Ο Πουρανέ Ισραηλίτες Κερένας Τζένγκι —Αμέν Σόσκε να Κεράσα Τζένγκι;
«ΑΜΑ εκ τζενό τουμένταρ να μανγκλάς τι κερέλ τζένγκι ι Γαλλιάσαρ ή ι Αγγλιάσαρ, κα μερέν σαρέ!» ντινάς βίκος ζουρανές εκ αξιωματικός σο ισινέ Ναζί οπράλ μερικέ Μαρτυρέντε κο Δεύτερος Παγκόσμιος Πόλεμος. Παρόλο σο οτθέ πασέ μπεκλεντίνενας στρατιώτες κατά Ες-Ες σο τθερένας όπλα, καέκ αμαρέ πφραλένταρ να νταρασάλο. Σο μπαρό θάρρος σικαντέ! Ανταβά ισί εκ λατσσό παράδειγμας σο σικαβέλα σαρ ντικχένα ο Μάρτυρες ι Ιεχωβάσκε ο τζένγκι: Να μανγκάσα τι πολεμίνας κο τζένγκια σο αβένα-πες ανταλέ ντουνιάστε. Ατζέ-ντα κάνα βακερένα ότι κα μουνταρέν-αμέν, να ανακατούντιβασα κο καβγκάδες ανταλέ ντουνιάσκε.
Όμως, να συμφωνίνενα ανταλέσαρ σαρέ ο τζενέ σο βακερένα ότι ισί Χριστιανοί. Μπουτ τζενέ πακιάνα ότι εκ Χριστιανός μπορίνελα ντα πρέπει τι τσσίντελ πι τθεμέσταρ. Μπέκιμ τι νακχέλα ακαβά λένγκε γκοντιάταρ: “Ο πουρανέ Ισραηλίτες ισινέ λαός ι Ντεβλέσκο ντα κερένας τζένγκι. Άρα, σόσκε μα τι κερέν τζένγκι ο Χριστιανοί αντιβές;” Τουμέν, σο κα βακερένας; Κα χρειαζίντιβελας τι εξηγίνεν ότι ο πουρανέ Ισραηλίτες ισινέ διαφορετικοί κατά Ντεβλέσκο λαός αντιβές. Ντικχέν παντς διαφορές.
1. ΣΑΡΟ Ο ΛΑΟΣ Ι ΝΤΕΒΛΕΣΚΟ ΙΣΙΝΕ ΕΚΧΕ ΤΘΕΜΕΣΤΑΡ
Ανγκλέ, ο Ιεχωβά γκιντιντάς πι λαός, ι Ισραηλιτέν, εκχέ τθεμέστε. Βακερντάς ότι λιντάς πέσκε ι Ισραηλιτέν αντράλ σαρέ κατά λαοί. (Έξοδ. 19:5) Ντα ο Ντεβέλ ντινάς-λεν τι τθερέν συγκεκριμέ τθανά. Οτθάρ, κάνα ο Ντεβέλ βακερέλας ι Ισραηλιτένγκε τι τζαν τι κερέν τζένγκι γιαβερέ τθεμέντζαρ, σίγουρα να κα χάνας-πες ι τζενέντζαρ σο υπηρετίνενας ι Ιεχωβάς ούτε κα μουνταρένας-λεν.a
Αντιβές, οντουλά σο ντένα αληθινή λατρεία ισί «σαρέ κατά τθεμά, κατά φυλές, κατά λαοί ντα κατά τσσιμπά». (Αποκ. 7:9) Άμα ο υπηρέτες ι Ντεβλέσκε κα κερένας τζένγκια, κα χάνας-πες τζενέντζαρ σο υπηρετίνενας βον-ντα ι Ιεχωβάς, ντα μπορεί ατζέ-ντα τι μουνταρένας-λεν.
