«Ευτυχισμέ Ισί Οντουλά σο Ατσσικιαρένα Σαστό Πουμαρό Γκι» κο Ιεχωβά

1, 2. (α) Σαρ γκιλέ κόντρα μερικές κυβερνήσεις κι Ιεχωβάσκε υπηρέτες, αλλά σο κερένα βον; (β) Σόσκε μπορίνασα τι αβάς χαρούμενοι κάνα τζάνα αμέντζαρ κόντρα; (Βακερέν χάνικ λάφια ι φωτογραφιάκε-ντα σο ισί κι ανγκλαϊνί σελίδα)

ΑΚΑΝΑ, 30 ντα πο μπουτ τθεμέντε σαρό κο ντουνιάς, ο κυβερνήσεις να μουκχένα ι πφραλέν τι κερέν κάποια πράγματα ή τσσιναντέ ντιπ ο έργος. Μερικέ τθεμέντε ανταλένταρ, η κυβέρνηση τσσουντάς κι φυλακή πφραλέν ντα πφενίν. Σο γκεραλιπέ κερντέ; Κι Ιεχωβάσκε γιακχά, να κερντέ καέκ γκεραλιπέ. Οντουβά σο κερντέ ισί ότι διαβάνενα ι Γραφή ντα σικλιαρένα-πες λάταρ, βακερένα οντουλένγκε σο πακιάνα κο γιαβερά ντα τζάνα κο συναθροίσεις γιεκ πουμαρέ πφραλέντζαρ. Ατζέ, να μανγκλέ τι ανακατούντιβεν κο πολιτικά. Παρόλο σο τζάνα λέντζαρ μπουτ κόντρα, οντουλά πιστοί υπηρέτες ι Ντεβλέσκε ατσσικιαρντέ σαστό πουμαρό γκι,b ή γιαβέρτουλους σικαντέ μπαρί αφοσίωση κο Ιεχωβά. Χαιρίνενα σο κερένα-λες ανταβά!

² Μπέκιμ ντικχλέν φωτογραφίες οντουλέ μπίνταρανε Μαρτυρένταρ ντα τσσουντέν σημασία λένγκο ασαπέ. Ισί χαρούμενοι σόσκε τζανένα ότι αβέλα ι Ιεχωβάσκο γκι σο ατσσικιαρένα πουμαρό γκι σαστό λέστε. (1 Χρον. 29:​17α) Ο Ιησούς βακερντάς: «Ευτυχισμέ ισί οντουλά σο γκιλέ λέντζαρ κόντρα επειδή κερένα ο σωστός . . . Χαιρίνεν ντα τι πουτάρντιβελ τουμαρό γκι, σόσκε η ευλογία σο κα τθερέν . . . ισί μπαρί».​—Ματθ. 5:​10-12.

ΠΑΡΑΔΕΙΓΜΑΣ ΑΜΕΝΓΚΕ

3. Σο κερντέ ο απόστολοι κάνα γκιλέ λέντζαρ κόντρα σαρ βακέρντιβελα κο εδάφια Πράξεις 4:​19, 20, ντα σόσκε;

³ Αμαρέ πφραλά ντα πφενιά νακχένα οντουλά σο νακχλέ ο απόστολοι-ντα κάνα γκιλέ λέντζαρ κόντρα επειδή κερένας λάφι ι Ιησούσκε κο τζενέ. Μπουτ φαρ, ο δικαστές κο πο μπαρό ιουδαϊκός δικαστήριος «ντινέ-λεν ι εντολή μα τι κερέν λάφι ι Ιησούσκε ναβέσκε». (Πράξ. 4:​18· 5:​27, 28, 40) Σο κερντέ ο απόστολοι; (Διαβάνεν Πράξεις 4:​19, 20) Τζανένας ότι ο Ντεβέλ, σο τθερέλας πο μπαρί εξουσία, “ντινάας-λεν διαταγή τι βακερέν ο λατσσέ αμπέρια [ι Χριστόσκε] κο λαός”. (Πράξ. 10:​42) Οτθάρ, ο Πέτρος ντα ο Ιωάννης βακερντέ μπίνταρανες ότι κα ντένας καν ι Ντεβλές, μα οντουλέ δικαστέν, ντα βακερντέ ότι να κα τσσιναβένας τι κερέν λάφι ι Ιησούσκε. Ισινέ σαρ τι πουτσένας οντουλέ δικαστέν: “Σαρ αβέλα-πες τι βακερέν ότι τουμαρέ εντολές ισί πο οπρέ κατά Ντεβλέσκε;”

