«Μα Τσσιναβέν τι Αβέν Γκοντιαβέρ, τι Αβέν Τζανγκαντέ!»

1. Σαρ σικαντάς ο Ιησούς πι μαθητένγκε, κάνα κα αβέλας ο τέλος ντα σο βακερντάς λένγκε τι κερέν;

ΧΑΝΙΚ ντιβεσά πριν κατά μεριπέ ι Ιησούσκο, σταρ κατά μαθητές λέσκε πουτσλέ-λες: «Καβά κα αβέλ ο σημείος σο κα σικαβέλ ότι . . . ισί πασέ ο τέλος ανταλέ ντουνιάσκο;» (Ματθ. 24:3) Οντουλά μαθητές μάλλον σκεφτίνενας σαρ κα μπορίνενας τι αγαβέν κάνα κα καταστραφίντιβελας η Ιερουσαλήμ ντα λάκο ναός. Κάνα ο Ιησούς απαντιντάς λένγκε, κερντάς λάφι όχι σάντε για το τέλος σο κα τθερέλας η Ιερουσαλήμ αλλά για το “τέλος ανταλέ ντουνιάσκο-ντα” σο τζουβντιάσα αμέν αντιβές. Κάνα κα αβέλας ο τέλος; Ο Ιησούς βακερντάς: «Οντουλέ ντιβεσέσκε ή οντουλέ σαατίσκε καέκ να τζανέλα, ούτε ο άγγελοι κο ουρανός ούτε ο Τσσαβό, αλλά σάντε ο Ντατ». Σοράν βακερντάς σαρέ πι μαθητένγκε «τι αβέν τζανγκαντέ».​—Μάρκ. 13:​32-37.

2. Σόσκε ισινέ σημαντικός τι αβέν τζανγκαντέ ο τζενέ σο τζουβντιόνας κι Ιερουσαλήμ;

² Ο Ιουδαίοι Χριστιανοί κο πρώτος αιώνας έπρεπε τι ατσσόν τζανγκαντέ για τι σώνεν πουμαρί ζωή. Ο Ιησούς βακερντάς πι μαθητένγκε σο τι μπεκλεντίνεν τι ντικχέν για τι αγαβέν ότι η Ιερουσαλήμ κα καταστραφίντιβελας: «Κάνα κα ντικχέν ι Ιερουσαλήμ τι πφαντιόλ ντονταλάι στρατόντζαρ, αζομάν τι τζανέν ότι ερεσλί λάκι καταστροφή». Κάνα κα αβέλας-πες ανταβά, έπρεπε τι ντεν καν κο λάφια κι Ιησούσκε ντα «τι αρχίνεν τι νασέν κο βεσά». (Λουκ. 21:​20, 21) Ο τζενέ σο ντινέ καν ανταλέ λαφίντε σωσάλε κάνα ο Ρωμαίοι καταστραφιντέ ι Ιερουσαλήμ.

3. Σο κα σικλιάς ανταλέ μαθημάστε;

³ Αντιβές, τζουβντιάσα κο τελευταία ντιβεσά ανταλέ πφιρνέ ντουνιάσκε. Οτθάρ, πρέπει αμέν-ντα τι ατσσάς γκοντιαβέρ ντα τζανγκαντέ. Ανταλέ μαθημάστε, κα σικλιάς σαρ μπορίνασα τι αβάς μετρημέ τζενέ κάνα ντικχάσα προσεκτικά ο πράγματα σο αβένα-πες κο ντουνιάς, σαρ μπορίνασα τι προσοχίνας αμαρό νεαυτός ντα σαρ μπορίνασα τι χρησιμοποιήνας ι πο λατσσέ τροπόσαρ ο σαάτι σο ατσσόλα.

ΤΙ ΑΒΕΝ ΜΕΤΡΗΜΕ ΤΖΕΝΕ ΚΑΝΑ ΝΤΙΚΧΕΝΑ Ο ΠΡΑΓΜΑΤΑ ΣΟ ΑΒΕΝΑ-ΠΕΣ ΚΟ ΝΤΟΥΝΙΑΣ

4. Σόσκε πρέπει τι μανγκάς τι ντικχάς σαρ ο πράγματα σο αβένα-πες κο ντουνιάς σικαβένα ότι ο προφητείες ι Γραφιάκε νικιόνα μπαγιά;

