Ισινάμ ι Ιεχωβάσκε

1. Σόσκε μπορίνασα τι βακεράς ότι σαρέ ο πράγματα ισί ι Ιεχωβάσκε; (Ντικχ ι φωτογραφία σο ισί κι αρχή)

ΣΑΡΕ ο πράγματα ισί ι Ιεχωβάσκε! Λέσκο ισί «ο ουρανός σαρέ οντουλέντζαρ σο ισί λέστε ντα η πφουβ σαρέ οντουλέντζαρ σο ισί λάτε». (Δευτερονόμιο 10:​14· Αποκάλυψη 4:​11) Επειδή ο Ιεχωβά κερντάς ι τζενέν, σαρέ αμέν ισινάμ λέσκε. (Ψαλμός 100:3) Κατά πουρανέ μπρεσά όμως, ο Ντεβέλ τραμπίνελα μερικέ τζενέν για τι αβέν λέσκε με εκ ξεχωριστός τρόπος.

2. Σαρ βακερέλα η Αγία Γραφή, καλά τζενέ ισί ι Ιεχωβάσκε με εκ ξεχωριστός τρόπος;

² Για παράδειγμας, ο Ψαλμός 135 βακερέλα ότι ο πιστοί υπηρέτες ι Ιεχωβάσκε κο πουρανό Ισραήλ ισινέ «λαός σάντε λέσκε». (Ψαλμός 135:4) Επίσης, ο προφήτης Ωσηέ βακερντάς ότι μερικά τζενέ σο να ισινέ Ισραηλίτες κα αβένας λαός ι Ιεχωβάσκο. (Ωσηέ 2:​23) Ανταγιά προφητεία νικίστιλι μπαγιά κάνα ο Ιεχωβά αρχισάλο τι τραμπίνελ τζενέν σο να ισινέ Ισραηλίτες για τι κυβερνίνεν κο ουρανός ι Χριστόσαρ. (Πράξεις 10:​45· Ρωμαίους 9:​23-26) Ανταλά τζενέ σο ισί χρισμέ με άγιος πνεύμας βακέρντιβενα «άγιος λαός». Βον ισί εκ «λαός σάντε» ι Ιεχωβάσκε. (1 Πέτρου 2:9, 10) Αλλά σο αβέλα-πες σαρέ ι πιστέ Χριστιανόντζαρ αμαρέ ντιβεσέντε σο τθερένα ι ελπίδα τι τζουβντιόν για πάντα κι πφουβ; Ο Ιεχωβά βακερέλα ότι βον-ντα ισί “λέσκο λαός” ντα “ο τζενέ σο τραμπιντάς”.​—Ησαΐας 65:22.

3. (α) Καλά τζενέ τθερένα εκ ξεχωριστή φιλία ι Ιεχωβάσαρ αντιβές; (β) Σο κα ντικχάς ανταλέ μαθημάστε;

³ Αντιβές, ο «χουρντό κοπάδι», δηλαδή οντουλά σο τθερένα ι ελπίδα τι τζουβντιόν για πάντα κο ουρανός, ντα ο “γιαβερά μπρακέ”, δηλαδή οντουλά σο τθερένα ι ελπίδα τι τζουβντιόν για πάντα κι πφουβ, ντένα λατρεία ι Ιεχωβάς γιεκ σαρ «εκ κοπάδι». (Λουκάς 12:​32· Ιωάννης 10:​16) Μανγκάσα τι σικαβάς ι Ιεχωβάσκε ότι ισινάμ πφερντέ εκτίμηση σο τθεράσα εκ ξεχωριστή φιλία λέσαρ. Ανταλέ μαθημάστε, κα ντικχάς σαρ μπορίνασα τι σικαβάς αμαρί εκτίμηση ι Ιεχωβάσκε σο ντέλα-αμέν ανταβά μπαρό προνόμιος.

