Νταντάλεν ντα Νταγιάλεν, Βοηθίνενα Τουμαρέ Τσσαβέν τι Ερεσέν κο Μπολιπέ;

1. Καλέ πραγμάσκε μανγκένα τι αβέν σίγουροι ο Χριστιανοί νταντά ντα νταγιά πριν τι μπολντιόν λένγκε τσσαβέ;

«ΓΙΑ μπουτ μασεκά βακεράβας μι νταντέσκε ντα μι νταγιάκε ότι μανγκάβας τι μπολντιάβ, ντα βον μπουτ φαρ κερένας μάντζαρ λάφι ανταλέσκε. Μανγκένας τι αβέν σίγουροι ότι τζανάβας καζόμ σημαντικός ισινέ ανταβά. 31 Δεκεμβρίου 1934, ισινέ ο ντιβές σο αβιλό-πες ανταβά μπουτ σημαντικός πράγμας μι ζωγιάτε». Ανταλέ λαφίντζαρ, η Μπλόσομ Μπραντ εξηγιντάς σο αβιλό-πες όταν αποφασιντάς τι μπολντιόλ. Αντιβές-ντα ο νταντά ντα ο νταγιά μανγκένα τι βοηθίνεν πουμαρέ τσσαβέν τι λεν λατσσέ αποφάσεις. Άμα εκ τσσαβό αργίνελα τι μπολντιόλ χωρίς τι υπαρχίντιβελ σημαντικός λόγος, ανταβά κα μπορίνελας τι κερέλ κακός κι φιλία σο τθερέλα ι Ιεχωβάσαρ. (Ιακώβου 4:​17) Πριν τι μπολντιόν λένγκε τσσαβέ, ο νταντά ντα ο νταγιά σο τθερένα σοφία μανγκένα τι αβέν σίγουροι ότι ισί έτοιμα τι αβέν μαθητές ι Χριστόσκε.

2. (α) Καβά πρόβλημας παρατηριντέ μερικοί επίσκοποι περιοχής; (β) Σο κα ντικχάς ανταλέ μαθημάστε;

² Μερικοί επίσκοποι περιοχής παρατηριντέ ότι μπουτ τερνέ σο ισί χάνικ πιο χουρντέ ή χάνικ πιο μπαρέ από 20 μπρεσένγκε, παρόλο σο μπαριλέ κι αλήθεια, να μπολντιλέ ατζέκ. Ανταλά τερνέ τζάνα κο συναθροίσεις, κο έργος ντα βακερένα ότι ισί Μάρτυρες του Ιεχωβά. Αλλά για κάποιος λόγος να αφιερωντέ-πες κο Ιεχωβά ντα να μπολντιλέ. Μερικές φορές, ανταβά αβέλα-πες επειδή ο νταντά ντα ο νταγιά πακιάνα ότι ο τσσαβέ λένγκε νανέ ατζέκ έτοιμα για τι μπολντιόν. Ανταλέ μαθημάστε, κα ντικχάς σταρ ανησυχίες σο εμποδίνενα μερικέ νταντέν ντα νταΐν τι βοηθίνεν πουμαρέ τσσαβέν τι μπολντιόν.

ΠΡΕΠΕΙ ΜΟ ΤΣΣΑΒΕ ΤΙ ΜΠΑΡΙΟΝ ΑΤΖΕΚ;

3. Καλέ πραγμάσκε ανησυχίνελας ο ντατ ντα η ντάι της Μπλόσομ;

³ Ο ντατ ντα η ντάι της Μπλόσομ, σο βακερντάμ κι αρχή, ανησυχίνενας μήπως η τσσάι λένγκι ισινέ χουρντί για τι αγαβέλ σο σημασία τθερέλα ο μπολιπέ ντα καζόμ σοβαρός ισί. Σαρ μπορίνενα ο νταντά ντα ο νταγιά τι τζανέν αν λένγκο τσσαβό ισί έτοιμος τι αφιερώντιβελ κο Ιεχωβά;

4. Σαρ βοηθίνελα ι νταντέν ντα ι νταΐν η εντολή ι Ιησούσκι κο εδάφια Ματθαίος 28:​19, 20;

