Ο Τζενέ σο Διαβάνενα Πουτσένα

Σο βακερέλα η Αγία Γραφή ι σοβελίνγκε;

Εκ τζενό χάλα σοβέλ για τι σικαβέλ ότι κάτι ισί μπαγιά ή για τι ντελ πο λάφι ότι κα κερέλ κάτι. Μπουτ φαρ ο τζενό σο κερέλα-λες ανταβά τσσουβέλα ι Ντεβλές σαρ μάρτυρας. Ο τζενό σο χάλα σοβέλ μπορίνελα είτε τι βακερέλ-λα λαφίντζαρ είτε τι γραφίνελ-λα.

Ισί τζενέ σο μπέκιμ αμντίνενα ότι νανέ λατσσό τι χας σοβέλ σόσκε ο Ιησούς βακερντάς: «Μα χαν ιτς σοβέλ . . . Αλλά τουμαρό “Βα” τι αβέλ βα, τουμαρό “Όχι”, όχι, σόσκε σαρέ εκτός ανταλέ λαφίνταρ αβένα κατά πφιρνό». (Ματθ. 5:33-37) Όμως, ο Ιησούς τζανέλας ότι πιστοί υπηρέτες ι Ντεβλέσκε χαλέας σοβέλ ντα ότι ο Μωσαϊκός Νόμος βακερέλας ι Ισραηλιτένγκε τι χαν σοβέλ μερικέ πραγματένγκε. (Γέν. 14:22, 23· Έξοδ. 22:10, 11) Επίσης, τζανέλας ότι ατζέ-ντα ο Ιεχωβά χαλάας σοβέλ. (Εβρ. 6:13-17) Άρα, ο Ιησούς να μανγκέλας τι βακερέλ ότι δεν πρέπει ποτές τι χας σοβέλ. Οντουβά σο μανγκέλας τι βακερέλ ισινέ μα τι χας σοβέλ πραγματένγκε σο νανέ σημαντικά. Πρέπει τι ατσσικιαράς πάντα αμαρό λάφι, σόσκε ανταβά μανγκέλα ο Ιεχωβά τι κεράς.

Σο πρέπει τι κερέν άμα κα μανγκέν τουμένταρ τι χαν σοβέλ; Πρώτα, αβέν σίγουροι ότι μπορίνενα τι κερέν οντουβά σο κα βακερέν τουμαρέ σοβελιάτε. Άμα να ισινέν σίγουροι, πο λατσσές μα τι χαν σοβέλ. Ο Λάφι ι Ντεβλέσκο βακερέλα: «Πο λατσσές μα τι ντες το λάφι εκχέ πραγμάσκε, παρά τι ντες-λες ντα μα τι κερές-λες». (Εκκλ. 5:5) Σοράν, ντικχέν αρχές ι Γραφιάκε σο βακερένα ι σοβελιάκε, ντα τραμπίνεν οντουβά σο μουκχέλα-τουμέν τουμαρί συνείδηση τι κερέν. Καλά ισί μερικές αρχές ι Γραφιάκε;

Εκ μουρς χάλα σοβέλ κο δικαστήριος. Λέσκο δεξίς βας ισί οπρέ ντα λέσκο αριστερός ισί οπράλ εκχέ Γραφιάτε.

Μερικά σοβελιά να τζάνα κόντρα κο Ντεβέλ. Για παράδειγμας, ο Μάρτυρες ι Ιεχωβάσκε ντένα πουμαρό λάφι κάνα παντρίνενα. Κάνα κερένα-λες ανταβά, ισί σαρ τι χάνα σοβέλ. Ανγκλάλ κο Ντεβέλ ντα κο μάρτυρες, η μπορί ντα ο τζαμουτρό ντένα πουμαρό λάφι ότι κα μανγκέν, κα αρακχαβέν ντα κα σεβάνεν ο εκ ι γιαβερές ντα ότι κα κερέν-λες ανταβά “καζόμ-ντα βακίτι κα τζουβντιόν ο ντούι-ντα”. (Γιαβερά ζευγάρια μπέκιμ μα τι βακερένα ανταλά λάφια κάνα παντρίνενα, αλλά βον-ντα ντένα πουμαρό λάφι ανγκλάλ κο Ντεβέλ.) Βακέρντιβενα αντρόγυνος, ντα πρέπει τι ατσσόν παντριμέ σαρί πουμαρί ζωή. (Γέν. 2:24· 1 Κορ. 7:39) Ανταγιά σοβέλ σο ντιντιόλα κο μπιαβ, ισί σωστή ντα να τζάλα κόντρα κο Ντεβέλ.

Μερικά σοβελιά τζάνα κόντρα κο Ντεβέλ. Εκ αληθινός Χριστιανός να κα χάλας εκ σοβέλ σαρ ισί τι λελ όπλα για τι αρακχαβέλ εκ τθεμ ή για τι τσσιναβέλ τι υπηρετίνελ ι Ντεβλές. Κάτι ασακό κα τζάλας κόντρα κο εντολές κι Ντεβλέσκε. Ο Χριστιανοί δεν πρέπει τι “τθερέν καέκ σχέση ανταλέ ντουνιάσαρ”, οτθάρ να ανακατούντιβασα κο κόντρες ντα κο τζένγκια σο κερέλα.—Ιωάν. 15:19· Ησ. 2:4· Ιακ. 1:27.

Μερικά σοβελιά τθερένα τι κερέν αμαρέ συνειδησιάσαρ. Μπάζιμα για τι χας εκ σοβέλ, χρειαζίντιβελα τι σκεφτίνας λατσσές ι συμβουλή σο βακερντάς ο Ιησούς τι “ντας οντουλά σο ισί ι Καισαράσκε κο Καίσαρας, αλλά οντουλά σο ισί ι Ντεβλέσκε κο Ντεβέλ”.—Λουκ. 20:25.

