Η Αγάπη Βοηθίνελα-αμέν τι Νταϊντίνας ο Μίσος

1. Σόσκε δεν πρέπει τι σαστίνας σο ο ντουνιάς μισίνελα-αμέν σαρ βακερέλα ο εδάφιος Ματθαίος 24:9;

Ο ΙΕΧΩΒΑ κερντάς-αμέν για τι μανγκάς ντα τι μανγκέν-αμέν. Οτθάρ, κάνα εκ τζενό μισίνελα-αμέν, ντουκχάσα, ντα μπορεί ατζέ-ντα τι νταράσα. Για παράδειγμας, η Τζορτζίνα, εκ πφεν σο τζουβντιόλα κι Ευρώπη, βακερέλα: «Κάνα ισινόμας 14 μπρεσένγκι, μι ντάι μισίνελας-μαν σόσκε υπηρετίναβας ι Ιεχωβάς. Νιωθίναβας ότι καέκ να μανγκέλας-μαν ντα αρχισάλομ τι σκεφτίναβ ότι να ισινόμας λατσσί τζενί».b Εκ πφραλ, ο Ντανίλο, βακερέλα: «Κάνα μερικοί στρατιώτες νταπλέ-μαν, κουσλέ-μαν ντα απειλιντέ-μαν επειδή ισινόμ Μάρτυρας ι Ιεχωβάσκο, νταρασάλομ μπουτ ντα νιωσάλομ μπουτ μπέτι». Κάνα ο γιαβερά μισίνενα-αμέν, ντουκχάσα αλλά ανταβά να κερέλα-αμέν τι σαστίνας. Ο Ιησούς βακερντάας ότι κα μισίνενας-αμέν.​—Διαβάνεν Ματθαίος 24:9.

2, 3. Σόσκε ο ντουνιάς μισίνελα ι Ιησούσκε μαθητέν;

² Ο ντουνιάς μισίνελα ι Ιησούσκε μαθητέν. Σόσκε; Επειδή σαρ ο Ιησούς, αντικάς αμέν-ντα “να τθεράσα καέκ σχέση ανταλέ ντουνιάσαρ”. (Ιωάν. 15:​17-19) Οντουλέσκε, παρόλο σο σεβάνασα ι τζενένγκε κυβερνήσεις, να ντάσα λατρεία ούτε λέντε ούτε κο σύμβολα σο τθερένα. Ντάσα λατρεία σάντε ι Ιεχωβάς. Υποστηρίνασα ο δικαίωμας σο τθερέλα τι κερέλ κουμάντος ι τζενέν παρόλο σο ο Μπενγκ ντα λέσκο «προσάγγονος» βακερένα ότι να τθερέλα ανταβά δικαίωμας. (Γέν. 3:​1-5, 15) Βακεράσα ότι σάντε η Βασιλεία ι Ντεβλέσκι μπορίνελα τι λύνελ ι τζενένγκε προβλήματα ντα ότι ατζεχάνικ κα καταστραφίνελ σαρέ οντουλέν σο τζάνα λάσαρ κόντρα. (Δαν. 2:​44· Αποκ. 19:​19-21) Ανταλά λάφια ισί λατσσέ αμπέρια ι λατσσέ τζενένγκε αλλά μπέτι αμπέρια ι πφιρνέ τζενένγκε.​—Ψαλμ. 37:​10, 11.

³ Εκ γιαβέρ λόγος σο μισίνενα-αμέν ισί επειδή τζουβντιάσα αντικάς σαρ βακερένα ο δίκαιοι κανόνες ι Ντεβλέσκε. Ανταλά κανόνες ισί μπουτ διαφορετικοί οντουλένταρ σο βακερένα ο τζενέ ανταλέ ντουνιάσκε. Για παράδειγμας, μπουτ τζενέ αντιβές βακερένα ότι νανέ μπέτι τι κεράς λουμνικανέ πράγματα σαρ οντουλά σο κερένας ο τζενέ κο Σόδομα ντα κο Γόμορρα σο καταστραφισάλε οντουλένγκε σο κερένας! (Ιούδα 7) Επειδή κεράσα ο κανόνες ι Γραφιάκε σο τθερένα τι κερέν ασακέ πραγματέντζαρ, μπουτ τζενέ πρασάνα-αμέν ντα βακερένα ότι ισινάμ κολλημέ!​—1 Πέτρ. 4:3, 4.