⁴ Μανγκάσα μπουτ τι ντικχάς σαρ ο πράγματα σο αβένα-πες κο ντουνιάς σικαβένα ότι ο προφητείες ι Γραφιάκε νικιόνα μπαγιά, ντα ανταβά ισί λογικός. Για παράδειγμας, ο Ιησούς βακερντάς καλά συγκεκριμέ πράγματα κα αβένας-πες για τι βοηθίνελ-αμέν τι ντικχάς κάνα κα ερεσέλας ο τέλος ι Μπενγκέσκε ντουνιάσκο. (Ματθ. 24:​3-14) Ο απόστολος Πέτρος βακερντάς αμένγκε τι ντικχάς προσεκτικά σαρ ο προφητείες νικιόνα μπαγιά για τι ατσσόλ αμαρί πίστη ζουρανί. (2 Πέτρ. 1:​19-21) Ο τελευταίος βιβλίος ι Γραφιάκο αρχίνελα ακαλέ λαφίντζαρ: «Αποκάλυψη κατά Ιησούς Χριστός, σο ντινάς-λα λέστε ο Ντεβέλ, για τι σικαβέλ πι δουλόνγκε οντουλά σο πρέπει τι αβέν-πες ατζεχάνικ». (Αποκ. 1:1) Οτθάρ, ντικχάσα με μπαρί προσοχή ο πράγματα σο αβένα-πες κο ντουνιάς ντα σαρ ανταλά μπορεί τι σικαβένα ότι ο προφητείες ι Γραφιάκε νικιόνα μπαγιά. Ντα μπέκιμ μπεκλεντίνασα σαρ σαρ τι κεράς λάφι ανταλέ πραγματένγκε ο εκ ι γιαβερέσαρ.

5. Καλά πράγματα δεν πρέπει τι κεράς ντα καλά πρέπει τι κεράς; (Ντικχέν ο φωτογραφίες-ντα)

⁵ Όμως κάνα κεράσα λάφι για το προφητείες ι Γραφιάκε, δεν πρέπει τι βακεράς σαρ πακιάσα αμέν ότι κα νικιόν μπαγιά. Σόσκε; Επειδή να κα μανγκάας τι βακεράς κάτι σο κα μπορίνελας τι ανέλ διχόνοια κι κχανγκιρί. Για παράδειγμας, μπέκιμ ασουνάσα ότι ο αρχηγοί ι ντουνιάσκε βακερένα σαρ κα τσσιναβέν ι τζενέν τι χαν-πες ντα σαρ κα ανέν ειρήνη ντα ασφάλεια. Αντίς τι βακεράς ότι εκ ασακό λάφι σικαβέλα ότι η προφητεία ι εδαφιόσκι 1 Θεσσαλονικείς 5:3 νικιόλα μπαγιά, χρειαζίντιβελα τι τζανάς καλά ισί ο πο νεβέ λάφια σο βακερντάς η οργάνωση ι Ιεχωβάσκι. Κάνα αμαρέ συζητήσεις βασίντιβενα κο πράγματα σο νικαντάς η οργάνωση ι Ιεχωβάσκι, βοηθίνασα ι κχανγκιρί τι ατσσόλ ενωμέ ντα τι τθερέλ «ι ίδια γκοντί ντα ι ίδια γνώμη».​—1 Κορ. 1:​10· 4:6.

6. Σο σικλιάσα κατά εδάφια 2 Πέτρου 3:​11-13;

⁶ Διαβάνεν 2 Πέτρου 3:​11-13. Ο απόστολος Πέτρος βοηθίνελα-αμέν τι αβάς μετρημέ τζενέ κάνα σκεφτίνασα ο προφητείες ι Γραφιάκε. Βακερέλα αμένγκε τι “τθεράς συνέχεια αμαρέ γκοντιάτε ο ντιβές ι Ιεχωβάσκο”. Σόσκε; Όχι επειδή μανγκάσα τι αρακχάς “ο ντιβές ντα ο σαάτι” σο κα ανέλ ο Ιεχωβά ο Αρμαγεδδώνας, αλλά επειδή μανγκάσα τι χρησιμοποιήνας ο σαάτι σο ατσσόλα για τι τθεράς “άγια συμπεριφορά ντα τι κεράς πράγματα σο σικαβένα αφοσίωση κο Ντεβέλ”. (Ματθ. 24:​36· Λουκ. 12:​40) Γιαβερέ λαφίντζαρ, μανγκάσα τι τθεράς σωστή συμπεριφορά ντα τι αβάς σίγουροι ότι σο-ντα κεράσα ι Ιεχωβάσκε κεράσα-λες επειδή τθεράσα μπαρό μανγκιπέ λέσκε. Για τι αβέλ-πες ανταβά, πρέπει τι προσοχίνας αμαρό νεαυτός.