2. Ο ΙΕΧΩΒΑ ΒΑΚΕΡΕΛΑΣ Ι ΙΣΡΑΗΛΙΤΕΝΓΚΕ ΤΙ ΚΕΡΕΝ ΤΖΕΝΓΚΙ
Ανγκλέ, ο Ιεχωβά αποφασίνελας κάνα ντα σόσκε χρειαζίντιβελας τι κερέν τζένγκι ο Ισραηλίτες. Για παράδειγμας, ο Ντεβέλ βακερντάς κο Ισραήλ τι κερέλ τζένγκι ι Χαναναιόντζαρ, σο τθερένας ο ναβ τζενένγκο σο ντένας λατρεία δαιμονέντε, σο κερένας μπουτ λουμνικανέ πράγματα ντα σο θυσιάνενας πουμαρέ τσσαβέν. Ο Ιεχωβά βακερντάς ι Ισραηλιτένγκε τι καταστραφίνεν ι τζενέν σο κερένας ανταλά μπέτι πράγματα κο Υποσχεμέ Τθεμ, για μα τι κερένας-λεν ο Ισραηλίτες-ντα. (Λευιτ. 18:24, 25) Αφού τσσουντέ-πες ο Ισραηλίτες κο Υποσχεμέ Τθεμ, ισινέ φαρ σο ο Ντεβέλ βακερντάς λένγκε ότι μπορίνενας τι κερέν τζένγκι για τι αρακχαβέν-πες κατά ντουσμάνια σο ζορισκιαρένας-λεν. (2 Σαμ. 5:17-25) Όμως, ο Ιεχωβά ποτές να μουκχλάς ι Ισραηλιτέν τι αποφασίνεν κορκορέ τι κερέν τζένγκι. Κάνα κερντέ-λες ανταβά, μπουτ φαρ αβιλέ-πες μπέτι πράγματα.—Αριθ. 14:41-45· 2 Χρον. 35:20-24.
Αντιβές, ο Ιεχωβά να βακερέλα ι τζενένγκε τι κερέν τζένγκι. Ο τθεμά κερένα τζένγκι πραγματένγκε σο μανγκένα ο τζενέ, όχι πραγματένγκε σο μανγκέλα ο Ντεβέλ. Μπέκιμ κερένα τζένγκι επειδή μανγκένα τι τθερέν πο μπουτ τθανά, τι κερέν πο μπουτ λοβέ ή τι νακχαβέν εκ πολιτική ιδέα. Αλλά σο κα βακεράς οντουλένγκε σο βακερένα ότι κερένα τζένγκι κο ναβ κι Ντεβλέσκο για τι αρακχαβέν πουμαρί θρησκεία ή τι μουνταρέν ι Ντεβλέσκε ντουσμανίν; Ο Ιεχωβά κα αρακχαβέλ πι αληθινέ υπηρετόν ντα κα καταστραφίνελ πι ντουσμανίν κο τζένγκι σο μπεκλεντίνασα τι αβέλ-πες ανγκλ’ αμέντε. Ανταβά τζένγκι ισί ο Αρμαγεδδώνας. (Αποκ. 16:14, 16) Οντουλέ τζενγκίστε, κο στρατός κι Ντεβλέσκο κα αβέν σάντε πνευματικά πλάσματα σο ισί κο ουρανός, όχι υπηρέτες σο ισί κι πφουβ.—Αποκ. 19:11-15.
3. Ο ΙΣΡΑΗΛΙΤΕΣ ΝΑ ΜΟΥΝΤΑΡΕΝΑΣ ΟΝΤΟΥΛΕΝ ΣΟ ΣΙΚΑΒΕΝΑΣ ΠΙΣΤΗ ΚΟ ΙΕΧΩΒΑ
Κερέλα τζένγκι ο Ντεβέλ καεκχέ λαόσκε αντιβές, σαρ κερντάς τζένγκι ι Ισραηλιτένγκε κι Ιεριχώ;
Ανγκλέ, ο στρατός ι Ισραηλιτένγκο μπουτ φαρ τζιτζίνελας οντουλένγκε σο σικαβένας πίστη κο Ντεβέλ ντα μουνταρέλας σάντε οντουλέν σο τραμπίνελας ο Ιεχωβά τι μερέν. Ντικχέν ντούι παραδείγματα. Παρόλο σο ο Ιεχωβά βακερντάς ι Ισραηλιτένγκε τι καταστραφίνεν ι Ιεριχώ, βον σωντέ ι Ρααβιά ντα λάκε τζενέν επειδή βόι σικαντάς πίστη. (Ιησ. Ναυή 2:9-16· 6:16, 17) Σοράν, σαρό ο τθεμ Γαβαών να καταστραφισάλο κάνα ο Γαβαωνίτες σικαντέ ότι σεβάνενας ι Ντεβλές.—Ιησ. Ναυή 9:3-9, 17-19.
