Τι Αβέν Χαρούμενοι Οντουλέντζαρ σο Μπορίνενα τι Κερέν για τι Υπηρετίνεν ι Ιεχωβάς!

1. Σόσκε ο Ιεχωβά να συγκρίνελα-αμέν ι γιαβερέντζαρ;

Ο ΙΕΧΩΒΑ μπεϊντίνελα σο νανέ σαρέ ο πράγματα ίδια. Ανταβά αγαβάσα-λες κατά διαφορετικά φυτά, ζώα ντα τζενέ σο κερντάς. Ο κάθε εκ αμένταρ ισί ξεχωριστός. Οτθάρ, ο Ιεχωβά ποτές να συγκρίνελα-αμέν ι γιαβερέντζαρ. Μπορίνελα τι ντικχέλ τουμαρό γκι, σο τζενέ ισινέν μπαγιά. (1 Σαμ. 16:7) Επίσης, τζανέλα ο πράγματα σο μπορίνενα τι κερέν λατσσές, ο πράγματα σο ναστί κερένα λατσσές ντα ο τρόπος σο μπαριλέν. Ντα να μανγκέλα τουμένταρ τι κερέν πιο μπουτ οντουλένταρ σο μπορίνενα τι κερέν. Πρέπει τι ντικχάς αμαρό νεαυτός αντικάς σαρ ντικχέλα-αμέν ο Ιεχωβά. Αζομάν κα “σκεφτίνας λογικά”, σόσκε να κα σκεφτίνας αμαρέ νεαυτόσκε πιο μπουτ ή πιο χάνικ πράγματα οντουλένταρ σο πρέπει τι σκεφτίνας.​—Ρωμ. 12:3.

2. Σόσκε νανέ λατσσό τι συγκρίνας-αμέν ι γιαβερέντζαρ;

² Μπορίνασα τι σικλιάς κατά λατσσό παράδειγμας ι γιαβερένγκο. Για παράδειγμας, μπορεί τι τζανάσα πφραλέν ντα πφενίν σο ισί μπουτ λατσσέ κο έργος. (Εβρ. 13:7) Μπορίνασα τι σικλιάς λένταρ σαρ τι κεράς πιο λατσσές ο έργος. (Φιλιπ. 3:​17) Αλλά γιαβέρ ισί τι σικλιόν κατά παράδειγμας εκχέ τζενέσκο ντα γιαβέρ ισί τι συγκρίνεν-τουμέν λέσαρ. Άμα συγκρίνασα-αμέν ι γιαβερέντζαρ, μπορεί τι αρχίνας τι ζηλίνας, τι χασαράς αμαρί ζορ ή ατζέ-ντα τι νιωθίνας άχρηστοι. Σαρ σικλιλάμ κο γιαβέρ μάθημας, άμα τζάσα κόντρα αμαρέ πφραλέντζαρ κι κχανγκιρί, ανταβά κα κερέλ ζιάνι κι φιλία σο τθεράσα ι Ιεχωβάσαρ. Οτθάρ, ο Ιεχωβά βακερέλα αμένγκε: «Ο κάθε εκ τουμένταρ τι σκεφτίνελ με προσοχή οντουλά σο κερέλα, ντα αζομάν κα τθερέλ λόγος τι χαιρίνελ σάντε οντουλέσκε σο κερντάς βοβ ντα όχι επειδή συγκρίνελα-πες ι γιαβερέσαρ».​—Γαλ. 6:4.

3. Καλά πράγματα σο κερντέν για τι υπηρετίνεν ι Ιεχωβάς ανένα τουμένγκε χαρά;

³ Ο Ιεχωβά μανγκέλα τι αβέν χαρούμενοι οντουλέντζαρ σο κερένα τουμέν για τι υπηρετίνεν-λες. Για παράδειγμας, άμα μπολντιλέν, ανταβά ισί εκ λόγος τι χαιρίνεν. Ανταγιά ισινέ εκ απόφαση σο λιντέν τουμέν κορκορέ. Λιντέν ανταγιά απόφαση επειδή τουμέν μανγκένα ι Ντεβλές. Ανέν τουμαρέ γκοντιάτε σαρέ οντουλά σο κερντέν μέχρι ακανά. Για παράδειγμας, μανγκένα πιο μπουτ τι διαβάνεν ντα τι σικλιαρέν-τουμέν κατά Γραφή; Σικλιλέν τι κερέν προσευχές αντράλ τουμαρέ γκίσταρ; (Ψαλμ. 141:2) Πουτρένα πιο εύκολα συζητήσεις κο έργος ντα χρησιμοποιήνενα πιο μπουτ ο εργαλεία για τι σικλιαράς; Ντα άμα τθερένα φαμιλί, βοηθιντάς-τουμέν ο Ιεχωβά τι αβέν πιο λατσσό ρομ, ρομνί, ντατ ή ντάι; Μπορίνενα τι αβέν μπουτ χαρούμενοι για το αλλαγές σο κερντέν.

