Μουκχάβα ι Ιεχωβάς τι Σικαβέλ Μάνγκε μο Ντρομ

ΚΑΤΑ ΜΑΥΡΗ ΧΩΡΑ ΚΟ ΤΑΤΟ ΓΚΙ ΚΙ ΑΦΡΙΚΙΑΚΟ

Μπιάντιλομ κο 1935 κο Ντάρλαστον, σο ισί κι Μαύρη Χώρα, εκχέ τθεμέστε κι Αγγλία σο λιντάς πο ναβ κατά καλό κάντος κι μπαρμπάλ σο νικιόλας κατά μπουτ εργοστάσια. Κάνα ισινόμας πασέ σταρέ μπρεσένγκο, μο ντατ ντα μι ντάι αρχισάλε μελέτη ι Ιεχωβάσκε Μαρτυρέντζαρ. Κάνα μπαριλόμ, αβιλόμ σίγουρος ότι ανταγιά ισινέ η αλήθεια ντα μπολντιλόμ κο 1952 σο ισινόμας 16 μπρεσένγκο.

Οντουβά βακίτι, γκιλόμ τι κεράβ μπουτί εκχέ μπαρέ εργοστασιόστε σο λατσσαρέλας χουρντέ εργαλεία ντα εξαρτήματα αυτοκινητόνγκε. Λάβας σικλιαριπέ για τι αβάβ γενικός γραμματέας, εκ μπουτί σο μπεϊντίναβας μπουτ.

Έπρεπε τι λαβ εκ σημαντική απόφαση κάνα εκ επίσκοπος σο τζάλας τθαν τθανέστε βακερντάς μάνγκε τι κεράβ αντρέ κι εβδομάδα ι Μελέτη Βιβλίου Εκκλησίας μι κχανγκιριάτε κο Γουίλενχολ. Αλλά να τζανάβας σο τι κεράβ. Αζομάν, τζάβας συναθροίσεις ντουέ κχανγκιρίντε. Αντρέ κι εβδομάδα, τζάβας συναθροίσεις κι κχανγκιρί σο ισινέ πο πασέ μι μπουτιάτε κο Μπρόμζγκροουβ, πασέ 32 χιλιόμετρα ντουρ μι κχερέσταρ. Κο σαββατοκύριακα, κάνα βουρτίναβας κο κχερ μι νταντέσκο ντα μι νταγιάκο, τζάβας κι κχανγκιρί κο Γουίλενχολ.

Μανγκάβας τι βοηθίναβ ι Ιεχωβάσκι οργάνωση, οτθάρ ασουντόμ οντουλέ επισκοπός, παρόλο σο ανταβά μανγκέλας τι βακερέλ ότι κα τσσιναβάβας κατά μπουτί σο μπεϊντίναβας αζόμ μπουτ. Επειδή αζομάν μουκχλόμ ι Ιεχωβάς τι σικαβέλ μάνγκε μο ντρομ, τθεράβας εκ μπουτ σουκάρ ζωή σο ποτές να μετανιωσάλομ.

Κι Κχανγκιρί Μπρόμζγκροουβ γνωριντόμ εκχέ σουκάρ ντα πνευματικέ πφενιά σο βακερένα λάκε Αν. Παντρισάλαμ κο 1957, ντα τθεράας γιεκ μπουτ σουκάρ προνόμια σαρ ισί ο τακτικός σκαπανικός, ο ειδικός σκαπανικός, ο έργος ι επισκοπόσκο σο τζάλα τθαν τθανέστε ντα η υπηρεσία Μπέθελ. Η Αν ντέλα-μαν χαρά σαρί μι ζωή.

Κο 1966, πουτάρντιλο αμαρό γκι κάνα νακχλάμ ι Γαλαάδ τάξη 42. Μπουτσσάντιλαμ κι Μαλάουι, σο βακέρντιβελα τατό γκι ι Αφρικιάκο επειδή ο τζενέ οτθέ σικαβένα λατσσιπέ ντα φιλοξενία. Κάι τι τζανάας ότι να κα μουκχένας-αμέν τι μπεσάς μπουτ οτθέ!

