Δεχτίνεν Ταπεινά Οντουλά σο Να Τζανένα

1. Σαρ κερντάς-αμέν ο Ιεχωβά ντα σόσκε;

Ο ΙΕΧΩΒΑ κερντάς-αμέν μπουτ σουκάρ τροπόσαρ. Μπορίνασα τι σκεφτίνας, τι σικλιάς νεβέ πράγματα ντα τι αγαβάς σαρ μπορίνασα τι κεράς οντουλά σο σικλιάσα. Σόσκε κερντάς-αμέν αντικάς; Μανγκέλα “τι μπορίνας τι σικλιάς ι Ντεβλέσκε” ντα τι υπηρετίνας-λες σαρέ αμαρέ γκοντιάσαρ.​—Παρ. 2:1-5· Ρωμ. 12:1.

2. (α) Καβά πράγμας πρέπει τι αγαβάς; (Ιώβ 37:23, 24) (Ντικχέν ι φωτογραφία-ντα) (β) Σόσκε ισί σημαντικός αμένγκε τι αγαβάς ότι να χρειαζίντιβελα τι τζανάς-λεν σαρέ;

² Ο Ιεχωβά κερντάς-αμέν τι μπορίνας τι σικλιάς μπουτ πράγματα. Όμως υπαρχίντιβενα μπουτ πράγματα σο να τζανάσα. (Διαβάνεν Ιώβ 37:23, 24) Σκεφτίνεν ο παράδειγμας του Ιώβ. Ο Ιεχωβά κερντάς κο Ιώβ μπουτ ερωτήσεις ντα βοηθιντάς-λες τι αγαβέλ ότι υπαρχίντιβενας μπουτ πράγματα σο να τζανέλας. Ανταβά βοηθιντάς-λες τι αβέλ πο ταπεινός ντα τι σκεφτίνελ σωστέ τροπόσαρ. (Ιώβ 42:3-6) Ισί λατσσό αμένγκε-ντα τι αγαβάς ότι να τζανάσα σαρέ ο πράγματα. Πρέπει τι ντας-αμέν γκοντί ότι υπαρχίντιβενα μπουτ πράγματα σο να τζανάσα. Ανταβά κα βοηθίνελ-αμέν τι αβάς ταπεινοί ντα τι ντας μπέσα ότι ο Ιεχωβά κα βακερέλ αμένγκε πάντα ο πράγματα σο χρειαζίντιβελα μπαγιά τι τζανάς για τι λας λατσσέ αποφάσεις.​—Παρ. 2:6.

3. Σο κα ντικχάς ανταλέ μαθημάστε;

³ Ανταλέ μαθημάστε, κα ντικχάς μερικά πράγματα σο να τζανάσα ντα ο δυσκολίες σο μπορεί τι ανέλ αμένγκε ανταβά. Επίσης κα ντικχάς σόσκε ισί λατσσό σο να τζανάσα κάποια πράγματα. Οντουλά σο κα σικλιάς κα βοηθίνεν-αμέν τι ντας μπέσα ότι ο Ιεχωβά, «Οντουβά σο τζανέλα-λεν σαρέ τέλειε τροπόσαρ», βακερέλα αμένγκε οντουλά σο χρειαζίντιβασα μπαγιά τι τζανάς.​—Ιώβ 37:16.

ΝΑ ΤΖΑΝΑΣΑ ΚΑΝΑ ΚΑ ΑΒΕΛ Ο ΤΕΛΟΣ

4. Σαρ βακερέλα κο Ματθαίος 24:36, καβά ισί εκ πράγμας σο να τζανάσα;

⁴ Διαβάνεν Ματθαίος 24:36. Να τζανάσα κάνα κα αβέλ ο τέλος ανταλέ ντουνιάσκο. Ατζέ-ντα ο Ιησούς, κάνα ισινέ κι πφουβ, να τζανέλας “ο ντιβές ντα ο σαάτι”.a Ο Ιησούς βακερντάς πι αποστολόντε ότι ο Ιεχωβά ισί οντουβά σο τθερέλα ο δικαίωμας τι αποφασίνελ καβά σαάτι κα αβέλ-πες ο κάθε πράγμας. (Πράξ. 1:6, 7) Ο Ιεχωβά αποφασιντάς κάνα κα αβέλ ο τέλος, αλλά αμέν να τζανάσα κάνα κα αβέλ.

