ΠΡΙΝ τι λεν τουμαρέ βαστέντε εκ Αγία Γραφή ντα τι αρχίνεν τι διαβάνεν-λα, ισί σημαντικός τι τζανέν σαρ ισί κερντό ανταβά βιβλίος. Η Γραφή, σο βακέρντιβελα Βίβλος-ντα, τθερέλα 66 πιο χουρντέ βιβλία, σο αρχίνενα με τη Γένεση ντα τελειώνενα με την Αποκάλυψη.

Κον ισί οντουβά σο γραφιντάς-λα; Ανταγιά ισί σημαντική ερώτηση. Ισί μπαγιά ότι βοηθιντέ περίπου 40 τζενέ για τι γραφίντιβελ ντα νακχλέ σχεδόν 1.600 μπρεσά για τι τελειώντιβελ. Οντουλά τζενέ, όμως, ποτές να βακερντέ ότι γραφιντέ βον ι Αγία Γραφή. Εκ λένταρ βακερντάς: «Ο άγιος πνεύμας ι Ντεβλέσκο βοηθιντάς τι γραφίντιβελ σαρί η Γραφή». (2 Τιμόθεο 3:​16) Εκ γιαβέρ βακερντάς: «Ο πνεύμας ι Ιεχωβάσκο κερντάς λάφι μέσω μάνταρ ντα λέσκο λάφι ισινέ μι τσσιμπάτε». (2 Σαμουήλ 23:2) Άρα, οντουλά τζενέ σικαντέ ότι ο λάφια σο τθερέλα η Βίβλος ισί ι Ιεχωβά Ντεβλέσκε, σο ισί ο πιο Μπαρό σαρό κο σύμπαν. Σαρ βακερένα οντουλά σο βοηθιντέ τι γραφίντιβελ η Γραφή, ο Ντεβέλ μανγκέλα τι αβέλ αμάλ ι τζενέντζαρ.

Ισί κάτι γιαβέρ-ντα μπουτ σημαντικός σο πρέπει τι τζανάς για τι αγαβάς ι Αγία Γραφή. Ο πιο σημαντικός πράγμας σο μανγκέλα τι σικαβέλ η Γραφή σαρέ κο τζενέ ισί ο δικαίωμας σο τθερέλα ο Ντεβέλ τι κυβερνίνελ ι τζενέν πι Βασιλειάσαρ, σο ισί κο ουρανός. Κο γιαβερά σελίδες, κα ντικχέν ότι ανταβά σημαντικός πράγμας κα αρακχάς-λες συνέχεια κι Γραφή, κατά Γένεση μέχρι κι Αποκάλυψη.

Αφού τθερένα τουμαρέ γκοντιάτε οντουλά σο ντικχλάμ πιο οπρέ, διαβάνεν προσεκτικά ακανά οντουλά σο μανγκέλα τι βακερέλ αμένγκε η Αγία Γραφή, ο βιβλίος σο τζανένα-λες ο πιο μπουτ τζενέ οπράλ κι πφουβ.

ΜΠΟΥΤ τζενέ βακερένα ότι ο πρώτα λάφια ι Γραφιάκε ισί πιο γνωστά σαρέ κατά λάφια σο τθερένα κι αρχή ο γιαβερά βιβλία. «Κι αρχή ο Ντεβέλ κερντάς ο ουρανός ντα ι πφουβ». (Γένεση 1:1) Ανταλέ χάνικ αλλά σημαντικέ λαφίντζαρ, η Γραφή βοηθίνελα-αμέν τι γνωρίνας ι πιο ζουρανές, ι Ιεχωβά Ντεβλές, σο από την αρχή μέχρι κο τέλος σικάντιβελα πιο μπουτ σαριλένταρ κι Γραφή. Ο πρώτος εδάφιος ι Γραφιάκο σικαβέλα ότι ο Ντεβέλ ισί Οντουβά σο κερντάς σαρό ο σύμπαν, αλλά εμ ι πφουβ σο τζουβντιάσα αμέν. Ο εδάφια σο ισί πιο μετά εξηγίνενα ότι αντρέ σε μερικά βακίτια, σο ασταρένας μπουτ μπρεσά ντα ισινέ ο εκ παλάλ κατά γιαβέρ, ο Ντεβέλ κερντάς αμαρί πφουβ ντα σαρέ ο σουκάρ πράγματα σο υπαρχίντιβενα λάτε. Οντουλά βακίτια βακέρντιβενα κι Γραφή «ντιβεσά».