4. Καλά ιδιότητες ντένα-αμέν ζορ κάνα ο τζενέ μισίνενα-αμέν;

⁴ Σο κα βοηθίνελ-αμέν τι νταϊντίνας κάνα ο τζενέ μισίνενα-αμέν ντα προσβαλίνενα-αμέν; Πρέπει τι πακιάς σαρέ αμαρέ γκίσαρ ότι ο Ιεχωβά κα βοηθίνελ-αμέν. Σαρ ασπίδα, αμαρί πίστη τθερέλα ι ζορ τι σταματίνελ «σαρέ ο βέλη ι πφιρνέσκε σο τθερένα γιακ». (Εφεσ. 6:​16) Αλλά να ερεσέλα σάντε τι τθεράς πίστη. Πρέπει τι τθεράς αγάπη-ντα. Σόσκε; Επειδή η αγάπη «να νευριάνελα». Αντιχίνελα ντα νταϊντίνελα σαρέ ο πράγματα σο κερένα-αμέν τι ντουκχάς. (1 Κορ. 13:​4-7, 13) Για τι ντικχάς ακανά σαρ η αγάπη ι Ιεχωβάσκε, αμαρέ πφραλένγκε, ατζέ-ντα αμαρέ ντουσμανίνγκε βοηθίνελα-αμέν τι νταϊντίνας ο μίσος.

Η ΑΓΑΠΗ Ι ΙΕΧΩΒΑΣΚΕ ΒΟΗΘΙΝΕΛΑ-ΑΜΕΝ ΤΙ ΝΤΑΪΝΤΙΝΑΣ Ο ΜΙΣΟΣ

5. Σαρ ντινάς ζορ ι Ιησούς η αγάπη σο τθερέλας πι Νταντέσκε;

⁵ Ι ιράτ πριν τι μουνταρέν-λες λέσκε ντουσμάνια, ο Ιησούς βακερντάς πι πιστέ μαθητένγκε: «Μανγκάβα ι Νταντές, [οντουλέσκε] κεράβα ντιπ οντουβά σο βακερντάς μάνγκε ο Ντατ τι κεράβ». (Ιωάν. 14:​31) Η αγάπη σο τθερέλας ο Ιησούς ι Ιεχωβάσκε ντινάς-λες ζορ για τι νταϊντίνελ ο δοκιμασίες σο ισινέ ανγκλά-λέστε. Αμαρί αγάπη ι Ιεχωβάσκε μπορίνελα τι κερέλ ο ίδιος αμένγκε-ντα.

6. Σαρ νιωθίνενα ι Ιεχωβάσκε υπηρέτες σο νταϊντίνενα ο μίσος ι ντουνιάσκο σαρ βακερένα ο εδάφια Ρωμαίους 5:​3-5;

⁶ Η αγάπη σο τθερένας ι Ντεβλέσκε βοηθίνελας πάντα ι Ιεχωβάσκε υπηρετόν τι νταϊντίνεν κάνα τζάνας λέντζαρ κόντρα. Για παράδειγμας, κάνα ο μπαρό ιουδαϊκός δικαστήριος βακερντάς ι αποστολόνγκε τι τσσιναβέν ο έργος, η αγάπη σο τθερένας ι Ντεβλέσκε κερντάς-λεν τι “ντεν καν ι Ντεβλές, σο ισί πιο μπαρό σαριλένταρ, ντα όχι ι τζενέν”. (Πράξ. 5:​29· 1 Ιωάν. 5:3) Ασακί μπαρί αγάπη ντέλα ζορ αμαρέ πφραλέν-ντα αντιβές, σο μπουτ λένταρ ατσσόνα σταθεροί κάνα ο κυβερνήσεις τζάνα λέντζαρ μπαρί κόντρα. Αντίς τι χασαράς αμαρί ζορ, σκεφτίνασα ότι ισί αμένγκε προνόμιος τι νταϊντίνας ο μίσος ι ντουνιάσκο.​—Πράξ. 5:​41· διαβάνεν Ρωμαίους 5:​3-5.