5. Επειδή να τζανάσα κάνα κα αβέλ ο τέλος, σαρ μπορεί τι νιωθίνας;

⁵ Να τζανάσα καζόμ καιρός πρέπει τι μπεκλεντίνας μέχρι τι αβέλ ο τέλος. Οτθάρ, μπορεί τι χασαράς αμαρί υπομονή ή αμαρί ζορ, ειδικά άμα μπεκλεντίνασα μπρεσά ι Ιεχωβάσκε ντιβεσέσκε. Ή μπορεί τι χασαράς αμαρί ζορ άμα κάποια τζενέ αμαρέ φαμιλιάταρ ή κάποια γιαβερά τζενέ πρασάνα-αμέν επειδή να αβιλό ατζέκ ο τέλος. (2 Πέτρ. 3:3, 4) Μπορεί τι σκεφτίνασα ότι άμα κα τζανάας ντιπ κάνα κα αβέλας ο τέλος, κα μπορίναας πο εύκολα τι κεράς υπομονή ντα τι νταϊντίνας ο πρασαϊπέ.

6. Σόσκε ισί λατσσό σο να τζανάσα κάνα κα αβέλ ο τέλος;

⁶ Ο Ιεχωβά να βακερέλα αμένγκε ντιπ ακριβώς κάνα κα αβέλ ο τέλος. Αντικάς, ντέλα-αμέν ι ευκαιρία τι σικαβάς λέσκε ότι υπηρετίνασα-λες επειδή μανγκάσα-λες ντα ντάσα λέσκε μπέσα. Να χρειαζίντιβελα τι τθεράς εκ συγκεκριμέ ημερομηνία για τι υπηρετίνας ι Ιεχωβάς. Αμαρί πίστη να τθερέλα ημερομηνία λήξης. Άρα αντίς τι ντας μπουτ σαάτι για τι σκεφτίνας κάνα κα αβέλ «ο ντιβές ι Ιεχωβάσκο», ισί πο λατσσές τι σκεφτίνας ο λατσσέ πράγματα σο κα αβέν-πες κάνα κα αβέλ οντουβά ντιβές. Ανταβά κα βοηθίνελ-αμέν τι τζας πο πασέ κο Ιεχωβά, τι ντας λέσκε μπέσα ντα τι μαράς-αμέν για τι κεράς λέσκο γκι.​—2 Πέτρ. 3:11, 12.

7. Καλά πράγματα τζανάσα;

⁷ Ισί μπουτ σημαντικός αμένγκε τι σκεφτίνας καλά πράγματα τζανάσα. Τζανάσα ότι ο τελευταία ντιβεσά αρχισάλε κο 1914. Κι Αγία Γραφή ο Ιεχωβά ντινάς-αμέν προφητείες σο σικαβένα ότι κο μπρες 1914 κα αρχίνενας ο τελευταία ντιβεσά. Επίσης βακερέλα αμένγκε σαρ κα αβέλας ο ντουνιάς σοράν κατά μπρες ανταβά. Επειδή ανταλά προφητείες νικίστιλε μπαγιά, ισινάμ σίγουροι ότι «ο μπαρό ντιβές ι Ιεχωβάσκο ισί πασέ». (Σοφ. 1:14) Επίσης τζανάσα ο έργος σο μανγκέλα αμένταρ ο Ιεχωβά τι κεράς. Μανγκέλα αμένταρ τι βακεράς καζόμ πο μπουτ τζενένγκε αβέλα-πες ο «λατσσέ αμπέρια ι Βασιλειάκε». (Ματθ. 24:14) Βακεράσα ανταλά λατσσέ αμπέρια περίπου 240 τθεμέντε ντα πο μπουτ από χίλιε τσσιμπέντε. Να χρειαζίντιβελα τι τζανάς “ο ντιβές ντα ο σαάτι” για τι κεράς έργος αντράλ αμαρέ γκίσταρ.

ΝΑ ΤΖΑΝΑΣΑ ΣΟ ΜΠΟΡΕΙ ΤΙ ΚΕΡΕΛ Ο ΙΕΧΩΒΑ

8. Σο μανγκένα τι σικαβέν ο λάφια «οντουβά σο κερέλα ο αληθινός Ντεβέλ»; (Εκκλησιαστής 11:5)

