Τθερένα ντικχλό κο φωτογραφίες ανταλέ βιβλιαριόστε καμπόρ λατσσές ισί ιριαντέ ο Μάρτυρες του Ιεχωβά κο συναθροίσεις σο κερένα; Σόσκε προσοχίνασα αζόμ μπουτ σαρ ιριαβάσα-αμέν ντα σαρ λατσσαράσα-αμέν, δηλαδή σαρ ζουζίνασα-αμέν;

Για τι σικαβάς σεβασμός αμαρέ Ντεβλέσκε. Ισί μπαγιά ότι ο Ντεβέλ να ντικχέλα-αμέν σαρ ισινάμ αβριάλ. (1 Σαμουήλ 16:7) Αλλά, όταν τζάσα για τι ασουνάς λέσκε, μανγκάσα τι σικαβάς αντράλ αμαρέ γκίσταρ σεβασμός εμ λέσκε εμ αμαρέ πφραλένγκε. Για παράδειγμας, αν έπρεπε τι τζας σε εκ δικαστήριος, για τι σικαβάς σεβασμός κο δικαστής σίγουρα κα προσοχίναας σαρ κα ιριαβάας-αμέν ντα σαρ κα λατσσαράας-αμέν. Αντικάς αμέν-ντα, ιριαβάσα-αμέν ντα λατσσαράσα-αμέν κο συναθροίσεις για τι σικαβάς σεβασμός κο “Κριτής κι πφουβιάκο”, κο Ιεχωβά Ντεβέλ, ντα ι συναθροισιένγκε σο τζάσα για τι ασουνάς λέσκε.​—Γένεση 18:25.

Για τι σικαβάς ότι κεράσα αμαρέ ζωγιάτε οντουλά σο σικλιάσα. Η Αγία Γραφή βακερέλα κο Χριστιανοί τι ιριαβέν-πες «με σεμνότητα ντα σωφροσύνη». (1 Τιμόθεο 2:9, 10) Τι ιριαβάς-αμέν «με σεμνότητα» μανγκέλα τι βακερέλ μα τι ιριάς σέα σο κα ταρτίνεν ι προσοχή οπρ’ αμέντε επειδή ισί μπουτ στενά ή επειδή σικάντιβενα πράγματα αμαρέ σωμάσταρ σο δεν πρέπει. Επίσης, η «σωφροσύνη» βοηθίνελα-αμέν τι τραμπίνας λατσσέ σέα, περιποιημέ ντα όχι σέα σο νακχένα ο όρια. Ανταλά εντολές, όμως, να τσσιναβένα-αμέν τι αποφασίνας τι ιριάς οντουλά σέα σο μανγκάσα. Χωρίς αμέν τι βακεράς ούτε εκ λάφι, κάνα ιριαβάσα-αμέν λατσσές ντα σουκάρ, ανταβά μπορίνελα “τι κερέλ ατζέ πιο σουκάρ ο λάφια ι Ντεβλέσκε” ντα “τι ντελ δόξα κο Ντεβέλ”. (Τίτο 2:​10· 1 Πέτρου 2:​12) Οτθάρ, κάνα ιριαβάσα-αμέν λατσσές κο συναθροίσεις, ο γιαβερά τζενέ ντικχένα-αμέν ντα μανγκένα τι ντεν βον-ντα δόξα κο Ιεχωβά.

Μα λατζάν τι αβέν κι Αίθουσα Βασιλείας επειδή να τθερένα μπουτ λατσσέ σέα. Νανέ ανάγκη ούτε πααλίς τι αβέν ο σέα ούτε επίσημα. Οντουβά σο τθερέλα σημασία ισί τι αβέν πάκι ντα περιποιημέ.

• Καζόμ σημασία τθερένα αμαρέ σέα όταν τζάσα τι ασουνάς ι Ντεβλέσκε;

• Καλά εντολές σικαβένα αμένγκε σαρ πρέπει τι ιριαβάς-αμέν ντα τι λατσσαράς-αμέν;

Άμα κερένα μελέτη με εκ Μάρτυρας του Ιεχωβά, σίγουρα προσπαθίνενα τι ντικχέν πιο τζανγκλέ οντουλά σο κα διαβάνεν κι μελέτη. Λατσσό ισί τι κερέν-λες ανταβά προτού τι τζαν κι συνάθροιση για τι βοηθίντιβεν ατζέκ πιο μπουτ. Κα τθεράς ο πιο λατσσέ αποτελέσματα όταν κα τσσουβάς εκ λατσσό πρόγραμμας ντα κα κεράς-λες.

