Ha nai well tiri familja bachteles?

1. Hoske hi o romedinepen moldes, te well i familja bachteles?

I latche laba wenna i Jehowestar, o Dewlestar, gai bachteles hi. Job khamella, te wenn i familje bachteles (1. Timoteo 1:11). O romedinepen was o Dewlestar. Hunte wass mer ninna glan o them romedino? Awa. Tchatche Christe hunte krenn kowa, hoi i pralstuni an lengro them pral kowa penella, ha te was tchatches ketene tchindes. Jaake nai wenn ninna tchawe mishto bares. Kokeres te rikerah kowa dren, ham mer glan o Dewleste romedino. — Dikh pala an Luka 2:1, 4, 5.

Hoi khamell o Dewel kolendar, gai romedino hi? Job khamell, te atchenn jon dui ketene, ha jek mass. O Jehowah khamell lendar, gai ma chochenn le pen i wawareha (Hebrearja 13:4). Leskro tselo djiestar dikell o Dewel tchilatches ap kowa, te mukell jek peskro wawares (Maleachi 2:16). Pash jek situationa hi i Jehoweste kowa wawartchandes: Te chochas jek peskro wawares i wawareha, nai djal pes kowa, gai krajas tchi un nai romedinrella pale. — Dikh pala an Mateo 19:3-6, 9.

2. Hoi hunte krenn i rom un i romni penge?

An o romedinepen das o Jehowah i morsheske i wawar buhti, ha i djuwjake (1. Mose 2:18). O rom, o rai an i familja, hunte krell hallauter, te nai well i familjat kowa, hoi well lat djipaske. Peskri familjat hunte sikerell job ninna, hoi o Dewel khamella. Peskri romjake hunte dell job peskro tselo gamlepen. Hake dui hunte gamenn pen, ninna hunte dikenn jon pal pende. Kek mendar hi perfekt, doleske hunte bisterenn hake dui o djiestar. — Dikh pala an Efesarja 4:31, 32; 5:22-25, 33; 1. Petro 3:7.

3. Hoi te kress, te hal tu gar bachteles romedino?

Te dell tchingepen mashkral dujende, hunte dikenn hake dui, te wenn le an gamlepen pale ketene (1. Korintarja 13:4, 5). An o Dewleskro lab hi tchindes, te ma mukenn le pen. Te djal pes jek, nai wenna kek probleme krik lines. — Dikh pala an 1. Korintarja 7:10-13.

4. Hoi khamell o Dewel i tchawenge?

O Jehowah khamell, gai wenn i tchawe bachteles. Lenge penell job, hoi an lengre tarne bersha lenge mishto hi. O Dewel khamell len kowa te dell, hoi o fedesta an o djipen hi. Doleske hunte shunenn le ap pengro dadeste, ninna ap pengri date. Jon hi phureda, jaake djinenn jon ninna budeda (Kolossarja 3:20). O Jehowah khamell ninna, gai haiwenn i tchawe, ha latches kowa hi, te krenn le leske un leskro tchaweske latcho kooma. — Dikh pala an Mateo 21:15, 16; Efesarja 6:1-3.

5. Hoi hunte well i tchawen, te nai wenn le bachteles?

Hallauter, hoi i tchawen hunte wella djipaske – chabpen, pipen, ripaske – hunte denn tumer tumare tchawen. Ninna hunte haiwenn i tchawe, gai hin le pash tumende khere (1. Timoteo 5:8). Tumer te sikerenn tumare tchawen, te gamenn le i Dewles, ninna te haiwenn le, koon job hi, wenn le tchatchepaha bachteles (Marko 12:29-31). Dikenn i tchawe, gai gamenn tumer i Dewles, nai well o gamlepen ap o Dewleste an lengre djija bares. Te penenn tumer ap tumare tchawende kowa, hoi an o Dewleskro lab tchindo hi, nai well kowa mishto an lengro djipen. — Dikh pala an Efesarja 6:4; 2. Timoteo 3:14, 15.

Te krenn i tchawe tchimoni latches, penenn lenge kowa. Ko hi lenge mishto! Lenge hunte well ninna tsikedo, hoi djala un hoi gar djala. Jaake rikerenn tumer len glan i jakka, gai kooma della, hoi nai lell lenge lengri bacht krik (Hebrearja 12:6, 7). Ma bisterenn kote pashal: Ma awenn midjak ap i tchawende! — Dikh pala an Kolossarja 3:21.

I Jehoweske Rakepangre denna bud libre wri. Kote wajan ninna libre tchindes, te haiwenn i dada un i daja, ha te tsardenn le i tchawenge mishto bares. Hallauter, hoi an kola libre tardo hi, wella dran i bibla. — Dikh pala an Gilja 19:7, 8, 11, 12.