ΥΠΗΡΕΤΙΝΑΣΑ ΚΙ ΜΑΛΑΟΥΙ ΜΠΑΡΕ ΠΡΟΒΛΗΜΑΤΕΝΤΖΑΡ

Ερεσλάμ κι Μαλάουι 1 Φεβρουαρίου 1967. Κο πρώτος μάσεκ, ντινάμ μπουτ αμαρέ σαατίσταρ για τι σικλιάς ι τσσιπ ντα σοράν αρχισάλαμ ο έργος περιφερείας. Τθεράας εκ τζιπ σο μερικοί αμντίνενας ότι τζάλας παντού ντα ότι νακχέλας ατζέ-ντα λενίνταρ. Αλλά να ισινέ μπαγιά, μπορίναας τι νακχάς σάντε πανίνταρ σο να ισινέ αχόρτ. Ισινέ φαρ σο μπεσάας καλυβέντε κερντέ τσικάταρ ντα οπράλ τθερένας πουσά. Κο βακίτι κι μπρισιμένγκο, έπρεπε τι τσσουβάς μουσαμάς τελάλ κατά στέγη. Κι αρχή, αμαρό έργος σαρ ιεραπόστολοι να ισινέ ιτς εύκολος, αλλά μπεϊντίναας-λες μπουτ!

Κο Απρίλιος, αγαντόμ ότι κα αβένας προβλήματα κι Μαλάουι. Ασουντόμ κο ραδιόφωνος ο λάφια σο βακερντάς ο πρωθυπουργός ο Δρ Χέιστινγκς Μπάντα. Ο πρωθυπουργός βακερντάς ότι ο Μάρτυρες ι Ιεχωβάσκε να ποκινένα φόροι ντα ότι ανένα προβλήματα κι κυβέρνηση. Σίγουρα, ανταλά λάφια να ισινέ μπαγιά. Σαρέ τζανάας ότι ανταβά αβέλας-πες σόσκε να ανακατούντιβαας κο πολιτικά, ντα πο μπουτ σόσκε να μανγκάας τι κινάς κάρτα μέλους κατά κόμμας.

Κο Σεπτέμβριος, διαβαντάμ κι εφημερίδα ότι ο πρωθυπουργός κατηγοριντάας ι πφραλέν ότι ανένα προβλήματα σαρό κο τθεμ. Βακερντάς ότι λέσκι κυβέρνηση μπουτ σουγκό κα τσσιναβέλας ο έργος ι Ιεχωβάσκε Μαρτυρένγκο. Ανταβά αβιλό-πες 20 Οκτωβρίου 1967. Χάνικ πο σοράν, αβιλέ ο ασκέρια για τι πφάντεν ο Μπέθελ ντα για τι νασκιαρέν ι ιεραποστολόν κατά τθεμ.

Νακχλάμ τριν ντιβεσά κι φυλακή, ντα σοράν μπουτσσαντέ-αμέν εκχέ τθεμέστε σο κερέλας-λες κουμάντος η Βρετανία​—κο Μαυρίκιος. Όμως, κο Μαυρίκιος να μουκχλέ-αμέν τι μπεσάς σαρ ιεραπόστολοι. Οτθάρ, ο πφραλά μπουτσσαντέ-αμέν κι Ροδεσία (αντιβές βακέρντιβελα Ζιμπάμπουε). Κάνα ερεσλάμ οτθέ, εκ χολιαμέ ασκέρι να μουκχλάς-αμέν τι νταλντίνας κο τθεμ ντα βακερντάς: «Να μουκχλέ-τουμέν τι μπεσέν κι Μαλάουι. Να μουκχλέ-τουμέν τι μπεσέν κο Μαυρίκιος, ντα ακανά αβιλέν ατθέ». Η Αν αρχισάλι τι ροβέλ. Ντικχίντιβελας ότι καέκ να μανγκέλας-αμέν! Κάνα αβιλό-πες ανταβά, μανγκάβας τι νασάς ντα τι βουρτίνας σουγκό κι Αγγλία. Τελικά, ο ασκέρια μουκχλέ-αμέν τι σοβάς οντιά ιράτ κο Μπέθελ, αλλά βακερντέ ότι ο γιαβέρ ντιβές έπρεπε τι τζας λένγκε γραφειόντε. Ισινάμας μπουτ κχινέ, αλλά να τσσιναντάμ τι μουκχάς ο πράγματα κι Ιεχωβάσκε βαστά. Ο γιαβέρ ντιβές, οτθέ σο να μπεκλεντίναας-λες, ντιντιλί-αμέν άδεια τι μπεσάς κι Ζιμπάμπουε. Ποτές να κα μπιστράβ σαρ νιωσάλομας οντουβά ντιβές​—ισινόμας σίγουρος ότι ο Ιεχωβά σικαβέλας αμένγκε αμαρό ντρομ.