Ντικχέν κάνα ντα κάι μανγκένα τι διαβάνεν. Κάνα μπορίνενα τι αγαβέν πιο λατσσές οντουλά σο διαβάνενα; Πρωί πριν τι τζαν κι μπουτί ή ιράτ, όταν σοβένα ο τσσαβέ; Ατζέ-ντα άμα να μπορίνενα τι διαβάνεν μπουτ σαάτι, ντικχέν καμπόρ μπορίνενα τι διαβάνεν ντα μα μουκχέν τίποτα τι τσσιναβέλ-τουμέν. Αρακχέν εκ ήσυχος τθαν ντα πφάντεν ο γκιλιά, ι τηλεόραση ντα τουμαρό κινητός. Η προσευχή πριν τι διαβάνεν κα βοηθίνελ-τουμέν τι μπιστρέν ο προβλήματα σο τθερένα κάθε ντιβές για τι μπορίνεν τι αγαβέν οντουλά σο κα διαβάνεν κατά Αγία Γραφή.​—Φιλιππησίους 4:6, 7.

Ντικχέν οντουλά σο κα διαβάνεν πριν τι τζαν κι συνάθροιση για τι μπορίνεν τι ντεν απαντήσεις. Πρώτα προσπαθίνεν τι αγαβέν σο μανγκέλα τι βακερέλ σαρό ο μάθημας σο πρέπει τι διαβάνεν. Σκεφτίνεν ο θέμας σο τθερέλα, σαρ ταιριάνενα λέσαρ ο υπότιτλοι ντα ντικχέν ο φωτογραφίες ντα ο ερωτήσεις κο τέλος σο σικαβένα ο πιο σημαντικά σημεία σο ισινέ κο μάθημας. Σοράν, διαβάνεν ι κάθε εκ παράγραφος ντα ρόντεν ι απάντηση κι ερώτηση σο τθερέλα οτθέ. Αρακχέν ντα διαβάνεν ο εδάφια κατά Αγία Γραφή ντα σκεφτίνεν σαρ ταιριάνενα οντουλέντζαρ σο διαβάνενα. (Πράξεις 17:​11) Όταν κο τέλος κα αρακχέν ι απάντηση, για μα τι μπιστρέν-λα, σημειώνεν ο πιο σημαντικά λάφια σο τθερέλα. Αντικάς, κα μπορίνεν, αν μανγκένα, τι βάντεν τουμαρό βας για τι ντεν εκ απάντηση κι συνάθροιση.

Όταν διαβάνενα πιο τζανγκλέ ο διάφορα θέματα σο βακερένα κο συναθροίσεις κάθε εβδομάδα, κα σικλιόν ατζέκ πιο μπουτ πράγματα κατά Αγία Γραφή σο τθερένα μπουτ μπαρί αξία.​—Ματθαίος 13:​51, 52.

• Σο πρόγραμμας μπορίνενα τι τσσουβέν για τι διαβάνεν οντουλά σο κα βακέρντιβεν κι συνάθροιση;

• Σαρ μπορίνενα τι διαβάνεν πιο τζανγκλέ για τι ντεν εκ απάντηση κι συνάθροιση;

Κατά πουρανέ μπρεσά ο Ιεχωβά μανγκέλας ι φαμιλί τι αβέλ μαζί για τι τθερέλ εκ πιο ζουρανί φιλία λέσαρ ντα τι αβέλ ατζέκ πιο αγαπημέ. (Δευτερονόμιο 6:6, 7) Ανταλέσκε, ο Μάρτυρες του Ιεχωβά σαρ φαμιλιά αρακχένα χρόνος κάθε εβδομάδα για τι σικαβέν κο Ντεβέλ ότι πακιάνα-λες ντα για τι σικλιόν λέσκε. Οτθέ μπεϊντίνενα τι γκιντίντιβεν ντα τι κερέν λάφι ι Ντεβλέσκε σόσκε ασουνένα πράγματα σο απασχολίνενα-λεν. Ατζέ-ντα άμα μπεσένα κορκορέ, αξίνελα τι τσσουβέν εκ πρόγραμμας για τι διαβάνεν ι Ντεβλέσκε ντα τι σκεφτίνεν οντουλά σο βακερέλα η Αγία Γραφή.

