Ο Ιεχωβά Ντέλα-αμέν ι Σιγουριά ότι κα Κερέλ ι Πφουβ Παράδεισος

1. Σο μανγκέλας τι βακερέλ ο Ησαΐας κο Ισραηλίτες;

Ο ΠΡΟΦΗΤΗΣ ΗΣΑΪΑΣ βακερντάς ότι ο Ιεχωβά ισί ο «Ντεβέλ ι αληθειάκο». Κο πουρανό εβραϊκός κείμενος, ο λάφι σο ατθέ μεταφράντιβελα «αλήθεια» ισί ο λάφι «αμήν». (Ησ. 65:​16, υποσ.) «Αμήν» μανγκέλα τι βακερέλ «αντικάς τι αβέλ-πες» ή «σίγουρα». Ο λάφι «αμήν» χρησιμοποιήντιβελα μπουτ φαρ κι Αγία Γραφή για τι σικαβέλ ι σιγουριά ότι οντουβά σο βακερέλα ή κερέλα ο Ιεχωβά ή ο Ιησούς ισί μπαγιά. Οτθάρ, ο Ησαΐας μανγκέλας τι βακερέλ ακαβά κο Ισραηλίτες: Σο-ντα βακερέλα ο Ιεχωβά, πάντα νικιόλα μπαγιά. Ο Ιεχωβά σικαντάς-λες ανταβά καζόμ κερέλα τι νικιόλ μπαγιά κάθε υπόσχεση λέσκι.

2. Σόσκε μπορίνασα τι ντας μπέσα κο υποσχέσεις κι Ιεχωβάσκε σο τθερένα τι κερέν με το μέλλον, ντα καλά ερωτήσεις κα ντικχάς;

² Μπορίνασα αμέν τι ντας ι ίδια μπέσα κο υποσχέσεις κι Ιεχωβάσκε σο τθερένα τι κερέν με το μέλλον; Περίπου 800 μπρεσά σοράν κατά Ησαΐας, ο απόστολος Παύλος εξηγιντάς σόσκε ο υποσχέσεις ι Ντεβλέσκε πάντα νικιόνα μπαγιά. Ο Παύλος βακερντάς: «Να αβέλα-πες τι βακερέλ ψέματα ο Ντεβέλ». (Εβρ. 6:​18) Σαρ εκ πηγή ναστί νικαβέλα εμ γκουλντό εμ λοντό πανί, αντικάς ο Ιεχωβά-ντα, σο λέσταρ αβέλα η αλήθεια, ναστί βακερέλα ψέματα. Άκ’ σόσκε μπορίνασα τι ντας μπαρί μπέσα σαρέ οντουλέντε σο βακερέλα ο Ιεχωβά. Αντρέ ανταλέντε σο βακερέλα ισί σαρέ ο υποσχέσεις λέσκε σο τθερένα τι κερέν με το μέλλον. Ανταλέ μαθημάστε, κα ντικχάς ο ερωτήσεις: Σο ντινάς πο λάφι ο Ιεχωβά ότι κα ντελ-αμέν κο μέλλον; Ντα καγιά σιγουριά ντινάς-αμέν ο Ιεχωβά ότι λέσκι υπόσχεση κα νικιόλ μπαγιά;

ΣΟ ΥΠΟΣΧΕΣΗ ΝΤΙΝΑΣ Ο ΙΕΧΩΒΑ;

3. (α) Καγιά υπόσχεση μπεϊντίνενα μπουτ ο υπηρέτες ι Ντεβλέσκε; (Αποκάλυψη 21:3, 4) (β) Σο βακερένα μερικά τζενέ κάνα βακεράσα λένγκε ανταγιά υπόσχεση;