⁴ Διαβάνεν Ματθαίος 28:​19, 20. Η Αγία Γραφή να βακερέλα ότι εκ τζενό πρέπει τι μπολντιόλ σε εκ συγκεκριμέ ηλικία. Αλλά ισί λατσσό ο νταντά ντα ο νταγιά τι σκεφτίνεν προσεκτικά σο μανγκέλα τι βακερέλ τι κερέν μαθητέν. Κι μπαλαμανί τσσιπ, η λέξη σο μεταφράντιβελα «κερέν μαθητέν» κο εδάφιος Ματθαίος 28:​19, μανγκέλα τι βακερέλ τι σικλιαρέλ κάποιος εκχέ τζενές με στόχος τι βοηθίνελ-λες τι αβέλ μαθητής. Μαθητής ισί κάποιος σο σικλιόλα ντα αγαβέλα οντουλά σο σικλιαρντάς ο Ιησούς ντα μανγκέλα τι ντελ-λες καν. Άρα, από αζομάν σο μπιαντιόνα λένγκε τσσαβέ, ο νταντά ντα ο νταγιά πρέπει τι σικλιαρέν-λεν με στόχος τι βοηθίνεν-λεν τι αφιερώντιβεν κο Ιεχωβά ντα τι αβέν μαθητές ι Χριστόσκε. Σίγουρα, εκ χουρντό μαξίμι νανέ έτοιμος τι μπολντιόλ. Αλλά η Γραφή σικαβέλα ότι ο χουρντέ τσσαβέ μπορίνενα τι αγαβέν ντα τι μανγκέν ο αλήθειες ι Γραφιάκε.

5, 6. (α) Οντουλένταρ σο διαβάνασα κι Γραφή ι Τιμοθεόσκε, σο αγαβάσα λέσκε μπολιμάσκε; (β) Καβά ισί ο πιο λατσσό τρόπος για τι βοηθίνεν πουμαρέ τσσαβέν ο νταντά ντα ο νταγιά σο τθερένα σοφία;

⁵ Ο Τιμόθεος ισινέ εκ μαθητής σο αποφασιντάς τι υπηρετίνελ ι Ιεχωβάς ενώ ισινέ ατζέ τερνό. Ο απόστολος Παύλος βακερντάς ότι ο Τιμόθεος αρχισάλο τι σικλιόλ ι αλήθεια κατά Ντεβλέσκο Λάφι «χουρντιαρέλα μπερί». Ο ντατ ι Τιμοθεόσκο να υπηρετίνελας ι Ιεχωβάς, αλλά η ντάι ντα η μπάμπα λέσκι βοηθιντέ-λες τι μανγκέλ ο Λάφι ι Ντεβλέσκο. Οτθάρ, τθερέλας μπουτ ζουρανί πίστη. (2 Τιμόθεο 1:5· 3:​14, 15) Μπορεί τι ισινέ χάνικ πιο χουρντό ή χάνικ πιο μπαρό από 20 μπρεσένγκο κάνα ντινέ-λες ειδικά προνόμια κι εκκλησία.​—Πράξεις 16:​1-3.

⁶ Κάθε τσσαβό ισί διαφορετικός. Να αβένα ώριμοι σαρέ κι ίδια ηλικία. Μερικά τσσαβέ αγαβένα ι αλήθεια, λένα σοφές αποφάσεις ντα μανγκένα τι μπολντιόν χουρντέ. Γιαβερά μπορεί τι χρειαζίντιβενα τι μπαριόν χάνικ ατζέ για τι αβέν έτοιμα τι μπολντιόν. Ο νταντά ντα ο νταγιά σο τθερένα σοφία να πιένενα πουμαρέ τσσαβέν τι μπολντιόν. Αλλά βοηθίνενα ι κάθε τσσαβές τι κερέλ πρόοδος καζόμ σουγκό μπορίνελα. Ο νταντά ντα ο νταγιά χαιρίνενα κάνα λένγκε τσσαβέ κερένα πουμαρέ ζωγιάτε ο εδάφιος Παροιμίες 27:​11. (Διαβάνεν) Αλλά δεν πρέπει τι μπιστρέν ότι λένγκο στόχος ισί τι βοηθίνεν-λεν τι αβέν μαθητές. Ενώ τθερένα ανταβά πουμαρέ γκοντιάτε, κα αβέλ λατσσό τι πουτσέν-πες: “Τζανέλα μο τσσαβό λατσσές ι αλήθεια για τι αφιερώντιβελ κο Ντεβέλ ντα τι μπολντιόλ;”

ΤΖΑΝΕΝΑ ΜΟ ΤΣΣΑΒΕ ΛΑΤΣΣΕΣ Ι ΑΛΗΘΕΙΑ;

7. Πρέπει εκ τζενό τι τζανέλ σαρέ ο πράγματα σο σικλιαρέλα η Γραφή πριν τι μπολντιόλ; Εξηγίνεν.