Αντιβές, οντουλά σο κερένα τζένγκι να σώνενα ι τζενέν σο τθερένα πίστη ή ατζέ-ντα οντουλέν σο νανέ στρατιώτες.
4. Ο ΙΣΡΑΗΛΙΤΕΣ ΕΠΡΕΠΕ ΤΙ ΚΕΡΕΝ Ο ΤΖΕΝΚΓΙ ΑΝΤΙΚΑΣ ΣΑΡ ΒΑΚΕΡΕΛΑΣ Ο ΝΤΕΒΕΛ
Ανγκλέ, ο Ιεχωβά μανγκέλας κατά Ισραηλίτες στρατιώτες τι κερέν ο τζένγκια αντικάς σαρ βακερέλας λένγκε βοβ. Για παράδειγμας, ισινέ φαρ σο ο Ντεβέλ βακερέλας λένγκε τι κερέν ειρήνη ντουσμανίντζαρ. (Δευτ. 20:10) Ντα ο Ιεχωβά μπεκλεντίνελας κατά Ισραηλίτες στρατιώτες τι ατσσικιαρέν πάκι εμ πουμαρό νεαυτός εμ ο στρατόπεδος ντα τι κερέν ο πάκι κανόνες σο ντέλας-λεν. (Δευτ. 23:9-14) Ενώ ο στρατοί ι γιαβερέ τθεμένγκε μπουτ φαρ λατζαβκιαρένας ι ντουσμανίνγκε τζουβλίν, ο Ιεχωβά να μουκχέλας ι Ισραηλιτέν τι κερέν-λες ανταβά. Ατζέκ, άμα εκ τζενό μανγκέλας τι παντρίνελ εκχέ αιχμάλωτε τζουβλιάσαρ, έπρεπε τι νακχέλ εκ μάσεκ ή πο μπουτ κατά ντιβές σο λιντιλό ο τθεμ.—Δευτ. 21:10-13.
Αντιβές, ο πο μπουτ τθεμά τθερένα κερντό συμφωνίες για τι αβέν-πες τζένγκια συγκεκριμέ τροπόσαρ. Παρόλο σο συμφωνίνενα τι αρακχαβέν οντουλέν σο νανέ στρατιώτες, μπουτ φαρ να ατσσικιαρένα πουμαρό λάφι.
5. Ο ΝΤΕΒΕΛ ΚΕΡΕΛΑΣ ΤΖΕΝΓΚΙ ΠΙ ΛΑΟΣΚΕ
Κο τζένγκια αντιβές, σώνενα οντουλέν σο ισί πιστοί σαρ αβιλό-πες ι Ρααβιάσαρ ντα λάκε φαμιλιάσαρ κι Ιεριχώ;
Ανγκλέ, ο Ιεχωβά πολεμίνελας ι Ισραηλιτένγκε ντα μπουτ φαρ κερέλας θαύμας για τι μπορίνεν τι νικίνεν ο τζένγκι. Για παράδειγμας, σαρ βοηθιντάς ο Ιεχωβά ι Ισραηλιτέν τι λεν ι Ιεριχώ; Σαρ βακερντάας ο Ιεχωβά, κάνα ο λαός «ντινάς βίκος μπουτ ζουρανές, ο βουτσσέ ντουβάρια πελέ τελέ», ντα αντικάς ισινέ πο εύκολος λένγκε τι λεν ο τθεμ. (Ιησ. Ναυή 6:20) Ντα σαρ κερδιντέ ο Ισραηλίτες εκ τζένγκι σο κερντέ ι Αμορραιόντζαρ; «Ο Ιεχωβά φουρτίνελας οπρά-λέντε κατά ουρανός μπαρέ χαλαζίσκε μπαρά . . . Οντουλά σο μουλέ κατά χαλάζι ισινέ πο μπουτ οντουλένταρ σο μουλέ κατά Ισραηλιτένγκο σπαθίς».—Ιησ. Ναυή 10:6-11.