³ Η υπόσχεση σο κα ντικχάς μπεϊντίνενα-λα μπουτ ο υπηρέτες ι Ντεβλέσκε σαρό κο ντουνιάς. (Διαβάνεν Αποκάλυψη 21:3, 4) Ο Ιεχωβά ντέλα πο λάφι ότι κα αβέλ εκ βακίτι σο «ο μεριπέ να κα αβέλ πάλι, ούτε λύπη ούτε βίκος ούτε ντουκχ να κα αβέν πάλι». Μπουτ αμένταρ διαβάνασα ανταλά εδάφια για τι ντας κουράγιος ι τζενέν κο έργος ντα τι σικαβάς λένγκε σαρ κα αβέλ η ζωή κο Παράδεισος. Σο βακερένα μερικά τζενέ κάνα βακεράσα λένγκε ανταγιά υπόσχεση; Μπέκιμ βακερένα: «Σουκάρ ασούντιβενα σαρέ ανταλά, αλλά να πακιάβα ότι κα αβέν-πες».

4. (α) Σο τζανέλας ο Ιεχωβά αμαρέ ντιβεσένγκε; (β) Σο γιαβέρ ντινάς ο Ιεχωβά εκτός από εκ υπόσχεση;

⁴ Σίγουρα, κάνα ο Ιεχωβά πι πνευμάσαρ κερντάς ι Ιωαννής τι γραφίνελ ανταγιά υπόσχεση σο τθερέλα τι κερέλ με τον Παράδεισο, τζανέλας ότι αμέν αντιβές κα κεράας λάφι κο γιαβερά για την ελπίδα ανταγιά καζόμ κα μουτθαβάας ο λατσσέ αμπέρια. Ο Ιεχωβά τζανέλας επίσης ότι μπουτ τζενέ κα δυσκολίντιβενας τι πακιάν ανταγιά υπόσχεση σο τθερέλα τι κερέλ “νεβέ πραγματέντζαρ”. (Ησ. 42:9· 60:2· 2 Κορ. 4:3, 4) Οτθάρ, σαρ μπορίνασα τι βοηθίνας εμ αμέν εμ ι γιαβερέν τι αβέν σίγουροι ότι ο ευλογίες σο βακέρντιβενα κο εδάφια Αποκάλυψη 21:3, 4 κα νικιόν μπαγιά; Ο Ιεχωβά να ντινάς σάντε ανταγιά υπόσχεση σο ερεσέλα αμαρέ γκίστε, αλλά ντινάς σημαντικούς λόγους-ντα για τι πακιάς ανταγιά υπόσχεση. Καλά λόγοι ντινάς;

Ο ΙΕΧΩΒΑ ΝΤΕΛΑ-ΑΜΕΝ Ι ΣΙΓΟΥΡΙΑ ΟΤΙ ΛΕΣΚΙ ΥΠΟΣΧΕΣΗ ΚΑ ΑΒΕΛ ΜΠΑΓΙΑ

5. Καλά λόγους τθεράσα για τι ντας μπέσα κι υπόσχεση κι Ντεβλέσκι για τον Παράδεισο, ντα κάι αρακχάσα ανταλά λόγους;

⁵ Τθεράσα μπουτ λόγους τι ντας μπέσα κι υπόσχεση κι Ιεχωβάσκι για τον Παράδεισο κατά εδάφια σο ισί πο τελέ. Οτθέ διαβάνασα: «Οντουβά σο μπεσέλα κο θρόνος βακερντάς: “Ντικχέν! Κεράβα-λεν σαρέ νεβέ”. Επίσης, βακερέλα: “Γράφινε, επειδή ανταλά λάφια ισί πιστά ντα κα αβέν-πες μπαγιά”. Ντα βακερντάς μάνγκε: “Αβιλέ-πες μπαγιά!” Με ισινόμ ο Άλφα ντα ο Ωμέγα, η αρχή ντα ο τέλος».​—Αποκ. 21:5, 6α.