⁸ Να τζανάσα πάντα «οντουβά σο κερέλα ο αληθινός Ντεβέλ». (Διαβάνεν Εκκλησιαστής 11:5) Ανταλά λάφια μανγκένα τι σικαβέν οντουλά σο κερέλα ο Ιεχωβά ή οντουλά σο μουκχέλα τι αβέν-πες για τι νικιόλ μπαγιά οντουβά σο μανγκέλα. Να μπορίνασα τι τζανάς ακριβώς σαρέ ο λόγοι σο μουκχέλα ο Ιεχωβά τι αβέλ-πες κάτι ή σο ακριβώς κα κερέλ για τι βοηθίνελ-αμέν. (Ψαλμ. 37:5) Η Γραφή βακερέλα ότι «οντουβά σο κερέλα ο αληθινός Ντεβέλ» μοιάζελα οντουλέσαρ σο αβέλα-πες κο περ εκχέ νταγιάκο κάνα ατσσόλα κχαμνί. Κο ντούι-ντα περιπτώσεις να αγαβάσα ντιπ ακριβώς σο αβέλα-πες. Ατζέ-ντα ο επιστήμονες να αγαβένα ντιπ λατσσές σαρ εκ μαξίμι μπαριόλα αντρέ κο περ πι νταγιάκο. Αντικάς αμέν-ντα να τζανάσα ακριβώς σαρ ο Ιεχωβά κα κερέλ κάποια πράγματα.

9. Επειδή να τζανάσα σο ακριβώς κα κερέλ ο Ιεχωβά, σαρ μπορεί τι νιωθίνας;

⁹ Κάνα να τζανάσα σαρ ακριβώς ο Ιεχωβά κα βοηθίνελ-αμέν, μπορεί τι σακιντίνασα τι λας αποφάσεις. Μπορεί τι σακιντίνασα τι μουκχάς κάποια πράγματα για τι κεράς πο μπουτ κο έργος, ή τι τζας εκχέ τθανέστε σο ισί πο μπαρί ανάγκη. Ή μπορεί τι σκεφτίνασα ότι ο Ιεχωβά νανέ ευχαριστιμέ αμέντζαρ άμα μαράσα-αμέν τι κεράς πο μπουτ κο έργος λέσκο ντα να καταφερίνασα-λεν. Ή μπορεί τι κεράσα μπουτ έργος ντα μα τι τθεράσα ατζέκ ούτε εκ μελέτη. Ή μπορεί τι μαράσα-αμέν τι κεράς εκ μπουτί σο ντινάς-αμέν η οργάνωση, αλλά τι αντιμετωπίνασα-ντα μπουτ δυσκολίες. Ιτιρί ανταλένταρ, μπορεί τι πακιάσα ότι ο Ιεχωβά να βοηθίνελα-αμέν.

10. Καλά σημαντικές ιδιότητες τθεράσα ι ευκαιρία τι μπαριαράς επειδή να τζανάσα σο ακριβώς κα κερέλ ο Ιεχωβά;

¹⁰ Επειδή να τζανάσα ακριβώς σο κα κερέλ ο Ιεχωβά, τθεράσα ι ευκαιρία τι μπαριαράς σημαντικές ιδιότητες, σαρ ισί η ταπεινότητα. Ανταβά βοηθίνελα-αμέν τι αγαβάς ότι ο Ιεχωβά πάντα τζανέλα καβά ισί ο πο λατσσό. (Ησ. 55:8, 9) Επίσης ισινάμ ντιπ σίγουροι ότι ο Ιεχωβά κα κερέλ ο πράγματα ι πο λατσσέ τροπόσαρ. Κάνα τθεράσα λατσσέ αποτελέσματα κο έργος ή σε εκ μπουτί σο ντινάς-αμέν η οργάνωση, ντάσα ι δόξα κο Ιεχωβά. (Ψαλμ. 127:1· 1 Κορ. 3:7) Άμα ο πράγματα να τζάνα αντικάς σαρ μπεκλεντίναας, χρειαζίντιβελα τι ντας-αμέν γκοντί ότι ο Ιεχωβά ντικχέλα-λεν σαρέ. (Ησ. 26:12) Αμέν κεράσα ο πο λατσσό σο μπορίνασα ντα ντάσα μπέσα ότι ο Ιεχωβά πάντα κα βοηθίνελ-αμέν. Ισινάμ σίγουροι ότι κα οδηγίνελ-αμέν, ατζέ-ντα άμα να κα κερέλ κάποιος θαύμας σαρ κερέλας μπάζιμα κο πουρανέ μπρεσά.​—Πράξ. 16:6-10.

