Koon hi o Jesus?

1. Koonestar las o Jesus peskro djipen?

Glan ko tsiro, gai o Jesus ap i phub boldo was, his job ninna i duchengro an o bollepen. Kek manush nai penell pestar kowa (Johanni 8:23). Kokeres o Jesus was dran i Dewleskri wasta gerdes. Job his o glanstunsto, hoi o Dewel gerdas. Doleske kharell lo ninna: O Dewleskro tchawo, gai was kokeres-gerdo (Johanni 1:14). Pash hallauter un hakeneste, hoi was pal leste gerdes, his job pashal un djas peskro dades ap o wast. O Jesus kharell ninna “o LAB”. Hoske? Job anas i Dewleskri laba pash i manushende. — Dikh pala an Kolossarja 1:15, 16.

2. Hoske was o Jesus ap i phub?

O Dewel bitcheras peskro tchawes ap i phub. Ha kras lo kowa? Job las o Jeseskro djipen un tchiwas les an i Maria, te well joj leskri dai. I Maria his gomme kek morsheha ketene. Jaake his o Jeseskro tchatcho dad kek manush (Luka 1:30-35). Job was ap i phub, (1) te penell lo o tchatchepen pral o Dewleste, (2) te tsikerell lo, ha te krass ninna tel pharo kooma kowa, hoi o Dewel khamella un (3) te dell lo peskro perfekt djipen, te nai ginell lo men win. — Dikh pala an Mateo 20:28.

3. Hoske hunte well men i win-gindo-lowe?

I win-gindo-lowe hunte wella plaiskemen, te nashte rikerell jek peskro djipen; te well ko lowe gar plaiskemen, well lo maredo (2. Mose 21:29, 30). I Dewles his an kek tsiro an o shero, gai well o merepen un o phurepen pral i manushende. Hoske djinah mer kowa? O Adam his o jekto morsh. Ap leste penas o Dewel, job merella, te shunell lo gar ap leskro lab. I bibla dell koi pre i lab: “doosh” (Johanni 1:29). Te lals o Adam kek doosh ap peste, hunte merals lo gar (1. Mose 2:16, 17; 5:5). An i bibla hi tardo, gai “o merepen ap i phub” was. O Adam das i doosh ap peskre tchawende dureda. Jaake hunte merell hakeno mendar. Mer haiwah: Te nai wass dran o merepen win, hunte well men o win-gindo-lowe. — Dikh pala an Remarja 5:12; 6:23.

Koon nashte plaiskerell menge o win-gindo-lowe? Koon nai lell men dran o merepen win? Te merell jek, plaiskerell leskro merepen kokeres koleskri doosh, gai meras. Mendar hi kek perfekt. Jaake plaiskerell kek nai i wawareskri doosh. — Dikh pala an Gilja 49:7-10.

4. Hoske meras o Jesus?

Ap i Jeseste his kek doosh, jaake hunte merals lo gar. Hoske meras lo balle? Leskro merepen plaiskeras i wawarengri doosh. O Dewel tsikeras peskro gamlepen, ha bitcheras lo i Jeses ap i phub, te merell lo menge. O Jesus tsikeras menge ninna peskro gamlepen: Job shunas ap peskro dadeskro lab un plaiskeras i tseli doosh mendar. — Dikh pala an Johanni 3:16; Remarja 5:18, 19.

Kate hatseh ninna o Video Hoske meras o Jesus?

5. Hoi krell o Jesus an maro tsiro?

Ha o Jesus ap i phub his, kras lo i nasslen sassto, djangeras muhlen pre un las i duka i manushendar krik. Jaake tsikeras job, hoi lo kolenge krella, gai shunenn ap o Dewleste (Mateo 15:30, 31; Johanni 5:28). Pal leskro merepen das o Dewel i Jeses o duchengro djipen papale (1. Korintarja 15:44). O Jehowah das leske i krahleskri soora pral i phub. Glan ko tsiro atchas o Jesus ap i Dewleskri tchatchi rig (Hebrearja 10:12, 13). An maro tsiro hi o Jesus o krahlo an o bollepen. Kola, gai nashenn les pala, anenn ko latcho lab ap i tseli phub. — Dikh pala an Mateo 24:14; Debleskro tsiro 11:15.

An kek rar tsiro tsikerell o Jesus peskri rajeskri soor. Balle lell lo i tseli bibacht krik, ninna kolen, gai krenn ko tchilatchepen. Hakeno, gai ap i Jeseste patsella un kowa krella, hoi job penella, nai djiwell an i paradiso ap i phub. — Dikh pala an Gilja 37:9-11.