ΜΑΘΗΜΑΣ 38
Τι Εκτιμίνες ο Δώρος ι Ζωγιάκο
Υπαρχίντιβενα μπουτ σουκάρ πράγματα κι ζωή. Ατζέ-ντα άμα τθεράσα προβλήματα, ο πο μπουτ φαρ αβέλα-πες τι απολαμβάνας κάποια πράγματα. Σαρ μπορίνασα τι σικαβάς ότι εκτιμίνασα ο δώρος ι ζωγιάκο; Ντα καβά ισί ο πο σημαντικός λόγος για τι κεράς-λες ανταβά;
1. Σόσκε πρέπει τι εκτιμίνας ι ζωή;
Πρέπει τι εκτιμίνας ι ζωή σόσκε ισί δώρος αμαρέ λατσσέ Νταντέσταρ, κατά Ιεχωβά, σο μανγκέλα-αμέν μπουτ. Βοβ ισί “σο ντέλα ι ζωή”—κερντάς σο-ντα τθερέλα ζωή. (Ψαλμός 36:9) «Βοβ ντέλα σαριλέντε ζωή ντα ανάσα ντα σαρέ ο πράγματα». (Πράξεις 17:25, 28) Ο Ιεχωβά ντέλα-αμέν σο-ντα χρειαζίντιβασα για τι τζουβντιάς. Αλλά νανέ σάντε ανταβά—κερντάς αμαρί ζωή ασακέ τροπόσαρ για τι μπορίνας τι απολαμβάνας-λα ντα.—Διαβάνεν Πράξεις 14:17.
2. Σαρ μπορίνασα τι σικαβάς κο Ιεχωβά ότι εκτιμίνασα ο δώρος ι ζωγιάκο;
Οτθάρ μπερί σο τι ντάι ατσσιλί κχαμνί τούτε, ο Ιεχωβά πφαμπόλα τούκε. Εκ κατά υπηρέτες ι Ιεχωβάσκε, ο Δαβίδ, βακερντάς αντράλ κατά Ντεβλέσκο πνεύμας: «Το γιακχά ντικχλέ-μαν ατζέ-ντα κάνα ισινόμας αντρέ κο περ». (Ψαλμός 139:16) Τι ζωή ι Ιεχωβάσκε τθερέλα μπουτ μπαρί αξία. (Διαβάνεν Ματθαίος 10:29-31) Κα πφανγκιόλας μπουτ λέσκο γκι άμα εκ τζενό κα μουνταρέλας επίτηδες εκχέ γιαβερές ή ατζέ-ντα άμα βοβ κορκορό κα μουνταρέλας-πες.a (Έξοδος 20:13) Επίσης, κα πφανγκιόλας ι Ιεχωβάσκο γκι άμα κα τσσουβάας αμαρί ζωή σε κίνδυνος σινανέ ή άμα να κα κεράας κάτι για τι αρακχαβάς ι γιαβερένγκι ζωή. Κάνα πφαμπάσα αμαρέ ζωγιάκε ντα σεβάνασα ι γιαβερένγκι ζωή, σικαβάσα ότι εκτιμίνασα ο μπουτ σουκάρ δώρος ι ζωγιάκο.
ΧΑΝΤΖΟΥΒ ΠΟ ΑΧΟΡΤ
Ντικχ καλέ τροπόντζαρ μπορίνεσα τι σικαβές ότι εκτιμίνεσα ο δώρος ι ζωγιάκο.
3. Τι αρακχαβές τι υγεία
Επειδή ντινάμ αμαρό λάφι κο Ιεχωβά τι τζουβντιάς λέσκε, υπηρετίνασα-λες σαρέ αμαρέ ζωγιάσαρ. Ισί σαρ τι ντας αμαρό σώμας σαρ θυσία κο Ντεβέλ. Διαβάνεν Ρωμαίους 12:1, 2 ντα σοράν συζητίνεν ο ερωτήσεις:
Σο πρέπει τι τσσίντελ-τουτ τι αρακχαβές τι υγεία;
Καλά ισί μερικοί τρόποι σο μπορίνεσα τι κερές-λες ανταβά;
4. Τι τθερές τι γκοντί σαρέ κο πράγματα σο κερέσα για μα τι ντελ-πες ή τι μερέλ καέκ τζενό
Η Γραφή βακερέλα αμένγκε μα τι αβάς σικλέ τι κεράς πράγματα σο ισί επικίνδυνα. Μανγκέσα τι σικλιός μερικά πράγματα σο μπορίνεσα τι κερές για τι αρακχαβές-τουτ; Ντικχέν ο ΒΙΝΤΕΟΣ.
Διαβάνεν Παροιμίες 22:3 ντα σοράν συζητίνεν σαρ μπορίνενα τι αβέν αρακχαντέ εμ ο γιαβερά εμ τούι . . .
τι κχερέστε.
τι μπουτιάτε.
κάνα κχελέσα εκ άθλημας.
κάνα οδηγίνεσα τούι ή κάνα οδηγίνελα εκ γιαβέρ τζενό.