11. Καλά σημαντικά πράγματα τζανάσα;

¹¹ Τζανάσα ότι ο Ιεχωβά μανγκέλα-αμέν, ισί δίκαιος ντα γκοντιαβέρ. Εκτιμίνελα μπουτ σο-ντα κεράσα λέσκε ντα αμαρέ πφραλένγκε ντα πφενίνγκε. Επίσης τζανάσα ότι ο Ιεχωβά πάντα ευλογίνελα οντουλέν σο ισί αφοσιωμέ λέστε.​—Εβρ. 11:6.

ΝΑ ΤΖΑΝΑΣΑ ΣΟ ΚΑ ΑΒΕΛ-ΠΕΣ ΓΙΑΒΙΝ

12. Σο σικλιάσα κατά Ιακώβου 4:13, 14;

¹² Διαβάνεν Ιακώβου 4:13, 14. Να τζανάσα σο κα αβέλ αμένγκε γιαβίν. Μπουτ πράγματα μπορεί τι αβέν-πες αμένγκε, σο να μπεκλεντίνασα-λεν ή να μπορίνασα τι ελεγχίνας-λεν. (Εκκλ. 9:11) Αντικάς, να μπορίνασα τι τζανάς άμα οντουβά σο κανονιντάμ κα αβέλ-πες ή άμα ατζέ-ντα κα αβάς τζουβντέ για τι κεράς-λες.

13. Σαρ μπορεί τι νιωθίνας επειδή να τζανάσα σαρέ ο πράγματα σο κα αβέν-πες κο μέλλον;

¹³ Μπορεί τι αβέλ αμένγκε δύσκολος τι νταϊντίνας επειδή να τζανάσα σο ακριβώς κα αβέλ-πες κο μέλλον. Σόσκε; Μπορεί τι ανησυχίνασα οντουλένγκε σο μπορεί τι αβέν-πες, ντα ανταβά μπορίνελα τι λελ αμαρί χαρά. Αμαρί ζωή μπορεί τι αλλάνελ οτθέ σο να μπεκλεντίνασα-λες. Ή μπορεί τι παθίνας κάτι μπουτ μπέτι ξαφνικά, ντα ανταβά τι ανέλ αμένγκε μπαρί στεναχώρια. Ή κάνα να τζάνα ο πράγματα αντικάς σαρ μανγκάας, μπορεί τι χασαράς αμαρί ζορ ντα τι στεναχωρίνας.​—Παρ. 13:12.

14. Σο χρειαζίντιβελα τι κεράς ντα τι τζανάς για τι αβάς μπαγιά χαρούμενοι; (Ντικχέν ο φωτογραφίες-ντα)

¹⁴ Σο-ντα τι αβέλ αμαρέ ζωγιάτε, μπορίνασα τι σικαβάς ότι υπηρετίνασα ι Ιεχωβάς επειδή μανγκάσα-λες ντα όχι από συμφέρον. Η Γραφή σικαβέλα αμένγκε ότι δεν πρέπει τι μπεκλεντίνας κατά Ιεχωβά τι αρακχαβέλ-αμέν σαρέ κατά δυσκολίες. Επίσης σικαβέλα αμένγκε ότι νανέ γραμμέ κατά Ντεβέλ οντουλά σο κα αβέν-πες αμαρέ ζωγιάτε. Ο Ιεχωβά τζανέλα ότι μπορίνασα τι αβάς χαρούμενοι ατζέ-ντα άμα να τζανάσα σαρέ οντουλά σο κα αβέν-πες αμένγκε. Οκιά μπάνταρ, κα αβάς χαρούμενοι άμα συνεχίνασα τι μανγκάς λέσταρ τι οδηγίνελ-αμέν αμαρέ ζωγιάτε ντα ντάσα-λες καν. (Ιερ. 10:23) Άμα κα μανγκάς ι βοήθεια λέσκι κάνα λάσα αποφάσεις να κα τθεράς αζόμ μπουτ άγχος οντουλένγκε σο μπορεί τι αβέν-πες. Κα μπορίνας τι βακεράς: «Άμα ο Ιεχωβά μανγκέλα, κα τζουβντιάς ντα κα κεράς ακαβά ή οκουβά».​—Ιακ. 4:15.