4. Σο κα ντικχάς ανταλέ μαθημάστε;

⁴ Μπορίνασα τι βοηθίνας γιαβερέν-ντα τι χαιρίνεν οντουλένγκε σο κερένα για τι υπηρετίνεν ι Ιεχωβάς. Επίσης, μπορίνασα τι βοηθίνας-λεν μα τι συγκρίνεν-πες ι γιαβερέντζαρ. Ανταλέ μαθημάστε, κα ντικχάς σαρ μπορίνενα ο νταντά ντα ο νταγιά τι βοηθίνεν πουμαρέ τσσαβέν, σαρ μπορίνενα ο αντρόγυνα τι βοηθίνεν ο εκ ι γιαβερές ντα σαρ μπορίνενα ο πρεσβύτεροι ντα γιαβερά τι βοηθίνεν ι πφραλέν ντα ι πφενίν. Κο τέλος, κα ντικχάς χάνικ αρχές ι Γραφιάκε σο μπορίνενα τι βοηθίνεν ι κάθε εκχές αμένταρ τι τσσουβέλ στόχους σο μπορίνελα τι κερέλ-λεν.

ΣΟ ΜΠΟΡΙΝΕΝΑ ΤΙ ΚΕΡΕΝ Ο ΝΤΑΝΤΑ, Ο ΝΤΑΓΙΑ ΝΤΑ Ο ΑΝΤΡΟΓΥΝΑ

5. Σο δεν πρέπει τι κερέν ο νταντά ντα ο νταγιά σαρ βακερέλα ο εδάφιος Εφεσίους 6:4;

⁵ Ο νταντά ντα ο νταγιά δεν πρέπει τι συγκρίνεν εκχέ τσσαβές εκχέ γιαβερέσαρ ούτε πρέπει τι μανγκέν εκχέ τσσαβέσταρ τι κερέλ πιο μπουτ οντουλένταρ σο μπορίνελα τι κερέλ. Άμα κα κερέν-λες ανταβά, κα χολιασκιαρέν πουμαρέ τσσαβές. (Διαβάνεν Εφεσίους 6:4) Εκ πφεν, η Σάτσικο,b βακερέλα: «Μο καθηγητές μπεκλεντίνενας τι αβάβ πιο λατσσί μι συμμαθητένταρ. Ντα μι ντάι μανγκέλας τι τζαβ-λεν λατσσές κο σχολείος για τι νταβ λατσσί μαρτυρία μι καθηγητέντε ντα μι νταντέστε, σο νανέ Μάρτυρας ι Ιεχωβάσκο. Μανγκέλας ατζέ-ντα μα τι κεράβ καέκ λάθος κο διαγωνίσματα σο γραφίναβας κο σχολείος, αλλά ανταβά να αβέλας-πες. Παρόλο σο νακχλέ μπουτ μπρεσά από αζομάν, μπάζιμα νιωθίναβα ότι να κεράβα ι Ιεχωβάσκο γκι ατζέ-ντα άμα κεράβα ο πιο λατσσό σο μπορίναβα».