ΕΚ ΝΕΒΟ ΔΙΟΡΙΣΜΟΣ​—ΥΠΗΡΕΣΙΑ ΚΑΤΑ ΖΙΜΠΑΜΠΟΥΕ Ι ΠΦΡΑΛΕΝΓΚΕ ΚΙ ΜΑΛΑΟΥΙ

Κο Μπέθελ κι Ζιμπάμπουε, διορισάλομ κο Τμήμας Υπηρεσίας ντα μι μπουτί τθερέλας τι κερέλ ι πφραλέντζαρ κι Μαλάουι ντα κι Μοζαμβίκη. Ο τζενέ τζάνας μπουτ μπαρί κόντρα ι πφραλέντζαρ κι Μαλάουι. Εκ κατά πράγματα σο κεράβας ισινέ τι μεταφράναβ αμπέρια σο μπουτσσαβένας ο επίσκοποι περιοχής κατά Μαλάουι. Εκ ιράτ κεράβας μπουτί μέχρι αργά για τι μεταφράναβ εκ αμπέρι ντα ροβάβας σο διαβάναβας καζόμ πράγματα τσσιντικιαρένας μι πφραλέν ντα μι πφενίν.a Αλλά λάβας μπουτ ζορ-ντα σόσκε οντουλά πφραλά ατσσόνας αφοσιωμέ, πιστοί ντα νταϊντίνενας.​—2 Κορ. 6:4, 5.

Κεράας σο νακχέλας αμαρέ βαστέσταρ για τι ντας πνευματικός χαμπέ κο πφραλά σο ατσσιλέας κι Μαλάουι ντα οντουλέντε σο γκιλέας κι Μοζαμβίκη για τι γλιτώνεν. Η ομάδα σο μεταφράνελας κι τσιτσέουα, κι τσσιπ σο κερένα λάφι ο πο μπουτ τζενέ κι Μαλάουι, γκιλί κο μπαρό κτήμας εκχέ πφραλέσκο κι Ζιμπάμπουε. Βοβ σικαντάς λατσσιπέ ι πφραλένγκε ντα λατσσαρντάς λένγκε κχερά ντα εκ γραφείος. Οτθέ, συνεχιντέ πουμαρό μπουτ σημαντικός έργος σο ισινέ τι μεταφράνεν ο έντυπα.

Κάθε μπρες, κανονίντιβελας τι αβέν ο επίσκοποι περιοχής κατά Μαλάουι κι περιφερειακή συνέλευση σο αβέλας-πες κι τσσιπ τσιτσέουα κι Ζιμπάμπουε. Οτθέ, λένας ο σχέδια ι ομιλιένγκε σο κερντιόνας κι συνέλευση. Κάνα βουρτίνενας κι Μαλάουι, βακερένας ι πφραλένγκε καζόμ πο λατσσές αβέλας-πες οντουλά σο σικλιλέ κι συνέλευση. Εκ μπρες, κάνα αβιλέας κι Ζιμπάμπουε, μπορισάλαμ τι κανονίνας εκ Σχολή Διακονίας της Βασιλείας για τι λεν ζορ οντουλά μπίνταρανε επίσκοποι περιοχής.