15. Σο τζανάσα ότι κα κερέλ ο Ιεχωβά κο μέλλον;

¹⁵ Να τζανάσα σο κα αβέλ αμένγκε κάθε ντιβές, αλλά τζανάσα ότι ο Ιεχωβά κα ντελ-αμέν ζωή για πάντα, είτε κο ουρανός είτε κι πφουβ, αντικάς σαρ βακερντάς. Τζανάσα ότι ναστί βακερέλα ψέματα ντα ότι καέκ να μπορίνελα τι τσσιναβέλ-λες για μα τι κερέλ πο υποσχέσεις τι νικιόν μπαγιά. (Τίτο 1:2) Σάντε βοβ μπορίνελα τι βακερέλ σο «κα αβέλ-πες ντα, μπουτ πο τζανγκλέ, ο πράγματα σο να αβιλέ-πες ατζέκ». Σαρέ ο πράγματα σο βακερντάας ότι κα αβένας-πες κο πουρανέ μπρεσά, νικίστιλε μπαγιά. Αντικάς-ντα σαρέ ο πράγματα-ντα σο βακερντάς ότι κα αβέν-πες κο μέλλον, κα νικιόν μπαγιά. (Ησ. 46:10) Ισινάμ σίγουροι ότι καέκ να μπορίνελα τι κερέλ ι Ιεχωβάς μα τι μανγκέλ-αμέν. (Ρωμ. 8:35-39) Κα ντελ-αμέν σοφία, ζορ ντα κα λοκχιαρέλ αμαρό γκι για τι μπορίνας τι νταϊντίνας σο-ντα τι αβέλ αμένγκε. Μπορίνασα τι αβάς σίγουροι ότι ο Ιεχωβά κα βοηθίνελ-αμέν ντα κα ευλογίνελ-αμέν.​—Ιερ. 17:7, 8.

ΝΑ ΜΠΟΡΙΝΑΣΑ ΤΙ ΑΓΑΒΑΣ ΝΤΙΠ ΚΑΖΟΜ ΛΑΤΣΣΕΣ ΤΖΑΝΕΛΑ-ΑΜΕΝ Ο ΙΕΧΩΒΑ

16. Σο τζανέλα ο Ιεχωβά αμένγκε, ντα σαρ κερέλα-αμέν τι νιωθίνας ανταβά; (Ψαλμός 139:1-6)

¹⁶ Διαβάνεν Ψαλμός 139:1-6. Αμαρό Δημιουργός τζανέλα σαρ ισινάμ κερντέ ντα ο πράγματα σο επηρεαντέ ο τρόπος σο σκεφτίνασα ντα αμαρέ συναισθήματα. Να κα τσσιναβέλ ποτές τι πφαμπόλ αμένγκε. Τζανέλα σο βακεράσα αλλά εμ σο μανγκένα τι βακερέν αμαρέ λάφια, σο κεράσα ντα σόσκε κεράσα λες. Ο βασιλιάς Δαβίδ βακερντάς ότι ο Ιεχωβά μπορίνελα ντα ισί πάντα έτοιμος τι βοηθίνελ-αμέν. Σαρ νιωθίνενα σο τζανένα ότι ο Ντεβέλ, σο ισί ο Πο Ζουρανό, Ισί Πο Οπρέ Σαριλένταρ ντα λατσσαρντάς-λεν σαρέ, πφαμπόλα αζόμ μπουτ τουμένγκε; Ο Δαβίδ βακερντάς: «Σαρέ ανταλά ναστί ερεσένα μι γκοντιάτε. Ισί αζόμ οπρέ σο να μπορίναβα τι ερεσάβ-λεν».​—Ψαλμ. 139:6.

17. Σόσκε μπορεί τι αβέλ αμένγκε δύσκολος τι πακιάς ότι ο Ιεχωβά τζανέλα-αμέν αζόμ λατσσές;

¹⁷ Ιτιρί κατά τρόπος σο μπαριλάμ, κατά κουλτούρα αμαρί ντα ιτιρί οντουλένταρ σο πακιάας πριν τι αβάς κι αλήθεια, μπορεί τι αβέλ αμένγκε δύσκολος τι ντικχάς ι Ιεχωβάς σαρ εκ λατσσό Ντατ σο πφαμπόλα αμένγκε. Ή μπορεί τι νιωθίνασα ότι ο λάθη σο κερντάμας ισί αζόμ μπέτι σο ο Ιεχωβά να κα μανγκέλας ποτές τι τζανέλ-αμέν ντα ότι ισί μπουτ ντουρ αμένταρ. Ατζέ-ντα ο Δαβίδ μπάζιμα νιωθίνελας αντικάς. (Ψαλμ. 38:18, 21) Ή μπορεί εκ τζενό σο μαρέλα-πες τι αλλάνελ πι ζωή ντα τι τζουβντιόλ αντικάς σαρ μανγκέλα ο Ιεχωβά τι σκεφτίνελ: “Άμα ο Ντεβέλ τζανέλα-μαν μπαγιά, σόσκε μπεκλεντίνελα μάνταρ τι τζαβ κόντρα μερικέ πραγματέντε παρόλο σο ισί μάνγκε δύσκολος;”

