«Τι Τθερές Εμπιστοσύνη κο Ιεχωβά ντα τι Κερές ο Λατσσιπέ»

1. Όταν ο Ιεχωβά κερντάς ι τζενέν, καλά ξεχωριστές ικανότητες ντινάς-λεν;

Ο ΙΕΧΩΒΑ κερντάς ι τζενέν με ξεχωριστές ικανότητες. Ντινάς-αμέν ι ικανότητα τι σκεφτίνας, σο βοηθίνελα-αμέν τι λύνας προβλήματα ντα τι κεράς σχέδια για το μέλλον. (Παροιμίες 2:​11) Ντινάς-αμέν δύναμη, για τι μπορίνας τι κεράς οντουλά σο σχεδιάνασα ντα οντουλά σο μανγκάσα. (Φιλιππησίους 2:​13) Επίσης ντινάς-αμέν ι συνείδηση, σο τθεράσα-λα αντρ’ αμέντε για τι μπορίνας τι αγαβάς καβά ισί ο σωστός ντα καβά ισί ο λάθος. Η συνείδηση βοηθίνελα-αμέν τι διορθώνας αμαρέ λάθη ντα μα τι κεράς αμαρτίες.​—Ρωμαίους 2:15.

2. Σαρ μπεσέλα τι χρησιμοποιήνας ο Ιεχωβά αμαρέ ικανότητες;

² Ο Ιεχωβά μπεσέλα αμένταρ τι χρησιμοποιήνας σωστά αμαρέ ικανότητες. Σόσκε; Επειδή μανγκέλα-αμέν ντα τζανέλα ότι κα αβάς χαρούμενοι όταν χρησιμοποιήνασα ο δώρα σο ντινάς-αμέν. Για παράδειγμας, κο Εβραϊκές Γραφές διαβάνασα: «Ο σχέδια σο κερέλα οντουβά σο ισί γκοντιαβέρ κα τθερέν λατσσό αποτέλεσμας», ντα «σο νακχέλα τι βαστέσταρ τι κερές, κερ-λες τι ζοριάσαρ». (Παροιμίες 21:5· Εκκλησιαστής 9:​10) Κο Ελληνικές Γραφές διαβάνασα: «Καζόμ τθεράσα ι ευκαιρία τι κεράς-λες ανταβά, τι προσπαθίνας τι κεράς ο λατσσό σαριλένγκε», ντα «αφού ο κάθε εκ τουμένταρ λιντάς εκ δώρος, τι χρησιμοποιήνεν-λες για τι υπηρετίνεν ο εκ ι γιαβερές». (Γαλάτες 6:​10· 1 Πέτρου 4:​10) Σίγουρα, ο Ιεχωβά μανγκέλα τι κεράς ο πιο λατσσό σο μπορίνασα για τι κεράς λατσσιπέ εμ αμένγκε εμ ι γιαβερένγκε.

3. Καλά ισί μερικά πράγματα σο να μπορίνενα τι κερέν ο τζενέ;

³ Ο Ιεχωβά μανγκέλα αμένταρ τι χρησιμοποιήνας αμαρέ ικανότητες, αλλά τζανέλα ότι ναστί κεράσα σαρέ ο πράγματα. Για παράδειγμας, να μπορίνασα τι νασκιαράς ι ατέλεια, ι αμαρτία ντα ο μεριπέ. (1 Βασιλέων 8:​46) Επίσης να μπορίνασα τι κεράς κουμάντος ι γιαβερέν, επειδή σαρέ ο τζενέ ισί ελεύθεροι τι τραμπίνεν σο κα κερέν. Ντα ατζέ-ντα άμα τζανάσα μπουτ πράγματα, ποτές να κα τζανάς ο πράγματα σο τζανέλα ο Ιεχωβά.​—Ησαΐας 55:9.

