Σαρ Μπορίνασα τι Αβάς Πάκι κι Ντεβλέσκε Γιακχά;

Σκέφτινε εκχέ λατσσέ νταγιά σο ετοιμάνελα πι χουρντέ τσσαβές για τι τζαλ κο σχολείος. Μανγκέλα λάκο τσσαβό τι κερέλ μπάνιος ντα τι ιρίλ περιποιημέ ντα τθοντέ σέα. Ανταβά βοηθίνελα-λες μα τι νασφάλιβελ ντα σικαβέλα κο γιαβερά ότι λέσκο ντατ ντα λέσκι ντάι αρακχαβένα-λες. Αντικάς αμαρό Ντατ, ο Ιεχωβά, μανγκέλα τι αβάς αμέν-ντα πάκι​—εμ κο σώμας ντα αμαρέ πραγματέντε, αλλά εμ οντουλέντε σο κεράσα ντα σκεφτίνασα. Κάνα ισινάμ πάκι, ντικχάσα λατσσιπέ ντα ντάσα δόξα κο Ιεχωβά.

1. Σαρ μπορίνασα τι αβάς πάκι αμαρέ σωμάστε ντα αμαρέ πραγματέντε;

Ο Ιεχωβά βακερέλα αμένγκε: «Πρέπει τι αβέν άγιοι». (1 Πέτρου 1:​16) Για τι βακέρντιβας άγιοι, πρέπει τι αβάς πάκι εμ οντουλέντε σο κεράσα ντα σκεφτίνασα, αλλά εμ αμαρέ σωμάστε ντα αμαρέ πραγματέντε. Μπορίνασα τι αβάς πάκι άμα κεράσα συχνά μπάνιος ντα ατσσικιαράσα αμαρέ σέα, αμαρό κχερ ντα αμαρό αμάξι περιποιημέ ντα σουκάρ. Επίσης, μπορίνασα τι βοηθίνας κο πακλίκι σο αβέλα-πες κι Αίθουσα Βασιλείας. Άμα ισινάμ πάκι αμαρέ σωμάστε ντα αμαρέ πραγματέντε, ντάσα δόξα κο Ιεχωβά.​—2 Κορινθίους 6:3, 4.

2. Καλά συνήθειες δεν πρέπει τι τθεράς για τι αβάς πάκι;

Η Αγία Γραφή βακερέλα αμένγκε «τι καθαρίνας αμαρό νεαυτός κάθε πραγμάσταρ σο μαγαρίνελα αμαρό σώμας ντα αμαρί γκοντί». (2 Κορινθίους 7:1) Οντουλέσκε, κεράσα ο πο λατσσό σο μπορίνασα για τι νασάς ντουρ σαρέ κατά πράγματα σο κα κερένας ζιάνι αμαρέ σωμάστε ντα αμαρέ γκοντιάτε. Οντουλά σο σκεφτίνασα πρέπει τι ανέν χαρά ι Ιεχωβάσκε, οτθάρ κεράσα σο νακχέλα αμαρέ βαστένταρ για τι νασκιαράς ντουρ ο μπέτι σκέψεις. (Ψαλμός 104:​34) Επίσης, μαράσα-αμέν για τι ατσσικιαράς πάκι αμαρί τσσιπ-ντα.​—Διαβάνεν Κολοσσαείς 3:8.

Σο γιαβέρ κα μπορίνελας τι μαγαρίνελ-αμέν κο σώμας ή κι Ντεβλέσκε γιακχά; Μερικά πράγματα μπορίνενα τι κερέν ζιάνι αμαρέ σωμάστε. Οτθάρ, να πιάσα τσιγάρα ή καλό, να τσαμτσαράσα φύλλα κόκας ντα να λάσα ναρκωτικά. Άμα κα νασάς ντουρ ανταλένταρ, κα τθεράς πο λατσσί υγεία ντα κα σικαβάς ότι σεβάνασα ο δώρος ι ζωγιάκο. Επίσης, προσπαθίνασα μπουτ τι τζας κόντρα κο μπέτι συνήθειες σαρ ισί ο αυνανισμός ντα η πορνογραφία. (Ψαλμός 119:​37· Εφεσίους 5:5) Μπορεί τι αβέλ δύσκολος τι τσσιναβάς ανταλά συνήθειες, αλλά ο Ιεχωβά κα βοηθίνελ-αμέν τι καταφερίνας-λεν.​—Διαβάνεν Ησαΐας 41:​13.

