Ισινέν “Έτοιμοι τι Ντεν Καν”;

1. Σόσκε μπέκιμ τι αβέλ αμένγκε δύσκολος τι ντας καν;

ΜΗΠΩΣ μερικές φορές ισί τουμένγκε δύσκολος τι ντεν καν; Ανταβά αβέλας-πες κο βασιλιάς Δαβίδ-ντα, οντουλέσκε προσευχίντιλο κο Ντεβέλ: «Κερ μο γκι τι μανγκέλ τι ντελ-τουτ καν». (Ψαλμ. 51:12) Ο Δαβίδ μανγκέλας ι Ιεχωβάς. Όμως μερικές φορές δυσκολίντιβελας τι ντελ καν, σαρ αμέν-ντα. Σόσκε; Πρώτον, κληρονομιντάμ ι ατέλεια σο τσσίντελα-αμέν μα τι ντας καν. Δεύτερον, ο Μπενγκ συνέχεια προσπαθίνελα τι κερέλ-αμέν τι τζας κόντρα σαρ τζάλα βοβ. (2 Κορ. 11:3) Τρίτον, ο ντουνιάς σο τζουβντιάσα ισί πφερντό τζενέντζαρ σο μανγκένα τι τζαν κόντρα. Ντονταλάι αμένταρ ισί «ο πνεύμας σο ακανά επηρεάνελα οντουλέν σο να ντένα καν». (Εφεσ. 2:2) Πρέπει τι μαράς-αμέν, όχι σάντε για τι τζας κόντρα κι ατέλεια σο τσσίντελα-αμέν τι κεράς αμαρτία, αλλά για μα τι περάς κι παγίδα-ντα σο τσσουβέλα αμένγκε ο Μπενγκ ντα ανταβά ντουνιάς μα τι ντας καν. Πρέπει τι μαράς-αμέν για τι ντας καν κο Ιεχωβά ντα οντουλέντε σο διοριντάς τι τθερέν εξουσία.

2. Σο μανγκέλα τι βακερέλ τι αβάς “έτοιμοι τι ντας καν”; (Ιακώβου 3:17)

² Διαβάνεν Ιακώβου 3:​17. Ο Ιάκωβος, ι Ντεβλέσκε πνευμάσαρ, γραφιντάς ότι ο γκοντιαβέρ τζενέ ισί “έτοιμοι τι ντεν καν”. Σκεφτίνεν σο μανγκέλα τι βακερέλ ανταβά. Πρέπει τι αβάς έτοιμοι τι ντας καν οντουλέντε σο ο Ιεχωβά ντινάς εξουσία. Σίγουρα, ο Ιεχωβά να μανγκέλα τι ντας καν οντουλέντε σο μανγκένα αμένταρ μα τι ντας σημασία Λέσκε εντολέντε.​—Πράξ. 4:18-20.

3. Σόσκε ισί σημαντικός ι Ιεχωβάσκε τι ντας καν οντουλέντε σο τθερένα εξουσία οπρ’ αμέντε;

³ Μπέκιμ τι αβέλ αμένγκε πο εύκολος τι ντας καν κο Ιεχωβά παρά εκχέ τζενέστε. Ντα ο Ιεχωβά ντέλα πάντα τέλειες οδηγίες. (Ψαλμ. 19:7) Αλλά ανταβά να αβέλα-πες ι τζενέντζαρ σο τθερένα εξουσία. Όμως, αμαρό Ντατ σο ισί κο ουρανός ντινάς εξουσία κο νταντά ντα κο νταγιά, κο κυβερνήσεις ντα κο πρεσβύτεροι. (Παρ. 6:20· 1 Θεσ. 5:12· 1 Πέτρ. 2:13, 14) Κάνα ντάσα καν λέντε, κι πραγματικότητα ντάσα καν κο Ιεχωβά. Ακανά, για τι ντικχάς σαρ μπορίνασα τι ντας καν κο τζενέ σο ο Ιεχωβά ντινάς-λεν εξουσία, παρόλο σο μερικές φορές μπέκιμ ισί δύσκολος τι δεχτίνας ντα τι κεράς ο οδηγίες σο ντένα-αμέν.