4. Καβά παράδειγμας μουκχλέ ο απόστολοι σαρέ ι αληθινέ Χριστιανόνγκε σαρ βακερένα ο εδάφια Πράξεις 5:​27-29, ντα σαρ μπορίνασα τι αβάς σαρ λέντε;

⁴ Ο απόστολοι μουκχλέ μπουτ σουκάρ παράδειγμας, σο ακολουθίνενα-λες σαρέ ο αληθινοί Χριστιανοί οτθάρ μπερί: “Ντάσα καν πρώτα ι Ντεβλές, σο ισί πο μπαρό σαριλένταρ, ντα όχι ι τζενέν”. (Διαβάνεν Πράξεις 5:​27-29) Ο απόστολοι χαλέ νταπ σόσκε ατσσικιαρντέ σαστό πουμαρό γκι, αλλά σοράν νασλέ χαράσαρ κατά ιουδαϊκός δικαστήριος «επειδή ισινέ άξιοι τι ταλαιπωρίντιβεν [ι Ιησούσκε] ναβέσκε», ντα να τσσιναντέ τι κερέν έργος!​—Πράξ. 5:​40-42.

5. Καλέ ερωτησιέντε χρειαζίντιβελα τι απαντίνας;

⁵ Ο παράδειγμας σο μουκχλέ ο απόστολοι ανέλα αμένγκε μερικές ερωτήσεις. Φιρειπείν, σαρ αβέλα-πες ο απόστολοι τι ντένας καν ι Ντεβλές ντα όχι ι τζενέν, αλλά τι κερένας-ντα ι διαταγή ι Γραφιάκι τι “ντας καν οντουλέντε σο τθερένα ι ζορ τι κερέν κουμάντος”; (Ρωμ. 13:1) Σαρ αβέλα-πες τι ντας καν “κο κυβερνήσεις ντα κο εξουσίες”, σαρ βακερντάς ο απόστολος Παύλος, αλλά τι ατσσικιαράς-ντα σαστό αμαρό γκι κο Ντεβέλ σο ισί ο πο μπαρό Άρχοντας;​—Τίτο 3:1.

“ΟΝΤΟΥΛΑ ΣΟ ΤΘΕΡΕΝΑ Ι ΖΟΡ ΤΙ ΚΕΡΕΝ ΚΟΥΜΑΝΤΟΣ”

6. (α) Κον ισί “οντουλά σο τθερένα ι ζορ τι κερέν κουμάντος” σο βακέρντιβενα κο εδάφιος Ρωμαίους 13:1, ντα σο ισινάμ υποχρεωμέ τι κεράς λένγκε; (β) Σόσκε τθερένα ζορ ο τζενέ σο κυβερνίνενα ντα καζόμ μπαρί ισί ανταγιά;

⁶ Διαβάνεν Ρωμαίους 13:1. Ανταλέ εδαφιόστε ο λάφι “οντουλά σο τθερένα ι ζορ τι κερέν κουμάντος” σικαβέλα ο κυβερνήσεις σο τθερένα εξουσία ντα κερένα κουμάντος ι τζενέν. Ο Χριστιανοί ντένα καν οντουλέ κυβερνησιέντε. Ο κυβερνήσεις ατσσικιαρένα ο πράγματα εκχέ σειράστε, τιμωρίνενα οντουλέν σο να ντένα καν κο νόμοι, ντα ισί φαρ σο τσσίντενα κατά λαός ι Ιεχωβάσκο. (Αποκ. 12:​16) Οτθάρ, ντιντιόλα-αμέν η εντολή τι ποκινάς ο φόροι ντα ο τέλη ντα τι ντας ι νταρ ντα ι τιμή σο μανγκένα αμένταρ. (Ρωμ. 13:7) Όμως, οντουλά κυβερνήσεις ι ντουνιάσκε τθερένα εξουσία σάντε επειδή ο Ιεχωβά μουκχέλα-λεν. Ο Ιησούς σικαντάς-λες ξεκάθαρα ανταβά κάνα ισινέ ανγκλάλ κο Ρωμαίος κυβερνήτης Πόντιος Πιλάτος. Κάνα ο Πιλάτος βακερντάς ότι τθερέλας ι ζορ τι μουκχέλ ι Ιησούς τι τζουβντιόλ ή τι μουνταρέλ-λες, ο Ιησούς βακερντάς λέσκε: «Να κα τθερέας ι ζορ τι κερές τίποτα οπρά-μάντε άμα να ντιντιλόας-τουτ ο δικαίωμας οπράλ». (Ιωάν. 19:​11) Αντιβές, η ζορ σο τθερένα σαρέ ο τζενέ σο κυβερνίνενα ντα ο πολιτικοί τθερέλα όρια σαρ τθερέλας όρια η ζορ ι Πιλατόσκι-ντα.