6. Σο σικλιόνα ο νταντά ντα ο νταγιά κατά εδάφια Ψαλμός 131:1, 2;

⁶ Ο νταντά ντα ο νταγιά μπορίνενα τι σικλιόν κάτι σημαντικός κατά εδάφια Ψαλμός 131:1, 2. (Διαβάνεν) Ο βασιλιάς Δαβίδ βακερντάς ότι “να μανγκέλας μπουτ μπαρέ πράγματα πι νεαυτόσκε” ή πράγματα σο να ισινέ λέσκε βαστέστε τι κερέλ-λεν. Επειδή ισινέ ταπεινός, ανταβά “λοκχιαρέλας-λες ντα ηρεμίνελας-λες”. Σο σικλιόνα ο νταντά ντα ο νταγιά κατά λάφια σο βακερντάς ο Δαβίδ; Για τι αβέν ταπεινοί ο νταντά ντα ο νταγιά, δεν πρέπει τι μπεκλεντίνεν μπουτ πράγματα ούτε πουμένταρ ούτε πουμαρέ τσσαβένταρ. Μπορίνενα τι βοηθίνεν πουμαρέ τσσαβέν τι νιωθίνεν σημαντικοί κάνα αγαβένα καλά πράγματα μπορίνενα τι κερέν λατσσές ντα καλά πράγματα ναστί κερένα λατσσές, ντα σοράν κάνα βοηθίνενα-λεν τι τσσουβέν στόχους σο μπορίνενα τι κερέν-λεν. Εκ πφεν, σο βακερένα λάκε Μαρίνα, ντέλα-πες γκοντί: «Μι ντάι ποτές να συγκρίνελας-μαν μι τρινέ πφραλέντζαρ ή γιαβερέ χουρντέντζαρ. Σικλιαρντάς-μαν ότι ο κάθε τζενό τθερέλα διαφορετικές ικανότητες ντα ότι ο κάθε εκ αμένταρ ισί σημαντικός ι Ιεχωβάσκε. Επειδή κερντάς-λες ανταβά μι ντάι, χάνικ φαρ συγκρίναβα-μαν ι γιαβερέντζαρ».

7, 8. Σαρ μπορίνελα εκ μουρς τι σεβάνελ πι ρομνιά;

⁷ Εκ Χριστιανός μουρς πρέπει τι σεβάνελ πι ρομνιά. (1 Πέτρ. 3:7) Σεβάνασα ι γιαβερέν κάνα σικαβάσα λένγκε μπαρί προσοχή. Για παράδειγμας, ο μουρς σεβάνελα πι ρομνιά κάνα σικαβέλα λάκε ότι ισί σημαντική. Να μανγκέλα λάταρ τι κερέλ πιο μπουτ πράγματα οντουλένταρ σο μπορίνελα τι κερέλ. Ντα σίγουρα να συγκρίνελα-λα γιαβερέ τζουβλίντζαρ. Σαρ κα νιωθίνελας εκ τζουβέλ άμα λάκο ρομ κα κερέλας-λες ανταβά; Εκ πφεν σο βακερένα λάκε Ρόζα ισί παντριμέ εκχέ ρομέσαρ σο νανέ Μάρτυρας ντα μπουτ φαρ συγκρίνελα-λα γιαβερέ τζουβλίντζαρ. Λέσκε μπέτι λάφια κερντέ ι Ροζά, όχι σάντε τι νιωθίνελ μπέτι πι νεαυτόσκε, αλλά μα τι πακιάλ-ντα ότι μανγκέλα-λα κάποιος μπαγιά. Βόι βακερέλα: «Πρέπει τι ανάβ συνέχεια μι γκοντιάτε ότι ισινόμ σημαντική ι Ιεχωβάσκε». Όμως, εκ Χριστιανός μουρς σεβάνελα πι ρομνιά. Τζανέλα ότι ανταβά κα κερέλ λατσσιπέ εμ κι σχέση σο τθερέλα λάσαρ εμ κι σχέση σο τθερέλα ι Ιεχωβάσαρ.c

⁸ Ο ρομ σο σεβάνελα πι ρομνιά βακερέλα λατσσέ λάφια λάκε κο γιαβερά, ισαρέλα-λα ντα πι λαφίντζαρ σικαβέλα λάκε καζόμ μπουτ μανγκέλα-λα. (Παρ. 31:​28) Ο ρομ ι Κατερινάκο, σο κερντάμ λάκε λάφι κο γιαβέρ μάθημας, βοηθιντάς-λα μα τι σκεφτίνελ ότι νανέ σημαντική. Κάνα η Κατερίνα ισινέ χουρντί, λάκι ντάι κερέλας-λα τι νιωθίνελ ότι να ισινέ σημαντική ντα συγκρίνελας-λα λάκε αμαλινέντζαρ ή γιαβερέ τσσαΐντζαρ. Οτθάρ, η Κατερίνα αρχισάλι τι συγκρίνελ-πες ι γιαβερέντζαρ ντα συνεχίνελας τι κερέλ-λες ανταβά ατζέ-ντα κάνα σικλιλί ι αλήθεια! Αλλά λάκο ρομ, σο ισί Χριστιανός, βοηθιντάς-λα τι τσσιναβέλ τι κερέλ-λες ανταβά ντα μα τι σκεφτίνελ αντικάς πι νεαυτόσκε. Βόι βακερέλα: «Μανγκέλα-μαν, ισαρέλα-μαν ι λατσσέ πραγματένγκε σο κεράβα ντα προσευχίντιβελα μάνγκε. Επίσης, ανέλα μι γκοντιάτε ο λατσσέ ιδιότητες ι Ιεχωβάσκε ντα βοηθίνελα-μαν μα τι σκεφτίναβ μπέτι μι νεαυτόσκε».