4. Σο κα ντικχάς ανταλέ μαθημάστε;

⁴ Πρέπει πάντα τι μουκχάς ι Ιεχωβάς τι οδηγίνελ-αμέν ντα τι τθεράς εμπιστοσύνη ότι κα στηρίνελ-αμέν ντα κα κερέλ οντουλά σο να μπορίνασα τι κεράς κορκορέ. Όμως ο Ιεχωβά μανγκέλα αμένταρ τι σκεφτίνας επίσης σο μπορίνασα τι κεράς για τι λύνας αμαρέ προβλήματα ντα τι βοηθίνας ι γιαβερέν. (Διαβάνεν Ψαλμός 37:3) Πρέπει εμ τι “τθεράς εμπιστοσύνη κο Ιεχωβά” εμ “τι κεράς ο λατσσιπέ”. Πρέπει τι “αβάς πιστοί σαρέ κο πράγματα”. Σαρ μπορίνασα τι κεράς-λες ανταβά; Μπορίνασα τι ντικχάς ο παράδειγμας του Νώε, του Δαβίδ ντα γιαβερά παραδείγματα πιστέ τζενένγκε σο υπηρετίνενας ι Ιεχωβάς ντα στηρίντιβενας λέστε. Κα ντικχάς ότι υπαρχίντιβενας πράγματα σο να μπορίνενας τι κερέν, αλλά τραμπιντέ τι ντεν προσοχή κο πράγματα σο μπορίνενας τι κερέν.

ΟΤΑΝ ΝΤΙΚΧΑΣΑ ΤΙ ΑΒΕΝ-ΠΕΣ ΜΠΕΤΙ ΠΡΑΓΜΑΤΑ

5. Βακερέν σο ντικχέλας ντα σο αγαντάς ο Νώε.

⁵ Ο Νώε τζουβντιόλας εκχέ ντουνιάστε σο ισινέ “πφερντό βία” ντα ο τζενέ κερένας μπίλατζανε πράγματα. (Γένεση 6:4, 9-13) Παρόλο σο τζανέλας ότι ο Ιεχωβά κα καταστραφίνελας οντουλέ πφιρνέ ντουνιάς, ο Νώε στεναχωρίντιβελας οντουλένταρ σο κερένας ο τζενέ. Αγαντάς ότι υπαρχίντιβενας πράγματα σο να μπορίνελας τι κερέλ, αλλά επίσης αγαντάς ότι υπαρχίντιβενας πράγματα σο μπορίνελας τι κερέλ.

6, 7. (α) Σο να μπορίνελας τι κερέλ ο Νώε; (β) Σαρ μοιάζελα ο ντουνιάς σο τζουβντιάσα ι ντουνιάσαρ κο ντιβεσά του Νώε;

⁶ Σο να μπορίνελας τι κερέλ ο Νώε: Ο Νώε, για τι προειδοποιήνελ ι τζενέν, βακερέλας με πίστη ο λάφια σο βακερντάας λέσκε ο Ιεχωβά, αλλά να μπορίνελας τι κερέλ-λεν τι ασουνέν-λες ζορίσαρ. Επίσης να μπορίνελας τι κερέλ κάτι για τι αβέλ ο Κατακλυσμός πιο τζανγκλέ. Ο Νώε έπρεπε τι αβέλ σίγουρος ότι ο Ιεχωβά κα ατσσικιαρέλας πο λάφι τι νασκιαρέλ ο πφιρνιπέ, ντα πακιάλας ότι ο Ντεβέλ κα κερέλας-λες ανταβά κι σωστή στιγμή.​—Γένεση 6:17.

⁷ Αμέν-ντα τζουβντιάσα εκχέ ντουνιάστε σο ισί πφερντό πφιρνιπέ ντα τζανάσα ότι ο Ιεχωβά ντινάς πο λάφι ότι κα καταστραφίνελ-λες. (1 Ιωάννη 2:​17) Όμως μέχρι τι αβέλ-πες ανταβά, αμέν να μπορίνασα τι κεράς ι τζενέν τι ασουνέν ζορίσαρ ο «λατσσέ αμπέρια ι βασιλειάκε». Ντα να μπορίνασα τι κεράς τίποτα για τι αβέλ πιο τζανγκλέ η «μπαρί στεναχώρια». (Ματθαίος 24:​14, 21) Σαρ ο Νώε, αντικάς αμέν-ντα πρέπει τι τθεράς μπαρί πίστη ντα εμπιστοσύνη ότι ατζεχάνικ ο Ιεχωβά κα νασκιαρέλ ο πφιρνιπέ. (Ψαλμός 37:​10, 11) Ισινάμ σίγουροι ότι ο Ιεχωβά να κα αργίνελ ούτε εκ ντιβές τι ανέλ ι καταστροφή ανταλέ πφιρνέ ντουνιάσκι.​—Αββακούμ 2:3.