6. Σόσκε ο εδάφια Αποκάλυψη 21:5, 6 μπαριαρένα αμαρί μπέσα κι υπόσχεση κι Ντεβλέσκι;

⁶ Σόσκε ανταλά εδάφια μπαριαρένα αμαρί μπέσα κι υπόσχεση κι Ντεβλέσκι; Ανταλέ εδαφιόντε, οντουβά σο κερέλα ο Ιεχωβά μοιάζελα σαρ τι τσσουβέλα σε εκ επίσημος χαρτίς πι υπογραφή για τι ντελ-αμέν ι σιγουριά ότι, σο-ντα τι αβέλ-πες, κα ατσσικιαρέλ πι υπόσχεση. Η υπόσχεση ι Ντεβλέσκι ισί γραμμέ κο εδάφια Αποκάλυψη 21:3, 4. Αλλά σοράν, κο εδάφια 5 ντα 6, αρακχάσα ι υπογραφή ι Ιεχωβάσκι, σαρ τι βακεράας, σο ντέλα-αμέν ι σιγουριά ότι λέσκι υπόσχεση κα νικιόλ μπαγιά σο-ντα τι αβέλ-πες. Για τι ντικχάς πο προσεκτικά ο λάφια ανταλέ εδαφιόνγκε σο ντένα-αμέν ανταγιά σιγουριά.

7. Κον αρχίνελα τι κερέλ λάφι κο εδάφιος 5, ντα σόσκε ανταβά ισί ξεχωριστός;

⁷ Η σιγουριά σο ντέλα-αμέν ο Ντεβέλ αρχίνελα ακαλέ λαφίντζαρ: «Οντουβά σο μπεσέλα κο θρόνος βακερντάς». (Αποκ. 21:​5α) Ανταλά λάφια ισί ξεχωριστά επειδή ανταγιά ισί εκ κατά τριν φαρ σο κερέλα λάφι ο ίδιος ο Ιεχωβά κο βιβλίος Αποκάλυψη. Οτθάρ, ανταγιά σιγουριά λάσα-λα, όχι εκχέ ζουρανέ αγγελόσταρ ούτε κατά αναστημέ Ιησούς, αλλά κατά Ιεχωβά! Ανταβά σικαβέλα αμένγκε καζόμ μπαγιά ισί οντουβά σο βακερέλα ο Ιεχωβά κι συνέχεια. Σόσκε; Επειδή ο Ιεχωβά «ναστί βακερέλα ψέματα». (Τίτο 1:2) Οτθάρ, ο λάφια σο διαβάνασα κο εδάφια Αποκάλυψη 21:5, 6 σίγουρα κα νικιόν μπαγιά.

«ΝΤΙΚΧΕΝ! ΚΕΡΑΒΑ-ΛΕΝ ΣΑΡΕ ΝΕΒΕ»

8. Σαρ σικαβέλα ο Ιεχωβά ότι λέσκι υπόσχεση σίγουρα κα νικιόλ μπαγιά; (Ησαΐας 46:10)

⁸ Κι συνέχεια, ο Ιεχωβά βακερέλα: «Ντικχέν!» (Αποκ. 21:5) Ο πουρανό μπαλαμανό λάφι ἰδοὺ σο μεταφράντιβελα «ντικχέν!» χρησιμοποιήντιβελα μπουτ φαρ κο βιβλίος Αποκάλυψη. Εκ εγκυκλοπαίδεια βακερέλα ότι ανταβά λάφι ισί εκ τρόπος «για τι σικαβέλ ι τζενέσκε σο διαβάνελα εκ βιβλίος ότι πρέπει τι ντελ προσοχή κο πράγματα σο κα διαβάνελ κι συνέχεια». Σο βακερέλα ο Ντεβέλ πο σοράν; Βακερέλα: «Κεράβα-λεν σαρέ νεβέ». Ισί μπαγιά ότι ατθέ ο Ιεχωβά κερέλα λάφι για το αλλαγές σο κα αβέν-πες κο μέλλον. Αλλά επειδή ισί αζόμ σίγουρος ότι κα κερέλ πι υπόσχεση τι νικιόλ μπαγιά, βακερέλα ότι ανταλά αλλαγές ισί σαρ τι αβιλέ-πες.​—Διαβάνεν Ησαΐας 46:10.