ΤΙ ΝΤΕΝ ΚΑΝ ΤΟΥΜΑΡΕ ΝΤΑΝΤΕΣ ΝΤΑ ΤΟΥΜΑΡΕ ΝΤΑΓΙΑ

4. Σόσκε αζόμ μπουτ τσσαβέ να ντένα καν πουμαρέ νταντές ντα πουμαρέ νταγιά;

⁴ Ο τερνέ μπουτ φαρ ισί γιαβερέ τερνέντζαρ σο “να ντένα καν πουμαρέ νταντές ντα πουμαρέ νταγιά”. (2 Τιμ. 3:1, 2) Σόσκε μπουτ τερνέ να ντένα καν; Μερικά τερνέ πακιάνα ότι λένγκο ντατ ντα λένγκι ντάι γιαβέρ σικαβένα ντα γιαβέρ ισί. Βακερένα πουμαρέ τσσαβένγκε τι κερέν πράγματα σο βον να κερένα-λεν. Γιαβερά πακιάνα ότι ο συμβουλές σο ντένα-λεν ο νταντά ντα ο νταγιά λένγκε νανέ αμαρέ ντιβεσένγκε, ναστί αβένα-πες ή ισί μπουτ αυστηρές. Άμα ισινέν τερνέ, μήπως νιωθίνενα μπάζιμα αντικάς; Μπουτέ τζενένγκε ισί δύσκολος τι κερέν ι εντολή ι Ιεχωβάσκι: «Τι ασουνέν τουμαρέ νταντές ντα τουμαρέ νταγιά σαρ μανγκέλα ο Κύριος, σόσκε ανταβά ισί σωστός». (Εφεσ. 6:1) Σο κα βοηθίνελ-τουμέν τι κερέν-λες ανταβά;

5. Σόσκε κερέλα αμένγκε εντύπωση ότι ο Ιησούς ντέλας καν πι νταντέστε ντα πι νταγιάτε, σαρ βακερένα ο εδάφια Λουκάς 2:46-52;

⁵ Μπορίνενα τι σικλιόν τι ντεν καν κατά πο λατσσό παράδειγμας​—κατά Ιησούς. (1 Πέτρ. 2:21-24) Ο Ιησούς ισινέ εκ τέλειος τζενό σο λέσκο ντατ ντα λέσκι ντάι ισινέ ατελείς, αλλά σεβάνελας πι νταντές ντα πι νταγιά ατζέ-ντα κάνα κερένας λάθη ντα μπάζιμα παρεξηγίνενας-λες. (Έξοδ. 20:12) Σκεφτίνεν σο αβιλό-πες κάνα ο Ιησούς ισινέ 12 μπρεσένγκο. (Διαβάνεν Λουκάς 2:​46⁠-52) Λέσκο ντατ ντα λέσκι ντάι μπισταρντέ-λες κι Ιερουσαλήμ. Ο Ιωσήφ ντα η Μαρία τθερένας ι ευθύνη τι αβέν σίγουροι ότι σαρέ λένγκε τσσαβέ ισινέ λέντζαρ καζόμ βουρτίνενας πέσκε σοράν κατά γιορτή. Κάνα αρακχλέ τελικά ι Ιησούς, η Μαρία βακερντάς ότι βοβ φταίνελας για τη νταρ σο λιντέ! Ο Ιησούς κα μπορίνελας τι βακερέλ καζόμ άδικος ισινέ ανταβά. Βοβ όμως απαντιντάς πι νταντέσκε ντα πι νταγιάκε απλέ τροπόσαρ σο σικαβέλας σεβασμός. Όμως, ο Ιωσήφ ντα η Μαρία «να αγαντέ οντουβά σο βακερντάς λένγκε». Αλλά ο Ιησούς «ντέλας καν λέντε».

6, 7. Σο κα βοηθίνελ ι τερνέν τι ντεν καν πουμαρέ νταντές ντα πουμαρέ νταγιά;

⁶ Τερνάλεν, μήπως ισί τουμένγκε δύσκολος τι ντεν καν τουμαρέ νταντές ντα τουμαρέ νταγιά κάνα κερένα λάθη ή παρεξηγίνενα-τουμέν; Σο κα βοηθίνελ-τουμέν; Πρώτον, τι σκεφτίνεν σαρ νιωθίνελα ο Ιεχωβά. Η Γραφή βακερέλα ότι «ανταβά μανγκέλα ο Κύριος», τι ντεν καν τουμαρέ νταντές ντα τουμαρέ νταγιά. (Κολ. 3:20) Κάνα τουμαρό ντατ ντα τουμαρί ντάι να αγαβένα-τουμέν ντιπ ή κάνα τσσουβένα κανόνες σο νανέ εύκολος τι ντεν-λεν καν, ο Ιεχωβά τζανέλα-λες ανταβά. Άμα όμως τραμπίνενα τι ντεν καν, ντένα-λες χαρά.