5. Τι σεβάνες ι ζωή ι χουρντένγκι σο να μπιάντιλε ατζέκ
Ο Δαβίδ βακερντάς ότι ο Ιεχωβά πφαμπόλα σαρέ οντουλένγκε σο αβένα-πες καζόμ εκ χουρντό μπαριόλα αντρέ κο περ πι νταγιάκο. Διαβάνεν Ψαλμός 139:13-17 ντα σοράν συζητίνεν ι ερώτηση:
Κι Ιεχωβάσκε γιακχά, κάνα αρχίνελα η ζωή εκχέ τζενέσκι, κάνα ατσσόλα κχαμνί η ντάι ή κάνα μπιανέλα;
Ο νόμοι σο ντινάς ο Ιεχωβά κο πουρανό Ισραήλ αρακχαβένας ι νταΐν ντα λένγκε χουρντέν σο να μπιάντιλεας ατζέκ. Διαβάνεν Έξοδος 21:22, 23 ντα σοράν συζητίνεν ο ερωτήσεις:
Σαρ ντικχέλας ο Ιεχωβά εκχέ τζενές σο μουνταρέλας κατά λάθος εκχέ χουρντές σο να μπιάντιλοας ατζέκ;
Σαρ κα νιωθίνελας ο Ιεχωβά άμα εκ τζενό κα κερέλας-λες ανταβά επίτηδες;b
Σαρ ντικχίντιβελα τούκε ανταβά σο πακιάλα ο Ντεβέλ;
Ατζέ-ντα εκ τζουβέλ σο πακιάλα ότι η ζωή τθερέλα αξία μπέκιμ τι νιωθίνελ ότι ο περαβκιαριπέ ισί ο μόνος πράγμας σο μπορίνελα τι κερέλ. Διαβάνεν Ησαΐας 41:10 ντα σοράν συζητίνεν ο ερωτήσεις:
Άμα εκχέ τζουβλιά πιένενα-λα τι περαβκιαρέλ-πες, κάσταρ πρέπει τι μανγκέλ βοήθεια; Σόσκε βακερέσα-λες ανταβά;
ΜΕΡΙΚΑ ΤΖΕΝΕ ΒΑΚΕΡΕΝΑ: «Κάθε τζουβέλ τθερέλα ο δικαίωμας τι αποφασίνελ άμα κα περαβκιαρέλ-πες ή όχι—λάκο ισί ο σώμας».
Σο κερέλα-τουτ τι αβές σίγουρος ότι ι Ιεχωβάσκε τθερέλα αξία εμ ι νταγιάκι ζωή αλλά εμ λάκε χουρντέσκι σο να μπιάντιλο ατζέκ;
ΧΑΝΙΚ ΛΑΦΙΝΤΖΑΡ
Η Γραφή σικλιαρέλα-αμέν τι μανγκάς, τι σεβάνας ντα τι αρακχαβάς ο δώρος ι ζωγιάκο σο ντινάς αμέντε ο Ιεχωβά. Αντρέ ανταλέστε ισί εμ αμαρί ζωή εμ ι γιαβερένγκι.
Σο Σικλιλάν;
Σόσκε πακιάλα ο Ιεχωβά ότι ισί μπουτ σημαντική η ζωή ι τζενένγκι;
Σαρ νιωθίνελα ο Ιεχωβά κάνα εκ τζενό μουνταρέλα επίτηδες εκχέ γιαβερές ή άμα βοβ κορκορό μουνταρέλα-πες;
Σόσκε εκτιμίνεσα τούι ο δώρος ι ζωγιάκο;
ΡΟΝΤΕ
Σαρ μπορίνασα τι βακεράς ευχαριστώ ι Ιεχωβάσκε για το δώρος ι ζωγιάκο;
Σίκλιουβ ι απάντηση κι ερώτηση: «Κα συγχωρίνελ ο Ντεβέλ εκχέ τζουβλιά σο περαβκιαρντάς-πες;»
«Σο Βακερέλα η Αγία Γραφή ι Περαβκιαριμάσκε;» (Θέμας κο ιστότοπος)
Ντικχ σαρ πρέπει τι επηρεάνελ-τουτ ο τρόπος σο ντικχέλα ο Ντεβέλ ι ζωή κάνα τραμπίνεσα σαρ κα νακχές λατσσές.
«“Επικίνδυνα Αθλήματα” —Πρέπει τι Τσσουβέν Τουμαρί Ζωή σε Κίνδυνος;» (Ξύπνα! 8 Οκτωβρίου 2000)
Ντικχ σαρ μπορίνελα η Γραφή τι βοηθίνελ εκχέ τζενές σο σκεφτίνελα τι μουνταρέλ-πες.
a Ο Ιεχωβά πφαμπόλα μπουτ οντουλένγκε σο τθερένα πφανγκό γκι. (Ψαλμός 34:18) Αγαβέλα ι ντουκχ σο μπέκιμ τι κερέλ εκχέ τζενές τι μανγκέλ τι μουνταρέλ-πες ντα μανγκέλα τι βοηθίνελ-λες. Για τι ντικχές καζόμ μπαρί βοήθεια μπορίνελα τι ντελ ο Ιεχωβά, διάβανε ο θέμας «Μανγκάβα τι Μεράβ—Μπορίνελα τι Βοηθίνελ-μαν η Αγία Γραφή Άμα Σκεφτίναβα τι Μουνταράβ-μαν;» σο ισί οτθέ σο βακερέλα «Ρόντε» ανταλέ μαθημάστε.
b Ο τζουβλιά σο περαβκιαρντέ-πες να χρειαζίντιβελα τι χαν-λεν ο τύψεις, επειδή ο Ιεχωβά μπορίνελα τι συγχωρίνελ-λεν. Για τι σικλιός πο μπουτ, ντικχ ο θέμας «Σο Βακερέλα η Αγία Γραφή ι Περαβκιαριμάσκε;» σο ισί οτθέ σο βακερέλα «Ρόντε» ανταλέ μαθημάστε.