντα ο τύψεις σο τθερένα. Ο Ιεχωβά βακερέλα ότι ασακέ πρεσβύτεροι ισί σαρ «εκ τθαν σο αρακχαβέλα . . . κατά μπουτ μπρισίμ». (Ησαΐας 32:1, 2) Η βοήθεια ι πρεσβυτερόνγκι ισί εκ τρόπος σο σικαβέλα αμένγκε έλεος ο Ντεβέλ.

⁹ Μπουτ υπηρέτες ι Ντεβλέσκε νιωσάλε ότι λοκχιλό λένγκο γκι όταν κερντέ λάφι κο πρεσβύτεροι ντα δεχτιντέ ι βοήθεια σο ντινέ-λεν. Για παράδειγμας, εκ πφραλ, ο Ντάνιελ, κερντάς εκ μπαρί αμαρτία, αλλά για κάποια μασεκά να γκιλόας κο πρεσβύτεροι. Βοβ βακερντάς: «Αφού νακχλόας αζόμ καιρός, πακιάβας ότι ο πρεσβύτεροι να μπορίνενας τι κερέν τίποτα μάνγκε». Επίσης, νταρέλας συνέχεια ότι κάποιος κα σικλιόλας ι αμαρτία σο κερντάς ντα νιωθίνελας ότι κάθε φαρ σο κερέλας προσευχή έπρεπε πρώτα τι μανγκέλ συγνώμη κατά Ιεχωβά. Τελικά, μανγκλάς βοήθεια κατά πρεσβύτεροι. Ακανά βακερέλα: «Νταράβας μπουτ τι πλησιάναβ-λεν. Αλλά σοράν, ισινέ σαρ τι λιντάς κάποιος οπρά-μάνταρ εκ μπουτ μπαρό βάρος». Ο Ντάνιελ μπορίνελας πάλι τι κερέλ λάφι κο Ιεχωβά ελεύθερα. Ακανά τθερέλα πάκι συνείδηση ντα τελευταία αβιλό διακονικός υπηρέτης.

«ΚΑ ΤΖΑΛ ΣΕ ΕΚ ΠΟΛΗ ΑΝΤΑΛΕΝΤΑΡ»

10. Για τι συγχωρίντιβελ εκ τζενό σο μουνταρντάς κατά λάθος, σο έπρεπε τι κερέλ;

¹⁰ Για τι συγχωρίντιβελ, ο τζενό σο μουνταρντάς κατά λάθος έπρεπε τι τζαλ κι πόλη κι αρακχαϊμάσκι σο ισινέ πιο πασέ. (Διαβάνεν Ιησούς του Ναυή 20:4) Κα σώνελας πι ζωή άμα κα τζάλας κι πόλη ντα κα μπεσέλας οτθέ μέχρι τι μερέλας ο αρχιερέας. Ανταγιά ισινέ εκ θυσία λέσκε. Έπρεπε τι μουκχέλ πι μπουτί, πο άνετος κχερ ντα ι ελευθερία τι τζαλ κάπου γιαβερτθέ.a (Ντικχ ι υποσημείωση) (Αριθμοί 35:​25) Αλλά αξίνελας τι κερέλ-λεν σαρέ ανταλά. Άμα κα νασέλας κατά αρακχαϊμάσκι πόλη, κα σικαβέλας ότι να χάλας-λες ανάγκη σο μουνταρντάας εκχέ τζενές ντα κα τσσουβέλας πι ζωή σε κίνδυνος.

11. Σαρ μπορίνελα εκ Χριστιανός σο μετανιωσάλο τι σικαβέλ ότι εκτιμίνελα μπουτ ο έλεος ι Ντεβλέσκο;