ΑΦΙΕΡΩΝΑΣΑ-ΑΜΕΝ ΚΟ ΙΕΧΩΒΑ

4. Σαρ μπορίνασα τι ευχαριστίνας ι Ιεχωβάς σο μουκχέλα-αμέν τι αβάς λέσκε αμαλά, ντα σαρ κερντάς ο Ιησούς-ντα κάτι ασακό;

⁴ Σικαβάσα ι Ιεχωβάσκε αμαρί εκτίμηση κάνα αφιερώνασα-αμέν λέστε ντα μπολντιάσα. Σοράν, σαρέ μπορίνενα τι ντικχέν ότι ισινάμ ι Ιεχωβάσκε ντα ότι ντάσα-λες καν αντράλ αμαρέ γκίσταρ. (Εβραίους 12:9) Ο Ιησούς κερντάς κάτι ασακό κάνα μπολντιλό. Παρόλο σο ισινέ εκχέ λαόσταρ σο ισινέ αφιερωμέ κο Ιεχωβά, ντινάς πο νεαυτός κο Ιεχωβά. Ισινέ σαρ τι βακερέλας: «Μανγκάβα μπουτ, Ντέβλα μου, τι κεράβ οντουβά σο μανγκέσα».​—Ψαλμός 40:7, 8, υποσημείωση.

5, 6. (α) Σο βακερντάς ο Ιεχωβά κάνα μπολντιλό ο Ιησούς; (β) Καβά παράδειγμας μπορίνελα τι βοηθίνελ-αμέν τι αγαβάς σαρ νιωθίνελα ο Ιεχωβά κάνα αφιερώνασα-αμέν λέστε;

⁵ Σαρ νιωσάλο ο Ιεχωβά κάνα μπολντιλό ο Ιησούς; Η Γραφή βακερέλα: «Αφού ο Ιησούς μπολντιλό, νικίστιλο αμέσως κατά πανί. Αζομάν πουτάρντιλο ο ουρανός ντα ντικχλάς ο πνεύμας ι Ντεβλέσκο τι γουλίλ σαρ περιστέρι ντα τι αβέλ οπρά-λέστε. Ντα εκ φωνή κατά ουρανός βακερντάς: “Ακαβά ισί μο Τσσαβό σο μανγκάβα-λες μπουτ, ισινόμ ευχαριστιμέ λέσαρ”». (Ματθαίος 3:​16, 17) Ο Ιησούς ισινέ ήδη ι Ντεβλέσκο. Αλλά ο Ιεχωβά χαιρισάλο κάνα ντικχλάς ότι ισινέ έτοιμος τι χρησιμοποιήνελ πι ζωή για τι υπηρετίνελ σάντε Λες. Ο Ιεχωβά χαιρίνελα αμέντζαρ-ντα κάνα αφιερώνασα-αμέν λέστε, ντα κα ευλογίνελ-αμέν.​—Ψαλμός 149:4.

⁶ Αλλά σο μπορίνασα τι ντας κο Ιεχωβά αφού σαρέ ο πράγματα ισί λέσκε; Σκεφτίνεν εκχέ μουρσές σο τθερέλα εκ κήπος σουκάρ λουλουδίντζαρ. Εκ ντιβές λέσκι χουρντί τσσάι λέλα εκ λουλούδι ντα ντέλα-λες λέστε. Παρόλο σο ο λουλούδι ισί λέσκο, οντουβά λατσσό ντατ χαιρίνελα σόσκε ανταβά δώρος σικαβέλα ότι λέσκι τσσάι μανγκέλα-λες. Οντουβά λουλούδι σο ντινάς-λες λέσκι τσσάι ισί πιο σημαντικός λέσκε σαρέ κατά γιαβερά λουλούδια σο ισί κο κήπος. Αντικάς χαιρίνελα ο Ιεχωβά-ντα κάνα αφιερώνασα-αμέν λέστε αντράλ αμαρέ γκίσταρ.​—Έξοδος 34:14.