ΣΟ ΜΠΟΡΙΝΕΝΑ ΤΙ ΚΕΡΕΝ Ο ΠΡΕΣΒΥΤΕΡΟΙ ΣΟ ΜΑΝΓΚΕΝΑ-ΑΜΕΝ ΜΠΟΥΤ ΝΤΑ ΓΙΑΒΕΡΑ

9, 10. Σαρ βοηθιντέ ο πρεσβύτεροι εκχέ πφενιά τι τσσιναβέλ τι συγκρίνελ-πες ι γιαβερέντζαρ;

⁹ Σαρ μπορίνενα τι βοηθίνεν ο πρεσβύτεροι οντουλέν σο συγκρίνενα-πες ι γιαβερέντζαρ; Σκεφτίνεν σο νακχλάς η πφεν Χάνουνι, σο κάνα ισινέ χουρντί χάνικ φαρ ασουνέλας εκ λατσσό λάφι. Βόι βακερέλα: «Ισινόμας λατζανί ντα πακιάβας ότι ο γιαβερά ισινέ πιο λατσσέ μάνταρ. Χουρντιαρέλα συγκρίναβας-μαν ι γιαβερέντζαρ». Η Χάνουνι συνεχίνελας τι συγκρίνελ-πες ι γιαβερέντζαρ ατζέ-ντα κάνα σικλιλί ι αλήθεια. Οτθάρ, νιωθίνελας ότι να ισινέ σημαντική αντρέ κι κχανγκιρί. Ακανά όμως ισί εκ ευτυχισμέ σκαπάνισσα. Σο βοηθιντάς-λα τι αλλάνελ ο τρόπος σο σκεφτίνελας;

¹⁰ Η Χάνουνι βακερέλα ότι βοηθιντέ-λα ο πρεσβύτεροι. Βακερένας λάκε ότι ισινέ σημαντική αντρέ κι κχανγκιρί ντα ισαρένας-λα σο ισινέ εκ λατσσό παράδειγμας. Βόι βακερέλα: «Μπάζιμα, ο πρεσβύτεροι βακερένας μάνγκε τι νταβ ζορ μερικέ πφενίν σο χρειαζίντιβενας βοήθεια. Ανταβά κερντάς-μαν τι νιωθίναβ ότι ισινόμ σημαντική. Ντάβα-μαν γκοντί σο εκ φαρ ο πρεσβύτεροι βακερντέ μάνγκε ευχαριστώ σο ντινόμας ζορ μερικέ τερνέ πφενίν. Σοράν, διαβαντέ μάνγκε ο εδάφια 1 Θεσσαλονικείς 1:2, 3. Ανταβά ντινάς-μαν μπαρί χαρά! Επειδή κερντέ-λες ανταβά ο πρεσβύτεροι, ακανά τζανάβα ότι ισινόμ σημαντική αντρέ κι κχανγκιρί».

