Σαρ τι Ντας-αμέν Γκοντί ο Εδάφια

Μήπως μπάζιμα ισί τουμένγκε δύσκολος τι ντεν-τουμέν γκοντί σο βακερέλα εκ εδάφιος ή κατέ ισί κι Γραφή, παρόλο σο διαβαντέν-λες μπουτ φαρ; Μπορεί τι αβέλ εκ εδάφιος σο παρηγορίνελα-τουμέν, σο βοηθίνελα-τουμέν τι νασκιαρέν ο μπέτι σκέψεις ή σο μανγκένα τι βακερέν-λες εκχέ τζενέστε. (Ψαλμ. 119:11, 111) Ντικχέν σο μπορίνελα τι βοηθίνελ-τουμέν τι ντεν-τουμέν γκοντί ο εδάφια.

• Χρησιμοποιήνεν ο JW Library^®. Κάνα διαβάνενα ι Γραφή κο JW Library ντα αρακχένα εκ εδάφιος σο μανγκένα τι ντεν-τουμέν γκοντί, τσσουβέν λέσκε εκ ετικέτα σο κα γραφίνελ «Αγαπημέ Εδάφια». Αντικάς κα μπορίνεν τι αρακχέν-λες εύκολα πο σοράν.

• Τσσουβέν ο εδάφιος εκχέ τθανέστε σο μπορίνενα τι ντικχέν-λες. Γραφίνεν σε εκ χαρτίς ο εδάφιος σο μανγκένα τι ντεν-τουμέν γκοντί, ντα τσσουβέν-λες κάπου σο κα μπορίνεν τι ντικχέν-λες μπουτ φαρ. Μερικά τζενέ τσσουβένα-λες κο ανιάς ντα γιαβερά κι πόρτα κι ψυγειόσκι. Γιαβερά τζενέ νικαβένα ο εδάφιος εκ φωτογραφία, ντα τσσουβένα-λες κι αρχική οθόνη πουμαρέ κινητόστε ή κο υπολογιστής.

• Κερέν κάρτες. Γραφίνεν κι εκ μπάντα κι καρτάκι ο βιβλίος ι Γραφιάκο, ο κεφάλαιος ντα ο εδάφιος ντα κι γιαβέρ μπάντα ο λάφια ι εδαφιόσκε. Σοράν ντικχέν σο βακερέλα κι εκ μπάντα κι καρτάκι ντα προσπαθίνεν τι ντεν-τουμέν γκοντί σο βακερέλα κι γιαβέρ μπάντα.