Ο πιο σημαντικός πράγμας σο κερντάς ο Ντεβέλ ατθέ κι πφουβ ισινέ ο τζενό. Ο Ντεβέλ κερντάς ι τζενές για τι μοιάζελ Λέστε​—τι μπορίνελ τι σικαβέλ ιδιότητες σο τθερέλα Βοβ, σαρ ισί λέσκι αγάπη ντα λέσκι σοφία. Ο Ντεβέλ κερντάς ι τζενές κατά πράχος σο τθερέλα η πφουβ. Ο ναβ σο ντινάς-λες ισινέ Αδάμ ντα σοράν τσσουντάς-λες σε εκ παράδεισος​—κο κήπος της Εδέμ. Ο ίδιος ο Ντεβέλ κερντάς οντουβά κήπος ντα πφερντάς-λες με σουκάρ δέντρα σο νικαβένας φρούτα.

Ο Ντεβέλ αγαντάς ότι ο τζενό χρειαζίντιβελας εκχέ ρομνιά. Οτθάρ, λιντάς εκ παΐδι κατά Αδάμ, κερντάς εκχέ τζουβλιά, σο βακέρντιλι Εύα, ντα αντάς-λα κο μουρς για τι αβέλ λέσκι ρομνί. Ο πρώτα λάφια σο νικίστιλε κατά μούι του Αδάμ ντα σικαβένας λέσκι χαρά ισινέ: «Ανταβά ισί επιτέλους κόκαλος μι κοκαλένταρ ντα σώμας μι σωμάσταρ». Ο Ντεβέλ εξηγιντάς: «Οτθάρ, ο τζενό κα μουκχέλ πι νταντές ντα πι νταγιά ντα κα αβέλ γιεκ πι ρομνιάσαρ σαρ εκ σώμας».​—Γένεση 2:​22-24· 3:20.

Ο Ντεβέλ ντινάς κο Αδάμ ντα κι Εύα ντούι εντολές. Πρώτον, μανγκλάς λένταρ τι καλλιεργίνεν ντα τι αρακχαβέν ι πφουβ σο ισινέ λένγκο κχερ, ντα τι πφερέν-λα πουμαρέ τσσαβέντζαρ σο κα κερένας. Δεύτερον, βακερντάς λένγκε ότι μπορίνενας τι χαν σαρέ κατά δέντρα σο τθερέλας οντουβά μπαρό κήπος εκτός από εκ τανό, «κατά δέντρος σο ντέλα γνώση οντουλέσκε σο ισί λατσσό ντα οντουλέσκε σο ισί κακός». (Γένεση 2:​17) Άμα να κα ασουνένας, κα μερένας. Ανταλέ ντουέ εντολέντζαρ, ο Ντεβέλ ντινάς ι ευκαιρία κο μουρς ντα κι τζουβέλ τι σικαβέν άμα κα μανγκένας ι Ντεβλές τι αβέλ λένγκο Βασιλιάς. Επίσης, άμα κα ασουνένας-λες, κα σικαβένας ότι μανγκένας-λες ντα ότι εκτιμίνενας σαρέ οντουλά σο κερντάς λένγκε. Να τθερένας ούτε εκ δικαιολογία για μα τι δεχτίνεν ο λατσσό τρόπος σο κερέλα κουμάντος ο Ντεβέλ. Να υπαρχίντιβελας ούτε εκ λάθος οπράλ οντουλέ τέλειε τζενέντε. Η Γραφή βακερέλα αμένγκε: «Ο Ντεβέλ ντικχλάς σαρέ οντουλά σο κερντάς, ντα ισινέ μπουτ λατσσέ».​—Γένεση 1:​31.

​—Στηρίντιβελα κο βιβλίος Γένεση, κεφάλαια 1 ντα 2.