Βακερέν, για παράδειγμας, ότι εκ Χριστιανός κερέλα πο χαρτιά για τι λελ υπηκοότητα ή διαβατήριος, ντα σικλιόλα ότι πρέπει τι χαλ σοβέλ. Άμα κι σοβέλ σο πρέπει τι χαλ χρειαζίντιβελα τι ντελ πο λάφι τι κερέλ κάτι σο τζάλα κόντρα κο νόμος κι Ντεβλέσκο, λέσκι συνείδηση σο σικλιαρντάς-λα κατά Γραφή να κα μουκχέλας-λες τι χαλ ανταγιά σοβέλ. Όμως, η κυβέρνηση μπέκιμ τι μουκχέλ-λες τι αλλάνελ ο λάφια ι σοβελιάκε για τι αβέν αντικάς σαρ μουκχέλα-λες λέσκι συνείδηση.

Άμα εκ τζενό κα αλλάνελ ο λάφια οντουλέ σοβελιάκε, μπέκιμ η σοβέλ να κα τζαλ κόντρα κι αρχή κι Γραφιάκι σο ισί κο εδάφιος Ρωμαίους 13:1: «Σαρέ τι ντεν καν οντουλέντε σο τθερένα ι ζορ τι κερέν κουμάντος». Οτθάρ, ο Χριστιανός μπέκιμ τι τραμπίνελ ότι νανέ λάθος τι χαλ σοβέλ τι κερέλ κάτι σο ο Ντεβέλ βακερέλα λέσκε τι κερέλ.

Επίσης, ισί σημαντικός τι ασουνέν τουμαρί συνείδηση άμα κα μανγκέν τουμένταρ τι χρησιμοποιήνεν εκ πράγμας ή τι κερέν κάτι τουμαρέ βαστέντζαρ κάνα χάνα σοβέλ. Ο πουρανέ Ρωμαίοι ντα ο Σκύθες χάνας σοβέλ πουμαρέ σπαθίντε, κο σύμβολος σο τθερέλας εκ ντεβέλ ι τζενγκίσκο, για τι σικαβέν ότι ισί μπεσαλήδες. Ο τζενέ κι πουρανί Ελλάδα βάντενας πουμαρό βας κάρινγκ κο ουρανός κάνα χάνας σοβέλ. Αντικάς, σικαβένας ότι ισί εκ ντεβέλ σο ντικχέλα οντουλά σο βακέρντιβενα ντα κερντιόνα ντα σο λέστε πρέπει τι ντεν λογαριασμός ο τζενέ.

Όμως, εκ υπηρέτης ι Ιεχωβάσκο να κα χάλας σοβέλ εκχέ συμβολόστε ι τθεμέσκο σο τθερέλα τι κερέλ ι ψεύτικε θρησκειάσαρ. Αλλά σο κα κερέν άμα κα μανγκέν τουμένταρ εκχέ δικαστηριόστε τι τσσουβέν τουμαρό βας οπράλ κι Γραφή ντα τι χαν σοβέλ ότι κα βακερέν ι αλήθεια; Άμα ισί αντικάς, μπέκιμ τι τραμπίνεν τι κερέν-λες, αφού η Γραφή βακερέλα πιστέ τζενένγκε σο κερντέ κάτι πουμαρέ βαστέντζαρ καζόμ χάνας σοβέλ. (Γέν. 24:2, 3, 9· 47:29-31) Ισί σημαντικός τι ντεν-τουμέν γκοντί ότι, άμα κα χαν εκ ασακί σοβέλ, χάνα σοβέλ ανγκλάλ κο Ντεβέλ ότι κα βακερέν ι αλήθεια. Πρέπει τι αβέν έτοιμοι τι βακερέν ι αλήθεια σο-ντα κα πουτσέν-τουμέν.

Αρχές ι Γραφιάκε για τι Σκεφτίνεν

Ματθαίος 5:37: «Τουμαρό “Βα” τι αβέλ βα, τουμαρό “Όχι”, όχι».
Ιωάννης 15:19: «Να τθερένα καέκ σχέση ανταλέ ντουνιάσαρ».
Δευτερονόμιο 5:9: “Ο Ιεχωβά το Ντεβέλ . . . μανγκέλα τι ντες τι λατρεία σάντε λέστε”.
Ρωμαίους 13:1: «Ντεν καν οντουλέντε σο τθερένα ι ζορ τι κερέν κουμάντος».
Λουκάς 20:25: «Ντεν οντουλά σο ισί ι Καισαράσκε κο Καίσαρας, αλλά οντουλά σο ισί ι Ντεβλέσκε κο Ντεβέλ».
1 Πέτρου 2:12: «Ατσσικιαρέν λατσσί συμπεριφορά ανγκλάλ κο τζενέ ανταλέ ντουνιάσκε, ντα αντικάς . . . τι ντικχέν πουμαρέ γιακχίντζαρ ο λατσσέ πράγματα σο κερένα».

Επειδή η φιλία σο τθεράσα ι Ιεχωβάσαρ ισί μπουτ σημαντική αμένγκε, πρέπει τι κεράς προσευχή ντα τι σκεφτίνας λατσσές σο-ντα σοβέλ χρειαζίντιβελα τι χας για τι αβάς σίγουροι ότι να κα τζαλ κόντρα κι συνείδηση αμαρί ή κο αρχές κι Γραφιάκε. Άμα κα τραμπίνεν τι χαν σοβέλ εκχέ πραγμάσκε, ατσσικιαρέν τουμαρό λάφι σο-ντα τι αβέλ-πες.—1 Πέτρ. 2:12.