7. Κάνα δεν πρέπει τι ντας καν κο τζενέ σο κυβερνίνενα, ντα σο πρέπει τι ντεν-πες γκοντί βον;

⁷ Ο Χριστιανοί ντένα καν κι τζενένγκε κυβερνήσεις κάνα λένγκε νόμοι να τζάνα κόντρα κι Ντεβλέσκε νόμοι. Αλλά ναστί ντάσα καν τζενέντε σο ντένα-αμέν διαταγή τι κεράς οντουλά σο να μανγκέλα ο Ντεβέλ ή σο να μουκχένα-αμέν τι κεράς οντουλά σο μανγκέλα αμένταρ ο Ντεβέλ. Για παράδειγμας, βον μπέκιμ μανγκένα κατά τερνέ μουρσά τι τζαν κο στρατός.c Ή μπέκιμ να μουκχένα-αμέν τι διαβάνας ντα τι ντας κο τζενέ ι Μετάφραση Νεβέ Ντουνιάσκι ντα αμαρέ έντυπα, τι κεράς ο έργος ντα τι ντας λατρεία σαρέ γιεκ. Άμα ο τζενέ σο κυβερνίνενα χρησιμοποιήνενα πουμαρί ζορ μπέτι τροπόσαρ, σαρ για παράδειγμας κάνα τζάνα κόντρα κο μαθητές κι Χριστόσκε, κα ντεν λογαριασμός κο Ντεβέλ. Ο Ιεχωβά ντικχέλα!​—Εκκλ. 5:8.

8. Σο διαφορά τθερέλα ο Ιεχωβά κατά τζενένγκε κυβερνήσεις;

⁸ Ο τζενέ «σο τθερένα ι ζορ τι κερέν κουμάντος», ή γιαβέρτουλους ο κυβερνήσεις, τθερένα μπουτ εξουσία, αλλά να τθερένα ι πο μπαρί εξουσία. Ανταγιά εξουσία τθερέλα-λα σάντε ο Ιεχωβά. Μπουτ φαρ, η Αγία Γραφή βακερέλα ότι ο Ιεχωβά Ντεβέλ ισί “ο πο Μπαρό”.​—Δαν. 7:​18, 22, 25, 27.

“Ο ΠΟ ΜΠΑΡΟ”

9. Σο ντικχλάς ο προφήτης Δανιήλ κο φαντασίες;

⁹ Ο προφήτης Δανιήλ ντικχλάς φαντασίες σο σικαντέ μπουτ λατσσές ότι ο Ιεχωβά ισί πο οπρέ σαρέ κατά γιαβερά κυβερνήσεις. Ο Δανιήλ ντικχλάς πρώτα σταρ μπουτ μπαρέ θηρία σο μανγκένα τι σικαβέν μπαρέ κυβερνήσεις ι ντουνιάσκε σο κερντέ κουμάντος κο πουρανέ μπρεσά, ι Βαβυλώνα, ι Μηδοπερσία, ι Ελλάδα ντα ι Ρώμη ντα οντιά σο κερέλα κουμάντος αντιβές, ι Αγγλοαμερικανική Δύναμη. (Δαν. 7:​1-3, 17) Σοράν, ο Δανιήλ ντικχλάς ι Ιεχωβά Ντεβλές τι μπεσέλ εκχέ θρονόστε κο δικαστήριος σο ισί κο ουρανός. (Δαν. 7:9, 10) Οντουλά σο ντικχλάς σοράν οντουβά πιστός προφήτης ισί εκ προειδοποίηση οντουλένγκε σο κυβερνίνενα αντιβές.

10. Κάσκε βαστέντε ντέλα ο Ιεχωβά ι πφουβ σαρ σικαβένα ο εδάφια Δανιήλ 7:​13, 14, 27, ντα σο σικλιάσα λέσκε ανταλέσταρ;

¹⁰ Διαβάνεν Δανιήλ 7:​13, 14, 27. Ο Ντεβέλ λέλα σαρί ι εξουσία κατά τζενένγκε κυβερνήσεις ντα ντέλα-λα γιαβερέντε σο ισί πο λατσσέ ντα πο ζουρανέ. Κάστε; Εκχέστε «σο ισινέ σαρ τζενέσκο τσσαβό», κο Ιησούς Χριστός, ντα “κο άγιοι κι Πο Μπαρέσκε”, κο 144.000, σο βον κα κυβερνίνεν για πάντα. (Δαν. 7:​18) Αγαβάσα μπουτ λατσσές ότι ο Ιεχωβά ισί “ο Πο Μπαρό” σόσκε σάντε βοβ τθερέλα ι ζορ τι κερέλ κάτι ασακό.