9. (α) Σο μανγκέλα τι βακερέλ ο λάφι «κεράβα-λεν σαρέ νεβέ»; (β) Σο κα αβέλ-πες κο «ουρανός» ντα κι «πφουβ» σο υπαρχίντιβενα ακανά;

⁹ Για τι ντικχάς ακανά ο γιαβερά λάφια σο ισί κο εδάφιος Αποκάλυψη 21:5: «Κεράβα-λεν σαρέ νεβέ». Ανταλέ κεφαλαιόστε, διαβάνασα ντουέ πραγματένγκε σο κερέλα ο Ιεχωβά. Πρώτον, ο Ιεχωβά κα ανέλ ο τέλος ανταλέ πφιρνέ ντουνιάσκο. Δεύτερον, κα ανέλ εκ νεβό ντουνιάς. Κο εδάφιος Αποκάλυψη 21:1 διαβάνασα: «Ο γιαβέρ ουρανός ντα η γιαβέρ πφουβ χασάρντιλεας». «Ο γιαβέρ ουρανός» ισί ο κυβερνήσεις σο ισί κο βας κι Μπενγκέσκο ντα λέσκε δαιμονένγκο. (Ματθ. 4:8, 9· 1 Ιωάν. 5:​19) Ο λάφι «πφουβ», σαρ χρησιμοποιήντιβελα κι Γραφή, μπορεί τι μανγκέλα τι σικαβέλ ι τζενέν σο μπεσένα κι πφουβ. (Γέν. 11:1· Ψαλμ. 96:1) Οτθάρ, «η γιαβέρ πφουβ» ισί ο πφιρνέ τζενέ αμαρέ ντιβεσέντε. Ο Ιεχωβά να κα αλλάνελ απλώς μερικά πράγματα κο «ουρανός» ντα κι «πφουβ» σο υπαρχίντιβενα αντιβές. Οκιά μπάνταρ, κα καταστραφίνελ ντιπ ο «ουρανός» ντα ι «πφουβ», ντα λένγκε θεσιάτε κα ανέλ «εκ νεβό ουρανός ντα νεβί πφουβ», δηλαδή εκ νεβί κυβέρνηση σο κα κερέλ κουμάντος ι δίκαιε τζενέν.

10. Καλά πράγματα κα κερέλ νεβέ ο Ιεχωβά;

¹⁰ Κο εδάφιος Αποκάλυψη 21:5, διαβάνασα σο βακερέλα ο Ιεχωβά ι πραγματένγκε σο κα κερέλ νεβέ. Ντικχέν ότι ο Ιεχωβά να βακερντάς: «Κεράβα νεβέ πράγματα». Οκιά μπάνταρ, βακερντάς: «Κεράβα-λεν σαρέ νεβέ». Ο Ιεχωβά κα κερέλ νεβί ι πφουβ ντα ι τζενέν, ντα αντικάς κα μπορίνεν τι αβέν τέλειοι. Σαρ βακερντάας ο Ησαΐας, σαρί η πφουβ κα αβέλ σαρ εκ σουκάρ πάρκος σαρ ο κήπος της Εδέμ. Ντα κα κερέλ-αμέν νεβέ κάνα κα κερέλ ντιπ λατσσές ι κάθε εκχές αμένταρ. Ο μπανγκέ, ο κορορέ ντα ο κασουκέ κα αβέν λατσσές, ενώ ατζέ-ντα ο μουλέ κα αβέν πάλι κι ζωή.​—Ησ. 25:8· 35:​1-7.

«ΑΝΤΑΛΑ ΛΑΦΙΑ ΙΣΙ ΠΙΣΤΑ. . . . ΑΒΙΛΕ-ΠΕΣ ΜΠΑΓΙΑ!»