Ισί εκ ευκαιρία τι πλησιάνας πιο μπουτ ι Ιεχωβάς. «Πλησιάνεν ι Ντεβλές, ντα βοβ κα πλησιάνελ-τουμέν». (Ιακώβου 4:8) Αντράλ κατά Αγία Γραφή αγαβάσα πιο λατσσές ι Ιεχωβάς σόσκε σικλιάσα πράγματα λέσκε ντα οντουλένγκε σο κερέλα. Εκ απλός τρόπος για τι σικλιόν ι Ντεβλέσκε ισί τι διαβάνελ σαρί η φαμιλί ι Αγία Γραφή. Άμα μανγκένα, μπορίνενα τι ντικχέν ο κεφάλαια για τη Συνάθροιση Ζωή ντα Έργος. Σαρέ κι φαμιλί μπορίνενα τι διαβάνεν-λεν ντα σοράν τι κερέν λάφι οντουλένγκε σο σικλιλέν κατά Αγία Γραφή.

Ισί εκ ευκαιρία τι αβάς πιο πασέ ο εκ ι γιαβερέσαρ κι φαμιλί. Κι φαμιλί, εμ ο αντρόγυνος αλλά εμ ο ντατ ντα η ντάι πουμαρέ τσσαβέντζαρ, αβένα πιο πασέ ο εκ κο γιαβέρ όταν διαβάνενα γιεκ ι Αγία Γραφή. Οντουλέσκε, σαρέ πρέπει τι μπεϊντίνεν ντα τι κερέν ησυχία όταν αβέλα-πες η φαμιλιάκι λατρεία ντα τι μπεκλεντίνεν οντουλέ σαατίσκε. Ο ντατ ντα η ντάι κερένα λάφι πουμαρέ τσσαβέντζαρ για τι βοηθίνεν-λεν, ντα μπορίνενα τι διαβάνεν λένγκε κατά περιοδικά Σκοπιά ντα Ξύπνα! ή κατά ιστότοπος αμαρέσταρ, jw.org. Κα μπορίνενας τι κερέν λάφι για εκ πρόβλημας σο τθερένας τουμαρέ τσσαβέ κο σχολείος ντα τι ρόντεν τι αρακχέν σαρ τι βοηθίνεν-λεν. Κάτι γιαβέρ σο μπορεί τι μπεϊντίνεν ισί τι γκιλιαβέν μαζί ο ύμνοι σο κα κερέν κο συναθροίσεις. Σόσκε μα τι ντικχέν ο πρόγραμμας σο σικάντιβελα κο JW Broadcasting (tv.jw.org) ντα τι συζητίνεν-λες σοράν; Αφού κα τελειώνεν ι φαμιλιάκι λατρεία, σοράν κα μπορίνενας τι χαν ή τι πιν κάτι.

Οντουβά συγκεκριμέ σαάτι σο κα διαβάνεν κάθε εβδομάδα για τι σικαβέν κο Ιεχωβά ότι πακιάνα-λες, κα βοηθίνελ σαρί τουμαρί φαμιλί τι μπεϊντίνελ τι διαβάνελ ι Αγία Γραφή, ντα ο Ντεβέλ κα ευλογίνελ μπουτ ο προσπάθειες σο κερένα.​—Ψαλμός 1:​1-3.

• Σόσκε αρακχάσα χρόνος για τι κεράς ι φαμιλιάκι λατρεία;

• Σαρ μπορίνενα, ο ντατ ντα η ντάι, τι κερέν ι φαμιλιάκι λατρεία πιο σουκάρ για τι μπεϊντίνελ-λα σαρί η φαμιλί;