Σαρ Μπορίνεσα τι Αβές ι Ντεβλέσκο Αμάλ;

1, 2. Κον ισινέ μερικά αμαλά ι Ιεχωβάσκε;

ΣΟ ΤΖΕΝΕΣ κα τραμπίνεας για τι αβέλ το αμάλ; Εκχέ τζενές σο συμπαθίνεσα. Εκχέ τζενές σο τθερέσα-λεν λατσσές λέσαρ. Εκχέ τζενές σο ισί λατσσέ γκίσκο ντα τθερέλα ιδιότητες σο μπεϊντίνεσα.

² Ο Ιεχωβά Ντεβέλ τραμπίνελα τζενέν για τι αβέν λέσκε αμαλά. Για παράδειγμας, ο Αβραάμ ισινέ αμάλ ι Ιεχωβάσκο. (Ησαΐας 41:8· Ιακώβου 2:​23) Επίσης, ο Ιεχωβά μανγκέλας τον Δαβίδ. Βακερντάς ότι ο Δαβίδ ισινέ “εκ μουρς αντικάς σαρ μανγκέλας λέσκο γκι”. (Πράξεις 13:​22) Ο προφήτης Δανιήλ-ντα ισινέ «εκ μπουτ λατσσό τζενό» κο γιακχά κι Ιεχωβάσκε.​—Δανιήλ 9:23.

3. Σόσκε ισινέ ο Αβραάμ, ο Δαβίδ ντα ο Δανιήλ αμαλά ι Ιεχωβάσκε;

³ Σαρ αβιλέ ο Αβραάμ, ο Δαβίδ ντα ο Δανιήλ αμαλά ι Ιεχωβάσκε; Ο Ιεχωβά βακερντάς κο Αβραάμ: «Ασουντάν μι φωνή». (Γένεση 22:​18) Ο Ιεχωβά αβέλα αμάλ οντουλέντζαρ σο ντένα-λες καν. Ατζέ-ντα εκ σαστό λαός, δηλαδή μπουτ τζενέ, κα μπορίνενας τι αβέν λέσκε αμαλά. Ο Ιεχωβά βακερντάς κο λαός Ισραήλ: «Ασουνέν μι φωνή ντα κα αβάβ τουμαρό Ντεβέλ, ντα τουμέν κα αβέν μο λαός». (Ιερεμίας 7:​23) Άρα, τούι-ντα πρέπει τι ντες καν ι Ιεχωβάς άμα μανγκέσα μπαγιά τι αβές λέσκο αμάλ.

Ο ΙΕΧΩΒΑ ΑΡΑΚΧΑΒΕΛΑ ΠΙ ΑΜΑΛΕΝ

4, 5. Σαρ αρακχαβέλα ο Ιεχωβά πι αμαλέν;

⁴ Η Αγία Γραφή βακερέλα ότι ο Ιεχωβά ρόντελα τρόπους «για τι βοηθίνελ πι ζοριάσαρ οντουλέν σο υπηρετίνενα-λες σαρέ πουμαρέ γκίσαρ». (2 Χρονικών 16:9) Κο εδάφιος Ψαλμός 32:8, ο Ιεχωβά ντέλα πο λάφι πι αμαλέντε: «Κα βοηθίναβ-τουτ τι αγαβές σαρ ισί ο πράγματα ντα κα σικλιαράβ-τουτ τι πφιρές κο ντρομ σο πρέπει τι τζας. Κα νταβ-τουτ συμβουλή ντα κα τθεράβ μι γιακχ οπρά-τούτε».

⁵ Εκ ζουρανό ντουσμάνι μανγκέλα τι τσσουβέλ αμένγκε εμπόδια για μα τι αβάς αμαλά ι Ντεβλέσκε. Αλλά ο Ιεχωβά μανγκέλα τι αρακχαβέλ-αμέν. (Διάβανε Ψαλμός 55:​22) Επειδή ισινάμ αμαλά ι Ιεχωβάσκε, υπηρετίνασα-λες σαρέ αμαρέ γκίσαρ. Ατσσάσα πιστοί λέστε ατζέ-ντα άμα τθεράσα προβλήματα. Ντα πακιάσα ο ίδιος πράγμας σο πακιάλας ο Δαβίδ-ντα ι Ιεχωβάσκε. Βοβ γραφιντάς: «Επειδή βοβ ισί κο δεξιά μάνταρ, να κα περάβ τελέ». (Ψαλμός 16:8· 63:8) Σαρ προσπαθίνελα ο Μπενγκ τι τσσουβέλ αμένγκε εμπόδια για μα τι αβάς αμαλά ι Ντεβλέσκε;