11. Σο γιαβέρ γραφιντάς ο Δανιήλ σο σικαβέλα ότι ο Ιεχωβά ισί πο οπρέ κατά τθεμά;

¹¹ Ανταβά σο ντικχλάς ο Δανιήλ κι φαντασία ταιριάνελα εκχέ λαφίσαρ σο βακερντάας πο τζανγκλέ. “Ο Ντεβέλ”, βακερντάς ο Δανιήλ, «νικαβέλα βασιλιαδέν ντα τσσουβέλα βασιλιαδέν». Σοράν βακερντάς ότι «οντουβά σο ισί Πο Οπρέ Σαριλένταρ κερέλα κουμάντος κι τζενένγκι βασιλεία ντα . . . ντέλα-λα κάστε μανγκέλα». (Δαν. 2:​19-21· 4:​17) Ισινέ φαρ σο ο Ιεχωβά νικαντάς ή τσσουντάς βασιλιαδέν; Βα!

12. Βακερέν εκ παράδειγμας σο σικαβέλα σαρ ο Ιεχωβά νικαντάς βασιλιαδέν λένγκε θρονόνταρ κο πουρανέ μπρεσά. (Ντικχέν ι φωτογραφία)

¹² Ο Ιεχωβά σικαντάς μπουτ λατσσές ότι ισί πο οπρέ κατά τζενέ «σο τθερένα ι ζορ τι κερέν κουμάντος». Ντικχέν τριν παραδείγματα. Ο Φαραώ σο κερέλας κουμάντος κι Αίγυπτος κερντάς ι Ιεχωβάσκε υπηρετόν τι αβέν δούλοι ντα να μουκχέλας-λεν τι νασέν. Αλλά ο Ντεβέλ ελευθερωντάς-λεν ντα τασαντάς ι Φαραώς κι Ερυθρά Θάλασσα. (Έξοδ. 14:​26-28· Ψαλμ. 136:​15) Ο Βαλτάσαρ, ο βασιλιάς ι Βαβυλωνάκο, κερντάς εκ τραπέζι ντα “βαντιντάς πο νεαυτός κόντρα κο Κύριος κι ουρανόσκο” ντα “ισαρντάς ντεβλέν σο ισινέ κερντέ ασημίσταρ ντα χρυσαφίσταρ” αντίς τι ισαρέλ ι Ιεχωβάς. (Δαν. 5:​22, 23) Αλλά ο Ντεβέλ περαντάς τελέ οντουλέ μπαρικανέ τζενές. Οντιά ιράτ, ο Βαλτάσαρ μουλό ντα λέσκι βασιλεία ντιντιλί κο Μήδοι ντα κο Πέρσες. (Δαν. 5:​28, 30, 31) Ο Ηρώδης Αγρίππας Α΄, ο βασιλιάς ι Παλαιστινιάκο, ντινάς διαταγή τι μερέλ ο απόστολος Ιάκωβος ντα σοράν τσσουντάς φυλακή ι απόστολε Πετρός ντα τθερέλας πι γκοντιάτε τι μουνταρέλ-λες. Αλλά ο Ιεχωβά να μουκχλάς ι Ηρωδής τι κερέλ-λες ανταβά. «Ο άγγελος ι Ιεχωβάσκο τιμωριντάς-λες» ντα μουλό.​—Πράξ. 12:​1-5, 21-23.

13. Βακερέν εκ παράδειγμας σο σικαβέλα σαρ νικιντάς ο Ιεχωβά αρχοντέν σο γκιντισάλε σαρέ γιεκ.