⁷ Καζόμ ο νταντά ντα ο νταγιά σικλιαρένα πουμαρέ τσσαβέν, βοηθίνενα-λεν τι σικλιόν λατσσές ι αλήθεια. Ανταλά σο κα σικλιόν κα κερέν-λεν τι αφιερώντιβεν κο Ντεβέλ. Όμως, ανταβά να μανγκέλα τι βακερέλ ότι εκ τσσαβό πρέπει τι τζανέλ σαρέ ο πράγματα σο σικλιαρέλα η Γραφή για τι αφιερώντιβελ κο Ντεβέλ ντα τι μπολντιόλ. Σαρέ ο μαθητές ι Χριστόσκε πρέπει τι συνεχίνεν τι σικλιόν ατζέ-ντα σοράν κατά μπολιπέ. (Διαβάνεν Κολοσσαείς 1:9, 10) Άρα, καζόμ πράγματα πρέπει τι τζανέλ εκ τζενό πριν τι μπολντιόλ;

8, 9. Σο αβιλό-πες σε εκ δεσμοφύλακας κο Φίλιπποι ντα σο μπορίνασα τι σικλιάς λέσκε ιστοριάταρ;

⁸ Η ιστορία εκχέ φαμιλιάκι κατά πουρανέ μπρεσά μπορίνελα τι βοηθίνελ ι νταντέν ντα ι νταΐν αντιβές. (Πράξεις 16:​25-33) Κο 50 Κ.Χ., ο Παύλος γκιλό κο Φίλιπποι όταν κερέλας πο δεύτερος ιεραποστολικός ταξίδι. Καζόμ ισινέ οτθέ, κατηγοριντέ σινανέ λες ντα ι Σιλάς, ασταρντέ-λεν ντα τσσουντέ-λεν κι φυλακή. Αρατί, αβιλό εκ ζουρανό σεισμός σο πουταρντάς σαρέ ο πόρτες ι φυλακιάκε. Ο δεσμοφύλακας, αμντισάλοας ότι σαρέ ο φυλακισμέ νασλέας ντα μανγκέλας τι μουνταρέλ-πες. Αλλά ο Παύλος τσσιναντάς-λες. Σοράν, ο Παύλος ντα ο Σίλας σικλιαρντέ λες ντα λέσκι φαμιλί ι αλήθεια ι Ιησούσκε. Βον πακιαντέ ο πράγματα σο σικλιλέ ι Ιησούσκε ντα αγαντέ καζόμ σημαντικός ισί τι ντεν-λες καν. Οτθάρ, μπολντιλέ χωρίς τι χασαρέν χρόνος. Σο μπορίνασα τι σικλιάς λένγκε ιστοριάταρ;

⁹ Πριν τι αβέλ δεσμοφύλακας, οντουβά τζενό μπορεί τι ισινέας Ρωμαίος στρατιώτης. Να τζανέλας ι Ντεβλέσκε Λαφίσκε. Άρα, για τι αβέλ Χριστιανός έπρεπε τι σικλιόλ ο βασικές αλήθειες ι Γραφιάκε, τι αγαβέλ σο μανγκέλα ο Ιεχωβά πι υπηρετόνταρ ντα τι μανγκέλ τι ντελ καν κο λάφια κι Ιησούσκε. Οντουλά σο σικλιλό αντρέ σε χάνικ σαάτι, κερντέ-λες τι μανγκέλ τι μπολντιόλ. Σίγουρα, συνεχιντάς τι σικλιόλ πιο μπουτ πράγματα σοράν κατά μπολιπέ. Άρα, όταν τουμαρό τσσαβό βακερέλα τουμένγκε ότι μανγκέλα τι μπολντιόλ επειδή μανγκέλα ι Ιεχωβάς ντα μανγκέλα τι ντελ-λες καν, σο μπορίνενα τι κερέν; Μπορεί τι μουκχέν-λες τι κερέλ λάφι ι πρεσβυτερόντζαρ για τι αποφασίνεν βον αν ισί έτοιμος τι μπολντιόλ.a (Ντικχ ι υποσημείωση) Σαρ αβέλα-πες σαρέ ι μπολντέ Χριστιανόντζαρ, κα συνεχίνελ τι σικλιόλ πιο μπουτ ι Ιεχωβάσκε σαρέ πι ζωγιάτε ντα για πάντα.​—Ρωμαίους 11:​33, 34.