Ο ΜΠΕΝΓΚ ΚΑΤΗΓΟΡΙΝΕΛΑ Ι ΤΖΕΝΕΝ

6. Σο βακερντάς ο Μπενγκ ότι κερένα ο τζενέ;

⁶ Κο Κεφάλαιος 11 σικλιλάμ ότι ο Μπενγκ προσβαλιντάς ι Ιεχωβάς ντα κατηγοριντάς-λες ότι ισί ψεύτης ντα άδικος, επειδή να μουκχέλας τον Αδάμ ντα την Εύα τι αποφασίνεν κορκορέ σο ισινέ σωστός ντα σο ισινέ λάθος. Ο βιβλίος Ιώβ σο ισί κι Αγία Γραφή σικλιαρέλα-αμέν ότι ο Μπενγκ κατηγορίνελα επίσης ι τζενέν σο μανγκένα τι αβέν αμαλά ι Ντεβλέσκε. Ο Μπενγκ βακερέλα ότι βον υπηρετίνενα ι Ντεβλές επειδή μπορίνενα τι κερδίνεν πράγματα Λέσταρ ντα όχι επειδή μανγκένα-Λες. Ο Μπενγκ βακερέλα επίσης ότι μπορίνελα τι κερέλ ι κάθε τζενές τι τζαλ κόντρα κο Ντεβέλ. Ακανά κα ντικχάς σο μπορίνασα τι σικλιάς κατά Ιώβ ντα σαρ αρακχαντάς-λες ο Ιεχωβά.

7, 8. (α) Κον ισινέ ο Ιώβ; (β) Σο βακερντάς ο Μπενγκ για τον Ιώβ;

⁷ Κον ισινέ ο Ιώβ; Ισινέ εκ λατσσό τζενό σο τζουβντιόλας περίπου πριν από 3.600 μπρεσά. Ο Ιεχωβά βακερντάς ότι, λέσκε μπρεσέντε, να υπαρχίντιβελας καέκ τζενό σαρ λέστε οπράλ κι πφουβ. Ο Ιώβ τθερέλας μπαρί σέβαση ι Ντεβλέσκε ντα μισίνελας ο γκεραλιπέ. (Ιώβ 1:8) Βα, ο Ιώβ ισινέ αληθινός αμάλ ι Ιεχωβάσκο.

⁸ Ο Μπενγκ βακερντάς ότι ο Ιώβ υπηρετίνελας ι Ντεβλές επειδή τθερέλας συμφέρον. Ο Μπενγκ βακερντάς κο Ιεχωβά: «Να τσσουντάν τούι φράχτη ντονταλάι λέσταρ ντα ντονταλάι λέσκε κχερέσταρ ντα ντονταλάι σαρέ οντουλένταρ σο τθερέλα; Ευλογιντάν ι μπουτί σο κερένα λέσκε βαστά, ντα λέσκε ζώα αβιλέ μπουτ κι πφουβ. Αλλά τσσουβ ακανά το βας, παρακαλώ, ντα λε σαρέ οντουλά σο τθερέλα ντα κα ντικχές άμα να κα ντελ-τουτ αρμανιά ανγκλά-τούτε».​—Ιώβ 1:​10, 11.

9. Σο μουκχλάς ο Ιεχωβά ι Μπενγκές τι κερέλ;

⁹ Ο Μπενγκ κατηγοριντάς τον Ιώβ ότι υπηρετίνελας ι Ιεχωβάς σάντε επειδή μπορίνελας τι κερδίνελ πράγματα Λέσταρ. Ο Μπενγκ βακερντάς επίσης ότι κα μπορίνελας τι κερέλ τον Ιώβ μα τι υπηρετίνελ ι Ιεχωβάς. Ο Ιεχωβά τζανέλας ότι οντουβά σο βακερντάς ο Μπενγκ να ισινέ μπαγιά, αλλά μουκχλάς-λες τι δοκιμάνελ τον Ιώβ για τι σικάντιβελ άμα ισινέ αμάλ ι Ιεχωβάσκο επειδή μανγκέλας-Λες.