¹³ Ο Ιεχωβά σικαντάς ότι ισί πο μπαρό ατζέ-ντα κατά άρχοντες σο γκιντισάλε σαρέ γιεκ. Κερντάς τζένγκι μάξους ι Ισραηλιτένγκε ντα ντινάς-λεν ι ζορ εμ τι καταστραφίνεν 31 βασιλιαδέν ι Χαναναιόνγκε σο γκιντισάλεας σαρέ γιεκ εμ τι λεν πουμένγκε μπουτ τθανά κατά Υποσχεμέ Τθεμ. (Ιησ. Ναυή 11:​4-6, 20· 12:1, 7, 24) Ατζέ, ο Ιεχωβά νικιντάς ι βασιλιάς Βεν-αδάδ ντα 32 γιαβερέ αρχοντέν σο τθερένας ο Σύριοι ντα σο γκιλέ κόντρα ι Ισραηλιτέντζαρ.​—1 Βασ. 20:1, 26-29.

14, 15. (α) Σο βακερντέ ο βασιλιάδες Ναβουχοδονόσορας ντα Δαρείος για το δικαίωμας σο τθερέλα ο Ιεχωβά τι κυβερνίνελ; (β) Καλά λάφια βακερντάς ο ψαλμωδός σο τθερένα τι κερέν ι Ιεχωβάσαρ ντα Λέσκε λαόσαρ;

¹⁴ Ο Ιεχωβά σικαντάς παλάλ γιαβερέστε ότι ισί ο Πο Μπαρό! Κάνα ο Ναβουχοδονόσορας, ο βασιλιάς ι Βαβυλωνάκο, ισαρντάς-πες πι ζοριάκε ντα πι ζουρανιμάσκε ντα βαντιντάς μπουτ πο νεαυτός, αντίς τι βακερέλ ταπεινά ότι ο Ιεχωβά ισί οντουβά σο αξίνελα ι δόξα, ο Ντεβέλ κερντάς-λες τι χασαρέλ πι γκοντί. Κάνα αγαντάς-πες, ο Ναβουχοδονόσορας “ισαρντάς Οντουλές σο Ισί Πο Οπρέ Σαριλένταρ” ντα βακερντάς ότι «η κυβέρνηση [ι Ιεχωβάσκι] ισί κυβέρνηση σο ατσσόλα για πάντα». Σοράν βακερντάς ακαβά-ντα: «Καέκ ναστί τσσιναβέλα-λες». (Δαν. 4:​30, 33-35) Κάνα ο Δανιήλ σικαντάς ότι τθερέλας σαστό πο γκι ντα ο Ιεχωβά σωντάς-λες κατά γούρνα ι λιονταρίνγκι, ο βασιλιάς Δαρείος ντινάς ακαγιά διαταγή: «Ο τζενέ πρέπει τι ιζράν νταριάσαρ ανγκλάλ κο Ντεβέλ κι Δανιηλίσκο. Σόσκε βοβ ισί ο τζουβντό Ντεβέλ ντα ατσσόλα για πάντα. Λέσκι βασιλεία να κα καταστραφίντιβελ ποτές ντα λέσκι κυβέρνηση ατσσόλα για πάντα».​—Δαν. 6:​7-10, 19-22, 26, 27.

¹⁵ Ο ψαλμωδός βακερντάς: «Ο Ιεχωβά τσσιναντάς ο πφιρνιπέ ι τθεμένγκο· να μουκχλάς ι λαόν τι κερέν οντουλά σο μανγκένας». Ντα βακερντάς ακαβά-ντα: «Ευτυχισμέ ισί ο λαός σο τθερέλα Ντεβλές ι Ιεχωβάς, ο λαός σο τραμπιντάς πέσκε». (Ψαλμ. 33:​10, 12) Μπαγιά, τθεράσα μπουτ σημαντικούς λόγους τι ατσσικιαράς σαστό αμαρό γκι κο Ιεχωβά!

Ο ΤΕΛΕΥΤΑΙΟΣ ΤΖΕΝΓΚΙ

16. Καλέ πραγμάσκε μπορίνασα τι αβάς σίγουροι κάνα κα αβέλ η «μπαρί στεναχώρια», ντα σόσκε; (Ντικχέν ι φωτογραφία)