Κο Φεβρουάριος 1975, γκιλόμ τι ντικχάβ ι Μαρτυρέν κατά Μαλάουι σο μπεσένας σαρ πρόσφυγες εκχέ τθανέστε κι Μοζαμβίκη. Οντουλά πφραλά ντένας καν κο οδηγίες κι οργανωσιάκε σαρέ κο πράγματα, εμ κι νεβί οδηγία σο βακερέλας τι αβέν πρεσβυτέρια κο κχανγκιριά. Ο νεβέ πρεσβύτεροι κανονιντέας τι αβέν-πες μπουτ πράγματα, αντρέ οντουλέντε δημόσιες ομιλίες, ο εδάφιος ι ντιβεσέσκο ντα η Σκοπιά, ατζέ-ντα συνελεύσεις. Οργανωντέας ο τθαν σο μπεσένας ο πφραλά εκχέ σειράστε σαρ τι αβέλας συνέλευση: κερντέ τμήματα ι πακλικίσκε, για τι ιλιάντιβεν χαμπίματα ντα ι αρακχαϊμάσκε. Οντουλά πιστά πφραλά κερντέας μπουτ πράγματα ι Ιεχωβάσκε βοηθειάσαρ, ντα λιντόμας μπουτ μπαρί ζορ λένταρ.

Πασέ κο 1979, ο Μπέθελ κι Ζάμπια αρχισάλο τι τθερέλ ι ευθύνη ι πφραλένγκε κι Μαλάουι. Όμως, να τσσιναντόμ τι τθεράβ μι γκοντιάτε ι πφραλέν κι Μαλάουι ντα τι προσευχίντιβαβ λένγκε σαρ κερένας μπουτ γιαβερά-ντα. Μπουτ φαρ, αμέν σο ισινάμας κι Επιτροπή του Τμήματος κι Ζιμπάμπουε, γκιντίντιβαας για τι κεράς λάφι ι πφραλέντζαρ σο μπουτσσάντιβενας κατά παγκόσμια κεντρικά γραφεία, αλλά εμ υπεύθυνε πφραλέντζαρ κατά Μαλάουι, κατά Νότια Αφρική ντα κατά Ζάμπια. Κάθε φαρ, πουτσάας-λεν ο ίδιος πράγμας: «Ισί κάτι γιαβέρ σο μπορίνασα τι κεράς ι πφραλένγκε κι Μαλάουι;»

Καζόμ νακχέλας ο βακίτι, ο τζενέ τζάνας πο χάνικ κόντρα ι πφραλέντζαρ κι Μαλάουι. Ο πφραλά σο νασλέας κατά Μαλάουι αρχισάλε χάνικ χάνικ τι βουρτίνεν, ντα οντουλά σο ατσσιλέας να τσσίντενας αζόμ μπουτ. Τθεμά σο ισινέ ντονταλάι αρχισάλε τι μουκχέν ι Ιεχωβάσκε λαός τι κερέλ ο έργος ντα ο συναθροίσεις. Η Μοζαμβίκη-ντα κερντάς-λες ανταβά κο 1991. Αλλά πουτσάας: “Κάνα κα αβέν ελεύθεροι ο Μάρτυρες ι Ιεχωβάσκε κι Μαλάουι;”

ΒΟΥΡΤΙΝΑΣΑ ΚΙ ΜΑΛΑΟΥΙ

Ο πράγματα κι Μαλάουι αλλαξάλε, ντα κο 1993 η κυβέρνηση μουκχλάς ι Ιεχωβάσκε Μαρτυρέν τι κερέν ο έργος ντα ο συναθροίσεις. Χάνικ πο σοράν, κεράβας λάφι εκχέ ιεραποστολόσαρ ντα βοβ πουτσλάς-μαν: «Κα βουρτίνες κι Μαλάουι;» Αζομάν ισινόμας 59 μπρεσένγκο, οτθάρ βακερντόμ: «Νάα, ισινόμ μπαρό ακανά!» Όμως, οντουβά ντιβές λιντάμ εκ φαξ κατά Κυβερνών Σώμας σο βακερέλας αμένγκε ότι ο πφραλά μανγκένας τι βουρτίνας οτθέ.

