Lell hako patsepen i latcho lab o Dewlestar?

1. Hi hako patsepen mishto?

An hako patsepen denna sawe, gai khamenn, te dikell o Dewel latches ap lende. O latcho lab hi: O Dewel dikell un brindjerell lengro dji! Bud tchilatchepen wajas dran patslende gerdes (2. Korintarja 4:3, 4; 11:13-15). Gadje penan, gai hi ko jek un ko wawar patsepen pash terroristiko kooma pashal, pash i manushengro marepen un an o khurepen. I gadjendar was ninna pendo, gai dell kowa an ko jek un ko wawar patsepen, gai taperenn le ap tikne tchawende. Kowa hallauter dukell kolen an o dji, gai khamenn, te dikell o Dewel latches ap lende. — Dikh pala an Mateo 24:3-5, 11, 12.

Te anell i chocheno patsepen ladj ap i Dewleste, hunte anell i tchatcho patsepen o sharepen ap leste. I tchatcho patsepen sikerella kokeres ko kooma, hoi tchatchepaha an i bibla tardo hi – kooma ha: Koon hi o Dewel tchatchepaha? Gai hi mare muhle tchatchepaha? Jaake haiwah mer: O Jehowah khamella, gai brindjerell hakeno o tchatchepen. — Dikh pala an Remarja 6:23; 1. Timoteo 2:3-5.

2. Lell hako patsepen i latcho lab o Dewlestar?

O Dewel mukell pes kekestar dineles te rikerell. Kek patsepen, gai o bengeskro swetto gamella, nai penell pestar, gai sharell lo o Dewles (Jakobo 4:4). I bibla dell hako chocheno patsepen i lab: “Koi bari Babilon”. Pal ko tsiro, gai o bollepaskreskro pani wajas, ha o Noah djiwas, was o chocheno patsepen pale an ko foro Babilon pre. An i tikno tsiro lell o Dewel hako chocheno patsepen krik, gai chochella un i manushen dukrella. — Dikh pala an Debleskro tsiro 17:1, 2, 5, 16, 17; 18:8.

An hako chocheno patsepen denna sawe, gai khamenn, te dikell o Dewel latches ap lende. Lenge dell ninna i latcho lab: O Jehowah bisteras len gar! Job khamell len hallauteren ketene te anell, te sikerell lo len o tchatchepen. — Dikh pala an Johanni 6:45.

3. Hoi krenn kola, gai khamenna, te dikell o Dewel latches ap lende?

O Jehowah gamell sawe, gai o tchatchepen un o latchepen gamenna. Job mangell len, te mukenn jon o chocheno patsepen. Kola, gai i Dewles tchatchepaha gamenna, krenn kowa, te nai dikell o Dewel dureda latches ap lende. — Dikh pala an Debleskro tsiro 18:4.

Ha i bitchepangre pal o Jeseskro merepen o latcho lab kolenge anan, gai khaman, te dikell o Dewel latches ap lende, wajan jon o djiestar bachteles. Lenge was an lengro djipen i newo drom, i bachtleda drom i Jehowestar sikedo. Jon lan i patsepen, hoi lenge penella, hoske jon djiwann. Ha jon kowa haiwan, djiwan le kokeres i Dewleste. Jaake, ha jon kowa krajan, hunte well o Jehowah an maro djipen ninna o glanstuno. — Dikh pala an 1. Tessalonikarja 1:8, 9; 2:13.

Te dell jek i chocheno patsepen pre, lell o Jehowah les pash peste an peskri patsli familja pre. Tu te shuneh ap koi gole, hoi o Jehowah tut della, nai weh tu i maal lestar. Tu nai leh lestar i djipen hake tsireske un i newi familja. Hawi familja? Patsle, gai ninna maala i Jehowestar hi. — Dikh pala an Marko 10:29, 30; 2. Korintarja 6:17, 18.

4. Ha anell o Dewel bacht an hako them?

Ko diwes, gai well i Dewlestar i bari phagi pral hako chocheno patsepen wri rakedo, hi i latcho lab. Hoske? Jaake well hallauter krik lino, hoi men bibachteles krella. An kek tsiro buda anell i chocheno patsepen jekes ap i wawar dromeste. O tchatcho patsepen rikerell i tsele manushen ketene. Balle mangell hakeno ap o tchatcho Dewleste. — Dikh pala an Debleskro tsiro 18:20, 21; 21:3, 4.