ΧΑΝΤΖΟΥΒ ΠΟ ΑΧΟΡΤ

3. Ο πακλίκι ντέλα δόξα κο Ιεχωβά

Μπορίνασα τι αγαβάς σαρ ντικχέλα ο Ιεχωβά ο πακλίκι άμα ντικχλάμ ο εντολές σο ντινάς κο πουρανό Ισραήλ. Διαβάνεν Έξοδος 19:​10 ντα 30:​17-19 ντα σοράν συζητίνεν ο ερωτήσεις:

• Σαρ σικαβένα ανταλά εδάφια, σαρ ντικχέλα ο Ιεχωβά ο πακλίκι;

• Σο κα βοηθίνελ-τουτ τι αβές πάντα πάκι;

Για τι αβάς πάκι πρέπει τι ντας αμαρέ σαατίσταρ ντα αμαρέ ζοριάταρ. Αλλά μπορίνασα τι αβάς πάκι κατέ-ντα τι μπεσάς ντα είτε ισινάμ χουλανέ είτε τσορορέ. Ντικχέν ο ΒΙΝΤΕΟΣ ντα σοράν συζητίνεν ι ερώτηση:

ΒΙΝΤΕΟΣ: Ο Ντεβέλ Μανγκέλα ι Πάκι Τζενέν (4:10)

• Σόσκε ο τζενέ σο ντάσα-λεν μαρτυρία κα σεβάνεν ι Ιεχωβάς πο μπουτ κάνα κα ντικχέν ότι αμαρέ πράγματα ισί πάντα περιποιημέ ντα πάκι;

4. Τσσίναβ ο μπέτι συνήθειες

Άμα πίσα τσιγάρα ή λέσα ναρκωτικά, μάλλον τζανέσα καζόμ δύσκολος ισί τι τσσιναβές ανταγιά συνήθεια. Σο μπορίνελα τι βοηθίνελ-τουτ; Σκέφτινε σαρ επηρεάνελα-τουτ ανταγιά συνήθεια. Διαβάνεν Ματθαίος 22:​37-39 ντα σοράν συζητίνεν σαρ επηρεάνελα ι τσιγάρα ντα ο ναρκωτικά  . . .

• ι φιλία σο τθερέλα εκ τζενό ι Ιεχωβάσαρ.

• λέσκι φαμιλί ντα ι τζενέν σο ισί πασέ λέστε.

Σκέφτινε πο τζανγκλέ σο μπορίνεσα τι κερές για τι τσσιναβές εκ μπέτι συνήθεια.a Ντικχέν ο ΒΙΝΤΕΟΣ.

ΒΙΝΤΕΟΣ: Τι Ατσσικιαρέν Τουμαρό Νεαυτός (2:47)

Διαβάνεν Φιλιππησίους 4:​13 ντα σοράν συζητίνεν ι ερώτηση:

• Σαρ μπορίνελα εκ τζενό τι αρακχέλ ι ζορ τι τσσιναβέλ εκ μπέτι συνήθεια άμα τθερέλα εκ λατσσό πρόγραμμας για τι κερέλ προσευχή, τι διαβάνελ ι Γραφή ντα τι τζαλ κο συναθροίσεις;

5. Τζα κόντρα κο μπέτι σκέψεις ντα συνήθειες

Διαβάνεν Κολοσσαείς 3:5 ντα σοράν συζητίνεν ο ερωτήσεις:

• Σαρ τζανάσα ότι η πορνογραφία, ο σέξτινγκ ντα ο αυνανισμός ισί μαγαριμέ πράγματα κι Ιεχωβάσκε γιακχά;

• Πακιάσα ότι ισί λογικός σο ο Ιεχωβά μανγκέλα τι αβάς πάκι λέσκε γιακχίντε; Σόσκε βακερέσα-λες ανταβά;

Ντικχ σαρ μπορίνεσα τι τζας κόντρα κο μπέτι σκέψεις. Ντικχέν ο ΒΙΝΤΕΟΣ.