7. Σαρ βοηθίνελα-αμέν ο Μαλαχίας τι αγαβάς σαρ νιωθίνελα ο Ιεχωβά οντουλένγκε σο υπηρετίνενα-λες αντράλ πουμαρέ γκίσταρ;

⁷ Διαβάνεν Μαλαχίας 3:​16. Σόσκε ισί αζόμ σημαντικός τι αφιερώνεν-τουμέν κο Ιεχωβά ντα τι μπολντιόν; Ισί μπαγιά ότι, από αζομάν σο αρχισάλεν τι υπαρχίντιβεν, ισινέν τουμαρέ Δημιουργόσκε, ι Ιεχωβάσκε. Αλλά σκεφτίνεν καζόμ κα χαιρίνελας ο Ιεχωβά άμα κα δεχτίνενας-λες σαρ Άρχοντας ντα κα αφιερώνενας-τουμέν λέστε! (Παροιμίες 23:​15) Ο Ιεχωβά τζανέλα οντουλέν σο υπηρετίνενα-λες αντράλ πουμαρέ γκίσταρ ντα τσσουβέλα λένγκε ναβά “κο βιβλίος σο γραφίντιβελα οντουλέ τζενένγκε σο τθερέλα-λεν πι γκοντιάτε”.

8, 9. Σο μανγκέλα ο Ιεχωβά οντουλένταρ σο λένγκε ναβά ισί γραμμέ λέσκε “βιβλιόστε”;

⁸ Άμα μανγκάσα τι ατσσόλ αμαρό ναβ κο βιβλίος κι Ιεχωβάσκο, πρέπει τι κεράς κάποια πράγματα. Ο Μαλαχίας βακερντάς ότι πρέπει τι νταράς κατά Ιεχωβά ντα τι κεράς σκέψεις λέσκε ναβέσκε. Άμα ντάσα λατρεία εκχέ γιαβερές ή σε κάτι γιαβέρ, αμαρό ναβ κα νικιόλ κατά Ιεχωβάσκο βιβλίος!​—Έξοδος 32:​33· Ψαλμός 69:28.

⁹ Άρα, να ερεσέλα σάντε τι ντας αμαρό λάφι ότι κα κεράς ι Ιεχωβάσκο θέλημας ντα σοράν τι μπολντιάς. Ανταλά κεράσα-λεν σάντε εκ φαρ, αλλά η λατρεία σο ντάσα ι Ιεχωβάς επηρεάνελα σαρί αμαρί ζωή. Κάθε ντιβές, καζόμ καιρός κα τζουβντιάς, πρέπει τι σικαβάς οντουλέντζαρ σο κεράσα ότι ντάσα καν ι Ιεχωβάς.​—1 Πέτρου 4:1, 2.

ΝΑ ΜΑΝΓΚΑΣΑ Ι ΝΤΟΥΝΙΑΣΚΕ ΠΡΑΓΜΑΤΑ

10. Καγιά ξεκάθαρη διαφορά πρέπει τι τθερέν οντουλά σο υπηρετίνενα ι Ιεχωβάς οντουλένταρ σο να υπηρετίνενα-λες;

¹⁰ Κο γιαβέρ μάθημας, σικλιλάμ ότι ο Κάιν, ο Σολομών ντα ο Ισραηλίτες βακερένας ότι ντένας λατρεία ι Ιεχωβάς αλλά να ισινέ αφοσιωμέ λέστε. Ανταλά παραδείγματα σικλιαρντέ-αμέν ότι να ερεσέλα σάντε τι βακεράς ότι ντάσα λατρεία ι Ιεχωβάς. Πρέπει τι μισίνας ο γκεραλιπέ ντα τι μανγκάς ο λατσσιπέ. (Ρωμαίους 12:9) Ο Ιεχωβά βακερέλα ότι κα αγαντίντιβελας ξεκάθαρα η «διαφορά σο τθερέλα ο δίκαιος κατά πφιρνό, ντα οντουβά σο υπηρετίνελα ι Ντεβλές οντουλέσταρ σο να υπηρετίνελα-λες».​—Μαλαχίας 3:18.