Ο ΜΠΕΝΓΚ ΑΝΕΛΑ ΠΡΟΒΛΗΜΑΤΑ ΚΟ ΙΩΒ

10. Σαρ αντάς ο Μπενγκ προβλήματα κο Ιώβ, ντα σο κερντάς ο Ιώβ;

¹⁰ Πρώτα, ο Μπενγκ λιντάς ή μουνταρντάς σαρέ ο ζώα σο τθερέλας ο Ιώβ. Σοράν, μουνταρντάς μπουτέν λέσκε υπηρετόνταρ. Ο Ιώβ χασαρντάς-λεν σαρέ. Επίσης, ο Μπενγκ αντάς εκ μπουτ ζουρανί μπαρμπάλ ντα μουνταρντάς λέσκε ντεσέ τσσαβέν. Αλλά ο Ιώβ ατσσιλό πιστός κο Ιεχωβά. «Σαρέ ανταλέντε, ο Ιώβ να αμαρτιντάς ούτε κατηγοριντάς ι Ντεβλές ότι κερντάς κάτι λάθος».​—Ιώβ 1:​12-19, 22.

11. (α) Σο γιαβέρ κερντάς ο Μπενγκ κο Ιώβ; (β) Σο βακερντάς ο Ιώβ;

¹¹ Ο Μπενγκ να τσσιναντάς τι προσπαθίνελ. Βακερντάς ι Ντεβλέσκε: «Ακούμπινε λέσκε κόκαλα ντα λέσκο σώμας, ντα κα ντικχές άμα να κα ντελ-τουτ αρμανιά ανγκλά-τούτε». Ο Μπενγκ αντάς κο Ιώβ εκ μπαρό νασφαλιπέ σο κερέλας-λες τι ντουκχάλ μπουτ. (Ιώβ 2:5, 7) Πάλι, ο Ιώβ ατσσιλό πιστός κο Ιεχωβά. Βακερντάς: «Μέχρι τι μεράβ κα συνεχίναβ τι ατσσάβ πιστός ντα τι τθεράβ ακεραιότητα!»​—Ιώβ 27:5.

12. Σαρ σικαντάς ο Ιώβ ότι ο Μπενγκ ισινέ ψεύτης;

¹² Ο Ιώβ να τζανέλας τίποτα ι κατηγοριένγκε σο βακερντάας ο Μπενγκ ντα σόσκε τθερέλας αζόμ προβλήματα. Αμντίνελας ότι ο Ιεχωβά φταίνελας λέσκε προβληματένγκε. (Ιώβ 6:4· 16:​11-14) Όμως, παρόλο σο πακιάλας-λες ανταβά, ο Ιώβ ατσσιλό πιστός κο Ιεχωβά. Οτθάρ, σικάντιλο ξεκάθαρα ότι ο Ιώβ να ντικχέλας πο συμφέρον. Ισινέ αμάλ ι Ντεβλέσκο σόσκε μανγκέλας-Λες. Οντουλά σο βακερντάας ο Μπενγκ ισινέ σαρέ ψέματα!

13. Καβά ισινέ ο αποτέλεσμας επειδή ο Ιώβ ατσσιλό πιστός;

¹³ Παρόλο σο ο Ιώβ να τζανέλας σο αβέλας-πες κο ουρανός, ισινέ πιστός κο Ντεβέλ ντα σικαντάς ότι ο Μπενγκ ισινέ μπουτ γκεραλό. Ο Ιεχωβά ευλογιντάς τον Ιώβ επειδή ισινέ λατσσό αμάλ.​—Ιώβ 42:​12-17.