ΒΙΝΤΕΟΣ: Κερέν Σο-ντα Χρειαζίντιβελα για τι Ατσσόν Πάκι (1:51)

Ο Ιησούς βακερντάς εκ παράδειγμας για τι σικαβέλ ότι πρέπει τι κεράς σο-ντα χρειαζίντιβελα άμα μανγκάσα τι ατσσάς πάκι κι Ντεβλέσκε γιακχά. Διαβάνεν Ματθαίος 5:​29, 30 ντα σοράν συζητίνεν ι ερώτηση:

• Ο Ιησούς να μανγκέλας τι βακερέλ τι κεράς ζιάνι αμαρέ νεαυτόστε, αλλά μανγκέλας τι σικαβέλ ότι πρέπει τι κεράς σο νακχέλα αμαρέ βαστένταρ. Σο μπορίνελα τι κερέλ εκ τζενό για τι νασκιαρέλ ο μπέτι σκέψεις;b

Άμα προσπαθίνεσα τι νασκιαρές ο μπέτι σκέψεις, ο Ιεχωβά εκτιμίνελα το προσπάθειες. Διαβάνεν Ψαλμός 103:​13, 14 ντα σοράν συζητίνεν ι ερώτηση:

• Άμα μαρέσα-τουτ τι τσσιναβές εκ μπέτι συνήθεια, σόσκε ντένα-τουτ ζορ ανταλά εδάφια για τι συνεχίνες το αγώνας;

Μα μουκχ-τουτ, συνέχινε το αγώνας!

Ισί εύκολος τι σκεφτίνες: “Αφού να καταφεριντόμ-λεν, να χρειαζίντιβελα τι προσπαθίναβ”. Αλλά σκέφτινε ακαβά: Άμα εκ τζενό σο τθάβντελα σε εκ αγώνας πελό τελέ, ανταβά να μανγκέλα τι βακερέλ ότι χασαρντάς ο αγώνας ούτε ότι πρέπει τι τζαλ από την αρχή. Αντικάς, άμα πελάν κο ίδιος λάθος ανταβά να μανγκέλα τι βακερέλ ότι χασαρντάν ο αγώνας σο κερέσα τι τσσιναβές ι μπέτι συνήθεια ούτε μανγκέλα τι βακερέλ ότι γκιλί σινανέ σαρί η προσπάθεια σο κερντάν. Ισί λογικός τι περές μπάζιμ κο ίδιος λάθος​—μέχρι τι αβέλ ο ντιβές σο κα καταφερίνες-λεν. Μα μουκχ-τουτ! Ι Ιεχωβάσκε βοηθειάσαρ, μπορίνεσα τι τσσιναβές ι μπέτι συνήθεια.

ΧΑΝΙΚ ΛΑΦΙΝΤΖΑΡ

Κεράσα ι Ιεχωβάσκο γκι κάνα ατσσικιαράσα αμαρό σώμας, αμαρί γκοντί ντα ο πράγματα σο κεράσα πάκι.

Σο Σικλιλάν;

• Σόσκε ισί αζόμ σημαντικός τι αβάς πάκι;

• Σαρ μπορίνεσα τι αβές πάκι τι σωμάστε ντα τι πραγματέντε;

• Σαρ μπορίνεσα τι ατσσικιαρές πάκι το σκέψεις ντα οντουλά σο κερέσα;

ΡΟΝΤΕ

Καλά απλά πράγματα μπορίνεσα τι κερές για τι αβές πάκι ατζέ-ντα άμα ισινάν τσορορό;

Υγεία ντα Πακλίκι​—Τθοϊπέ ι Βαστένγκο (3:01)

Τσσουβ σημασία μερικά πράγματα σο μπορίνεσα τι κερές για τι τσσιναβές ι τσιγάρα.

«Σαρ τι Τσσιναβέν ι Τσιγάρα» (Ξύπνα!, Μάιος 2010)

Σίκλιουβ σο κερέλα τούκε η πορνογραφία.

«Πορνογραφία​—Κερέλα Λατσσιπέ ή Ζιάνι;» (Η Σκοπιά 1 Αυγούστου 2013)

Ντικχ σαρ εκ μουρς τσσιναντάς τι ντικχέλ πορνογραφία.

«Πελόμ Μπουτ Φαρ Μέχρι τι Καταφερίναβ-λεν» (Η Σκοπιά, Αρ. 4 2016)