11. Σαρ μπορίνασα τι βοηθίνας οντουλέν «σο τθερένα πφανγκό γκι ντα ισί ταπεινοί» σαρ βακερέλα ο εδάφιος Ησαΐας 57:15;

¹¹ Διαβάνεν Ησαΐας 57:​15. Ο Ιεχωβά πφαμπόλα μπουτ οντουλένγκε «σο τθερένα πφανγκό γκι ντα ισί ταπεινοί». Σαρέ μπορίνασα τι ντας ζορ ανταλέ πφραλέν ντα πφενίν σο μανγκάσα-λεν μπουτ, όχι σάντε ο πρεσβύτεροι. Εκ τρόπος για τι κεράς-λες ανταβά ισί τι σικαβάς ότι πφαμπάσα λένγκε. Ο Ιεχωβά μανγκέλα αμένταρ τι σικαβάς λένγκε καζόμ μπουτ μανγκέλα-λεν βοβ. (Παρ. 19:​17) Μπορίνασα επίσης τι βοηθίνας ι πφραλέν ντα ι πφενίν κάνα ισινάμ ταπεινοί ντα να ισαράσα-αμέν για το ικανότητες σο τθεράσα. Δεν πρέπει τι ταρτίνας ι προσοχή οπρ’ αμέντε σόσκε να μανγκάσα τι κεράς ι γιαβερέν τι ζηλίνεν-αμέν. Οκιά μπάνταρ, χρησιμοποιήνασα αμαρέ ικανότητες ντα οντουλά σο τζανάσα για τι ντας ζορ αμαρέ πφραλέν.​—1 Πέτρ. 4:​10, 11.

12. Σόσκε ο ταπεινά τζενέ μπεϊντίνενας τι αβέν ι Ιησούσαρ; (Ντικχέν ι φωτογραφία κι ανγκλαϊνί σελίδα)

¹² Σικλιάσα σαρ τι συμπεριφερίντιβας κο γιαβερά άμα κα σκεφτίνας σαρ συμπεριφερίντιβελας ο Ιησούς οντουλέντε σο τζάνας παλά-λέστε. Βοβ ισινέ ο πιο σημαντικός τζενό σο τζουβντιλό ποτές. Όμως, τθερέλας «κοβλό ντα ταπεινός γκι». (Ματθ. 11:​28-30) Να προσπαθίνελας τι σικαβέλ ότι ισινέ έξυπνος ντα ότι τζανέλας μπουτ πράγματα. Κάνα σικλιαρέλας ι τζενέν, κερέλας λάφι απλά ντα βακερέλας παραδείγματα σο ισινέ εύκολος τι αγαβέν-λεν ο ταπεινά τζενέ ντα τι ερεσέν λένγκε γκίστε. (Λουκ. 10:​21) Ο Ιησούς να ισινέ σαρ ο μπαρικανέ αρχηγοί ι θρησκειάκε. Πάντα κερέλας ι γιαβερέν τι νιωθίνεν ότι ισί σημαντικοί ι Ντεβλέσκε. (Ιωάν. 6:​37) Σεβάνελας ι απλέ τζενέν.

13. Σαρ ντικχίντιβελας ο λατσσιπέ ντα η αγάπη ι Ιησούσκε οντουλένταρ σο κερέλας πι μαθητένγκε;

¹³ Ο λατσσιπέ ντα η αγάπη ι Ιησούσκε ντικχίντιβενας οντουλένταρ σο κερέλας πι μαθητένγκε. Τζανέλας ότι η ζωή ντα ο ικανότητες ι κάθε εκχέσκε ισινέ διαφορετικές. Οτθάρ, ναστί κερένας σαρέ ο ίδια πράγματα ή ναστί κερένας σαρέ μπουτ έργος. Όμως, ο Ιησούς εκτιμίνελας σο ο κάθε εκ λένταρ κερέλας ο πιο λατσσό σο μπορίνελας. Αγαβάσα ότι ο Ιησούς νιωθίνελας αντικάς κατά ιστορία για το τάλαντα. Οντουλέ ιστοριάτε, ο κύριος ντινάς κο κάθε δούλος εκ μπουτί σο μπορίνελας τι κερέλ. Ο εκ κατά ντούι μπουτιαρνέ δούλους νικαντάς πιο μπουτ κιάρι κατά γιαβέρ. Αλλά ο κύριος ισαρντάς ι ντουέν-ντα ακαλέ λαφίντζαρ: «Μπουτ λατσσές κερντάν, ισινάν λατσσό ντα πιστός δούλος!»​—Ματθ. 25:​14-23.