ΣΑΡ ΚΑΤΗΓΟΡΙΝΕΛΑ-ΤΟΥΤ Ο ΜΠΕΝΓΚ

14, 15. Σαρ κατηγοριντάς ο Μπενγκ σαρέ ι μουρσέν ντα ι τζουβλίν;

¹⁴ Μπορίνεσα τι σικλιός σημαντικά πράγματα οντουλένταρ σο νακχλάς ο Ιώβ. Αντιβές, ο Μπενγκ κατηγορίνελα-αμέν ότι υπηρετίνασα ι Ιεχωβάς επειδή μπορίνασα τι κερδίνας πράγματα Λέσταρ. Κο εδάφιος Ιώβ 2:4, διαβάνασα σο βακερντάς ο Μπενγκ: «Σαρέ οντουλά σο τθερέλα ο τζενό κα ντελ-λεν πι ζωγιάκε». Άρα, ο Μπενγκ να κατηγοριντάς σάντε τον Ιώβ ότι ντικχέλας πο συμφέρον, αλλά κατηγοριντάς επίσης σαρέ ι μουρσέν ντα ι τζουβλίν. Μπουτ μπρεσά αφού μουλό ο Ιώβ, ο Μπενγκ συνεχίνελας τι προσβαλίνελ ι Ιεχωβάς ντα τι κατηγορίνελ λέσκε υπηρετόν. Για παράδειγμας, κο εδάφιος Παροιμίες 27:​11, διαβάνασα: «Τι αβές σοφός, μο τσσαβό, ντα τι κερές μο γκι τι χαιρίνελ, για τι τζανάβ σο τι βακεράβ οντουλέσκε σο πρασάλα-μαν [ή γιαβέρτουλους προσβαλίνελα-μαν]».

¹⁵ Μπορίνεσα τι τραμπίνες τι ασουνές ι Ιεχωβάς ντα τι αβές λατσσό αμάλ λέσαρ για τι σικαβές ότι ο Μπενγκ ισί ψεύτης. Ατζέ-ντα άμα χρειαζίντιβελα τι κερές μπαρέ αλλαγές τι ζωγιάτε για τι αβές αμάλ ι Ντεβλέσκο, ανταγιά ισί η πιο λατσσί απόφαση σο κα μπορίνεας τι λες! Ισί μπουτ σημαντική απόφαση. Ο Μπενγκ βακερέλα ότι τούι να κα ατσσός πιστός κο Ντεβέλ όταν κα τθερές προβλήματα. Προσπαθίνελα τι χουχαβέλ-αμέν για μα τι ατσσάς πιστοί κο Ντεβέλ. Σαρ κερέλα-λες ανταβά;

16. (α) Σο τρόπους χρησιμοποιήνελα ο Μπενγκ για τι κερέλ ι τζενέν μα τι υπηρετίνεν ι Ιεχωβάς; (β) Σαρ προσπαθίνελα ο Μπενγκ τι κερέλ-τουτ μα τι υπηρετίνες ι Ιεχωβάς;

¹⁶ Ο Μπενγκ χρησιμοποιήνελα μπουτ τρόπους για τι κερέλ-αμέν μα τι αβάς αμαλά ι Ντεβλέσκε. Ισί σαρ εκ «λιοντάρι σο ρόντελα τι χαλ εκχέ τζενές». (1 Πέτρου 5:8) Μα τι κερέλ τούκε εντύπωση όταν το αμαλά, το τζενέ ή ο γιαβερά κα προσπαθίνεν τι κερέν-τουτ μα τι διαβάνες ι Αγία Γραφή ντα μα τι κερές οντουβά σο ισί σωστός. Μπορεί τι νιωθίνες ότι τζάνα τούσαρ κόντρα.a (Ιωάννης 15:​19, 20) Επίσης, ο Μπενγκ κερέλα-πες ότι ισί εκ λατσσό άγγελος. Οτθάρ, μπορεί τι χουχαβέλ-αμέν για μα τι ντας καν ι Ιεχωβάς. (2 Κορινθίους 11:​14) Εκ γιαβέρ τρόπος σο χρησιμοποιήνελα ο Μπενγκ για τι κερέλ-αμέν μα τι υπηρετίνας ι Ιεχωβάς, ισί τι τσσουβέλ αμαρέ γκοντιάτε ότι να αξίνασα τι υπηρετίνας ι Ντεβλές.​—Παροιμίες 24:10.