7. Σο πρέπει τι κεράς άμα μερικοί αμαρέ τζενένταρ τζάνα αμέντζαρ κόντρα;

⁷ Μπέκιμ εκ κατά πιο μπαρέ δοκιμασίες τι αβέλ αμαρέ φαμιλιάταρ. Κάνα αρχίνασα τι σικλιάς ι αλήθεια, μερικοί αμαρέ φαμιλιάταρ μπορεί τι αμντίνενα ότι χουχάντιλαμ. Γιαβερά πάλι μπορεί τι πακιάνα ότι ισινάμ ντινιλέ. (Ντικχέν Μάρκος 3:​21) Ντα μπορεί τι ντένα αμένγκε βίκος ή ατζέ-ντα τι νταπένα-αμέν. Αλλά ανταβά δεν πρέπει τι κερέλ-αμέν τι σαστίνας. Ο Ιησούς βακερντάς: «Ο ντουσμάνια ι τζενέσκε κα αβέν αντράλ λέσκε φαμιλιάταρ». (Ματθ. 10:​36) Όμως, σαρ-ντα τι ντικχένα-αμέν αμαρέ τζενέ, αμέν ποτές να κα ντικχάς-λεν σαρ ντουσμάνια. Οκιά μπάνταρ, καζόμ μπαριόλα αμαρί αγάπη ι Ιεχωβάσκε, μπαριόλα αμαρί αγάπη ι τζενένγκε-ντα. (Ματθ. 22:​37-39) Αλλά ποτές να κα τσσιναβάς τι ντας καν κο νόμοι ντα κο αρχές κι Γραφιάκε σάντε για τι κεράς ο γκι εκχέ τζενέσκο.

8, 9. Σο βοηθιντάς εκχέ πφενιά τι ατσσόλ σταθερή παρόλο σο τζάνας λάσαρ μπαρί κόντρα;

⁸ Η Τζορτζίνα ατσσιλί σταθερή παρόλο σο λάκι ντάι γκιλί λάσαρ μπαρί κόντρα. Η Τζορτζίνα βακερέλα: «Μι ντάι ντα με αρχισάλαμ τι κεράς μελέτη ι Μαρτυρέντζαρ. Αλλά σιοβ μάσεκ πιο σοράν, κάνα μανγκάβας τι τζαβ κο συναθροίσεις, μι ντάι αρχισάλι τι τζαλ μάντζαρ κόντρα. Αγαντόμ ότι ασουνέλας ι αποστατόν ντα, κάνα κερέλας μάντζαρ λάφι, βακερέλας ο λάφια σο βακερένας βον. Επίσης κουσέλας-μαν, νικαβέλας μο μπαλά, ασταρέλας-μαν κατά κουρλό για τι τασαβέλ-μαν ντα φουρτίνελας μο έντυπα. Κάνα αβιλόμ 15 μπρεσένγκι, μπολντιλόμ. Για τι κερέλ-μαν τι τσσιναβάβ τι υπηρετίναβ ι Ιεχωβάς, μπουτσσαντάς-μαν σε εκ ίδρυμας σο ισινέ γιαβερά-ντα τερνέ τζουβλιά. Μερικές οντουλένταρ πίνας ναρκωτικά ντα κερένας γιαβερά-ντα μπέτι πράγματα. Κάνα τζάλα τούσαρ κόντρα εκ τζενό σο κανονικά έπρεπε τι μανγκέλ-τουτ ντα τι αρακχαβέλ-τουτ, ανταβά ισί ατζέ πιο δύσκολος».