11. Σο βακερντάς ο Ιεχωβά κο Ιωάννης τι κερέλ, ντα καβά ισινέ ο λόγος;

¹¹ Σο γιαβέρ βακερντάς ο Ντεβέλ για τι αβάς σίγουροι ότι μπορίνασα τι ντας λέσκε μπέσα; Ο Ιεχωβά βακερντάς κο Ιωάννης: «Γράφινε, επειδή ανταλά λάφια ισί πιστά ντα κα αβέν-πες μπαγιά». (Αποκ. 21:5) Ο Ιεχωβά να ντινάς-λες απλώς ι εντολή τι “γραφίνελ”. Εξηγιντάς λέσκε ο λόγος-ντα για τι γραφίνελ ανταλά λάφια. Βακερντάς: «Επειδή ανταλά λάφια ισί πιστά ντα κα αβέν-πες μπαγιά», δηλαδή ότι ο λάφια ι Ντεβλέσκε ισί ντιπ σωστά. Ισινάμ πφερντέ εκτίμηση σο ο Ιωάννης ντινάς καν κι εντολή τι “γραφίνελ”. Οτθάρ, μπορίνασα τι διαβάνας για την υπόσχεση ι Ντεβλέσκι σο τθερέλα τι κερέλ με τον Παράδεισο ντα τι σκεφτίνας λατσσές ο σουκάρ ευλογίες σο ισί ανγκλ’ αμέντε.

12. Σόσκε τθερέλας ο Ιεχωβά ο δικαίωμας τι βακερέλ: «Αβιλέ-πες μπαγιά!»;

¹² Σο βακερέλα κι συνέχεια ο Ντεβέλ; «Αβιλέ-πες μπαγιά!» (Αποκ. 21:6) Ακανά ο Ιεχωβά κερέλα λάφι σαρ τι αβιλέ-πες σαρέ οντουλά σο βακέρντιβενα για τον Παράδεισο. Τθερέλα ο δικαίωμας τι κερέλ λάφι αντικάς επειδή τίποτα ναστί τσσιναβέλα ι Ντεβλές τι κερέλ πο σκοπός τι νικιόλ μπαγιά. Σοράν, ο Ιεχωβά βακερέλα αμένγκε κάτι σο σικαβέλα ότι, σο-ντα τι αβέλ-πες, λέσκι υπόσχεση κα νικιόλ μπαγιά. Σο βακερέλα;

«ΜΕ ΙΣΙΝΟΜ Ο ΑΛΦΑ ΝΤΑ Ο ΩΜΕΓΑ»

13. Σόσκε βακερντάς ο Ιεχωβά ο λάφι: «Με ισινόμ ο Άλφα ντα ο Ωμέγα»;

¹³ Σαρ ντικχλάμ πο τζανγκλέ, ο Ιεχωβά κερντάς λάφι τριν φαρ αντράλ κατά φαντασίες σο ντιντιλέ κο Ιωάννης. (Αποκ. 1:8· 21:5, 6· 22:​13) Κάθε φαρ, ο Ιεχωβά βακερέλας ο ίδιος λάφι: «Με ισινόμ ο Άλφα ντα ο Ωμέγα». Ο άλφα ισί ο πρώτος γράμμας κι μπαλαμανί αλφαβήτα ντα ο ωμέγα ισί ο τελευταίος. Κάνα βακερέλα ο λάφι «ο Άλφα ντα ο Ωμέγα», ο Ιεχωβά μανγκέλα τι σικαβέλ ότι, κάνα αρχίνελα κάτι, μπιτισκιαρέλα-λες με επιτυχία.