ΤΙ ΝΤΕΣ ΚΑΝ ΚΙ ΙΕΧΩΒΑΣΚΕ ΕΝΤΟΛΕΣ

17. Σόσκε ντάσα καν ι Ιεχωβάς;

¹⁷ Όταν ντάσα καν ι Ιεχωβάς, σικαβάσα ότι ο Σατανάς ισί ψεύτης. Σο κα βοηθίνελ-αμέν τι ντας καν; Η Γραφή βακερέλα: «Πρέπει τι μανγκές ι Ιεχωβάς τι Ντεβλές σαρέ τι γκίσαρ ντα σαρέ τι ψυχιάσαρ ντα σαρέ τι ζοριάσαρ». (Δευτερονόμιο 6:5) Ντάσα καν ι Ιεχωβάς επειδή μανγκάσα-λες. Καζόμ κα μπαριόλ αμαρί αγάπη ι Ιεχωβάσκε, κα μανγκάς τι κεράς σαρέ οντουλά σο μανγκέλα αμένταρ. Ο απόστολος Ιωάννης γραφιντάς: «Αντικάς σικαβάσα αμαρί αγάπη κο Ντεβέλ: τι κεράς οντουλά σο βακερέλα αμένγκε· ντα οντουλά σο βακερέλα νανέ πφαρέ».​—1 Ιωάννη 5:3.

18, 19. (α) Καλά ισί μερικά πράγματα σο βακερέλα ο Ιεχωβά ότι ισί λάθος; (β) Σαρ τζανάσα ότι ο Ιεχωβά να μανγκέλα αμένταρ τι κεράς κάτι σο να μπορίνασα;

¹⁸ Αλλά καλά ισί μερικά πράγματα σο βακερέλα αμένγκε ο Ιεχωβά ότι ισί λάθος; Μερικά ανταλέ πραγματένταρ ισί κο πλαίσιος «Τι Μισίνες Οντουλά σο Μισίνελα ο Ιεχωβά». Κι αρχή, μπορεί τι σκεφτίνες ότι μερικά ανταλέ πραγματένταρ νανέ αζόμ γκεραλέ. Αλλά όταν κα διαβάνες ο εδάφια κατά Αγία Γραφή ντα κα σκεφτίνες-λεν λατσσές, κα αγαβές ότι ισί τι λατσσιμάσκε τι ντες καν κο νόμοι κι Ιεχωβάσκε. Επίσης, μπορεί τι αγαβές ότι πρέπει τι κερές μερικές αλλαγές τι ζωγιάτε. Ατζέ-ντα άμα ανταβά μπορεί τι αβέλ δύσκολος μπάζιμ, άμα κερντάν ανταλά αλλαγές, κα τθερές ι ειρήνη ντα ι ευτυχία σο τθερένα οντουλά σο ισί πιστά αμαλά ι Ντεβλέσκε. (Ησαΐας 48:​17, 18) Σαρ τζανάσα ότι μπορίνασα τι κεράς ανταλά αλλαγές;

¹⁹ Ο Ιεχωβά ποτές να μανγκέλα αμένταρ τι κεράς κάτι σο να μπορίνασα τι κεράς-λες. (Δευτερονόμιο 30:​11-14) Επειδή ισί αληθινός Αμάλ, τζανέλα-αμέν πιο λατσσές από ό,τι τζανάσα αμέν αμαρό νεαυτός. Τζανέλα σο πράγματα κεράσα λατσσές ντα σο αδυναμίες τθεράσα. (Ψαλμός 103:​14) Ο απόστολος Παύλος ντέλα-αμέν θάρρος ακαλέ λαφίντζαρ: «Ο Ντεβέλ ισί πιστός ντα να κα μουκχέλ-τουμέν τι δοκιμάντιβεν πιο μπουτ οντουλέσταρ σο μπορίνενα τι αντιχίνεν, αλλά μαζί με τη δοκιμασία κα σικαβέλ τουμένγκε ο τρόπος-ντα για τι μπορίνεν τι νταϊντίνεν-λα». (1 Κορινθίους 10:​13) Μπορίνασα τι αβάς σίγουροι ότι ο Ιεχωβά πάντα κα ντελ-αμέν ι ζορ για τι κεράς οντουβά σο ισί σωστός. Βοβ κα ντελ-τουτ ι “ζορ σο ισί πιο μπαρί τιρέ ζοριάταρ” για τι βοηθίνελ-τουτ τι αντιμετωπίνες ο δυσκολίες. (2 Κορινθίους 4:7) Ο Παύλος, αφού ντικχλάς σαρ βοηθιντάς-λες ο Ιεχωβά όταν τθερέλας δυσκολίες, μπορίνελας τι βακερέλ: «Σαρέ ι πραγματένγκε τθεράβα ι ζορ χάρη οντουλέσταρ σο ντέλα-μαν ζορ».​—Φιλιππησίους 4:13.