8. Κατέ ντέλας πι προσοχή ο Νώε; (Ντικχ ι φωτογραφία σο ισί κι αρχή.)

⁸ Σο μπορίνελας τι κερέλ ο Νώε: Αντί τι παρατίνελ-λεν ιτιρί οντουλένταρ σο ναστί κερέλας, ο Νώε ντέλας προσοχή κο πράγματα σο μπορίνελας τι κερέλ. Ο Νώε, για τι προειδοποιήνελ ι τζενέν, βακερέλας με πίστη ο λάφια σο βακερντάας λέσκε ο Ιεχωβά. (2 Πέτρου 2:5) Ανταβά έργος βοηθιντάς-λες τι ατσσικιαρέλ πι πίστη ζουρανί. Επίσης, ακολουθιντάς ι Ιεχωβάσκε οδηγίες για τι κερέλ εκ κιβωτός.​—Διαβάνεν Εβραίους 11:7.

9. Σαρ μπορίνασα τι ακολουθίνας ο παράδειγμας του Νώε;

⁹ Αμέν-ντα, σαρ ο Νώε, κεράσα μπουτ πράγματα «κο έργος κι Κυριόσκο». (1 Κορινθίους 15:​58) Για παράδειγμας, μπορεί τι βοηθίνασα τι κερντιόν ντα τι ατσσόν περιποιημέ ο Αίθουσες Βασιλείας ντα ο Αίθουσες Συνελεύσεων, μπορεί τι βοηθίνασα κο πράγματα σο πρέπει τι αβέν-πες κο συνελεύσεις ή μπορεί τι κεράσα μπουτί σε εκ γραφείος τμήματος ή σε εκ απομακρυσμέ μεταφραστικός γραφείος. Ο πιο σημαντικός όμως ισί ότι κεράσα λάφι ι Ντεβλέσκε κο γιαβερά τζενέ, ντα ανταβά κερέλα πιο ζουρανί αμαρί ελπίδα για το μέλλον. Εκ πιστή πφεν βακερντάς ότι, όταν κερέλα λάφι για το ευλογίες σο κα ανέλ η Βασιλεία ι Ντεβλέσκι, αγαβέλα ότι ο τζενέ να τθερένα καέκ ελπίδα ντα πακιάνα ότι λένγκε προβλήματα να κα νασέν ποτές. Σαρ βακερντάς οντιά πφεν, αμέν τθεράσα ελπίδα, σο αβέλα πιο ζουρανί όταν μουτθαβάσα-λα κο γιαβερά. Ανταγιά ελπίδα βοηθίνελα-αμέν τι συνεχίνας ο αγώνας σο κεράσα για τι τζουβντιάς!​—1 Κορινθίους 9:24.

ΟΤΑΝ ΚΕΡΑΣΑ ΑΜΑΡΤΙΕΣ

10. Βακερέν σο κερντάς ο Δαβίδ.

¹⁰ Ο Βασιλιάς Δαβίδ ισινέ εκ πιστός τζενό ντα ο Ιεχωβά μανγκέλας-λες μπουτ. (Πράξεις 13:​22) Όμως, ο Δαβίδ γκιλό με την Βηθ-σαβεέ, ντα ανταβά ισινέ μπαρί αμαρτία. Σοράν κερντάς κάτι χειρότερος: Προσπαθιντάς τι γκεραβέλ πι αμαρτία, οτθάρ κανονιντάς τι μουνταρέν κο πόλεμος τον Ουρία, σο ισινέ ο ρομ της Βηθ-σαβεέ. Ντα μάλιστα ντινάς κο Ουρίας τι γκερέλ εκ γράμμας σο τθερέλας αντρέ ι οδηγία τι μουνταρέν-λες! (2 Σαμουήλ 11:​1-21) Τελικά, ο γιαβερά σικλιλέ ο αμαρτίες σο κερντάς ο Δαβίδ. (Μάρκος 4:​22) Όταν αβιλό-πες ανταβά, καγιά ισινέ η αντίδραση του Δαβίδ;

11, 12. (α) Σο να μπορίνελας τι κερέλ ο Δαβίδ αφού αμαρτιντάς; (β) Σο κα κερέλ αμένγκε ο Ιεχωβά άμα μετανιώνασα;