⁷ Δεύτερον, τι σκεφτίνεν σαρ νιωθίνελα τουμαρό ντατ ντα τουμαρί ντάι. Κάνα ντένα καν τουμαρέ νταντές ντα τουμαρέ νταγιά, ντένα-λεν χαρά ντα κερδίνενα λένγκι εμπιστοσύνη. (Παρ. 23:22-25) Επίσης, μπέκιμ κα αβέν πο πασέ λέντζαρ. Εκ πφραλ κατά Βέλγιος, ο Αλεξάντρ, βακερέλα: «Κάνα αρχισάλομ τι νταβ πο μπουτ καν μι νταντές ντα μι νταγιά, μι σχέση λέντζαρ αβιλί πο τατί ντα πο χαρούμενη».b Τρίτον, τι σκεφτίνεν σαρ κα βοηθίντιβεν πο σοράν άμα κα ντεν καν ακανά. Ο Πάουλο, σο τζουβντιόλα κι Βραζιλία, βακερέλα: «Επειδή σικλιλόμ τι νταβ καν μι νταντές ντα μι νταγιά, ανταβά βοηθίνελα-μαν τι νταβ καν ι Ιεχωβάς ντα γιαβερέν σο τθερένα εξουσία». Ο Λάφι ι Ντεβλέσκο ντέλα-τουμέν εκ σοβαρός λόγος τι ντεν καν τουμαρέ νταντές ντα τουμαρέ νταγιά. Βακερέλα: «Για τι τζαν τούκε λατσσές ο πράγματα ντα για τι ατσσός μπουτ μπρεσά οπράλ κι πφουβ».​—Εφεσ. 6:2, 3.

8. Σόσκε τραμπίνενα μπουτ τερνέ τι ντεν καν πουμαρέ νταντές ντα πουμαρέ νταγιά;

⁸ Μπουτ τερνέ ντικχλέ καζόμ λατσσές τζάνα λένγκε ο πράγματα κάνα ντένα καν. Η Λουίζα, σο ισί βόι-ντα κατά Βραζιλία, κι αρχή ισινέ λάκε δύσκολος τι αγαβέλ σόσκε να μουκχένας-λα τι τθερέλ κινητός για χάνικ καιρός. Αφού ο πο μπουτ τερνέ τθερένας κινητός, σκεφτίνελας. Αλλά σοράν αγαντάς ότι λάκο ντατ ντα λάκι ντάι αντικάς αρακχαβένας-λα. Ακανά βακερέλα: «Κάνα ντάβα καν μι νταντές ντα μι νταγιά, να νιωθίναβα σαρ τι αβάβ πφαντί εκχέ σολέσαρ, αλλά νιωθίναβα σαρ τι αβάβ αντρέ εκχέ αμαξίστε ντα τι ιριάβ ι ζώνη σο μπορίνελα τι σώνελ μι ζωή». Η Ελίζαμπεθ, εκ τερνί πφεν κατά Ηνωμένες Πολιτείες, ατζέ δυσκολίντιβελα τι ντελ καν πι νταντές ντα πι νταγιά κάποιες φορές. Βόι βακερέλα: «Κάνα να αγαβάβα ντιπ σόσκε μο ντατ ντα μι ντάι τσσουβένα μάνγκε εκ κανόνας, ανάβα μι γκοντιάτε καζόμ φαρ αρακχαντέ-μαν λένγκε κανόνες». Η Μόνικα, σο τζουβντιόλα κι Αρμενία, βακερέλα ότι ο πράγματα πάντα τζάνας πο λατσσές λάκε κάνα ντέλας καν πι νταντές ντα πι νταγιά.