ΣΙΚΛΙΟ ΤΙ ΜΑΝΓΚΕΣ ΟΝΤΟΥΛΑ ΣΟ ΜΑΝΓΚΕΛΑ Ο ΝΤΕΒΕΛ

20. Καλά ιδιότητες πρέπει τι προσπαθίνες τι τθερές, ντα σόσκε;

²⁰ Άμα μανγκάσα τι αβάς αμαλά ι Ιεχωβάσκε, πρέπει τι τσσιναβάς τι κεράς ο πράγματα σο βακερέλα ο Ιεχωβά ότι ισί λάθος, αλλά πρέπει επίσης τι κεράς ατζέκ πιο μπουτ πράγματα. (Ρωμαίους 12:9) Ο αμαλά ι Ντεβλέσκε μανγκένα ο πράγματα σο μανγκέλα Βοβ. Οντουλά πράγματα διαβάνασα-λεν κο εδάφια Ψαλμός 15:​1-5. (Διάβανε) Ο αμαλά ι Ιεχωβάσκε προσπαθίνενα τι τθερέν λέσκε ιδιότητες ντα σικαβένα «αγάπη, χαρά, ειρήνη, υπομονή, λατσσιπέ . . . πίστη, πραότητα [ηρεμία], εγκράτεια [τι ατσσικιαράς αμαρό νεαυτός]».​—Γαλάτες 5:​22, 23.

21. Σαρ κα σικλιός τι τθερές ο ιδιότητες σο μανγκέλα ο Ντεβέλ;

²¹ Σαρ κα σικλιός τι τθερές ανταλά σουκάρ ιδιότητες; Πρέπει τι διαβάνες ι Γραφή συνέχεια για τι σικλιός σο μανγκέλα ο Ιεχωβά. (Ησαΐας 30:​20, 21) Καζόμ κα κερές-λες ανταβά, τι αγάπη ι Ιεχωβάσκε κα μπαριόλ, ντα καζόμ μπαριόλα τι αγάπη λέσκε, αζόμ πιο μπουτ κα μανγκές τι ντες-λες καν.

22. Καβά κα αβέλ ο αποτέλεσμας άμα κα ντες καν ι Ιεχωβάς;

²² Ο αλλαγές σο μπορεί τι χρειαζίντιβελ τι κερές τι ζωγιάτε ισί σαρ τι νικαβές ο πουρανέ σέα ντα τι ιρίς ο νεβέ. Η Γραφή βακερέλα ότι πρέπει τι “νικαβές οπρά-τούταρ ο πουρανό χαρακτήρας” ντα τι ιρίς «ο νεβό χαρακτήρας». (Κολοσσαείς 3:9, 10) Παρόλο σο ανταβά μπορεί μα τι αβέλ εύκολος, όταν κεράσα ανταλά αλλαγές ντα ντάσα καν ι Ιεχωβάς, βοβ ντέλα πο λάφι ότι κα τθεράς «μπαρέ ευλογίες». (Ψαλμός 19:​11) Βα, τράμπινε τι ντες καν ι Ιεχωβάς ντα σίκαβ ότι ο Μπενγκ ισί ψεύτης. Υπηρέτινε ι Ιεχωβάς, όχι επειδή κα ευλογίνελ-τουτ κο μέλλον, αλλά επειδή μανγκέσα-λες μπαγιά. Αντικάς κα αβές αληθινός αμάλ ι Ντεβλέσκο!