⁹ Σο βοηθιντάς ι Τζορτζινά; Βόι βακερέλα: «Ο ντιβές σο μι ντάι αρχισάλι τι τζαλ μάντζαρ κόντρα, μόλις τελειωσάλομας ο διάβασμας σαρέ ι Γραφιάκο. Ισινόμας μπουτ σίγουρη ότι αρακχλόμας ι αλήθεια ντα νιωθίναβας μπουτ πασέ κο Ιεχωβά. Κεράβας προσευχή λέστε μπουτ φαρ ντα βοβ ασουνέλας-μαν. Κάνα μπεσάβας κο ίδρυμας, εκ πφεν καλίνελας-μαν πι κχερέστε ντα σικλιαράας-αμέν κατά Γραφή. Οντουβά βακίτι, ντένας-μαν μπουτ ζορ ο πφραλά ντα ο πφενιά κι Αίθουσα Βασιλείας. Τσσουντέας-μαν πουμαρέ φαμιλιάτε. Ντικχλόμ μι γιακχίντζαρ ότι ο Ιεχωβά ισί πιο ζουρανό σαρέ οντουλένταρ σο τζάνα αμέντζαρ κόντρα, κον-ντα τι αβέν οντουλά».

10. Σο ισινάμ σίγουροι ότι κα κερέλ ο Ιεχωβά αμαρό Ντεβέλ;

¹⁰ Ο απόστολος Παύλος γραφιντάς ότι τίποτα «ναστί τσσιναβέλα-αμέν κατά Ντεβλέσκι αγάπη, σο σικάντιβελα αντράλ κατά Χριστός Ιησούς σο ισί αμαρό Κύριος». (Ρωμ. 8:​38, 39) Παρόλο σο μπορεί τι νακχάσα δυσκολίες για χάνικ, ο Ιεχωβά κα αβέλ πάντα πασέ αμέντε για τι λοκχιαρέλ αμαρό γκι ντα για τι ντελ-αμέν ζορ. Σαρ σικλιάσα κατά Τζορτζίνα, ο Ιεχωβά βοηθίνελα-αμέν επίσης αντράλ κατά πφραλά ντα κατά πφενιά.

Η ΑΓΑΠΗ ΑΜΑΡΕ ΠΦΡΑΛΕΝΓΚΕ ΒΟΗΘΙΝΕΛΑ-ΑΜΕΝ ΤΙ ΝΤΑΪΝΤΙΝΑΣ Ο ΜΙΣΟΣ

11. Σαρ κα βοηθίνελας ι Ιησούσκε μαθητέν η αγάπη σο βακερντάς κο εδάφια Ιωάννης 15:​12, 13; Βακερέν εκ παράδειγμας.

¹¹ Ι ιράτ πριν τι μερέλ, ο Ιησούς αντάς κι γκοντί πι μαθητένγκι τι μανγκέν ο εκ ι γιαβερές. (Διαβάνεν Ιωάννης 15:​12, 13) Τζανέλας ότι, άμα κα μανγκένας ι γιαβερέν χωρίς τι ντικχέν πουμαρό συμφέρον, ανταβά κα βοηθίνελας-λεν τι ατσσόν ενωμέ ντα τι νταϊντίνεν ο μίσος ι ντουνιάσκο. Ντικχέν ο παράδειγμας ι πφραλένγκο κατά κχανγκιρί κι Θεσσαλονίκη. Από αζομάν σο κερντιλί η κχανγκιρί, ο τζενέ τζάνας κόντρα κο πφραλά οτθέ. Όμως, βον ισινέ λατσσό παράδειγμας σόσκε ατσσικιαρντέ σαστό πουμαρό γκι κο Ντεβέλ ντα σικαντέ αγάπη. (1 Θεσ. 1:3, 6, 7) Ο Παύλος βακερντάς λένγκε μα τι τσσιναβέν τι σικαβέν αγάπη ντα «τι κερέν-λες ανταβά ατζέ πιο μπουτ». (1 Θεσ. 4:9, 10) Η αγάπη κα ντέλας-λεν ι ζορ τι λοκχιαρέν πουμαρέ λαφίντζαρ οντουλέν σο τθερένας πφανγκό γκι ντα τι βοηθίνεν οντουλέν σο ισινέ μπίζουρανε. (1 Θεσ. 5:​14) Βον κερντέ ι συμβουλή ι Παυλόσκι σόσκε κι δεύτερη επιστολή σο γραφιντάς λένγκε, εκ μπρες πιο σοράν, ο Παύλος βακερντάς λένγκε: «Η αγάπη σο τθερένα ο εκ ι γιαβερέσκε μπαριόλα». (2 Θεσ. 1:​3-5) Η αγάπη σο τθερένας βοηθιντάς-λεν τι νταϊντίνεν ο δυσκολίες ντα ι κόντρα σο τζάνας λέντζαρ ο τζενέ.