14. (α) Σικαβέν εκχέ παραδειγμάσαρ κάνα ο Ιεχωβά βακερντάς «Άλφα» ντα κάνα κα βακερέλ «Ωμέγα». (β) Καγιά σιγουριά ντένα-αμέν ο εδάφια Γένεση 2:​1-3;

¹⁴ Κάνα ο Ιεχωβά κερντάς τον Αδάμ ντα την Εύα, βακερντάς ο σκοπός σο τθερέλας κι αρχή ι τζενένγκε ντα ι πφουβιάκε. Η Γραφή βακερέλα: «Ο Ντεβέλ ευλογιντάς-λεν ντα βακερντάς λένγκε: “Τι κερέν μπουτέ τσσαβέν ντα τι αβγατίντιβεν, τι πφερέν ι πφουβ ντα τι τθερέν-λα τουμένγκε”». (Γέν. 1:​28) Οντιά στιγμή, ο Ιεχωβά ισινέ σαρ τι βακερντάς: «Άλφα». Βακερντάς ξεκάθαρα πο σκοπός: Κα αβέλας ο βακίτι σο ο τέλεια τσσαβέ του Αδάμ ντα της Εύας, σο κα ντένας καν, κα πφερένας ι πφουβ ντα κα κερένας-λα παράδεισος. Κάνα κα αβέλ-πες ανταβά, ο Ιεχωβά κα βακερέλ, σαρ τι βακεράας: «Ωμέγα». Κάνα ο Ιεχωβά μπιτισκιαρντάς ι δημιουργία “ι ουρανόσκι ντα ι πφουβιάκι ντα σαρέ ι πραγματένγκι σο υπαρχίντιβενα λέντε”, ο Ιεχωβά βακερντάς κάτι για τι σικαβέλ ότι λέσκο σκοπός σίγουρα κα αβέλας μπαγιά. Ανταβά ισί κο εδάφια Γένεση 2:​1⁠-3. (Διαβάνεν) Ο Ιεχωβά τραμπιντάς ο έβδομος ντιβές σαρ εκ ιερός ντιβές πέσκε. Σο μανγκέλα τι βακερέλ ανταβά; Ο Ιεχωβά ντινάς πο λάφι ότι σίγουρα κα κερέλας τι νικιόλ μπαγιά ο σκοπός σο τθερέλας ι τζενένγκε ντα ι πφουβιάκε. Λέσκο σκοπός κα νικιόλ μπαγιά κάνα κα τελειώνελ ο έβδομος ντιβές.

15. Σόσκε μπέκιμ ντικχίντιβελας ότι ο Μπενγκ τσσιναντάς ο σκοπός σο τθερέλας ο Ντεβέλ ι τζενένγκε;

¹⁵ Κάνα ο Αδάμ ντα η Εύα γκιλέ κόντρα κο Ιεχωβά, αβιλέ αμαρτωλοί, ντα λένγκε τσσαβέ λιντέ ι αμαρτία ντα ο μεριπέ. (Ρωμ. 5:​12) Οτθάρ, μπέκιμ ντικχίντιβελας ότι ο Μπενγκ τσσιναντάς ο σκοπός ι Ντεβλέσκο τι πφερέλ ι πφουβ τέλειε τζενέντζαρ σο ντένα καν. Ντικχίντιβελας ότι ο Μπενγκ κερντάς ι Ιεχωβάς μα τι μπορίνελ ποτές τι βακερέλ «Ωμέγα». Ο Μπενγκ μπέκιμ αμντίνελας ότι πφαντάας ο βαστά ι Ιεχωβάσκε. Μπέκιμ σκεφτιντάς ότι ο Ντεβέλ κα μουνταρέλας τον Αδάμ ντα την Εύα ντα κα δημιουργίνελας εκχέ γιαβερέ τέλειε αντρογυνός, για τι κερέλ Πο σκοπός τι νικιόλ μπαγιά. Αλλά άμα ο Ντεβέλ κερντάας-λες ανταβά, ο Μπενγκ κα κατηγορίνελας-λες ότι ισί ψεύτης. Σόσκε; Επειδή, σαρ ισί γραμμέ κο εδάφιος Γένεση 1:​28, ο Ιεχωβά βακερντάας κο Αδάμ ντα κι Εύα ότι λένγκε τσσαβέ κα πφερένας ι πφουβ.