¹¹ Επίσης αμαρέ ντιβεσέντε, εκ τζενό σο μετανιώνελα εκχέ αμαρτιάκε πρέπει τι κερέλ συγκεκριμέ πράγματα για τι συγχωρίνελ-λες ο Ντεβέλ. Πρέπει τι τσσιναβέλ τι κερέλ αμαρτωλά πράγματα. Ανταβά μανγκέλα τι βακερέλ ότι κα νασέλ ντουρ κάθε πραγμάσταρ σο κα μπορίνελας τι οδηγίνελ-λες μπαρέ αμαρτιέντε. Ο απόστολος Παύλος βακερντάς σο κερντέ ο Χριστιανοί κι Κόρινθος σο μετανιωσάλεας. Βοβ γραφιντάς: «Ντικχέν σο αποτελέσματα αντάς τουμένγκε η προσπάθεια σο κερντέν επειδή στεναχωρισάλεν σαρ μανγκέλα ο Ντεβέλ, βα, καθαρισάλεν, βα, μετανιωσάλεν για το κακός σο αβιλό, βα, νταρασάλεν κατά Ντεβέλ, βα, μανγκλέν μπουτ τι αλλάνεν, βα, υπηρετιντέν ι Ντεβλές αντράλ τουμαρέ γκίσταρ, βα, διορθωντέν ι αδικία!» (2 Κορινθίους 7:​10, 11) Άρα, άμα κεράσα ο πιο λατσσό σο μπορίνασα για τι τσσιναβάς τι αμαρτίνας, κα σικαβάς κο Ιεχωβά ότι ενδιαφερίντιβασα μπουτ οντουλέσκε σο αβιλό-πες ντα ότι να πακιάσα ότι σο-ντα τι αβέλ-πες κα σικαβέλ αμένγκε έλεος.

12. Σο μπορεί τι χρειαζίντιβελ τι μουκχέλ εκ Χριστιανός για τι συνεχίνελ τι τθερέλ ι Ιεχωβάσκο έλεος;

¹² Σο μπορεί τι χρειαζίντιβελ τι μουκχέλ εκ Χριστιανός για τι συνεχίνελ τι τθερέλ ι Ιεχωβάσκο έλεος; Πρέπει τι αβέλ έτοιμος τι μουκχέλ πράγματα σο κα μπορίνενας τι κερέν-λες τι αμαρτίνελ ατζέ-ντα άμα μπεϊντίνελα-λεν μπουτ. (Ματθαίος 18:8, 9) Για παράδειγμας, άμα τουμαρέ αμαλά επηρεάνενα-τουμέν για τι κερέν πράγματα σο στεναχωρίνενα ι Ιεχωβάς, κα τσσιναβέν τι κερέν παρέα λέντζαρ; Άμα δυσκολίντιβενα τι κερέν κουμάντος ι μολ, κα νασέν πραγματένταρ σο μπορεί τι τσσουβέν-τουμέν κο πειρασμός τι πιν μπουτ; Άμα δυσκολίντιβενα τι κερέν κουμάντος ο λάθος σεξουαλικές επιθυμίες, ισινέν αποφασισμέ μα τι ντικχέν ταινίες, μα τι τζαν σε ιστοσελίδες ή μα τι κερέν τίποτα γιαβέρ σο κα μπορίνελας τι κερέλ-τουμέν τι σκεφτίνεν μπέτι πράγματα; Τι ντεν-τουμέν γκοντί ότι σο-ντα θυσία κεράσα για τι ντας καν κο νόμοι κι Ιεχωβάσκε, αξίνελα. Ο πιο μπέτι συναίσθημας σο κα μπορίναας τι τθεράς ισί τι νιωθίνας ότι ο Ιεχωβά μουκχλάς-αμέν. Αλλά ο πιο σουκάρ συναίσθημας ισί τι νιωθίνας ι Ιεχωβάσκι «αφοσιωμέ αγάπη σο ατσσικιαρέλα για πάντα».​—Ησαΐας 54:7, 8.

«ΚΑ ΜΠΟΡΙΝΕΝ ΤΙ ΤΖΑΝ ΟΤΘΕ ΓΙΑ ΤΙ ΑΡΑΚΧΑΒΕΝ-ΤΟΥΜΕΝ»

13. Εξηγίνεν σόσκε ο τζενό σο μουνταρντάς κατά λάθος μπορίνελας τι νιωθίνελ ασφαλής ντα ευτυχισμέ αντρέ κι πόλη κι αρακχαϊμάσκι.