¹¹ Σο να μπορίνελας τι κερέλ ο Δαβίδ: Ο Δαβίδ να μπορίνελας τι διορθώνελ οντουβά σο κερντάας. Μάλιστα, μερικά κατά προβλήματα σο αβιλέ επειδή αμαρτιντάς κα ακολουθίνενας-λες σαρέ λέσκε ζωγιάτε. (2 Σαμουήλ 12:​10-12, 14) Άρα χρειαζίντιβελας πίστη. Έπρεπε τι αβέλ σίγουρος ότι, όταν κα μετανιώνελας μπαγιά, ο Ιεχωβά κα συγχωρίνελας-λες ντα κα βοηθίνελας-λες τι νταϊντίνελ ο προβλήματα σο αντέ λέσκε ο αμαρτίες σο κερντάς.

¹² Επειδή ισινάμ ατελείς, σαρέ κεράσα αμαρτίες. Αλλά μερικά λάθη ισί πιο σοβαρά κατά γιαβερά ντα μερικές φορές να μπορίνασα τι διορθώνας-λεν. Αμέν-ντα μπορεί τι αρακχάς ανγκλ’ αμέντε προβλήματα επειδή κερντάμ λάθη. (Γαλάτες 6:7) Αλλά τθεράσα εμπιστοσύνη κι υπόσχεση κι Ιεχωβάσκι ότι, άμα κα μετανιώνας, κα στηρίνελ-αμέν κο δυσκολίες σο νακχάσα, ατζέ-ντα άμα οντουλά δυσκολίες αβένα επειδή κερντάμ λάθη.​—Διαβάνεν Ησαΐας 1:​18, 19· Πράξεις 3:19.

13. Σο κερντάς ο Δαβίδ για τι τθερέλ πάλι εκ λατσσί σχέση ι Ιεχωβάσαρ;

¹³ Σο μπορίνελας τι κερέλ ο Δαβίδ: Ο Δαβίδ μανγκέλας τι τθερέλ πάλι εκ λατσσί σχέση ι Ιεχωβάσαρ. Σαρ κερντάς-λες ανταβά; Ο Δαβίδ μουκχλάς ι Ιεχωβάς τι βοηθίνελ-λες. Για παράδειγμας, δεχτιντάς ι διόρθωση σο ντινάς-λες ο προφήτης ι Ιεχωβάσκο, ο Νάθαν. (2 Σαμουήλ 12:​13) Επίσης, ο Δαβίδ προσευχισάλο κο Ιεχωβά ντα μουτθαντάς πο αμαρτίες. Αντικάς σικαντάς ότι μανγκέλας τι τθερέλ πάλι πι ζωγιάτε ι ευλογία ι Ιεχωβάσκι. (Ψαλμός 51:​1-17) Αντί τι τασαβέν-λες ο τύψεις, ο Δαβίδ λιντάς εκ μάθημας κατά λάθη σο κερντάς. Ποτές να κερντάς πάλι οντουλά μπαρέ αμαρτίες. Μετά από μπουτ μπρεσά μουλό πιστός, ντα ο Ιεχωβά τθερέλα-λες πι γκοντιάτε σαρ εκ πιστός τζενό.​—Εβραίους 11:​32-34.

14. Σο μπορίνασα τι σικλιάς κατά παράδειγμας του Δαβίδ;

¹⁴ Σο μπορίνασα τι σικλιάς κατά παράδειγμας του Δαβίδ; Άμα κα κεράς εκ σοβαρή αμαρτία, πρέπει τι μετανιώνας αντράλ αμαρέ γκίσταρ, τι μουτθαβάς αμαρί αμαρτία κο Ιεχωβά ντα τι μανγκάς λέσταρ τι συγχωρίνελ-αμέν. (1 Ιωάννη 1:9) Επίσης, πρέπει τι κεράς λάφι ι πρεσβυτερόντζαρ επειδή βον μπορίνενα τι βοηθίνεν-αμέν τι τθεράς πάλι εκ λατσσί σχέση ι Ιεχωβάσαρ. (Διαβάνεν Ιακώβου 5:​14-16) Όταν δεχτίνασα ι βοήθεια ι Ιεχωβάσκι, σικαβάσα ότι τθεράσα εμπιστοσύνη κι υπόσχεση σο ντινάς ότι κα συγχωρίνελ-αμέν. Επίσης, πρέπει τι σικλιάς κατά λάθη σο κερντάμ ντα τι συνεχίνας τι υπηρετίνας ι Ιεχωβάς με σιγουριά.​—Εβραίους 12:​12, 13.