12. Σαρ ο πφραλά ντα ο πφενιά εκχέ τθεμέστε σικαντέ πουμαρί αγάπη ο εκ ι γιαβερέσκε καζόμ αβέλας-πες τζένγκι;

¹² Σκεφτίνεν σο νακχλάς ο Ντανίλο ντα λέσκι ρομνί. Κάνα ο τζένγκι σο αβέλας-πες λένγκε τθεμέστε ερεσλό κι πόλη σο μπεσένας, βον να τσσιναντέ τι τζαν κο συναθροίσεις, τι κερέν ο πιο λατσσό σο μπορίνενας κο έργος ντα τι ντεν πουμαρέ χαμπιματένταρ πουμαρέ πφραλέντε ντα πφενίντε. Εκ ντιβές, στρατιώτες σο τθερένας όπλα γκιλέ πασέ κο Ντανίλο. «Βακερντέ μάνγκε τι τσσιναβάβ τι αβάβ Μάρτυρας», βακερέλα ο Ντανίλο. «Κάνα βακερντόμ όχι, νταπλέ-μαν ντα βακερντέ ότι κα μουνταρένας-μαν, αλλά πυροβολιντέ οπράλ μι σορέσταρ. Πριν τι νασέν, βακερντέ ότι κα αβένας πάλι για τι σοβέν μι ρομνιάσαρ. Αλλά αμαρέ πφραλά τσσουντέ-αμέν σουγκό εκχέ τρενόστε για τι τζας σε εκ γιαβέρ πόλη. Να κα μπιστράβ ποτές ι αγάπη σο σικαντέ οντουλά πφραλά. Κάνα ερεσλάμ κι γιαβέρ πόλη, ο πφραλά σο μπεσένας οτθέ ντινέ-αμέν χαμπίματα ντα βοηθιντέ-μαν τι αρακχάβ μπουτί ντα κχερ! Αντικάς, μπορισάλαμ τι λας αμαρέ κχερέστε γιαβερέ-ντα Μαρτυρέν σο νασλέ οντουτθάρ σο αβέλας-πες ο τζένγκι». Ασακέ ιστορίες σικαβένα ότι η αγάπη σο τθεράσα ο εκ ι γιαβερέσκε μπορίνελα τι βοηθίνελ-αμέν τι νταϊντίνας ο μίσος.

Η ΑΓΑΠΗ ΑΜΑΡΕ ΝΤΟΥΣΜΑΝΙΝΓΚΕ ΒΟΗΘΙΝΕΛΑ-ΑΜΕΝ ΤΙ ΝΤΑΪΝΤΙΝΑΣ Ο ΜΙΣΟΣ

13. Σαρ βοηθίνελα-αμέν ο άγιος πνεύμας τι νταϊντίνας κι υπηρεσία κι Ιεχωβάσκι ατζέ-ντα κάνα ο τζενέ μισίνενα-αμέν;

¹³ Ο Ιησούς βακερντάς πι μαθητένγκε τι μανγκέν πουμαρέ ντουσμανίν. (Ματθ. 5:​44, 45) Όμως, ανταβά νανέ ιτς εύκολος. Αλλά μπορίνασα τι κεράς-λες χάρη κο άγιος πνεύμας κι Ντεβλέσκο. Αντρέ κο καρπός κι πνευμάσκο ισί η αγάπη αλλά εμ η υπομονή, ο λατσσιπέ, η πραότητα ντα η εγκράτεια. (Γαλ. 5:​22, 23) Ανταλά ιδιότητες βοηθίνενα-αμέν τι νταϊντίνας ο μίσος. Μπουτ τζενέ σο τζάνας κόντρα ι πφραλέντζαρ αλλαξάλε σόσκε λένγκο ρομ, λένγκι ρομνί, λένγκο τσσαβό ή λένγκο γείτονας σικαντάς ανταλά ιδιότητες. Ντα μπουτ λένταρ ακανά ισί πφραλά ντα πφενιά, ντα μανγκάσα-λεν μπουτ. Οντουλέσκε, άμα ισί τουμένγκε δύσκολος τι μανγκέν οντουλέν σο μισίνενα-τουμέν σάντε επειδή υπηρετίνενα ι Ιεχωβάς, τι κερέν προσευχή για τι λεν άγιος πνεύμας. (Λουκ. 11:​13) Ντα τι αβέν μπουτ σίγουροι ότι ο ντρομ ι Ντεβλέσκο ισί πάντα ο πιο λατσσό.​—Παρ. 3:​5-7.