Αντιβές, ο Ιεχωβά να κερέλα τζένγκι καέκ λαόσκε κι πφουβ. Λέσκι Βασιλεία, ι Ιησούσαρ σαρ Βασιλιάς, «νανέ ανταλέ ντουνιάσταρ». (Ιωάν. 18:36) Οκιά μπάνταρ, οντουβά σο κερέλα κουμάντος σαρέ ι τζενένγκε κυβερνήσεις ισί ο Μπενγκ. Ο τζένγκια σο αβένα-πες κο ντουνιάς σικαβένα καζόμ πφιρνό ισί ο Μπενγκ.—Λουκ. 4:5, 6· 1 Ιωάν. 5:19.
Ο ΑΛΗΘΙΝΟΙ ΧΡΙΣΤΙΑΝΟΙ ΜΑΡΕΝΑ-ΠΕΣ ΤΙ ΚΕΡΕΝ ΕΙΡΗΝΗ Ι ΓΙΑΒΕΡΕΝΤΖΑΡ
Σαρ ντικχλάμ, αμέν αντιβές ισινάμ διαφορετικοί κατά πουρανό Ισραήλ. Όμως, ανταλά διαφορές νανέ ο μόνοι λόγοι σο να κεράσα τζένγκι. Τθεράσα γιαβερά-ντα λόγοι. Για παράδειγμας, ο Ντεβέλ τθερέλα βακερντό ότι, κο τελευταία ντιβεσά, οντουλά σο κα σικλιόνας λέσταρ να “κα σικλιόνας τι κερέν τζένγκι”. Άρα, να κα τζάνας-ντα τι κερέν τζένγκι. (Ησ. 2:2-4) Επίσης, ο Χριστός βακερντάς ότι λέσκε μαθητές να «κα τθερένας σχέση ανταλέ ντουνιάσαρ». Να κα τσσίντενας καεκχέσταρ κο τζένγκια σο κα κερέλας ο ντουνιάς.—Ιωάν. 15:19.
Ο Χριστός βακερντάς επίσης οντουλένγκε σο τζάνας παλά-λέστε τι κερέν κάτι πο μπουτ. Βακερντάς λένγκε μα τι σκεφτίνεν πράγματα σο κα κερένας-λεν τι ατσσικιαρέν χολί ντα τι κερέν τζένγκι. (Ματθ. 5:21, 22) Ατζέκ, βακερντάς οντουλένγκε σο τζάνας παλά-λέστε τι “κερέν ειρήνη” ι γιαβερέντζαρ ντα τι μανγκέν πουμαρέ ντουσμανίν.—Ματθ. 5:9, 44.
Σαρ μπορίνασα τι κεράς-λες αμέν ανταβά; Να μανγκάσα τι τζας τι κεράς τζένγκι, αλλά μήπως ισί αμαρέ γκίστε ατζέ-ντα χάνικ ντουσμανλίκι, σο κα μπορίνελας τι ανέλ καβγκάδες ή διχόνοια κι κχανγκιρί; Μα τι τσσιναβάς τι μαράς-αμέν τι νικαβάς αμαρέ γκίσταρ σο-ντα μπέτι συναισθήματα τθεράσα ι γιαβερένγκε.—Ιακ. 4:1, 11.
Αντίς τι πολεμίνας κο τζένγκια σο κερέλα ο ντουνιάς, μαράσα-αμέν τι τθεράς ειρήνη ντα τι μανγκάς ο εκ ι γιαβερές. (Ιωάν. 13:34, 35) Μανγκάσα σαρέ αμαρέ γκίσαρ τι ατσσάς ουδέτεροι, καζόμ μπεκλεντίνασα ι ντιβεσέσκε σο ο Ιεχωβά κα τσσιναβέλ ντιπ σαρέ ο τζένγκια.—Ψαλμ. 46:9.
a Μπάζιμα, ι Ισραηλιτένγκε φάρες κερένας τζένγκι η εκ ι γιαβεράσαρ, παρόλο σο να μανγκέλας-λες ανταβά ο Ιεχωβά. (1 Βασ. 12:24) Ισινέ φαρ όμως σο μανγκλάς τι αβέν-πες ασακέ τζένγκια, επειδή μερικές φάρες είτε γκιλέας λέσαρ κόντρα είτε κερντέας γιαβερά μπαρέ αμαρτίες.—Κριτ. 20:3-35· 2 Χρον. 13:3-18· 25:14-22· 28:1-8.