14. Σαρ μπορίνασα τι μοιάζας κο Ιησούς;

¹⁴ Ο Ιησούς σικαβέλα αμένγκε λατσσιπέ ντα αγάπη. Τζανέλα ότι η ζωή ντα ο ικανότητες σο τθερέλα ο κάθε εκ αμένταρ ισί διαφορετικές, ντα χαιρίνελα κάνα κεράσα ο πιο λατσσό σο μπορίνασα αμέν. Πρέπει τι μοιάζας κο Ιησούς. Δεν πρέπει ποτές τι κεράς αμαρέ πφραλέν τι νιωθίνεν άχρηστοι ή τι λατζάν επειδή ναστί κερένα οντουλά σο κερένα ο γιαβερά. Οκιά μπάνταρ, πρέπει τι ισαράς αμαρέ πφραλέν ντα πφενίν σο υπηρετίνενα ι Ιεχωβάς καζόμ πιο λατσσές μπορίνενα.

ΤΙ ΤΣΣΟΥΒΕΝ ΣΤΟΧΟΥΣ ΣΟ ΜΠΟΡΙΝΕΝΑ ΤΙ ΚΕΡΕΝ-ΛΕΝ

15, 16. Σαρ βοηθίντιλι εκ πφεν κάνα τσσουντάς στόχους σο μπορίνελας τι κερέλ-λεν;

¹⁵ Κάνα τθεράσα στόχους κι υπηρεσία κι Ιεχωβάσκι, αμαρί ζωή ισί σουκάρ ντα πφερντί. Αλλά πρέπει τι τσσουβάς στόχους σο μπορίνασα τι κεράς-λεν. Να τσσουβάσα ο ίδιους στόχους σο τσσουβένα ο γιαβερά πουμένγκε. Άμα κα κεράς-λες ανταβά, κα πφανγκιόλ αμαρό γκι ντα κα χασαράς αμαρί ζορ. (Λουκ. 14:​28) Ντικχέν ο παράδειγμας εκχέ πφενιάκο σο ισί σκαπάνισσα ντα βακερένα λάκε Μίντορι.

¹⁶ Κάνα η Μίντορι ισινέ χουρντί, λάκο ντατ, σο νανέ Μάρτυρας, βακερέλας λάκε ότι λάκε πφραλά ντα λάκε συμμαθητές ισινέ πιο λατσσέ λάταρ. «Νιωθίναβας άχρηστη», βακερέλα η Μίντορι. Αλλά κάνα μπαριλί, αρχισάλι τι νιωθίνελ πιο λατσσές πι νεαυτόσκε. Βόι βακερέλα: «Διαβάναβας ι Γραφή κάθε ντιβές επειδή ανταβά βοηθίνελας-μαν τι νιωθίναβ ότι ο Ιεχωβά μανγκέλα-μαν». Επίσης, τσσουβέλας στόχους σο μπορίνελας τι κερέλ-λεν ντα σοράν προσευχίντιβελας κο Ιεχωβά τι βοηθίνελ-λα τι κερέλ οντουλά στόχους. Ανταβά βοηθιντάς-λα τι αβέλ χαρούμενη οντουλένγκε σο μπορισάλι τι κερέλ ι Ιεχωβάσκε.

ΤΙ ΚΕΡΕΝ ΠΑΝΤΑ Ο ΠΙΟ ΛΑΤΣΣΟ ΣΟ ΜΠΟΡΙΝΕΝΑ ΤΟΥΜΕΝ Ι ΙΕΧΩΒΑΣΚΕ

17. Σο κα βοηθίνελ-αμέν τι αλλάνας αμαρό τρόπος σκέψης, ντα καλά κα αβέν ο αποτελέσματα;

¹⁷ Ναστί αλλάνασα ο τρόπος σο σκεφτίνασα αμαρέ νεαυτόσκε αντρέ εκχέ ντιβεσέστε. Οτθάρ, ο Ιεχωβά βακερέλα αμένγκε: «Πρέπει τι συνεχίνεν τι αλλάνεν ντα τι τθερέν εκ νεβό τρόπος σκέψης». (Εφεσ. 4:​23, 24) Για τι κεράς-λες ανταβά, πρέπει τι προσευχίντιβας, τι σικλιαράς-αμέν κατά Λάφι ι Ντεβλέσκο ντα τι σκεφτίνας-λες λατσσές. Μα τσσιναβέν τι κερέν ανταλά πράγματα, ντα τι μανγκέν κατά Ιεχωβά τι ντελ-τουμέν ζορ. Ο άγιος πνεύμας κα βοηθίνελ-τουμέν τι σικλιόν μα τι συγκρίνεν-τουμέν ι γιαβερέντζαρ. Επίσης, ο Ιεχωβά κα βοηθίνελ-τουμέν τι αγαβέν άμα ζηλίνενα ή άμα ισινέν μπαρικανέ, ντα κα βοηθίνελ-τουμέν τι αλλάνεν σουγκό.

