Ο Τζενέ σο Διαβάνενα Πουτσένα
Σο μανγκέλας τι βακερέλ ο Ιησούς κάνα βακερντάς: «Μα αμντίνεν ότι αβιλόμ τι ανάβ ειρήνη»;
Ο Ιησούς σικλιαρέλας ι τζενέν τι αβέν ειρηνικοί ο εκ ι γιαβερέσαρ. Αλλά εκ φαρ βακερντάς πι αποστολόνγκε: «Μα αμντίνεν ότι αβιλόμ τι ανάβ ειρήνη κι πφουβ· να αβιλόμ τι ανάβ ειρήνη, αλλά σπαθίς. Επειδή αβιλόμ τι χωρίναβ ι τζενές πι νταντέσταρ, ντα ι τσσαγιά πι νταγιάταρ, ντα ι μποριά πι σασάταρ». (Ματθ. 10:34, 35) Σο μανγκέλας τι βακερέλ;
Ο Ιησούς να μανγκέλας τι χωρίνελ φαμιλίν, αλλά τζανέλας ότι λέσκο σικλιαριπέ κα τρουγίνελας μερικέν ανταλένταρ. Οτθάρ, οντουλά σο μανγκένας τι αβέν μαθητές ι Χριστόσκε ντα τι μπολντιόν έπρεπε τι τζανέν σο κα ανέλας λένγκε ανταγιά απόφαση. Η κόντρα κατά ρομ, κατά ρομνί ή γιαβερέ τζενένταρ κατά φαμιλί σο να πακιάνα κο Ιεχωβά κα μπορίνελας τι ανέλ δυσκολίες κι προσπάθεια σο κερένα βον τι ατσσόν πιστοί κο σικλιαριπέ κι Χριστόσκο.
Η Αγία Γραφή βακερέλα ι Χριστιανόνγκε «τι τθερέν ειρήνη σαρέ ι τζενέντζαρ». (Ρωμ. 12:18) Αλλά ο σικλιαριπέ ι Ιησούσκο μπορίνελα τι αβέλ σαρ «σπαθίς» μερικέ φαμιλίντε. Ανταβά αβέλα-πες κάνα εκ τζενό αντρέ κι φαμιλί πακιάλα κο σικλιαριπέ κι Ιησούσκο ενώ ο γιαβερά να πακιάνα ή τζάνα κόντρα ανταλέ σικλιαριμάστε. Αζομάν, οντουλά τζενέ αντράλ κατά φαμιλί αβένα «ντουσμάνια» οντουλέσκε σο τζανέλα ι αλήθεια.—Ματθ. 10:36.
Ο μαθητές ι Χριστόσκε σο τζουβντιόνα φαμιλίντε σο νανέ σαρέ κι αλήθεια, πρέπει τι σικαβέν άμα μανγκένα μπαγιά ι Ιεχωβάς ντα ι Ιησούς. Για παράδειγμας, λένγκε τζενέ σο νανέ κι αλήθεια μπέκιμ ζορισκιαρένα-λεν τι κερέν εκ γιορτή ι ψεύτικε θρησκειάκι. Κάνα ανταλά πφραλά νακχένα ανταγιά δοκιμασία, κάσκο γκι κα κερέν; Ο Ιησούς βακερντάς: «Κον μανγκέλα πι νταντές ή πι νταγιά πο μπουτ μάνταρ να αξίνελα μάνγκε». (Ματθ. 10:37) Σίγουρα, ο Ιησούς να μανγκέλας τι βακερέλ ότι, για τι αξίνας λέσκε, πρέπει τι μανγκάς αμαρέ νταντές ντα αμαρέ νταγιά πο χάνικ. Αλλά σικλιαρντάς-αμέν σαρ τι αποφασίνας καλά ισί ο πο σημαντικά πράγματα κι ζωή. Άμα αμαρέ τζενέ σο νανέ κι αλήθεια τζάνα αμέντζαρ κόντρα για μα τι ντας λατρεία ι Ιεχωβάς, αμέν να τσσιναβάσα τι μανγκάς-λεν, αλλά αγαβάσα ότι αμαρό μανγκιπέ ι Ντεβλέσκε ισί ο πο σημαντικός.
Σίγουρα, η κόντρα κατά φαμιλί μπορεί τι πφανγκέλ μπουτ αμαρό γκι. Αλλά ο μαθητές ι Ιησούσκε ντένα-πες γκοντί ακαλά λάφια: «Κον να δεχτίνελα πι ντουκχένγκο κας ντα να ακολουθίνελα-μαν να αξίνελα τι αβέλ μο μαθητής». (Ματθ. 10:38) Γιαβερέ λαφίντζαρ, ι Χριστιανόνγκε, η κόντρα κατά φαμιλί ισί αντρέ κο πράγματα σο πρέπει τι νταϊντίνεν ο μαθητές ι Χριστόσκε. Ντα πακιάνα ότι πουμαρέ λατσσέ συμπεριφοράσαρ κα κερέν πουμαρέ φαμιλίν τι κοβλιόν ντα τι ρόντεν ο λάφια ι Γραφιάκε.—1 Πέτρ. 3:1, 2.