18. Σόσκε ισί λατσσό αμένγκε τι δεχτίνας ότι ο Ιεχωβά τζανέλα-αμέν πο λατσσές απ’ ότι τζανάσα αμέν αμαρό νεαυτός; (Ντικχέν ο φωτογραφίες-ντα)

¹⁸ Πρέπει τι δεχτίνας ότι ο Ιεχωβά τζανέλα-αμέν πο λατσσές απ’ ότι τζανάσα αμέν αμαρό νεαυτός ντα ότι βοβ μπορίνελα τι ντικχέλ ο λατσσό αμαρέ νεαυτόστε σο αμέν ναστί ντικχάσα-λες. Μπορίνασα τι σικλιάς τι δεχτίνας-λες ανταβά. Παρόλο σο ντικχέλα αμαρέ λάθη ντα τζανέλα σόσκε νιωθίνασα ντα συμπεριφερίντιβασα αντικάς, βοβ μανγκέλα-αμέν. (Ρωμ. 7:15) Κάνα κα αγαβάς ότι ο Ιεχωβά ντικχέλα πάντα καζόμ λατσσέ τζενέ μπορίνασα τι αβάς, ανταβά κα ντελ-αμέν ι ζορ σο χρειαζίντιβασα για τι υπηρετίνας-λες πιστά ντα χαρούμενα.

19. Καλά πράγματα τζανάσα σίγουρα ι Ιεχωβάσκε;

¹⁹ Τζανάσα ότι ο Ιεχωβά ισί αγάπη. Ισινάμ ντιπ σίγουροι ανταλέσκε. (1 Ιωάν. 4:8) Τζανάσα ότι σαρέ οντουλά σο βακερέλα αμένγκε τι κεράς ή μα τι κεράς ισί επειδή μανγκέλα-αμέν ντα πφαμπόλα μπουτ αμένγκε. Τζανάσα ότι ο Ιεχωβά μανγκέλα τι τζουβντιάς για πάντα. Ντινάς ο λύτρος για τι μπορίνελ τι αβέλ-πες ανταβά. Ο λύτρος σο ντινάς-αμέν σαρ δώρος κερέλα-αμέν σίγουρους ότι μπορίνασα τι καταφερίνας-λεν παρόλο σο ισινάμ ατελείς. (Ρωμ. 7:24, 25) Ντα τζανάσα ότι «ο Ντεβέλ ισί πο μπαρό αμαρέ γκίσταρ ντα τζανέλα σαρέ ο πράγματα». (1 Ιωάν. 3:19, 20) Ο Ιεχωβά τζανέλα τα πάντα αμένγκε ντα ισί σίγουρος ότι μπορίνασα τι κεράς οντουβά σο μανγκέλα.

20. Σο κα βοηθίνελ-αμέν μα τι ανησυχίνας αζόμ μπουτ οντουλένγκε σο να τζανάσα;

²⁰ Ο Ιεχωβά βακερέλα αμένγκε σαρέ ο πράγματα σο χρειαζίντιβασα μπαγιά τι τζανάς. Άρα να χρειαζίντιβελα τι ανησυχίνας οντουλένγκε σο να τζανάσα. Οκιά μπάνταρ, πρέπει τι ντας πο μπουτ προσοχή οντουλέντε σο ισί μπαγιά σημαντικά. Άκ’ αντικάς κα σικαβάς ότι ισινάμ ταπεινοί ντα ότι ντάσα σαρί αμαρί μπέσα κο Ιεχωβά, “Οντουλέστε σο τζανέλα-λεν σαρέ τέλειε τροπόσαρ”. (Ιώβ 36:4) Παρόλο σο να αγαβάσα μερικά πράγματα ακανά, τζανάσα ότι ο Ιεχωβά κα συνεχίνελ τι σικλιαρέλ-αμέν νεβέ πράγματα για πάντα. Ντα μπεσάσα σαρ σαρ ανταλέσκε επειδή ποτές να κα τσσιναβάς τι σικλιάς νεβέ πράγματα αμαρέ λατσσέ Ντεβλέσκε.​—Εκκλ. 3:11.