Μανγκάας αμαρό διορισμός κι Ζιμπάμπουε, οτθάρ ανταγιά ισινέ δύσκολη απόφαση. Χαιρίναας μπουτ σο ισινάμας οτθέ ντα τθεράας λατσσέ αμαλέν μπουτ βακίτι. Ο Κυβερνών Σώμας σικαντάς αμένγκε μπουτ λατσσιπέ ντα βακερντάς ότι, άμα να μανγκάας, μπορίναας μα τι αλλάνας διορισμός. Οτθάρ, ισινέ αμαρέ βαστέστε τι τραμπίνας αμαρό ντρομ ντα μα τι νασάς κατά Ζιμπάμπουε. Όμως, αντάμ αμαρέ γκοντιάτε σαρ ο Αβραάμ ντα η Σάρρα ντινέ καν ι Ιεχωβάς ντα νασλέ πουμαρέ μπαρέ κχερέσταρ κάνα ισινέ πφουρέ.​—Γέν. 12:​1-5.

Τραμπιντάμ τι κεράς οντουβά σο βακερντάς αμένγκε η οργάνωση ι Ιεχωβάσκι ντα βουρτισάλαμ κι Μαλάουι 1 Φεβρουαρίου 1995, ακριβώς 28 μπρεσά οτθάρ μπερί σο γκιλάμας πρώτη φαρ οτθέ. Κερντιλί εκ Επιτροπή Τμήματος, σο λάτε ισινόμας με ντα ατζέ ντούι πφραλά, ντα μπουτ σουγκό ασταρντάμ μπουτί για τι οργανώνας οντουλά σο κερένα ο Μάρτυρες ι Ιεχωβάσκε.

Ο ΙΕΧΩΒΑ ΚΕΡΕΛΑ-ΛΕΣ ΤΙ ΜΠΑΡΙΟΛ

Ισινέ μπαρί ευλογία τι ντικχάς ι Ιεχωβάς τι κερέλ ο έργος τι μπαριόλ αζόμ σουγκό! Ο πφραλά αβγατίντιλε μπουτ ντα από περίπου 30.000 σο ισινέ κο 1993 αβιλέ πο μπουτ από 42.000 κο 1998.b Ο Κυβερνών Σώμας βακερντάς τι κερντιόλ εκ νεβό Μπέθελ για τι αβέν-πες ο μπουτ μπουτιά σο τθεράας τι κεράς. Κιντάμ εκ τθαν 120 στρέμματα κο Λιλόνγκουε, ντα διορισάλομ κι επιτροπή οικοδόμησης.

Ο πφραλ Γκάι Πιρς κατά Κυβερνών Σώμας κερντάς ι ομιλία αφιέρωσης ι νεβέ κτιριόνγκε κο Μάιος 2001. Ισινέ οτθέ πο μπουτ από 2.000 Μάρτυρες, σο ο πο μπουτ λένταρ μπολντιλέας πριν από 40 ντα πο μπουτ μπρεσά. Οντουλά πιστά πφραλά ντα πφενιά τσσιντιντέας μπουτ μπαρέ προβλήματα σαρέ οντουλά μπρεσά σο η κυβέρνηση να μουκχέλας-λεν τι κερέν ο έργος. Παρόλο σο ισινέ τσορορέ, ισινέ μπουτ χουλανέ πνευματικά. Ντα αβέλας λένγκο γκι σο ντικχένας πουμαρό νεβό Μπέθελ. Σαρό κο Μπέθελ ασούντιβενας ο ύμνοι ι Βασιλειάκε σο γκιλιάντιβενας αντικάς σαρ γκιλιαβένα-λεν ο Αφρικανοί. Ποτές να τζουβντιλόμας κάτι ασακό. Σικάντιλο ξεκάθαρα ότι ο Ιεχωβά ευλογίνελα μπουτ οντουλέν σο νταϊντίνενα πιστά κο δοκιμασίες.