ΣΟ ΜΑΝΓΚΕΛΑ ΤΙ ΒΑΚΕΡΕΛ ΤΙ ΠΡΟΣΟΧΙΝΑΣ ΑΜΑΡΟ ΝΕΑΥΤΟΣ;

7. Σαρ σικαβάσα ότι προσοχίνασα αμαρό νεαυτός; (Λουκάς 21:34)

⁷ Ο Ιησούς βακερντάς πι μαθητένγκε τι προσοχίνεν, όχι σάντε ο πράγματα σο αβένα-πες κο ντουνιάς, αλλά πουμαρό νεαυτός-ντα. Ανταβά ντικχίντιβελα ξεκάθαρα κο εδάφιος Λουκάς 21:​34. (Διαβάνεν) Ο Ιησούς βακερντάς: «Τι προσοχίνεν τουμαρό νεαυτός». Ο τζενό σο προσοχίνελα πο νεαυτός ισί τζανγκαντό για τι ντικχέλ σο κα μπορίνελας τι χαλαβέλ λέσκι φιλία ι Ιεχωβάσαρ, ντα αρακχαβέλα-λα. Ανταλέ τροπόσαρ, ατσσικιαρέλα πο νεαυτός κι Ντεβλέσκο μανγκιπέ.​—Παρ. 22:3· Ιούδα 20, 21.

8. Καγιά συμβουλή ντινάς ο απόστολος Παύλος κο Χριστιανοί;

⁸ Ο απόστολος Παύλος βακερντάς κο Χριστιανοί τι προσοχίνεν πουμαρό νεαυτός. Για παράδειγμας, ντινάς κο Χριστιανοί κι Έφεσος ακαγιά συμβουλή: «Τι προσοχίνεν μπουτ σαρ πφιρένα, όχι σαρ οντουλά σο να τθερένα σοφία, αλλά σαρ οντουλά σο τθερένα». (Εφεσ. 5:​15, 16) Ο Μπενγκ προσπαθίνελα συνέχεια τι χαλαβέλ αμαρί φιλία ι Ιεχωβάσαρ. Οτθάρ, η Γραφή βακερέλα αμένγκε “τι αγαβάς σο ισί οντουβά σο μανγκέλα ο Ιεχωβά” για τι αρακχαβάς-αμέν σαρέ κατά παγίδες ι Μπενγκέσκε.​—Εφεσ. 5:17.

9. Σαρ αγαβάσα σο ισί οντουβά σο μανγκέλα ο Ιεχωβά αμένγκε;

⁹ Η Αγία Γραφή να βακερέλα αμένγκε κάθε πράγμας σο κα μπορίνελας τι κερέλ ζιάνι κι φιλία σο τθεράσα ι Ιεχωβάσαρ. Μπουτ φαρ, χρειαζίντιβελα τι λας αποφάσεις πραγματένγκε σο να βακέρντιβενα ξεκάθαρα κι Γραφή. Για τι τραμπίνας γκοντιάσαρ, χρειαζίντιβελα τι αγαβάς «σο ισί οντουβά σο μανγκέλα ο Ιεχωβά». Μπορίνασα τι κεράς-λες ανταβά κάνα σικλιαράσα-αμέν μπουτ φαρ κατά Λάφι ι Ντεβλέσκο ντα σκεφτίνασα-λες λατσσές. Καζόμ πο μπουτ αγαβάσα σο ισί οντουβά σο μανγκέλα ο Ιεχωβά ντα προσπαθίνασα τι τθεράς «ι γκοντί ι Χριστόσκι», αζόμ πο εύκολος κα αβέλ τι πφιράς «σαρ οντουλά σο τθερένα [σοφία]», ατζέ-ντα κάνα να τθεράσα συγκεκριμέ κανόνες σο σικαβένα αμένγκε σο τι κεράς. (1 Κορ. 2:​14-16) Μερικές παγίδες ισί εύκολος τι αγαβάς-λεν, ενώ γιαβερά νανέ αζόμ εύκολος.