ΚΑΓΙΑ ΙΣΙ Η ΠΙΟ ΛΑΤΣΣΙ ΕΚΠΑΙΔΕΥΣΗ ΜΙ ΤΣΣΑΒΕΝΓΚΕ;

10, 11. (α) Σο πακιάνα μερικά νταντά ντα νταγιά; (β) Σο κα αρακχαβέλ μπαγιά ι τσσαβέν;

¹⁰ Μερικά νταντά ντα νταγιά πακιάνα ότι ο πιο λατσσό λένγκε τσσαβένγκε ισί τι αργίνεν τι μπολντιόν για τι μπορίνεν τι σπουδάνεν ντα τι τθερέν επιτυχία ανταλέ ντουνιάστε. Ανταλά νταντά ντα νταγιά μπορεί τι μανγκένα λένγκο λατσσιπέ, αλλά πρέπει τι πουτσέν-πες: “Κα βοηθίνελ ανταβά μι τσσαβές τι τθερέλ πραγματική επιτυχία; Ταιριάνελα ανταβά οντουλέσαρ σο σικλιάσα κατά Γραφή; Σαρ μανγκέλα ο Ιεχωβά τι χρησιμοποιήνας αμαρί ζωή;”​—Διαβάνεν Εκκλησιαστής 12:1.

¹¹ Ισί σημαντικός μα τι μπιστράς ότι ανταβά ντουνιάς ντα ο πράγματα σο ισί λέστε τζάνα κόντρα οντουλέντε σο μανγκέλα ντα σκεφτίνελα ο Ιεχωβά. (Ιακώβου 4:7, 8· 1 Ιωάννη 2:​15-17· 5:​19) Σάντε εκ λατσσί φιλία ι Ιεχωβάσαρ μπορίνελα τι αρακχαβέλ μπαγιά εκχέ τσσαβές κατά Μπενγκ, ανταλέ ντουνιάσταρ ντα κατά μπέτι τρόπος σο σκεφτίνελα ο ντουνιάς. Αν ο νταντά ντα ο νταγιά τσσουβένα πρώτα ο σπουδές ντα ι μπουτί, ο τσσαβέ λένγκε μάλλον κα πακιάν ότι ο πράγματα ανταλέ ντουνιάσκε ισί πιο σημαντικά κατά φιλία ι Ιεχωβάσαρ. Ανταβά ισί επικίνδυνος. Μανγκένα μπαγιά τι σικλιαρέλ ανταβά ντουνιάς τουμαρέ τσσαβέν σο κα κερέλ-λεν ευτυχισμέ; Ο μόνος τρόπος για τι τθεράς επιτυχία ντα τι αρακχάς πραγματική χαρά ισί τι τσσουβάς πρώτα ι Ιεχωβάς αμαρέ ζωγιάτε.​—Διαβάνεν Ψαλμός 1:2, 3.

ΝΤΑ ΑΝ ΜΟ ΤΣΣΑΒΕ ΑΜΑΡΤΙΝΤΕ;

12. Σόσκε μανγκένα μερικά νταντά ντα νταγιά τι αργίνεν τι μπολντιόν λένγκε τσσαβέ;

¹² Εκ ντάι εξηγιντάς σόσκε να μανγκέλας τι μπολντιόλ λάκι τσσάι. Βακερντάς: «Λατζάβα σο βακεράβα-λες, αλλά ο πιο σημαντικός λόγος ισινέ η αποκοπή». Σαρ ανταγιά πφεν, μερικά νταντά ντα νταγιά σκεφτίνενα ότι ισί πιο λατσσό λένγκε τσσαβένγκε τι ερεσέν πρώτα σε εκ μπαρί ηλικία σο να κα κερέν ντινιλίματα ντα σοράν τι μπολντιόν. (Γένεση 8:​21· Παροιμίες 22:​15) Ανταλά νταντά ντα νταγιά μπορεί τι νιωθίνενα ότι, άμα λένγκε τσσαβέ να κα μπολντιόν, να κα μπορίνεν τι χαν αποκοπή. Αλλά σόσκε ισί λάθος τι σκεφτίνεν αντικάς;​—Ιακώβου 1:22.