Κάνα κερντιλό ο νεβό Μπέθελ, ισινόμας μπουτ χαρούμενος σο ντιντιόνας-μαν διορισμοί για τι αφιερώναβ Αίθουσες Βασιλείας. Ο κχανγκιριά κι Μαλάουι ντικχένας λατσσιπέ κατά πρόγραμμας σο τθερέλα η οργάνωση τι λατσσαρέλ σουγκό Αίθουσες Βασιλείας τθεμέντε σο ο πφραλά να τθερένα μπουτ λοβέ. Ανγκλέ, μερικά κχανγκιριά γκιντίντιβενας τθανέντε σο λατσσάρντιλεας από ευκάλυπτος. Ιτσσαρένας-λεν οπράλ καλαμίντζαρ ντα λατσσαρένας μπαρέ παγκάκια τσικάταρ για τι μπεσέν ο τζενέ. Ακανά, ο πφραλά χαιρίνενας σο πεκένας τούβλα καμινίντε σο κερντέας-λεν βον ντα σο λατσσαρένας σουκάρ νεβέ τθανά συναθροισιένγκε. Αλλά ατζέκ ατζέκ να μανγκένας τι τθερέν καρέκλες κο Αίθουσες, σόσκε σαρ βακερένα μπουτ τζενέ οτθέ: Πάντα ερεσέλα ατζέκ εκ τζενό κο παγκάκι!

Ισινέ μπουτ σουκάρ σο ντικχάβας ι Ιεχωβάς τι βοηθίνελ τζενέν τι αβέν πο ζουρανέ πνευματικά. Κερντέ μάνγκε μπουτ εντύπωση ο τερνέ Αφρικανοί σόσκε ισινέ έτοιμοι τι βοηθίνεν ντα σικλιόνας σουγκό μπουτ πράγματα κατά σικλιαριπέ σο ντέλα ι Ιεχωβάσκι οργάνωση ντα κατά έργος σο κερένας. Αρχισάλε τι λεν πο μπαρέ ευθύνες κο Μπέθελ ντα κο κχανγκιριά. Ο κχανγκιριά λιντέ ατζέ πο μπουτ ζορ κατά νεβέ επίσκοποι περιοχής σο ισινέ Αφρικανοί, ντα μπουτ λένταρ ισινέ παντριμέ. Ανταλά ζευγάρια τραμπιντέ τι κερέν πο μπουτ ι Ιεχωβάσκε ντα μα τι τθερέν ακανά ι χαρά τι κερέν τσσαβέν, παρόλο σο μπουτ τζενέ αλλά εμ λένγκι φαμιλί μπάζιμα, μπεκλεντίνενας λένταρ τι κερέν τσσαβέν.

ΟΝΤΟΥΛΑ ΣΟ ΤΡΑΜΠΙΝΤΟΜ ΝΤΙΝΕ-ΜΑΝ ΕΚ ΠΦΕΡΝΤΙ ΖΩΗ

Σοράν από 52 μπρεσά κι Αφρική, τθεράβας μερικά προβλήματα υγείας. Η Επιτροπής του Τμήματος βακερντάς τι τζας κι Βρετανία ντα ο Κυβερνών Σώμας συμφωνιντάς. Πφανγκιλό αμαρό γκι σο μουκχλάμ εκ διορισμός σο μανγκάας, αλλά η φαμιλί Μπέθελ κι Βρετανία ντέλα-αμέν μπαρί βοήθεια ακανά σο ισινάμ πφουρέ.

Πακιάβα σαρέ μι γκίσαρ ότι ο πο λατσσό πράγμας σο τραμπιντόμ τι κεράβ ισινέ ότι μουκχλόμ ι Ιεχωβάς τι σικαβέλ μάνγκε μο ντρομ κι ζωή. Άμα κα κεράβας οντουβά σο αγαβάβας με, κον τζανέλα σαρ κα αβέλας μι ζωή ακανά. Ο Ιεχωβά τζανέλας ντιπ κατά αρχή σο χρειαζίντιβαβας για τι “κεράβ μο ντρομά ίσια”. (Παρ. 3:5, 6) Κάνα ισινόμας τερνό, μπεϊντίναβας μπουτ τι σικλιάβ σαρέ ο πράγματα σο τθερένας τι κερέν ι μπουτιάσαρ εκχέ μπαρέ εταιριάτε. Όμως, η οργάνωση ι Ιεχωβάσκι, σο ισί σαρό κο ντουνιάς, πουταρντάς μάνγκε ο ντρομ για τι κεράβ μπουτ πο σουκάρ πράγματα ντα τι τθεράβ εκ πφερντί ζωή. Μάνγκε, η υπηρεσία ι Ιεχωβάσκι ισινέ ντα ατζέκ ατζέκ ισί εκ μπουτ σουκάρ ζωή!