14, 15. Σαρ βοηθίντιλι η Γιασμίν κατά εδάφια Ρωμαίους 12:​17-21 τι σικαβέλ αγάπη πι ρομέσκε παρόλο σο τζάλας λάσαρ μπαρί κόντρα;

¹⁴ Σκεφτίνεν σο αβιλό-πες κι Γιασμίν, σο τζουβντιόλα κι Μέση Ανατολή. Κάνα αβιλί Μάρτυρας ι Ιεχωβάσκι, λάκο ρομ αμντίνελας ότι χουχαντέας-λα ντα προσπαθίνελας τι κερέλ-λα τι τσσιναβέλ τι υπηρετίνελ ι Ντεβλές. Προσβαλίνελας-λα συνέχεια ντα τσσουντάς γιαβερέ τζενέν, αλλά εμ εκχέ παπαζίς ντα εκχέ μαγός τι νταραβέν-λα ντα τι κατηγορίνεν-λα ότι χαλαβέλας πι φαμιλί. Ντα εκχέ συναθροισιάτε λάκο ρομ κουσλάς ι πφραλέν! Ιτιρί σαρέ ανταλέ πραγματένταρ, η Γιασμίν μπουτ φαρ ροβέλας.

¹⁵ Κι Αίθουσα Βασιλείας, ο πφραλά ντα ο πφενιά ντένας ζορ κι Γιασμίν ντα λοκχιαρένας λάκο γκι. Ο πρεσβύτεροι βακερντέ λάκε τι κερέλ οντουλά σο βακερένα ο εδάφια Ρωμαίους 12:​17-21. (Διαβάνεν) «Ισινέ δύσκολος», βακερέλα η Γιασμίν. «Αλλά μανγκλόμ κατά Ιεχωβά τι βοηθίνελ-μαν ντα κερντόμ σο νακχέλας μι βαστένταρ για τι κεράβ οντουλά σο βακερέλα η Γραφή. Οτθάρ, κάνα μο ρομ κερέλας επίτηδες λέσι ι κουζίνα, με καθαρίναβας-λα. Κάνα προσβαλίνελας-μαν, με απαντίναβας λατσσιμάσαρ. Ντα κάνα νασφάλιβελας, με ντικχάβας-λες».

16, 17. Σο σικλιόνα κατά Γιασμίν;

¹⁶ Επειδή η Γιασμίν σικαβέλας αγάπη πι ρομέσκε ευλογισάλι. Βόι βακερέλα: «Μο ρομ αρχισάλο τι ντελ μάνγκε πιο μπουτ μπέσα επειδή τζανέλας ότι βακεράβα πάντα ι αλήθεια. Αρχισάλο τι ασουνέλ-μαν με σεβασμός κάνα κεράας λάφι ι θρησκειάκε ντα βακερντάς τι κεράς ειρήνη. Ακανά βοβ ο ίδιος βακερέλα μάνγκε τι τζαβ κο συναθροίσεις. Τζάβα-λεν μπουτ πιο λατσσές μι ρομέσαρ ντα ισινάμ αγαπημέ. Πακιάβα ότι η αλήθεια κα ερεσέλ κο γκι μι ρομέσκο ντα κα αρχίνελ τι υπηρετίνελ μάντζαρ ι Ιεχωβάς».