18. Σαρ ντένα-τουμέν ζορ ο εδάφια 2 Χρονικών 6:​29, 30;

¹⁸ Διαβάνεν 2 Χρονικών 6:​29, 30. Ο Ιεχωβά τζανέλα σο τθεράσα αντρέ αμαρέ γκίστε. Επίσης, τζανέλα ότι μαράσα-αμέν τι τζας κόντρα ανταλέ ντουνιάσαρ ντα αμαρέ νεαυτόσαρ σο ισί ατελείς. Κάνα ντικχέλα καζόμ μπουτ μαράσα-αμέν μα τι κεράς ανταλά πράγματα, λέσκι αγάπη αμένγκε μπαριόλα.

19. Καβά παράδειγμας βακερντάς ο Ιεχωβά για τι σικαβέλ σαρ νιωθίνελα αμένγκε;

¹⁹ Για τι ντελ-αμέν τι αγαβάς σαρ νιωθίνελα αμένγκε, ο Ιεχωβά βακερέλα αμένγκε σαρ νιωθίνελα εκ ντάι πι τσσαβέσκε. (Ησ. 49:​15) Ντικχέν ο παράδειγμας εκχέ νταγιάκο σο βακερένα λάκε Ρέιτσελ. Βόι βακερέλα: «Μι τσσάι η Στέφανι να μπιάντιλι πι μασικέστε. Κάνα ντικχλόμ-λα πρώτη φαρ, ισινέ πιο χουρντί σαρέ κατά γιαβερά μαξίμια. Αλλά ο πρώτος μάσεκ σο ισινέ αντρέ κι θερμοκοιτίδα, ο γιατροί μουκχλέ-μαν τι τζαβ κάθε ντιβές ντα τι λαβ-λα αγκάλι. Ανταβά βοηθιντάς-αμέν τι αβάς πασέ ο εκ ι γιαβεράσαρ. Η Στέφανι ακανά ισί σιοβέ μπρεσένγκι ντα ντικχίντιβελα πιο χουρντί κατά γιαβερά χουρντέ σο ισί λάκε ηλικιάτε. Μανγκάβα-λα ατζέ πιο μπουτ σόσκε μαρντάς-πες μπουτ για τι ατσσόλ κι ζωή, ντα αντάς μπαρί χαρά μι ζωγιάτε!» Ισινάμ μπουτ χαρούμενοι σο τζανάσα ότι μπαριόλα ι Ιεχωβάσκι αγάπη κάνα ντικχέλα-αμέν τι μαράς-αμέν για τι κεράς ο πιο λατσσό σο μπορίνασα λέσκε!

20. Σόσκε μπορίνενα ο υπηρέτες ι Ιεχωβάσκε τι χαιρίνεν;

²⁰ Επειδή υπηρετίνενα ι Ιεχωβάς, ισινέν σημαντικοί ι Ιεχωβάσκε φαμιλιάκε ντα ισινέν ξεχωριστοί σαρέ κατά γιαβερά. Ο Ιεχωβά να ταρτιντάς-τουμέν πασέ πέστε επειδή ισινένας πιο λατσσέ κατά γιαβερά τζενέ. Ταρτιντάς-τουμέν πασέ πέστε επειδή ισινέν ταπεινοί ντα μανγκένα τι σικλιόν λέσταρ ντα τι αλλάνεν. (Ψαλμ. 25:9) Τι αβέν σίγουροι ότι, κάνα κερένα ο πιο λατσσό σο μπορίνενα για τι υπηρετίνεν-λες, βοβ εκτιμίνελα-λες ανταβά. Τουμαρί υπομονή ντα τουμαρί πίστη σικαβένα ότι ισινέν “λατσσέ γκίσκε”. (Λουκ. 8:​15) Οτθάρ, μα τσσιναβέν τι κερέν ο πιο λατσσό σο μπορίνενα τουμέν. Αζομάν “κα τθερέν λόγος τι χαιρίνεν σάντε οντουλέσκε σο κερένα τουμέν”.