ΤΙ ΝΤΕΝ ΚΑΝ «ΟΝΤΟΥΛΕΝΤΕ ΣΟ ΤΘΕΡΕΝΑ Ι ΖΟΡ ΤΙ ΚΕΡΕΝ ΚΟΥΜΑΝΤΟΣ»

9. Σαρ νιωθίνενα μπουτ τζενέ κάνα ισί τι ντεν καν κο νόμος;

⁹ Μπουτ τζενέ αγαβένα ότι χρειαζίντιβασα ο κυβερνήσεις ι ντουνιάσκε ντα ότι πρέπει τι ντας καν ατζέ-ντα σε χάνικ νόμους σο τσσουβένα “οντουλά σο τθερένα ι ζορ τι κερέν κουμάντος”. (Ρωμ. 13:1) Αλλά ο ίδια ανταλά τζενέ να ντένα καν σε εκ νόμος σο ντικχίντιβελα άδικος ή μπουτ αυστηρός. Σκεφτίνεν για παράδειγμας σο αβέλα-πες με το φόροι σο πρέπει τι ποκίντιβεν. Σε εκ έρευνα σο αβιλί-πες εκχέ τθεμέστε κι Ευρώπη, μπουτ τζενέ πακιάνας ότι «ισί σωστός μα τι ποκινές φόρους άμα ντικχιόλα τούκε ότι ισί άδικος». Άκ’ σόσκε ο τζενέ οντουλέ τθεμέστε να ποκινένα σαρέ ο φόροι σο πρέπει τι ντιντιόν κο κράτος.

10. Σόσκε ντάσα καν ατζέ-ντα κο νόμοι σο να μπεϊντίνασα;

¹⁰ Η Γραφή βακερέλα ότι ι τζενένγκε κυβερνήσεις ανένα βάσανα, ισί κο βας κι Μπενγκέσκο ντα ατζεχάνικ κα αβέν καταστροφή. (Ψαλμ. 110:5, 6· Εκκλ. 8:9· Λουκ. 4:5, 6) Βακερέλα αμένγκε επίσης ότι «κον τζάλα λέντζαρ κόντρα, τζάλα κόντρα κο Ντεβέλ σο τσσουντάς σε εκ σειράς ο πράγματα». Ακανά, ο Ιεχωβά μουκχέλα κο κυβερνήσεις τι κερέν κουμάντος για τι αβέν σε εκ σειράς ο πράγματα, ντα μπεκλεντίνελα αμένταρ τι ντας-λεν καν. Άρα, πρέπει “τι ντας σαριλέντε οντουλά σο πρέπει τι ντας-λεν”, σαρ ισί τι ποκινάς ο φόροι, τι σικαβάς λένγκε σεβασμός ντα τι ντας-λεν καν. (Ρωμ. 13:1-7) Μπέκιμ αμντίνασα ότι εκ νόμος νανέ εύκολος ή ισί άδικος ή χρειαζίντιβελα τι ποκινάς μπουτ λοβέ για τι ντας-λες καν. Όμως, ντάσα καν κο Ιεχωβά, ντα βοβ βακερέλα αμένγκε τι ντας καν ανταλέ κυβερνησιέντε άμα να μανγκένα αμένταρ τι τζας κόντρα κο κανόνες λέσκε.​—Πράξ. 5:29.

11, 12. Σαρ βακερένα ο εδάφια Λουκάς 2:1-6, σο κερντάς ο Ιωσήφ ντα η Μαρία για τι ντεν καν σε εκ νόμος σο να ισινέ εύκολος, ντα καβά ισινέ ο αποτέλεσμας; (Ντικχέν ο φωτογραφίες-ντα)

¹¹ Μπορίνασα τι σικλιάς μπουτ πράγματα κατά παράδειγμας σο μουκχλάς αμένγκε ο Ιωσήφ ντα η Μαρία, σο ισινέ έτοιμοι τι ντεν καν οντουλέντε σο τθερένας ι ζορ τι κερέν κουμάντος, ατζέ-ντα κάνα ανταβά να ισινέ εύκολος. (Διαβάνεν Λουκάς 2:1-6) Κάνα η Μαρία ισινέ κχαμνί πι μασικέστε, βόι ντα ο Ιωσήφ νακχλέ εκ δοκιμασία σο κα σικαβέλας άμα κα ντένας καν. Ο Αύγουστος, σο κυβερνίνελας ι Ρωμαϊκή Αυτοκρατορία, ντινάς εντολή τι αβέλ απογραφή. Ο Ιωσήφ ντα η Μαρία έπρεπε τι τζαν μέχρι κι Βηθλεέμ, ντα τι κερέν σχεδόν 150 χιλιόμετρα ντα τι νακχέν βεσένταρ. Οντουβά ταξίδι να ισινέ εύκολος, ειδικά ι Μαριάκε. Μπέκιμ τι ανησυχίνελας πέσκε ντα πι μαξιμίσκε σο να μπιάντιλοας ατζέκ. Σο κα αβέλας-πες άμα κα ασταρένας-λα ο ντουκχά κο ντρομ; Τθερέλας πι περέστε ι Μεσσιάς. Κα αβέλας ανταβά δικαιολογία για μα τι ντελ καν κι κυβέρνηση;