11. Σόσκε πρέπει σαρέ τι μπορίνεν τι αγαβέν ξεκάθαρα ότι ντάσα λατρεία σάντε ι Ιεχωβάς;

¹¹ Ισινάμ πφερντέ εκτίμηση ι Ιεχωβάσκε σο τραμπιντάς-αμέν για τι αβάς λέσκο λαός! Σαρέ πρέπει τι μπορίνεν τι αγαβέν ξεκάθαρα ότι τσσίντασα κατά Ιεχωβά. (Ματθαίος 5:​16· 1 Τιμόθεο 4:​15) Πουτσέν-τουμέν: “Μπορίνενα ο γιαβερά τι ντικχέν ξεκάθαρα ότι ισινόμ σαρέ μι γκίσαρ αφοσιωμέ κο Ιεχωβά; Βακεράβα κο γιαβερά χωρίς τι λατζάβ ότι ισινόμ Μάρτυρας ι Ιεχωβάσκο;” Σκεφτίνεν καζόμ κα στεναχωρίντιβελας ο Ιεχωβά αν κα λατζάας τι βακεράς κο γιαβερά ότι ισινάμ λέσκε.​—Ψαλμός 119:​46· διαβάνεν Μάρκος 8:38.

12, 13. Καλά πράγματα κερένα μερικέ Μαρτυρέν μα τι ξεχωρίνεν μπουτ κατά ντουνιάς;

¹² Δυστυχώς, ατζέ-ντα μερικά πφραλά ντα πφενιά επηρεάντιβενα κατά «πνεύμας ι ντουνιάσκο». Οτθάρ, νανέ μπουτ διαφορετικοί οντουλένταρ σο να ντένα λατρεία ι Ιεχωβάς. (1 Κορινθίους 2:​12) «Ο πνεύμας ι ντουνιάσκο» κερέλα ι τζενέν τι ντεν πιο μπουτ σημασία κο πράγματα σο μανγκένα βον. (Εφεσίους 2:3) Για παράδειγμας, παρόλο σο ντιντιλέ-αμέν μπουτ συμβουλές, μερικοί να ιριαβένα-πες σεμνά. Ατζέ-ντα κο συναθροίσεις, ιρίνα σέα σο ισί στενά ή σο κερένα-λεν τι ντικχίντιβεν. Ή τσσινένα ντα λατσσαρένα πουμαρέ μπαλά με τρόπος σο ταρτίνελα ι προσοχή οπρά-πουμέντε. (1 Τιμόθεο 2:9, 10) Οτθάρ, μπορεί τι αβέλ δύσκολος ι γιαβερένγκε τι αγαβέν άμα ισί Μάρτυρες ι Ιεχωβάσκε ή όχι.​—Ιακώβου 4:4.

¹³ Υπαρχίντιβενα γιαβερά-ντα πράγματα σο κερένα μερικέ Μαρτυρέν μα τι ξεχωρίνεν μπουτ κατά ντουνιάς. Για παράδειγμας, κάνα διασκεδάνενα, μερικοί κχελένα ντα συμπεριφερίντιβενα με τρόπος σο νανέ σωστός ι Χριστιανόνγκε. Γιαβερά βάντενα κο Ίντερνετ πουμαρέ φωτογραφίες ντα γραφίνενα σχόλια σο σικαβένα ότι τθερένα πουμαρέ γκοντιάτε ο σώμας. Μπορεί μα τι κερντέ εκ μπαρί αμαρτία ντα τι συνεχίνενα τι αβέν πφραλά, αλλά μπορεί τι επηρεάνεν ι πφραλέν σο προσπαθίνενα μπουτ τι αβέν διαφορετικοί κατά ντουνιάς.​—Διαβάνεν 1 Πέτρου 2:​11, 12.