10. Καλά ισί μερικές παγίδες σο πρέπει τι νασάς ντουρ λένταρ;

¹⁰ Μερικές παγίδες σο πρέπει τι νασάς ντουρ λένταρ ισί ο καμάκι, ο μπουτ πιπέ, ο μπουτ χαμπέ, ο λάφια σο ντουκχαβένα, η βίαιη διασκέδαση, η πορνογραφία ντα γιαβερά ασακέ. (Ψαλμ. 101:3) Αμαρό ντουσμάνι, ο Μπενγκ, ρόντελα συνέχεια τρόπους για τι χαλαβέλ αμαρί φιλία ι Ιεχωβάσαρ. (1 Πέτρ. 5:8) Άμα να ισινάμ τζανγκαντέ, ο Μπενγκ μπορεί τι φυτίνελ αμαρέ γκοντιάτε ντα αμαρέ γκίστε σπόροι σο κα κερέν-αμέν τι τθεράς ζήλια, μίσος, μπαρικανιπέ, χολί, ή τι αβάς παράνομοι ή μπίτσαλε γιακχάκε. (Γαλ. 5:​19-21) Κι αρχή, ανταλά αισθήματα μπέκιμ μα τι αβέν μπουτ ζουρανέ. Αλλά άμα να νικαβάσα-λεν ριζάσαρ σουγκό, κα συνεχίνεν τι μπαριόν σαρ εκ φυτός σο νικαβέλα δηλητήριος ντα κα ανέν αμένγκε προβλήματα.​—Ιακ. 1:​14, 15.

11. Καγιά ισί εκ παγίδα σο πρέπει τι νασάς ντουρ λάταρ, ντα σόσκε;

¹¹ Εκ παγίδα σο να ντικχίντιβελα εύκολα ισί ο μπέτι παρέες. Βακερέν ότι κερένα μπουτί εκχέ τζενέσαρ σο νανέ Μάρτυρας ι Ιεχωβάσκο. Μανγκένα τι κερέν-λες τι σκεφτίνελ λατσσέ πράγματα ι Ιεχωβάσκε Μαρτυρένγκε, οτθάρ κερένα λέσαρ λάφι σουκάρ ντα βοηθίνενα-λες. Μπάζιμα δεχτίνενα τι χαν λέσαρ κο μεσημέρι. Ντα χάνικ χάνικ, αρχίνενα τι κερέν-λες ανταβά πο συχνά. Κάποιες φαρ, ο τζενό πουτρέλα λουμνικανέ πραγματένγκε, ντα τουμέν προσπαθίνενα μα τι τσσουβέν-λεν σημασία κι αρχή. Καζόμ νακχέλα ο βακίτι όμως, συνηθίνενα αζόμ μπουτ ανταλά λάφια σο να πειράνενα-τουμέν. Εκ ντιβές, ο τζενό καλίνελα-τουμέν τι τζαν λέσαρ τι πιν σοράν κατά μπουτί, ντα τουμέν δεχτίνενα. Τελικά, αρχίνενα τι σκεφτίνεν σαρ βοβ. Κάνα κα ερεσέν κο σημείος ανταβά, καζόμ βακίτι κα νακχέλ για τι αρχίνεν τι συμπεριφερίντιβεν σαρ βοβ; Σίγουρα, σικαβάσα λατσσιπέ ντα σεβασμός σαριλένγκε, αλλά πρέπει τι ντας-αμέν γκοντί ότι ο τζενέ σο τραμπίνασα τι νακχάς σαάτι λέντζαρ κα επηρεάνεν-αμέν μπουτ. (1 Κορ. 15:​33) Άμα προσοχίνασα αμαρό νεαυτός, σαρ βακερντάς αμένγκε ο Ιησούς, να κα κεράς παρέα τζενέντζαρ σο να τζουβντιόνα σαρ μανγκέλα ο Ιεχωβά, άμα νανέ ανάγκη ανταβά. (2 Κορ. 6:​15) Κα ντικχάς ι παγίδα ντα κα νασάς ντουρ λάταρ.

ΤΙ ΧΡΗΣΙΜΟΠΟΙΗΝΕΝ ΤΟΥΜΑΡΟ ΣΑΑΤΙ Ι ΠΟ ΛΑΤΣΣΕ ΤΡΟΠΟΣΑΡ

12. Σο έπρεπε τι κερέν ο μαθητές ι Ιησούσκε καζόμ μπεκλεντίνενας ο τέλος ι ντουνιάσκο;

¹² Ο μαθητές ι Ιησούσκε δεν έπρεπε τι ατσσόν πφαντέ βαστέντζαρ καζόμ μπεκλεντίνενας ο τέλος ι ντουνιάσκο. Ο Ιησούς ντινάς-λεν εκ έργος τι κερέν. Βακερντάς λένγκε τι μουτθαβέν ο λατσσέ αμπέρια «κι Ιερουσαλήμ, σαρί κι Ιουδαία ντα κι Σαμάρεια, ατζέ-ντα κο τθαν σο ισί πο ντουρ οπράλ κι πφουβ». (Πράξ. 1:​6-8) Σο μπαρό έργος! Ο μαθητές ι Ιησούσκε ντινέ σαρό πουμαρό γκι ανταλέ διορισμόστε, ντα χρησιμοποιηντέ πουμαρό σαάτι ι πο λατσσέ τροπόσαρ.