16. Σόσκε αμντίνελας ο Μπενγκ ότι κα μπορίνελας τι κατηγορίνελ ι Ιεχωβάς ότι ναστί ατσσικιαρέλα πο λάφι;

¹⁶ Καγιά γιαβέρ απόφαση μπέκιμ αμντίνελας ο Μπενγκ ότι κα λέλας ο Ντεβέλ; Μπέκιμ ο Μπενγκ πακιάλας ότι ο Ιεχωβά κα μουκχέλας τον Αδάμ ντα την Εύα τι κερέν ατελείς τσσαβέν, σο ποτές ναστί κα αβένας τέλεια. (Εκκλ. 7:​20· Ρωμ. 3:​23) Ανταλέ περιπτωσιάτε, ο Μπενγκ σίγουρα κα κατηγορίνελας ι Ιεχωβάς ότι ναστί ατσσικιαρντάς πο λάφι. Σόσκε; Επειδή άμα κα αβέλας-πες ανταβά, η πφουβ να κα πφερντιόλας τέλειε τζενέντζαρ, ντα να κα νικιόλας μπαγιά ο σκοπός ι Ντεβλέσκο.

17. Σο κερντάς ο Ιεχωβά κάνα ο Μπενγκ, ο Αδάμ ντα η Εύα γκιλέ λέσαρ κόντρα, ντα καβά κα αβέλ ο αποτέλεσμας; (Ντικχέν ι φωτογραφία-ντα)

¹⁷ Η λύση σο ντινάς ο Ιεχωβά κι κόντρα σο γκιλέ λέσαρ ο Μπενγκ, ο Αδάμ ντα η Εύα ούτε νακχλί κατά Μπενγκέσκι γκοντί. (Ψαλμ. 92:5) Ο Ιεχωβά μουκχλάς τον Αδάμ ντα την Εύα τι κερέν τσσαβέν, ντα ανταλέ τροπόσαρ ο λάφια ι Ιεχωβάσκε νικίστιλε μπαγιά. Ο Ιεχωβά νανέ ψεύτης. Ντα σικαντάς ότι άμα βακερέλα ότι κα κερέλ κάτι, τίποτα ναστί τσσιναβέλα-λες. Κερντάς σίγουρα πο σκοπός τι νικιόλ μπαγιά κάνα ντινάς εκχέ “προσαγγονίς” σο κα σώνελας ι προσαγγονίν του Αδάμ ντα της Εύας σο κα ντένας καν. (Γέν. 3:​15· 22:​18) Ο Μπενγκ πρέπει τι ατσσιλό πουταρντέ μόσαρ σο ο Ιεχωβά κανονιντάς τι ντελ ο λύτρος! Σόσκε; Επειδή ο λύτρος ισί βασισμέ κι αληθινή αγάπη. (Ματθ. 20:​28· Ιωάν. 3:​16) Ανταγιά ιδιότητα να υπαρχίντιβελα κο χαρακτήρας κι Μπενγκέσκο, σο ντικχέλα σάντε πο συμφέρον. Σο κα αβέλ-πες χάρη κο λύτρος; Κάνα κα μπιτίνεν ο Χίλια Μπρεσά, τέλεια τσσαβέ του Αδάμ ντα της Εύας σο ντένα καν κα μπεσέν εκχέ πφουβιάτε σο ισί παράδεισος​—αντικάς σαρ ισινέ ο σκοπός ι Ιεχωβάσκο κι αρχή. Οντουβά βακίτι, ο Ιεχωβά κα βακερέλ, σαρ τι βακεράας: «Ωμέγα».