¹³ Αφού ο τζενό σο μουνταρντάς κατά λάθος ισινέ αντρέ κι πόλη κι αρακχαϊμάσκι, ισινέ ασφαλής. Ο Ιεχωβά βακερντάας: «Κα μπορίνεν τι τζαν οτθέ για τι αρακχαβέν-τουμέν». (Ιησούς του Ναυή 20:2, 3) Ο Ιεχωβά να μανγκέλας τι ξανακρίντιβελ ο τζενό σο μουνταρντάς κατά λάθος οντουλέσκε σο κερντάας. Επίσης, να μουκχένας οντουλές σο λέλας εκδίκηση ι ρατέσκε τι τζαλ αντρέ κι πόλη ντα τι μουνταρέλ-λες. Όταν ο τζενό ισινέ αντρέ κι πόλη, ισινέ ασφαλής επειδή αρακχαβέλας-λες ο Ιεχωβά. Να ισινέ εκχέ φυλακιάτε. Μπορίνελας τι κερέλ μπουτί, τι βοηθίνελ γιαβερέν ντα τι υπηρετίνελ ι Ιεχωβάς με ειρήνη. Βα, κα μπορίνελας τι τθερέλ εκ ευτυχισμέ ζωή, πφερντί νόημας!

14. Καλέ πραγμάσκε μπορίνελα τι αβέλ σίγουρος εκ Χριστιανός σο μετανιωσάλο;

¹⁴ Μερικοί υπηρέτες ι Ντεβλέσκε σο κερντέ μπαρέ αμαρτίες συνεχίνενα τι τθερέν τύψεις παρόλο σο μετανιωσάλε. Μερικοί νιωθίνενα μάλιστα ότι ο Ιεχωβά να κα μπιστρέλ ποτές σο κερντέ. Αν νιωθίνενα αντικάς, μολίνασα-τουμέν τι αβέν σίγουροι ότι, όταν ο Ιεχωβά συγχωρίνελα-τουμέν, να ανέλα πάλι πι γκοντιάτε οντουβά σο κερντέν. Να χρειαζίντιβελα τι τθερέν τύψεις. Ανταβά αβιλό-πες κο Ντάνιελ, σο βακερντάμ λέσκε πιο τζανγκλέ. Αφού ο πρεσβύτεροι διορθωντέ-λες ντα βοηθιντέ-λες τι τθερέλ πάλι πάκι συνείδηση, νιωσάλο ότι λοκχιλό λέσκο γκι. Βοβ βακερέλα: «Να υπαρχίντιβελας λόγος τι τθεράβ τύψεις. Αφού η αμαρτία σβησάλι, σβησάλι για πάντα. Ο Ιεχωβά, κερέλα οντουβά σο βακερντάς, λέλα το βάρη ντα τσσουβέλα-λεν ντουρ τούταρ. Να κα ξαναντικχές-λεν ποτές». Αφού οντουβά σο μουνταρντάς κατά λάθος ισινέ αντρέ κι πόλη κι αρακχαϊμάσκι, να χρειαζίντιβελας τι νταρέλ ότι κα αβέλας τι μουνταρέλ-λες οντουβά σο λέλας εκδίκηση ι ρατέσκε. Ο ίδιος αβέλα-πες όταν ο Ιεχωβά συγχωρίνελα εκ αμαρτία σο κερντάμ. Να χρειαζίντιβελα τι νταράς ότι κα ανέλ-λα πάλι πι γκοντιάτε ή ότι κα τιμωρίνελ-αμέν λάκε.​—Διαβάνεν Ψαλμός 103:​8-12.

15, 16. Σαρ μπαριόλα τουμαρί σιγουριά για το έλεος ι Ντεβλέσκο όταν ανένα τουμαρέ γκοντιάτε ότι ο Ιησούς ποκιντάς ο λύτρος ντα ότι ισί αμαρό Αρχιερέας;