¹² Ο Ιωσήφ ντα η Μαρία να μουκχλέ καέκ ανησυχία τι κερέλ-λεν μα τι ντεν καν κο νόμος. Ο Ιεχωβά ευλογιντάς-λεν επειδή ντινέ καν. Η Μαρία ερεσλί λατσσές κι Βηθλεέμ, μπιαντάς εκχέ ζουρανέ χουρντές ντα αντικάς κερντάς τι νικιόλ μπαγιά εκ προφητεία ι Γραφιάκι!​—Μιχ. 5:2.

13. Σο λατσσιπέ μπορεί τι κεράς αμαρέ πφραλένγκε κάνα ντάσα καν κο νόμοι;

¹³ Κάνα ντάσα καν οντουλέντε σο τθερένα ι ζορ τι κερέν κουμάντος, βοηθίνασα εμ αμέν εμ ι γιαβερέν. Σαρ; Ο πρώτος πράγμας ισί ότι να τθεράσα ο μπέτι αποτελέσματα σο τθερένα οντουλά σο να ντένα καν κο νόμος. (Ρωμ. 13:4) Κάνα αμέν ντάσα καν κο νόμοι, ο κυβερνήσεις μπορίνενα τι ντικχέν ότι ο Μάρτυρες ι Ιεχωβάσκε ισί λατσσέ τζενέ. Για παράδειγμας, πριν από μπουτ μπρεσά κι Νιγηρία, ο στρατιώτες τσσουντέ-πες σε εκ Αίθουσα Βασιλείας καζόμ αβέλας-πες η συνάθροιση, ντα ρόντενας τζενένγκε σο νικιόνας κο ντρομά ντα ντένας βίκος επειδή να μανγκένας τι ποκινέν ο φόροι. Αλλά ο αξιωματικός ντινάς κο στρατιώτες ι εντολή τι νασέν, ντα βακερντάς: «Ο Μάρτυρες ι Ιεχωβάσκε πάντα ποκινένα πουμαρέ φόρους». Κάθε φαρ σο τουμέν ντένα καν κο νόμοι, βοηθίνενα τι συνεχίνεν τι τθερέν ο Μάρτυρες ι Ιεχωβάσκε λατσσό ναβ. Ντα μπέκιμ εκ ντιβές ανταβά λατσσό ναβ τι αρακχαβέλ τουμαρέ πφραλέν ντα πφενίν.​—Ματθ. 5:16.

14. Σο βοηθιντάς εκχέ πφενιά τι αβέλ «έτοιμη τι ντελ καν» οντουλέντε σο τθερένα ι ζορ τι κερέν κουμάντος;

¹⁴ Όμως, μπέκιμ να μανγκάσα πάντα τι ντας καν οντουλέντε σο τθερένα ι ζορ τι κερέν κουμάντος. «Ισινέ μάνγκε μπουτ δύσκολος τι νταβ καν», βακερέλα η Τζοάνα, εκ πφεν κο Ηνωμένες Πολιτείες, «επειδή η κυβέρνηση αδικιντάς μερικέ τζενέν μι φαμιλιάταρ». Αλλά η Τζοάνα κερντάς μπαρί προσπάθεια για τι αλλάνελ ο τρόπος σο σκεφτίνελας. Πρώτον, τσσιναντάς τι διαβάνελ πράγματα κο κοινωνικά δίκτυα σο ανένας λάκε μπέτι αισθήματα για την κυβέρνηση. (Παρ. 20:3) Δεύτερον, προσευχίντιβελας κο Ιεχωβά τι βοηθίνελ-λα τι συνεχίνελ τι ντελ μπέσα λέστε ντα μα τι μπεκλεντίνελ ότι ο τζενέ κα ανέν εκ πο λατσσί κυβέρνηση. (Ψαλμ. 9:9, 10) Τρίτον, διαβάνελας θέματα κο έντυπα αμαρέ σο βακερένας ότι πρέπει τι ατσσάς ουδέτεροι. (Ιωάν. 17:16) Ακανά, η Τζοάνα βακερέλα ότι, επειδή σεβάνελα ντα ντέλα καν οντουλέντε σο τθερένα ι ζορ τι κερέν κουμάντος, τθερέλα «ειρήνη σο να βακέρντιβελα λαφίντζαρ».

