Ο Τζενέ σο Διαβάνενα Πουτσένα

Σο μανγκέλα τι βακερέλ η εντολή: «Δεν πρέπει τι κερές καέκ ζιάνι κι ζωή εκχέ γιαβερέ τζενέσκι» σο ισί κο εδάφιος Λευιτικό 19:16, ντα σο σικλιάσα αμέν λάταρ;

Ο Ιεχωβά βακερντάς κο Ισραηλίτες τι αβέν άγιος λαός. Για τι βοηθίνελ-λεν τι αβέν άγιοι, βακερντάς λένγκε: «Δεν πρέπει τι τζας ακατάρ ντα οκουτάρ για τι βακερές ψέματα σο χαλαβένα ι γιαβερένγκο ναβ. Δεν πρέπει τι κερές καέκ ζιάνι κι ζωή εκχέ γιαβερέ τζενέσκι. Με ισινόμ ο Ιεχωβά».—Λευιτ. 19:2, 16.

Κο εβραϊκός κείμενος, ο λάφια “τι κερές ζιάνι κι ζωή εκχέ γιαβερέ τζενέσκι” διαβάντιβενα «τι τζας κόντρα κο ρατ εκχέ γιαβερέ τζενέσκο», αλλά σο μανγκένα τι βακερέν; Εκ Ιουδαϊκός βιβλίος σο κερέλα λάφι ι Λευιτικόσκε βακερέλα: «Ανταλά λάφια ι εδαφιόσκε ισί . . . δύσκολος τι αγαβάς-λεν σόσκε ναστί αγαβάσα ντιπ λατσσές σο μανγκένα τι βακερέν κο εβραϊκά [ανταλά] λάφια».

Μερικά σπουδαγμέ τζενέ βακερένα ότι ανταλά λάφια ταιριάνενα ι εδαφιόσαρ 15, σο βακερέλα: «Δεν πρέπει τι αβέν άδικοι κάνα κρίνενα. Δεν πρέπει τι τσσίντες εκχέ τζενέσταρ επειδή ισί τσορορό ή χουλανό. Με δικαιοσύνη πρέπει τι κρίνες ι τζενέν». (Λευιτ. 19:15) Άμα ισί αντικάς, η εντολή σο ισί κο εδάφιος 16 μα τι τζας κόντρα εκχέ γιαβερέστε κα μανγκέλας τι βακερέλ ότι ο Ισραηλίτες δεν έπρεπε τι κερέν καέκ αδικία κο δικαστήρια, κι μπουτί σο κερένας ή κι φαμιλί. Ντα εκ Ισραηλίτης δεν έπρεπε τι κερέλ καέκ αδικία για τι κερέλ λατσσιπέ πέσκε. Ισί μπαγιά ότι ναστί κεράσα ανταλά πράγματα, αλλά ισί ατζέκ εκ γιαβέρ πο λογικός τρόπος τι αγαβάς ο λάφια σο ισί κο εδάφιος 16.

Ντικχέν ο λάφια σο ισί κι αρχή ανταλέ εδαφιόσκι. Ο Ντεβέλ βακερέλα πι λαόσκε μα τι τζαλ ακατάρ ντα οκουτάρ για τι βακερέλ ψέματα σο χαλαβένα ι γιαβερένγκο ναβ. Ισί μπαγιά ότι εκ τζενό σο κερέλα κουτσομπολιός ανέλα προβλήματα. Αλλά ισί πο μπέτι τι βακερέλ εκ τζενό ψέματα για τι χαλαβέλ ι γιαβερένγκο ναβ. (Παρ. 10:19· Εκκλ. 10:12-14· 1 Τιμ. 5:11-15· Ιακ. 3:6) Εκ τζενό βακερέλα ασακέ ψέματα ο πο μπουτ φαρ για τι κερέλ ζιάνι εκχέ γιαβερέσκε. Εκ ασακό τζενό μπέκιμ τι βακερέλ ψέματα εκχέ γιαβερέ τζενέσκε, ατζέ-ντα άμα ανταβά μπέκιμ τι ανέλ ο μεριπέ οντουλέ τζενέσκο. Ανέν τουμαρέ γκοντιάτε ότι μερικά τζενέ βακερντέ ψέματα για τι χαλαβέν ι Ναβουθέσκο ναβ, ντα ανταβά κερντάς μερικέ τζενέν τι φουρτίνεν λέσκε μπαρά μέχρι σο μουλό. (1 Βασ. 21:8-13) Βα, εκ τζενό σο βακερέλα ψέματα σο χαλαβένα ι γιαβερένγκο ναβ κα μπορίνελας τι κερέλ ζιάνι κι ζωή εκχέ γιαβερέ τζενέσκι, σαρ βακερέλα πο σοράν ο εδάφιος Λευιτικό 19:16.

Επίσης, εκ τζενό μπέκιμ τι βακερέλα ψέματα σο χαλαβένα ι γιαβερένγκο ναβ επειδή μισίνελα-λες. Κο εδάφιος 1 Ιωάννη 3:15 βακερέλα: «Κον μισίνελα πι πφραλές ισί δολοφόνος, ντα τζανένα ότι καέκ δολοφόνος να κα λελ αιώνια ζωή». Ντα ισί σημαντικός ότι, σοράν κατά εδάφιος 16, ο Ντεβέλ βακερντάς: «Δεν πρέπει τι τθερές μίσος τι πφραλέσκε αντρέ τι γκίστε».—Λευιτ. 19:17.

Άρα, ο περίεργα λάφια σο ισί γραμμέ κο εδάφιος Λευιτικό 19:16 ισί μπουτ ζουρανί συμβουλή ι Χριστιανόνγκε. Πρέπει τι νασκιαράς ο μπέτι σκέψεις, ντα ποτές μα τι βακεράς ψέματα σο χαλαβένα ι γιαβερένγκο ναβ. Για τι βακεράς-λες απλά, άμα “κεράσα ζιάνι” εκχέ τζενέσκε, δηλαδή άμα βακεράσα ψέματα σο χαλαβένα ο ναβ οντουλέ τζενέσκο επειδή να χοΐνασα-λες ή ισινάμ χολιαμέ λέσαρ, ανταβά μπέκιμ τι σικαβέλα ότι μισίνασα-λες. Ο Χριστιανοί δεν πρέπει τι τθερέν μίσος καεκχέσκε.—Ματθ. 12:36, 37.

Σο μανγκέλα τι βακερέλ η εντολή: «Δεν πρέπει τι κερές καέκ ζιάνι κι ζωή εκχέ γιαβερέ τζενέσκι» σο ισί κο εδάφιος Λευιτικό 19:​16, ντα σο σικλιάσα αμέν λάταρ;

Σο μανγκέλα τι βακερέλ η εντολή: «Δεν πρέπει τι κερές καέκ ζιάνι κι ζωή εκχέ γιαβερέ τζενέσκι» σο ισί κο εδάφιος Λευιτικό 19:16, ντα σο σικλιάσα αμέν λάταρ;