ΓΙΑΒΕΡΑ-ΝΤΑ ΔΥΣΚΟΛΙΕΣ

15. Σο σικλιάσα κατά παράδειγμας της Άννας;

¹⁵ Μπορεί τι νακχένα αμαρέ γκοντιάταρ γιαβερά-ντα πιστοί υπηρέτες κατά Γραφή σο τθερένας εμπιστοσύνη κο Ιεχωβά ενώ κερένας ο πιο λατσσό σο μπορίνενας όταν τθερένας δυσκολίες. Για παράδειγμας, η Άννα να μπορίνελας τι κερέλ τσσαβέν. Να μπορίνελας τι κερέλ κάτι για τι αλλάνελ-λες ανταβά. Αλλά ισινέ σίγουρη ότι ο Ιεχωβά κα ντέλας-λα παρηγοριά. Οτθάρ συνεχιντάς τι ντελ λατρεία κι σκηνή της μαρτυρίας ντα τι προσευχίντιβελ κο Ιεχωβά για τι βακερέλ λέσκε σαρ νιωθίνελας. (1 Σαμουήλ 1:​9-11) Βόι ισί εκ μπουτ λατσσό παράδειγμας αμένγκε! Όταν τθεράσα προβλήματα υγείας ή γιαβερά δυσκολίες σο να μπορίνασα τι αλλάνας-λεν, μουκχάσα οπράλ κο Ιεχωβά σο-ντα πρόβλημας κερέλα-αμέν τι ανησυχίνας ντα τθεράσα εμπιστοσύνη ότι κα φροντίνελ-αμέν. (1 Πέτρου 5:​6, 7) Ντα κεράσα ο πιο λατσσό σο μπορίνασα για τι λας ι βοήθεια σο ντένα-αμέν ο Χριστιανικές συναθροίσεις ντα γιαβερά προγράμματα σο ετοιμάνελα η οργάνωση ι Ιεχωβάσκι.​—Εβραίους 10:​24, 25.

16. Σο μπορίνενα τι σικλιόν ο νταντά ντα ο νταγιά κατά Σαμουήλ;

¹⁶ Σο κα βακεράς ι πιστέ νταντένγκε ντα νταΐνγκε σο λένγκε τσσαβέ τσσιναντέ τι υπηρετίνεν ι Ιεχωβάς; Ο προφήτης Σαμουήλ να μπορίνελας τι κερέλ ζορίσαρ πι τσσαβέν τι ατσσόν πιστοί κο Ντεβέλ. (1 Σαμουήλ 8:​1-3) Έπρεπε τι μουκχέλ οντουβά πρόβλημας κι Ιεχωβάσκε βαστά. Όμως ο Σαμουήλ κερντάς ο πιο λατσσό σο μπορίνελας για τι ατσσόλ πιστός κο Ντεβέλ ντα τι κερέλ χαρούμενος πι Νταντές σο ισί κο ουρανός. (Παροιμίες 27:​11) Αντιβές, μπουτ Χριστιανοί σο τθερένα τσσαβέν νακχένα κάτι ασακό. Ισί σίγουροι ότι, σαρ ο ντατ κο παράδειγμας με τον άσωτο γιο, αντικάς ο Ιεχωβά-ντα ισί πάντα έτοιμος τι δεχτίνελ πάλι ι αμαρτωλέ τζενέν σο μετανιώνενα. (Λουκάς 15:​20) Επίσης, ο νταντά ντα ο νταγιά προσοχίνενα τι ατσσόν πιστοί κο Ιεχωβά ντα τθερένα ελπίδα ότι λένγκο παράδειγμας κα βοηθίνελ λένγκε τσσαβέν τι βουρτίνεν κο Ιεχωβά.