13. Μήπως να κα ντελ λόγος κο Ιεχωβά κάποιος σο ισί μπίμπολντο; Εξηγίνεν.

¹³ Σίγουρα, ο νταντά ντα ο νταγιά να μανγκένα τι μπολντιόν λένγκε τσσαβέ πριν τι αβέν έτοιμα τι αφιερώνεν πουμαρί ζωή κο Ιεχωβά. Όμως, κα αβέλας λάθος τι αμντίνεν ότι εκ μπίμπολντο τσσαβό να κα ντελ λόγος κο Ιεχωβά οντουλένγκε σο κερέλα. Ο Ιεχωβά κα μανγκέλ ο λόγος κατά τσσαβέ σο τζανένα καβά ισί ο σωστός ντα ο λάθος λέσκε γιακχίντε. (Διαβάνεν Ιακώβου 4:​17) Ο νταντά ντα ο νταγιά σο τθερένα σοφία να τσσιναβένα πουμαρέ τσσαβέν τι μπολντιόν. Ατζέ-ντα κάνα λένγκε τσσαβέ ισί χουρντέ, σικλιαρένα-λεν τι μανγκέν βον-ντα οντουβά σο ισί σωστός ι Ιεχωβάσκε ντα τι μισίνεν οντουβά σο ισί λάθος λέσκε. (Λουκάς 6:​40) Η αγάπη σο τθερένα τουμαρέ τσσαβέ ι Ιεχωβάσκε κα αρακχαβέλ-λεν για μα τι κερέν μπαρί αμαρτία, επειδή κα μανγκέν τι κερέν οντουβά σο ισί σωστός ι Ιεχωβάσκε.​—Ησαΐας 35:8.

ΓΙΑΒΕΡΑ-ΝΤΑ ΤΖΕΝΕ ΜΠΟΡΙΝΕΝΑ ΤΙ ΒΟΗΘΙΝΕΝ

14. Σαρ μπορίνενα ο πρεσβύτεροι τι υποστηρίνεν ο προσπάθειες ι νταντένγκε ντα ι νταΐνγκε;

¹⁴ Ο πρεσβύτεροι μπορίνενα τι υποστηρίνεν ο προσπάθειες ι νταντένγκε ντα ι νταΐνγκε όταν βακερένα λατσσέ λάφια για το στόχοι κι υπηρεσία κι Ιεχωβάσκι. Εκ πφεν ντέλας-πες γκοντί ότι ο πφραλ Ρώσσελ κερντάς λάσαρ λάφι όταν ισινέ σιοβέ μπρεσένγκι. Βόι βακερντάς: «Μπεσλό 15 λεπτά τι κερέλ μάντζαρ λάφι για το πνευματικοί στόχοι σο τθεράβας». Καβά ισινέ ο αποτέλεσμας; Οντιά πφεν κερντάς σκαπανικός πιο μπουτ από 70 μπρεσά! Αγαβάσα ξεκάθαρα ότι ο λατσσέ λάφια ντα η ενθάρρυνση μπορίνενα τι επηρεάνεν σαρί ι ζωή εκχέ τζενέσκι. (Παροιμίες 25:​11) Ο πρεσβύτεροι μπορίνενα επίσης τι βακερέν κο νταντά, κο νταγιά ντα κο τσσαβέ τι βοηθίνεν κο μπουτιά κι Αίθουσα Βασιλείας. Μπορίνενα τι μανγκέν κατά τσσαβέ τι κερέν πράγματα ανάλογα λένγκε ηλικιάσαρ ντα ι πραγματέντζαρ σο μπορίνενα τι κερέν.