14. Σο πρέπει τι κεράς για τι αρακχαβάς αμαρί ξεχωριστή φιλία ι Ιεχωβάσαρ;

¹⁴ Σαρέ ο πράγματα κο ντουνιάς ισί κερντέ για τι κερέν-αμέν τι ντας μπουτ σημασία κο πράγματα “σο μανγκέλα ο σώμας ντα οντουλέντε σο μανγκένα ο γιακχά ντα [κι επιθυμία] τι σικαβάς μπαρικανές σαρ τζουβντιάσα”. (1 Ιωάννη 2:​16) Αλλά αμέν ισινάμ ι Ιεχωβάσκε, οτθάρ ισινάμ διαφορετικοί. Να ισινάμ «τζενέ σο να τθερένα σεβασμός ι Ντεβλέσκε ντα μανγκένα ι ντουνιάσκε πράγματα» αλλά τζουβντιάσα «ανταλέ ντουνιάστε τροπόσαρ σο σικαβέλα ότι ισινάμ λογικοί, δίκαιοι ντα σεβάνασα ι Ντεβλές». (Τίτο 2:​12) Σαρέ ο πράγματα σο κεράσα, σαρ για παράδειγμας ο τρόπος σο κεράσα λάφι, χάσα ή πιάσα, ιριαβάσα-αμέν ντα κεράσα μπουτί, πρέπει τι σικαβέν ξεκάθαρα σαριλένγκε ότι ισινάμ ι Ιεχωβάσκε.​—Διαβάνεν 1 Κορινθίους 10:​31, 32.

“ΜΑΝΓΚΑΣΑ ΜΠΟΥΤ Ο ΕΚ Ι ΓΙΑΒΕΡΕΣ”

15. Σόσκε πρέπει τι σικαβάς λατσσιπέ ντα αγάπη αμαρέ πφραλένγκε;

¹⁵ Σικαβάσα ότι εκτιμίνασα αμαρί φιλία ι Ιεχωβάσαρ ι τροπόσαρ σο συμπεριφερίντιβασα αμαρέ πφραλένγκε. Βον-ντα ισί ι Ιεχωβάσκε, σαρ αμέν. Άμα να μπιστράσα-λες ανταβά, πάντα κα σικαβάς λένγκε λατσσιπέ ντα αγάπη. (1 Θεσσαλονικείς 5:​15) Καζόμ σημαντικός ισί ανταβά; Ο Ιησούς βακερντάς: «Ανταλέσταρ κα αγαβέν σαρέ ότι ισινέν μο μαθητές, άμα τθερένα αγάπη ο εκ ι γιαβερέσκε».​—Ιωάννης 13:35.

16. Σο σικλιάσα κατά Μωσαϊκός Νόμος για την αγάπη σο τθερέλα ο Ιεχωβά πι λαόσκε;

¹⁶ Εκ παράδειγμας κατά Μωσαϊκός Νόμος μπορίνελα τι βοηθίνελ-αμέν τι αγαβάς σαρ πρέπει τι συμπεριφερίντιβας κο γιαβερά κι κχανγκιρί. Κο ναός κι Ιεχωβάσκο, υπαρχίντιβενας σκεύη σο χρησιμοποιήνενας-λεν σάντε κι λατρεία. Ο Νόμος εξηγίνελας ξεκάθαρα σαρ έπρεπε ο Λευίτες τι φροντίνεν ανταλά σκεύη, ντα κον να ακολουθίνελας ανταλά οδηγίες έπρεπε τι μερέλ. (Αριθμοί 1:​50, 51) Αν ο Ιεχωβά ενδιαφερίντιβελας αζόμ μπουτ για το τρόπος σο χρησιμοποιήνενας ο τζενέ ανταλά σκεύη για τι ντεν-λες λατρεία, καζόμ πιο μπουτ ενδιαφερίντιβελα για το τρόπος σο ο τζενέ συμπεριφερίντιβενα λέσκε αφοσιωμέ ντα αφιερωμέ υπηρετόντε σο ντένα-λες λατρεία! Σικαντάς αμένγκε καζόμ σημαντικοί ισινάμ λέσκε κάνα βακερντάς: «Κον πειράνελα-τουμέν πειράνελα ο μιρικλό μι γιακχάκο».​—Ζαχαρίας 2:8.