13. Σόσκε χρειαζίντιβελα τι χρησιμοποιήνας αμαρό σαάτι ι πο λατσσέ τροπόσαρ; (Κολοσσαείς 4:5)

¹³ Διαβάνεν Κολοσσαείς 4:5. Για τι προσοχίνας αμαρό νεαυτός, χρειαζίντιβελα τι σκεφτίνας σοβαρά σαρ χρησιμοποιήνασα αμαρό σαάτι. «Κάτι σο να μπεσάσα» μπορεί τι αβέλ κο κάθε εκ αμένταρ. (Εκκλ. 9:​11) Μπορεί τι χασαράς ξαφνικά αμαρί ζωή.

14, 15. Σαρ μπορίνασα τι χρησιμοποιήνας αμαρό σαάτι ι πο λατσσέ τροπόσαρ; (Εβραίους 6:​11, 12) (Ντικχέν ι φωτογραφία-ντα)

¹⁴ Μπορίνασα τι χρησιμοποιήνας αμαρό σαάτι ι πο λατσσέ τροπόσαρ κάνα κεράσα οντουβά σο μανγκέλα ο Ιεχωβά ντα μπαριαράσα αμαρί φιλία λέσαρ. (Ιωάν. 14:​21) Χρειαζίντιβελα “τι αβάς σταθεροί, ντα πάντα τι τθεράς μπουτ πράγματα τι κεράς κο έργος κι Κυριόσκο”. (1 Κορ. 15:​58) Αντικάς, κάνα κα αβέλ ο τέλος​—είτε ο τέλος αμαρέ ζωγιάκο είτε ο τέλος ανταλέ ντουνιάσκο—​να κα μετανιώνας οντουλένγκε σο τραμπιντάμ αμαρέ ζωγιάτε.​—Ματθ. 24:​13· Ρωμ. 14:8.

¹⁵ Αντιβές, ο Ιησούς συνεχίνελα τι οδηγίνελ πι μαθητέν καζόμ κερένα λάφι ι Ντεβλέσκε Βασιλειάκε σαρί κι πφουβ. Βοβ ατσσικιαρντάς πο λάφι. Αντράλ κατά οργάνωση ι Ιεχωβάσκι, ο Ιησούς σικλιαρέλα-αμέν σαρ τι κεράς ο έργος ντα ντέλα-αμέν ο εργαλεία σο χρειαζίντιβασα για τι μουτθαβάς ο λατσσέ αμπέρια. (Ματθ. 28:​18-20) Αμέν κεράσα οντουβά σο μανγκέλα ο Ιησούς αμένταρ κάνα βακεράσα ντα σικλιαράσα σαρέ αμαρέ γκίσαρ ο λατσσέ αμπέρια ντα κάνα ατσσάσα τζανγκαντέ καζόμ μπεκλεντίνασα κατά Ιεχωβά τι ανέλ ο τέλος ανταλέ ντουνιάσκο. Κάνα ντάσα καν κο λάφια σο ισί κο Εβραίους 6:​11, 12, κα ασταράς σικίς αμαρί ελπίδα «μέχρι κο τέλος».​—Διαβάνεν.

16. Σο ισινάμ αποφασισμέ τι κεράς;

¹⁶ Ο Ιεχωβά τραμπιντάς ο ντιβές ντα ο σαάτι σο κα αβέλ ο τέλος ι Μπενγκέσκε ντουνιάσκο. Κάνα κα αβέλ οντουβά ντιβές, ο Ιεχωβά σίγουρα κα κερέλ τι νικιόν μπαγιά ο προφητείες σο κανονιντάς τι γραφίντιβεν λέσκε Λαφίστε. Ισί φαρ όμως σο μπέκιμ ντικχίντιβελα ότι ο τέλος ανταλέ ντουνιάσκο αργισάλο. Ο ντιβές ι Ιεχωβάσκο όμως «να κα αργίνελ!» (Αββακ. 2:3) Οτθάρ, τι αβάς αποφασισμέ τι “τθεράς συνέχεια αμαρέ γιακχά κο Ιεχωβά” ντα τι “μπεκλεντίνας με υπομονή αμαρέ Ντεβλέσκε σο κα σώνελ-αμέν”.​—Μιχ. 7:7.