ΣΑΡ ΜΠΟΡΙΝΑΣΑ ΤΙ ΜΠΑΡΙΑΡΑΣ ΑΜΑΡΙ ΜΠΕΣΑ ΚΙ ΥΠΟΣΧΕΣΗ ΚΙ ΙΕΧΩΒΑΣΚΙ ΓΙΑ ΤΟΝ ΠΑΡΑΔΕΙΣΟ

18. Καλά τριν πράγματα βακερέλα αμένγκε ο Ντεβέλ για τι κερέλ-αμέν σίγουρους; (Ντικχέν ο πλαίσιος-ντα «Τριν Λόγοι για τι Ντας Μπέσα κι Υπόσχεση κι Ιεχωβάσκι»)

¹⁸ Ανταλέ μαθημάστε, ντικχλάμ καλά λόγους τθεράσα για τι αβάς σίγουροι ότι η πφουβ κα αβέλ Παράδεισος. Σο μπορίνασα τι βακεράς κο γιαβερά για τι κεράς-λεν τι αβέν σίγουροι ότι ανταβά κα αβέλ-πες; Πρώτον, ο ίδιος ο Ιεχωβά ντέλα ι συγκεκριμέ υπόσχεση. Ο βιβλίος Αποκάλυψη βακερέλα: «Οντουβά σο μπεσέλα κο θρόνος βακερντάς: “Ντικχέν! Κεράβα-λεν σαρέ νεβέ”». Βοβ τθερέλα ι σοφία, ι ζορ ντα μανγκέλα αντράλ πι γκίσταρ τι κερέλ πι υπόσχεση τι νικιόλ μπαγιά. Δεύτερον, ισί αζόμ σίγουρος ότι κα νικιόλ μπαγιά λέσκι υπόσχεση, σο κο γιακχά κι Ιεχωβάσκε ισί σαρ τι αβιλί-πες. Οτθάρ βακερντάς: «Γράφινε, επειδή ανταλά λάφια ισί πιστά. . . . Αβιλέ-πες μπαγιά!» Τρίτον, κάνα ο Ιεχωβά αρχίνελα κάτι, μπιτισκιαρέλα-λες με επιτυχία, σαρ ντικχίντιβελα κατά λάφια: «Με ισινόμ ο Άλφα ντα ο Ωμέγα». Ο Ιεχωβά κα σικαβέλ ότι ο Μπενγκ ισί ψεύτης σο να μπορίνελα τι τσσιναβέλ ι Ιεχωβάς τι κερέλ πο σκοπός τι νικιόλ μπαγιά.

19. Κάνα ο τζενέ δυσκολίντιβενα τι πακιάν ι υπόσχεση ι Ντεβλέσκι για τον Παράδεισο, σο μπορίνενα τι κερέν τουμέν;

¹⁹ Τι ντεν-τουμέν γκοντί ότι, κάθε φαρ σο ισινέν κο έργος ντα βακερένα ι τζενένγκε σαρ ο Ιεχωβά κερντάς-τουμέν σίγουρους ότι λέσκε υποσχέσεις κα νικιόν μπαγιά, μπαριαρένα τουμαρί μπέσα λέστε. Οτθάρ, ι γιαβέρ φαρ σο κα διαβάνεν ι σουκάρ υπόσχεση για τον Παράδεισο, σο ισί κο εδάφιος Αποκάλυψη 21:4, ντα κάποιος κα βακερέλ: «Σουκάρ ασούντιβενα σαρέ ανταλά, αλλά να πακιάβα ότι κα αβέν-πες», σο μπορίνενα τι κερέν; Κα μπορίνενας τι διαβάνεν ντα τι εξηγίνεν ο εδάφια 5 ντα 6. Σικαβέν καγιά σιγουριά ντινάς-αμέν ο Ιεχωβά για τι πακιάς λέσκι υπόσχεση, κάνα τσσουντάς πι υπογραφή, σαρ τι βακεράας.​—Ησ. 65:16.