¹⁷ Κατά Γιασμίν σικλιάσα ότι η αγάπη «αντιχίνελα-λεν σαρέ, . . . τθερέλα ελπίδα σαρέ ι πραγματένγκε, νταϊντίνελα-λεν σαρέ». (1 Κορ. 13:4, 7) Ο μίσος μπορίνελα τι ανέλ ντουκχ, αλλά η αγάπη ισί μπουτ πιο ζουρανί. Κοβλιαρέλα ο γκι ι τζενένγκο. Ντα ανέλα χαρά κο γκι κι Ιεχωβάσκο. Αλλά ατζέ-ντα άμα οντουλά σο τζάνα αμέντζαρ κόντρα συνεχίνενα τι μισίνεν-αμέν, αμέν μπορίνασα τι αβάς ευτυχισμέ. Σαρ;

ΕΥΤΥΧΙΣΜΕ ΚΑΝΑ ΜΙΣΙΝΕΝΑ-ΑΜΕΝ

18. Σόσκε μπορίνασα τι αβάς ευτυχισμέ κάνα μισίνενα-αμέν;

¹⁸ Ο Ιησούς βακερντάς: «Ευτυχισμέ ισινέν κάνα ο τζενέ μισίνενα-τουμέν». (Λουκ. 6:​22) Να μανγκάσα τι μισίνεν-αμέν. Να μπεϊντίνασα τι τζαν αμέντζαρ κόντρα οντουλένγκε σο πακιάσα. Σόσκε όμως μπορίνασα τι αβάς ευτυχισμέ κάνα μισίνενα-αμέν; Ντικχέν τριν λόγοι. Πρώτον, κάνα νταϊντίνασα, κεράσα ο γκι ι Ντεβλέσκο. (1 Πέτρ. 4:​13, 14) Δεύτερον, αμαρί πίστη λέλα πιο μπαρί αξία ντα αβέλα πιο ζουρανί. (1 Πέτρ. 1:7) Ντα τρίτον, κα λας εκ βραβείος σο τθερέλα μπαρί αξία​—ζωή για πάντα.​—Ρωμ. 2:6, 7.

19. Σόσκε ισινέ ο απόστολοι ευτυχισμέ κάνα νταπλέ-λεν;

¹⁹ Χάνικ πιο σοράν αφού ο Ιησούς ιστίντιλο κατά μουλέ, ο απόστολοι νιωσάλε ι ευτυχία σο βακερντάας λένγκε. Κάνα νταπλέ-λεν ντα βακερντέ λένγκε τι τσσιναβέν τι κερέν έργος, βον ισινέ χαρούμενοι. Σόσκε; «Επειδή ισινέ άξιοι τι ταλαιπωρίντιβεν [ι Ιησούσκε] ναβέσκε». (Πράξ. 5:​40-42) Η αγάπη σο τθερένας πουμαρέ Κυριόσκε ισινέ πιο μπαρί κατά νταρ σο τθερένας πουμαρέ ντουσμανίνταρ. Ντα σικαβένας πουμαρί αγάπη κάνα βακερένας ο λατσσέ αμπέρια «χωρίς τι ατσσόν». Μπουτ αμαρέ πφραλένταρ αντιβές συνεχίνενα τι υπηρετίνεν πιστά παρόλο σο τθερένα δυσκολίες. Τζανένα ότι ο Ιεχωβά να κα μπιστρέλ λένγκο έργος ντα ι αγάπη σο σικαβένα λέσκε ναβέσκε.​—Εβρ. 6:10.

20. Σο κα ντικχάς κο γιαβέρ μάθημας;

²⁰ Καζόμ υπαρχίντιβελα ανταβά ντουνιάς, ο τζενέ κα μισίνεν-αμέν. (Ιωάν. 15:​19) Αλλά να χρειαζίντιβελα τι νταράς. Σαρ κα ντικχάς κο γιαβέρ μάθημας, ο Ιεχωβά “κα ντελ ζορ ντα κα αρακχαβέλ” πι αφοσιωμέ υπηρετόν. (2 Θεσ. 3:3) Οτθάρ, μα τι τσσιναβάς τι μανγκάς ι Ιεχωβάς, τι μανγκάς αμαρέ πφραλέν ντα αμαρέ πφενίν ντα τι μανγκάς ατζέ-ντα αμαρέ ντουσμανίν. Άμα κεράσα ανταγιά συμβουλή, κα ατσσάς ενωμέ ντα πνευματικά ζουρανέ, κα δοξάνας ι Ιεχωβάς ντα κα σικαβάς ότι η αγάπη ισί μπουτ πιο ζουρανί κατά μίσος.