¹⁶ Διαβαντάμ σο κερντάς ο Ιεχωβά κο πουρανέ μπρεσά. Άρα, σο μπεκλεντίνασα τι αβέλ-πες ατζεχάνικ; Μπορίνασα τι αβάς σίγουροι ότι ο Ιεχωβά κα σώνελ πι αφοσιωμέ υπηρετόν κατά «μπαρί στεναχώρια» σο αβέλα. (Ματθ. 24:​21· Δαν. 12:1) Κα κερέλ-λες ανταβά κάνα μπουτ τθεμά σο κα γκιντίντιβεν σαρέ γιεκ, ο Γωγ του Μαγώγ, κα τσσουβέν-λεν σαρέ πουμαρέ ζοριάσαρ οντουλέντζαρ σο ισί πιστοί κο Ιεχωβά σαρό κο ντουνιάς. Ατζέ-ντα άμα κα αβέν γιεκ ανταλέ τθεμέντζαρ ο 193-ντα μέλη σο ισί κο Ηνωμένα Έθνη, πάλι ναστί κα τζαν κόντρα ι Πο Μπαρέσαρ ντα λέσκε στρατόσαρ σο ισί κο ουρανός! Ο Ιεχωβά ντέλα πο λάφι: «Κα κεράβ μπαρό μο νεαυτός ντα κα αγιάναβ-μαν ντα κα κεράβ μπουτέ τθεμέν τι τζανέν-μαν· ντα σίγουρα κα σικλιόν ότι με ισινόμ ο Ιεχωβά».​—Ιεζ. 38:​14-16, 23· Ψαλμ. 46:10.

17. Σο βακερέλα η Γραφή ότι κα αβέλ-πες κο βασιλιάδες κι πφουβιάκε ντα οντουλένγκε σο ατσσικιαρένα σαστό πουμαρό γκι κο Ιεχωβά;

¹⁷ Σοράν ανταλέσταρ σο κα κερέλ ο Γωγ, κα αβέλ ο τελευταίος τζένγκι ι Ιεχωβάσκο, εκ ζουρανό τζένγκι, ο Αρμαγεδδώνας. Αζομάν, ο Ιεχωβά κα καταστραφίνελ “σαρέ ι πφουβιάκε βασιλιαδέν”. (Αποκ. 16:​14, 16· 19:​19-21) Οκιά μπάνταρ, «σάντε ο σωστοί κα μπεσέν κι πφουβ ντα κον ατσσικιαρέλα σαστό πο γκι κα ατσσόλ λάτε».​—Παρ. 2:​21, υποσ.

ΠΡΕΠΕΙ ΤΙ ΑΤΣΣΙΚΙΑΡΑΣ ΣΑΣΤΟ ΑΜΑΡΟ ΓΚΙ

18. Σο ισινέ έτοιμοι τι κερέν μπουτ αληθινοί Χριστιανοί, ντα σόσκε; (Δανιήλ 3:28)

¹⁸ Κατά πουρανέ μπρεσά μέχρι ακανά, μπουτ αληθινοί Χριστιανοί τσσουντέ σε κίνδυνος πουμαρί ελευθερία, ατζέ-ντα πουμαρί ζωή, σόσκε μανγκένα ι Ιεχωβάς, ι πο Μπαρέ Αρχοντάς. Οντουλά πιστά τζενέ ισί σαρ ο τριν Εβραίοι σο ατσσικιαρντέ σαστό πουμαρό γκι κο Ιεχωβά, κο Πο Μπαρό, ντα βοβ ατσσικιαρντάς-λεν τζουβντέ κάνα τσσουντέας-λεν κι μπαρί γιακ.​—Διαβάνεν Δανιήλ 3:28.

19. Καλέ πραγματένταρ κα κρίνελ ο Ιεχωβά πι λαός, ντα σο πρέπει τι κεράς αμέν ακανά;

¹⁹ Ο ψαλμωδός Δαβίδ γραφιντάς ακαλά λάφια για τι σικαβέλ καμπόρ σημαντικός ισί τι ατσσικιαράς σαστό αμαρό γκι κο Ντεβέλ: «Ο Ιεχωβά κα νικαβέλ απόφαση ι λαόνγκε. Κρίνε-μαν, Ιεχωβά, κατά δικαιοσύνη ντα κατά σαστό γκι σο τθεράβα». (Ψαλμ. 7:8) Ντα πάλι ο Δαβίδ γραφιντάς: «Ο σαστό γκι ντα ο σωστός ντρομ τι αρακχαβέν-μαν». (Ψαλμ. 25:​21) Ο πο λατσσό ντρομ κι ζωή ισί τι ατσσάς πιστοί κο Ιεχωβά ντα τι ατσσικιαράς αμαρί αφοσίωση λέστε σο-ντα τι αβέλ-πες. Αζομάν κα νιωθίνας σαρ ο ψαλμωδός σο γραφιντάς: «Ευτυχισμέ ισί οντουλά σο ατσσικιαρένα σαστό πουμαρό γκι . . . , οντουλά σο πφιρένα σαρ βακερέλα ο νόμος ι Ιεχωβάσκο».​—Ψαλμ. 119:1, υποσ.