17. Σο “ντέλα σημασία ντα ασουνέλα” ο Ιεχωβά;

¹⁷ Ο Μαλαχίας βακερντάς ότι ο Ιεχωβά “ντέλα σημασία ντα ασουνέλα” σαρ συμπεριφερίντιβενα λέσκε υπηρέτες ο εκ κο γιαβέρ. (Μαλαχίας 3:​16) Ο Ιεχωβά «τζανέλα οντουλέν σο ισί λέσκε». (2 Τιμόθεο 2:​19) Τζανέλα μπουτ λατσσές σο-ντα κεράσα ντα βακεράσα. (Εβραίους 4:​13) Κάνα να σικαβάσα λατσσιπέ αμαρέ πφραλένγκε, ο Ιεχωβά ντικχέλα-λες ανταβά. Αλλά μπορίνασα τι αβάς σίγουροι ότι ο Ιεχωβά ντικχέλα εμ κάνα σικαβάσα φιλοξενία, ντάσα αντράλ αμαρέ γκίσταρ, συγχωρίνασα ντα σικαβάσα λατσσιπέ.​—Εβραίους 13:​16· 1 Πέτρου 4:8, 9.

«Ο ΙΕΧΩΒΑ ΝΑ ΚΑ ΜΟΥΚΧΕΛ ΠΙ ΛΑΟΣ»

18. Σαρ μπορίνασα τι ευχαριστίνας ι Ιεχωβάς σο τραμπιντάς-αμέν για τι αβάς λέσκο λαός;

¹⁸ Μανγκάσα τι σικαβάς ι Ιεχωβάσκε ότι ισινάμ πφερντέ εκτίμηση σο ισινάμ λέσκε, ισινάμ λέσκο λαός. Τζανάσα ότι κάνα αφιερωντάμ-αμέν λέστε, κερντάμ ι πιο λατσσί επιλογή σο κα μπορίναας τι κεράς. Παρόλο σο τζουβντιάσα «εκχέ γκεραλέ γενιάτε σο να κερέλα ο σωστός», μπορίνασα τι αβάς «πάκι ντα αθώοι» ντα “τι ντας φως κο ντουνιάς”. (Φιλιππησίους 2:​15) Οτθάρ, ισινάμ αποφασισμέ μα τι κεράς τίποτα σο μισίνελα ο Ιεχωβά. (Ιακώβου 4:7) Μανγκάσα ντα σεβάνασα αμαρέ πφραλέν σόσκε βον-ντα ισί ι Ιεχωβάσκε.​—Ρωμαίους 12:10.

19. Σαρ ευλογίνελα ο Ιεχωβά οντουλέν σο ισί λέσκε;

¹⁹ Η Αγία Γραφή ντέλα ακαγιά υπόσχεση: «Ο Ιεχωβά να κα μουκχέλ πι λαός». (Ψαλμός 94:​14) Ανταβά ισί σίγουρος. Σο-ντα τι αβέλ-πες, ο Ιεχωβά κα αβέλ αμέντζαρ. Ατζέ-ντα άμα κα μεράς, να κα μπιστρέλ-αμέν. (Ρωμαίους 8:​38, 39) «Άμα τζουβντιάσα, τζουβντιάσα ι Ιεχωβάσκε, ντα άμα μεράσα, μεράσα ι Ιεχωβάσκε. Άρα, είτε τζουβντιάσα είτε μεράσα, ισινάμ ι Ιεχωβάσκε». (Ρωμαίους 14:8) Μπεκλεντίνασα σαρ σαρ τι αβέλ ο ντιβές σο ο Ιεχωβά κα ανέλ πάλι κι ζωή σαρέ πι αφοσιωμέ αμαλέν σο μουλέ. (Ματθαίος 22:​32) Ατζέ-ντα ακανά τθεράσα μπερεκέτι σουκάρ δώρα αμαρέ Νταντέσταρ. Σαρ βακερέλα η Γραφή, «ευτυχισμέ ισί ο λαός σο τθερέλα Ντεβλές ι Ιεχωβάς, ο λαός σο τραμπιντάς πέσκε για κληρονομιά».​—Ψαλμός 33:12.