ΤΙ ΝΤΕΝ ΚΑΝ ΚΟ ΟΔΗΓΙΕΣ ΣΟ ΝΤΕΛΑ Η ΟΡΓΑΝΩΣΗ Ι ΙΕΧΩΒΑΣΚΙ

15. Σόσκε μπέκιμ τι αβέλ αμένγκε δύσκολος τι ντας καν κο οδηγίες σο ντέλα η οργάνωση ι Ιεχωβάσκι;

¹⁵ Ο Ιεχωβά μανγκέλα αμένταρ τι “ασουνάς οντουλέν σο οδηγίνενα-αμέν” κι κχανγκιρί. (Εβρ. 13:17) Παρόλο σο αμαρό Αρχηγός, ο Ιησούς, ισί τέλειος, οντουλέν σο χρησιμοποιήνελα ατθέ κι πφουβ για τι οδηγίνεν-αμέν νανέ τέλειοι. Μπέκιμ ισί αμένγκε δύσκολος τι ντας-λεν καν, ειδικά άμα μανγκένα αμένταρ τι κεράς κάτι σο να μανγκάσα. Εκχέ περιπτωσιάτε, ο απόστολος Πέτρος σακιντίνελας τι κερέλ εκ οδηγία σο ντιντιλί-λες. Κάνα εκ άγγελος βακερντάς λέσκε τι χαλ ζώα σο ο Μωσαϊκός Νόμος βακερέλας ότι ισινέ μαγαριμέ, ο Πέτρος βακερντάς όχι​—μάλιστα, όχι σάντε εκ φαρ, αλλά τριν φαρ! (Πράξ. 10:9-16) Σόσκε; Η νεβί οδηγία να ντικχίντιβελας λέσκε λογική. Σικλιλόας τι κερέλ ο πράγματα διαφορετικά. Άμα ισινέ δύσκολος ι Πετρόσκε τι ντελ καν κο οδηγίες σο ντινάς-λες εκ τέλειος άγγελος, καζόμ πο δύσκολος μπέκιμ τι αβέλ αμένγκε-ντα τι ντας καν κο ατελείς τζενέ!

16. Παρόλο σο ο απόστολος Παύλος κα μπορίνελας τι σκεφτίνελ ότι η οδηγία σο λιντάς να ισινέ λογική, σο κερντάς; (Πράξεις 21:23, 24, 26)

¹⁶ Ο απόστολος Παύλος ισινέ “έτοιμος τι ντελ καν” ατζέ-ντα κάνα λέλας οδηγίες σο μπέκιμ να ντικχίντιβενας λογικές. Ο Ιουδαίοι Χριστιανοί ασουντέας τι βακέρντιβεν ψεύτικα λάφια ι Παυλόσκε​—δηλαδή ότι ο Παύλος βακερέλας ι Ιουδαιόνγκε «τι τζαν κόντρα κο Μωυσής» ντα ότι να σεβάνελας ο Μωσαϊκός Νόμος. (Πράξ. 21:21) Ο Χριστιανοί πρεσβύτεροι κι Ιερουσαλήμ ντινέ κο Παύλος ι οδηγία τι λελ πέσαρ κο ναός σταρέ μουρσέν ντα τι καθαρίνελ-πες, σαρ βακερέλας ο Νόμος. Αντικάς κα σικαβέλας ότι κερέλας ο Νόμος. Αλλά ο Παύλος τζανέλας ότι ο Χριστιανοί να ισινέ ακανά τελάλ κατά Νόμος. Ντα να τθερέλας κερντό κάτι λάθος. Όμως, ο Παύλος ντινάς καν αμέσως. «Λιντάς ι μουρσέν ο γιαβέρ ντιβές ντα καθαριντάς-πες λέντζαρ». (Διαβάνεν Πράξεις 21:​23, 24, 26) Επειδή ο Παύλος ντινάς καν, αντάς ι ενότητα.​—Ρωμ. 14:19, 21.