17. Σόσκε ο παράδειγμας ι τσορορέ χηράκο ντέλα-αμέν θάρρος;

¹⁷ Εκ γιαβέρ λατσσό παράδειγμας ισινέ η τσορορί χήρα κο ντιβεσά κι Ιησούσκε. (Διαβάνεν Λουκάς 21:​1-4) Να μπορίνελας τι κερέλ τίποτα για το μπέτι πράγματα σο αβένας-πες κο ναός ντα να μπορίνελας τι κερέλ κάτι πι τσοροριμάσκε. (Ματθαίος 21:​12, 13) Όμως η εμπιστοσύνη σο τθερέλας κο Ιεχωβά κερντάς-λα τι υποστηρίνελ ι αληθινή λατρεία. Βόι ντινάς αντράλ πι γκίσταρ “ντούι λεπτά”, σο ισινέ σαρέ λάκε λοβέ. Οντιά πιστή τζουβέλ τθερέλας σαρί πι εμπιστοσύνη κο Ιεχωβά. Τζανέλας ότι, άμα κα τσσουβέλας ο πράγματα ι Ιεχωβάσκε κι πρώτη θέση, Βοβ σίγουρα κα φροντίνελας τι τθερέλ σαρέ οντουλά σο χρειαζίντιβελας. Αντικάς αμέν-ντα τθεράσα εμπιστοσύνη ότι, άμα κα τσσουβάς πρώτα αμαρέ ζωγιάτε ι Βασιλεία ι Ντεβλέσκι, ο Ιεχωβά σίγουρα κα φροντίνελ τι τθεράς σαρέ οντουλά σο χρειαζίντιβασα.​—Ματθαίος 6:33.

18. Βακερέν ο παράδειγμας εκχέ πφραλέσκο σο ντικχέλας ο πράγματα με το σωστός τρόπος.

¹⁸ Μπουτ πφραλά ντα πφενιά αντιβές ντένα προσοχή κο πράγματα σο μπορίνενα τι κερέν ντα όχι κο πράγματα σο να μπορίνενα, ντα αντικάς βον-ντα σικαβένα εμπιστοσύνη κο Ιεχωβά. Σκεφτίνεν ο παράδειγμας του Μάλκολμ, εκχέ πφραλέσκο σο ατσσιλό πιστός μέχρι κο 2015 σο μουλό. Σαρέ οντουλά μπρεσά σο υπηρετίνελας βοβ ντα λέσκι ρομνί ι Ιεχωβάς, νακχλέ λατσσέ ντα μπέτι στιγμές. «Μπουτ φαρ κι ζωή να τζανέσα σο κα αβέλ-πες ούτε σο τι κερές, ντα τθερέσα δυσκολίες», βακερντάς. «Αλλά ο Ιεχωβά ευλογίνελα οντουλέν σο στηρίντιβενα λέστε». Καγιά ισινέ η συμβουλή του Μάλκολμ; «Κερ προσευχή για τι τθερές ο πιο λατσσέ αποτελέσματα ντα τι κερές σο νακχέλα τι βαστέσταρ κι υπηρεσία κι Ιεχωβάσκι. Ντε προσοχή κο πράγματα σο μπορίνεσα τι κερές, όχι κο πράγματα σο να μπορίνεσα».a​—Ντικχ ι υποσημείωση.

19. (α) Σόσκε ισί μπουτ λατσσό αμένγκε ο εδάφιος ι μπρεσέσκο για το 2017; (β) Σαρ κα κερέν τουμαρέ ζωγιάτε ο εδάφιος ι μπρεσέσκο για το 2017;

¹⁹ Ανταβά πφιρνό ντουνιάς αβέλα “χειρότερος”, οτθάρ μπεκλεντίνασα ότι κα τθεράς ατζέ πιο μπουτ δυσκολίες. (2 Τιμόθεο 3:1, 13) Ακανά ισί πιο σημαντικός από ποτές μα τι μουκχάς τι τασαβέν-αμέν ο δυσκολίες. Αντίθετα, πρέπει τι τθεράς μπαρί εμπιστοσύνη κο Ιεχωβά ντα τι ντας προσοχή κο πράγματα σο μπορίνασα τι κεράς. Οτθάρ, ισί μπουτ λατσσό αμένγκε ο εδάφιος ι μπρεσέσκο για το 2017: «Τι τθερές εμπιστοσύνη κο Ιεχωβά ντα τι κερές ο λατσσιπέ»!​—Ψαλμός 37:3.