15. Σαρ μπορίνενα ο γιαβερά κι εκκλησία τι βοηθίνεν ι τερνέν;

¹⁵ Σαρ μπορίνενα τι βοηθίνεν ο γιαβερά αντρέ κι εκκλησία; Μπορίνενα τι σικαβέν ότι πφαμπόνα μπαγιά ι τερνένγκε. Για παράδειγμας, μπορίνασα τι παρατηρίνας ι τερνέν για τι ντικχάς σημάδια σο σικαβένα ότι πλησιάνενα πιο μπουτ ι Ιεχωβάς. Μήπως εκ τσσαβό ντινάς εκ λατσσί απάντηση ή συμμετεχιντάς σε εκ μέρος κι συνάθροιση; Μήπως ντινάς μαρτυρία κο σχολείος ή κερντάς ο σωστός όταν αβιλό λέσκε ο πειρασμός τι κερέλ κάτι λάθος; Αν αβιλό-πες κάτι ασακό, ισαρέν-λες αμέσως! Μπορίνασα τι τσσουβάς στόχος τι κεράς λάφι ι τερνέντζαρ πριν ή μετά κατά συνάθροιση. Όταν κεράσα-λες ανταβά, ο τσσαβέ κα νιωθίνεν ότι ισί μέρος “ι μπαρέ εκκλησιάκο”.​—Ψαλμός 35:18.

ΒΟΗΘΙΝΕΝ ΤΟΥΜΑΡΕ ΤΣΣΑΒΕΝ ΤΙ ΕΡΕΣΕΝ ΚΟ ΜΠΟΛΙΠΕ

16, 17. (α) Σόσκε ισί σημαντικός τι μπολντιόν ο τσσαβέ; (β) Καγιά χαρά μπορίνενα τι τθερέν ο Χριστιανοί νταντά ντα νταγιά; (Ντικχ ι φωτογραφία σο ισί κι αρχή)

¹⁶ Εκ κατά πιο μπαρέ προνόμια σο τθερένα ο νταντά ντα ο νταγιά ισί τι σικλιαρέν πουμαρέ τσσαβέν τι μανγκέν ι Ιεχωβάς. (Ψαλμός 127:3· Εφεσίους 6:4) Κο λαός Ισραήλ, ο τσσαβέ ισινέ αφιερωμέ κο Ιεχωβά κατά μπιανιπέ. Αλλά αμαρέ τσσαβέντζαρ να αβέλα-πες ο ίδιος. Ο τσσαβέ να κα μανγκέν ι Ιεχωβάς ντα ι αλήθεια σάντε επειδή λένγκο ντατ ντα λένγκι ντάι κερένα-λες ανταβά. Κατά ντιβές σο μπιαντιόλα λένγκο τσσαβό, ο ντατ ντα η ντάι πρέπει τι τθερέν στόχος τι βοηθίνεν-λες τι αβέλ μαθητής, τι αφιερώντιβελ κο Ντεβέλ ντα τι μπολντιόλ. Σο κα μπορίνελας τι αβέλ πιο σημαντικός ανταλέσταρ; Η αφιέρωση, ο μπολιπέ ντα η πιστή υπηρεσία εκχέ τζενέσκι κο Ιεχωβά κα βοηθίνελ-λες τι σώντιβελ όταν κα αβέλ η μπαρί στεναχώρια.​—Ματθαίος 24:13.

¹⁷ Όταν η Μπλόσομ Μπραντ μανγκέλας τι μπολντιόλ, λάκο ντατ ντα λάκι ντάι μανγκένας τι αβέν σίγουροι ότι ισινέ έτοιμη. Μόλις αβιλέ σίγουροι, υποστηριντέ λάκι απόφαση. Η Μπλόσομ εξηγιντάς σο κερντάς λάκο ντατ ι ιράτ πριν τι μπολντιόλ: «Τσσουντάς-αμέν σαριλέν τι περάς κοτσίντζαρ ντα κερντάς προσευχή. Βακερντάς κο Ιεχωβά καζόμ χαρούμενος ισινέ σο λέσκι χουρντί τσσάι αποφασιντάς τι αφιερώνελ πι ζωή Λέστε». Σοράν από 60 ντα πιο μπουτ μπρεσά, η Μπλόσομ βακερντάς: «Καζόμ-ντα μπρεσά τι νακχέν, να κα μπιστράβ ποτές οντιά ιράτ!» Νταντάλεν ντα νταγιάλεν, μακάρι τι αβέν τουμέν-ντα ευτυχισμέ ντα ικανοποιημέ όταν ντικχένα τουμαρέ τσσαβέν τι αβέν αφιερωμέ ντα μπολντέ υπηρέτες ι Ιεχωβάσκε.