17. Σο σικλιόνα κατά Στέφανι;

¹⁷ Εκ πφεν, η Στέφανι, δυσκολίντιβελας τι δεχτίνελ εκ απόφαση σο λιντέ ο υπεύθυνα πφραλά λάκε τθεμέστε. Βόι ντα λάκο ρομ υπηρετίνενας σε εκ όμιλος σο κερντιόλας λάφι εκ γιαβέρ τσσιπ, ντα μπεϊντίνενας-λες μπουτ ανταβά. Σοράν, ο γραφείος τμήματος λιντάς ι απόφαση τι σταματίνελ οντουβά όμιλος, ντα ο ρομ ντα η ρομνί διορισάλε πάλι εκχέ κχανγκιριάτε σο κερένας λάφι πουμαρί τσσιπ. «Ισινόμας μπουτ στεναχωριμέ», βακερέλα η Στέφανι. «Να πακιάβας ότι υπαρχίντιβελας πο μπουτ ανάγκη αμαρέ τσσιμπάτε». Όμως, αποφασιντάς τι ντελ καν κι νεβί οδηγία. «Πο σοράν, αγαντόμ καζόμ γκοντιαβέρ ισινέ ανταγιά απόφαση», βακερέλα η Στέφανι. «Αμαρέ κχανγκιριάτε, μπουτ πφραλά ντα πφενιά να τθερένα πουμαρέ τζενέν κι αλήθεια. Οτθάρ, αμέν αβιλάμ λένγκε πνευματική φαμιλί. Κεράβα μελέτη εκχέ πφενιάσαρ σο ισινέ αδρανής ντα αρχισάλι πάλι τι κερέλ έργος ντα τι τζαλ κο συναθροίσεις. Επίσης, ακανά τθεράβα πο μπουτ σαάτι για τι σικλιαράβ-μαν κατά Γραφή». Η Στέφανι βακερέλα κάτι ατζέκ: «Μι συνείδηση ισί πάκι επειδή τζανάβα ότι κερντόμ σο νακχέλας μι βαστέσταρ για τι νταβ καν».

18. Σαρ βοηθίντιβασα κάνα ντάσα καν;

¹⁸ Μπορίνασα τι σικλιάς τι ντας καν. Ο Ιησούς «σικλιλό τι ντελ καν», όχι κάνα ο πράγματα τζάνας λατσσές, αλλά «αντράλ οντουλένταρ σο τσσιντιντάς». (Εβρ. 5:8) Σαρ ο Ιησούς, αντικάς αμέν-ντα μπουτ φαρ σικλιάσα τι ντας καν κο δύσκολα ντιβεσά. Για παράδειγμας, κάνα αρχισάλο ο Κορωνοϊός, κάνα βακερντέ αμένγκε τι σταματίνας ο συναθροίσεις κι Αίθουσα Βασιλείας ντα ο έργος κχερ κχερέστε, μήπως ισινέ τουμένγκε δύσκολος τι ντεν καν; Όμως, επειδή ντινέν καν, ανταβά αρακχαντάς-τουμέν, κερντάς-τουμέν πο ενωμέ τουμαρέ πφραλέντζαρ ντα κερντάς ι Ιεχωβάσκο γκι. Ακανά, σαρέ ισινάμ πο λατσσές προετοιμασμέ τι ντας καν σο-ντα οδηγίες κα λας αντρέ κι μπαρί στεναχώρια. Άμα κα ντας καν ανταλέ οδηγιέντε, κα σώνας αμαρί ζωή!​—Ιώβ 36:11.

19. Σόσκε μανγκένα τι ντεν καν;

¹⁹ Σικλιλάμ ότι, κάνα ντάσα καν, τθεράσα μπουτ ευλογίες. Αλλά ο πο σημαντικός λόγος σο τραμπίνασα τι ντας καν κο Ιεχωβά ισί ότι μανγκάσα-λες ντα μανγκάσα τι κεράς λέσκο γκι. (1 Ιωάν. 5:3) Να μπορίνασα ποτές τι ντας κο Ιεχωβά σαρέ οντουλά σο τθερέλα κερντό αμένγκε. (Ψαλμ. 116:12) Αλλά μπορίνασα τι ντας καν λέστε ντα οντουλέντε σο τθερένα εξουσία οπρ’ αμέντε. Άμα ντάσα καν, σικαβάσα ότι ισινάμ γκοντιαβέρ. Ντα ο γκοντιαβέρ κερένα ι Ιεχωβάσκο γκι τι χαιρίνελ.​—Παρ. 27:11.