¹⁵ Κι πραγματικότητα, αμέν τθεράσα ατζέ πιο μπουτ λόγους κατά Ισραηλίτες για τι αβάς σίγουροι ότι ο Ιεχωβά σικαβέλα έλεος. Αφού ο Παύλος βακερντάς ότι “τσσίντελας ταλαιπωρία” επειδή να μπορίνελας τι ντελ καν ι Ιεχωβάς τέλεια, σοράν βακερντάς: «Ευχαριστίναβα ι Ντεβλές αντράλ κατά Ιησούς Χριστός σο ισί αμαρό Κύριος!» (Ρωμαίους 7:​25) Σο μανγκέλας τι βακερέλ; Παρόλο σο ο Παύλος κερέλας αγώνας για μα τι μανγκέλ αμαρτωλά πράγματα ντα αμαρτιντάας κο παρελθόν, μετανιωσάλοας. Οτθάρ, ισινέ σίγουρος ότι ο Ιεχωβά συγχωριντάας-λες χάρη κι θυσία κι Ιησούσκι σο ντιντιλί σαρ λύτρος. Επειδή ο Ιησούς ποκιντάς ο λύτρος, μπορίνασα τι τθεράς πάκι συνείδηση ντα ειρήνη αντρ’ αμέντε. (Εβραίους 9:​13, 14) Επειδή ισί αμαρό Αρχιερέας, ο Ιησούς «μπορίνελα επίσης τι σώνελ με τέλειος τρόπος οντουλέν σο λέσκε ναβέστε πλησιάνενα ι Ντεβλές, επειδή ισί πάντα τζουβντό για τι μολίνελ ι Ντεβλές τι βοηθίνελ-λεν». (Εβραίους 7:​24, 25) Κο πουρανέ μπρεσά, ο αρχιερέας βοηθίνελας ι Ισραηλιτέν τι αβέν σίγουροι ότι ο Ιεχωβά κα συγχωρίνελας λένγκε αμαρτίες. Επειδή αμαρό Αρχιερέας ισί ο Ιησούς, τθεράσα ατζέ πιο μπουτ λόγους για τι αβάς σίγουροι ότι “κα ντιντιόλ-αμέν έλεος ντα κα αρακχάς ο λατσσιπέ σο να αξίνασα-λες αζομάν σο κα χρειαζίντιβας βοήθεια”.​—Εβραίους 4:​15, 16.

¹⁶ Άρα, για τι τζας τι αρακχαβάς-αμέν κο Ιεχωβά, πρέπει τι τθεράς πίστη κι θυσία κι Ιησούσκι. Μα τι σκεφτίνεν ότι ο λύτρος απλά βοηθίνελα σαρέ ι τζενέν. Τι πακιάν ότι ο λύτρος βοηθίνελα τουμέν. (Γαλάτες 2:​20, 21) Τι πακιάν ότι χάρη κο λύτρος, ο Ιεχωβά συγχωρίνελα τουμαρέ αμαρτίες. Τι πακιάν ότι ο λύτρος ντέλα τουμέντε ι ελπίδα τι τζουβντιόν για πάντα. Η θυσία ι Ιησούσκι ισί εκ δώρος σο κερντάς ο Ιεχωβά τουμένγκε!

17. Σόσκε μανγκένα τι τζαν κο Ιεχωβά για τι αρακχαβέν-τουμέν;

¹⁷ Ο πόλεις ι αρακχαϊμάσκε βοηθίνενα-αμέν τι αγαβάς ι Ιεχωβάσκο έλεος. Σικλιαρένα-αμέν ότι η ζωή ισί ιερή. Σικαβένα αμένγκε επίσης σαρ μπορίνενα τι βοηθίνεν-αμέν ο πρεσβύτεροι, σο μανγκέλα τι βακερέλ τι μετανιώνας μπαγιά ντα σόσκε μπορίνασα μα τι τθεράς καέκ αμφιβολία ότι ο Ιεχωβά συγχωρίνελα-αμέν. Τουμέν τζάνα κο Ιεχωβά για τι αρακχαβέν-τουμέν; Πουθενά γιαβερτθέ να μπορίνενα τι αρακχέν ασακί ασφάλεια! (Ψαλμός 91:1, 2) Κο γιαβέρ μάθημας, κα ντικχάς σαρ ο πόλεις ι αρακχαϊμάσκε μπορίνενα τι βοηθίνεν-αμέν τι μοιάζας κο Ιεχωβά, σο ντέλα-αμέν ο πιο λατσσό παράδειγμας για τι σικαβάς δικαιοσύνη ντα έλεος.